Kategorie: Nuus

NGV sal nie amptenare in al-Basjir-saak vervolg nie

Die Nasionale Vervolgingsgesag het verklaar dat hulle sal wag vir die regering se verdere appélproses oor die al-Basjir kwessie.

Die NGV gaan dus nie dadelik met strafregtelike vervolging begin nie, het Luvuyo Mfaku gesê.

Die Vervolgingsgesag sê daar kan eers ná die proses besluit word of staatsamptenare wat gehelp het om die Soedannese president, Omar al-Bashir uit Suid-Afrika te kry, stafrefregtelik vervolg sal word.

Die Hooggeregshof in Pretoria het in Junie bevind dat die regering nie ‘n hofbevel nagekom het om te keer dat al-Basjir die land verlaat nie.

Dieselfde hof het Woensdag die staat se aansoek vir verlof tot appèl geweier.

Die ANC het ‘n beroep op die regering gedoen om ‘n petisie tot die Appèlhof te rig. Hulle het 20 dae om te besluit.

Die departement van Justisie het by monde van ‘n woordvoerder gesê hulle is teleurgesteld en hulle sal verdere stappe oorweeg.

Die regering het tot volgende maand om aan die Internasionale Strafhof te verduidelik waarom die Soedannese president nie in hegtenis geneem is nie.

Thailand blameer Moslemgroep vir Bangkok-bom

Die hoof van Thailand se polisie het Woensdag verklaar dat die Bangkok-bomontploffing met China se Oeigoer-minderheid verbind word.

Die bomontploffing op 17 Augustus het die lewe geëis van 20 mense, van wie die meeste etniese Chinese was.

Dit het die vermoede laat ontstaan dat militante of ondersteuners van die oeigoere, ‘n etniese groep wat aanvoer dat hulle in China vervolg word, vir die ontploffing verantwoordelik was.

‘n Maand tevore het Thailand meer as 100 Oeigoer-vlugtelinge na China gedeporteer, wat internasionale kritiek uitgelok het en tot gewelddadige protes in Turkye gelei het.

Moslems in Turkye beskou die Oeigoer-minderheid as deel van die globale Turkssprekende familie.

Die Han Chinese beset tans die invloedryke posisies in China se Xinjiangprovinsie waar die meeste Oeigoere woon.

Aktiviste sê hul kommersiële en kulturele aktiwiteite word geleidelik ingeperk deur die Chinese staat.

Daar is klagtes van ernstige beperkings op Islam, met minder moskees en streng beheer oor godsdienstige skole.

Oproeriges versper hospitaal in Limpopo

Oproerige inwoners van Makhuvha naby Thohoyandou in Limpopo het Woensdagaand amok gemaak by ‘n hospitaal.

Die beswaardes het die ingang na die Matatshe Donald Frazer hospitaal met klippe en brandende bande versper.

Hulle eis dat verdagtes wat in hegtenis geneem is in verband met twee moorde in Mei vanjaar vrygelaat word.

Die verdagtes was na bewering deel van ‘n groep inwoners wat twee vermeende misdadigers vermoor het.

Die polisie is in die gebied ontplooi en monitor tans die situasie.

Polisiebeampte wat glo dossiere steel vas

‘n Bloemfonteinse polisiebeampte, wat na bewering dossiere uit die plaaslike landdroshof gesteel het, sal op 28 September weer in die hof verskyn.

Polisiewoordvoerder, Chaka Marope, sê die 43-jarige Patricia Pitt van die Parkweg-polisiekantoor en ‘n plaaslike sakeman, Thulani Qhiti, is Maandag in hegtenis geneem kort nadat Pitt glo onder valse voorwendsels vyf dossiere geneem het.

Sy het haarself na bewering voorgedoen as ‘n lid van die eenheid teen gesinsgeweld en seksuele misdrywe en vir kinderbeskerming (GKS), wat die betrokke dossiere ondersoek.

Marope het bevestig Qhiti word in een van die gesteelde dossiere weens beweerde verkragting ondersoek.

Pitt is op borgtog van R3 000 uitgelaat, terwyl Qhiti se borgtogaansoek nie toegestaan is nie.

Albei die beskuldiges staan tereg op aanklagte van diefstal en dwarsboming van die gereg.

Qhiti staar ook ‘n aanklag van verkragting in die gesig.

Polisiebeampte kry borg na gewapende roof in uniform

‘n Polisiebeampte van Theunissen wat die naweek by sy huis in hegtenis geneem is in verband met ‘n gewapende rooftog verlede maand, is uit op borg.

Die swart beampte is Woensdag in die plaaslike landdroshof op borgtog van R5000 uitgelaat.

Vrystaatse polisiewoordvoerder, Ian Gaobepe, sê die 28-jarige Diphaphang Mokoena, wat verbonde is aan die polisie se gemeenskapsdienssentrum, staan tereg op aanklagte van poging tot moord, gewapende roof en ontvoering.

