Nuus Archives - Page 407 of 1583

Nuwe anti-Amerikaanse lede vir Veiligheidsraad

Die Veiligheidsraad van die Verenigde Nasies sal Donderdag bykomende lede verkies vir vyf setels in die raad van 15 lede.

Die 193 lede van die Algemene Vergadering sal die nuwe lede aanwys wat op 1 Januarie 2015 hul poste sal opneem.

Die verkose lande sal aansluit by die vyf permanente lede, Brittanje, China, Frankryk, Rusland en Amerika en sal twee jaar lank verteenwoordig word.

Die lande wat waarskynlik verteenwoordiging sal kry is Angola, wat deur Afrika voorgestel is, Venezuela wat deur Latyns-Amerika voorgestel is, en Maleisië wat deur Asiatiese moondhede benoem is.

Dié drie sal die leë stoele van Argentina, Rwanda en Suid-Korea vul.

Spanje, Turkye en Nieu-Seeland sal sake uitspook vir die ander twee setels wat tans deur Australië en Luxemburg gevul word.

Met die moontlike toetrede van Turkye en Maleisië, tesame met Tsjad en Jordanië reeds op die Raad, sal dit die eerste keer in sy geskiedenis wees dat vier Moslem lande verteenwoordig word.

Baie aandag is gefokus op Venezuela se deelname en die aanstelling van wyle president Hugo Chavez se dogter, Maria Gabriela, as adjunk-ambassadeur by die Verenigde Nasies. Na verwagting sal Venezuela teen Anglo-Amerikaanse resolusies opstaan.

As die hoogste besluitnemingsliggaam van die Verenigde Nasies, kan die Veiligheidsraad sanksies op lande en individue instel, verdagtes vir oorlogsmisdade vervolg, vredesooreenkomste bekragtig en die gebruik van geweld magtig.

Die Veiliheidsraad hou ook toesig oor 16 vredesendings in die wêreld, met ‘n begroting van byna $8 miljard.

Jaarlikse voertuigdiefstal beloop R8,5mjd in SA

Sowat R8,5 miljard se voertuie is verlede jaar in Suid-Afrika gesteel.

Van die 66 360 motors wat verlede jaar gesteel is, was 15% die gevolg van motorkapings, het die Suid-Afrikaanse buro vir versekeringsmisdaad (Sabic) Maandag gesê.

Sowat R5 miljard se motors wat gesteel is, is land-uit geneem, het Hugo van Zyl, uitvoerende hoof van die buro, in ’n verklaring gesê.

“Voertuigmisdaad is ’n markgeoriënteerde misdaad wat die burgers van Suid-Afrika op verskeie maniere raak,” het Van Zyl gesê.

Die “publiek is nie net slagoffers van motorkapings en –diefstal nie, maar word ook die slagoffer wanneer hulle onwetend gekloonde gesteelde voertuie van sindikate koop”.

Motorkapings het met 11% tot 11 129 in 2013 toegeneem, het die polisie in September bekendgemaak. – Bloomberg

Nigerië talm met uitkenning van rampslagoffers

Die Suid-Afrikaanse regering het berigte ontken dat gespanne betrekkinge tussen Suid-Afrika en Nigerië ‘n probleem geskep het om die oorskot van slagoffers van ‘n kerkramp terug te bring.

Die troebel verhoudinge tussen die twee lande is glo die oorsaak van vertragings om die liggame van Suid-Afrikaners wat in Lagos dood is, na die land terug te bring.

Sedert die ramp, sukkel Nigeriese owerhede steeds om ontbindende lyke te identifiseer deur middel van DNA-toetse, maar dit blyk ‘n moeilike taak vir die swak toegeruste Wes-Afrikane te wees.

Amptenare kla dat dit ‘n onbegonne taak is om vingerafdrukke te kry van ontbindende lyke.

Volgense bewerings word die meeste lyke in lykshuise koel gehou alleen deur waaiers, met geen verkoeling nie.

