Nuus Archives - Page 341 of 1583

Vrou by myn verkrag

‘n Vrou is glo by ‘n myn van Anglo American Platinum (Amplats) in Rustenburg verkrag, het die vakbond NUM Dinsdag gesê.

“Daar word beweer dat die vrou in ‘n aantrekkamer by die myn verkrag is,” het Sydwell Dokolwana, NUM se streeksekretaris in Rustenburg, gesê. Volgens Dokolwana is die vrou Sondag by die Thembelani-myn verkrag.

“’n Verdagte het glo die aantrekkamer met ‘n skroewedraaier binnegekom. Hy het die vrou beveel om haar klere uit te trek en gedreig om haar dood te maak indien sy nie gehoor gee nie.”

Die polisie in Noordwes het volgens Sapa bevestig dat ‘n klag van verkragting ondersoek word en dat ‘n 28-jarige man in hegtenis geneem is.

“Veiligheidsbeamptes kon daarin slaag om die verdagte voor te keer en het die polisie ontbied.” Hy sal na verwagting Dinsdag in die Rustenburg-landdroshof verskyn.

Volgens Dokolwana is daar aan hulle gesê dat die man nie ‘n werknemer van Amplats is nie, en wil hulle weet hoe die man toegang tot die myn se perseel verkry het.

Mpumi Sithole, woordvoerder van Amplats, het gesê die verdagte het glo ook nog ‘n vrou probeer leed aandoen. Volgens Sithole ontvang die vrou wat glo verkrag is sowel as die ander vrou albei traumaberading.

Chris Griffiths, uitvoerende hoof van Amplats, het gesê die maatskappy veroordeel enige vorm van geweld teen vroue. “Ons is baie hartseer oor die gewelddadige kriminele daad en veroordeel dit ten sterkste. Die veiligheid van ons werknemers is ons nommer een prioriteit.”

Kraanvoëls wél vergiftig

‘n Gifkenner sê die voorval waarin honderde kraanvoëls op ‘n plaas by Richmond in die Noord-Kaap vergiftig is, is een van die ergste gevalle wat hy in sy 30-jaar loopbaan nog teëgekom het.

Gerhard Verdoorn sê ‘n toksikologiese ontleding van monsters van die karkasse van die voëls, wat vermoedelik reeds in 2012 vergiftig is, dui aan dat daar hoë vlakke van die gif Diazinon teenwoordig was.

Die voëls is na bewering kwaadwillig met mielies, wat in die gif geweek is, gevoer.

Die saak is nie vroeër ondersoek nie, weens die owerhede se traak-my-nie-agtige houding.

Hy sê die Noord-Kaapse departement van omgewingsake en bewaring asook die polisie is besig met ‘n forensiese ondersoek. Die uitslag word nog afgewag.

Intussen sê Verdoorn, boere van oor die land heen oorval hom met oproepe om hul misnoë te kenne te gee. “Party boere is bekommerd oor die slegte naam wat dit die landbougemeenskap gee. Ek is self bekommerd daaroor, maar die meeste boere wat my gebel het ná hierdie voorval, net soos met die van die aasvoëls, was bitter knorrig omdat dié ou kraanvoëls vergiftig het.”

Verdoorn meen boere het ‘n baie sagte plek vir voëls en sê meeste boere sal in hul lewe nooit ‘n voël vergiftig nie.

Geweld in Ladybrand nadat Rooi Miere toeslaan

Geweld het in Ladybrand uitgebreek in die Oos-Vrystaat.

Die Manyatseng-lokasie in Ladybrand is in rep en roer nadat honderde huise, wat volgens die munisipaliteit onwettig opgerig is, deur die Rooi Miere afgebreek is.

Inwoners het hulle teen die uitsettings verset.

Die voorsitter van die Mantsopa Inwonersvereniging, Kaye Durant, sê die uitsetting, deur die Rooi Miere, moes onderbreek word toe die Manyatseng-gemeenskap gewelddadig geraak het.

Die Rooi Miere het later egter teruggekeer, vergesel deur die polisie, en het voortgegaan met die uitsetting.

OFM-nuus se verslaggewer op die toneel sê so ver die oog kan sien, is daar net sinkplate, pale en bourommel en tekens van buitebande en hout wat gebrand het.

Honderde mense sal sonder ‘n dak oor hul kop moet klaarkom.

Durant sê tans is dit ‘n hele oorlog. Verskeie buitelanders se ondernemings word geplunder, daar is by skole ingebreek, twee wyksraadslede se huise is afgebrand en skoolkinders dwaal sonder toesig rond weens die geweld.

Polisiemagte moes versterkings van Harrismith, Ficksburg en Bethlehem inroep om te help om die gewelddadige gepeupel onder beheer te hou.

Volgens Durant is ‘n Pakistani sake-eienaar beseer tydens die plundering wat plaasgevind het by sy winkel en is na Bloemfontein geneem vir dringende mediese sorg.

