Suider-Afrika Archives - Page 227 of 888

Vredendal-plaasmoordslagoffer keelaf gesny

Koba Odendaal (74), is in ’n plas bloed in haar slaapkamer op ’n plaas buite Vredendal aangetref in die jongste gru-plaasmoord.

Sy is met ’n serp verwurg en het drie diep steekwonde aan die regterkant van haar nek gehad. Haar dogter sê het dit gelyk asof haar ma keelaf gesny is, het Die Burger berig.

Odendaal is vermoedelik in die huis op die plaas Akkerdal, waar sy en haar dogter gewoon het, oorval.

Mather het gister gesê sy het vir middagete huis toe gegaan toe sy op haar ma afkom.

Slegs Odendaal se beursie met sowat R100 en haar selfoon is gesteel.

Die moordenaars was vermoedelik steeds in die huis toe die dogter by die huis aangekom het, maar het gevlug.

Odendaal het vyf maande gelede van George na Vredendal verhuis. Sy was glo ‘n gawe en vrygewige mens.

’n Provinsiale polisiewoordvoerder, kapt. Frederick van Wyk, het die moord bevestig en gesê niemand is nog in hegtenis geneem nie.

Hy het gevra dat mense met inligting oor die voorval die ondersoekbeampte, speursers. Amande Barens, by 0 074 112 0798 bel of die Stop Misdaad-nommer, 0 0860 010 111, skakel.

ANC-hoofsweep se vrou verskyn vir bedrog

Die ANC se hoofsweep, Stone Sizani, wat deur die DA en die EFF in die parlement uitgelag is vir sy steun aan die Palestyne in Gasa, het tans nog groter probleme.

Sizane se vrou Portia, het in die handelsmisdaadhof in Port Elizabeth verskyn op aanklagte van bedrog en geldwassery.

Sy het na bewering die Departement van Onderwys tussen 2009 en 2010 met meer as ‘n miljoen rand bedrieg terwyl sy in die distrikskantoor as Onderwyskoördineerder van die Ontwikkelingseenheid gewerk het.

Die Staat voer aan dat Sizani werk vir sogenaamde spookonderwysers gereël het.

Sy is in Desember 2012 in hegtenis geneem en die saak is vir meer as ‘n jaar lank weens beweerde swak gesondheid uitgestel.

Zoeloekoning het nog nie grondeis ingedien nie

Die Hoof-grondeisekommissaris het berigte ontken dat ‘n multimiljardrandse grondeis deur die Zoeloekoning Goodwill Zwelithini, en ander tradisionele leiers ingedien is, het RSG berig.

Nomfundo Gobodo sê hulle het nog geen eis van dié aard van die koning ontvang nie. Hy sê meer as 12.000 nuwe eise is reeds ingedien.

Die Ingonyama Trust het verlede maand gesê hy sal die koning help om die eis vir grond in minstens vier provinsies in te dien.

Die eis sal grond insluit wat sedert 1838 afgeneem is.

Ingevolge die wetgewing vir grondeise kan slegs grond geëis word wat sedert 1913 afgeneem is.

Geen sprake van ANC-leierskapstryd nie

Die ANC in Gauteng se pogings om Cyril Ramaphosa vir leierskap van die ANC aan te wys, is voortydig, het die ANC Jeugliga op ‘n nuuskonferensie gesê.

Die ANC-voorsitter in Gauteng, Paul Mashatile, het vroeër openlik sy steun aan Ramaphosa toegesê om die ANC-leier en president van die land te word.

Dié haastige stap kom nadat die Valke toegeslaan het op vermeende bedrog van meer as ‘n miljard rand in Gauteng wat verband hou met een van Mashatile se binnekringlede, Brian Hlongwa, hoofsweep van die ANC in Gauteng. Hy is ook die mede-eienaar en uitvoerende voorsitter van Brisigo Properties (Edms) Beperk.

Gerugte doen die rondte dat die geld aangewend moes word om ‘n anti-Zoeloe-faksie in Gauteng te befonds en die kern van die ANC na Johannesburg uit Pretoria te skuif. Die DA het ook die Mashatile-faksie gesteun totdat die bedrogondersoek op die lappe gekom het.