Volgens amptelike bronne is 80 Suid-Afrikaners en nog vier mense wat in Suid-Afrika gewoon het, dood toe ‘n gastehuis by ‘n kerk van die prediker, TB Joshua op 12 September ineengestort het.

Die ramp, wat aan swak bouwerk toegeskryf is, het die lewens van 115 mense geëis.

‘n Regeringswoordvoerder, Phumla Williams sê hulle volg die nodige riglyne om te verseker dat die liggame van die oorledenes sou gou moontlik terug in die land is.

Volgens Williams gee die Nigeriese owerhede hul volle samewerking.

Williams het egter toegegee dat sy verstaan dat die naasbestaandes graag die gebeurtenis wil afsluit.

Jonathan Jansen wil geen Suid-Afrikaner as viserektor by Kovsies

In sy drif om die Universiteit van die Vrystaat van Afrikaners en selfs Suid-Afrikaners te suiwer, moedig die omstrede rektor, Jonathan Jansen, slegs buitelanders aan om vir die vakante pos van viserektor aansoek te doen. Dié pos het juis ontstaan omdat Jansen die bekwame dr. Driekie Hay sonder rede soos ‘n hond weggejaag het. Sy is op 6 Augustus vanjaar summier deur Jansen geskors.

Teken ons petisie dat Jonathan Jansen moet bedank.

Weg met Afrikanerskap en Suid-Afrika! Welkom aan Zimbabwe, Amerika en Argentinië: dit is die lande waarvan die kandidate op die kortlys vir die pos van viserektor: akademies aan die Universiteit van die Vrystaat burgers is. Hulle is die Zimbabwiër, prof. Gabriel Kabanda, die Amerikanerin, dr. Le Lene Quesenberry en die Argentyn, dr. Lis Lange. Opvallend is ook dat daar geen blanke man op die kortlys is nie, waarskynlik op Jansen se aandrang.

Gerugte wil dit egter hê dat Jansen vir Lange, wat voorheen in regeringskringe opgang gemaak het, verkies. Onder andere was sy uitvoerende direkteur van die raad op gehalte in hoër onderwys (2006 – 2010) en het ook ander amptelike poste beklee.

Die universiteit se skakelbeampte, wat as direktrise vir kommunikasie en handelsmerkbestuur bekendstaan, Lacea Loader, het egter aan die media verklaar: “Geen individu beskik oor die mag om aanbiedings te maak of aanstellings te doen nie. Dit word altyd deur middel van komitees van die universiteit gedoen.”

Volgens haar is geen besluit oor die aanstelling nog geneem nie. Die bestuur van die universiteit sal aanvanklik ‘n aanbeveling doen, waarna die UV-raad dit op 21 November sal goedkeur.

Hoewel Lange ‘n Argentynse burger is, het sy haar Ph.D. in geskiedenis aan die Universiteit van die Witwatersrand verwerf. Wits is bekend vir sy klem op die marxistiese benadering teenoor die geskiedenis. Tans word verskeie linkse en ekstreemlinkse akademici na Afrikaanse kampusse ontplooi om hulle ideologies te transformeer.

Boonop is daar van haar mede-akademici by Kovsies wat meen dat Lange “onbevoeg” is om as viserektor aangestel te word. Sy het geen bewese publikasierekord nie, was nog nooit ‘n departementshoof of dekaan nie of selfs promotor van ‘n nagraadse student nie en beskik oor geen navorsingsgradering nie.

Volgens Lacea Loader is Lange se aanstelling by die DINAB of selfs haar huidige kandidatuur vir viserektor: akademies nie ongewoon nie. Sy sê: “Lange is as hoof van die DINAB aangestel deur dieselfde proses as ander senior personeel in ’n senior werwingsprojek onder die mandaat van die UV-raad. Lange word wyd erken as die mees senior persoon in die land wat betref hoëronderwysbestuur en administrasie wat verband hou met gehalteversekering, akkreditasie en programoorsig – alles kritieke take vir universiteitsleierskap in Suid-Afrika en in die buiteland. Dit is vir hierdie doel dat sy aangestel is as hoof van die DINAB.”

