Kategorie: Nuus

Grondwethof beslis dat Zuma moet opdok vir Nkandla

President Jacob Zuma het tot middel Julie tyd om ‘n gedeelte van die geld wat op sy privaatwoning Nkandla in KwaZulu-Natal verkwis is, terug te betaal.

Die hoofregter van die Grondwethof, Mogoeng Mogoeng het Donderdag in sy uitspraak beslis dat die president strydig met die grondwet opgetree het deur nie aan die Openbare Beskermer gehoor te gee nie.

Die OB, Thuli Madonsela se aanbevelings oor Nkandla is as bindend, ingevolge die uitspraak en ‘n spertyd van 105 dae is gestel vir die terugbetaling.

Die Tesourie het 60 dae tyd om te bepaal hoeveel geld die president moet terugbetaal. Zuma het ná die Tesourie se spertyd, 45 dae tyd om dié bedrag te vereffen.

Madonsela het Donderdag gesê die aanvanklike geraamde koste was sowat tien miljoen rand, maar dit sal waarskynlik nie die finale bedrag wees nie.

Die voormalige tesourier-generaal van die ANC, Matthews Phosa het intussen ‘n beroep op Zuma gedoen om te bedank.

Hy het aan sakeleiers in Phalaborwa, die ANC gevra om beslissende stappe teen die president te neem. Phosa sê Suid-Afrika het nuwe en onselfsugtige leierskap nodig.

‘n Voormalige regter van die Grondwethof, Albie Sachs sê hy hoop president Jacob Zuma, die Parlement en die ANC sal die uitspraak oor Nkandla en die magte van die Openbare Beskermer eerbiedig.

Hy sê hy is bly die Grondwet het geseëvier. Sachs was die hoofspreker by die 350ste herdenking van die Kasteel van Goeie Hoop in Kaapstad.

Die organisasie, Corruption Watch, sê die kantoor van die Openbare Beskermer kan nou beskryf word as ‘n ware kampvegter en kampioen teen korrupsie.

‘n Woordvoerder van Corruption Watch, David Lewis het gesê dit is ‘n “blye dag vir Suid-Afrika se grondwetlike demokrasie, want dit toon daar is instellings wat die demokrasie kan beskerm”.

Leeu wat man aanval in Nairobi geskiet

’n Man is die week in die buitewyke van Kenia se hoofstad, Nairobi deur ’n leeu aangeval en beseer waarna natuurbewaarders die leeu van kant gemaak het.

Dit is die vierde keer vanjaar dat leeus buite die Amboseli Nasionale Park in Kaijado rondloop en die tweede keer in twee weke dat iemand deur ’n leeu aangeval en beseer word.

Die donkermaanhaar-leeumannetjie is in ’n beboude gebied in die suide van die hoofstad doodgeskiet, het AFP berig.

’n Woordvoerder van Kenia se afdeling vir natuurbewaring, Paul Udoto, sê die beseerde man is na ’n nabygeleë hospitaal geneem.

In vorige voorvalle vanjaar is die leeus óf teruggejaag na die 117 vierkante kilometer natuurreservaat óf het die diere self na die park teruggekeer.

Die reservaat is byna heeltemal omring deur die vinnig groeiende stad met meer as drie miljoen mense.
Die park is nie heeltemal omhein nie ten einde ruimte te laat vir die tradisionele migrasie van diere op soek na weiding.

Die groot katte is onder toenemende druk van een van Afrika se vinnigste groeiende stede wat inbreuk maak op eeue ou migrasieroetes en jagvelde.

SANParke in Suid-Afrika het intussen gesê die rondloperleeu, Sylvester, sal slegs van kant gemaak word as laaste uitweg.

Die bewaringsowerheid het gister planne aangekondig om Sylvester uit te sit wanneer hy weer gevang is, maar dit het tot ‘n hewige reaksie in die sosiale media gelei.

Die leeumannetjie het Maandag vir die tweede keer uit die Karoo Nasionale Park naby Beaufort-Wes ontsnap. Hy is nog nie weer gevang nie.

