Dan Roodt, Author at praag.co.za

VSA en Frankryk loop uit tydens Ahmadinejad-toespraak

Verskeie afgevaardigdes, insluitende die VSA en Frankryk, het uit die VN se Algemene Vergadering tydens ‘n toespraak deur die Iranse president, Mahmoud Ahmadinejad, geloop. Dit word gesien as ‘n sein aan Ahmadinejad dat hierdie lande sy land se kernprogram afkeur.

Daar is ernstige kommer dat Iran hulle kernkapasiteit sal gebruik om massavernietigingswapens te vervaardig, waarskynlik vir gebruik teen Israel.

In sy toespraak het Ahmadinejad klem gelê op die deugde van Islam en gewaarsku dat ongebreidelde kapitalisme tot ‘n val sal kom, net soos wat met sosialisme gebeur het.

Ahmadinejad het Israel uitgesonder vir kritiek en dié land beskuldig van ‘n “onmenslike beleid” teen die Palestyne en hulle dominansie van die wêreld se politieke en ekonomiese aangeleenthede.

Hy het voorts gesê “die ontwaking van volke en die uitbreiding van vryheid wêreldwyd sal beteken dat [Israel] nie langer sal kan voortgaan met hulle skynheiligheid en venynige houding nie”.

Hy het nie gedurende sy toespraak verwys na Teheran se kernprogram nie.

Sy toespraak is met belangstelling deur Westerse moondhede gevolg en dit is voor sy aflewering van die podium af, vrygestel.

Hy het die Weste daarvan beskuldig dat hulle “oorlog, bloedvergieting, aggressie, terreur en intimidasie” in die Midde-Ooste saai en na die oorloë in Irak en Afghanistan verwys.

“Hoe kan misdade van die besetters teen kwesbare vroue en kinders en die vernietiging van hulle huise, plase, hospitale en skole so onvoorwaardelik deur sekere regerings ondersteun word?”

Die Iranse leier het gesê dit is tyd vir die wêreld om te reageer.

“Dit is nie meer aanvaarbaar dat ‘n klein minderheid die politiek, ekonomie en kultuur van groot dele van die wêreld oorheers met hulle ingewikklede netwerke en ‘n nuwe soort slawerny bedryf nie, en die reputasie van ander volke kwaad aandoen, selfs Europese volke en die VSA, om hulle rassitiese ambisies te volvoer nie.”

Pakistan en Wes-Indiërs veg hard maar bereik min

Die Wes-Indiese krieketspan het gister nie baie lank gevat om die wip en spoed van die kolfblad op die Wanderers gewoond te raak nie, maar in die kort tydjie was die top ses kolwers – en nommer agt op die koop toe – reeds terug in die paviljoen.

Dié span is natuurlik aanmekaar gelap en is iets tussen ‘n B-span en ‘n jeugspan. Dit was juis dié gebrek aan ervaring wat sy tol geëis het. Aanvangkolwers Richards en Fletcher, het hulleself nie eintlik vermoei om die wip van die kolfblad en die aard van die boulaanval deur te kyk nie. Die blad was lewendig en die jong snelbouler, Mohammad Aamer, nog meer so. Binne ‘n ommesientjie het hy die toporde ontwortel waarna die ouer Umar Gul sy voorbeeld gevol het en nóg drie paaltjies geneem het.

Hierna het Darren Sammy en Nikita Miller die oog ingespeel, en tot die skande van die topordekolwers, begin om die bal die veld vol te slaan. Miller, nommer 9 op die kolflys, het uiteindelik die span se hoogste telling van 57 gekry, maar selfs sy heldhaftigheid kon nie die Wes-Indiese debakel in ‘n skaflike telling verander nie.

Pakistan moes 135 lopies vir ‘n oorwinning insamel, maar met ewe onbesonne kolfwerk het hulle dit na ‘n formidabele teiken laat lyk. Die onbekende Gavin Tonge – wel, hulle is omtrent almal net aan hulle moeders bekend, het die Pakistanse toporde in skerwe gelaat met ‘n boulontleding van vier paaltjies vir 25 in tien boulbeurte.

