Twee swart mans in ‘n silwer Audi het gister gepoog om ‘n motor by die Glenanda-winkelsentrum in die suide van Johannesburg te kaap. Die bestuurder is met vuurwapens oor die kop geslaan, asook van sy horlosie beroof.
Volgens die Glenvista-GPF (gemeenskapspolisieforum) het bouers op die boonste vlak van die sentrum die gebeure raakgesien en begin om die kapers met bakstene te gooi. Hierna het die verdagtes van die toneel af gevlug, sonder om die motor te kaap.
Gebruikers op Facebook het hul teleurstelling uitgespreek dat die kapers nie met die bakstene raakgegooi is nie, maar tog die bouers gelukgewens dat hulle die kaping gefnuik het.