Kategorie: Nuus

‘Matriek waarborg nie universiteitstoelating nie’

Die departement van Hoër Onderwys sê in geen land in die wêreld kry almal wat matriek slaag, universiteitstoelating nie.

Die minister van Hoër Onderwys, Blade Nzimande het gereageer op ‘n eis van die Fees-must-fall-veldtog dat almal wat matriek geslaag het, die reg op universiteitopleiding het.

Die direkteur-generaal van die departement, Gwebinkundla Qonde sê dit is standaardpraktyk dat slegs sowat dertig persent van diegene met nasionale senior sertifikate tot universiteitvlak vorder.

Hy sê geen ekonomie kan so werk nie, en dat opleiding aan universiteite met ander naskoolse onderrig- en opleidingsgeleenthede gebalanseer moet word.

Skoonmakers by verskeie universiteite het die registrasieproses ontwrig.

Die voorsitter van Universiteite Suid-Afrika, Adam Habib sê ‘n nuwe befondsingsmodel moet eers tot stand kom voordat universiteitsgeld in sy geheel geskrap kan word.

Habib sê hulle kan dit op die oomblik nie bekostig om slegs staat te maak op regeringsubsidies nie. Hy sê Universiteite Suid-Afrika sal deel wees van die samesprekings oor universiteitsgeld en hoe dit befonds gaan word.

Die organisasie Universiteite Suid-Afrika sê intussen studente wat vanjaar by hoër onderwys instansies wil inskryf, sal registrasie- en klasgeld móét betaal.

Die organisasie verteenwoordig 26 universiteite landwyd. Universiteite Suid-Afrika het gereageer te midde van aanduidings by talle universiteite dat studente ontevrede is oor registrasiegeld.

Vyf olie-opgaartenks brand in Libiese hawens

Met die olieprys wat ‘n laagtepunt bereik het, is brandstofbergingsplekke oorvol.

Maar in Libië woed brande tans by die opgaartenks van Es Sider en Ras Lanuf. Twee van die brande is begin toe olie-opgaartenks deur ISIS-mortiere getref is. Die brande het toe na drie ander tenks versprei.

‘n Hawewoord­voerder, Ali al-Hassi, het gesê die wagte wat gemoeid is met die ­veiligheid van petroleumopslagplekke was teen Woensdagmiddag in beheer van die hawens Es Sider en Ras Lanuf, maar dat gevegte met die ­Islamitiese Staat-groep (ISIS) ­voortduur.

Minstens nege wagte is dood en in gevegte Maandag en Dinsdag aan die buitewyke van die hawens is meer as 40 beseer, het Reuters berig.

Die oorskot van 30 ISIS-terroriste is ook gevind. Die wagte het ook daarin geslaag om beslag op twee militêre tenks en ander voertuie van die militante te lê.

Mohamed al-Manfi, ’n oliebeampte in die ooste van Libië sê elk van die brandende opgaartenks bevat tussen 420 000 en 460 000 vate olie.

Es Sider en Ras Lanuf is sedert Desember 2014 gesluit. Die hawens is tussen die stad Sirte wat deur ISIS beheer word en die oostelike stad, ­Benghazi geleë.

Libië is verdeel tussen politieke faksies en ­gewapende groepe wat veg om beheer van die land se olierykdom, vier jaar ná die afsetting van Moeammar Ghaddafi.

Sedertdien het ­olieproduksie afgeneem na minder as ’n kwart van wat dit in 2011 was toe 1,6 miljoen vate per dag geproduseer is.

ISIS het munt geslaan uit die veiligheidsvakuum en sy teenwoordigheid uitgebrei, maar nog nie daarin geslaag om beheer oor olie-installasies in die land te neem nie.

Die ekstremiste het die wagte by Es Sider ook in Oktober 2015 ­aangeval, maar vandeesweek se aanvalle is oënskynlik ’n baie feller en meer gefokuste aanslag op die hawens.

Mustafa Sanalla, die voorsitter van die ­nasionale oliekorporasie (NOC) in Tripoli, het die hoop uitgespreek dat die geweld “politieke leiers aan albei kante in Libië tot die besef sal bring van die omvang van die ­bedreiging wat die land in die gesig staar.”