Dit het naderhand nog ‘n jongeling, die pragmatiese Umar Akmal, in geselsskap met sy kaptein, Shahid Afridi, geverg om met ‘n spanninglose 41 lopies ‘n einde aan die malligheid te bring. Dié twee het die teiken in die 31ste boulbeurt gehaal.

Pakistan lyk allermins soos die span wat die 20-20 Wêreldbeker gewen het. Maar dis juis wanneer hulle soos ploerte lyk wat hulle eensklaps in ‘n onstuitbare span verander. Opponente sal in die komende wedstryde wel beraad wees om nie weer aan hierdie wedstryd te dink nie.

beaded tiaras Фильчаков прокурор

Die blye gedagte

Verwelk die krieketblommetjies al weer?

Ek en my maat Wim was daardie swart dag in 1999 persoonlik op Edgbaston in Birmingham, toe menere Klusener en Donald ‘n breinfloute beleef het en uitgehardloop is met die laaste bal van die Krieketwêreldbeker 1999. Ek kon sedertdien nog nie besluit wat was erger nie: die skok langs die veld, of hoe die Aussie-ondersteuners ons buite die stadion getart het nie.

Steve Waugh en kie het toe al die Proteas se blommetjies as “chokers” bestempel. Tydens dieselfde wedstryd in Birmingham het Herschelle Gibbs, te vol selfvertroue soos gewoonlik, vir Waugh gevang maar toe die bal slordig weggegooi. Die skeidsregter het geoordeel dat Gibbs nie beheer oor die bal gehad het nie en Waugh was gevolglik nie uit nie. Waugh het toe vir Gibbs gesê: “You’ve just dropped the World Cup, mate.”

Waugh se uittartery is sedertdien telkens reg bewys. In 2003 het sersantmajoor Sean Pollock nie sy sakrekenaar byderhand gehad nie, en is die blommetjies deur Sri Lanka in Durban gepluk. Hoe minder ek skryf oor die rampspoedige halfeindstryd teen Australië in die Karibbiese See in 2007, hoe beter. Dit was asof ‘n skielike breinfloute wat die kolwers beetgepak het toe hulle almal uitgekom het en verwoed probeer slaan het.

Nietemin leer die blommetjies nie hulle les nie. Dit loop weer oor van die selfvertroue. Voor die aanvang van die huidige IKR se Kampioenetrofee, spog Dale Steyn ewe windgat dat g’n span in die toernooi die blommetjies se gelykes is nie. Sri Lanka het egter nie na Steyn geluister nie, en eerder Steve Waugh se woord daarvoor gevat. Dit was van die begin af ‘n slagting.

Die naatbouler Wayne Parnell is gestriem in sy 10 boulbeurte. Grootbek Steyn se syfers was nie juis waffers nie. Roelof van der Merwe het moedig probeer. Waar, o waar, was Morné Morkel? As ek op my huis se voorstoep staan, kan ek Supersportpark se ligte sien. Al wat my gisteraand so ‘n effe hoop gegee het, was die dreigende donderweer wat uit die weste aangekom het. Miskien sou Duckworth-Lewis die blommetjies wonderbaarlik red. Toe nie.

Wat is dit met die blommetjies dat hulle 435 lopies in die beste eendagwedstryd van alle tye kan aanteken, maar dat hulle g’n vermoë het om tydens kompetisies soos die Wêreldbeker hond haaraf te maak nie?

“Chokers”, inderdaad.