Prof. Gabriel Kabanda, wat op die foto hier bo soos ‘n Nigeriër geklee is, is tans visekanselier: korporatiewe beplanning en sake-ontwikkeling aan die Zimbabwe Open University (ZOU). Blykbaar het hy in 1996 ‘n doktorsgraad in rekenaarwetenskap iewers in Kalifornië, VSA, verwerf. Agterna het hy in 2007 nog ‘n graad of diploma in die bestuur van hoëronderwysinstellings in Israel behaal.

Die derde kandidaat, die Amerikanerin, dr. Le Lene Quesenberry, was tot einde verlede jaar waarnemende presidente van The Royal University for Women in die koninkryk van Bahrein. Volgens haar LinkedIn-profiel beskik sy oor ‘n Ph.D. in regte van die Universiteit van Gonzaga in Washingtonstaat in die VSA. ‘n Soektog op Google Scholar het geen resultate met maar naam opgelewer nie. Google Scholar bevat gewoonlik titels van akademiese publikasies of verwysings na sulke publikasies. Op haar LinkedIn-profiel word slegs drie liggewigartikels aangedui. Maar sy is Russies en Arabies magtig wat seker in Bloemfontein handig te pas kan kom.

praag-webblaaie loop nou op splinternuwe apparatuur

Geagte leser,

Nadat ons tegniese span oor die naweek baie hard gewerk het, kan ons aankondig dat beide praag.co.za en praag.org nou op ‘n splinternuwe en veel kragtiger bediener gehuisves word.

Vroeg vanoggend was daar skielik ‘n probleem met die goedjies (widgets) aan die kant van en bokant die blaaie, maar mettertyd het ons na baie kopkrap vasgestel dat ons ‘n ding genaamd cURL moes installeer, wat toe gedoen is.

Die krulle het vroeg vanoggend vir geringe hartversaking gesorg, maar toe het ons hulle darem getem met 'n eenvoudige: sudo apt-get install curl — Die krulle het vroeg vanoggend vir geringe hartversaking gesorg, maar toe het ons hulle darem getem met ‘n eenvoudige: sudo apt-get install curl

Soos ons al voorheen aangedui het, sal die nuwe apparatuur ons in staat stel om ‘n internasionale rol te speel, maar ook toenemend opwindende voordele aan ons PRAAG-lede en algemene lesers te bied.

Maak seker dat u op ons nuusbrief inteken wat voortaan ook meer gereeld uitgestuur sal word om u op hoogte van al ons werksaamhede te hou.

Vertel gerus vir ons hoe u die praag-blaaie op die nuwe masjien ervaar, of dit vinniger as voorheen is en dalk makliker aflaai. Hier in Johannesburg teen laataand as die internet vinniger loop, herlaai die blaaie so vinnig dat ‘n mens dit skaars met die blote oog kan sien. Ons vind ook dat wanneer die webblad bygewerk word, word die nuwe blad binne ‘n breukdeel van ‘n sekonde opgelaai, geberg en gepubliseer.

Dus was al ons beplanning en geswoeg die moeite werd! Boonop was ons nooit gedurende die opgradeerproses van lyn af nie. Slegs een artikel wat vroeg vanoggend opgelaai is, het iewers op die ou bediener beland omdat dit seker nog ‘n weergawe van die blad bevat het wat in die kasgeheue moes vasgehaak het. Hoe dit gewerk het, was dat ons twee identiese weergawes van die blad op die ou en die nuwe bediener gehad het. Op ‘n gegewe oomblik het ons die DNS na die nuwe blad toe verwys, waarna dit binne vyf minute oorgeskakel het, sonder dat die gewone leser dit sou agterkom.

Soos 53% van die wêreld se webblaaie, loop hierdie webblad op Apache op ‘n Linux-masjien wat met die jongste weergawe van Ubuntu 14.04 (Trusty Tahr) gelaai is.

Trouens, my getroue rekenaar waarop ek hierdie woorde skryf, gebruik ook Ubuntu Trusty Tahr as bedryfstelsel. Dus voel ek sommer goed om te weet dat sy voorbokbroer doer oorkant die water so hard werk om die meer as tien miljoen woorde op ons twee PRAAG-webblaaie aan die hele wêreld beskikbaar te stel!

