Etiket: terreur

ISIS-aanvaller dood senior polisiebeampte in Parys

‘n Senior Franse polisiebevelvoerder is buite sy huis doodgesteek asook sy metgesel, ‘n polisievrou, in ‘n aanval deur die Islamitiese staat.

Die Franse regering het dit as ‘n “volslae daad van terrorisme” beskryf.

Die aanvaller, ‘n 25-jarige man van Marokkaanse afkoms, is tronk toe gestuur in 2013 vir hulp aan Islamitiese militante om na Pakistan te reis en was onder toesig van die intelligensiedienste.

Ten tyde van die aanval, het die polisie selfs meeluisteringstoerusting teen hom ontplooi, het polisiebronne gesê.

Die aanvaller het deel van die aanval verfilm en op Facebook uitgesaai, volgens David Thomson, ‘n joernalis wat in radikale Islamiete spesialiseer.

In sy Facebookboodskap, het die terroris die aanval aan die Euro 2016-sokkertoernooi gekoppel wat tans aan die gang is in Frankryk en gesê: “Die Euro sal ‘n begraafplaas wees.”

Die aanvaller, Larossi Abballa, het die 42-jarige bevelvoerder herhaaldelik in die maag gesteek Maandagaand.

Hy het toe homself binne-in die huis in Magnanville toegesluit, ‘n voorstad sowat 60km wes van Parys, en die man se 36-jarige metgesel en hul drie-jaar-oue seun as gyselaars aangehou.

Die vrou, ‘n sekretaresse by ‘n polisiestasie in ‘n nabygeleë woonbuurt, is vermoor met ‘n mes, het ‘n bron na aan die ondersoek gesê voordat hy deur ‘n spesiale polisie-eenheid doodgeskiet is.

Op een stadium het die terroris die na die klein seuntjie agter hom op die rusbank beduie tydens die verfilming en gesê hy weet nie wat hy met hom gaan doen nie.

Die polisie het op die liggaam van die vrou afgekom, maar die jong seun is gered.

Die seun was ongedeerd, maar in ‘n toestand van skok.

Die Islamitiese Staat het op hul webwerf vroeër bevestig dat die aanval deur ‘n ISIS-terroris uitgevoer is.

Irakse magte dring Fallujah binne

Irakse elite teenterreur-magte het Woensdag dieper in die stad Fallujah, wat onder beheer van die Islamitiese Staat (ISIS) is, inbeweeg, net meer as twee weke nadat die offensief begin het om die stad te herower.

Die stad het simboliese betekenis vir die militante groep en was vir ‘n geruime tyd ‘n vesting van militante wat, sedert die 2003 Amerikaans-geleide inval in Irak, teen die besetting gekant is.

Nadat hulle Sondag die suidelike rand van die stad binnegedring het, het Irakse magte Woensdagoggend die woonbuurt Shuhada binnegegaan, het AP berig.

Volgens genl.maj. Hadi Zayid Kassar, adjunkbevelvoerder van die teenterreur-magte in Fallujah, het artillerievuur en vuurpyl-aanvalle die weg gebaan sodat die eerste kolom swart Humvees in Shuhada, in die suide van Fallujah, kon inbeweeg.

Fallujah is een van die laaste ISIS-vestings in Irak. Die militante Soenni-groep beheer reeds die afgelope twee jaar die stad, wat 65 kilometer wes van Bagdad geleë is.

Irakse magte het reeds sterk teenstand in die stryd om Fallujah teëgekom. Uitgebreide tonnels, goed opgeleide sluipskutters en bomme langs die pad wat deur ISIS geplant is, het die aanvanklike aanslag op die stad belemmer.

Ná ‘n blitzkrieg regoor die land in die somer van 2014, word die gebied nou stadig van die ISIS-militante gesuiwer.

Die operasie om Fallujah te herwin, is glo een van die moeilikstes nog, maar ISIS is reeds op die agtervoet in Libië sowel as Sirië waar Koerdiese magte op die punt staan om Raqqa te herower.

SA ministers byeen oor Amerikaanse terreurwaarskuwing

Ministers binne die veiligheidsgroepering vergader vandag na ‘n terreurwaarskuwing wat deur die Amerikaanse ambassade in Pretoria uitgereik is, het RSG berig.

