Kategorie: Nuus

Vyf vermeende renosterstropers aangekeer

Vyf vermeende renosterstropers het Maandag in die KwaMsane Landdroshof in Kwazulu-Natal verskyn waarna hulle op R5 000 borgtog elk vrygelaat is, het News24 berig.

Die vyf mans is 13 Junie in hegtenis geneem na ‘n wenk dat renosterstropers op pad was om ‘n renoster in die Umfolozi-gebied te stroop.

Polisie het die vyf omstreeks sewe-uur die aand naby Mfekayi voorgekeer. Daar is beslaggelê op ‘n jaggeweer, ammunisie, ‘n byl, knaldemper en ander tipiese strooptoerusting.

Polisiewoordvoerder Vish Naidoo sê dit blyk dat die stropers besluit het om renosters in die Umfolozi-gebied te teiken nadat groter polisiesigbaarheid in die Isimangaliso-wildreservaat stroperaktiwiteit aan bande gelê het.

Die vyf mans staan tereg op aanklagte van sameswering om renosters te jag, sowel as die onwettige besit van vuurwapens en ammunisie. Die saak is tot 28 Julie uitgestel.

Oorlogsmonument weer beskadig

Die oorlogsmonument in Uitenhage in die Oos-Kaap is met wit verf beskadig het RSG berig.

Dit is die tweede voorval van vandalisme by die standbeeld die afgelope ruk, nadat dit in April vanjaar aan die brand gesteek is.

Ander standbeelde wat vanjaar in die provinsie deurgeloop het, is die standbeeld van Koningin Victoria, ‘n beeld in Port Elizabeth wat die rol van perde in die Boere-oorlog uitbeeld, asook die Burgermonument op Burgersdorp.

‘n Woordvoerder van die Nelson Mandelabaai-metro het die jongste voorval veroordeel. Hy sê geen vandalisme sal onder enige omstandighede geduld word nie.

Namibiese oogspesialis wen Nelson Mandela-prys

Die Namibiese oogspesialis, dr. Helena Ndume, bekend vir haar liefdadigheidswerk met gesiggestremdes, het pas die Verenigde Nasies se eerste Nelson Mandela-prys in New York verower.

Die Portugese president Jorge Sampaio sal ook die prys ontvang, het die voorsitter van die Algemene Vergadering van die Verenigde Nasies, Sam Kutesa Maandag gesê.

Ndume is glo bekend vir haar liefdadigheidwerk en Sampaio word vereer vir sy werk om demokrasie in Portugal aan te moedig tydens sy presidentskap entre 1996 en 2006.

Die Verenigde Nasies se Nelson Mandela-prys word elke vyf jaar aan een man en een vrou oorhandig.

Die prys is verlede jaar gestig om hulde te bring aan Suid-Afrika se Nelson Mandela.

Die doel van die prys is om diegene wat hul lewens wy aan diens van die mensdom te erken.

Die prys sal oorhandig word by die VN se hoofkwartier in New York met die herdenking van Nelson Mandela Internasionale Dag op 24 Julie.

Olimpiese atletieklegende oorlede

Die Bloemfonteinse atletieklegende en wenner van die hoogspringtitel vir vroue by die Olimpiese Spele in 1952 in Helsinki, Finland, Esther Brand is gister op die rype ouderdom van 92 jaar in Bloemfontein oorlede.

Brand is tot op hede die enigste Suid-Afrikaanse vroue-atleet wat ‘n goue medalje by ‘n Olimpiese Spele kon vermag. Sy het gewen met die destydse skêr-styl met ‘n hoogte van 1,67 meter.

Brand het tot ‘n paar jaar gelede gereeld diens gedoen as hoogspringbeampte by atletiekbyeenkomste.

Haar man, Jan Brand, het ook sy Springbokleure verwerf toe hy die land in fietsry by die 1948 Olimpiese Spele in Londen verteenwoordig het.

Bejaarde in oog en rug gesteek tydens plaasaanval

‘n Bejaarde man is Sondagoggend met ‘n skêr in sy oog en rug gesteek toe hy en sy vrou deur twee swart verdagtes op hul plaas in Noordwes aangeval is.

Johannes Haasbroek (73) en sy vrou het albei in hul plaashuis op die plaas Friedslard in Ganyesa geslaap toe die aanval gebeur het.

