N4 sluit weens oproer

Die N4 snelweg wat Rustenburg en Zeerust met mekaar verbind, was Woensdagaand gesluit weens die voortgesette diensleweringsbetogings in die plaaslike munisipaliteit op Zeerust in Noordwes.

Oproeriges het paaie met klippe en rommel versper.

Hulle het die strate ingevaar nadat water-en sanitasieprobleme in die gebied ondervind is.

Ondanks ‘n swaar polisieteenwoordigheid in die gebied, het die oproerigheid vererger.

Volgens die polisie monitor hulle die situasie in die gebied.

Kommer oor ebola laai op

Die minister van Gesondheid, Aaron Motsoaledi, sê Suid-Afrikaanse mediese deskundiges is na lande gestuur wat deur ebola geteister word.

Motsoaledi het die portefeuljekomitee belas met gesondheid oor die departement se jaarverslag ingelig.

Die Departement het ‘n ongekwalifiseerde ouditverslag vir die derde agtereenvolgende jaar ontvang.

Hy sê Suid-Afrika is hard besig om maatreëls in plek te kry teen die ebolavirus.

Kommer oor die ebolavirus in die VSA is aan die oplaai.

President Barack Obama het intussen inderhaas sy reisplanne gekanselleer om die krisis en die Amerikaanse regering se reaksie daarop te bespreek.

Die Amerikaanse Sentrum vir Siektebeheer (CDC) is uitgesonder vir skerp kritiek, nadat ‘n tweede verpleegster in Dallas klaarblyklik die virus onderlede het.

Die direkteur, dr Thomas Frieden, het voorheen grappe oor zombies ivm virusse gemaak.

Amerikaanse gesondheidsamptenare sê nou hulle wil gesondheidstoetse doen op alle passasiers wat op dieselfde vlug was as ‘n gesondheidswerker van Texas wat positief vir ebola getoets het, maar kritici meen dis te min, te laat.

Die verpleegster het vroeër bevestig dat sy ‘n dag voordat sy simptome begin toon het, van Cleveland af gevlieg het.

Die Amerikaanse Sentrum vir Siektebeheer en Voorkoming wil die 132 passasiers ondersoek wat Maandag saam met haar op die vlug was. Sy is die tweede verpleegster wat die siekte in Amerika opgedoen het.

Albei vroue het die Liberiër versorg wat vroeër die maand in Dallas aan ebola oorlede is.

Die hospitale in Dallas en in Spanje wat met ebola-pasiënte gewerk het het nie dieselfde veiligheidsmaatreëls toegepas as dié in Duitsland nie.

‘Brand die plase’

Ten minste een swarte is erg opgewonde oor die nuwe liedjie van ‘n kletsrymgroep Dookoom.

Andile Mngxitama was in die middestad van Kaapstad vir die bekendstelling van Dookoom se Larney Jou poes.

Die video het skokgolwe in Suid-Afrika veroorsaak.

Die hoofsanger, Die Mutant, is glo ‘n “hip-hop-legende” op die Kaapse Vlakte.

Mngxitama, Julius Malema se regterhand, sê die video vertel ‘n “swart waarheid oor wit mag” en is ‘n “uitnodiging vir die hervoorstelling van bevryding”.

Hy voorspel dat Dookoom ‘n treffer gaan wees. Volgens Mngxitama is daar min twyfel dat hulle in alle waarskynlikheid Die Antwoord sal verbysteek.

Afrikaners sal waarskynlik baie verlig wees om dit te verneem.

Mngxitama meen swartes is nog steeds “vasgevang in die koloniale verhouding” waar blankes swartes deur die geweer of deur die liefde regeer. Hy sê hulp is die mees kragtige wapen van kolonialisme, deur te gee wanneer dit eintlik tienvoudig terugneem.

Kennelik is anargie en geweld volgens die sanger sowel as Mngxitama al manier om van hierdie verhouding te ontsnap.

