Suid-Afrikaanse nuus, d.w.s. sowel nuus uit Suid-Afrika én Suider-Afrika.
‘n Metrobus-bestuurder is gewond na ‘n skietery op Ontdekkersweg in Newlands in Johannesburg.
‘n Onbekende aantal verdagtes het na bewering by die bus ingeklim en skote afgevuur.
‘n Woordvoerder van ER24, Werner Vermaak sê die busbestuurder is in ‘n ernstige toestand, terwyl een passasier ook gewond is.
Lees verder.
Die uitvoerende hoof van KrieketSA, Haroon Lorgat het berigte ontken dat hy ‘n sms aan die Proteas-afrigter gestuur het om ‘n speler van kleur in die halfeindstryd van die Wêreldbekerreeks in te sluit.
Volgens koerantberigte het Lorgat teen een-uur die oggend die sms aan Russel Domingo gestuur om na bewering tussen sekere spelers te kies.
Lorgat het aan die African News Agency gesê die bewerings is heeltemal vals en dat die span reeds teen sesuur die aand bevestig was.
Hy sê hy het geen onderhoude aan koerante toegestaan wat hom in die berigte aanhaal nie, het RSG berig.
Motoriste in die Wes-Kaap sal drie keer meer tolgeld moet betaal as in Gauteng vir Sanral se beplande N1- en N2-Wynland-tolprojek.
Die Kaapse stadsraad en Sanral se geding oor geheimhouding wat die tolprojek betref, is in die appèlhof in Bloemfontein openbaar gemaak.
Die Wes-Kaapse hooggeregshof het vroeër beslis dat die inligting geheim gehou kan word, maar dit is Maandag tersyde gestel.
Die voorgestelde toltarief vir ligte voertuie is 84,59 c/km, terwyl dit 30c/km in Gauteng is. Die Gautengse e-tolstelsel se tariewe vir ligte voertuie is beperk tot R450 per maand, terwyl dit nie in die Wes-Kaap is nie.
‘n Kaapse burgemeesterskomiteelid vir vervoer, het gesê die besluit om die tolprojek in die Wes-Kaap te verklaar is deur die uitvoerende hoof (van Sanral), Nazir Alie, geneem en nie deur die Sanral-komitee soos die wet voorskryf nie.
Hy het gesê Sanral sal ook belastingbetalers se geld gebruik om die verwagte inkomste van die Protea Parkways-konsortium te verseker.
“Dit is duidelik dat die lae inkomstegroepe nie in ag geneem is nie. Arm mense sal glad nie kan bekostig om die N1 en N2 te gebruik nie. Die negatiewe ekonomiese impak op die streek is nie in ag geneem nie. Die uitwerking wat dit op die vervoerkoste van landbouprodukte gaan hê, is erg,” het hy bygevoeg.
Wayne Duvenhage, voorsitter van die Bondgenootskap teen Stedelike Tol (Outa) in Gauteng, het die appèlhofuitspraak as “fantasties” bestempel.
Die ANC-regering het gisteraand tydens ‘n spesiale kabinetsitting in Tshwane besluit dat alle “apartheids- en koloniale monumente” teen Werkersdag, 1 Mei, verwyder moet wees”. Dit sluit standbeelde van Paul Kruger, Jan Smuts, Louis Botha, Cecil John Rhodes en koningin Victoria in. Selfs die Danie Theron-gedenkteken op die pad tussen Johannesburg en Potchefstroom, verkeer op die lang lys standbeelde en monumente wat óf verskuif óf vernietig gaan word.
Die minister van kultuur, mnr. Nathi Mthethwa, het in ‘n verklaring gesê:
“Die huidige nasionale diskoers oor monumente en ons postbevrydingsidentiteit het die regering genoop om ‘n finale besluit oor oorblywende apartheids- en koloniale monumente te neem. Daarom sal alle monumente, standbeelde en geboue wat deur plaaslike blanke argitekte ontwerp is, teen 1 Mei 2015 verwyder, vernietig of gesloop word. In die plek daarvan sal nuwe beelde van ons bevrydingshelde opgerig word.”
Die burgemeester van Tshwane, mnr. Kgosientsho “Sputla” Ramokgopa, het bevestig dat Paul Kruger se standbeeld op Kerkplein in Pretoria deur ‘n beeld van Solomon Mahlangu vervang sal word. Mahlangu is in 1979 deur die destydse Nasionale Party-regering weens terreurdade ter dood veroordeel en gehang, maar word in bevrydingskringe as ‘n held beskou.