Noordwes polisiewoordvoerder, Kealeboga Molale, het gesê twee swart verdagtes het deur toegang tot die huis deur ‘n venster verkry. Die verdagtes het ‘n pistool en twee selfone gesteel voordat hulle op die vlug geslaan het.

Volgens Molale het die polisie die verdagtes se spoor gevolg tot by ‘n veepos in Cassel, waar hulle die mans, onderskeidelik 27 en 28 jaar oud, aangekeer het.

Die verdagtes sal na verwagting vandag in die Ganyesa-landdroshof verskyn.

Nog chaos dié week in parlement verwag met Bashir-debat

President Jacob Zuma het sy spyt en teleurstelling uitgespreek oor die chaos in die Parlement toe ‘n beplande vraag- en antwoordsessie tussen hom en parlementslede weer verdaag moes word.

Chaos word dié week verwag met die debat oor die Soedanese president se verdwyningstoertjie nadat hy ‘n Hooggeregshofuitspraak verontagsaam het.

Die ACDP se hoofsweep, Cherelyn Dudley, sê die voortdurende chaos in die Nasionale Vergadering moet voor die deur van die DA gelê word.

Dudley sê die polisie kan nie meer LP’s verwyder nie omdat die DA die verwyderings in die hof betwis het.

Hoewel daar wetgewing is wat die Speaker toelaat om die polisie na die Raad te ontbied om wanordelike Parlementslede te verwyder, het die Hooggeregshof bevind dat die betrokke wetsbepaling in stryd is met die Grondwet wat aan LP’s vryheid van spraak gee.

Dit beteken ook dat die ontwrigters nie in hegtenis geneem kan word nie. Hulle kan ook nie tronktoe gestuur of gedagvaar kan word oor enigiets wat hulle in die Nasionale Vergadering sê nie.

Die EFF se “betaal terug die geld”-betoog rakende Nkandla het daarvoor gesorg dat die sessie weer ontwrig is. Die DA steun die EFF se eise.

Die president se kantoor sê in ‘n verklaring Zuma is teleurgesteld dat hy weereens verhoed is om sy konstitusionele mandaat uit te voer om deur die Nasionale Vergadering aan die publiek verslag te doen.

Die ANC het intussen sy gereedheid vir komende Dinsdag se debat oor die president van Soedan, Omar al-Bashir verklaar.

Die DA-leier, Mmusi Maimane het die debat versoek en gesê dit is van nasionale belang nadat Bashir, strydig met ‘n Hooggeregshofbevel, die land verlaat het.

Bashir het ‘n lasbrief van die Internasionale Strafhof ontduik toe die kwessie oor beweerde menseregteskenings opgeduik het tydens sy besoek aan Suid-Afrika vir die Afrika Unie-beraad.

‘n Woordvoerder vir die ANC-Koukus, Moloto Mothapo sê die ANC in die Parlement is van mening dat die Soedan-kwessie ‘n politieke oplossing nodig het en nie deur die howe hanteer kan word nie.

Veiligheidsagentskappe is verlede Sondag per SMS ingelig om planne voor te berei om die moontlike arrestasie van Soedan se president, Omar al-Bashir, te verwag. Die boodskap het as volg gelui:

“Re Sudan court order. All respective committees at NATJOINTS [National Joint Operations] were given tasks to come up with ops plans by 08:00 tomorrow morning. IF an order is given to arrest Sudanese HoS. [al-Bashir] DHA DG [department of home affairs director-general] who is currently in court with the litigation personnel will give an instruction thereafter as to what needs to happen. BCOCC [border control operational coordinating committee] will have to ensure that that instruction is given to all ports of entry tonight whilst we are waiting upon DHA instruction.”

Vyf uur later, is Bashir se I1-62 straler egter vinnig en op kort kennisgewing verskuif vanaf OR Tambo Internasionale Lughawe na Waterklooflugmagbasis.

Die vliegtuig is weggesteek in een van die loodse van die BBP-eskader, ver weg van waar die ander vliegtuie geparkeer was.

Die volgende dag, het al-Bashir se konvooi die beraad van die Afrika Unie in Sandton met groot haas verlaat, begelei deur die polisie, na Waterkloof. Sy straler is deur lugbeheer toegelaat om op te styg.

