Zim na stembusse

Gushungo
Gushungo

Veertien partye sal Woensdag aan die verkiesings in Zimbabwe deelneem in wat waarnemers as ‘n verbete stryd tussen die twee voorste kandidate, Robert Mugabe en Morgan Tsvangirai beskryf. Stembusse het vanmore geopen.

Daar is altesaam vyf presidensiële kandidate wat hulself beskikbaar gestel het. Die stembusse sluit om 19:00 vanaand.

Meer as ses miljoen Zimbabwiese kiesers gaan toustaan in die land se presidensiële en parlementêre verkiesings.

Gushungo, wat “krokodil” beteken is die bynaam vir  die huidige president wat ook die oudste een in Afrika is.

Pres. Robert Mugabe (89) gaan poog om die eerste minister in die vorige eenheidsregering, Morgan Tsvangirai, se derde probeerslag om as wenner uit die stryd te tree, weer te fnuik.

Die Zimbabwiese president het belowe om die mag om sy aartsvyand, Tsvangirai, te oorhandig as hy in die verkiesing verloor.

“Dit is ‘n normale ding om te doen as jy aan ‘n kompetisie deelneem waar daar slegs twee uitkomste is, wen of verloor, jy kan nie albei hê nie. As jy verloor moet jy oorgee aan diegene wat gewen het,” het Mugabe aan joernaliste by State House in Harare Dinsdag gesê.

Baie min van hulle glo hom omdat herinneringe van die chaotiese 2008-verkiesing, wat deur moorde, aanrandings en intimidasie van politieke opponente deur Mugabe se Zanu-PF gekenmerk is, nog vars in die geheue van sy MDC-teenstanders is.

Duisende gewapende onlustepolisie is ontplooi in gebiede wat as brandpunte geïdentifiseer is.

Radio Zimbabwe berig dat duisende polisielede na die sentrale provinsie gestuur is, terwyl vragmotors met gewapende polisielede sekere dele van Harare patrolleer.

Die gebiede is vestings vir Tsvangirai en was die kern van die geweld na die verkiesing in 2008, waarin 200 mense dood is wat bande met die MDC gehad het.

Die verkiesing sal die einde van ‘n vierjaarlange wankelrige eenheidsregering beteken, met sowel die MDC as Zanu-PF wat voorspel dat hulle ver gaan wen.

Mugabe is reeds 33 jaar aan bewind, in ‘n ampstydperk wat deur ekonomiese chaos en vernietiging in sy land gekenmerk is, maar ten spyte daarvan nie sy gewildheid aangetas het nie.

Soldaat voor oor moord op polisiehoof

Tirhani Maswanganyi
Tirhani Maswanganyi

‘n Weermaglid is een van die vier mans wat daarvan beskuldig word dat hulle die moord op die Johannesburgse polisiehoof maj. genl. Tirhani Maswanganyi beplan het, het die Pretoria-Noord-distrikhof Dinsdag gehoor.

Maswanganyi sou as getuie optree in ‘n belangrike korrupsiesaak en daar word vermoed dat dit die motief vir die moord was.

Ndaedzo Isaac Vele (29), Tshepo Mosai (30), Roger Godfrey Moseki (33), en Nditsheni Daniel Nefolohodwe (32), het vlugtig Dinsdag vlugtig in die hof verskyn voor hul borgtogaansoeke tot Donderdag uitgestel is.

Maswanganyi (51) se lyk is op 17 Junie naby Hammanskraal in ‘n veld, noord van Pretoria, gevind.

Sy hande en voete was vasgebind en sy verlate bakkie is langs die R101 gevind.

Lucas Moseki, staatsaanklaer, het gesê die staat sal borg vir die vier beskuldigdes teenstaan.

Die beskuldigdes staan tereg op aanklagte van moord, beplande moord, roof met verswarende omstandighede asook daarvan dat hulle ‘n voertuig sonder die eienaar se toestemming bestuur het.