‘n Argitek en stedelike ontwikkelingskonsultant van die Universiteit van Johannesburg, Melinda Silverman, het ‘n lys opgetrek van geboue wat deur “fascistiese Afrikanerargitekte” ontwerp is. Dit sluit die Voortrekkermonument, die ABSA-gebou in Pretoria en die Staatsteater in. Die lys is tydens die kabinetsitting ter tafel gelê en “minstens die helfte van die geboue op die lys sal summier gesloop word”. Dr. Blade Nzimande, minister van hoër onderwys, het opdrag ontvang om dringend “alternatiewe akkomodasie” vir personeel en studente aan die Universiteit van Johannesburg (voorheen RAU) te vind, aangesien dié gebou ook op die lys verkeer.
In Mthethwa se verklaring word veral twee Afrikanerargitekte en een beeldhouer vir skerp kritiek uitgesonder: Gerhard Moerdyk, Gordon Leith en Anton van Wouw. Gerhard Moerdyk het die Voortrekkermonument ontwerp en Van Wouw die Kruger-standbeeld op Kerkplein. Mthethwa sê:
“Hulle is letterlike apartheidsargitekte wat van eurosentriese vorme gebruik gemaak het om die kultuur van die blanke setlaars te verheerlik. Geboue deur Gordon Leith in Johannesburg word reeds gesloop (sien foto) terwyl die Voortrekkermonument en die Kruger-standbeeld beslis teen 1 Mei iets van die verlede sal wees.”
Die redakteur van die Business Day-koerant, Songezo Zibi, steun die regeringsprojek en het gister teen die Voortrekkermonument uitgevaar deur te sê:
Sadly, there is patent lack of leadership and foresight, for this will one day soon culminate in a move to put dynamite through the Voortrekker Monument and others like it.
Die regering sal later vandag met koerantredakteurs en radiostasiehoofde vergader om te sorg dat die transformasie van alle blanke monumente en geboue sonder ‘n haakplek verloop.
Mnr. Adriaan Basson, redakteur van Beeld, het sy koerant se steun vir die projek uitgespreek.
“Beeld was nog altyd op die voorpunt van transformasie en om oorblyfselfs uit die Afrikanerverlede sover moontlik uit die weg te ruim. Onlangs het ons ons skerp kritiek teen die Potchefstroomse kampus van die Noordwes-universiteit uitgespreek wat steeds oorwegend blanke, Afrikaanse studente op die kampus duld. Sodra UJ gesloop is, behoort die regering ook na Potch te kyk. Nie net Totius se standbeeld nie, maar sommer die hele kampus moet vernietig word. Dis net ‘n broeiplek vir nazisme. Beeld en sy lesers sal beslis enige dekoloniseringsinisiatiewe van die regering steun,” het Basson gesê.
Sowel Volksblad as Beeld is tans besig om Kubaanse wateringenieurs wat na Bloemfontein en Kimberley ontplooi is, in die land tuis te laat voel deur vir hulle Spaans-Engelse tolke te borg. Joernaliste van die twee koerante sal saam met die Kubane in vyfsterhotelle tuisgaan en tolkwerk doen terwyl hulle op hul beurt aandklasse oor die denke van Karl Marx en Wladimir Lenin by die Kubane sal ontvang.
Mnr. Steven Friedman, nog ‘n rubriekskrywer van Business Day, sê “Suid-Afrikaners voel nog nie gemaklik met ‘n standbeeld van Wladimir Lenin nie”, omdat selfs die “wit liberale” rassisties is, soos wat mnr. Harold Wolpe van die SA Kommunisteparty voorheen gewaarsku het.
Volgens Friedman, moet “alle instellings, nie net universiteite nie” getransformeer word.
’n Hoëvlak militêre afvaardiging uit China onder leiding van dié land se minister van verdediging, genl. Chang Wanquan, is in Namibië om die twee lande se bilaterale samewerking op militêre gebied te verstewig.
Die besoek kom midde kommer in die internasionale gemeenskap oor hardnekkige gerugte van ’n Chinese vlootbasis wat by Walvisbaai opgerig gaan word, het die Republikein berig.
’n Namibiese dagblad het in Januarie berig Namibië se ambassadeur in China, amb. Ringo Abed, het die voormalige minister van buitelandse sake, me. Netumbu Nandi-Ndaitwah, in kennis gestel “’n Chinese afvaardiging sal Namibië ná 21 Maart besoek vir samesprekings oor die pad vorentoe rakende planne vir die voorgestelde vlootbasis in Walvisbaai”.
The Namibian het na aanleiding van ’n geheime dokument in sy besit berig die afvaardiging sal “tegniese personeel en vloot-argitekte” insluit.
