Kategorie: Afrikaanse nuus

Sedert 1652 is ‘n welvaartbeskawing, gevestig op Christelik-Protestantse beginsels, hier te lande gevestig wat tot voordeel van al die land se inwoners dien. Die Afrikanervolk, of die Afrikaner Kultuurgemeenskap soos in die Grondwet van die Republiek van Suid-Afrika omskryf word, was hoofsaaklik verantwoordelik vir die vestiging en uitbouing van vermelde beskawing en lewensnorme.

Gedurende die Landsberaad van die Rapportryerbeweging gedurende 2004 te Maselspoort, is besluit dat aandag aan die Afrikaner Erfenisse gegee moet word. Tydens die Landsberaad van 2006 te Wellington, is hierdie besluit herbevestig. Voortspruitend uit vermelde besluite is ondergetekende op 12 Mei 2007 ingestel as lid van die Rapportryerdaad, met die spesifieke verantwoordelikheid:- RRB Erfenisprojekte.

Die Rapportryerbeweging beoog om landswyd ‘n opname van die Afrikaner erfenis te maak; dit op te spoor, te noteer, te registreer en waar nodig te laat proklameer, sodat hierdie Grondbrief van Eiendomsreg van die Afrikaner, synde ‘n inheemse volk van hierdie Suiderland, wetlik beskerm mag word. Die Wet op Nasionale Erfenishulpbronne van 1999 omskryf wat bewarenswaardig mag wees, onder meer as volg:

(a) plekke, geboue, strukture en toerusting wat van kulturele waarde mag wees;

(b) plekke wat aan mondelinge oorlewering gekoppel is of wat geassosieer word met die lewende [hedendaagse] erfenis

(c) historiese nedersettings en gehuggies;

(d) landskappe en natuurlike kenmerke van kulturele betekenis;

(e) geologiese gebiede van wetenskaplike of kulturele belang;

(f) argeologiese en palaeontologiese terreine;

(g) grafte en begraafplase, insluitend ~

(i) voorvaderlike grafte;

(ii) koninklike grafte en grafte van Tradisionele Leiers

(iii) grafte van konflikslagoffers;

(iv) grafte van individue wat deur die betrokke Minister in die Staatskoerant verklaar is;

(v) historiese grafte en begraafplase; en

(vi) ander menslike oorblyfsels wat nie deur die Wet op Menslike Weefsel, wet 65 van 1983, omskryf is nie;

(h) terreine van belang met betrekking tot die geskiedenis van slawerny in Suid-Afrika;

(i) verwyderbare voorwerpe, insluitend ~

(i) voorwerpe herwin vanuit die grond of waters van Suid-Afrika, insluitend argeologiese en palaeontologiese voorwerpe en materiaal, meteoriete en skaars geologiese monsters;

(ii) voorwerpe waaraan mondelingse tradisies gekoppel is of wat gekoppel is aan mondelinge {hedendaagse] erfenis;

(iii) etniese kuns en voorwerpe;

(iv) militêre voorwerpe;

(v) sier-voorwerpe of voorwerpe van die skone kunste;

(vi) voorwerpe van wetenskaplike of tegnologiese belang; en

(vii) boeke, verslae, dokumente, fotografiese positiewe en negatiewe voorwerpe, grafiese, film of videomateriaal of klankopnames, uitsluitend daardie wat openbare verslae is soos gedefineer in artikel 1 (xiv) van die Wet op die Nasionale Argiewe van Suid-Afrika (Wet 43 van 1996)

Waar die Afrikanervolk, of Kultuurgemeenskap, soos dit Grondwetlik omskryf is, oor geheel Suid-Afrika versprei woon en in elke uithoek van ons Vaderland sy stempel afgedruk het, is die samewerking van elke Rapportryer nodig om van hierdie projek ‘n sukses te maak.

