Kategorie: Nuus

Ebola is terug in Sierra Leone

Gesondheidsamptenare in Sierra Leone het ‘n sterfgeval weens Ebola bevestig, pas nadat die Wêreldgesondheidsorganisasie aangekondig het dat die dodelike virus in Wes-Afrika uitgeroei is.

Geen gevalle van Ebola moet vir 42 dae voorkom voordat die WGO ‘n land Ebola-vry verklaar.

Liberia is vroeër vanjaar en Guinee laat verlede keer, vry verklaar.

Die sterfgeval in Sierra Leone is vroeër hierdie week aangeteken.

Die Ebola-toetssentrum se woordvoerder Sidi Yahya Tunis het aan die BBC vertel dat die pasiënt gesterf het in die Tonkolilidistrik. Hy het daarheen gereis het vanaf Kambia, naby die grens met Guinee.

Die toetse is uitgevoer deur Britse gesondheidspesialiste. Die BBC se Umaru Fofana het in die hoofstad Freetown gesê gesondheidbeamptes is nou dringend op soek na diegene wat in kontak met die slagoffer was.

Nagenoeg 4000 mense het gesterf van Ebola in Sierra Leone, en 11.000 mense in die hele streek, sedert Desember 2013.

Liberië het al twee keer vantevore aangekondig dat Ebola oorwin is, maar dit kon nie die infeksie keer nie.

Twee renosterstropers, wildbewaarder doodgeskiet

Twee vermeende renosterstopers is deur bewaarders in die Nasionale Kruger-wildtuin doodgeskiet.

‘n Woordvoerder van die wildtuin sê toeriste het ‘n bewaarder daarop bedag gemaak dat ‘n man met ‘n swaar kaliber jaggeweer in die Napi-gebied naby Pretoriuskop rondloop.

Helikopters met honde en die polisie is na die gebied gestuur. Hulle het twee mans gevind wat op die polisie begin skiet het.

Die polisie en bewaardes het teruggeskiet en die mans gedood.

In nog ‘n skietvoorval vroeër is ‘n lid van die teenstropings-eenheid in die wildtuin per ongeluk deur ‘n kollega doodgeskiet.

Die voorval het in die Malelane-deel van die park plaasgevind.

Die man is glo geskiet nadat ‘n buffel hom gejaag het en die veldwagter probeer het om die buffel te neutraliseer.

Sy kollega het glo in die spervuur beland. Hy is na die hospitaal gehaas, maar is in die teater oorlede.

Bob is glo perdfris

Zimbabwe se pres. Robert Mugabe is gesond en die internetgerugte dat die 91-jarige leier ernstig siek is, is vals, het die Zimbabwiese staatskoerant, Donderdag berig.

The Herald het die president se woordvoerder, George Charamba, aangehaal.

Vals berigte dat Mugabe dood is,­ ­sirkuleer gewoonlik elke Januarie wanneer die leier op sy jaarlikse verlof is, berig The Herald.

Zimbabwe se regerende ZANU-PF party het die week aangekondig dat begin is met reëlings vir Mugabe se verjaardagpartytjie. Hy word volgende maand 92.

‘Harry Potter se prof’ oorlede

Die akteur Alan Rickman, bekend vir sy rolle as Professor Snape in die Harry Potter-reeks, en die Sheriff van Nottingham in Robin Hood: Prince of Thieves, is Donderdag in die ouderdom van 69 jaar oorlede.

Die ster se familie het aan die BBC gesê Rickman het aan kanker gely.

Hy was ook te sien in die films Love Actually en het onlangs die rol van Judge Turpin in die filmweergawe van Stephen Sondheim se musiekblyspel, Sweeney Todd: The Demon Barber of Fleet Street, vertolk.

In 1995 het hy ‘n Golden Globe, Emmy-toekenning en Screen Actors Guild-toekenning vir sy vertolking van Rasputin in Rasputin: Dark Servant of Destiny, ontvang.

Strenger Amerikaanse wetgewing kan leeujag knou

Strenger nuwe Amerikaanse wetgewing rakende die invoer van leeu-trofeë gaan ’n beduidende impak op die Suid-Afrikaanse toerismebedryf hê.

Dit is volgens Melville Saayman, toerismekenner verbonde aan die NWU se Potchefstroomkampus.

Sy kommentaar aan OFM volg nadat dit bekend gemaak is dat die nuwe wetgewing op 22 Januarie in werking sal tree.

Saayman meen dit gaan ’n direkte invloed hê op die inkomste wat gegenereer word uit jag, veral omdat leeus so gesog vir trofeë is.