Die ANC se Nasionale Uitvoerende Komitee het die regering intussen versoek om die geloofwaardigheid van die Internasionale Strafhof te help “herstel”, nadat die regering nie gehoor gegee aan die internasionale lasbrief van die hof vir sy inhegtenisneming weens volksmoord nie.

Die NUK het opnuut sy verbintenis bevestig tot die beskerming van menseregte en het die Afrika Unie gevra om sy eie instellings te versterk wat bedoel is om Afrika teen misdade teen die mensdom te beskerm.

Maimane het Sondag gesê die Openbare Beskermer Thuli Madonsela sal gevra om ondersoek in te stel oor die gebruik van staatsgeld om die Soedanese president in staat stel om inhegtenisneming in Suid-Afrika te ontduik.

City Press het ook berig dat die ANC ‘n besluit geneem het om die regering te vra om sy lidmaatskap van die Internasionale Strafhof op te skort.

Standaardtarief vir doktersbesoeke bekyk

Die Raad op Gesondheidsfinansiers vra dat ‘n standaardtarief vir gesondheidsorg ingestel word om stygende mediese kostes aan bande te lê, het RSG berig.

Die Raad het gereageer op kommer dat ‘n toenemende aantal dokters kontant van pasiënte vereis voor hulle behandeling ontvang. In talle gevalle is dié bedrag meer as wat mediese fondse betaal.

In 2004 het die Mededingingskommissie beslis dat dit sameswerende gedrag is om standaardtariewe vir dokters in privaat praktyke voor te skryf.

‘n Woordvoerder van die RGF, Heidi Kruger sê omdat daar nie ‘n standaardtarief is nie, het mediese fondse ‘n groot aanspreeklikheid en die verbruiker moet uiteindelik hoër premies betaal.

Die Raad op Mediese Skemas het intussen pasiënte aangeraai om met dokters te onderhandel indien hulle voel dat tariewe buitensporig is.

Die raad het ook mense aangemoedig om ‘n dokter te soek wat billike tariewe vra.

‘n Woordvoerder, Clayston Swart sê mediese fondse onderhandel tariewe met voorkeur-verskaffers.

Mediese fondse het egter min beheer oor tariewe wat dokters hef wat nie op hul databasis is nie.

Ses gesinne, drie minute

‘n Gewapende roof in Linden, Johannesburg, op 20 Junie het net drie minute geduur waartydens ses gesinne aangeval is.

Ene Fareed Hoosen, van Pexco Security was glo eerste op die toneel. “Ek het verbygery my vriend Hans se huis op my pad huis toe van die werk af en gesien dat hulle partytjie hou. Binne ‘n minuut of so van my aankoms tuis, ek het ‘n oproep van hom gehad om te sê daar is gewapende mans in sy huis. Ek is haastig daarheen, maar teen die tyd dat ek daar aangekom het, was die gewapende mans weg. Dit is hoe vinnig die hele ding gebeur het.”

‘n Nederlandse huiseienaar Hans Somsen verduidelik dat hy en sy vrou, Riana vriende oorgenooi het om die onlangse verkoop van Somsen se tuinsentrumbedryf op Witkoppenweg te vier. Hulle wou ‘n afskeidspartytjie hou voor die Somsens hul huis verkoop en terug verhuis na Nederland.

Daar was ses gesinne by die partytjie, ongeveer 17 volwassenes en 17 kinders. Geslotekringbeeldmateriaal wys een van motors van die laaste gas se aankoms in die oprit.

‘n Wit Toyota Avanza word dan gesien wat op die hek afjaag en hard rem buite die hek. Drie swart mans met klapmusse en handskoene en wapens spring uit en gryp die hek voordat dit heeltemal sluit. Hulle dwing die hek oop, trek die gas uit die motor en dwing die insittendes om in die oprit te gaan lê voordat hulle die huis bestorm. Die bestuurder van die Avanza ry intussen verder met die straat op.

Die gewapende mans het al die kinders op die grond laat lê terwyl hulle persoonlike items van waarde, soos selfone, juweliersware en horlosies van die res van die gaste gestroop het. Riana Somsen het daarin geslaag om die paniek-knoppie te druk.