Volksvergadering te Vegkop dié naweek

Die Boere-Afrikanervryheidsinisiatief het ‘n volksvergadering vir die komende naweek by die Vegkopfeesterrein naby Heilbron belê. Volgens die organiseerders het hulle gedurende die afgelope twee maande honderde duisende Afrikaners deur middel van pamflette, radio-uitsendings en die internet uitgenooi na die volksvergadering wat oor die naweek van 25 tot 27 September by Vegkop naby Heilbron in die Vrystaat sal plaasvind. Die vergadering word gehou om konsensus te bereik oor ‘n strategie vir die herstel van die vryheid van ons volk en dit vind plaas onder die tema “Soewereiniteit binne Gelofteverband”. Volledige besonderhede oor die program is te siene by volksvergadering.co.za.

Rassedebat spoel oor na TV

Die rassedebat wat in die Afrikaanse media, sowel koerante as webwerwe, begin het, het oor die naweek na die TV oorgespoel toe twee programme van die SAUK die toenemende verwydering tussen wit en swart opgehaal het.

Freek Robinson het in sy program “Fokus” op die tweede kanaal van die SAUK vir Flip Buys van Solidariteit en ds. Nico Smith ontvang vir ‘n debat oor Smith se voorspellings dat blankes dalk soos in Algerië uit die land verdryf mag word. Agterna het dr. Fanie du Toit van die Instituut vir Versoening uit Kaapstad ook ‘n bydrae gelewer om te sê dat “blankes nie moet stilbly” nie.

Nie lank daarna nie het ‘n rusie op die program Interface tussen die aanbiedster Tsepiso Makwetla en dr. Corné Mulder van die Vryheidsfront Plus losgebars. Rondom die kwessie van naamsveranderings het Makwetla die naam “Kafferskraal” herhaal in ‘n duidelike poging om swart kykers aan te hits. Sy het “Kafferskraal” voorgehou asof dit een van die name was wat Mulder nie verander wou hê nie, wat hom aan die einde van die program sy humeur laat verloor het.

Ander deelnemers aan “Interface” was die hoof van die ANC se Vryheidspark, Mongane Wally Serote en ‘n jong swart professor van Wits. Al die swart deelnemers, sowel as die aanbiedster, was dit eens dat “Suid-Afrika nog nie swart genoeg is nie” en dat veel meer gedoen moet word om rassekwotas op alle gebiede in te voer. Die feit dat Suid-Afrika nog plek-plek ‘n Westerse aanskyn het en blankes steeds in sekere sleutelposisies in die ekonomie verkeer, is as ‘n probleem uitgewys.

Op die vraag of “Suid-Afrika ‘n plek vir blanke Afrikaners soos Orania nodig het”, het dr. Corné Mulder geantwoord dat artikel 235 van die SA grondwet vir selfbeskikking voorsiening maak en dat Afrikaners die reg het om met mekaar te assosieer. Volgens Serote het hy ook die reg om te eniger tyd Orania te besoek.

Die debat tussen Flip Buys en Nico Smith was minder skerp, behalwe dat Smith sy vorige stellings herhaal het dat blankes heel moontlik uit die land geskop mag word soos die Franse Algeryne in die vroeë sestigerjare. Oor die kwessie van rassistiese houdings onder Afrikaners, het Buys gemeen dat “slegs ‘n klein minderheid hieraan ly”, terwyl Smith beweer dat “die meerderheid blankes, nie net Afrikaners nie, hulle hieraan skuldig maak”. ‘n Neerbuigende houding teenoor swartes is een van die manifestasies van sogenaamde “rassisme”.

Die swart deelnemers aan “Interface” was dit egter eens dat Suid-Afrika “maar aan die begin van sy veranderings” verkeer en dat veel meer name as tans byvoorbeeld gewysig moet word.

Tsepiso Makwetla het heel in haar skik gelyk dat sy Corné Mulder, deur hom die woord “Kafferskraal” in die mond te lê, kon uitlok om warm onder die kraag te raak.

Volgens ingeligte bronne voel kleurlinge tans uitgesluit van die rassedebat en gaan “Fokus” binnekort ook aan hulle ‘n spreukbeurt gee.