“Dis eintlik ons grootste bron van inkomste as jy na enkele items kyk. So dit gaan vir seker ‘n invloed daarop hê. Ek dink wat amper vir my nog meer belangrik is, is die feit dat as Amerika hierdie tipe van aksies loods, het dit gewoonlik ‘n afwentelingseffek op ander lande.

“So ons kan dalk sien dat meer lande so ‘n tipe van reaksie gaan toon, wat dan natuurlik die effek baie groter gaan maak as wat ons dit op die oomblik gaan voel.”

Minister wil glo nie aan studente se eise toegee nie

Swart studenteraadslede het Donderdag die vergadering met die minister van hoër onderwys, Blade Nzimande, vroeg verlaat.

Nzimande het saam met amptenare van sy departement met studenteraadleiers van universiteite landwyd in Tembisa vergader.

Dit was ‘n poging om die lot van swart wanpresteerders wat nie outomaties toegang tot hoër onderyws kry nie, aan te spreek.

Talle swart studente meen hulle is geregtig op ‘n graad omdat hulle benadeel word. Nie een van die beswaardes is egter voor 1994 gebore nie en het juis die voordeel van swart regering geniet.

Hulle hou nietemin vol dat dat hulle “struktureel” deur ‘n wit stelsel uitgesluit word.

Die vergadering met Nzimande het glo ure lank geduur waartydens die anti-wit belhamels hul eise gestel het.

Hulle wou nie met die hoofstroommedia praat nadat hulle uitgestap het nie, alhoewel hul eise besonder simpatiek deur die mediamonopolie behandel word.

Volgens bronne het die minister hulle uitgejaag, maar Nzimande sê sy departement is bereid om met studenteleiers oor alle kwessies te beraadslaag.

Die sekretaris-generaal van Wits se Studenteraad, Fasiha Hassan, sê hulle het uitgestap omdat die minister geen resolusies wou aanvaar nie.

Hassan sê agt eise is aan die minister voorgelê. Dit sluit in gratis onderrig en gratis registrasie.

Hulle het onder meer geëis dat die sogenaamde “uitsluiting” van swart studente beëindig word, asook dat gratis registrasie toegelaat word en kredietrekords geskrap moet word.

Tans word regeringsbeurse aan prestasie verbind, wat klaarblyklik vir die wanpresteerders onaanvaarbaar is en neerkom op uitsluiting.

Die swart studente gebruik tans skoonmakers om die kampusse te ontwrig om die owerhede te dwing om gehoor te gee aan hul eise.

ISIS aanvaar verantwoordelikheid vir Jakarta-aanvalle

Minstens sewe mense is dood in Jakarta na ‘n terreuraanval waarvoor ISIS verantwoordelikheid aanvaar het.

Verskeie ontploffings en geweerskote is in die middestad gehoor.

‘n Polisiebeampte en Kanadese man, asook vyf aanvallers is gedood in die ontploffings en vuurgevegte in een van die besigste distrikte in die Indonesiese hoofstad.

Tot sewe ontploffings en verskeie vuurgevegte het Jakarta Donderdag in ‘n skynbaar gekoördineer aanval geruk.

Sewentien mense, insluitend ‘n Nederlandse man, is gewond. Dit het veiligheidsmagte sowat drie uur geneem om die beleg by ‘n Starbuckskafee te beëindig, in Jakarta se oudste winkelsentrum.

Die gekoördineerde aanvalle volg na ‘n dreigement deur die Islamitiese Staat om Indonesië te teiken. Die dreigement het die land in ‘n greep van vrees gehad.

Die polisie sê hulle vermoed ‘n selfmoordbomaanvaller was vir minstens een van die ontploffings verantwoordelik.

Volgens berigte het tot ses bomme ontplof. Ooggetuies sê daar was ook ‘n gespanne situasie met die veiligheidsmagte wat ‘n koffiewinkel binnegegaan het en ‘n verdagte wat glo op die gebou se dak vasgekeer was.

Berigte is verder ontvang van ‘n polisielkontrolepunt wat voor ‘n winkelsentrum opgeblaas is.

Skerpskutters is ook daar ontplooi.

Intussen het die Islamitiese Staat nog nie verantwoordelikheid vir die aanval in Turkye aanvaar nie.

Polisie skiet een dood in oproer by Waterval Boven

Die polisie het bevestig dat ‘n 21-jarige man gister oppad hospitaal toe dood is nadat die polisie skote afgevuur het om ‘n groep gewelddadige betogers uiteen te jaag.

Oproeriges het strate versper in Waterval Boven en Umgwenya in Mpumalanga nadat hulle vroeër ‘n munisipale gebou aan die brand gesteek het.