Intussen het die AFKInsider Sondag ook oor die voorgenome besoek berig en ’n Amerikaanse kenner van buitelandse beleid in nasionale veiligheid, Robert C. O’Brien, aangehaal wat sê dit wil voorkom asof China se “strategie van vlootbasisse soortgelyk aan ’n string pêrels oral in die Indiese Oseaan, nou na die Suid-Atlantiese gebied wil uitbrei”.
O’Brien waarsku dat indien die gerugte van ’n Chinese militêre basis langs die Namibiese kus waar is, dit “reuse- strategiese implikasies” vir die Weste inhou.
Genl. Chang het gister by Staatshuis aan pres. Hage Geingob gesê hy is vergesel van onder meer die politieke kommissaris van die Chinese vloot, Miao Hua, asook ’n bevelvoerder van dié land se lugmag.
“Die doel van ons besoek is om die belangrike konsensus oor groter militêre samewerking te implementeer waarop tydens u (Geingob) besoek in April verlede aan China ooreengekom is.
“Ons is nou gereed om voort te gaan met die bilaterale reëlings en dit in die toekoms meer produktief te maak.
Beide Namibië en China wil nou hul droom van ’n sterker militêre mag verwesentlik,” het hy gesê en aangekondig dié land gaan wapentuig ter waarde van 30 miljoen yuan (sowat N$58,6 miljoen) aan Namibië skenk.
Hy het verder gesê Namibië en China wil saam aan “’n beter wêreld met blywende vrede” bou. “As ’n ware vriend van Afrika, wil ons die mense van Afrika help om hul probleme op die Afrika-manier op te los.”
Geingob het in reaksie op ’n vraag oor beweringe in die media dat die besoek met die vlootbasis verband hou, geantwoord: “Ons moet nie ons bestaan op gerugte grond nie. Gerugte kan lande vernietig.
‘n Groep van sowat 250 Transnet-pensioentrekkers het ‘n memorandum met griewe aan die kantoor van President Jacob Zuma oorhandig, na ‘n optog na die Uniegebou.
Die pensioentrekkers beskuldig die raad van Transnet daarvan dat hulle die pensioenfonds se bates gestroop het.
Hulle beweer dat die fonds wanbestuur is tot so ‘n mate dat verpligtinge aan lede nie nagekom kan word nie.
Die VF Plus se Anton Alberts, wat op aandrang van die pensioentrekkers die optog help organiseer het, sê die eis van bykans R80 miljard, die grootste siviele eis in Suid-Afrika se regsgeskiedenis.
Die eis is nou die onderwerp van ‘n hofgeding.
Meer as ‘n honderd buitelanders het by die polisiestasie op Isipingo in KwaZulu-Natal saamgedrom om aanklagte van aanranding en intimidasie in te dien, nadat tien van hulle winkels in die dorp, suid van Durban, geplunder is.
Hulle sê dit is veroorsaak deur Koning Goodwill Zwelithini se aanmerking dat hulle die land behoort te verlaat, het RSG berig.
Die plundery en aanvalle hou vermoedelik ook verband met vroeëre betogings by ‘n plaaslike pakhuis tussen Umlazi en Isipingo.
Buitelanders sê hulle leef in vrees, en het meer sigbare polisiëring in die omgewing gevra.
Zwelinzima Vavi, sekretaris-generaal van Cosatu, gaan sy skorsing uit die vakbondfederasie beveg.
Cosatu se sentrale uitvoerende komitee het gisteraand vergader. Die komitee moes ‘n spesiale vergadering hou om te stem oor Vavi se toekoms.
Die skorsing is nog nie deur Cosatu bevestig nie, maar ‘n mediakonferensie is vir 12uur vanmiddag geskeduleer.
Die vakbondfederasie het ‘n oorweldigende ja-stem vir die afdanking van sy hoofsekretaris uitgebring.
Drie-en-dertig lede het ja-gestem, en een daarteen. Dit volg nadat Vavi geweier het om self te bedank, en aangekondig het dat hy die komiteevergadering sal boikot.
Die komitee het verwag dat Vavi sou kom verduidelik waarom hy die vorige vergadering geboikot het, homself gedistansieer het van ‘n besluit om Numsa te skors, asook interne prosesse en finansies aan die media onthul het.
Vavi se posisie in Cosatu is sedert verlede jaar Augustus in die weegskaal nadat hy aangekla is weens ‘n seksskandaal en beweerde finansiële omgerymdhede met die verkryging van Cosatu se hoofkwartier.
Ná Numsa se skorsing het betrekkinge met Vavi verder versleg. Intussen is ‘n vervanging vir Numsa op die been gebring by name Limusa. Dit bestaan uit lede wat weggebreek het uit die geskorsde metaalwerkersvakbond.
