Suider-Afrika Archives - Page 152 of 888

Inwoners eis dat plaaslike werkers by Medupi aangestel word

Lokasiebewoners by Ellisras (Lephalale) in Limpopo het ‘n beroep op die Wetgewer gedoen om te sorg dat plaaslike inwoners by die Medupi en Matimba-kragaanlegte aangestel word.

Hulle beskuldig buitelanders ook van ‘n prysoorlog teen plaaslike kleinsake-handelaars.

Hulle het sterk beswaar aangeteken oor buitelanders wat by onwettige sakebedrywighede betrokke is.

Die plaaslike swartes beweer dat buitelanders hul produkte te goedkoop verkoop wat tot werkloosheid en die ineenstorting van die plaaslike kleinsake-sektor gelei het.

Honderde plaaslike inwoners het by ‘n uitreikprogram teen vreemdelingehaat van die Limpopo Wetgewer in die Marapong-lokasie gekla oor dié en ander praktyke.

‘n Lid van die provinsiale wetgewer, Dickson Masemola het in reaksie op die gemeenskap se griewe gesê die ANC-regering sal verseker dat buitelanders aan die land se wette voldoen.

Hy sê die provinsiale regering en plaaslike munisipaliteite moet toesien dat sake-ondernemings behoorlik gereguleer word.

Intussen het die Nasionale Vergadering die oprigting van ‘n adhoc-komitee goedgekeur om die vlaag xenofobiese geweld van verlede maand te ondersoek.

Dié aanvalle in Durban en Johannesburg het vir kwaai internasionale kritiek gesorg.

Die veelparty komitee van elf lede sal teen 30 Augustus aan die parlement verslag doen oor hul bevindinge oor geweld teen buitelanders en verwante sake.

Die bevindinge van ‘n taakspan wat xenofobie in 2008 ondersoek het, sal ook by hul verslag ingesluit word. In 2008 is buitelanders lewend aan die brand gesteek.

Elf Durbanse treinwaens uitgebrand

Durbanse pendelaars het elf treinwaens vernietig omdat die treine nie betyds opgedaag het nie.

Die waens is by die Reunion-stasie naby Isipingo by Durban deur oproerige pendelaars aan die brand gesteek.

‘n Woordvoerder van die KwaZulu-Natalse nooddienste sê niemand is tydens die brande beseer nie.

Die pendelaars het ook glo die trein met klippe bestook en daarna aan die brand gesteek uit ontevredheid met swak diens.

Mugabe noem Zimbabwiese emigrante ‘kriminele’

Die Zimbabwiese regering het president Robert Mugabe verdedig nadat die veteraan-leier opmerkings oor die land se “kriminele Kalangastam” (Ndebele) gemaak het.

Mugabe het opslae gemaak toe hy verlede week gesê het die meeste Zimbabwiese emigrante na Suid-Afrika is “Kalangas van Matabeleland”. Hy het gesê hulle (Kalangas) het min opvoeding en dat hulle ook na bewering skelms is.

Mugabe het gesê Kalangas word wyd gesien as betrokke in kriminele aktiwiteite in Suid-Afrika. Mugabe het ten minste 20 000 van Joshua Nkomo se volgelinge, almal Ndebele, laat uitmoor in die tagtigerjare.

Mugabe, 91, het dié stellings kwytgeraak in reaksie op ‘n vraag oor die xenofobiese geweld in dele van Durban en Johannesburg verlede maand.

Westerse skenkers oefen na wat berig word druk uit dat die Zimbabwiese opposisieleier, Morgan Tsvangirai en die afgedankte adjunkpresident, Joice Mujuru kragte saamspan om president Robert Mugabe in die volgende verkiesing uit die kussings te lig.

Volgens die webwerf, Zimbabwe.com het skenkers ‘n beroep op Tsvangirai gedoen om Mujuru te betrek of andersins geldelike steun te verbeur.

Luidens die berig is skenkers gefrustreerd met die MDC se volgehoue mislukking teen Mugabe. Volgens bronne is voorlopige samesprekings begin, maar die party het dit ontken.

Intussen moes Julius Malema se besoek aan Zimbabwe afstel na xenofobiese aanvalle op buitelanders in Suid-Afrika tot kritiek gelei het.

Hulporganisasie weet nie 3 van SA word vermis nie

Die hulpverleningsorganisasie, Gift of the Givers, is nie bewus van drie Suid-Afrikaners wat moontlik nog in Nepal vermis is nie, met die amptelike dodetal wat die 7 500 kerf verbygesteek het.

Gift of the Givers-stigter, Imtiaz Sooliman, se komentaar volg nadat die Nepalese weermag gesê het die drie is onder 105 mense van wie daar nog nie rekenskap gegee is nie. Dit is volgens die jongste statistieke van ‘n sentrale koördineringsentrum in Katmandoe.

