Kategorie: Nuus

Velaphi Khumalo glo geskors by GP weens oproep om blanke volksmoord

Terwyl Suid-Afrika nuwe hoogte- (of laagte-)punte bereik in sy nabootsing van Amerikaanse politieke korrektheid en die obsessie oor ras en rassisme, het die Gautengse provinsie aangekondig dat sy werknemer Velaphi Khumalo glo ‘n tugverhoor in die gesig staar weens sy onlangs oproep om blanke volksmoord op sosiale media (skermafdruk hierby). Khumalo is ‘n werknemer van die departement kuns en kultuur in die provinsie Gauteng.

Die volledige aanhaling van Khumalo se plasing op Facebook lui soos volg:

“We must act as Hitler did to the Jews. I don’t believe any more that the is a large number of not so racist whit people . I’m starting to be sceptical even of those within our Movement the ANC. I will from today unfriend all white people I have as friends from today u must be put under the same blanket as any other racist white because secretly u all are a bunch of racist fuck heads. as we have already seen.”

Gister het hy om verskoning gevra deur blanke rassisme die skuld vir sy uitbarsting te gee:

“I would like to apologiese (sic) to the Gauteng government for my emotional comments that I made on a public platform. I further want to apologise to the ANC for the comments I made that do not reflect the ideologies of a Democratic society that are our ideals.”

Dit is egter onduidelik of Khumalo werklik geskors is, hangende ‘n tugverhoor, aangesien daar bloot van ‘n “interne proses” by die provinsie Gauteng gepraat word. Dit mag dalk net ‘n waarskuwing of iets dergelike behels.

Intussen woed die rasseherrie rondom Penny Sparrow se uitlatings oor swart “ape” wat Durban se strande met vullis bemors steeds en dit lyk asof sy, soos die Reitz-studente voorheen, strafregtelik van crimen injuria aangekla gaan word. Geen verder nuus is oor die Chris Hart-geval bekend nie en Hart handhaaf intussen ‘n “lae profiel”.

hate_white_peopleVandag verskyn daar in die Mail & Guardian ‘n meningstuk deur die bekende swart nasionalis en voormalige EFF-bestuurslid, Andile Mngxitama onder die titel: Penny Sparrow: Racism’s sacrificial lamb. Daarin lyk dit asof hy ‘n argument vir radikale grondhervorming uitmaak wat glo die enigste “oplossing vir rassisme” sou wees. Weens die betaalmuur wat die M&G deesdae op hul webblad het, is die artikel nie tans vir nie-intekenaars leesbaar nie, maar sal waarskynlik oor ‘n paar dae wel aanlyn beskikbaar wees.

Waarskynlik weens die verwysing na Hitler, het die Suid-Afrikaanse Joodse Raad van Afgevaardigdes aangekondig dat hy “in die komende dae ‘n formele klag by die SA Menseregtekommissie sal indien”.

Terwyl die hoofstroommedia fokus op Penny Sparrow en Chris Hart se uitlatings, bestaan daar ‘n hele horde swartes op Twitter en Facebook wat gereeld anti-blanke boodskappe plaas, waaronder oproepe om blankes uit die land te verdryf of om alle blankes dood te maak.

Die redakteur van Netwerk24, Adriaan Basson, het ‘n beroep op blankes gedoen om mede-blankes in die openbaar uit te skel as hulle hul aan “rassistiese” taal of houdings skuldig maak. Hy skryf:

2016 is die jaar wat wit mense wat glo in ’n toekoms vir Suid-Afrika nie langer kan stilbly nie. Anders gaan rassiste soos Penny Sparrow namens jou praat.

Die redaktrise van Die Volksblad, Johanna van Eeden, betreur dit dat “rassisme met rassisme beveg word”, asook die heengaan van die liberale “nasiebouprojek”:

Dit dra niks by tot ’n oplossing nie en pogings om brûe te bou is nie volhoubaar nie. Ons móét ’n manier kry om die klowe tussen rasse te oorbrug.

Vir die hoofstroommedia bly “rassisme” dus ‘n “blanke probleem” en verseg hulle om aandag te gee aan swart rassenarsisme wat besig is om handuit te ruk, ‘n narsisme wat jare lank al deur linkse en liberale joernaliste, asook akademici gevoed word…

Nigeriese opposisie-korrupsie oopgevlek

Die waarnemende hoof van Nigerië se hoofopposisieparty, is van korrupsie aangekla het AFP berig.