Maar die waarskuwings kom van ‘n besmette bron, ‘n sakeman van Oos-Afrika wat glo in Suid-Afrika woon en sulke gerugte versprei teen betaling het News24 berig.

‘n Bron uit die Suid-Afrikaanse intelligensiediens het gesê die sakeman is glo ‘n “gediskrediteerde” informant wat net geld najaag vir sy inligting.

Suid-Afrikaanse owerhede het die bedreiging onderspeel en gesê daar is geen rede tot paniek nie.

Die Amerikaanse regering het vroeër sy burgers in Suid-Afrika gewaarsku dat terreurgroepe Amerikaanse toeriste by luukse winkelsentrums in groot stede kan teiken.

Brittanje en Australië het ook reiswaarskuwings vir hulle burgers uitgereik.

‘n Woordvoerder van die Amerikaanse ambassade, Cynthia Harvey, sê wanneer hulle spesifieke en geloofwaardige inligting oor bedreigings ontvang, is dit hulle beleid om die inligting bekend te maak.

Sy het ook weer bevestig dat hulle met die Suid-Afrikaanse owerhede saamwerk.

Die Instituut vir Sekerheidstudies het vroeër gewaarsku dat terreurdreigemente in Suid-Afrika nie ligtelik opgeneem of geïgnoreer moet word nie.

‘n Senior navorser by die Instituut, Martin Ewi, sê terreurgroepe wil Amerikaanse en Europese belange wêreldwyd aanval, en dit sluit Suid-Afrika in.

Maar die Afrika-direkteur vir terreurnavorsing en analise (TRAC), Jasmine Opperman het gesê die waarskuwings is eerder gerig om buitelandse burgers “wat duidelik aandui dat hulle hul dreigemente van direkte aanvalle op Suid-Afrikaanse bodem invoer”.

Dodetal styg na Al-Sjabaab-aanval in Mogadisjoe

Die dodetal in die aanval op ‘n hotel in die Somaliese hoofstad, Mogadisjoe het tot 16 gestyg en sal na verwagting verder styg. Ongeveer 55 mense is gewond.

Al-Sjabaab het verantwoordelikheid vir die aanval op die Ambassadorhotel aanvaar waar ‘n motorbom eers afgegaan het voordat militante die gebou bestorm het.

Die hotel word veral deur Westerlinge besoek. Die BBC het berig dat die hotel hoofsaaklik gebruik word deur vooraanstaande Somaliërs, wat onder meer lede van die Parlement insluit.

Twee wetmakers is in die aanval gedood, volgens die Somaliese media.

Ambulansdienste sê is talle mense gewond en die hoofhospitaal in die stad, is oorvol.

Sporadiese geweervuur weerklink nog in die omtrek van die hotel.

Volgens `n polisiebeampte is veiligheidsmagte in beheer van die eerste vier verdiepings, maar die vyfde verdieping is nog onveilig.

Paaie in die gebied is gesluit.

Daar is eers beweer dat die gewapende aanvallers die boonste vloer probeer oorgeneem het, maar dat hulle deur die veiligheidsmagte teruggedryf is.

In Washington, het Amerikaanse amptenare gesê Amerikaanse troepe verskaf raad, bystand en ondersteuning teen die militante. Hulle het met die AP nuusagentskap op voorwaarde van anonimiteit gepraat.

Voor die aanval op die hotel, is ‘n bevelvoerder wat glo verantwoordelik was vir die dodelike aanval op Kenia se Garissa Universiteit in 2015, doodgeskiet is in die suide van Somalië.

Plaaslike veiligheidsmagte in die Somalië kusdorp Kismayo het bekend gemaak dat Mohamed Mohamud Ali, die vermeende argitek van die bloedbad in Garissa, oornag gedood is.

Die aanval in April 2015 op Garissa Universiteitskollege, 365km noord van die Keniaanse hoofstad Nairobi, het die lewens van 148 mense geëis, 142 van hulle studente.

Die Afrika Unie se vredesmag het Al-Sjabaab in 2011 uit die stad probeer verdryf, maar gereelde aanvalle vind nog gereeld plaas.

