Kategorie: Nuus

Medunsa-boikotters dreig studente met dood

Die minister vir Hoër Onderwys en die Suid-Afrikaanse Menseregte Kommisie se hulp is ingeroep deur Afriforum Jeug nadat boikotters studente gedreig het.

Die organisasie voer aan dat studente wat nie aan die klasse-boikot by Medunsa in Garankuwa wil deelneem nie doodsdreigemente ontvang.

Die woordvoerder van die organisasie, Henk Maree sê rassistiese aanmerkings word gemaak teen nie-swart studente wat klasse wil bywoon.

Afriforum Jeug eis ‘n ondersoek na die optrede en dat die veiligheid van studente gewaarborg word. Die universiteitbestuur het studente gister ingelig dat die kampus tot verdere kennisgewing gesluit is, maar geen redes is verskaf nie.

Daar word egter bespiegel dat studente Maandag begin dreig het om klasse te boikot totdat aanklagte teen vyf studente, wat vroeër die maand in hegtenis geneem is, teruggetrek word.

Die Kaapse Skiereiland Universiteit van Tegnologie stel intussen ondersoek in na redes waarom Afrikaanssprekende studente by die Landboubestuur-kampus in kennis gestel is dat hulle hul eksamen in Engels moet aflê.

Die burgerregte-organisasie, Afriforum, dreig met regsoptrede indien die universiteit nie redes kan verskaf nie. Die universiteit sê studente wat vanjaar onderrig in Afrikaans ontvang het, sal wel toegelaat word om hul eksamen in Afrikaans af te lê.

MSF waarsku dat Ebola-reaksie chaoties is

Die Franse mediese hulporganisasie, Dokters Sonder Grense (MSF) het gewaarsku dat die internasionale reaksie op die ebola-uitbreking in Wes-Afrika chaoties en totaal onvoldoende is, het RSG berig.

MSF sê dit is onaanvaarbaar dat ernstige besprekings oor internasionale samewerking eers vyf maande ná die uitbreking begin het. Volgens die organisasie word ebola bestuursentrums in Liberië oorval en die virus versprei vinnig.

Bykans 1500 mense het weens ebola in Wes-Afrika gesterf.

Suid-Afrika het vroeër mense die versekering gegee dat die landsgrense gemonitor word om die verspreiding van die siekte te keer.

Burger King vlug van Amerikaanse belastingkoers

Burger King is die jongste Amerikaanse maatskappy wat sy hoofkantoor gaan verskuif om laer belasting te betaal, ten spyte van president Barack Obama se waarskuwings dat die Amerikaanse regering stappe oorweeg om dit te voorkom.

Tussen Junie en Julie, ná Obama se uitlatings, het minstens vyf Amerikaanse maatskappye planne bekendgemaak om te laat spaander.

Sedert die begin van 2012 het meer as 21 Amerikaanse maatskappye na ‘n land met laer koerse verskuif. Dit is amper die helfte van die totaal van 51 van dié tipe transaksies in die laaste dertig jaar.

Burger King, die VSA se naasgrootste burgerkitskosgroep, onderhandel tans om Tim Hortons te koop en sy hoofkantoor na Kanada te verskuif.

Tim Hortons is Kanada se grootste verkoper van koffie en oliebolle en die samesmelting sal lei tot die stigting van die wêreld se derde grootste kitskosgroep.

Maatskappye se belasting beloop 40% in die VSA, maar in Kanada is dit slegs 26,5%.

Dié transaksie werp die soeklig op Amerikaanse maatskappye wat hul hoofkantore na ander lander skuif op soek na laer belastingkoerse te midde van neerdrukkende ekonomiese vooruitsigte waar die kloof tussen arm en ryk groter word.

Tim Hortons en Burger King sal steeds as twee aparte handelsname voortgaan en elkeen met hul eie bedrywighede.

Die gesamentlike onderneming sal verkope van sowat US$22 miljard ’n jaar hê en meer as 18 000 restaurante in 100 lande, volgens ’n verklaring van die maatskappye.

Graderingsagentskap gee SA banke opduim

African Bank se probleme is onwaarskynlik om ’n groot invloed op die groter Suid-Afrikaanse banke te hê, het die graderingsagentskap Fitch gesê.

Fitch se uitlatings kom slegs dae nadat ’n ander graderingsagent­skap die vier grootste Suid-Afrikaanse banke – Barclays Africa, FirstRand, Nedbank en Standard Bank – se skuld afgegradeer het.

Moody’s het verlede week dié stap geneem na die ineenstorting van African Bank (Abil) vroeër die maand en die daaropvolgende reddingsplan van die Reserwebank.

Volgens Moody’ het die Reserwebank die risiko van verspreiding na die res van die stelsel beperk, maar gewys dat hy bereid was om toe te laat dat krediteure verliese kan ly.

“Die onlangse mislukking en redding van African Bank Limited is geïsoleerd en enige verspreiding na die groot Suid-Afrikaanse banke gaan waarskynlik beperk wees,” het Fitch gesê.