Hy het glo op 13 Augustus omstreeks 19:00 ‘n plaaslike winkel beroof en ‘n Ethiopiese winkeleienaar met sy amptelike vuurwapen aangehou, ontvoer en aangerand.

Gaobepe sê Mokoena was in sy uniform geklee tydens die rooftog waarna hy die winkeleienaar agter in ‘n polisiebakkie gegooi het. Mokoena het toe die erg beseerde man vir dood by Meloding in Virginia gelaat.

Hy het hom glo erg aangerand met sy vuurwapen. Geld, sigarette en selfoonlugtyd alles ter waarde van R5 000 is gesteel.

Mokoena verskyn weer op 30 September in die hof.

Jong Mandela daag nie op vir sy verkragtingsaak nie

Verwarring het Woensdag by die Johannesburgse landdroshof geheers, waar ‘n kleinseun van die voormalige president Nelson Mandela, beskuldig word van verkragting van ‘n minderjarige.

‘n Amptenaar het gesê Mandela is nie meer geskeduleer om te verskyn nie, en sy saak het verskuif na ‘n later datum.

Melvin Neale, wat deel is van die jong Mandela se regspan, het bevestig dat die saak nie in die hof aangehoor sal word soos voorheen nie.

“Ek kan nie die redes gee nie. Dit sal aan die lig kom in die hof op 6 November,” het hy gesê, en geweier om enige verdere inligting bekend te maak.

Die 24-jarige swart pa van drie, wat ‘n treffende ooreenkoms met sy oorlede oupa toon, is verlede maand op R7 000 borgtog uitgelaat nadat hy ‘n week in die tronk deurgebring het.

Tydens sy aansoek om borgtog, het hy versoek dat hy “nie beskou word as ‘n Mandela nie, maar as ‘n normale burger van die land”.

Die staat beweer dat die jong man die tienermeisie van 15 op 7 Augustus verkrag het.

Die slagoffer se woedende pa het vroeër gesê hy hoop die naam “Mandela” beteken nie dat die dader lig daarvan sal afkom nie.

Die pa beweer dat Winnie Madikizela-Mandela, die vermeende dader se stiefouma, haar lyfwagte gestuur het om die gesin te gaan intimideer nadat hulle die klag teen die jong Mandela gelê het.

Die lyfwagte het voorgee om polisiebeamptes te wees. ‘n Familielid van die slagoffer het bevestig dat die Mandelas probeer om druk op die slagoffer se ma te plaas om die saak terug te trek.

In Desember verlede jaar, was Mbuso betrokke in ‘n motorongeluk met een van aartsbiskop Desmond Tutu se kleinkinders in die vroeë oggendure na ‘n partytjie. Mbuso se Polo is afgeskryf maar die ongeluk is nie by die polisie aangemeld nie.

Mbuso het voorheen ‘n verhouding met Anais Grimaud, ‘n Franse kleurling van Reunion en die voormalige vrou van sy oudste broer, Mandla gehad.

Mandla het Anais se seun aan Nelson Mandela voorgehou as sy eie, maar na vaderskapstoetse is bevind dat die kind ‘n ander pa het. Sy het toe teruggekeer na die Franse Indiese Oseaan-eiland met haar baba.

EU ontken blaam vir vlugteling-krisis

Die krisis van massa-migrasie van vlugtelinge uit Afrika is nie veroorsaak deur die Europese lande nie, maar deur outokratiese leiers, het ‘n Europese amptenaar Dinsdag gesê.

Roeland van de Geer, die ambassadeur van die Europese Unie na Suid-Afrika, het gesê die oorsaak van die krisis in Noord-Afrika “lê vierkantig by sy eie leiers”.

Ná ‘n vergadering tussen President Jacob Zuma en die diplomatieke korps, het hy aan verslaggewers gesê hy geglo dat die gebrek aan demokratiese waardes die dryfkrag agter die mirgrasie-stroom is.

“So het ons plaas die verantwoordelikheid vir wat gebeur in die lande van die Magreb duidelik in die hande van die leiers wat diktators was en het nie demokrasie respekteer nie,” het Van der Geer verklaar.

Vroeër Dinsdag, het President Jacob Zuma Europese lande vir die Libiese vlugtelingkrisis blameer.

Zuma sê die Europese lande, wat ‘n rol in die ondergang van die Libiese president Gaddafi en die gevolglike onstabiliteit in Libië gespeel het, dra die volle verantwoordelikheid vir die humanitêre en vlugtelingkrisis.

Hy sê die moondhede wat lande gedestabiliseer het en hul burgers laat vlug het, moet nou verantwoordelikheid vir hul dade aanvaar.