“Ons het nog nie ‘n posisie oor die aangeleentheid nie. Dis hopeloos te vroeg, want die benoeming van leierskap – en die leierskapsverkiesing – vind eers in 2017 plaas,” het Magasela Mzobe, die Jeugliga se koördineerder, aan Beeld gesê.

Adriaan Basson, redakteur van Beeld, het vandeesweek hard probeer om die anti-Zoeloe en anti-Afrikaner-faksie ‘n hupstoot te gee met gratis bemarking van sy jongste prul oor Zuma.

Die Liga se nasionale konferensie vind van 24 tot 28 September by Gallagher-landgoed in Midrand, Gauteng plaas, waar nuwe leiers aangewys sal word.

Indiër wat vrou doodsteek probeer selfmoord pleeg

‘n Indiër wat na bewering ‘n vrou in Bryanston noord van Johannesburg met ‘n skerp voorwerp doodgesteek het, is onder polisie-bewaking in die hospitaal.

Die Randburg Landdroshof het gehoor dat Yengesen Pillay probeer het om sy eie lewe te neem.

Hy is Dinsdag in Pietermaritzburg in hegtenis geneem, nadat hy vir drie dae van die polisie gevlug het. Hy word daarvan aangekla dat hy sy vrou Saterdag vermoor het.

Die man wat glo sy vrou vermoor het deur haar nagenoeg 50 keer met ‘n skerp voorwerp te steek, het probeer selfmoord pleeg.

Yusuf Baba, die staatsaanklaer, het Woensdag in die Randburg-landdroshof gesê Yengesen Pillay is in die hospitaal opgeneem en dat hy onder polisiebewaking is.

Pillay sal op aanklag van moord teregstaan wanneer hy op 28 Augustus in die hof verskyn.

Dit is onduidelik hoe of wanneer Pillay probeer selfmoord pleeg het.

Die vrou is omstreeks 17:00 Saterdagmiddag by die ingang van ‘n kantoorpark in Bryanston opgemerk. ‘n Vrou en haar kind het verby die kantoorpark gery en die gewonde vrou by die ingang sien lê waar sy beswaarlik nog asem gehaal het weens bloedverlies.

Die motoris het die nooddienste ontbied en paramedici was binne enkele minute op die toneel

“Die beseerde vrou het skaars reageer en het gesukkel om asem te haal. Hulle het haar dadelik met ŉ ambulans na die MediClinic Sandton geneem vir verdere behandeling,” het Werner Vermaak, woordvoerder van ER24, gesê.

Die vrou is later by die hospitaal dood verklaar.

Mynbou veroorsaak grootste skudding

Suid-Afrikaners moet hulself voorberei op nog meer aardbewings.

Die Raad vir Geowetenskap van Suid-Afrika het bevestig dat die Orkney-aardbewing op 5 Augustus nou die grootste myn-verwante seismiese gebeurtenis is wat ooit aangeteken is in Suid-Afrika.

Dit het aan die lig gekom tydens ‘n seminaar van die Wetenskaplike en Nywerheidsnavorsingsraad (WNNR) oor aardbewings aangebied in Pretoria.

Die skudding was gesentreer in Orkney, ‘n dorp geleë sowat 120 km suidwes van Johannesburg met ‘n hoë konsentrasie van diep goudmyne in die Klerksdorp-Orkney-Stilfontein-Hartebeesfontein (KOSH) area.

‘n Swart man, 31, het sy lewe verloor nadat ‘n muur ineengestort het in ‘n mynbou-nedersetting naby Orkney.

‘n Totaal van 600 huise in die Khuma-lokasie naby die episentrum, is erg beskadig en minstens 34 mynwerkers is beseer.

Inwoners in Gauteng, KwaZulu-Natal, Mpumalanga, die Vrystaat en so ver as Botswana het die trilling gevoel.

Die raad se Michelle Grobbelaar sê die aardbewing het ‘n 5,5 gemeet op die Richterskaal, groter is as die 5,3 Stilfontein aardbewing van 2005.

Sy sê die gebeurtenis het op ongeveer vyf kilometer onder die oppervlak plaasgevind.

