Kategorie: Nuus

RSG: Swart bevoorregtes gee witheid die skuld vir alles wat verkeerd is

RSG, wat uitsaai vanaf die Woordfees in Stellenbosch, het hul luisteraars met menings oor “wit bevoorregting” oor die kop geboender.

Die tema is besonder vreemd aangesien die raswette van die ANC wittes uitsluit van die ekonomie. Die term “swart bevoorregting” is dus eerder ‘n weerspieëling van die werklikheid in Suid-Afrika.

‘n “Gedig” deur ‘n “wit bevoorregte” is ook vir die Marxistiese anti-wit brigade se propagandadoeleindes opgedis en op sosiale media versprei.

Ek ry in ‘n motor gekoop deur my pappie
En ek bly stil oor my dosent se rassistiese grappie
Ek klou stywer aan my beursie as ‘n swart man nader loop
En die deure in my lewe staan almal wawyd oop
Ons spot vir Zuma wanneer hy getalle hardop lees
Want dis mos lekker om ‘n wit Suid-Afrikaner te wees
Ons kla oor BEE, en oor kwotas is ons suur
Ons blameer werkloosheid eenvoudig op ‘n lui-wees kultuur
“Bruh, ek wil net graadvang en New Zealand toe emigreer”
“Apartheid is verby, hoekom kla hulle alweer?”
Ons is dan deel van die Madiba-reënboognasie
En daardie klomp maak net alweer ‘n gerasie
FeesMustFall was onnosel, en “annoying as hell”
Want nou moes ons trippies Europa toe uitstel
“Ek’s nie ‘n rassis nie, ek’t dan ‘n swart maat!”
Maar luister jy as hy oor pyn probeer praat?
Hey, wanneer gaan ek my goue sterretjie wen?
Want ek het nou mos my wit voorreg erken
Ek haal vir Biko aan, glasie rooiwyn in my hand
En ek sê vir die vegters: “Ek’s aan julle kant”
Intussen is geboue en siele aan die brand
Studente word deur hul beskermers aangerand
Gesinne moet leef op onder vyf duisend rand
Daar’s pyn en onregverdigheid regoor ons land
Daar’s duisendes sonder die kans om te studeer
In plek van uitreiking: ‘n rubberkoeëlgeweer
Sisteme onderdruk, en harte kry seer
Dan sê jy met trots: “Ek sien nie kleur”
Ek voel ongelooflik skynheilig om enigsins kommentaar te lewer, maar wraggies:
Sommige van die gesprekke waarvan ek hierdie week deel was
was so belaai met rassisme en haat en onkunde
dat ek begin oorweeg het om myself net te isoleer.
Ja, ek weet dat die aanvallenheid van baie studentebewegings nie lekker is nie.
Dit maak vir my ook ongemaklik.
En sonder om enige aksie te probeer regverdig, is my standpunt eintlik net dit:
Ons moet verstaan waarom soveel mense nogsteeds bitter bly.

Vierde UK-student verkrag

‘n Vierde student van die Universiteit van Kaapstad is Dinsdagaand naby die Rhodes-gedenkteken verkrag.

Sedert Desember word studente daar voorgelê en seksueel aangerand, het Gerda Kruger, UK-woordvoerder, Donderdag laat blyk.

Hulle bied intussen glo berading aan sulke slagoffers.

Dinsdag se aanval is moontlik deur dieselfde verdagte as die vorige verkragtings gepleeg, sê Kruger.

Die student het gaan draf toe sy ernstig aangerand en in die bosse verkrag is.

Die verkragter het haar met ‘n mes aangehou, maar sy kon later daarin slaag om te ontsnap en hulp te ontbied.

Die UK het studente en personeel gevra om nie alleen te gaan stap of draf na donker nie.

Die polisie het eers ‘n week of twee gelede ‘n indentiteitsvoorstelling uitgereik van die vermeende verkragter, ‘n swartman, Patrick Hlomane.

ANC-binnegevegte raak warm

Die polisie monitor die situasie by die KwaSithebe Nywerheidspark op Mandeni aan die KwaZulu-Natalse noordkus waar ‘n agtste fabriek gisteraand aan die brand gesteek is, het RSG berig.

Die polisie het ook hulle hande vol gehad toe onbekende mense probeer het om sakeondernemings naby die eMakhempini-sportveld aan die brand te steek.

Die skade by die fabrieke word reeds op 15 miljoen rand beraam.