ISIS teiken Irak se hoofstad

Militante het Maandag ’n vlaag aanvalle, waarin die kommersiële deel in en om die Irakse hoofstad, Bagdad geteiken is, van stapel gestuur, het AP berig.

Minstens 20 mense is dood en meer as 50 is beseer. Die nuus kom midde aanduidings dat Irakse troepe gereed is om die stad Fallujah, wes van Bagdad, te herower. Dit is tans onder beheer van die Islamitiese Staat (ISIS).

Sowat 20 000 kinders en burgerlikes is in Fallujah vasgekeer.

Niemand het dadelik aanspreeklikheid vir die aanvalle aanvaar nie, wat die kentekens van die ekstremiste getoon het. ISIS het verantwoordelik vir verskeie onlangse dodelike aanvalle in Bagdad en elders aanvaar.

Sodanige aanvalle word gesien as ’n poging deur die militante om die weermag se aandag van die frontlinies af te lei.

Die dodelikste aanval Maandag het die noordelike Sjiïties-gedomineerde Sjaab-woonbuurt van Bagdad plaasgevind waar ’n selfmoordbomaanvaller met sy plofstofbelaaide voertuig in ’n deursoekingspunt naby aan ’n kommersiële gebied vasgejaag en die lewens van vyf burgerlikes en drie soldate geëis het.

Nog 14 mense is in die aanval beseer.

’n Selfmoord-motorbomaanvaller het ook op ’n buitemuurse mark in die dorp, Tarmijah, ongeveer 50 kilometer noord van Bagdad, toegeslaan en die lewens van vier burgerlikes en twee polisiebeamptes geëis.

Die aanvalle kom midde Irakse militêre operasies om ISIS te ontsetel en Fallujah te herower nadat die stad vir twee jaar in die hande van militante was.

Die operasie is ’n week gelede van stapel gestuur met Irakse magte wat kragte met paramilitêre troepe, met die lugsteun van die Amerikaans-geleide koalisie, saamsnoer.

Die stad is een van die laaste belangrike vestings van ISIS in die weste van Irak. Die ekstremistiese groep beheer steeds grondgebied in die noorde en weste van die land asook Mosul, Irak se tweede grootste stad.

Chevron-aanleg in Nigerië aangeval

’n Nigeriese burgerregteleier en inwoner van die Niger-delta, het bevestig dat militante ’n olieaanleg van die Chevron-maatskappy in die gebied aangeval het.

Die militante, bekend as die NDA, het laat Woensdag aangekondig dat hulle die hoofelektrisiteitstoevoerlyn na die Escravos-aanleg opgeblaas het.

Die NDA sê hulle veg vir ’n groter deel van olie-wins, ’n einde aan besoedeling en onafhanklikwording van die suidelike streek, en het oliemaatskappye tot die einde van die maand gegun om aan die gebied te onttrek.

Abuja het in reaksie weermagversterkings na die gebied gestuur.

Die Britse minister van buitelandse sake, Philip Hammond, het vroeër gesê Nigerië se president, Muhammadu Buhari, moet oplossings vir die sleuteloorsake van die konflik vind.

Ruolie-verkope uit die delta, maak 70 persent van die nasionale inkomste van Afrika se grootste ekonomie uit, maar inwoners, van wie baie met die militante simpatiseer, kla reeds vir ’n geruime tyd oor die armoede wat inwoners teister.

Buhari het ’n amnestie-ooreenkoms verleng wat in 2009 met militante gesluit is, maar finansiering vir die amnestieprogram gesny en kontrakte met voormalige militante opgeskort om die pypleidings te beskerm wat in die verlede aangeval is.

Raaisel verdiep oor vlugbeamptes op EgyptAir-rampvliegtuig

Drie vlugsekuriteitsbeamptes was onder die 66 mense aan boord EgyptAir vlug MS804 wat neergestort in die Middellandse See vroeg Donderdag, het owerhede gesê.

Frankryk se vervoerhoof Alain Vidalies het aan verslaggewers gesê dat dit nie “te veel” sekuriteitsbeamptes op so ‘n vlug was nie en dit is “die gewone praktyk”. Hy het bygevoeg dat die vliegtuig, wat 189 passasiers kan vervoer – geen ander vrag in die ruim gehad het nie.