Wits Universiteit se seismoloog professor Ray Durrheim sê seismiese gebeure sal voortgaan om vir so lank as mynbou voortgaan.

“Daar is mense wat opgelei is om te handel met aardbewings, maar kry ons een van hierdie seldsame gebeurtenisse, moet ons hulpbronne nie oorweldig word nie.”

Hy sê rampbestuur agentskappe moet aardbewings in hul beplanning insluit.

Durheim, en `n span navorsers het gevind dat meer as 90 persent van aardskuddings in Suid-Afrika aan goudmyne toegeskryf kan word.

Durrheim sê mynbou oor meer as 100 jaar het bygedra tot die druk op die kontinentale plate. Volgens hom, kan groot aardbewings in `n stabiele kontinentale streek voorkom.

Beeld het voorheen berig dat die episentrum deur die Amerikaanse geologiese opname (USGS) bepaal is en dat dit “enkele kilometer van Khuma, Orkney, Stilfontein en Klerksdorp” was.

Dr. Herman van Niekerk van die departement geologie aan die Universiteit van Johannesburg wat in strukturele geologie spesialiseer, sê die fokuspunt van die aardbewing was “10 km onder die aardoppervlak, sowat 6 km van Orkney in Noordwes”.

Die episentrum was in dié provinsie se goudveld, “maar het volgens Van Niekerk niks met mynboubedrywighede te doen nie” het Beeld berig.

In 2005 het ŉ soortgelyke aardbewing ‘n woonstelblok in Stilfontein vernietig is.

Strukturele skade aan geboue en huishoudelike artikels in die KOSH-area wat deur mynbou veroorsaak word beteken dat versekeringsmaatskappye nie eise uitbetaal nie.

Versekeringsmaatskappye betaal wel vir skade wat deur natuurrampe veroorsaak word.

Namibië se ekonomiese vryheidsvegters kry bestand

Namibië se Verkiesingskommissie het die registrasie van die Namibiese Ekonomiese Vryheidsvegters as ‘n politieke party goedgekeur.

Julius Malema se EFF het dus ‘n amptelike susterparty in Namibië. Die Namibië Ekonomiese Vryheidsvegters (NEFF) is ‘n “radikale linkse”, anti-kapitalistiese en anti-imperialistiese beweging, het die sakeman en politikus Epafras Mukwiilongo vroeër gesê.

Mukwiilongo, “bevelvoerder” van die NEFF het gesê die nuwe party sal meeding in die nasionale verkiesings in Desember.

Namibië se Mukwiilongo was voorheen ‘n lid van beide die regerende Swapo en die opposisie Congress of Democrats.

Hy en sy adjunk, voormalige opposisie-jeugleier Kalimbo Iipumbu, het reeds gesprekke met Malema gevoer.

Die twee mans dra ook rooi uitrustings en rooi barette soortgelyk aan dié van die EFF, maar met ‘n NEFF-logo.

Mukwiilongo het gesê die skepping van die NEFF is die “geboorte van ‘n reus” wat veg vir ekonomiese vryheid en het die Swapo-regering van “kapitalistiese belange” ten koste van sy burgers beskuldig.

“Ons regering is besig om deur die bemagtiging van die Chinese en Indiërs plaaslike sakelui te vernietig,” het Mukwiilongo vroeër aan AFP gesê.

“Ons is ‘n baie ryk land wat kan sorg vir homself as die regering industrialisering en die verwerking van ons minerale in Namibië verseker,” het Mukwiilongo gesê.

Mukwiilongo gesê sy party sal ook homoseksualiteit teiken met befondsing uit Uganda.

“Vandag manipuleer/beïnvloed die imperialiste ons nasie deur homoseksuele praktyke,” het Mukwiilongo gesê.

“Die NEFF is verbind tot die vereniging van alle Namibiërs om hierdie bose praktyk uit te roei.”

Die M&G het intussen berig dat net ‘n handjievol regeringsamptenare van Swapo wat saamwerk met onder meer Kanadese maatskappye uit die olievonds aan die kus baat.

Verdagte ontsnap in polisie-uniform

‘n Verdagte wat uit die polisieselle by Thohoyandou in Limpopo ontsnap het, is weer aangekeer.