Hy was die man aan die hoof van oudpresident Goodluck Jonathan se mislukte veldtog om as president herverkies te word.

Haliru Mohammed Bello en sy seun, Abba Mohammed Bello, het Dinsdag in ’n federale hof in Abuja verskyn waar hulle op vier klagte van kriminele vertrouensbreuk en geld­wassery ­teregstaan.

Die twee word aangekla vir hul beweerde rol in die herleiding van geld wat bedoel was om wapens vir soldate te koop wat teen Boko Haram veg.

Die saak hou verband met ’n wyer ondersoek na omstrede wapentransaksies onder Jonathan en sy destydse nasionale veiligheidsadviseur, Sambo Dasuki. Verskeie groot politieke rolspelers is reeds in die ondersoek geïmpliseer.

Bello, die minister van verdediging onder Jonathan vanaf 2011 tot 2012 en tans die waarnemende voorsitter van die Peoples Democratic Party (PDP), en sy seun het na bewering 300 miljoen naira (US$1,5 miljoen) van Dasuki se kantoor ontvang.

Albei die mans het on­skuldig gepleit en die saak is tot Donderdag uitgestel wanneer hulle aansoek om borgtog kan doen.

Dasuki, wat op soortgelyke klagte teregstaan, ontken aantygings dat hy nagenoeg US$2 miljard in vals transaksies vir vegvliegtuie, helikopters, wapens en ammunisie toegeken het, wat nooit gematerialiseer het nie.

Die 60-jarige voormalige weermagkolonel sê alle kontrakte en betalings is deur Jonathan as staatshoof en opperbevelvoerder van die weermag goedgekeur.

Jonathan is in Maart opgevolg deur pres. Muhammadu Buhari, wat sedertdien met ’n omvattende veldtog teen korrupsie begin het.

Die ondersoek na Dasuki het ook meegebring dat die voormalige minister van finansies onder Jonathan en die voormalige goewerneur van die noordwestelike staat, Sokoto ondervra is.

Die stigter van Nigerië se eerste private radio en televisiestasies, Raymond Dokpesi, is vir bedrog en geldwassery aangekla omdat hy na bewering 2,1 miljard naira van Dasuki ontvang het.-

Motorverkope in SA hou aan daal

Verkope van nuwe voertuie het sy afwaartse neiging in Desember 2015 voortegesit, asook ‘n jaar-tot-jaar afname getoon, het die Nasionale Vereniging van Voertuigvervaardigers van Suid-Afrika, Donderdag gesê.

“Met die uitsondering van ligte kommersiële motorverkope, het nywerheidsverkope 2015 op ‘n swak noot geëindig met totale bedryfsverkope van nuwe voertuie van 49.250 eenhede. Dit is ‘n afname van 2171 voertuie of ‘n val van 4,1%, in vergelyking met die totale nuwe voertuigverkope van 51421 eenhede gedurende die ooreenstemmende maand van Desember 2014,” het Naamsa in ‘n verklaring gesê.

Die jaar-op-jaar syfers toon voertuigverkope het vir ‘n tweede agtereenvolgende jaar gedaal.

“‘n Verdere verlangsaming in die plaaslike ekonomie, stygings in rentekoerse, druk op verbruikers se besteebare inkomste en nuwe inflasiedruk het bygedra tot ‘n daling in die totale binnelandse verkoopsvolumes van 4,1% vir die jaar,” sê Naamsa.

Voertuiguitvoere het egter aansienlik toegeneem met die hoogste ooit vir ‘n jaar aangeteken in 2015.

‘n Totaal van 333748 eenhede is uitgevoer, ‘n bestendige toename van 276.936 voertuie wat in 2014 verskeep is.

AGOA-ooreenkoms op stewiger voet geplaas

Handelsbetrekkinge tussen Suid-Afrika en die VSA is op ‘n stewiger voet geplaas nadat ‘n ooreenkoms bereik is tussen die twee lande.

Die twee lande het na uitgerekte onderhandelings ‘n ooreenkoms bereik wat belastingvrye landbou-uitvoere na Amerika waarborg.

Die Minister van Handel en Nywerheid, Rob Davies, sê 38 persent van Suid-Afrikaanse uitvoere gaan ingevolge AGOA na die VSA, terwyl meer as 600 Amerikaanse maatskappye in Suid-Afrika belê het.

Davies sê Suid-Afrika wil betrekkinge met Amerika verder bevorder.

Die voorsitter van Wyne van Suid-Afrika, Michael Jordaan, sê die ooreenkoms is uitstekende nuus. Jordaan sê Afrika het minder hulp en meer vrye handel nodig.