‘n Voormalige Amerikaanse NTSB-ondersoeker na vliegveiliheid, Greg Feith het aan MSNBC gesê dat Egipte se sekuriteit onlangs ‘n hupstoot gekry het, wat die aantal offisiere aan boord sou kon verduidelik.

“Die enigste ander rede om sekuriteitspersoneel te hê soos ons vandag hier doen in die VSA is as hulle iemand van belang vervoer,” het Feith bygevoeg. “Maar die mees waarskynlike is dat dit soortgelyk aan ons federale lugbeamptes was wat op hierdie vlug was.”

Sekuriteit op Egiptiese vliegtuie is opgeskerp nadat ‘n Russiese Metrojet-passasiervliegtuig wat vanaf die lughawe Sharm el-Sheikh op 31 Oktober verlede jaar vertrek het, met al 224 mense aan boord verongeluk het.

Die vlug was slegs drie minute in Egipte se lugruim voordat dit verdwyn het, wat beteken hulle sal die ondersoek lei.

Die Griekse minister van verdediging, Panos Kammenos, het later volgens Reuters op ‘n nuuskonferensie gesê die vliegtuig het, voordat dit van die radarskerms af verdwyn het, ‘n paar keer skielik van rigting verander en hoogte verloor.

Wrakstukke wat Donderdag in die Middellandse See gevind is, is nie dié van EgyptAir nie.

Die Egiptiese ministerie van burgerlugvaart het aanvanklik gesê Griekse owerhede het “drywende materiaal” en lewensreddingsbaadjies gevind wat moontlik deel van vlug MS804 se Airbus A320 was.

EgyptAir se visepresident, Ahmed Adel, het egter laat Donderdagaand aan CNN gesê die wrak is steeds nie gevind nie.

“Die wrakstukke wat gevind is, is nie deel van vlug MS804 nie. Die soektog duur voort,” het Adel gesê.

Intussen het amptenare van verskeie Amerikaanse agentskappe aan Reuters gesê ‘n ontleding van satelliet-beeldmateriaal tot dusver dui nie op ‘n ontploffing aan boord van die Airbus A320 nie.

Die FBI se direkteur Jim Comey het vroeëre berigte weerspreek dat daar ‘n ontploffing was wat deur ‘n bom veroorsaak kon gewees het.

Alexander Bortnikov, die direkteur van die Russiese Federale Veiligheidsdiens, het gister gesê die ongeluk is waarskynlik te wyte aan ‘n terroriste-aanval.

Bortnikov het dié opmerkings gemaak tydens ‘n sitting van die Raad van die hoofde van sekuriteit en spesiale dienste van CIS-lidlande, het die Russiese nuusagentskap Tass berig.

EgyptAir-vliegramp was ‘n terreuraanval

‘n Terreuraanval is die mees waarskynlike verklaring vir die verdwyning van ‘n EgyptAir-vlug tussen Parys en Kaïro sê kenners. Donald Trump, presidentskandidaat in die VSA, het hulle gelyk gegee.

Die Franse grenspolisie ondersoek reeds die moontlikheid dat Islamitiese werkers op die lughawe Charles de Gaulles kon gehelp het om die aanval te fasiliteer.

Die hoof van interne intelligensiediens in Frankryk, Patrick Calvar het gewaarsku dat die land “duidelik geteiken” word deur ISIS net ‘n week voor die aanslag op die Parys-na-Kaïro vlug.

Frankryk het twee keer verlede jaar deurgeloop, met die Charlie Hebdo-aanval in Januarie en die aanvalle Parys in November waarna die Franse veiligheidsmagte op ‘n hoë gereedheidsgrondslag geplaas is.

Calvar is in die plaaslike aangehaal: “Ons word gekonfronteer met ‘n nuwe vorm van aanval. ‘n Terroriste-veldtog wat gekenmerk word deur ploftoestelle wat op plekke geplant word waar groot skares versamel, hierdie soort optrede te vermenigvuldig om ‘n klimaat van paniek te skep.”

Die vliegtuig het in die nag verdwyn met 66 passasiers aan boord. Die kaptein van ‘n handelsvaartuig beweer hy het vlamme gesien in die lug 150 myl suid van die Griekse eiland Karpathos naby waar die wrak gevind is.