Tshilidzi Nelson Masindi het twee weke gelede ontsnap en is tans onder polisiebewaking in die hospitaal, het RSG berig.

Hy het ernstige beserings opgedoen toe hy deur lede van die gemeenskap aangerand is oor die beweerde poging tot verkragting van twee vroue in Muledane Saterdag.

Masindi het daarna ontsnap vermom in ‘n polisie-uniform. ‘n Interne proses is aan die gang om vas te stel hoe hy die uniform bekom het.

Bouramp in Alberton eis 7

Die soektog na vermiste slagoffers onder die puin van ‘n betonblok by ‘n huis in Alberton, suid van Johannesburg, sal Dinsdag voortgaan.

Volgens Sapa is die dodetal minder as wat voorheen vermoed is. Sewe mense is dood met talle mense wat beseer is.

Daar is aanvanklik gedink dat nege mense dood is, omdat twee van die oorledenes klaarblyklik in twee gesny is.

Die voorval het gebeur tydens opgraderingswerk aan ‘n meenthuis in ‘n landgoed.

Inspekteurs het reeds die toneel besoek om die oorsaak van die ongeluk vas te stel.

Die departement van arbeid het gesê streng optrede sal teen die skuldiges geneem word.

Eskom ‘n tydbom weens swak instandhouding

Groot skade is aan die Duvha-kragsentrale aangerig ná ’n hewige ontploffing in die drukketel op 30 Maart vanjaar. Eskom swyg soos die graf oor die oorsake vir dié ontploffing wat ’n eerste in Eskom se geskiedenis is.

Kenners sê dit is ongetwyfeld omdat die eenheid nie onderhou word nie.

Eskom is so ver agter met instandhoudingswerk dat al hoe groter onstabiliteit van sy kragstasies ’n ernstige bedreiging vir die land se kragnetwerk begin inhou, het Beeld berig.

Nie-amptelike ingeligte bronne waarsku die gevaar van ’n algehele ineenstorting van kragsentrales word al hoe groter.

Die beskikbaarheid van kragsentrales wat krag kan lewer is veronderstel om meer as 85% te wees om veilig te wees, maar tot dusver vanjaar is net 75% beskikbaar weens onbeplande foute.

Eskom hoop hy kan dit vir die res van die jaar tot 77% verhoog, het dr. Steve Lennon, uitvoerende hoof vir volhoubaarheid, gesê.

Die nasionale beheersentrum wat ’n volskaalse ineenstorting moet afweer met laer kragverbruik en met beurtkrag indien nodig, moet bontstaan weens die swak beplanning.

Die sentrum moet ’n frekwensie van 50 Hz in al die verskillende onderdele van die netwerk handhaaf, anders stort die netwerk ineen. Daarvoor moet die vraag na en aanbod van beskikbare elektrisiteit presies dieselfde gehou word.

Dit sal ’n nasionale ramp wees en dit gaan baie moeiliker wees om die Suid-Afrikaanse netwerk ná ’n algehele ineenstorting aan die gang te kry as in ander lande omdat geeneen van die buurstate genoeg krag het om die Suid-Afrikaanse netwerk weer aan die gang te help kry nie, het ‘n bestuurder van die nasionale beheersentrum in Germiston gesê.

Die gevaar is dat die 13 steenkoolkragsentrales oud is en boonop harder moet werk as hul ontwerpvermoë en nie genoeg vir noodsaaklike instandhouding afgeskakel kan word nie. Die sentrales moet nog minstens 15 jaar voluit werk, “maar heeltemal inmekaar kan stort voor dan” het ’n topamptenaar in die organisasie gesê.

Tot dusver het Eskom sy duur dieselopwekkingseenhede gebruik om tekorte tydens instandhoudingswerk te verlig, maar dit hom in sy jongste boekjaar R11,3 miljard aan diesel gekos, terwyl hy veronderstel was om net R2,5 miljard aan dié energiebron te bestee.

’n Ingenieurskonsultant wat sedert begin vanjaar ondersoeke by verskeie van die 13 steenkoolkragstasies gedoen het, het gesê die erns van die instandhoudingsagterstand is skokkend en word hopeloos onderskat.