Die geweld het uitgebreek oor die ANC se proses om kandidate te benoem vir die komende plaaslike verkiesings.

Die hoofmanne het ‘n nuwe indoena aangewys om kandidate vir die komende plaaslike verkiesing te kies.

Die protesgangers het vroeër geweier dat ANC-leiers hulle toespreek totdat sowat 120 mense, wat weens brandstigting en openbare geweld in hegtenis geneem is, vrygelaat word.

Janusz Walus vrygelaat

Janusz Walus sal op parool vrygelaat word. Sy prokureur, Roelof du Plessis, het Donderdagoggend die Poolse immigrant se vrylating bevestig.

Walus het die leier van die Kommuniste, Hani in sy oprit in Boksburg in April 1993 doodgeskiet.

Die SAKP was teenwoordig en woordvoerder Alex Mashilo sê hulle is teleurgesteld, maar nie verbaas nie.

Terwyl die paroolraad Walus die groen lig gegee het, het die minister van justisie, Michael Masutha geweier, omdat “verdere dialoog met die party en die Hani-familie” glo nodig was.

Die regspan wat Walus verteenwoordig het, het aangevoer dat Masutha bevooroordeeld was teen hul kliënt, en het gesê die besluit van die minister van justisie om nie parool toe te staan nie, was uitsluitlik as gevolg van politieke vooroordeel en inmenging.

Walus en sy mede-gevangene Clive Derby-Lewis is in 2014 beseer ‘n beweerde SAKP-sluipmoordaanval deur ‘n bendeleier wat omgekoop is in die Kgosi Mampuru (voorheen Pretoria Sentraal) Gevangenis.

Ander gevangenes het die twee gered van ‘n gewisse dood. Die SAPD sou die voorval ondersoek, maar na twee jaar is daar nog geen besonderhede vrygestel nie.

Derby-Lewis en Walus is albei gesteek met ‘n “kombuislepel”, het ‘n woordvoerder van Korrektiewe Dienste Manelisi Wolela gesê.

Die bendeleier het die twee voorheen met rus gelaat, maar die SAKP wou klaarblyklik nie hê hulle moet die gevangenis oorleef nie.

MTN kry die skuld vir Boko Haram-sterftes

President Jacob Zuma sê die regering sal nie probeer om die geskil tussen die selfoonmaatskappy MTN en die Nigeriese regering in die guns van die Suid-Afrikaners te besleg nie.

Zuma sê dit is ‘n kwessie tussen MTN en Nigerië en hulle sal wag tot die twee partye die kwessie afgehandel het.

Die Nigeriese president, Muhammadu Buhari, het vroeër MTN die skuld gegee vir die dood en ontvoering van Nigeriërs deur die Boko Haram-militante groep.

Die Nigeriese kommunikasie-kommissie het MTN met bykans R80-miljard rand beboet omdat hy nie die reëls vir simkaart-registrasie nagekom het nie.

Buhari het gesê duisende ongeregistreerde simkaarte het in die hande van terreurgroepe beland.

“Tussen 2009 en vandag, is ten minste 10,000 Nigeriërs vermoor deur Boko Haram. Dit was die rede waarom NCC gevra het dat MTN, Glo en die res van hulle hul selfone moet laat registreer. Ongelukkig was MTN baie, baie stadig en het bygedra tot die ongevalle”.

Selfs al het die maatskappy onlangs ‘n betaling van $250 miljoen gemaak om ‘n skikking te fasiliteer, het Nigerië se president volgehou om die maatskappy verantwoordelik te hou.

MTN bied diens aan meer as 200 miljoen mense in Afrika en die Midde-Ooste. Nigerië is na bewering die selfoon-reus se grootste mark.

Twee renosters in Noordwes doodgeskiet

Twee renosters is in die Mafikeng Private Natuurreservaat in Noordwes deur stropers doodgeskiet.

Die bestuurder van die reservaat, Louis Coetzee, sê die renosters is Woensdagoggend gekry.

Albei koeie se horings is ook verwyder. Coetzee sê ‘n .375-geweer is gebruik.

Hy sê vier renosters is sedert die begin van die jaar in die Mafikeng-reservaat vir hul horings afgemaai.

In 2015 het stropers 1 175 renosters in Suid-Afrika doodgemaak.

Al- Sjabaab weer glo aanval af

Volgens die Islamitiese groep Al-Sjabaab, het hulle ‘n aanval op een van hul basisse in die suide van Somalië afgeweer.