“Ons moet verenig teen ’n gemeen­skaplike vyand, nie môre of ­volgende week nie, maar nou.”

Die NOC het in ’n ­afsonderlike ­verklaring gesê dit sal alles in sy vermoë doen om ­kontrakte na te kom en Libië se oliebronne te beskerm.

Motoriste aangeraai om Stinkwater te vermy

Motoriste is aangeraai om Stinkwater noord van Pretoria, te vermy nadat oproeriges paaie versper het.

Die oproermakers het die Molefe Makintapad met klippe en ander rommel besaai.

Die ontevredenes het gesê hulle het verskeie kere reeds oor watertekorte en swak sanitasie in die gebied gekla, maar die stad Tshwane het die afgelope vyf jaar nie na hulle geluister en dienste verskaf nie.

Motoriste word aangeraai om alternatiewe roetes te gebruik.

‘n Gemeenskapsleier, Josua Selemane, sê hulle sal die paaie vir ‘n onbepaalde tyd versper todat daar aandag gegee word aan hulle griewe.

Sigaret veroorsaak glo brand by Steve Biko hospitaal

‘n Sigaretstompie is vermoedelik die oorsaak van die brand die Steve Biko Akademiese Hospitaal in Pretoria.

Die brand het veroorsaak dat verskeie afdelings van die hospitaal ontruim moes word.

Die Gautengse Departement van Gesondheid sê die brandweer en die polisie sal voortgaan om die oorsaak van die brand te ondersoek.

Dertien werknemers wat gehelp het om die betrokke deel van die hospitaal te ontruim, is vir rook-inaseming behandel en ontslaan.

‘n Woordvoerder van die Departement, Steve Mabona, sê geen pasiënte is deur die rook verontrief nie.

Boere wat lewens en grond wil beskerm kan reken op rassevergelding

Boere wat hul eie lewens en grond teen swart aanvallers wil beskerm, kan reken op die regime se rassevergelding.

Alhoewel die 72-jarige Vrystaatse boer van Parys te hulp gesnel is toe twee swartes hom wou vermoor, word Loedie van der Westhuizen se eie seun, Boeta, nou aangekla van moord.

Boeta het die naweek in die gevangenis deurgebring saam met drie ander wit boere van die omgewing.

Brig. Hangwani Mulaudzi, woordvoerder van die Valke, sê die wit boere staan voorlopig tereg weens moord.

Die twee swart aanvallers het geld geëis, maar moes op die vlug slaan toe die hulp opdaag. Hulle is uiteindelik aangekeer.

Tientalle boere was op die toneel waar die mans aangerand is toe die polisie opdaag. Albei mans het egter nog geleef toe die polisie hulle weggeneem het.

Een van die mans is by sy aankoms by die hospitaal in Parys dood en die ander een is by sy aankoms by die Pelonomi-hospitaal in Bloemfontein dood verklaar.

Die aanvallers was nie werknemers van Van der Westhuizen nie.

Boere leef in vrees dat een van hulle volgende kan wees nadat die 40-jarige boer Johan Strydom in 2010 met ’n ysterstaaf geslaan is en agter sy eie Mazda-bakkie gesleep is. Strydom het nie die aanval oorleef nie.

Loedie se dogter is die joernalis Alet Rademeyer.

Wits beloof om universiteite in 2016 verder te ontwrig

Die #FeesMustFall-beweging se terugkeer vir 2016 het by die Universiteit van die Witwatersrand afgeskop.

Op die eerste dag van registrasie, Wits se Verteenwoordigende Studenteraad (VSR) bevestig dat hulle sal voortgaan om die instelling te ontwrig.

In ‘n verklaring het die VSR gesê studente word glo gekonfronteer met ‘n soortgelyke probleem as ‘n jaar gelede.

“Duisende [swart] jeugdiges het nie toegang tot die instellings van hoër onderwys nie, ten spyte van hul akademiese vermoëns in die mees uitdagende omstandighede!”

Die studenteraad het weer ‘n appèl op ras gemaak om meriete te troef.