Die Vereniging van Vleis-Invoerders en Uitvoerders het ook die nuus dat Suid-Afrika deel sal bly van die Agoa-handelsprogram, verwelkom.

Die uitvoerende hoof van die Vereniging, David Wolpert, sê gesonde verstand het geseëvier.

Moslem-aanvaller geskiet op Charlie Hebdo-herdenking

Die Franse polisie het die Moslem geïdentifiseer wat vermoedelik probeer het om ‘n polisiestasie aan te val tydens die eerste herdenking van die Charlie Hebdo-aanval.

Die man, Salli Alli was ‘n veroordeelde dief en is in Marokko gebore.

Alli is doodgeskiet toe hy ‘n polisiestasie met ‘n fop-selfmoordbaadjie en ‘n vleismes binnegestorm het.

Hy het “god is groot” in Arabies geskreeu en ‘n papier-weergawe van ISIS se vlag gedra.

Die Paryse polisie sê die aanval is as ‘n terreurdaad bestempel.

‘n Jaar gelede is 17 mense dood toe die kantoor van die satiriese tydskrif Charlie Hebdo en ‘n Joodse winkel aangeval is.

Droogte kan lei tot meer GM-gewasse in Afrika

‘n Knellende droogte het tot wydverspreide misoeste gelei. Die droogte raak lande in Suider-Afrika.

Van dié lande kan binnekort oorreed word om geneties gemanipuleerde gewasse te aanvaar om oeste te verbeter.

In talle Afrikalande word geneties gemanipuleerde gewasse verbied weens die langtermyn gesondheidsgevolge wat dit mag inhou.

Die hulpagentskap Oxfam sê tien miljoen mense op die vasteland word tans deur hondersnood bedreig en word genoop om graan in te voer.

Voorstaanders van GM-gewasse sê Afrikaboere sal waarskynlik die meeste baat vind by die verminderde gebruik van insekdoders, laer produksiekoste, hoër opbrengste en hoër pryse vir hulle gewasse.

AgriSA het intussen ‘n beroep op die regering gedoen om die droogte in die land tot ‘n nasionale ramp te verklaar.

Die uitvoerende direkteur van die organisasie, Omri van Zyl sê huishoudings se drinkwater droog op en vee vrek weens die droogte.

Noordwes, KwaZulu-Natal, Mpumalanga, Limpopo en die Vrystaat is tot rampgebiede verklaar. Volgens ekonome sal sowat vyf miljoen ton mielies waarskynlik ingevoer moet word.

Van Zyl het aan RSG gesê as dit gebeur sal die onbestendige rand voedselinflasie die hoogte laat inskiet wat die ekonomie verder sal knou.

Lesotho het water beskikbaar gestel aan droogtegeteisterde Suid-Afrikaanse dorpe uit die Katsedam.

Inwoners van Aliwal-Noord in die Oos-Kaap het volgens berigte al begin water bedel van motoriste wat deur die dorp ry.

‘n Woordvoerder van die departement van Waterwese, Sputnik Ratau, sê hulle wil die watervlakke in die Bo-Oranjerivier stabiliseer vir gebruik in die Joe Gwqabi distriksmunisipaliteit.

Oorskot van 34 migrante spoel op Turkse kus uit

Die liggame van 34 migrante, van wie minstens sewe kinders is, is Dinsdag dood op twee strande aan Turkye se Egeïese kus gevind, nadat hulle oënskynlik probeer het om na die nabygeleë Griekse eiland Lesbos te gaan.

Die migrante, wat beweer dat hulle van Sirië se oorlog vlug na Europa, gaan voort om koue winterweer te beleef, het Reuters berig.

Ongeveer ’n miljoen mense het in 2015 die Egeïese see oorgesteek of probeer om dit oor te steek, vyf keer meer as in 2014.

Die mense wat Dinsdag dood aangetref is, het omgekom nadat hul boot of bote in die onstuimige see omgeslaan het.
Die kuswag het 12 ander uit die see en op die rotse aan die Ayvalik-kus gered. Drie bote en ’n helikopter was betrokke in die reddingsoperasie.

“Dit is ’n misdaad teen die mensdom. Dit is moord om mense op ’n see soos hierdie te laat gaan,” het die goewerneur van Ayvalik, Namik Kemal Nazli, gesê met verwysing na diegene wat migrante uitbuit wat desperaat is om Europa te bereik.