кукли Данильченко Харьков

Reise van Janssens en De Mist

Eers goewerneur Janssens, en later kommissaris-generaal De Mist het omvattende reise in die binneland onderneem. Die laaste gerieflike woonhuis waarin Janssens op pad na die oosgrens tuisgegaan het, was die boerewoning van Hillegard Mulder. In een van die grootste vertrekke het daar ‘n orrel gestaan. Daar het die gesin en die bure op Sondag byeengekom om godsdiensoefening te hou.

By die Gouritsrivier het Janssens die eerste daklose vreemdelinge teëgekom uit die gebiede wat deur die Xhosas en Khoi-Khoi geplunder is. In die omtrek van Algoabaai het die deerniswekkende toestand van groepies boere wat van hul plase verdryf was, die goewerneur diep getref. Graaff-Reinet was in ‘n treurige toestand. Die kerk, wat deur die Engelse as kaserne vir die pandoers gebruik is, was verweer. Baie huise was in puin en tuine verwaarloos. Al het net sowat twee-derde van die boere hul verliese bekend gemaak, was tussen 800 en 900 perde en byna 75 000 beeste en skape verlore.

Nadat Janssens met die vraagstukke aan die grens kennis gemaak het, het hy besef dat die verhouding tussen wit en swart aldaar net kon baat vind by die beperking van kontak tussen die twee groepe. Hy het bepaal dat geen wit mens ‘n swarte in sy diens mag neem nie, onder meer omdat verskille tussen individue tot algemene twiste kon lei. Janssens het ‘n klein klompie soldate onder kaptein L. Alberti by Algoabaai gelaat om die vrede aan die grens te probeer handhaaf. Alberti het later in ‘n boek geskryf dat daar twee grondbeginsels vir rus en welvaart is: dat die swartes binne hulle grense bly en dat alle omgang tussen wit en swart mense beëindig moes word.

Ná Janssens se terugkeer het De Mist op 22 Oktober 1803 met ‘n gevolg van 22 wit mense en 17 Khoi-Khoi uit Kaapstad vertrek. Onder hulle was die Duitse geneesheer dr. M.H.K. Lichtenstein, De Mist se seun Arnoldus Lambert, sy dogter Augusta en ‘n vriendin mej. E.M. Versveld. Die geselskap het eers noord en daarna ooswaarts gereis. Op die reis kon De Mist tot ander insigte oor die Kaapse samelewing kom. Sowel De Mist as Janssens was voorheen sterk onder die invloed van die leerstellings van Rousseau oor die “edele barbaar”. De Mist het toegegee dat hy te maklik geglo het aan John Barrow en die Fransman L. Degrandpére wat die grensboere so ongunstig beskryf het. Toe De Mist in 1803 self die toestand aan die grens waargeneem het, het hy geskryf hy kon nooit vermoed dat skrywers soos dié twee “enkel uit nationale nijd” soveel lasterlike onwaarhede kon verkondig nie.

Soos ander reisigers voor hulle, is de Mist en sy geselskap hartlik in die boerewonings ontvang. Lichtenstein, wat dikwels in Barrow se geskrifte van die “onbeskaafde boere” gelees het, moes hom telkens verbaas oor die aangename maniere van die mense wie se gasvryheid hulle geniet het. By “Prammeberg” in die Karoo verwonder hy hom oor die aangebore goeie maniere en natuurlike beleefdheid van die boere in ‘n droë eensame wêreld. Boere het met hul waens en gesinne van heinde en verre gekom om die geselskap te verwelkom. Almal het persentjies van wild of die een of ander eetgoed gebring. In Anna Böeseken se samevatting van De Mist se reis (waarvan hier gebruik gemaak is) lui een van die opskrifte: “Beskaafdheid van die Boere het Lichtenstein verbaas”.

план бани фото

VF+ wil met plaaslike ANC oor ‘Pretoria’ praat

Die Vryheidsfront Plus het uitsprake van die plaaslike ANC in Pretoria verwelkom waarin hulle erken het dat die naam van die hoofstad Pretoria is.