“Een akademiese en finansiële uitsluiting is een te veel, en ons weet dat akademiese uitsluitings dikwels gekoppel is aan finansiële kwessies, want daar is ‘n kampus vir die rykes en ‘n kampus vir die armes. So hierdie stelsel is ontwerp om stelselmatig die swart kind uit te sluit.”

Weens ‘n “strukturele uitsluitingsmeganisme” kan “geen bedrag uit fondsinsameling die krisis in hoër onderwys oplos nie,”sê die VSR.

#FeesMustFall is ‘n getalarm, kunsmatige anti-wit protesbeweging wat in middel-Oktober 2015 deur wit rewolusionêres op die been gebring is.

Protes het by die Universiteit van die Witwatersrand begin en versprei na die Universiteit van Kaapstad en die Universiteit van Rhodes.

President Jacob Zuma het uiteindelik verklaar dat daar geen toename in fooie vir 2016 sal wees nie.

Ontsnapte gevangene steeds soek

Die polisie op Senekal in die Vrystaat soek steeds na ‘n gevangene wat deel was van sewe gevangenes wat Saterdag uit die Senekal-tronk, waar hulle as verhoorafwagtendes aangehou is, ontsnap het.

Ses van die gevangenes is reeds aangekeer nadat hulle bewaarders oorrompel en hul selsleutels gevat het.

Polisiewoordvoerder, Phumelelo Dlamini, sê slegs Vasco Makubela (42) word steeds gesoek. Hy het die laaste keer wat hy gesien is ‘n blou broek en ‘n wit en swart gestreepte trui aangehad.

Dlamini sê die hoof van die Senekal korrektiewe dienste, Mokhane Nthoroane, is Saterdag omstreeks 07:30 deur een van die gevangenes in die been geskiet toe hy en ‘n bewaarder ‘n roetinebesoek in die selle afgelê het.

Een van die gevangenes het op Nthoroane begin skiet waarna hulle die mans oorrompel het. Die gevangenes het die sluitels van hul sel gevat en dit oopgesluit. Die mans het ook met die sleutels van ‘n kluis en die bewaarders se selfone op die vlug geslaan.

Dlamini sê die polisie het vinnig gereageer. Ses van die ontsnaptes is twee ure later naby Senekal in hegtenis geneem.

Hy vra mense om Makubela nie te konfronteer wanneer hulle hom gewaar nie, maar om eerder die polisie te ontbied. Die verhoorafwagtendes word van koperdiefstal en roof aangekla.

Nthoroane is na die Mediclinic Hoogland in Bethlehem gehaas. Na wat verneem word is hy in ‘n bestendige toestand.

Rassepolarisering oorheers sosiale media

Die radiopersoonlikheid Gareth Cliff, Standardbank se ekonoom Chris Hart en eiendomsmakelaar Penny Sparrow se beweerde rassisme het Suid-Afrikaanse sosiale media die afgelope week aan die gons gehad.

Meer as 45% van die sosiale gesprek in sewe dae het oor rassisme gehandel met ‘n kloof wat al hoe dieper tussen wit en swart raak.

Die land se swak matriekuitslae en krieket kon nie meer as 20% se belansgstelling wek nie.

Die matriekuitslae en Hashim Amla se bedanking is deur wedersydse rasaanvalle oorheers.

Sparrow het onder skoot gekom nadat sy op Facebook swart strandgangers as “ape” beskryf het.

Cliff is ingeroep nadat hy op Twitter gesê het dat mense nie regtig vryheid van spraak verstaan ​​nie.

Hart het die huidige regime se swak bestuur uitgelig.

Internasionaal maak Donald Trump, Star Wars en die Siriese oorlog opslae met byna 45% van die internasionale mediadekking.

Ten spyte van grootskaalse sensuur in Duitsland, het die etniese massaverkragtings tydens Nuwejaar en migrante-kriminaliteit uitgelek en oorheers die media in Duitsland.

Die invloedryke New York Times, ‘n NeoCon-mondstuk, het intussen gevra dat die Duitse kanselier Angela Merkel moet bedank omdat die nuus uitgelek het.