Beeldmateriaal toon dan hoe die gewapende swart mans die eiendom verlaat, en in die wagtende Avanza spring wat weers sy verskyning maak. Die hele voorval het nie langer as drie minute geduur nie.

‘n Saak is geopen by die Linden-polisiekantoor. Gaste ontvang tans traumaberading. ‘n Woordvoerder van die Linden-polisiekantoor was nie onmiddellik beskikbaar vir kommentaar nie.

Die eienaar van die sekuriteitsonderneming het beklemtoon dat hy “vinniger” as die ander mededingers gereageer het.

Duitse popster wil Namibiese renosters red

‘n Derde witrenoster is op die wildsplaas Okamahoro wes van Okahandja in Namibië gestroop, het die Republikein berig.

Volgens die polisie van die Otjozondjupastreek is die renoster met 10 geweerskote neergevel. In Mei is ook twee witrenosters op dié plaas gestroop. Niemand is nog in hegtenis geneem nie en die ondersoek duur voort.

Intussen het die opbrengs van ’n potjie poker op Swakopmund die boerpot van die Red die Renosterfonds (SRT) geword.

Die wedgeld beloop N$100 000 en is deur ’n merkwaardige seun van dié dorp tot die laaste sent vir die bewaring van die bedreigde swartrenosterspesie geskenk.

Die jong man, Christoph Thesen, ’n Duitse popster met die verhoognaam T-Zon, se pa, mnr. Werner Thesen van Swakopmund, het die oorhandiging van die geld aan die voorsitter van die SRT, mnr. Simson !Uri?Khob, waargeneem.

Saam met die oorhandiging was daar ’n onderneming van die jong kunstenaar met Duitsland aan sy voete dat soortgelyke ondersteuning ook in die toekoms van hom verwag kan word.

Die potjie poker is vanjaar in Mei in Hamburg gespeel en Christoph was as “baie belangrike kunstenaar” genooi om daar op te tree. Dit was ’n spel in belang van liefdadigheid wat deur ’n internetmaat­skappy, pokerstar.de, aan­gebied is. Toe stap Christoph met die wedgeld weg.

“Dis ’n mannetjie met ’n groot hart,” het sy pa tydens die oorhandiging gesê. “Hy is deurentyd bewus van sy welsynsverpligtinge. Hy het gehoor van die renosterstropery in sy geboorteland en het onmiddellik besluit om tot die bewaring van die swartrenosters by te dra.”

Christoph is in 1993 op Swakopmund gebore en het ná drie jaar in Windhoek in 2011 aan die DHPS gematrikuleer. As 12-jarige seun het hy reeds sy eerste liedjies geskryf en vrygestel. In 2012 het hy by die Makro Media-akademie in Keulen ingeskryf en in 2015 was hy gekwalifiseer om spesiale geleenthede aan te bied.

Sy loopbaan het as YouTube/rap/hip-hop kunstenaar ontwikkel. In 2014 het sy eerste album, Doppelleben.

Vroeër vanjaar het hy meer as 20 verhoogoptredes in Duitsland en Oostenryk gelewer. Sy tweede album is op pad en teen September behoort sy tweede Europese toer te begin.

Goeie vertoning deur Deense Volksparty bevestig Europese ‘swaai na regs’

Gister se algemene verkiesing in Denemarke het tot ‘n oorwinning vir die konserwatiewe opposisie gelei, met die Deense Volksparty van mrn. Kristian Thulesan Dahl wat bo verwagting goed gevaar het en 21,1% van die stemme ontvang het. Daar is selfs ‘n moontlikheid dat die Dahl die volgende eerste minister van Denemarke kan word, wat skokgolwe deur Europa sal stuur aangesien die media die Deense Volksparty, soortgelyk aan die Franse Front National, as “verregs” probeer brandmerk het.

Die verkiesing het naelskraap verloop, dog nadat alle stemme gisteraand getel is, het die sentrum-regse koalisie wat deur die vorige eerste minister Lars Lokke Rasmussen gelei is, die nodige 90 setels wat aan hom ‘n meerderheid in die parlement van 179 setels besorg.

Die DVP se leier, Kristian Thulesen Dahl het vooraf gesê dat hy nie in die regering wil dien nie, maar aangesien sy party nou die grootste van die konserwatiewe “bloublok”-koalisie is, mag dit dalk gebeur dat hy wel gevra word om die eersteministerspos te aanvaar.