Die munisipale woordvoerder Mohlomi Mokoatsi sê die munisipaliteit het gelas dat die uitsettings voortgaan.

Volgens onbevestigde berigte is drie mense geskiet en gewond deur rubberkoeëls.

Beweerde bordeeleienaar nie aangekla

Die vier swart vroue wat Vrydag in hegtenis geneem is by ‘n beweerde bordeel in Fleurdal in Bloemfontein bly in aanhouding tot later vandeesweek.

Dit kom nadat Princess en Zanele Ncube, Sthando Zondi en Sandisile Gumede Dinsdag in die plaaslike landdroshof op aanklag van prostitusie verskyn het.

Zanele word ook aangekla vir die bedryf van ‘n bordeel, terwyl Princess tereg staan op ‘n bykomende aanklag van die besit van kokaïne.

Die vroue se verhoor is uitgestel tot Vrydag om meer inligting te bekom vir ‘n formele borgtogaansoek.

Intussen het die beweerde eienaar van die huis waar die vroue in hegtenis geneem is, nie in die hof verskyn nie.

Die 56-jarige man, glo verbonde aan ‘n hoër onderwys-instelling, is Saterdag by dieselfde huis gearresteer.

‘n Woordvoerder van die polisie, Chaka Marope, sê die saak is nie op die rol geplaas nie weens ‘n tegniese fout.

Sensitiewe inligting is nie op die klagstaat van die man ingesluit nie. het Marope gesê.

Hy sou na verwagting in die hof verskyn het op aanklag van die bedryf van ‘n bordeel. Sy prokureur Bertus Jacobs, sê hy is egter laat gaan omdat die staat nie die saak op die hofrol geplaas het nie.

Jacobs sê sy kliënt word nie met die misdryf verbind nie. Advokaat Nico Dreyer tree in opdrag van Jacobs vir dié man op.

Swart gepeupel rand blanke vrou in Oosrandse winkelsentrum aan

‘n Blanke paartjie, Zoran Ramos en Natalie Spence, is op Sondag 1 Maart deur ‘n tierende groep van 15 tot 20 swartes in die East Rand Galleria aangerand.

Die twee is deur die aanvallende groep swartes “wit varke” genoem. ‘n Woordewisseling het plaasgevind waartydens die blankes “wit varke” (white pigs) genoem is. Toe daar aan Spence geslaan is, het Ramos haar probeer beskerm deur terug te slaan.

Binne oomblikke het die skare swartes van omtrent twintig egter op die twee weerlose blankes toegesak en hulle begin aanrand.

Volgens ‘n ooggetuie, Jessica Smith, het Spence en Ramos op die vloer beland en kon nie wegkom nie. “Die twee het op die vloer gelê en kon nie beweeg of wegkom nie – hulle het om hulp geskree, maar nie eens die veiligheidswagte van die winkelsentrum wou hulle help nie,” sê sy.Teen dié tyd het ‘n bebloede Natalie Spence die trop swartes gesmeek om op te hou.Maar die aanranding het net aangehou, sê Jessica Smith. “Ek het selfs ‘n swart vrou gesien wat haar skoen uittrek om Spence mee te slaan en, ja, ek het ook ‘n swartman gesien wat haar teen die kop skop, wat die erge sny veroorsaak het.” (Sien foto hierby.)

“Die res van die gepeupel was besig om Ramos te skop en aan te hou om hom te slaan.

”Hy kon hulle nie almal terugslaan nie, en ek kon sien hy het probeer om Spence te verdedig.”

Smith het die polisie tydens die voorval geskakel, maar niemand het opgedaag nie. Dit het ‘n hele ruk geduur voordat enige hulp sou opdaag. Sy is deur die voorval geskok en het gesê: “‘n Paartjie is in ‘n openbare winkelsentrum aangerand sonder dat enige poging aangewend word om hulle te help; dis skokkend en heeltemal afstootlik!”Smith het ook gepoog om met die bestuur van die winkel te praat waar die onderonsie begin het, maar is vertel dat aangesien die fisieke aanranding buite die winkel se deure plaasgevind het, hulle geen verantwoordelikheid aanvaar nie.

“In vandag se tye behoort so iets nie plaas te vind nie,” meen Smith.

Hael laat boere op moedverloor se vlakte

Graanboere in die Oos-Vrystaat, wat gehoop het om ten spyte van die droogte hierdie seisoen ‘n oes van die lande te kan afhaal, is moedeloos na hael die naweek gesaaides vernietig het, het OFM berig.

Jan Scheepers sê die donderwolke het ongeveer 7uur Sondagaand begin saampak en dit het daarna verskriklik begin hael in Retiefsnek tussen Bethlehem en Fouriesburg.

Hy sê die hael het omtrent 25cm diep op die teerpad gelê en ongeveer 20 motors was ook gestrand.

Scheepers sê die skade aan die lande is hartverskeurend.