Vanuit die Boerderygemeenskap dink ons veral aan opstalle en plaaswerwe wat ‘n eeu of langer ons landskap verfraai; strukture van estetiese, argitektoniese, kulturele of kultuur-historiese belang; plaasbegraafplase waar prominente persone uit die plaaslike gemeenskap, die breër Afrikaner-gemeenskap, ons krygsverlede of enige derglike velde van prestasie ter ruste gelê is; alle grafte wat histories, kultureel of in familieverband van belang is, asook grafte wat ouer as sestig jaar is; ons dink aan plekke van belang op plase soos historiese slagvelde, ~vergaderplekke, ~terreine, asook plaasgedeeltes waar uitsonderlike landboukundige prestasies behaal is.

Vanuit die Kerklike gemeenskappe dink ons aan gemeentes wat reeds hul Vyftigjarige, eeufees, of langer bestaan gevier het; kerkgeboue van historiese, estetiese, argitektoniese of kerk-administratiewe belang; pastorieë en ander gemeentelike of kerklike eiendomme wat aan voormelde voldoen, asook orrels, preekstoele, kerkklokke of derglike voorwerpe wat kultuurhistories van belang mag wees;

Vanuit die Onderwysgeledere dink ons aan historiese skoolgeboue, sportvelde waar besondere prestasies gelewer is, plekke waar uitstaande persone hul skoling ondergaan het asook alle ander plekke van belang.

So kan ons voortgaan in elke beroepsgroep deur Suid-Afrika. Al voormelde, en andere, moet opgespoor en genoteer word. Talle mag daarna geproklameer word ten einde dit te bewaar in ‘n proses om ons bakens as Kultuurgemeenskap, as Volk, vas te stel en bekend te maak, maar ook om dit te bewaar vir die nageslag. Dit is alles deel van dit wat dien as bewys van die Afrikaner se ontwyfelbare aanspraak op ons Vaderland, Suid-Afrika. ‘n Land wat ons deur die genade van God bewoon, en ook deel met ander volkere, maar waar ons die onbetwisbare bewys kan lewer dat ons as Kultuurgemeenskap oor dekades dié leidingewende aandeel in die opbou en ontwikkeling van hierdie land gelewer het.

Graag rig ek hiermee ‘n versoek ook aan PRAAG om landswyd betrokke te raak; aktiveer boere, onderwysers, skoliere, almal wat maar kan om ons behulpsaam te wees in hierdie projek om al voormelde Erfenishulpbronne op te spoor, te noteer en so volledig moontlik inligting, insluitend, waar moontlik, stawende boeke of albums aan ons deur te voer, hetsy na ondergetekende, of na die Erfenisstigting by die Voortrekkermonument.

Dit wat ons wil aanteken is die erfenis van ons en van u nageslag. ‘n Erfenis wat ons nie mag toelaat dat dit van ons Kultuurgemeenskap, die Afrikanervolk af vervreem word nie.

Die Vryheidsfront Plus-raadslede in die Tshwane/Pretoria metroraad het dr. Pieter Mulder geluk en sterkte toegewens met sy aanstelling as adjunk-minister van Landbou, Bosbou en Visserye:

Dr. Rentia Landman (leier van VF Plus in die raad), dr. Conrad Beyers (koukusvoorsitter), kol. Piet Uys (sweep), rdl. Neels Hatting, rdl. Wouter Hoffman en rdl. Frik van Wyk is die lede.

Hulle meen Mulder het die belangrike gebaar wat pres. Zuma aan Afrikaners gemaak het aanvaar na konsultasie met die partyleierskap en invloedryke Afrikanerinstellings.

Die lede sê dit was belangrik dat dr. Mulder hierdie gebaar in belang van Afrikaners en die landbougemeenskap aanvaar. Dit is goed vir Suid-Afrika en bied ook aan die Vryheidsfront Plus nuwe geleenthede en 'n sinvolle rol om regeringsbesluite, ook op munisipale vlak, te beïnvloed.

Hulle sê ook dit is nou tyd vir die party om geledere te sluit en te werk vir 'n beter toekoms vir ons mense en vir die party.

Na aanleiding van ’n mediaverklaring wat op 10 Mei 2009 deur mnr. Cornelius Jansen van Rensburg, die VF Plus se Nasionale Jeugleier, uitgereik is en waarin hy aantygings teen die Leier van die VF Plus maak, het die Uitvoerende Dagbestuur van die VF Plus vandag besluit om mnr. Cornelius Jansen van Rensburg se lidmaatskap ooreenkomstig die Grondwet van die VF Plus tydelik op te hef, hangende ’n ondersoek deur die Party se Federale Regskomitee.