“Die Franse koerant Le Figaro verwys na ‘n Franse grenspolisiebron wat sê dat speurders hul aandag sal fokus op grondbemanning op die lughawe Charles de Gaulles, om vas te stel of lughawewerknemers ‘n sekuriteitsrisiko inhou,” het die BBC berig.

“Die bron het gesê dat militante Moslems onder diegene is met toegang tot die laai van vrag by vliegtuie.”

Kort ná die slagting in Parys verlede jaar, het die veiligheidsdiens ontdek dat “57 werknemers (by Charles de Gaulles) met toegang tot vliegtuie, op ‘n terreurswartlys was.”

Najim Laachraoui, een van die Brusselse bomaanvallers, het ook by die lughawe Zaventem vir vyf jaar lank voor die aanval gewerk.

Maar die bisarre bewegings van die vliegtuig, wat 22,000 voet geval het voordat dit ‘n 90 grade swaai na links en ‘n 360 grade swaai na regs geneem het, dui daarop dat iets met die beheer van die vliegtuig kon fout gegaan het

Dit was dus nie noodwendig uit die lug geblaas deur ‘n missiel of ‘n toestel aan boord nie.

Dit is onwaarskynlik dat die vlieënier betrokke was by een of ander voorval in die kajuit soos in die geval van die Duitse vlieënier van Germanwings wat glo die vliegtuig vol skoolkinders “opsetlik” laat verongeluk het in die Alpe.

‘n Lugvaartkunde deskundige het daarop gewys dat die A320 oor die algemeen ‘n uitstekende veiligheidsrekord het en die ramp nie weens ‘n tegniese fout kon plaasvind nie.

Presidentskandidaat Donald Trump het vanoggend getwiet: “Dit lyk asof dit nog ‘n terroriste-aanval was. Vliegtuig vertrek uit Parys. Wanneer sal ons kwaai raak, slim en oplettend? Groot haat en siekte!”

Parysaanval-verdagte aan Franse oorhandig

Die top verdagte in die Parys-aanvalle, Salah Abdeslam, is Woensdag aan Franse owerhede oorhandig, het Belgiese aanklaers bekendgemaak.

Abdeslam, ‘n Franse burger van Marokkaanse oorsprong, is sover bekend die laaste oorlewende lid van die terreur-groep wat in November die dood van 130 mense in die Franse hoofstad veroorsaak het.

“Binne die raamwerk van die Parys-aanvalle van 13 November 2015, is Salah Abdeslam vanoggend aan die Franse owerhede oorhandig,” het ‘n verklaring gelui.

Geen verdere inligting oor die presiese tyd en omstandighede van die uitlewering is bekendgemaak nie.

Belgiese polisie het probeer om hom te ondervra oor sy verbintenis met drie selfmoordbomaanvallers wat Brussel se lughawe en moltreinstasie op 22 Maart aangeval het en waarin 32 mense dood en honderde beseer is.

Karel Combrinck: Bush en Obama in die bed oor 9/11

Sedert die 11 September 2001-aanslae teen die tweelingtorings van die World Trade Center in New York en die Pentagon in Washington, het ‘n legio teorieë ontstaan wat probeer verklaar wie eintlik vir die aanslae verantwoordelik was. Sommige van hierdie teorieë lyk na onsin, ander weer kom besonder geloofwaardig voor en mag inderdaad selfs die waarheid wees. Maar dit is ook so dat daar soveel stories is dat ‘n gewone mens moeite het om die kaf van die koring te skei. Dit is nie die bedoeling om al die ontledings en teorieë wat in omloop is, hier te probeer herhaal nie , maar bloot om enkele gevalle uit te lig wat moontlik interessant mag wees.

Na die 9/11-aanslae was daar uit die staanspoor waarnemers wat gemotiveerde beskuldigings gemaak het dat daar ‘n sterk verband bestaan tussen die aanvalle in New York en Washington, en Saoedi-Arabië was. En meer nog is daar selfs agterdog dat die Amerikaanse regering bewus was van Saoedi-betrokkenheid en dat hulle dit oogluikend toegelaat het, of nog erger, bevorder het en in elk geval nog steeds verdoesel.