Volgens die weermag is sommige dorpe in bergagtige gebiede heeltemal onder modderstortings begrawe.

Sooliman sê hy het nog niks gehoor van drie vermiste Suid-Afrikaners nie, maar indien dit wel so is, is hulle bereid om hulp te verleen, al is hul span op pad terug na Suid-Afrika.

Die Nepalese weermag sê volgens die jongste statistieke van ‘n sentrale koördineringsentrum in Katmandoe, is die drie onder 105 mense van wie daar nog nie rekenskap gegee is nie.

Die woordvoerder van die Suid-Afrikanse departement van Internasionale Betrekkinge, Nelson Kgwete sê egter daar is rekenskap gegee van al die Suid-Afrikaners op sy lys.

Vroeër is die bergklimmer, Sarah Khumalo per helikopter van die berg Everest na veiligheid gebring.

SAPD by Rustenburg ontplooi na oproer

Spanning in Boitekong naby Rustenburg in Noordwes het afgeneem nadat die SAPD teen oproermakers van Sondela en Meriteng ontplooi is. Die afgelope twee dae is die gebied op horings geneem.

Polisiewoordvoerder, Kelebogile Moleko, sê die polisie het die situasie sedert Maandagaand gemonitor. Sy sê die oproeriges is ontevrede oor swak munisipale dienslewering en gebrekkige watertoevoer.

‘n Groep van sowat 200 mense het gister by ‘n vulstasie op die R510 by Rustenburg saamgedrom en aangedring dat munisipale verteenwoordigers aan hulle antwoorde verskaf.

Volgens haar het verteenwoordigers van die munispaliteit die groep toegespreek waarna watertoevoer na die gebied weer herstel is.

Moleko sê twee betogers, ‘n man en vrou, wat Maandagaand in Sondela in hegtenis geneem is weens openbare geweld, is gister in die Rustenburg landdroshof op waarskuwing vrygelaat.

Volgens haar is die paaie by Sondela and Meriteng wat gesluit is nadat betogers dit met boomtakke en brandende bande versper het intussen weer oopgestel.

Tweede tiener wou by ISIS aansluit

Die minister van staatsveiligheid, David Mahlobo het bevestig dat ‘n tweede tiener van Kaapstad gekeer is voordat sy by die Islamitiese Staat kon aansluit.

Die hoërskool-leerder van Grassy Park op die Kaapse Vlakte is ná ‘n wenk by die Kaapstadse Internasionale Lughawe aangekeer, berig RSG.

Mahlobo sê sekere gemeenskappe in die land word deur die ISIS-militante geteiken.

Die veiligheidsdienste het na bewering gereageer op grond van inligting wat deur die eerste Kaapse meisie verskaf wat by die ISIS wou aansluit. Die twee is glo vriendinne.

Die departement en die Valke het glo reageer op inligting wat ‘n 15-jarige meisie van Kenwyn verskaf het.

Mahlobo het sedertdien ouers herhaaldelik gemaan om hul kinders se internetgebruik dop te hou. Hy het Dinsdag weer die waarskuwing tydens ‘n perskonferensie voor die minister se begrotingsdebat in die parlement uitgereik.

“Ons weet dat ISIS jongmense teiken en die internet daarvoor gebruik,” het Sonto Kudjoe, direkteur-generaal van staatsveiligheid, gesê.

Intelligensiebronne sê egter hulle ondersoek ‘n fisiese teenwoordigheid van werwers van die jihad-groep in die land.

Mahlobo het gesê staatsveiligheidsagentskappe is baie paraat oor die kwessie van werwing deur fundamentalistiese groepe en hulle bly in kontak met gemeenskappe wat as teikens beskou word. Hy het gesê sedert die tiener van Kenwyn gepoog het om by ISIS aan te sluit, het verskeie gemeenskapsgroepe sy departement gekontak om te sê dat hul kinders aangehits word om dit ook te doen.

“In Kaapstad het ons met die Moslemregsraad vergader,” het hy gesê. Kinders word glo daagliks gewerf.

SA spog steeds met hoogste MIV-infeksies

Suid-Afrika het steeds die hoogste voorkoms van MIV-infeksies ter wêreld.

Dit is volgens die mede-voorsitter van die Suid-Afrikaanse nasionale Vigsraad, Steve Letsike. Letsike het by UNISA in Pretoria gesê daar is sowat 6,4 miljoen mense in die land wat met MIV lewe.

Hy sê om die teiken van zero infeksies te bereik sal ‘n groot poging verg.

Miljarde rande is oor dekades reeds aan voorkoming en navorsing bestee, sonder om die siekte uit te skakel.

