Kategorie: Nuus

Swart onderwysers wil nie sport afrig

Die parlementêre portefeuljekomitee oor sport en ontspanning, meen sport in skole moet voortaan verpligtend wees, maar daar is nie swart onderwysers wat “na ure” wil werk nie.

Komiteelid, Strike Relegoma, sê hulle en die departement van basiese onderwys werk hard agter die skerms om sekere sportsoorte verpligtend te maak.

Hy sê die nuwe nasionale skolewet gaan daarvoor voorsiening maak dat elke skool vyf sportdissiplines moet aanbied.

Relegoma sê daar is egter nog verskeie uitstaande kwessies soos swart onderwysers wat weier om in die middag sport af te rig as die skool verdaag het.

Hy het ook gesê vervoerkontrakte wat tans in plek is maak nie voorsiening vir vervoer na skoolure nie.

NRP ontstig oor plaasmoorde na swarte se dood

Die Nasionale Raad van Provinsies (NRP) het ‘n sterk boodskap aan die minister van polisie, Nathi Nhleko, gestuur om dringend aandag aan plaasmoorde in die land te gee.

Dit kom nadat lede van die NRP gister eenparig ‘n mosie van die DA oor moorde op plase in die Vrystaat aanvaar het. DA parlementslid, George Michalakis, sê in die mosie is die raad se medelye gevra nadat ‘n bejaarde swart plaasbestuurder, Robert Rhadebe, die naweek op ‘n plaas by Harrismith vermoor is.

In die mosie is daar ook aangedui dat daar sedert die begin van die jaar altesaam 16 plaasmoorde in die Vrystaat was. Dit sluit Rhadebe se moord uit.

Michalakis sê van die 16 moorde was tien van die slagoffers plaaswerkers.

Volgens hom het die raad, nadat hy die mosie aanvaar het, ‘n beroep op Nhleko gedoen dat plaasmoorde as afsonderlike misdaad in die polisie se jaarlikse misdaadsyfers ingesluit moet word. Dit moet ook ‘n voorkeurmisdaad word en ‘n gespesialiseerde landelike veiligheidseenheid moet gevorm word. Michalakis sê die NRP se voorstelle aan Nhleko is ‘n stap in die regte rigting omdat die NRP verteenwoordigend is van kiesers in al nege provinsies.

Michalakis sê Nhleko sal hopelik kennis neem van die NRP se voorstelle en die erns daarvan insien.

Wie het Luister befonds?

Die sogenaamde film wat aantygings van rassisme teen die Universiteit van Stellenbosch “gedokumenteer” het, se vervaardiger is self betrokke by die aktiviste van Open Stellenbosch.

Dus is die vervaardigers van Luister, Dan Corder, Markus Hegewisch, Eric Mulder en Declan Manca wat hulself as “wit mans” beskryf, nie die onpartydige filmmakers wat hulle voorgee om te wees nie.

Corder het vroeër aan Greg Nicholson van die Daily Maverick erken dat hy ‘n plan wou bedink teen die US omdat sy vriend ‘n dissiplinêre verhoor in die gesig staar.

Praag het Corder per epos gevra wie die film befonds het, waarop Corder soos volg gereageer het:

For clarity, there was no funding whatsoever for this film. Not a single rand was spent on it. All of the equipment and transport costs were supplied and covered by us, the four filmmakers.

Hegewisch, bedrywig by die Universiteit van Kaapstad met radio-uitsendings en eertydse werknemer van Prime Media, het kort tevore getwiet:

Luister is a documentary about SA students facing racism & exclusion through language in varsity.

Terwyl geen Afrikaansprekende in Afrikaans by die UK geakkomodeer sal word nie, is Hegewisch klaarblyklik onbesorg dat die werklike diskriminasie en uitsluiting op grond van taal by die Universiteit van Kaapstad asook ander eentalige instellings plaasvind.