Van die feite wat bekend is, is onder meer dat van die 19 terroriste wat by die aanval betrokke was, 15 burgers van Saoedi-Arabië was. Osama Bin Laden was natuurlik self ook ‘n Saoedi, hoewel daar twyfel is of Bin Laden hoegenaamd by die aanvalle betrokke was. Verder is dit ook so dat al 19 van die aanvallers visums gekry het om Amerika te besoek, ten spyte van die normale drakoniese Amerikaanse visumvereistes, veral ten opsigte van besoekers uit die Midde-Ooste. (Vergelyk daarmee dr Roodt se visumaansoek wat geweier word.)

Daar is ook eerstehandse getuienis van Amerikaanse konsulêre beamptes wat ten tye van die aanslag in Saoedi-Arabië diens gedoen het, dat druk « van bo » op hulle uitgeoefen is om visums aan lede van die terroristekommando toe te staan en in minstens een geval bloot opdrag ontvang het dat hy ‘n visum moet toestaan. In ander gevalle is konsulêre beamtes gedreig dat hulle hul betrekkings sou verloor indien hulle sou weier om visums aan bepaalde persone toe te staan.

Dit is ook bekend dat verskeie van die terroriste vliegopleiding aan Amerikaanse vliegskole ontvang het. Die opleiding was natuurlik met die oog op die aanvalle in New York en Washington. Die Amerikaanse polisie en intelligensiedienste was bewus daarvan dat Arabiere vlugopleiding in Amerika kry, maar het niks daaromtrent gedoen nie. Nog ‘n raaisel in hierdie verband is hoedat die Arabiere (daar was vier) wat skynbaar geen vorige vliegondervinding of kennis gehad het nie, binne enkele maande kon vorder na ‘n punt waar hulle reusepasssierstralers kon vlieg op ‘n uiters komplekse sending. Om ‘n groot Boeing of Airbus te kan vlieg, neem vanaf die stadium van ondervinding op ‘n ligte eenmotorige skroefvliegtuig normaalweg tot 20 jaar met duisende ure vliegondervinding.

En dan is daar nog die die verslag van die gesamentlike komitee van ondersoek van die Amerikaanse Kongres (President, Senaat, Huis van Verteenwoordigers) na die 11 September-aanslae waarvan die eerste 28 blasdsye deur Pres George Bush tot geheime dokument geklassifiseer is en wat, volgens talle kommentators aanduidings bevat van Saoedi-betrokkenheid by die aanvalle. Inderdaad eienaardig dat in die wêreld se grootste demokrasie, die bevolking nie mag weet wat die bevindings is van hulle verkose verteenwoordigers oor so ‘n belangrike aangeleentheid nie.

Op 17 April vanjaar het daar ‘n artikel in die New York Post verskyn wat onder meer soos volg lui :

« The Saudi Kingdom’s involvement was deliberately covered up at the highest levels of our government. And the coverup goes beyond locking up the 28 pages of the Saudi report in a vault of the US Capitol basement. Investigations were throttled , co-conspirators were let off the hook. Time and time again. »

Nou was daar die afgelope dae weer ‘n interessante nuwe verwikkeling wat lig op die aangeleentheid mag werp. ‘n Moslemfundamentalis wat sedert 2009 vir terroristebedrywighede in ‘n Amerikaanse tronk aangehou word, Zacharias Moussoui, het naamlik so pas in ‘n beëdigde verklaring bekendgemaak dat die 11 September 2001-aanslag deur Saoedi-Arabië beplan en gefinansier is. Hierdie verklaring is uiteraard ‘n reuseknuppel in die bos en verwek groot opspraak in Amerika.

Die posisie is nou dat die Amerikaanse regsowerhede ‘n ondersoek na die aantygings wil begin, maar dat ten einde dit moontlik te maak, wetgewing skynbaar eers nodig is, aangesien ‘n vreemde moondheid betrokke is. Volgens berigte staan Barack Obama wetgewing van hierdie aard ten sterkste teen. Weereens vreemd. Daarenteen dring die naasbestaandes van die 3000 Amerikaners wat in die aanvalle omgekom het, weer sterk aan op ‘n regsondersoek, soos verstaanbaar is.