Vele het in ‘n beëdigde verklaring wat aan die hof voorgelees is, gesê hy is ‘n soldaat. Hy vrees dat hy geskors kan word indien hy vir te lank in aanhouding is. Hy het verder gesê sy verloofde is swanger met hul eerste kind en sal in November kraam.

Vele het ook erken dat hy voorheen veroordeel is op aanklag van verkragting, waarvoor hy ‘n opgeskorte vonnis opgelê is.

Op die dag van die moord het hy sy bevelvoerder by die OR Tambo Internasionale Lughawe opgelaai en daarna ‘n paar goed vir haar gedoen.

Vele se bevelvoerder het in ‘n verklaring bevestig dat hy haar daardie dag by die lughawe gaan haal het.

Die bevelvoerder se verklaring is nie geverifieer nie en kan dus nie ingedien word as bewys nie.

Stander het gesê die borgaansoek kan nie voortgaan totdat dit nie gedoen is nie. – Sapa

Dodetal styg ná skietery by Grootvleimyn

Grootvleimyn
Grootvleimyn

Altesaam sewe onwettige mynwerkers het gesterf toe ‘n geveg in ‘n mynskag in Brakpan-Noord aan die Oos-Rand uitgebreek het. Nóg 12 is gewond.

Nooddienswerkers het aanvanklik op vier lyke afgekom by die Grootvleimyn.

Volgens berigte is skote die naweek afgevuur toe ‘n ondergrondse geveg tussen twee groepe onwettige mynwerkers uitgebreek het.

Sommige families beweer hul familielede is steeds vermis. Soek en reddingspanne sal later vandag besluit of hulle sal voortgaan met hul soektog na vasgekeerde onwettige mynwerkers.

Sewe liggame is sover gevind nadat skote gevuur is tydens ‘n ondergrondse botsing tussen twee strydende groepe werkers.

‘n Woordvoerder van die Ekurhuleni Nooddienste, Rogers Mamaila sê twee vlakke van die mynskag is deurgesoek sonder dat enige iemand gevind is en nog een vlak sal gefynkam word voordat ‘n besluit geneem word. – Sapa

Tlokwe se ANC-burgemeester skop vas

Annette Combrink, haastig vir haar kantoor
Annette Combrink ( links), haastig vir haar kantoor

Maphetle Maphetle, onsetelde burgemeester van Tlokwe, het Dinsdag geweier om sy kantoor te ontruim omdat hy teen ‘n hofbevel gaan appelleer, het ‘n ANC-woordvoerder gesê.

“Maphetle Maphetle beset die kantoor omdat die ANC besluit het om teen die uitspraak te appelleer,” het Kenny Morolong, woordvoerder van die ANC in die Noordwes, gesê.

“Die burgemeester en speaker, albei as applikante, het besluit om te appelleer en die ANC steun dit.”

Die Pretoriase hooggeregshof het Maandag ‘n aansoek verwerp om die raadsvergadering, waartydens Maphetle ontsetel is, nietig te verklaar.

Regter Neil Tuchten het bevind dat die vergadering en die verkiesing van die DA-raadslid Annette Combrink as burgemeester, wettig was.

Tuchten het ook bevind dat Maphetle se besetting van die burgemeesterskantoor onwettig is.

Op 2 Julie is Combrink vir die tweede keer sedert November tot burgemeester verkies nadat Maphetle ontsetel is.

Maphetle en die speaker van Tlokwe, Barei Segotso, het ‘n aansoek voor die hof gebring om die vergadering, waartydens Combrink tot burgemeester verkies is, nietig te verklaar.

Maphetle moes teen Dinsdagoggend 10:00 die kantoor ontruim. Die ANC het daarna gesê die uitspraak sal gerespekteer word.

Tiaan Kotzé, woordvoerder van die DA in die Noordwes, het gesê die burgemeester het Dinsdagoggend geweier om die kantoor te ontruim en het gesê die ANC appelleer teen die uitspraak.

“Die DA het nog nie regsdokumente ontvang nie. Wat hulle doen is heeltemal onwettig,” het Kotzé gesê.