Buitelandse kommando’s het glo met twee helikopters ingevlieg en die aanval geloods. Een Al-Sjabaab-militant is in die aanval dood.

Sjeik Abdiasis Abu Musab, Al-Sjabaab se woordvoerder vir militêre operasies, het nie die nasionaliteit van die troepe geïdentifiseer wat in die aanval ongeveer 50 km suid van Mogadisjoe, betrokke was nie.

Verskeie lande onder die vaandel van Amisom staan die Somaliese regering by in hul stryd teen die Al-Sjabaab-insurgensie.

Die sending bestaan uit troepe van verskeie Afrikalande wat sy aan sy met die Somaliese weermag veg.

Amerikaanse amptenare het in 2014 bekend gemaak dat Amerikaanse militêre adviseurs sedert 2007 in die geheim in Somalië betrokke is en dieper betrokke sal raak om die Islamitiese bedreiging af te weer.

Washington het oor die naweek aangekondig dat lugaanvalle Saterdag op ’n ander Al-Sjabaab-basis uitgevoer is en dat meer as 150 Islamitiese vegters in daardie aanval dood is.

Hulle het glo van onbemande tuie gebruik gemaak om twee sleutelfigure uit te wis. Al-Sjabaab wou nie die Pentagon se verklaring bevestig dat hulle die twee, Ugaas en Mire gedood het nie.

Die VSA het hommeltuie in Jemen sowel as in Somalië ontplooi.

Ondertussen berig Reuters dat ’n motorbomontploffing in die Somaliese hoofstad, die week die lewens van drie mense geëis het.

Die drie slagoffers was almal polisiemanne.

UV betaal amokmakers se borg

Stig brande, jaag betalende wit studente uit hul verblyf, rig miljoene rande se skade aan en skree luidkeels rassistiese slagspreuke?

Die Universiteit van die Vrystaat het erken dat hulle oproerige swart personeel en studente wat in hegtenis geneem is vir sulke soort misdrywe, se borgtog betaal het.

Die oproeriges is tydens betogings op die kampus twee weke gelede vasgevat nadat hulle ‘n hofbevel verontagsaam het.

Die 39 studente en werkers is op borgtog vrygelaat en die bedrae wissel van tussen R300 en R2000 elk.

Die universiteit se woordvoerder, Lacea Loader, sê dié geld is deur UV van “private bydraers” ingesamel en hulle het hulp verleen omdat hulle van mening is “dat alle oortreders as onskuldig beskou word tot skuldig bewys”.

Loader wou nie reageer op navrae oor of die borgtog betaal is op voorwaarde dat skoonmakers die universiteit se nuwe ooreenkoms met uitgekontrakteerde werkers aanvaar nie.

Die skoonmakers sal na verwagting op 5 April op aanklagte van onwettige byeenkomste weer verskyn.

Dié voorreg “dat alle oortreders as onskuldig beskou word tot skuldig bewys”, is een wat wit Kovsies klaarblyklik nie geniet nie.

Sedert die anti-wit Reitz 4-voorval is nog twee wit Kovsie-studente sonder gronde van poging tot moord aangekla.

Die beweerde aanranding van ‘n swart mede-student deur Cobus Muller en Charl Blom is dadelik deur die rektor aangegryp om die twee te belaster.

Muller en Blom is daarna sonder enige prosedure van die kampus verban en nooit die geleentheid gegun om hul kant van die saak te stel nie.

Die twee is uiteindelik in die Bloemfonteinse streekhof op alle aanklagte vrygespreek en die rektor moes daarna om verskoning vra.

Dit blyk dat Muzi Gwebu se versinsels dat hy op die Bloemfontein-kampus met ‘n bakkie raakgery is en daarna geslaan is deur Muller en Blom, egter oorgenoeg rede was vir Jansen om nog ‘n tirade teen Afrikaners van stapel te stuur.

Die Reitz-4-verhoor was ‘n groter skande, ook wat die mediadekking betref. Die universiteit het ‘n skuldigbevinding vooruitgeloop.

Selfs vermanings deur ‘n landdros om nie die uitspraak deur die media te lewer nie, is botweg geïgnoreer.

Fiksie en haatveldtogte het die verhoorproses deurlopend oorheers. Die media het ook probeer voorgee dat die swart skoonmakers wat deur die vier verfilm is, onbewus daarvan was dat hulle verfilm word.