Die stemming gisteraand was ‘n geheime stemming en die komitee het ‘n regsmening ingewin om te sorg dat die proses waterdig is.
Na verwagting sal Vavi dit sterk oorweeg om ‘n nuwe vakbond op die been te bring en Cosatu verdeel.
Die spanning kom al ‘n paar jaar weens die styging in salarisse van staatsamptenare, sogenaamde witboordjiewerkers, wat nie ontevrede met die regering is nie.
Die blouboordjiewerkers in Cosatu, wat minder verdien, werk meestal in die privaatsektor.
Vavi het die afgelope paar jaar lyfwagte aangehou teen wat hy beskou het as ‘n aanslag van Jacob Zuma en Blade Nzimande.
Twee vakbonde wat by Cosatu geaffilieer is het Vavi vroeër skerp gekritiseer. Die mynwerkersvakbond NUM het hom as ‘n desperate lafaard bestempel wat geen verantwoordelikheid vir sy optrede neem nie.
Die polisievakbond Popcru het Vavi daarvan beskuldig dat hy die vorming van faksies aanmoedig en dat hy die drieparty-alliansie wil opbreek.
Die voorsitter van Eskom se raad, Zola Tsotsi, het bedank.
Die voorsitter van die Landbank en voormalige raadsvoorsitter van die SAUK, dr Ben Ngubane sal as voorsitter van Eskom waarneem ná die bedanking van Zola Tsotsi.
Eskom het na ‘n laatnagvergadering bevestig dat daar ooreengekom is dat Tsotsi in belang van die maatskappy en die land, bedank.
Tsotsi is daarvan beskuldig dat hy onbehoorlik opgetree het. Hy het vroeër die maand vier senior uitvoerende lede, insluitende Eskom se bestuurshoof, Tshediso Matona, geskors.
Eskom sê in ‘n verklaring die besluit oor Tsotsi se bedanking is geneem sodat die raad kan fokus op die toekoms en dringende kwessies wat aandag moet kry. Die kragvoorsiener het gesê dat die besluit vriendelik geneem is.
Ngubane het Tsotsi bedank vir sy diens aan die kragvoorsiener die afgelope jare.
Tsotsi se bedanking kom te midde van ‘n ondersoek na bewerings van wangedrag wat teen kom gemaak is.
Intussen het Eskom berigte ontken dat daar vir ‘n landwye kragineenstorting voorberei word.
‘n Energie-ontleder, Chris Yelland, sê totdat die bykomende kragstasies voltooi is, sal beurtkrag voortduur.
Die verskaffer sê die energievoorraad bly steeds onder druk, wat die rede is waarom hy ‘n simulasie-toets gedoen het genaamd, Exercise Breaking Dawn.
Sommige media het berig dat dit ‘n aanduiding is dat die maatskappy homself staal teen ‘n onafwendbare krisis.
Die Presidensie het intussen groot kommer uitgespreek oor opmerkings in die Mail en Guardian verlede week wat aan Tsotsi, toegedig is.
Volgens die koerant het Tsotsi gesê hy het ‘n opmerking deur die president by ‘n sosiale geleentheid, dat hy na goeddunke moet handel rakende Eskom, as ‘n opdrag vertolk.
Die Presidensie sê in ‘n verklaring die betrokke minister sal besluit of ‘n saak onder die president se aandag gebring behoort te word, en hom dan daaroor inlig. Besluite word deur die monister geneem en nie die president nie.
Suid-Afrikaanse motoriste gaan van môre af baie meer vir brandstof betaal.
Petrol in die binneland word om middernag met R1.62 duurder en diesel met R1.24. Parafien word met 36 sent per liter duurder en petroleumgas met 85 sent per kilogram.
Die redes vir die styging sluit in die gesamentlike heffing vir brandstof en ‘n reddingsboei vir die bankrot Padongelukkefonds, ‘n swakker rand en “hoër oliepryse”.
‘n Stanford-ekonoom Frank Wolack het egter Maandag gesê die daling in globale olie-pryse sal voortgaan vir die volgende paar dekades.
Terwyl geopolitieke en omgewingskwessies verander en moontlik enige oomblik oliepryse opwaarts kan druk, meen Wolack ons waarskynlik oliepryse tussen $50 tot $70 per vat sien oor die volgende 20 jaar vir verskeie redes.
Die drie hoofredes wat hy aanvoer is skalie-ontginning in Noord-Amerika, tegnologiese vooruitgang in ontginning asook die kwynende rol wat OPUL speel in die vasstelling van pryse.