‘n Woordvoerder van SANParke, Wanda Mkutshulwa, sê daar is verskeie opsies beskikbaar waarvan een is om die leeu na die wildtuin terug te neem.

Hulle kan dit ook oorweeg om die leeu na een van hulle ander nasionale parke te verskuif. n Derde opsie is om Sylvester aan ‘n ander staats- of nie-staatsinstansie te skenk.

Klopjag teen terroriste in Rotterdam lewer niks op

Niemand is in ’n vroeg­oggend klopjag in Rotterdam aangekeer nadat ’n gebou deur lede van die Nederlandse spesiale polisie deursoek is nie.

Die aanklaerskantoor het op Twitter gesê geen wapens of plofstof is gevind nie, het AFP berig.

Die klopjag volg nadat ’n 32-jarige Franse man láát Sondag in die westelike distrik van Rotterdam saam met drie ander mense aangekeer is nadat ’n wenk van die Franse owerhede ontvang is.

Die Nederlandse nuusagentskap ANP sê mense is gevra om naburige huise in die Kralingen-distrik te ontruim en ’n span om bomme onskadelik te stel, was in die omgewing, sou hul dienste benodig word.

Die Fransman, wat net as Anis B. geïdentifiseer is, het Dinsdag in ’n hof in Amsterdam verskyn en staan ’n versoek teen om aan Frankryk uitgelewer te word.

Die ander drie wat Sondagnag aangekeer is, is van Algerynse oorsprong.

Anis B. word in Frank­ryk gesoek vir “betrokkenheid in ’n kriminele organisasie met bande aan terroriste-ondernemings” het die aanklaerskantoor gesê.

Swaar gewapende polisie het Sondag ook beslag op ’n groot hoeveelheid ammunisie, SIM-kaarte, rekenaar-hardeskywe, kontant en dwelms gelê.

Nederland se howe het 90 dae om te besluit of die Fransman aan Frankryk uitgelewer sal word.

Die Nederlandse minister van justisie, Ard van der Steur, het die parlement Dinsdag egter meegedeel dat hy verwag dat Anis B. “binnekort aan Frankryk uitgelewer sal word.”

Hillary moet binne dae voor FBI verskyn

Die Demokratiese voorloper, Hillary Clinton, het Trump met mening aangeval omdat sy tans onder groot druk verkeer.

Sy moet binne enkele dae voor die FBI verskyn wat sal besluit of sy krimineel aangekla sal word vir vertroulike eposse wat sy rondgestuur het.

Clinton wou kennelik die publiek se aandag aflei van die FBI-ondersoek na haar eposse.

Sy het uitgevaar teen Donald Trump omdat hy “gewelddadige en aggressiewe gedrag aangehits” nadat Trump se veldtogbestuurder ‘n joernalis wou keer wat te naby aan die voorverkiesingskandidaat wou kom.

Clinton het in La Crosse, Wisconsin myle uit die Demokrate se poging probeer haal om Trump se veldtogbestuurder, Corey Lewandowski, swart te smeer.

Trump se veldtogbestuur het intussen die beeldmateriaal vrygestel wat toon dat die verslaggeefster probeer om Trump aan te raak met een of ander instrument, terwyl sy veiligheidspan dit probeer keer.

Boonop is die Florida-aanklaer wat die klagte teen Lewandowski aanhangig gemaak het, deel van Clinton se veldtog.

In ‘n artikel gepubliseer deur die Palm Beach Post op 17 November 2015, wat sedert Dinsdagaand weer sirkuleer, word Palm Beach County se aanklaer, Dave Aronberg as ‘n lid van Florida se Demokratiese leiersraad gelys.

Die raad is gestig is deur die Demokratiese Party om die presidensiële kandidatuur van Hillary Clinton te bevorder.

Die artikel stel dit duidelik dat Aronberg “deel is van die Clinton-span in Florida”.

Hillary Clinton gaan voor Direkteur Comey en die FBI moet verskyn binne ‘n kwessie van dae. Die uitkoms van die onderhoud kon uiteindelik die hele wedloop vir die Withuis bepaal.