Corder is voorheen, in 2012, deur die polisie aangekeer vir openbare geweld in Kaapstad en het 10 ure in aanhouding deurgebring saam met 39 ander bruin oproeriges.

Hy het in 2011 gematrikuleer aan die gegoede Westerford High School in Kaapstad.

Dene, Duitsland waarsku dat migrantekrisis kan hande uitruk

Sommige Europese regerings weier om migrante in te neem en bied weerstand teen EU-voorstelle om die aankomelinge te huisves.

Die huidige voorstelle behels dat alle lidlande migrante uit Afrika, Asië en die Midde-Ooste moet inneem.

Magneetlande soos Duitsland besef dat afkeur teen immigrasie by kiesers bou en probeer die probleem versprei.

Die Deense sekretaris vir Vlugtelinge, Andreas Kamm, was eers ‘n multikulturalis, maar het dié week gewaarsku dat Europa op Armageddon afstuur.

Die Duitse regering sê hulle sal nie kan voortgaan om die buitensporige toeloop van vlugtelinge te akkomodeer nie.

‘n Duitse regeringswoord­voerder het gesê Duitsland verwag dat die aantal asielsoekers wat reeds die land binnegestroom het, viervoudig tot sowat 800 000 vanjaar gaan toeneem.

Na verwagting kan hierdie getal vanjaar selfs een miljoen haal.

“Duitsland en ’n paar ander lande ontvang verreweg die meeste vlugtelinge,” het Steffen Seibert, ’n woordvoerder van die regering, op ’n mediakonferensie gesê.

“Daar is 28 EU-lidlande en hierdie situasie kan nie voortduur nie. Daar moet ’n regverdiger verspreiding en meer samehorigheid wees.”

Honderde voorvalle van brandstigting by migtantekampe in Italië en Duitsland is reeds aangemeld en meer as 30 polisielede is verlede naweek beseer in oproer in die oostelike stad Heidenau, naby Dresden, toe protes teen so ‘n kamp handuit geruk het.

Opstande in migrantekampe in Frankryk kom gereeld voor, maar linkse Franse leef steeds in ontkenning oor die probleem.

Die mate waartoe linksers is staat is tot selfmisleiding ten spyte van daaglikse harde bewyse dat hulle die inval verkeerd takseer, is legio.

LiveLeak het ‘n video-opname van linkse Franse wat die “verbruikersamelewing” blameer vir hoe sogenaamde “honger vlugtelinge” optree geplaas.

Saterdag het 5 000 linkses deelgeneem aan ’n optog in Dresden om hul steun aan die migrante te betoon, maar Oostenryk het toegangsbeheer by grensposte in die ooste van die land verskerp nadat 71 vlugtelinge verlede week dood in ‘n verlate vragmotor op ‘n hoofweg gevind is.

Die voertuig het deur Hongarye toegang tot die EU verkry.

“Ons sal vir ‘n onbepaalde tyd (strenger) beheermaatreëls by alle belangrike grensposte in die ooste van die land toepas en alle voertuie ondersoek waarin mense moontlik versteek kan word,” het Johanna Mikl-Leitner van die departement van binnelandse sake gister aan ORF-radio gesê.

Oostenryk grens in die ooste aan Hongarye, Slowakye, Slowenië en die Tsjeggiese Republiek.

Die Hongaarse nasionale nuusagentskap MTI het berig oor reuse verkeersopeenhopings van meer as 20km op ‘n hoofweg wat na die grens met Oostenryk lei. Daar was na wat berig word ook ‘n opeenhoping op ‘n sekondêre pad na die grens.

Die polisie het die afgelope drie dae meer as 8 700 migrante wat Hongarye binnegekom het, in hegtenis geneem.

Intussen werk ‘n Amerikaanse hulporganisasie MOAS, onverpoos om vlugtelinge na Italië te bring.

Lees ook hier.

Regering sentraliseer tender-databasis

Die minister van finansies, Nhlanhla Nene het ‘n sentrale verskaffer-databasisstelsel bekendgestel.