Duitse koerante word aktief ontmoedig om oor swart en bruin kriminaliteit te berig en die nuus het vir groot verleentheid gesorg by linkse meningsmouse.

Indien bevind word dat hulle aan die voorvalle van seksuele geweldpleging op Nuwejaar in Keulen deelgeneem het, sal asielsoekers gedeporteer word het die owerhede gesê.

Die polisie sê getuies het die aanvallers as van “Arabiese of Noord-Afrika-oorsprong” beskryf.

Byna 1,1 miljoen mense het verlede jaar in Duitsland politieke asiel gekry.

Amptenare het probeer vure doodslaan en inwoners gemaan “om nie alle vlugtelinge oor dieselfde kam te skeer nie”, en die verlinkse minister van justisie, Heiko Maas, moes inderhaas strenger maatreëls teen migrante belowe.

Minstens 106 vrouens het kriminele klagte van seksuele aanvalle en roof gelê.

“Indien dit aan die lig kom dat die aanvallers vlugtelinge was, het hulle die reg verbeur om ons gaste te wees,” het die hoofsekretaris van die konserwatiewe CSU, tans die sterkste party in kanselier Angela Merkel se koalisieregering, gesê.

Rand tuimel verder teen dollar, euro, pond

Die rand het verder teenoor die dollar verswak na R17,92, met vertroue in die ANC se ontluikende geldeenheid wat verwelk.

Op ‘n stadium moes Mandela se note R19,59 vir een euro opdok.

Sondagnag het die rand ‘n rekord laagtepunt van R17,92 teenoor die dollar behaal. Alhoewel die rand daarna effens versterk het, het dit steeds teen 40c swakker as Vrydag se sluitingsprys verhandel.

‘n Pond het op ‘n stadium R26,02 gekos, maar later ook effens herstel.

Rekordlaagtepunte is teenoor die groot geldeenhede aangeteken. In 2015 het die rand reeds 25% van sy waarde teenoor die dollar afgestaan en het sedert die einde van 2015 meer as 7% van sy waarde teenoor die dollar verloor.

Die beleerde Suid-Afrikaanse geldeenheid moes in een dag die skerpste daling in meer as sewe jaar trotseer, het Bloomberg berig.

Dit word voorts toegeskryf aan sukkelende hulpbronpryse weens die groeiafname in China asook die onlangse styging in Amerikaanse rentekoerse.

Zuma bevorder rasseverdeling en stook rassehaat met grond: Pieter Groenewald

“Pres. Jacob Zuma bevorder rasseverdeling en stook rassehaat met sy uitlating dat grond die oorsaak is van armoede, ongelykheid en werkloosheid en dat die grond in Suid-Afrika gesteel is. Met hierdie opmerking teiken Zuma die wittes in Suid-Afrika asof hulle die oorsaak is van armoede, ongelykheid en werkloosheid. Daar word ook gereeld in die parlement gesê dat ‘wittes het die grond gesteel’. Dit stook rassehaat en die Vryheidsfront Plus gaan ʼn klagte van rassisme indien by die Menseregtekommissie (MRK) om Zuma te ondersoek,” sê dr. Pieter Groenewald, hoofwoordvoerder oor grondsake van die Vryheidsfront Plus.

“Die feit dat Zuma hierdie opmerking in Rustenburg voor tradisionele leiers gemaak het, vererger die situasie as in gedagte gehou word wat die gevolge was met die uitlatings van die Zoeloe-koning oor vreemdelinge in Suid-Afrika. Dit is ook duidelik dat Zuma die EFF probeer troef oor die grondkwessie wat emosies en humeure vinnig laat opvlam.

“Die teendeel oor grond is egter waar. Grond vereis harde werk en kundigheid om bewerk te word en om produksie te lewer. Die blote besit van grond gaan nie armoede, ongelykheid en werkloosheid skielik oplos nie. Zuma en die ANC weet nie meer hoe om armoede en werkloosheid op te los nie en nou word op ʼn onverantwoordelike en emosionele wyse die wittes daarvoor beskuldig. Dit is ʼn gevaarlike resep wat rassekonflik skep,” het Groenewald gesê.