Effers dreig met groot betoging môre by Tuks

Volgens berigte gaan die EFF môre ‘n groot betoging voor die Universiteit van Pretoria hou. Die party het verklaar dat hy hom verset teen ‘n “’n minderheid wat kulturele, maatskaplike en alle ander fasette van universiteitslewe daar steeds oorheers”.

“Ons gaan ons lede oor Gauteng heen daarvoor mobiliseer,” sê die waarnemende provinsiale leidster van die party, Mandisa Mashego.

Dit mag tot konfrontasie lei, aangesien ‘n interdik wat die universiteit voorheen teen betogings in en rondom die kampus verkry het, steeds geldig is. By navraag van PRAAG, het Anna-Retha Bouwer, die universiteit se woordvoerder, gesê:

“Die EFF het by die Tshwane-metroraad aansoek gedoen om more om 10:00 met die optog voort te gaan, maar dit is nie toegestaan nie. Indien dit dus voortgaan, is dit onbeskerm. Die Universiteit het streng sekuriteitsmaatreëls in plek, asook goeie samewerking met die SAPD.”

Intussen het daar ook onenigheid onder die personeel van die Universiteit van Pretoria ontstaan nadat vier Effer-studente, wat voorheen geskors is omdat hulle geweld gebruik het, weer deur die rektor, prof. Cheryl de la Rey, tot studie toegelaat is. Lede van Solidariteit en die UP-werknemersorganisasie (UPWO) het dié besluit om die studente se skorsing op te hef, gekritiseer, maar is op hul beurt deur ‘n ander groep van 50 akademici veroordeel. In ‘n petisie het dié groep van 50 verklaar:

“Ons, die ondergetekende lede van die akademiese personeel van die Universiteit van Pretoria, ondersteun ons universiteit se besluit om daardie studente wat geskors is vir hul betrokkenheid by onlangse studentebetogings toe te laat om na die kampus terug te keer en om hul studies voort te sit, hangende die uitslag van hul tugverhore.”

Volgens die EFF, moet die Universiteit van Pretoria “gedekoloniseer” word. Mandisa Mashego sê:

“Ongelukkig dink swart Suid-Afrikaners dat dekolonisasie plaasgevind het as jy kan stem. Dit is nie (so nie). Dit is ’n diepgaande proses. Dit gaan oor ekonomiese eienaarskap, eiendomsreg en patrone van rykdom.

“’n Proses van dekolonisasie moet by die UP begin word, want ’n minderheid oorheers steeds kultureel, maatskaplik en alle ander fasette daar.”

Sy het ook gesê dat die party se studente “met burokratiese taktiek geboelie word” deur die UP, wat hom agter die ANC en Afriforum geskaar het”.

ANC keelvol vir Nederlandse bomplanters

Die ANC se sekretaris-generaal Gwede Mantashe het nou genoeg gehad van die Nederlandse bomplanters.

Hy het die Nederlandse anti-apartheidbeweging (AAM) gevra om hul inmenging in Suid-Afrika se besluite te staak.

Sy kommentaar volg na ‘n ope brief deur die AAM aan Mantashe en sy adjunk Jessie Duarte gerig is waarin hul “ernstige kommer” uitspreek oor die “onlangse polisie en ander amptelike ondersoeke na ‘n paar van ons kamerade”.

Die brief kom te midde van die bohaai oor ‘n ondersoek van die Valke teen ‘n geheime eenheid in die Suid-Afrikaanse Inkomstediens.

AAM noem die minister van finansies, Pravin Gordhan by name in die brief.

In die brief word beweer dat Gordhan “vandag gebrandmerk is as vyand van die staat” terwyl hy en sy vriende ondergrondse weerstand teen apartheid gebied het.

In reaksie hierop het Mantashe gesê: “Inmenging met prosesse in ons land is nie solidariteit nie. Dit is inmenging.”

Hy het bygevoeg dat ‘n vriend van die ANC nie kwessies deur middel van ‘n ope brief sou hanteer nie.

“Ek dink dit is ‘n stap te ver,” het Mantashe gesê.

Die brief is onderteken deur die voormalige leiers van die Nederlandse AAM, insluitende sy oudpres Conny Braam, voormalige sekretaris-generaal Fons Geerlings, voormalige tesourier Kier Schuringa en die voormalige redakteur van ‘n anti-apartheid publikasie, Bart Luirink.

Luirink beskryf noukeurig die bande tussen die Nederlandse bomplanters en hoe hulle gehelp het met Operasie Vula, waarin Gordhan ook ‘n sleutelrol gespeel het.