Fitch het bygevoeg dat sy gradering van die banke nie gaan verander nie.

Die ander groot graderingsagentskap, Standard & Poor’s, het Donderdag ook gesê hy het geen planne om die banke af te gradeer nie.

Fitch het gesê die groot banke het slegs ’n klein blootstelling aan Abil en die invloed op die bankstelsel is onbeduidend.

Nampol skiet ‘struggle kid’ dood

Een van die slagoffers van die skermutseling tussen die polisie en die ‘Struggle Kids’ by Swapo se hoofkantoor in Windhoek, het dood onder ‘n goue kombers langs die pad gelê Woensdagoggend.

Die jong vrou is tydens ‘n skermutseling tussen die polisie en betogers in Windhoek in Namibië doodgeskiet, waar politieke geweld nie dikwels voorkom nie.

Twee polisiebeamptes is glo ernstig beseer tydens die betoging voor die hoofkwartier van die land se regerende party, volgens sekere bronne. Die Republikein het egter berig dat drie lede van die polisie, Nampol, gewond is.

Die 26-jarige Frieda Ndatipo was een van die sogenaamde kinders van vryheidsvegters wat werkgeleenthede van die regering eis.

Polisiebeamptes sê die betogers het stokke, klippe en vuurwapens by hulle gehad, maar die betogers ontken dit.

Die eerste minister Hage Geinob het Ndatipo se dood as ‘n tragiese en ongelukkige gebeurtenis bestempel.

Volgens inligting het die ‘Struggle Kids’ die een kant van die pad beset, terwyl die polisie die ander kant bewaak het.

Die ‘Struggle Kids’ het eers die aftog by Swapo se hoofkantoor geblaas nadat die weermag se hulp ook ingeroep is.

VSA al nader aan lugaanvalle op Sirië

Die Amerikaanse weermag sê vegvliegtuie van Egipte en die Verenigde Arabiese Emirate het ‘n reeks lugaanvalle op ISIS-groepe in Libië uitgevoer.

‘n Woordvoerder van die Pentagon, John Kirby, wou nie nadere besonderhede gee oor hoekom dié twee lande die aanvalle uitgevoer het nie.

Dié aanvalle kom nadat ‘n video vrygestel is waarin ‘n Amerikaner glo onthoof word. Die opname is intussen deur spesialiste as ‘n foefie afgemaak.

Nadat die VSA Moemmar Ghaddafi laat vermoor het sonder verhoor om Libië sogenaamd te “bevry”, is die land besig om al dieper in chaos te versink.

Faksies in verskeie stede wat deur die VSA bewapen is om die naburige Sirië te destabiliseer, asook twee strydende Parlemente veg om die mag te behou.

Amerika het reeds begin met vlugte oor Sirië, het Amerikaanse amptenare gesê. Washington beoog lugaanvalle teen die Islamitiese Kalifaat, maar daar is geen plan om die anti-terreur-aanvalle met die Siriese regering te koördineer nie.

Dit laat die vermoede ontstaan dat die VSA ‘n nuwe verskoning gekry het om Sirië aan te val soos hulle voorheen beplan het om te doen na hulle ‘n giftige gasaanval deur Amerikaans-gesteunde rebelle op die regering van Bashar al-Assad probeer blameer het.

Een Amerikaanse amptenaar, het op voorwaarde van anonimiteit aan AP gesê dat die administrasie betroubare intelligensie op die grond in Sirië insamel voordat enige lugaanvalle gedoen word.

Intussen is ‘n langtermyn skietstaking in die Gasastrook bereik. Israel en die Palestynse groep Hamas het in Kairo ‘n ooreenkoms bereik tydens samesprekings waarin Egipte as bemiddelaar opgetree het.

Die Sekretaris-Generaal van die Verenigde Nasies, Ban Ki Moon en die VSA is optimisties dat dit sal hou, maar nogtans ‘n beroep op albei partye gedoen om die ooreenkoms na te kom.

Meer as tweeduisend Palestyne en sowat 70 Israeli’s is in die 50 dae van geweld dood.

E-tol onder die loep

Die openbare konsultasie oor die e-tolstelsel sal Woensdag in Gauteng open. Die Gautengse regering het Maandag aangekondig dat die paneel vanaf 27 Augustus vir `n maand lank die stelsel met organisasies en lede van die publiek sal bespreek.

Die adviserende paneel van 15 mense sal die implikasies van en die sienings oor die befondsing van die Gauteng se snelwegverbeteringsprojek en e-tolpaaie ondersoek.

Die sosiale en ekonomiese invloed van die stelsel sal onder die loep kom, asook die omgewingsimpak. Die verspreiding van die finansiële kostes en voordele vir die gemeenskap sal ook ondersoek word.

Die paneel sal na verwagting in November aan die Gautengse premier verslag doen.