Toenemende polisiëring aan die Turkse strande en kouer weersomstandighede het nie migrante uit die Midde-Ooste, Afganistan en Afrika afgeskrik om die gevaarlike reis in klein bootjies te onderneem nie.

Noord-Korea spog oor waterstofbom-toets

Noord-Korea sê die land het ’n kragtige waterstofbom met welslae getoets, het AP berig.

Hierdie uitdagende en ver­rassende stap, indien bevestig, sal ’n reuse­stap in Pjongjang se soeke na verbetering in sy steeds beperkte ­kern-arsenaal wees.

Die aankondiging is oor die staatsmedia gedoen en is gevolg deur ­feesvieringe in die strate van Pjongjang. In Seoel en elders in die wêreld is kommer op hoë vlakke uitgespreek.

Suid-Korea se pres. Park Geun-hye het opdrag gegee dat sy weermag die land se verdediging saam met Amerikaanse magte versterk.

Washington bly skepties oor Noord-Korea se aansprake oor waterstofbomme, wat veel kragtiger en baie moeiliker as kernbomme is om te vervaardig.

Noorweë vra dat diplomaat gepos word na dronkbestuur

Die regering het bevestig dat hy ‘n amptelike versoek van Noorweë ontvang het om die diplomatieke immuniteit van ‘n senior diplomaat terug te trek.

Dié versoek is gerig nadat die swartman van ongeveer 50 na bewering in Oslo se sjiek Frogner-distrik onder die invloed van alkohol bestuur het, van die polisie gevlug en ‘n ongeluk veroorsaak het.

Die diplomaat het glo van die polisie probeer wegjaag. Toe die Noorse polisie hul blou sireneligte aanskakel het die swarte in die aankomende verkeer ingedraai en so die ongeluk veroorsaak.

Daarna het die diplomaat uit die kar gespring en weggehardloop.

Die Suid-Afrikaanse ambassadepersoneel het glo volgens die Aftenposten die diplomatieke nommerplate van die voertuig verwyder om dit moeiliker te maak vir die owerhede om die kar op te spoor.

‘n Nege-en-twintig jarige paramedikus is ernstig in die ongeluk beseer. Sy het haar heup op verskeie plekke gebreek en moes in die Ullevål Universiteitshospitaal behandeling ontvang.

Die Noorweegse polisie sê amptenare van die Suid-Afrikaanse ambassade het op die ongelukstoneel geweier dat die diplomaat ‘n alkoholtoets ondergaan en het sy diplomatieke immuniteit voorgehou.

Die Noorweegse woordvoerder vir buitelandse sake, Hilde Steinfeld sê die versoek is aan Suid-Afrika se swart ambassadeur in Oslo sedert 2013, Queen Anne Zondo oorhandig.

‘n Woordvoerder van die departement van internasionale betrekkinge, Nelson Kgwete sê dit word oorweeg.

Tweede fase van ACE se ondersese kabel begin

Die eerste ondersese kabel in Suid-Afrika het op 27 Desember 1879 Suid-Afrika direk verbind aan Europa. Die verbinding is moontlik gemaak deur die East Coast cable of the South African Telegraph Company via Durban en Zanzibar na Aden.

Vandag word optiese vesel tegnologie gebruik om digitale data te versend en dit sluit telefone, internet en private dataverkeer in.

Die tweede fase van die Africa Coast to Europe- (ACE) ondersese kabel-projek het pas afgeskop vanaf die eiland Sao Tomé & Principe in die Golf van Guinee tot by Kaapstad.

Die Franse telekommunikasiegroep Orange en die ander konsortiumlede van die ACE-kabel sal die verbinding oor 5 000km aanlê en sal digitale dienste en breëbandinternetdiens in Afrika uitbrei.

Die ACE-netwerk verbind 15 Afrikalande met Frankryk, Portugal en die Kanariese Eilande.

Na voltooiing van die tweede fase, sal die ACE 17 000 km se kabel beslaan en 25 lande met hoëspoedinternet verbind.

Bestaande ondersese kabels wat Suid-Afrika met die res van die wêreld verbind, is die SAT-3- en WACS-kabels aan die Weskus en die Seacom- en EASSy-kabels aan die Ooskus.

Moderne kabels is gewoonlik ongeveer 25 millimeter in deursnee en weeg ongeveer 1.4 kilogram per meter vir die gedeeltes diep onder die see, wat die grootste deel in beslag neem en groter en swaarder kabels vir die vlakwater gedeeltes naby die strand.