Clinton het nie kommentaar gelewer op joernalis se vreemde gedrag nie, maar het verklaar dat die verslaggewer wat die klagte ingedien het, Michelle Fields, “krediet verdien vir die wyse waarop sy opgevolg het nadat sy fisies mishandel is.”

Staat loods ‘politieke appèl’ teen Walus se vrylating

Die staat het gister teen regter Nicolene Janse van Nieuwenhuizen se uitspraak dat Janusz Walus vrygelaat moet word, geappelleer. Volgens die grondwet- en regskenner professor Marinus Wiechers verteenwoordig dit egter ‘n desperate poging van die staat om sy vrylating te keer.

“Terwyl die appèlsaak na die een of die ander kant toe beslis kan word, is ek versigtig oor wat die staat met so ‘n stap kan bereik.

“Die paroolraad het ‘n aanbeveling (dat Walus vrygelaat moet word) gemaak, dit het hof toe gegaan en ‘n besluit is geneem. Ons moet op die hof se besluit vertrou en die staat moet die hof se besluit gehoorsaam.”

Wiechers het verder gesê dat die appèl ‘n “meer politieke aangeleentheid” is, om te toon dat Hani nie heeltemal vergete is en om die ideologie van die SAKP se “stryd” lewendig te hou.

Volgens hom kan die staat slegs op twee gronde appelleer.

“Een is dat die regter die wet gewaninterpreteer het, maar in dié geval sou dit vergesog wees om so iets aan te voer. Die ander argument is dat die regter nie al die feite in ag geneem het nie.

“Ek kan gewoon nie insien hoe die Appèlhof kragtens die reg anders kan bevind en meen dat die regter die feite gewaninterpreteer het nie, veral omdat dit lyk asof sy baie indringend daarna gekyk het.”

Tot tyd en wyl die appèlsaak afgehandel word, mag die staat Walus egter steeds in die gevangenis aanhou.

Sowel die ANC as die Kommunisteparty het die appèl verwelkom.

 

Twee swartes probeer motor by Glenanda-winkelsentrum kaap

Twee swart mans in ‘n silwer Audi het gister gepoog om ‘n motor by die Glenanda-winkelsentrum in die suide van Johannesburg te kaap. Die bestuurder is met vuurwapens oor die kop geslaan, asook van sy horlosie beroof.

Volgens die Glenvista-GPF (gemeenskapspolisieforum) het bouers op die boonste vlak van die sentrum die gebeure raakgesien en begin om die kapers met bakstene te gooi. Hierna het die verdagtes van die toneel af gevlug, sonder om die motor te kaap.

Gebruikers op Facebook het hul teleurstelling uitgespreek dat die kapers nie met die bakstene raakgegooi is nie, maar tog die bouers gelukgewens dat hulle die kaping gefnuik het.

Egiptiese kaper saam met Brit afgeneem

Die kaper van die vliegtuig van die Egiptiese lug­redery, Seif Eddin Mustafa, het met ‘n oorwinningsteken die Cipriese hof in ‘n polisievoertuig verlaat.

‘n Britse man, Ben Innes, het homself saam met die kaper laat afneem tydens die drama.

“Slegs Ben kon ‘n Selfie kry! #proud,” het ‘n familielid Sarah Innes later getwiet nadat hy die foto uitgestuur het waarin hy breed glimlag. Haar rekening is nie lank daarna nie deur Twitter verwyder.

Die kaper bly in aanhouding in Larnaca terwyl klagtes wat kaping, onwettige besit van plofstof en ontvoering, teen hom ondersoek word.

Mustafa, wat as “sielkundig onstabiel” beskryf word, het Dinsdag ’n vliegtuig onderweg van Aleksandrië na Kaïro gekaap en gedreig om die vliegtuig op te blaas.

Die “plofstof” wat hy by hom gehad het, was nie eg nie en al die passasiers is na ses ure ongeskonde vrygelaat.

Grondwethof besluit vandag oor Nkandla

Die Grondwethof gaan vandag uitspraak lewer daaroor of Zuma ten minste ‘n gedeelte van die R246 miljoen wat Nkandla gekos het, uit sy eie sak moet betaal. Dit volg op ‘n aansoek voor dié hof wat meer as ‘n maand gelede deur die EFF en die DA gebring is.