Intussen het ‘n inwoner van die Strand, naby Kaapstad, Vrydag ‘n e-tolrekening in die pos ontvang terwyl hy geen voertuig in sy naam geregsitreer het nie en 20 jaar gelede in Gauteng was.

Volgens die rekening van R34,62 is sy voertuig op 29 Junie 2014 tussen 17:44 en 17:59 binne 15 minute deur die Ilowe-, Fiscal- en Kingfisher-tolhekke.

Kobus Laing het die e-tol-inligtingsnommer, 0800 726 725, bly skakel, maar kon nie geholpe raak nie. Hy is aangeraai om die rekening te betaal.

Volgens Laing het hulle sy motor se registrasienommer en sy identiteitsnommer bekom.

“Die registrasienommer op die motor op die foto is my vrou se motor se registrasienommer. Die foto is egter te donker en ons kan nie uitmaak watter soort voertuig dit is nie,” het hy aan Die Burger gesê.

Laing het gesê hy gaan nie betaal nie.

Rus gaande oor Afrikaans

‘n Rus, Ewgeny Artemof is so gaande oor Afrikaans dat hy aan ‘n Russiese-Afrikaanse woordeboek werk.

Artemof woon in Stoepino, naby Moskou. Hy luister graag na RSG, skryf kortverhale vir Litnet en is tans besig om ‘n Russiese-Afrikaanse woordeboek op te stel, het Beeld berig.

Artemof doen dit vir die liefde van die saak en omdat hy graag die Afrikaanse woorde wat hy leer wil onthou.

Die praat sukkel maar, skerts Artemof, wat ‘n taalpraktisyn en vryskut-regsvertaler van beroep is.

Na die val van die Sowjet-unie in Desember 1991 was die ekonomiese situasie in Rusland haglik en Artemof het emigrasie oorweeg.

Op ‘n Suid-Afrikaanse immigrasievorm wat hy per toeval gekry het, was die vraag: “Beheers u Engels en/of Afrikaans en, indien wel, hoe goed?”

Artemof is wel Engels magtig, maar het gemeen kennis van Afrikaans sal sy kanse verbeter om as immigrant in Suid-Afrika aanvaar te word.

Hy en sy werkgewer het twee handboeke om Afrikaans te leer geleen gekry en oorgetik.

“Teen die tyd toe ons die eerste boek deurgesukkel het, kry ons albei opeens goeie werk by die Moskouse kantoor van ‘n internasionale regsfirma, dus sit ons ons studies in die yskas. Maar ons aangetrokkenheid tot die taal het gebly.

“In 2005 huur my baas ‘n Suid-Afrikaanse vennoot wat Afrikaans praat. Ons fassinasie was skielik terug.”

Artemof kan Afrikaans lees en skryf, maar kan dit nog nie vlot praat nie.

Niekie: Dom besluit om by VF+ aan te sluit

Die gewese DA-LP Niekie van den Berg het uit die Vryheidsfront Plus bedank.

Van den Berg het in Maart 2014, kort voor die verkiesing, by die VF Plus aangesluit omdat hy nie die DA se kandidatelys gehaal het nie.

In sy bedankingsbrief aan Pieter Mulder, leier van die VF Plus, skryf hy : “Ek dink ook nie dat dit enige doel dien om voort te gaan as lid nie. Dis maklik om agterna te praat, maar ek wil byvoeg dat my besluit om oor te loop (na die VF Plus) sekerlik een van die domste dinge is wat ek gedoen het.”

Van den Berg, wat homself reeds erg ongewild gemaak het met sy naakte ANC-propaganda op RSG, wil glo weer uitsaai.

Mulder was nie vir kommentaar beskikbaar nie.

Steve gaan Stem op nuwe album opneem

Steve Hofmeyr, wat verlede week verbied is om aan die Namaquafees deel te neem, gaan dele van Die Stem op sy nuwe album opneem. Toeka 3 sal in September vrygestel word.

Hofmeyr, wat vandeesweek verjaar, het aangekondig dat sy splinternuwe treffer, Sit die ligte aan, ook op die album verskyn.

Hofmeyr het vroeër vanjaar saam met 40.000 mense by die Innibos-fees Die Stem gesing tot konsternasie van Media24 en Boerehaters.

Hy beplan om nog ’n CD met FAK-staatmakers op te neem, met die volledige Stem, Ken jy die land?, Die lied van jong Suid-Afrika en Suikerbossie.

Hofmeyr sê dit pas in by die Toeka-tema van nostalgie. Hy het aan Beeld gesê hy sou vir Neelsie (C.J. Langenhoven) “self wou opspoor vir ’n duet”.

Meer as 350 000 eksem­plare van die eerste twee Toeka-albums is al verkoop, wat reuse-treffers soos Pampoen insluit.

Die nuwe Toeka verskil nie veel van sy twee voorgangers nie.

Hy het gesê die veldtog teen hom verander nie die enorme behoefte by konsertgangers aan redes om trots te voel nie.