Die interessantste en ook die moeilikste vraag bly egter dat indien die Saoedi’s wel agter die 11 September-aanvalle gesit het en die Amerikaanse regering dit oogluikend toegelaat het, dan waarom? Ek wens ek kon die vraag beantwoord. Dit kan wees dat die aanvalle georganiseer is ten einde die Amerikaners van ‘n voorwendsel te voorsien om die kaarte in die olieryke Midde-Ooste deurmekaar te krap. Duidelik het die Amerikaners die aanslag van 11 September gebruik om openbare gevoelens teen Saddam Hoesein op te sweep en militêre optrede teen hom, Ghaddafi van Libië en Bachir Al Assad van Sirië te regverdig. Ironies is dat al drie hierdie leiers geswore vyande van Moslemfundamentalisme, insluitend Al-Kaida was en is.

Vir die rekord kan daarop gewys word dat dit natuurlik nie die eerste keer in die geskiedenis sal wees dat ‘n groot moondheid ‘n foefie gebruik om ‘n oorlog te begin nie. So is daar baie gesaghebbendes wat glo dat die Amerikaners die passasierskip, die Lusitania gekelder het ten einde Amerika se betrokkenheid in die Eerste WO te bespoedig. Soortgelyk is die menings dat Amerika ook die aanval op Pearl Harbour georkestreer het om Amerika by die Tweede WO te betrek. Dink ook maar aan ons eie geval hoe die Engelse die uitlanderkwessie gebruik het as voorwendsel om die Boererepublieke te vernietig.

In ‘n werk, Visas for Al-Qaida, wat in 2015 verskyn het, skryf ‘n voormalige Amerikaanse konsulêre beampte in Saoedi-Arabië, Michael Springmann : « This tale is a sordid sketch of backstabbing, disloyalty, double crossing, faithlessness, falsity, perfidy, sellouts, treachery and betrayal. All of this is in addition to the stupidity and incompetence normally manifested by the State Department and the intelligence services ». Dit sê omtrent alles. Terselderyd is dit ook die beste beskrywing van die laaste dae van die Nasionale Party-regering wat ek nog onder oë gehad het.

Parys-terreurverdagte het Duitse kernsentrum se planne gehad

Salah Abdesalam, ’n hoofverdagte in die Parys-terreuraanvalle, het dokumente oor die Duitse kernnavorsingsentrum, Juelich in sy woonstel in die Molenbeek-gebied van Brussel gehad, het ’n groep Duitse koerante gister berig.

Juelich is ná aan die grens met België geleë en kernafval word daar geberg, het Reuters berig.

Die sentrum het in ’n verklaring gesê daar is geen aanduidings van gevaar nie, maar dat hulle in kontak met veiligheidsowerhede en kern-toesighouers is.

Kommer dat Islamitiese militante hul aandag op die kernnywerheid se swak plekke toespits, het opgelaai ná die aanvalle in Brussel waar selfmoordbomaanvallers die lewens van 32 mense geëis het.

Brussel-aanvallers wou Parys weer bom

Die terroriste wat verlede maand Brussel geteiken het, het aanvanklik beplan om ‘n tweede aanval op Frankryk te doen, het België se Federale Vervolgingsgesag gesê.

Maar die groep was “verras deur die spoed van die vordering in die voortgesette ondersoek” en het besluit om ‘n aanval op die Belgiese hoofstad te loods, het die kantoor in ‘n verklaring gesê.

Twee selfmoordbommers het 16 mense op die lughawe Brussel op 22 Maart vermoor en in ‘n daaropvolgende ontploffing by Maalbeek-moltreinstasie dieselfde oggend, nog 16 mense opgeblaas.

Ondersoekbeamptes het bande ontdek tussen die sel agter die Brussel-aanvalle en die groep wat 130 mense in Parys vermoor het op 13 November verlede jaar.

Die verklaring Sondag het bevestig wat baie vermoed het: Die reeks klopjagte en arrestasies in die week in die aanloop tot die Brussel-aanvalle, het die moordenaars tot aksie oorgehaal.

Saterdag, het Belgiese owerhede vier mans aangekla weens hul deelname aan “terreurmoorde” en die “aktiwiteite van ‘n terroriste-groep” nalv die Brussel-aanvalle.

Een van hulle, Mohamed Abrini, is ook aangekla in verband met die aanvalle in Parys, het aanklaers gesê.