‘n Nasionale studie oor studentegedrag in terme van seks en MIV is tydens die geleentheid bekendgestel.

In Uganda en Nigerië is die voorkoms van nuwe gevalle ewe hoog wat van UNAIDS se teiken van zero nuwe infeksies teen die einde van 2015, ‘n hersenskim maak.

Jongste ramings deur Uganda se Vigskommissie (UAC) toon dat 380 nuwe infeksies daagliks voorkom. Dit impliseer jaarliks 138700 nuwe infeksies bykomend tot die 1,6 miljoen mense wat reeds met MIV leef.

Thabo Mbeki, die vorige president, is verguis as ‘n Vigsontkenner omdat hy nie anti-retrovirale medisyne op staatsonkoste wou verskaf nie, en daarvan beskuldig dat hy verantwoordelik is vir die hoë sterftesyfer.

Die beskikbaarheid van die medikasie het intussen niks aan die prentjie verander nie.

Twee kritiek na baksteengooier weer N12 teiken

‘n Agtjarige seuntjie veg om sy lewe nadat ’n baksteen op die N12-hoofweg in Johannesburg vanaf ‘n oorbrug op die gesin se motor gegooi is.

Die polisie stel glo nie in die saak belang nie en het nog geen verklarings afgeneem nie.

Caden Slabbert (8) is Donderdagmiddag op die N12 naby die winkelsentrum The Glen met ‘n baksteen raakgegooi. Hy is teen die kop getref.

Nóg ‘n passasier, Marionette Schwab (42) is ook Donderdagmiddag by dieselfde oorbrug deur ‘n baksteen getref, wat vermoedelik deur dieselfde swarte afgegooi is.

Albei slagoffers was passasiers in motors en is teen die kop getref. Caden en Schwab word in geïnduseerde komas gehou weens hul kritieke kopbeserings.

Justin Slabbert, Caden se pa, het Maandag gesê die polisie het nog nie die voorval opgevolg nie.

Schwab se ongeluk is Saterdag by die Alberton-polisiekantoor aangemeld, maar die polisie stel klaarblyklik nie belang om die misdadiger vas te trek nie.

Alberton se gemeenskapspolisiëringsforum (GPF) het glo reeds die baksteengooier geïdentifiseer. Dit is glo nie die eerste keer dat hy bakstene gooi nie.

Hoofsupt. Wayne Minnaar, woordvoerder van die Johannesburgse metropolisiediens (JMPD), het gesê die metropolisie patrolleer die gebied en geen verdere voorvalle is aangemeld nie.

Kernfisikus van Stellenbosch geskors oor SMS

‘n Dosent in kernfisika aan die Universiteit van Stellenbosch is geskors nadat hy na bewering ‘n rassistiese SMS-boodskap aan ‘n student gestuur het.

‘n Woordvoerder van die universiteit sê die dosent in kernfisika, Anton Stander is tydelik van sy pligte onthef en daar is met tugstappe teen Stander begin.

Dit volg ná ‘n klagte van ‘n sosiologiestudent en lid van die Oop-Stellenbosch forum, Sikhulekile Duma waarin hy beweer hy het die volgende ontvang: “Jou swart moer van die wit boer”.

Die selfoonnommer wat vir die SMS gebruik is, behoort volgens berigte aan die dosent.

Die Oop-Stellenbosch forum beywer hom vir verskeie veldtogte ten gunste van transformasie en verswarting by die universiteit.

Die SU-woordvoerder Martin Viljoen het bevestig dat die akademikus van sy pligte onthef is: “Sulke gedrag is onaanvaarbaar en nie in lyn met die Universiteit se waardes nie.”

Viljoen sê die instelling beskou die voorval in ‘n baie ernstige lig.

Die swart student wat die klagte gelê het, is in kennis gestel van die ontwikkelinge, en sal op hoogte gehou word, het Viljoen bygevoeg.

Upington-lughawe kry bomdreigement

Die lughawensmaatskappy van Suid-Afrika (ACSA) wil lugreisigers en ander belanghebbendes gerusstel dat bedrywighede by die Upington-Internasionale Lughawe nie erg ontwrig is nadat die lughawe vanoggend ‘n bomdreigement ontvang het nie.

Lughawebestuurder, Nongo Dibete, sê die polisie se bomeenheid het die perseel gefynkam nadat die lughawe se sekuriteit vanoggend omstreeks 04:00 ‘n naamlose oproep ontvang het.

Polisie het vroeër aan Ofm-nuus gesê ‘n Afrikaanssprekende vrou het gebel en gesê ‘n bom sal tussen 5 en 7 afgaan. Dibete sê die lughawe se noodplan is vinnig in werking gestel.

Dibete sê die polisie is op ’n hoë gereedheidsgrondslag en die situasie op die lughawe word deeglik gemonitor.