Hy sê dié verskriklike haelskade is veral sleg nadat die droogte reeds sy tol geëis het.

Lokval deur Britse agente lei tot spioenasieskandaal

Die Sunday Independent het laat blyk dat ‘n lokval deur Britse agente aanleiding gegee het tot die lekkasie van spioenasie-inligting aan Al Jazeera.

‘n Aantal van intelligensie bronne sê ‘n agent wat besig was op ‘n geheime projek met die kodenaam Mokopa-missiel, het dossiere aan die Central Intelligence Agency (CIA) en die Britse geheime intelligensie M16 verkoop.

M16 het glo daarna dadelik die dossier aan die Suid-Afrikaanse Staatsveiligheidsagentskap (SSA) oorhandig. Die koerant berig dat kriminele en interne ondersoeke van stapel gestuur is.

Die koerant het ‘n “voormalige apartheidsera intelligensie-agent” die skuld vir lekkasie gegee, maar nie verklaar hoe dit in die hande van die Amerikaanse TV-stasie in Katar, Al Jazeera, gekom het nie.

Die agent het na bewering sy swaer toegelaat om sy amptelike rekenaar te gebruik. Die swaer het die dossier gekopieer.

Twee ondersoekbeamptes wat vertroud is met die geval wou egter nie kommentaar lewer oor die aangeleentheid nie.

“Die kabinet veroordeel in die sterkste terme die lek van dokumente wat die veiligheid van die land in die gedrang kan bring,” het die minister in die Presidensie Jeff Radebe, gesê.

Dokumente van verskeie internasionale spioenasie-agentskappe is aan die internasionale nuusnetwerk uitgelek. Al die dokumente hou ten nouste verband met Iran, Israel en die VSA.

Israel is bekommerd dat die VSA ‘n ooreenkoms met Iran sal bereik oor hul kernprogram.

VSA kondig sanksies teen Venezuela aan

Die Verenigde State van Amerika het Venezuela Maandag as ‘n “nasionale veiligheidsbedreiging” verklaar in die ergste bilaterale diplomatieke geskil nog.

Sanksies sal teen sewe amptenare van die olieryke land ingestel word. Die land se intelligensiehoof, Gustavo Gonzalez, is een van die sewe.

President Nicolas Maduro het die sewe as nasionale helde verklaar en gesê hy verwerp die VSA se imperialisme.

Die Amerikaanse president Barack Obama het reeds die uitvoerende bevel onderteken, maar senior administrasie-amptenare het ontken dat Venezuela se energie-sektor of breër ekonomie geteiken word.

Vroeër in Februarie het Maduro Amerika daarvan beskuldig dat hulle agter die mislukte staatsgreep in Venezuela sit.

“Die noordelike imperiale mag verkeer in ‘n gevaarlike fase van desperaatheid, en gaan onderhandel met die vasteland [Suid-Amerika] se regerings om die omverwerping van my regering aan te kondig. En ek beskuldig vise-president Joe Biden hiervan,” het Maduro gesê.

Venezuela se leier het intussen aangekondig dat die land ‘n Amerikaans-geleide staatsgreep suksesvol afgeweer het. Dit sou na bewering ‘n aanval op die presidensiële paleis of ‘n ander topteiken behels.

Enige land wat deur die Amerikaanse administrasie as ‘n “bedreiging vir nasionale veiligheid” beskryf word, kan Amerikaanse sanksies te wagte wees.

Dieselfde proses is gevolg met lande soos Iran en Sirië, het Amerikaanse amptenare gesê.

SA se duur stadige internet striem glo groei

Suid-Afrika se duur en stadige internet is besig om ekonomiese groei te strem, het RSG berig.

Volgens ‘n opname deur die Instituut vir Rasseverhoudinge is die maandeliks koste van breëband-internet in Suid-Afrika meer as tien keer soveel as in Brittanje.

Die Britte geniet egter ‘n internet-spoed wat sowat vyf keer vinniger is.

Die uitvoerende hoof van die instituut, Frans Cronje sê goedkoper en vinniger breëband sal tot ‘n aantal ekonomiese voordele lei en die bruto binnelandse produk ‘n broodnodige hupstoot gee.

Die Internasionale Telekommunikasie-vakbond het Suid-Afrika 137ste geplaas uit 166 lande in terme van die persentasie van die bevolking wat internettoegang het.

Heli-ongeluk eis Olimpiese sterre

Agt Franse burgers, onder wie twee Olimpiese sportsterre en twee Argentiniërs is dood in ‘n helikopterongeluk in Argentinië, het RSG berig.

Volgens die Argentynse polisie het twee helikopters in die westelike provinsie La Rioja naby die Andes-berge teen mekaar vasgevlieg.

Die Olimpiese vroue swemkampioen, Camille Muffat en die Olimpiese bokser, Alexis Vastine was onder die oorledenes.

Die vlieëniers was van Argentinië.

Hulle was deel van ‘n span wat die realiteitsprogram, Dropped verfilm het.