Abrini is geïdentifiseer as die sogenaamde “man in die hoed” wat langs die twee selfmoordbommer opgemerk is wat hulself opgeblaas het by die Zaventem-lughawe in Brussel.

Toesig-beeldmateriaal het hom ook in die konvooi saam met die aanvallers wat na Parys is, geplaas.

Abrini was ‘n jeugvriend van Brussel-broers Salah en Brahim Abdeslam, beide verdagtes in die Parysaanval.

Sy vingerafdrukke en DNA is nie net in ‘n Renault Clio gekry nie, maar ook in ‘n woonstel in die buurt Schaerbeek van Brussel wat gebruik is deur die lughawebommers.

Abrini het vroeër na Sirië gereis, waar sy jonger broer oorlede in 2014 as ‘n lid van die Islamitiese staat se Franssprekende brigade.

Die Belgiese anti-terreureenhede verkeer steeds op ‘n hoë gereedheidsgondslag aangesien hulle nog aanvalle verwag.

Die Franse minister van Binnelandse Sake, Bernard Cazeneuve het Sondag aan I-Tele TV gesê sy land het die afgelope tyd 13 sulke beplande aanvalle afgeweer en reeds 80 mense is aangekla sedert die begin van die jaar. Hy wou nie verder uitbrei nie.

ISIS uit sleuteldorp gedryf

Sirië het met die hulp van Russiese lugaanvalle Sondag die Islamitiese Staat (ISIS) uit die dorp al-Qaryatain gedryf.

ISIS het in Augustus beheer van die dorp geneem.

Sirië se staatstelevisie het Maandag berig dat die dorp weer in die hande van die wettige regering is. “Die laaste groepe Daesh-terroriste in die dorp is om die lewe gebring.”

Die dorp lê sowat 100km wes van die antieke stad Palmira wat verlede Sondag van die Islamitiese staat herower is.

Dit is ‘n strategiese dorp waardeur olie en gas deur die invallers gesmokkel is. ISIS se voorraadroete in Sirië is daarmee ontwrig.

Die herowering van die dorp word het ISIS se greep op die digbevolkte weste van Sirië – asook Damaskus en ander belangrike stede – losgemaak.

Die regering beplan om ander terreurneste in die gebied skoon te maak.

Volgens berigte uit Sirië het die soldate die dorp uit verskillende rigtings binnegeval en landmyne noordwes van die dorp is onskadelik te stel.

Duisende landmyne is ook geplant toe ISIS uit Palmira gevlug het en inwoners sal eers kan terugkeer wanneer die myne onskadelik gestel is.

ISIS beheer steeds die stad Raqqa – wat hy as sy hoofstad benut – en die grootste deel van die provinsie Deir al-Zor in die ooste van die land en aangrensend aan Irak.

Islamitiese Staat aanvaar verantwoordelikheid vir Irak-aanvalle

Selfmoordbomaanvalle het die lewens van minstens 24 mense Maandag in Irak geëis.

Intussen vlug duisende inwoners uit die strategiese stad Hit, wes van Bagdad, wat deur Islamitiese militante bedreig word.

Die Islamitiese Staat (IS), wat dele van die noorde en die weste van Irak beheer, het op die Amaq-nuusblad verklaar dat hulle verantwoordelikheid vir die aanvalle aanvaar.

Volgens amptenare het die aanvallers onder meer lede van ’n Sjiïtiese militêre groep geteiken.

‘n Motorbom het in Basra, die grootste stad in Irak, ontplof. Minstens vyf mense het omgekom.

Die bom het ook ‘n konvooi van ‘n koalisie van Sjiïtiese soldate, die PMF, geteiken en nog vyf mense is in dié voorval dood.

Vyf mense is ook dood toe selfmoordbomaanvallers hulself by militêre punte in Bagdad ­opgeblaas het.

In die suidelike stad Nassiriya is minstens vier lede van die PMF-groep buite ’n restaurant in ’n selfmoordbomaanval dood.

Twee lede van die regeringsmagte is in die weste van Bagdad in ’n motorbom-aanval dood en ’n derde lid in ’n ontploffing in die suide van dié stad.

Twee mense is dood in ’n mortierbomaanval in die Abu Ghraib-distrik.