Rooftogte by winkelsentrums styg 142% en polisie is ‘verlore’

Korrupsie, wanadministrasie en ‘n gebrek aan inligting kortwiek die stryd teen misdaad, het sprekers gister by ‘n konferensie oor misdaadvoorkoming gesê. Die hoof van die spesiale ondersoekeenheid, adv. Vas Soni, het sover gegaan soos om te vereis dat alle bates wat deur misdadigers verkry word, onteien behoort te word.

Volgens ‘n ander spreker by die konferensie, dr. Johan Burger van die Instituut vir Sekerheidstudies, het rooftogte by winkelsentrums binne ‘n jaar meer as verdubbel. Trouens, die persentasiestyging in dié misdaadkategorie is ‘n skrikwekkende 142%.

Burger het veral die polisie se misdaadinligtingseenheid gekritiseer vir hul gebrek aan inligting oor dié tipe misdaad: “Sonder intelligensie is ons verlore (by die aanpak van dié misdade), maar ons misdaadintelligensie sukkel. Dit is duidelik dat diewe iets nuuts gekry het om op te fokus.”

Soos wat privaatveiligheidsmaatskappye sekere vorme van misdaad moeiliker maak, verskuif misdaadaktiwiteit na ander terreine.

“Misdadigers kyk na hul risiko’s en kyk waar hulle meer wins kan maak teen minder risiko,” sê dr. Johan Burger. Hy vind die neiging vir misdaad om jaarliks toe te neem “kommerwekkend” en voeg by: “Ons moet bekommerd wees; ons moet antwoorde kry.”

Soni het voorts gesê dat “Suid-Afrikaners ongeduldig is as dit by korrupsie kom”. Sy eenheid is veral betrokke by die bekamping van korrupsie en omkopery.

Hy meen dat wanadministrasie en korrupsie ‘n bedreiging vir demokrasie inhou omdat dit die regstaat ondermyn.

Dit is egter nie meer genoeg om die oortreders van korrupsiewette in die openbaar uit te wys en skaam te maak nie.

“Die afgelope 20 jaar van ons demokrasie het genoegsaam gewys dat dit nie genoeg is om diegene wat van korrupsie verdink word in die openbaar te beskaam nie,” sê Soni

Baie meer as net openbare hoon is nodig. “Ons het ’n skaamtelose geslag geword.”

Die openbare beskermer Thuli Madonsela en Emiritusaartsbiskop Tutu het insgelyks die konferensie toegespreek.

Tutu het die polisie bedank dat hulle hul lewens waag om Suid-Afrikaners te beskerm, terwyl Madonsela ‘n beroep op Suid-Afrikaners gedoen het om teen korrupsie te verenig.

Waterbeperkings vir Noord-Durban

Watervlakke in damme wat die eThekwini munisipaliteit bedien, is op kritieke lae vlakke.

Die munisipale woordvoerder, Thabo Mofekeng het ‘n beroep op inwoners gedoen om water te spaar.

Die watervlak in die Hazelmere-dam het drasties afgeneem, wat dié stappe noodsaak. Die dam is die hoofbron van water vir gemeenskappe in die omgewing.

Die munisipaliteit het waterbeperkings in sommige noordelike dele van Durban naby die King Shaka Internasionale Lughawe ingestel.

Die beperkings sal die volgende vier maande geld.

Die Hazelmere-dam is op ‘n kritieke lae vlak van 51 persent.

Gebiede wat geraak word sluit in Verulam, Redcliffe, Everest heights, Waterloo, Tongaat, Westbrooke, La Mercy, Hambanathi, Emona, Fairbreeze en Umdloti.

Geleentheidsvenster om ebola te stuit krimp

Met die oog op bekamping van die wêreldwye dodelike ebola-virussiekte, het Nasionale Hawe-owerheid van Suid-Afrika verklaar dat hulle veiligheidsmaatreëls verskerp het.

Dié stap is geneem om personeellede by agt hawens te beskerm teen die virus wat deur inkomende vaartuie en hulle bemanning die land mag binnekom.

Die Hoof Hawemeester, Rufus Lekala, sê hulle werk saam met ander wetstoepassingsagentskappe.

Lekala sê hulle is nie bewus van enige vaartuie wat uit die besmette gebiede soos Liberië of Guinee gekom het nie, maar hulle hanteer hulle elke geval met omsigtigheid.