Die stelsel is glo daarop gemik om die proses te vereenvoudig om sake met die staat te doen, om korrupsie te bekamp en deursigtigheid te bevorder, het RSG berig.

Die stelsel sal ook gekoppel wees aan die Suid-Afrikaanse Inkomstediens, Binnelandse Sake en die kommissie vir maatskappye en intellektuele eiendom.

Nene sê die stelsel van nege miljoen rand sal die registrasie en verifikasie-prosesse versnel. Hy sê die stelsel gaan ook verbind word met die regering se elektroniese tenderstelsel wat in April bekendgestel is.

Die Oos-Kaapse LUR vir Finansies, Sakhumzi Smoyao sê die stelsel sal inligting oor verskaffers vir alle staatsinstellings bevat en sal onwettige praktyke verminder.

Skietery by winkelsentrum in Kroonstad eis een

‘n Sekuriteitswag is Dinsdagaand in ‘n hospitaal in Kroonstad in die Vrystaat dood ná ‘n skietvoorval by ‘n winkelsentrum.

Netcare 911-woordvoerder, Chris Botha, sê met paramedici se aankoms by ‘n kruidenierswinkel in die sentrum omstreeks 21:00 het die gewonde man op die grond gelê. Hy het skietwonde aan die kop gehad.

Botha sê die skietvoorval word deur die polisie ondersoek. Niemand anders is beseer nie. Dit is nog onbekend of die sekuriteitswag in ‘n rooftog geskiet is.

Geweld op Stellenbosch na rektor se patetiese optrede

Die bestuur van die Stellenbosch Universiteit wil glo Open Stellenbosch – ‘n paar verdwaalde anti-Afrikaanse belhamels – raadpleeg oor “transformasie” te midde van aanvalle op wit studente.

Die rektor en vise-kansellier, Wim de Villiers het Maandag voor die parlementêre portefeuljekomitee oor hoër onderwys verskyn.

Die komitee het hom “ontbied” nadat ‘n video met die titel “Luister” op sosiale media verskyn het.

Dan Corder, die stigter van die mediamaatskappy Contraband Cape Town, het die video vervaardig. Dit is nie bekend waar hy die fondse vandaan gekry het nie.

Die kwaadwillige prul getiteld “Luister” is 35 minute lank en bevat aantygings deur 32 swart en bruin studente en ’n dosent van die Universiteit Stellenbosch (US) oor beweerde rassisme op Stellenbosch.

Met die vervaardiging van die video het hoogstens 20 anti-Afrikaanse aktiviste hoorsê en kwaadwillige aantygings in “getuienis” omskep.

De Villiers is glo tans bekommerd oor die polarisasie wat plaasvind, nadat hy gaan bieg het oor die “wit rassiste” op sy kampus.

Die rektor stel klaarblyklik steeds nie belang in die doelwitte van die video nie.

Weens die rektor se swak hantering van die kwessie, het geweld Dinsdag uitgebreek. Gevegte tussen betogende swartes en wit studente wat probeer om klasse bywoon, is op video opgeneem.

Die aanvallers was lede van die EFF en Open Stellenbosch wat wit studente met sambokke geslaan het.

Fotomateriaal van ‘n bebloede wit student is op sosiale media rondgestuur.

Eikestadnuus het’n lid van Open Stellenbosch afgeneem wat met ‘n sambok op ‘n Elsenburgstudent toesak. Die Open Stellenbosch-lid verskyn in die openingsonderhoud in “Luister”.

Ijeoma Opara, woordvoerder van Open Stellenbosch, het bevestig dat die aanvaller inderdaad ‘n lid van die beweging is.

“Ons staan saam in solidariteit met die [swart, anti-Afrikaanse] studente van Elsenburg en hul ervarings,” sê Opara.

Veiligheidsmaatreëls by die Elsenburg-landboukollege in Stellenbosch is verskerp na ontwrigtings deur studente wat betoog dat die kollege se taalbeleid Afrikaans insluit.