Die feit dat ons Mark Shuttleworth se gratis bedryfstelsel gebruik, beteken so min of meer dat die tegnologie wat ons gebruik insgelyks eg Suid-Afrikaans is (al is ‘n tahr ‘n boksoort in die Himalajas). Dus is ons sommer reg vir die volgende keer as Apple en Microsoft Suid-Afrika begin boikot ook!

Dan Roodt
Eindredakteur

Malema ontken dat hy Namibiese byeenkoms sou bywoon

Die leier van die Economic Freedom Fighters (EFF) in Suid-Afrika, mnr. Julius Malema, het ontken dat hy die bekendstelling van die Namibian Economic Freedom Fighters (NEFF) se verkiesingsmanifes die afgelope naweek sou bywoon.

Die bekendstelling het Saterdag by die UN Plaza in Windhoek, Katutura plaasgevind en is deur drie lede van die EFF bygewoon, het die Republikein berig.

Net oor ’n honderd mense, van wie die meeste kinders was, het die bekendstelling van die manifes bygewoon wat aan Namibië se ontslape helde opgedra is.

“Nee, ek het nog nooit gesê dat ek dit gaan bywoon nie. Ek het geen benul waarvan hulle praat nie,” het Malema per telefoon aanRepublikein gesê.

Die nasionale koördineerder van die NEFF, mnr. Iipumbu Kalimbo, meen egter Malema is met ’n politieke speletjie besig.

“Die NEFF het nog nooit vir die mense gelieg dat hy (Malema) sou kom nie, ek weet nie eens of dit nou ter sprake behoort te wees nie. Soos jy kon sien, was drie lede van EFF se sentrale komitee afgevaardig. Dat Malema sou kom, was nie ’n leuen nie,” het Kalimbo gesê.

Wat volgens hom wel belangrik is, is dat ‘n NEFF-regering godsdiens in skole sal terugbring. Die NEFF beoog ook om die maandelikse maatskaplike pensioen van N$600 na N$1 500, die kindertoelaag van N$250 na N$500 en die oorlogsveterane se toelaag van N$2 200 na N$4 400 te verhoog.

Een van die EFF-afgevaardiges en lid van die Suid Afrikaanse parlement, me. Magdalene Moonsamy, het die NEFF gewaarsku om nooit in die voetspore te volg van diegene wat vir die massas jok nie. Sy het na die handvol mense verwys wat vir die bekendstelling opgedaag het en gesê dit word van die NEFF verwag om elke stem in die land vir dié party te wen.

“Dit is nie hoe EFF van Suid-Afrika lyk nie. Ons is groot en ons verwag van julle om elke Namibiër se hart te oortuig om vir julle te stem,” het sy gesê.

Skietery op paaie in KZN eis 14

Die paaie rondom Ezakheni, Ladysmith het dié naweek in die Wilde Weste ontaard toe 14 swartes doodgeskiet is twee verbyry-skietaanvalle.

Dit is nog nie bekend of dié voorvalle verwant is nie.

In die eerste voorval het ’n Mercedes-Benz met vyf insittendes van Peters Road, naby Ezakheni, afgejaag in ’n poging om van ’n ander, onbekende voertuig te ontsnap. Die bestuurder het beheer verloor en van die pad gery.

Een van die Mercedes-Benz se passasiers is op die toneel dood en nog vier is in die hospitaal dood aan hul skietwonde. Nog vier mense is dood toe ’n ander taxi in die chaos op die toneel in ’n vragmotor vasgery het.

Later is vyf mense dood by ’n karwassery in Ezakheni toe aanvallers uit ’n Toyota Avanza op hulle losgebrand het.

‘Wes-Kaap moet onafhanklike federale Bruin staat word’

Peter Marais, voormalige Wes-Kaapse premier en oud-burgemeester van Kaapstad, het by die Maynardville-jeugfees in Wynberg, Kaapstad, gesê bruines wil ’n onafhanklike federale Wes-Kaap hê.