Die Veiligheidsraad het in September ‘n resolusie aanvaar wat verklaar dat ebola ‘n bedreiging vir internasionale vrede en veiligheid inhou.

Die geleentheidsvenster voor die uitbreking tot vlakke uitbrei waar dit nie meer beheer kan word nie, is stadig maar seker besig om te sluit.

Die Wêreldgesondheidsorganisasie sê bykans 4500 mens het reeds weens die ebolavirus omgekom.

Volgens die WGO sal die aantal mense wat na verwagting met die siekte besmet is, die week tot meer as negeduisend styg.

Die organisasie se assistent direkteur-generaal, Bruce Ailwood, sê hy is bekommerd dat die siekte na nuwe gebiede naby die grense van Liberië en Guinee met die Ivoorkus kan versprei.

Die prys van sjokelade kan negatief geraak word omdat een van die hoofprodusente, die Ivoorkus, op werkers uit besmette lande staatmaak om die bone te pluk.

Skole is intussen gesluit, verkiesings uitgestel, mynboumaatskappye het onttrek, en bestaansboere het hul lappies grond versaak.

Die virus teister Wes-Afrika met ‘n hernude risiko van politieke onstabiliteit in ‘n streek skaars herstel het van burgeroorlog.

Die WGO berig dat 10.000 nuwe gevalle per week teen Desember waarskynlik is, 10 keer die huidige koers.

Die Nasionale verpleegstersunie in die VSA het Dinsdag tydens ‘n perskonferensie verklaar dat verpleegpersoneel wat ebola-pasiënte behandel die deur hospitale beskerm word nie.

Roseann DeMoro, direkteur van die unie sê in hospitale se reaksie op die ebola-krisis word aanbevole veiligheidsprotokolle nie gevolg nie.

Die Dallas hospitaal waar Thomas Eric Duncan, die eerste persoon gediagnoseer met Ebola in die Verenigde State van Amerika, verlede week dood is, het geen van dié protokolle nagekom nie.

DeMoro het gesê as verpleegsters nie beskerm word nie, is hulle nie bereid om ebola of enige ander pandemie te hanteer nie.

“Die protokolle wat in die plek in Dallas moes gewees het, was nie in plek nie en is nie in plek op enige plek in die Verenigde State van Amerika nie,” het sy gesê.

Mosambiek stem

Mosambiekse diplomate sê alles is gereed vir Mosambiekers in Suid-Afrika om in vandag se verkiesing te gaan stem, het RSG berig.

Dit is die land se vyfde demokratiese presidensiële en parlementêre verkiesing sedert 1994.

‘n Woordvoerder van die Mosambiekse Konsulaat in Mbombela, Nercia Sambo sê daar is 32 stemlokale in Mpumalanga en Limpopo.

Inligting oor stemlokale in ander dele van Suid-Afrika was in die stadium nie beskikbaar nie. Sambo sê hulle hoop dat alles volgens plan sal verloop.

In Mosambiek kan kiesers sewe-uur vanoggend by stembusse landwyd begin stem. Alle oë is op die regerende Frelimoparty en sy hoofopposisie Renamo.

Die ander party is die Mosambiekse Demokratiese Beweging. Die party, wat nie ‘n gewapende tradisie het nie, het burgemeesters in vier stede, waarvan die meeste verlede jaar in munisipale verkiesings by Frelimo afgeneem is.

Die polisie in Mosambiek is op ‘n hoë gereedheidsgrondslag.

Motoronderdelebedryf ondersoek

Meer as 80 motorkomponentvervaardigers word ondersoek vir ‘n beweerde samespanning om pryse vas te stel en die mark die afgelope 14 jaar te manipuleer.

Die Mededingingskommissie het Maandag gesê die ondersoek is geloods toe een van die maatskappye in die kartel hulle genader het om vervolging vry te spring in ruil vir inligting.

Die kommissie het gesê sy ondersoek is soortgelyk aan ondersoeke in die VSA, Europa en Asië. Die vervaardigers wat ondersoek is, verskaf onderdele aan maatskappye soos Toyota, Nissan, Isuzu, General Motors, Mazda en Ford.