Die Wes-Kaapse departement van Landbou sê ook hy het begin met die proses om ‘n interdik te bekom om te verseker dat onderrig by die kollege kan voortgaan.

Die kollege val onder die beheer van die departement. ‘n Woordvoerder van Elsenburg, Petro van Rhyn sê daar is ‘n klein aantal studente wat nie saam met die kollege wil werk om oplossings te vind nie.

Van Rhyn het bevestig dat ‘n student na gister se skermutseling mediese behandeling moes ontvang. Sy sê die kollege se raad het reeds ‘n taakspan aangestel om ‘n nuwe taalbeleid te bespreek.

Intussen het die voorsitter van die Parlement se portefeuljekomitee oor Hoër Onderwys, Pinky Phosa, De Villiers se “eerlikheid” geloof.

Phosa sê dit is goed dat die universiteit nie die studente in die “Luister” video se ervarings ontken nie, en dat hulle daartoe verbind is om rassisme te ondersoek en daarteen op te tree.

Georkestreerde veldtog teen Afrikaans by US kry momentum

‘n Wit student aan die Universiteit Stellenbosch is uit sy koshuis geskors te midde van ‘n fel aanslag teen Afrikaans wat by die instelling woed.

Die groep Open Stellenbosch het die universiteit se gebruik van Afrikaans betreur as ‘n medium van onderrig, en beweer dit is uitgedink om die Afrikanerkultuur te beskerm ten koste van swart studente.

Verlede week het ‘n dokumentêre film getiteld Luister, die lot van swart studente by die universiteit bekla. Die ANC het die geleentheid dadelik uitgebuit om die bestuur voor die Parlement te roep “om hulself te verduidelik”.

Verlede week het Stellenbosch se visekanselier Wim de Villiers gesê hy het die uitnodiging om te verskyn voor die Parlement verwelkom.

Die wit student het na bewering “homofobiese en rassistiese” aanmerkings teenoor ‘n bruin student gemaak het.

Die woordvoerder van die universiteit, Martin Viljoen sê die voorval het na bewering verlede Vrydag in die Helshoogte-manskoshuis plaasgevind.

Hy wou nie oor die aanmerkings uitbrei nie, maar het bevestig dat die klaer bruin en die respondent wit is.

Kragkrisis dreig in Zim

‘n Kragkrisis dreig in Zimbabwe indien die land se kragverskaffer, die Zimbabwean Power Company (ZPC), voortgaan met sy planne om die hidro-elektriese-aanleg by Kariba af te skakel.

Die ZPC het gewaarsku dat die lae watervlak in die Karibadam die kragverskaffing met bykans 50 persent kan verminder.

Die kragsituasie in Zimbabwe sal na verwagting eers in 2018 verbeter met voltooiing van die nuwe kragstasie wat naby Binga opgerig word.

Dit sal nuwe beleggings striem tesame met die verwagte droogte wat die land se droewe ekonomiese vooruitsigte sal laat voortduur.

Die hoof van die Confederation of Zimbabwe Industries, Busisa Moyo het Vrydag aan African News Agency gesê sakeondernemings sal groot skade ly.

“Ons is besorg omdat die voorstel nie sê wanneer dit kan gebeur nie. Ons nader die feesseisoen wanneer verbruik en produksie op ’n hoogtepunt is. Ons moet beslis die oorblywende klompie werkgeleenthede beskerm.

“As hulle die krag in Januarie en Februarie afskakel, sal dit sin maak omdat dit die tydperk van lae produksie en verbruik is, maar nie in November en Desember nie.”

‘n Paar maande tevore het Afrika se rykste man, Aliko Dangote, aangekondig dat hy beplan om in mynbou- en kragopwekkingsprojekte in Zimbabwe te belê sowel as in ‘n groot sementfabriek.

Dangote het President Robert Mugabe in Harare ontmoet.