Lars Lokke Rasmussen en Helle Schmidt-Thorning
Lars Lokke Rasmussen en Helle Thorning-Schmidt

Lars Lokke Rasmussen van die Deense Liberale Party het vier jaar gelede verklaar dat die linkse “rooiblok”-koalisie, soos dit in Denemarke bekendstaan, nie lank sal regeer nie en dat hy die sleutels na die eersteministerskantoor slegs aan Me. Helle Thorning-Schmidt “leen”. Tans sê hy dat sy konswerwatiewe “blou blok” alles in sy vermoë sal doen om immigrasie vanuit die Derde Wêreld na Denemarke te stuit.

Hoewel Thorning-Schmidt se Sosiale-Demokratiese Party goed gevaar het met 26.3% van die stemme, het die res van haar “rooiblok”-vennote stemme verloor, sodat die konserwatiewe geseëvier het. Al vier “buitelandse” setels op Groenland en op die Faroe-eilande het ook na die Sosiaal-Demokrate gegaan, maar dit was nie genoeg om die konserwatiewe opmars te stuit nie. Volgens Thorning-Schmidt het haar party “by die wenstreep verloor”.

Mnr Rasmussen se Deense Liberale Party het 19,5% van die stemme getrek.

Die swaai na regs in Denemarke kom kort op die hakke van die nuus Dinsdag dat daar ‘n nuwe regse groepering in die Europese Parlement in Straatsburg, Frankryk, tot stand gekom het, wat gelei word deur me. Marine Le Pen van die Franse Front National en mnr. Geert Wilders van die Nederlandse Partij voor de Vrijheid. Die nuwe groep heet “Europa van volkere en vryheid” en bestaan, benewens die FN en PVV, uit die Oostenrykse Vryheidsparty, die Vlaams Belang, die Lega Nord van Italië, die Nieu-Regse Kongres van Pole en die onafhanklike lid Janice Atkinson van Brittanje (voorheen UKIP). Hoewel Marine Le Pen en die Front National oor die meeste Euro-parlementslede van enige Franse party (23) beskik, het sy tot dusver gesukkel om ander partye uit sewe lande saam te snoer aangesien mnr. Nigel Farrage van UKIP sy eie groep gevorm het en nie bereid was om met haar saam te werk nie.

Die voorwaarde vir ‘n groep in die Europese Parlement is dat dit uit ten minste 25 Euro-parlementslede vanuit minstens sewe lande moet bestaan. Tans beskik Volkere en Vryheid oor 38 Euro-LP’s wat uit presies sewe lande afkomstig is. Die groep sal ‘n ekstra bedrag van ongeveer R60m per jaar aan toelaes van die Europese Unie ontvang, waarmee hy sy invloed oor die hele Europa kan uitbrei en al sewe partye was sigbaar verheug dat hulle daarin geslaag het om die nuwe groepering saam te stel.

Volgens dr. Dan Roodt van PRAAG, “kan Suid-Afrika net bemoedig word deur die verwikkelinge in Denemarke en elders in Europa waar die anti-blanke, anti-Westerse partye wat in die 1980’s terreur deur die ANC en SAKP in ons land befonds het, nou teruggedryf word deur patriotiese, pro-Westerse partye. Sowel die Partij voor de Vrijheid as die Vlaams Belang is uitgesproke in hul steun vir Afrikanervryheid en dis seker net ‘n kwessie van tyd voor die ander partye soos die FN en die Deense Volksparty ook hul steun vir ons uitspreek.”

PRAAG is tans besig met ‘n uitreikaksie na verskeie Europese groepe. PRAAG-uitgewery is insgelyks besig om ‘n verskeidenheid boeke uit Europese tale in Afrikaans te vertaal, onder meer uit Frans, Nederlands en Skandinawiese tale. “Daar is ‘n nuwe oplewing in kreatiwiteit en in kritiese denke in Europa en Afrikaners en Afrikaans wil beslis hierin deel,” sê dr. Dan Roodt. “Hoewel ons geografies van mekaar verwyder is en dalk ‘n ietwat ander spelling en uitspraak het, is ons steeds verwant aan ons familie oorkant die water wat oplaas die waansin van oorheersing deur die Derde Wêreld begin insien.”

Sluit aan by PRAAG.