Die voorsitter van die ANC se Tshwane-distrik, Sputla Ramokgopa, het aangedui dat Pretoria se naam nie sonder meer verander sal word nie.

Volgens dr. Conrad Beyers, VF Plus-raadslid, is hierdie ‘n oorwinning vir Pretorianers en ‘n wekroep dat druk verder verskerp moet word om die naam van die stad te beskerm.

“Die plaaslike ANC is onder druk vanweë die stad se finansiële krisis en hulle eie ondersteuners maak dit aan hulle duidelik dat hulle dienslewering soek, nie naamsveranderinge nie. Die plaaslike ANC is duidelik verdeeld oor die naamkwessie,” het Beyers gesê.

Die VF Plus het die ANC-beheerde metroraad vroeër daarvan beskuldig dat die raad probeer om aandag af te lei van die finansiële krisis waarin hulle die stad gedompel het, nadat die metroraad die VF Plus voor die hof gedaag het om toestemming te kry om naamborde wat slegs die naam ‘Tshwane’ bevat, op te rig.

Die VF Plus het gesê dat hy in gesprek wil tree met die plaaslike leierskap van die ANC oor ‘n moontlike finale oplossing vir die naamkwessie. “Ons glo dat ‘n permanente oplossing moontlik is waarmee alle inwoners in die stad tevrede sal wees. Pretoria het die geleentheid om ‘n voorbeeld te stel oor hoe sensitiewe sake soos hierdie hanteer behoort te word.”

mositaldent.ru topcargo

VSA sluit alle amptelike kantore in SA

Die VSA sal hulle ambassade en ander Amerikaanse regeringskantore in Suid-Afrika Woensdag gesluit hou nadat ‘n veiligheidsbedreiging geïdentifiseer is. Die aard van die bedreiging is nie bekend nie.

Woordvoerder van die ambassade Sharon Hudson-Dean het Dinsdag gesê die kantore sal moontlik weer Woensdag heropen.

Ian Kelly van die VSA se State Department sê die bedreiging is “taamlike geloofwaardige inligting” teen Amerikaanse instellings in Suid-Afrika.

Alhoewel die Wêreldsokkertoernooi aanstaande jaar hier gehou gaan word, is dit nie op sigself ‘n teiken vir aanvalle nie.

Hudson-Dean sê dit sal die eerste keer in ‘n dekade wees wat die kantore gesluit sal wees weens veiligheidsredes.

Somali-rebelle het verlede week wraak gesweer nadat een van Al-Kaida se mees gesoekte lede deur Amerikaanse spesiale magte om die lewe gebring is, maar daar is geen vorige skakel tussen Somalië en Suid-Afrika nie.

In 1998 het bomaanvalle teen Amerikaanse ambassades in Kenia en Tanzanië die lewens van 224 mense geëis en duisende gewond.

Kelly sê die situasie word noukeurig gemonitor en toepaslike stappe sal geneem word om die bedreiging die hoof te bied..

Suid-Afrikaanse polisiekommissaris Bheki Cele kon ook nie besonderhede van die bedreiging gee nie, maar het nie die moontlikheid dat dit ‘n poets is, uitgesluit nie.

Hy het aan verslaggewers in Kaapstad gesê “Dis onder beheer.”

‘n Boodskap van die ambassade het Amerikaanse burgers gewaarsku dat Al-Kaida en verwante organisasies soos op 29 Julie terreuraanvalle op Amerikaanse belange in Europe, Asië, Afrika, Midde-Ooste beplan.

Die VSA se konsulate in Johannesburg, Durban en Kaapstad en ander regeringskantore wat USAID, die Agency for International Development, insluit, sal ook gesluit wees.