Die onderleier van die Bruin Belange Beweging (BBB) het aan Media24 gesê die opkoms van bruin nasionalisme is te danke aan die verslag van die Verenigde Nasies se gesant oor inheemse volke in Suid-Afrika.

Bruines het in 2005 Eerste Nasie-status gekry.

“Nou is die bruin man besig om aanspraak te maak op ’n eie grondgebied in die land, op die basis van ’n outonome federale staat soos aangedui in artikel 235 in die Grondwet.

“Konsolideer jou getalle, streef om mag te bekom en dra jou Afrika-herkoms op jou voorkop, is die nuwe kreet op die Kaapse Vlakte.

“Dis ons paspoort na rykdom en mag en dit word daar orals vertel.”

Volgens Marais sal federalisme die getalle-oorwig beperk tot provinsiale grense en aan minderhede groter politieke en ekonomiese mag verleen binne ’n grondgebied, iets wat glo nie deur ‘n onafhanklike volkstaat gegrond op velkleur sal gebeur nie.

Die Wes-Kaap is meer as 51% bruin en 80% Afrikaans.

Marais sê Afrikaans as taal van kommunikasie en vakkeuse by skole en universiteite sal sodoende opbloei.

Hy sê Suid-Afrika is reeds in ’n mate ’n federale staat, maar die sentrale parlement beskik nog oor te veel mag.

“As die ANC bereid is om geringe grondwetlike aanpassings te maak en om die aspirasies van minderhede te akkommodeer, kan ons ’n vrye, semi-onafhanklike Kaapprovinsie hê.

“Ons provinsies is grondwetlik te swak. Ons is afhanklik van die sentrale parlement vir 95% van ons begroting. Daarby subsidieer die Wes-Kaap ander provinsies. Ons provinsiale begrotingstoekenning is ’n klein deel van ons bydrae tot die land se BBP.”

Heindrich Wyngaard, kommentator oor bruin kwessies, bestempel Marais se sienings as interessant.

“Dit spreek van ’n versugting by ’n groot deel van die bruin mense oor erkenning.”

Oproermakers sluit Goue Hoofweg

Die verkeersvloei op die Goue-hoofweg verby Lenasia is Maandagoggend weens oproer erg ontwrig.

Hoofsupt. Wayne Minnaar, woordvoerder van die Johannesburgse metropolisie (JMPD), het padgebruikers gemaan om alternatiewe roetes te gebruik omdat die situasie gevaarlik is.

“In dié stadium kan ons nie sê wat die oorsaak van die protesaksie is nie. Motoriste moet die hoofweg vermy omdat daar groot klippe in die pad lê. Oproeriges gooi verbygaande motoriste met klippe.

“Metropolisiebeamptes is op die toneel om die situasie onder beheer te probeer bring,” het Minnaar omstreeks 06:30 gesê.

In Malibongweweg, naby Boundaryweg in Kya Sands, is die verkeersvloei ook ontwrig. Plakkershutte het verlede week afgebrand in die gebied, maar volgens die owerhede is die ontwrigting te wyte aan ‘n ongeluk.

’n Ongeluk in Noordgesig naby Mookistraat op die Soweto-hoofweg het vroegoggend ook vertragings veroorsaak.

Jong vrou sterf in koeëlreën

‘n Jong wit vrou van Heidelberg het gesterf toe sy en haar verloofde hulle gisteraand omstreeks 21:00 in gewapende rowers vasgeloop het.

Die twee het haar aanstaande se werkplek besoek.

Chantelle Jacobs het gesterf en haar verloofde Marius Jansen van Rensburg is gewond toe die paartjie omstreeks 21:00 op 11 Oktober by Wentrans (op die R23 na Balfour) ingery en deur gewapende rowers oorval is.

Chantelle is op die toneel deur paramedici dood verklaar en Marius is na Life Suikerbosrand Kliniek geneem.

Chantelle was die eienaar van Glam Nails in Heidelberg en Marius is ‘n werknemer van Wentrans.