Die uitspraak sal verskeie aspekte van die saak moet hanteer. Ten eerste is daar ‘n brief aan die hof wat Zuma in Februarie geskryf het en waarin hy versoek dat die hof die minister van finansies en die ouditeur-generaal gelas om te bepaal hoeveel van die “nie-veiligheidsbesteding” aan sy woning hy aan die staat behoort terug te betaal. Tot onlangs het Zuma volgehou dat die totale bedrag van R246 miljoen uit “veiligheidsbesteding” bestaan.

‘n Tweede aspek waaroor die hof se uitspraak behoort te handel, is die magte van die openbare beskermer, Thuli Madonsela. In haar verslag in Maart 2014 het sy bepaalde voorstelle gemaam waardeur Zuma hom in die reine kan bring. Zuma en die ANC se houding was egter dat die openbare beskermer se bevindings bloot ‘n “mening” verteenwoordig en daarom nie bindend is nie. Die hof sal vandag uitsluitsel daaroor moet gee deur te bevind of sodanige aanbevelings enige regskrag het en dalk bindend op Zuma mag wees.

Die partye het van die land se hoogs betaalde senior advokate in die saak aangestel. Jeremy Gauntlett het vir Zuma verskyn en Wim Trengove vir die EFF. Onder andere het Trengove aangevoer dat die nasionale vergadering sy grondwetlike pligte versuim het deur nie die president en die kabinet verantwoordelik te hou nie.

Gauntlett het op sy beurt geredeneer dat dit “gevaarlik” sou wees om teen Zuma te bevind, aangesien so ‘n bevinding dit vir opposisiepartye moontlik sou maak om hom in ‘n staat van beskuldiging te plaas. Hy het die departement van openbare werke vir die bouwerk aan Nkandla geblameer en gesê dat die verslag deur die minister van polisie, Nathi Hhleko, “niks beteken nie”. In sy verslag het Nhleko bevind dat al die uitgawes by Nkandla “veiligheidsverwant” was en dat Zuma daarom niks hoef terug te betaal nie.

 

Katlehong gespanne na jongste xenofobiese geweld

Die situasie in Katlehong aan die Oosrand is gespanne nadat geweld Dinsdagnag uitgebreek het in die jongste vlaag xenofobiese aanvalle.

Winkels, wat aan buitelandsers behoort, is geplunder en in puin gelê.

Een plunderaar is in die geweld doodgeskiet toe die buitelanders glo hul eiendom wou beskerm.

Die polisie het bevestig dat vier buitelanders – wat tussen 20 en 27 jaar oud is – in verband met die skietery in hegtenis geneem is.

‘n Saak van moord en twee van poging tot moord word ondersoek.

Die oorsaak van die onlangse geweld is in die stadium nog onbekend.

Volgens berigte het dit tydens ‘n gemeenskapsvergadering in die Mandela-plakkerskamp begin.

‘n Katlehong-tiener is verlede Saterdag glo deur ‘n dwaalkoeël getref.

Bongani Msimango is in sy geslagsdele geskiet na die moord op nog ‘n plaaslike swarte wat na bewering deur ‘n Somaliese winkeleienaar doodgeskiet is.

Daar word beweer dat die swarte vroeër ‘n ou hoender gekoop het en dit teruggeneem het na die winkel toe ‘n bakleiery uitgebreek het tussen hom en winkeliers.

Oud-ANC-raadslid verskyn weer vir moord

‘n Voormalige ANC-raadslid, wat teregstaan op die moord op sy vrou, verskyn na verwagting vandag weer in die Bloemfonteinse landdroshof.

Maphabole Godfrey Maphobole, ‘n voormalige ANC-raadslid van die Tokologo plaaslike munisipaliteit, is vroeër borgtog van R20 000 toegestaan.

Die 33-jarige staar onder meer aanklagte van moord en dwarsboming van die gereg in die gesig.

Maphobole word daarvan aangekla dat hy sy vrou, Thulani, op 27 November verlede jaar in hul huis in Langenhovenpark, Bloemfontein, vermoor het.