Die Nigeriese miljardêr ‘n reeks vergaderings met hooggeplaaste regeringsamptenare gehou: “Ons het reeds besluit om te belê in Zimbabwe. Dit is hoekom ons hier is. Enige land wat jy ons sien besoek beteken, ja, het ons besluit om te belê.”

Dangote het gesê die belegging sal werk skep en “Zimbabwe help om hul eie ekonomie te ontwikkel.”

Dangote gesê sy groep sal ook kragsektor in Zimbabwe verken. Die land genereer tans ongeveer 1,300MW terwyl die vraag in die winter 2,200MW is.

Dit sal klaarblyklik ‘n gesamentlike onderneming tussen Dangote en Blackstone wees.

Die Dangote Groep het belange in sementproduksie in verskeie Afrika-lande.

Vermeende skêraanvaller ontwrig hof

Die saak teen ‘n swart derdejaar Pukstudent wat tereg staan op ‘n aanklag van aanranding met die opset om ernstig te beseer is Maandag in die Potchefstroom Landdroshof tot 30 September uitgestel.

Die verrigtinge is uitgestel nadat die student uit sy beurt begin gepraat het in die hof en luidrugtig beswaar aangeteken het teen die wyse waarop sy saak glo hanteer word.

Hy het onder meer geskree dat die Staat die proses onnodig laat sloer en sy familie in die proses seer maak.

Die swarte sal tot dan in aanhouding bly.

Hy is intussen na die Sterkfontein Hospitaal vir sielkundige evaluasie verwys.

Die 24-jarige Lerato Phoofolo, het vroeëer vandeesmaand ‘n wit student van die Over-de-Voor manskoshuis op kampus met ‘n skêr in die arm, skouer en heup gesteek.

Phoofolo het Hendri Van Dyk na bewering Vrydagoggend omstreeks 07:00 in die koshuis aangeval nadat Van Dyk hom gevra het om sy musiek sagter te sit.

Die polisie en die PUK se beskermingsdienste is na die koshuis ontbied na die aanval waarna Phoofolo in hegtenis geneem is.

Phoofolo is dieselfde dag op borgtog van R1 000 vrygelaat. Deel van sy borgvoorwaardes was dat hy nie die NWU Potchefstroomkampus mag betree nie.

Volgens mnr. Rooies Andrianatos, koshuisvader van Over-de-Voor, het Phoofolo hom twee keer op die 14de gekontak om te sê dat hy sy besittings wil kom haal. Andrianatos het vir hom gesê dat hy met sy prokureur moet reël om dit te doen.

Saterdag 15 Augustus het Phoofolo se broer, Sipho, hom gekontak en gesê dat Phoofolo op pad is koshuis toe, “hy is baie aggressief en onder die invloed van een of ander middel. Ons is baie bekommerd”.

Andrianatos het beskermingsdienste laat weet en Phoofolo is by ‘n ingangshek voorgekeer.

Daar is met Phoofolo gepraat oor die borgvoorwaardes waarna Phoofolo glo gelag het en weer weg is.

Hy het na bewering toe oor ‘n muur gespring en na die koshuis gegaan waar veiligheidspersoneel hom gevang het. Hulle het die polisie laat kom.

Volgens die polisielid wat hom in hegtenis geneem het, het Phoofolo die polisie gedreig en gevloek. Twee bykomende klagtes van intimidasie en onwettige betreding is teen Phoofolo aangebring.

Phoofolo se prokureur, mnr. Lucas Makoro, het geargumenteer dat die staat nie die regte prosedure gevolg het met hul aansoek om Phoofolo se borgtog te kanselleer nie.

Landdros Tebogo Mokgatle het egter in sy uitspraak gesê dat hy in die belang van geregtigheid die staat se aansoek toestaan om die borg te kanselleer.

Volgens Mokgatle het Phoofolo se prokureur op baie tegniese punte beswaar aangeteken, maar nooit die inhoud van die verklarings betwis nie.