Die party het die balju gevra om die hofbevel uit te voer en is besig om regsadvies in te win. – Sapa

SA eis Morsi se vrylating van Egipte

morsiDie Suid-Afrikaanse regering eis dat die ontsetelde president van Egipte, Mohammed Morsi, vrygelaat word.

Clayson Monyela, woordvoerder van die departement van internasionale betrekkinge en samewerking, sê Suid-Afrika dring daarop aan dat die president “en alle ander politieke gevangenes onvoorwaardelik vrygelaat word.”

Hy het verwys na gevangenes wat “sedert die ongrondwetlike verandering van die regering op 3 Julie” in aanhouding is.

Monyela het bygevoeg dat die regering ook ‘n beroep gedoen het op alle partye om hul van “geweld en wraaksug te weerhou.”

Volgens Monyela is die regering bekommerd oor mense wat teen die ongrondwetlike verwydering van die ontsetelde president betoog, aangesien die optogte reeds talle mense se lewens geëis het.

Morsi is verlede jaar as die land se president verkies, en is vroeër vandeesmaand in ‘n staatsgreep ontsetel nadat talle betogings teen sy bewind gehou is. Hy is sedertdien nie in die openbaar gesien nie.

Sy ondersteuners hou onafgebroke optogte ter ondersteuning van sy heraanstelling.

Die afgelope naweek se geweld het die lewe van 82 mense geëis. – Sapa

ANC erken Zim-burgers se aandeel in SA

Zim-wynkelners slaag die toets
Zim-wynkelners slaag die toets

Gwede Mantashe, die ANC se sekretaris-generaal, het het toegegee dat pres. Robert Mugabese stelling dat Zimbabwiese burgers Suid-Afrika se ekonomie oorgeneem het, waar is.

Hy gesê Suid-Afrika kan by Mugabe gaan kers opsteek wat betref beleggings in onderwys en opleiding.
Hoewel “dit erg is om by Mugabe te hoor”, is dit nie onwaar nie, het Mantashe by ‘n inligtingsessie erken.
“In die landbou en gasvryheidsbedryf is daar orals Zimbabwiërs omdat ons jongmense blykbaar dink sulke tipe werk is benede hulle.”
Hy het ook Zanu-PF daarvan beskuldig dat hy die ANC wil destabiliseer met Julius Malema se Ekonomiese Vryheidsvegters (EFF), maar nie meer besonderhede gegee oor dié poging nie.
Mantashe het verklaar dat Malema se nuwe politieke beweging deur Zanu-PF gedryf word en daarom afwyk van die Vryheidshandves “en baie meer met Mugabe en Zanu-PF” te make het.
“Nêrens in die Vryheidshandves sê dit grond moet sonder vergoeding gevat word nie. Malema gaan te kere oor die besitreg van minerale onder die grond. Besit die staat dit nie reeds danksy wetgewing nie?”

Die ANC bekommer nie dat Malema die jeugstem gaan afrokkel nie. “Die jeug identifiseer met die EFF, akademici met (dr.) Mamphele (Ramphela) se Agang . . . die ANC is vir almal.”

Brittanje wil immigantestroom stop

ukimmigrationOm immigrasie te bevraagteken was vir jare beskou as rassisties in Brittanje, maar al drie vernaamste partye het begin om te praat oor die moeilike onderwerp in reaksie op stygende openbare angs dat die VK oorspoel gaan word deur ander rasse en kulture.

Die gewildheid van anti-immigrasie veldtogte deur veral UK Independence Party (UKIP) het die kwessie nou in die hoofstroom gedwing.

Cameron se regerende Konserwatiewes, wat agter raak by die Arbeiders in die plaaslike stembusse, het belowe om ‘n verreikende immigrasiebeleid in te voer en sê hulle gaan netto-immigrasie met ‘n derde verminder.

Die immigrasiekantoor in Brittanje het bevestig dat hy ‘n terugbetaalbare bedrag van ongeveer R45 000 gaan eis vir visums van “hoërisiko”-besoekers uit ses voormalige kolonies in Afrika en Asië.