Die VF Plus is nie bereid om enige ongedissiplineerdheid van hierdie aard te duld nie.

Die party het in 'n verkalring gesê die stroom van ondersteuning wat verkry word van oor die hele Suid-Afrika vir die besluit wat die Uitvoerende Dagbestuur van die VF Plus geneem het dat dr. Pieter Mulder, die Leier van die VF Plus, die pos as adjunkminister van Landbou moet opneem, is oorweldigend.

DA-woordvoerder, Manie van Dyk, sê Pieter Mulder se aanvaarding van die adjunkministerspos in die ANC-kabinet van Jacob Zuma, is miskien vir talle 'n verrassing, maar nie vir die DA nie.

"Dr Mulder plaas duidelik sy pensioen voor sy beginsels," het van Dyk gesê. Volgens van Dyk het die VF+ "nog nooit opposisiepolitiek behoorlik verstaan nie".

"Hulle sal eerder skraal konsessies van die regering ontvang in ruil vir hulle samewerking, as om deel te wees van 'n beginselvaste opposisie teen die ANC," het van Dyk gesê.

Die bekendmaking dat Mulder nie eers met die leierskap van sy party beraadslaag het voordat hy die pos aanvaar het nie, is 'n aanduiding van die minagting wat hy vir sy kollegas en ondersteuners voel, meen van Dyk.

"Hy stel blykbaar meer belang in die voordele en voorregte wat 'n kabinetspos meebring," het die DA-woordvoerder gesê. Hy dink ook dat Zuma se uitlating voor die verkiesing dat Afrikaners die enigste ware wit Suid-Afrikaners is, Mulder oorreed het om die pos te aanvaar.

"Mulder se aanvaarding van die kabinetspos gaan die finale spyker in die kis van die VF Plus wees. Ons het reeds gesien hoe die Nasionale Party deur die ANC ingesluk is nadat Marthinus van Schalkwyk in die kabinet opgeneem is. Die ANC gaan die VF Plus insluk nes hulle die Nasionale Party ingesluk het."

Lede van die Adam Tas-studentevereniging van die Universiteit Stellenbosch het gister 'n lys van griewe oor US se taalbeleid by die Kasteel in Kaapstad afgelees.

Nico de Wet, Adam Tas-voorsitter, meen die US het dubbele standaarde toegepas. Die vereniging glo die US-raad sou gistermiddag ’n besluit oor die afdwing van Engels bekragtig. Hulle beskou die stap as soortgelyk aan die apartheidsregering se destydse besluit om Afrikaans as onderrigtaal op swart leerders af te dwing.

Mnr. Mohamed Shaikh, die US se senior direkteur: kommunikasie en skakeling, hetgesê dat hulle “so gou doenlik” verslag sal lewer van die raadsbesluit.

Op ’n spesiale raadsvergadering vroeër vanjaar is besluit dat parallelmedium-onderrig in plaas van van dubbelmedium-onderrig (die T-opsie) van aanstaande jaar af in die eerste studiejaar in vier groot US-fakulteite – ekonomiese en bestuurswetenskappe, natuurwetenskappe, agri-wetenskappe en ingenieurswese – sal geld.

Adam Tas meen dié beleid sal diversiteit en transformasie teenwerk omdat Engels Afrikaans in die praktyk uiteindelik gaan oorskadu. “Navorsing het getoon dat kleiner tale soos Afrikaans in die verlede by ander fakulteite aan die US en ander universiteite uitgedryf is,” het De Wet gesê.

Die US wil net in die eerste jaar aan studente vryheid van hul taalkeuse gee, het De Wet gesê. Van die tweede jaar sal klasse 50% in Afrikaans en 50% in Engels aangebied word, ongeag watter taal studente praat.

"Soos wat studente in Soweto die keuse ontneem is om hul hooftaal van onderrig Engels te hê, word huidige en toekomstige Afrikaanse studente in Stellenbosch dit tans ontneem vir Afrikaans.”