Toegangsroetes na Umgwenya word steeds met klippe en brandende bande versper, en die situasie bly gespanne. In Waterval Boven is dit kalmer.

Brandbestryders van die Ngangala-munisipaliteit het vroeër die brand by die munisipale gebou geblus.

Die gebou huisves ook ‘n kliniek.

Inwoners betoog glo oor ‘n tekort aan skoon drinkwater en vullisverwydering.

Nathi Mthethwa ‘ontbind’ PANSAT ná jare se ondoeltreffendheid

Die ANC-SAKP-minister van kultuur, Nathi Mthethwa het aangekondig dat hy PANSAT summier ontbind. Dié taalwaghond wat deur die grondwet geskep is, die Pan-Suid-Afrikaanse Taalraad, is veronderstel om daarop te let dat taalgelykheid in Suid-Afrika geskied. Dit is egter ‘n tandelose waghond want in baie jare het daar geen geluid uit PANSAT gekom terwyl die land sienderoë verengels is nie.

Volgens Lisa Combrinck, woordvoerder van die departement, het “die minister opgetree kragtens artikel 5(5A) van die Pan-Suid-Afrikaanse Taalraadwet nr. 59 van 1995 wat hom toelaat om die raad op redelike gronde te ontbind.”

Volgens Mthethwa was daar “geen gemeenskaplike begrip tussen die departement (van kuns en kultuur) en die raad betreffende wat die strategiese rol die raad behoort te wees nie”.

“Ek het die raad van PANSAT met onmiddellike ingang ontbind. Die ontwikkeling van ons tale en die bevordering van veeltaligheid in Suid-Afrika moet versnel word. Die jaar 2016 moet tasbare resultate oplewer. Kom ons begin van meet af aan en tree beslissend op in sake die uitdagings wat PANSAT raak,” sê Mthethwa.

Met die samewerking van die Nasionale Tesourie het Mthethwa die Raad op Nasionale Erfenisraad as die rekenkundige gesag vir PANSAT aangestel om te verseker dat die ontwikkeling van ‘n “omkeerstrategie” geskied en dat dit sonder versuim ingestel word.

Verder stappe sal glo in die loop van die jaar geneem word om PANSAT te “stabiliseer”.

PANSAT was een van die “speelgoedtelefone” wat ná 1994 ingestel is om die indruk te wek dat daar gewaak sal word oor billike behandeling vir Afrikaans, ‘n taal waarteen sowel die ANC as die SAKP histories baie vyandig staan. Mnr. FW de Klerk het dit insgelyks voorgehou as voldoende om die status van Afrikaans te beskerm, maar PANSAT het nog nooit enige stappe teen Engels-eentaligheid in die land geneem nie.

Volgens dr. Dan Roodt van PRAAG, “verteenwoordig PANSAT ‘n jammerlike mislukking, ook van die Suid-Afrikaanse grondwet waarvan die taalbepalings glad nie eerbiedig word nie.” Hy het ook “die reste van die ou Broederbond en NP vir dié stand van sake” geblameer. “Ek sien die stigting van organisasies soos die Afrikaanse Taalraad as niks minder as die voortsetting van die geploeter rondom taal en die status van Afrikaans nie. PANSAT kon veeltaligheid verseker het indien die wil daartoe bestaan het. Nou sal ons self moet verseker dat Afrikaans oorleef, sónder PANSAT en sónder die grondwet wat eintlik ‘n klug geword het. Wat taal betref, verkeer ons reeds in ‘n diktatuur, tans die enigste Engelstalige diktatuur ter wêreld,” het hy gesê.

 

Iran hou 10 Amerikaners aan wat gebiedswater betree

Iran hou 10 Amerikaanse soldate aan nadat beslag gelê is op twee skepe wat volgens die VSA “per ongeluk” in Iranse gebiedswater gevaar het.

Dié voorval kom te midde van spanning in die aanloop tot die verwagte implementering van die P5+1-kernooreenkoms met Iran wat in Julie 2015 bereik is.

Die ooreenkoms kan na wat berig word binne enkele dae in werking gestel word.

Volgens ‘n Amerikaanse amptenaar is ooreengekom om die 10 aangehoudenes Woensdag na ’n Amerikaanse vlootvaartuig in internasionale­ water oor te plaas.

Iran sowel as die VSA het bevestig dat die nege mans en een vrou korrek behandel word.

Volgens Iranse nuusmedia het vlootmagte van die Rewolusionêre Mag twee kilometer binne Iran se gebiedswater in die Persiese Golf beslag gelê op die vaartuie.

Die Rewolusionêre Mag sê die Amerikaners het die fout begaan weens “foutiewe navigasietoerusting”.