Zuma is het diplomate toegespreek oor Suid-Afrika se internasionale sienings voor die VN se Algemene Vergadering later hierdie maand vergader.

Hy het bygevoeg dat die Verenigde Nasies hervorm moet word om al die kontinente te verteenwoordig en om die uitdagings van ‘n moderne wêreld die hoof te bied.

Australië voer lugaanvalle uit op Sirië

Die Amerikaanse weermag sê Australiese gevegsvliegtuie het hulle eerste lugaanvalle op vestings van die Islamitiese Staat-groep in Sirië uitgevoer, het RSG berig.

Australië het verlede week aangedui dat hy sy betrokkenheid by die Amerikaans-geleide optrede teen die jihadistegroep gaan uitbrei.

Vroeër het die Britse eerste minister, David Cameron gesê ‘n sterk saak kan uitgemaak word ten gunste van militêre optrede teen die militante in Sirië, maar dat hy konsensus daaroor sou wou bereik in die parlement.

Dié aankondiging volg nadat Australië pas van sy premier Tony Abbott, ontslae geraak het in ‘n interne partystryd.

Abbott het die leierskapstryd met 54 stemme teenoor 44 verloor. Hy word vervang deur die voormalige leier van die Liberale Party en minister van kommunikasie, Malcolm Turnbull.

Turnbull het dié week die uitdaging aan Abbott gerig midde die al swakker vertoning van die twee jaar oue konserwatiewe koalisie regering.

Die verandering in leierskap is deel van ’n buitengewone onstabiele tydperk in Australiese politiek. Turnbull word Australië se vierde eerste minister in net meer as twee jaar.

Petrolbomaanval op langafstandbus in Strand eis twee

Die waarnemende burgemeester van Kaapstad, Brett Heron het die aanval op ‘n Intercape-bus in die Strand waarin twee mense dood is, veroordeel.

Herron het beroep op inwoners gedoen om na vore te kom met inligting.

Die motief vir die aanval op Onverwachtstraat, net langs die N2-snelweg, is nog nie duidelik nie.

“Op hierdie stadium is die rede agter hierdie gevoellose daad nog onbekend,” het Heron in ‘n verklaring gesê.

Twee mans is dood en 34 ander mense is beseer toe die bus Dinsdagaand met ‘n petrolbom gegooi is.

ER24 woordvoerder Werner Vermaak het gesê vier mense het ernstige beserings opgedoen en die res is vir rookinaseming behandel asook brandwonde.

Die Wes-Kaapse departement van Gemeenskapsveiligheid het die polisie gevra om die aanvallers van die dubbeldekkerbus in Lwandle, so vinnig moontlik vas te trek.

Drie petrolbomme is glo na bus van die langafstand-passasiersdiens Intercape gegooi.

In dié stadium meen amptenare dat die aanval nie verband hou met ‘n protes-aksie nie, aangesien daar nie berigte van onrus in die gebied was nie.

Die provinsiale minister van Gemeenskapsveiligheid, Dan Plato het sy skok oor die voorval uitgespreek en gesê dringende optrede is nodig om die skuldiges op te spoor.

Die Wes-Kaapse polisie ondersoek intussen ‘n saak van moord en poging tot moord na die aanval.

Keniane maak jag op albino’s

Keniane is dié week betrap waar hulle probeer het om liggaamsdele van ’n man met albinisme af te kap om dit vir moetie te verkoop.

Dit het vrees vir oorgrens-aanvalle uit naburige Tanzanië laat ontstaan, het AFP berig.

“Drie mense het my huis bestorm en geld geëis,” het die 56-jarige Enock Jamenya van die Vihiga-distrik aan die Daily Nation gesê. “Toe ek hulle meedeel dat ek nie geld het nie, het hulle vir ’n oor of ’n hand gevra wat hulle in Tanzanië wou gaan verkoop.”

Die aanvallers het sy oor, arm, nek en vingers begin afsny, maar het op die vlug geslaan toe hulle vermoedelik gesteur is. Jamenya is gewond en bewusteloos agtergelaat.

In naburige Tanzanië word sommige politici daarvan beskuldig dat hulle albino-liggaamsdele vir heksery en gelukbringers koop.

Menseregtegroepe het gewaarsku oor die gevaar van meer aanvalle op albino’s in Tanzanië terwyl veldtogvoering onderneem word vir die presidents- en algemene verkiesing wat op 25 Oktober plaasvind.

Die Keniaanse wetgewer Isaac Mwaura, wat ook albinisme het, het herhaaldelik gewaarsku dat bendes aanvalle in Kenia uitvoer vir handel in Tanzanië. Minstens 76 albino’s in Tanzanië is sedert 2000 vermoor en hul liggaamsdele teen ongeveer US$600 stuk verkoop.

’n Hele liggaam kan volgens deskundiges van die Verenigde Nasies vir soveel as US$75 000 verkoop word.