Luidens ‘n verklaring wat Maandag uitgereik is, sal Brittanje voortgaan met die loodsprojek wat woede en beskuldigings uit verskeie oorde ontlok het. Die land is ook gewaarsku van weerwraak en dat die besluit handelsverhoudings kan skaad.

Dit is nie bekend wanneer die projek sal begin nie.

Indien die projek suksesvol is, sal Brittanje die bedrag “op ‘n intelligensie-geleide basis op enige visum-roete en enige land” kan toepas.

Die lande wat tans geraak word is Nigerië, Ghana, Indië, Pakistan, Bangladesj en Sri Lanka.

Die immigrasiekantoor het gesê hy hoop die deposito-stelsel verhoed dat mense te lank in die land bly en die koste van buitelanders se gebruik van openbare dienste kan verhaal. – AP

Tsvangirai betwis vry en regverdige verkiesing

Morgan Tsvangirai
Morgan Tsvangirai

Die Zimbabwiese eerste minister, Morgan Tsvangirai, sê hy glo nie dat die land se verkiesingskommissie môre ‘n vry en regverdige verkiesing in die land kan hou nie, en het gevra dat die lede bedank.

Tsvangirai het aan meer as 50 000 ondersteuners in Harare gesê hy vrees dieselfde stemknoeiery wat die vorige verkiesings in 2008 ontsier het, sal weer voorkom.

Hy sê die land se Verkiesingskommissie het getoon dat hy nie gereed is nie, nadat chaos voorgekom het tydens die vroeë stemmery op 14 en 15 Julie vir lede van die polisie en weermag wat op stemdag aan diens sal wees.

Hy het gewaarsku dat politieke onrus kan voorkom indien mense van stemlokale weggewys word en daar vermoedens is dat daar met die stemme geknoei is.

Die hoof van die Verkiesingskommissie, Rita Makarau, het die kommissie verdedig en gesê hulle is gereed om toesig oor ‘n geloofwaardige verkiesing te hou.

Met die ongenaakbaarheid wat sy politieke loopbaan reeds dekades lank kenmerk, het president Robert Mugabe gewaarsku Tsvangirai nie moet probeer om nie-amptelike uitslae aan te kondig indien die Zimbabwe Verkiesingskommissie (ZEC) versuim om hulle betyds vry te stel nie.

“[Mnr Tsvangirai] weet wat nie toegelaat word deur die wet nie. Die ZEC is die enigste organisasie watverkiesingsuitslae mag aankondig. Ek by voorbaat sê dat as jy ‘n wetbreker is, sal die polisie jou in hegtenis neem,” het Mugabe gesê. – RSG/Business Day

Onwettige dobbelmasjiene vernietig

slotmachineMeer as 400 onwettige dobbelmasjiene is in Mahikeng in Noordwes vernietig, nadat daarop beslag gelê is.

Die LUR vir Ekonomiese Ontwikkeling in die provinsie, Matlalepula Rosho, sê onwettige dobbelbedrywighede word deur hoogs gesofistikeerde sindikate uitgevoer.

Volgens die uitvoerende hoof van die provinsie se Dobbelraad, Themba Ngobese, is die wette oor die voorkoming van onwettige bedrywighede heeltemal voldoende, maar slenters verhoed behoorlike wetstoepassing.

Die onwettige operateurs het dikwels lasbriewe op ‘n tegniese punt betwis en kon daarin slaag om die deursoeking van die perseel te uit te stel.

Polisiebeampte gekaap

sapd2‘n Polisiebeampte is gewond nadat drie mans hom van sy dienspistool beroof en sy motor gekaap het, het die polisie in die Oos-Kaap Maandag gesê.

Die 45-jarige adjudant-offisier is Sondag in Mainstraat geskiet, waar hy stilgehou het, het kapt. Jackson Manatha gesê.

“Drie gewapende mans het die polisiebeampte en die ander insittende beveel om uit die motor te klim. Die beampte is van sy dienspistool beroof.”

Die mans het in die polisiebeampte se Toyota Corolla met die registrasienommer DWD 296 EC gevlug.

‘n Saak van poging tot moord en kaping word ondersoek. – Sapa