Misdaadmekka

As u hierdie nuuskommentaar lees, moet u uself as ‘n baie gelukkige persoon beskou. Dit beteken dat u nie een van vyftig mense is wat die afgelope jaar elke dag vermoor is nie. Dit beteken ook dat u nie een van die vyftig huiseienaars daagliks is by wie daar ingebreek is en u radio weggedra is terwyl u dalk bloeiend, aangerand of half doodgeslaan in die badkamer vasgemaak was nie. Dit beteken dat u ook nog radio in u motor kan luister, en dat u nie een van die een en veertig mense daagliks is wie se motor gekaap is nie.

Dit is die realiteit van die ANC-Suid-Afrika, soos dit gister oopgevlek is toe die misdaadstatistieke uiteindelik vrygestel is. Met dié skokkende statistiek is dit nou heel verstaanbaar dat die huidige adjunk-president van die ANC, Kgalema Motlanthe, in sy tyd as president vroeër vanjaar besluit het om nie hierdie statistiek voor die algemene verkiesing bekend te maak nie.

Die afname van 1,8 persent in moordgevalle is weglaatbaar. Om te wil juig oor ‘n afname van 339 moorde oor ‘n tydperk van ‘n jaar, terwyl daar steeds byna 18500 mense vermoor is, grens aan die absurde. Die enigste rede waarom daar ‘n algehele afname in die getal moorde is, is omdat daar ‘n 17 persent afname was in die Wes-Kaap en ‘n 7,5 persent afname in die Oos-Kaap. Maar in Oos-Transvaal het moorde met ‘n stewige 8 persent gestyg, in Noord-Transvaal met byna 8 persent, in Sentraal Transvaal met 5,7 persent, en in die ander provinsies was daar ook stygings.

Huisrooftogte het skrikwekkend gestyg. Die provinsie waar die styging die minste was, is Sentraal-Transvaal, waar die styging “slegs” 11 persent was. Maar in die Noord-Kaap het huisrooftogte met 275 persent gestyg, in die Oos-Kaap byna 129 persent, in die Vrystaat byna 128 persent en ook die Wes-Kaap is nie dié euwel gespaar nie, een meer as 22 persent méér huisrooftogte het daar voorgekom.

Rooftogte by sake-ondernemings het ook drasties gestyg. Die feit dat nie méér mense tydens die verskillende rooftogte dood is nie, kan byna as blote geluk geskryf word, want in baie gevalle word mense geskiet, gesteek, aangerand en gewond. Daar is dus geen rede vir enige gerustheid nie. Die situasie is erger as in die meeste oorloggeteisterde lande.

Hierdie statistiek kan ook nie meer op Thabo Mbeki en sy minister van veiligheid en sekuriteit se brood gesmeer word nie. Die grootste tydperk was onder die huidige minister van polisie, wat al deur Motlanthe aangestel is nadat Mbeki “herroep” is. Ons moet dus geen valse hoop koester dat onder Zuma en sy minister dinge beter gaan nie, want duidelik gebeur dit nie.

Daar kan nog baie oor die misdaad gesê word, maar dit sal ons net warm onder die boordjie maak. Die belangrikste is om te besef dat ons ons belastinggeld mors, want die staat gebruik dit nie om sy inwoners te beskerm nie. Ons sal een of ander tyd ernstig moet begin besin oor die hele kwessie van belastingbetaling aan die staat, vir dienste wat nie gelewer word nie.

Voorts moet ons besef dat ons ons asem mors om die regering daarop te wys dat dit sy grondwetlike plig is om ons te beskerm. Hy doen dit al vyftien jaar lank nié. Ons sal dit self moet doen. Ons sal nog meer paraat moet word, onsself moet laat oplei om huis en haard te beskerm en te verdedig, betrokke raak by mekaar, en mekaar beskerm en mekaar se belange op die hart dra.

Bowenal sal ons weer eens moet besef dat hierdie nie die soort bestel is wat strook met ons kultuur nie, en dat ons dringend moet kyk na ‘n alternatief. Om te dink ons kan hierdie land “maak werk” en ‘n leefbare situasie kan help skep, is, met alle redelikheid, ‘n hersenskim – pragmatiese wensdenkery.

барби ляльки прокурор Фильчаков