Kommissaris Tembinkosi Bonakele het gesê die ondersoek sal fokus op komponente wat in voertuie in SA se mark gebruik word.

“Ons het nog nie bepaal wat die omvang van die skade is nie, maar kartels oor die algemeen benadeel verbruikers en doen sluit sekere spelers uit,” het die kommissie gesê.

Dit moet nog ondersoek word of die kartel die ontwikkeling van Suid-Afrika se binnelandse onderdelebedryf gekniehalter het.

Kompetisiewaghonde in die VSA, Europa en Asië het ‘n paar kartels in die afgelope vyf jaar uitgerook. Hoë pryse en samespanning is deel van die optrede wat ondersoek is deur internasionale owerhede.

Die kommissie het nie die naam van die maatskappy met die inligting in verband met prysvasstelling, samespanning tenderprosedure en markmanipulasie onthul nie.

Die Nasionale Vereniging van Voertuigvervaardigers van Suid-Afrika se direkteur Nico Vermeulen, het Maandag gesê die bedryf is verras deur die omvang van die huidige ondersoek. Meer as 120 motorkomponente word geraak daardeur.

“Die ondersoek moet sy gang gaan. Ons wil nie die uitslag vooruitloop nie,” het hy gesê.

Suid-Afrika het sowat 300 verskaffers van motoronderdele.

Komponente wat geraak word deur die samespanning sluit omsetters, elektriese kragstuurstelsels, drukreguleerders en vonkproppe in.

Beleërde SAUK-voorsitter klou aan haar pos

Die voorsitter van die SAUK-raad, Zandile Tshabalala sal na verwagting vandag voor die parlementêre portefeuljekomitee oor Kommunikasie verskyn oor die wanvoorstelling van haar kwalifikasies.

Tshabalala het intussen gekla dat die portefeuljekomitee haar onregverdig behandel omdat die SAUK besprekings oor die kwessie uitsaai.

Sy ’n brief aan die portefeuljekomitee se voorsitter, Joyce Moloi-Moropa, gekla oor haar behandeling.

Die komitee het verlede maand eenparig besluit om Tshabalala te skors, hangende ‘n ondersoek. Sy eis egter dat die komitee haar ’n verhoor gee waarin sy redes kan voorlê waarom sy nie geskors moet word nie. Dit is van die hand gewys.

Moloi-Moropa het Tshabalala daarop gewys dat sy al op 30 Julie ingelig is oor die klag teen haar, tot 12 Augustus gehad het om daarop te antwoord asook uitstel gegun is.

Daar is twee klagte teen Tshabalala. Ten eerste omdat sy oor haar kwalifikasies gelieg het, en ten tweede omdat sy ’n vals beëdigde verklaring afgelê het.

Luidens dié verklaring het sy gesê haar kwalifikasies was in ‘n sak wat weggeraak het.

‘n Regsverteenwoordiger van die Universiteit van Suid-Afrika sal ook voor die portefeuljekomitee verskyn.

Die woordvoerder in die presidensie, Mac Maharaj het bevestig dat geen formele versoek tot dusver deur die parlement gerig is om Tshabalala af te dank nie.

‘n SAUK-voorsitter kan slegs deur die President, op aanbeveling van die Parlement aangestel of afgedank word.

ANC verkies brandstofheffing ipv etol

Die ANC in Gauteng kom vandag aan die beurt om sy standpunt te stel oor die omstrede etol-stelsel op die provinsie se hoofweë, het RSG berig.

Die party sal voor die hersieningspaneel verskyn wat deur die Gautengse premier, David Makhura aangestel is.

Die paneel ondersoek die sosio-ekonomiese impak van die stelsel op inwoners.

Die ANC se voorlegging volg op ‘n resolusie by die party se onlangse provinsiale konferensie, wat die implementering van die e-tolstelsel in sy huidige formaat verwerp.

Die nuwe provinsiale sekretaris, Hope Papo sê hulle verkies dat ‘n brandstofheffing die e-tolstelsel finansier.

Papo en die provinsiale voorsitter, Paul Mashatile sal na verwagting die afvaardiging na die wetgewer in Johannesburg lei.