Kategorie: Nuus

VSA erken dat ISIS uitbrei

Ná die VSA Dinsdag nog lugaanvalle teen ISIS-teikens in Libië van stapel gestuur het – ‘n uitbreiding van Amerikaanse militêre operasies buite Irak en Sirië – het NBC News ‘n kaart van die globale uitbreiding van die terreurgroep bekom.

Die kaart is deel van ‘n geklassifiseerde inligtingstuk wat deur die Withuis ontvang opgedateer is vir “Augustus 2016” en wat voorberei is deur die Nasionale Teenterrorisme Sentrum.

Dit toon ‘n drie-voudige toename in die aantal plekke rondom die wêreld waar ISIS werksaam is.

Die VSA se departement van buitelandse sake het dokumente wat aandui dat in 2014, toe die Amerikaanse militêre veldtog teen die ekstremiste begin het, was daar net sewe lande waarin die terroriste aktief was.

Teen 2015, volgens die State Department se eie beramings, was dit reeds byna dubbel, met 13 lande.

Die huidige inligtingsessiekaart toon 18 lande waar ISIS ten volle operasioneel is. Die kaart vertoon ook ‘n nuwe kategorie – “aspiranttakke” – en ‘n lys van ses lande waar hulle wortel skiet, naamlik Egipte, Indonesië, Mali, die Filippyne, Somalië en Bangladesj.

Die VSA was suksesvol in die aanval op die “ISIS-kern” in Irak en Sirië, maar die “hittekaart” is waarskynlik ‘n baie groter een as al die aspirerende gebiede gewys word waar ISIS graag verder wil uitbrei en reeds terroriste-aanvalle uitgevoer het, sê ontleders.

“Dit is regverdig om te sê dat die hele ruimte tot stryd uitbrei vir ISIS,” het een NBC-ontleder bygevoeg.

In ‘n verkiesingsjaar waarin die stryd teen terreur ‘n fokuspunt is, erken selfs die Amerikaanse regering dat die slagveld al hoe groter raak.

Rand versterk ná Britse rentekoersverlaging en DA-vertoning

Die rand het sy beste koers in nege maande teen die dollar bereik nadat die Bank van Engeland rentekoerse verlaag het en die Demokratiese Alliansie ‘n goeie vertoning in gister se plaaslike verkiesings gelewer het.

Die rand het vanoggend vroeg op R13,7035 teen die Amerikaanse dollar gestaan en R17,9938 teenoor die Britse pond. Die plaaslike geldeenheid het laas op 3 November 2015 teen dié koerse verhandel.

Die plaaslike verkiesings het gister invloed uitgeoefen, met die DA wat lyk asof dit die meeste stemme in Johannesburg, Pretoria, Port Elizabeth en Kaapstad gaan behaal. Sommige ontleders het dit as positief vir die rand gesien.

“Die verkiesingsuitslag lyk asof dit verwagtinge vir ‘n verandering in die vernaamste stede ondersteun,” het Simon Quijano-Evens, ‘n strateeg in ontluikende markte by Legal & General Investment Management in Londen, aan Bloomberg gesê. “Verandering is waarna markte uitgesien het, hoe gering dit ook al mag wees, gegewe die voortdurende inkomste-ongelykheid en daling in groeikoerse wat mens in Suid-Afrika waarneem.”

Teen die euro het die rand op R15,2560 te staan gekom, nadat dit nie te lank gelede nie selfs teen R18 per euro verhandel het.

Ook in Johannesburg is die rand deur ‘n meer rooskleurige bril bekyk. “Plaaslike verkiesings wat glad verloop ondersteun vanoggend sentiment, dit lyk asof ons demokrasie in ‘n goeie toestand is, daarom is dit goeie nuus,” het Ion de Vleeschauwer, hoofhandelaar van Bidvestbank in Johannesburg gesê. “Verhandeling in rentekoersverskille help ook, met die rentekoersverlaging van die Bank van Engeland wat ons opbrengs oor die kort termyn aanloklik laat lyk.”

Die Bank van Engeland het gister op sogenaamde “Super-Donderdag” besluit om die Britse koerse tot 0,25% vanaf 0,50% te verlaag terwyl die terugkoop van bates onveranderd op £375bn gelaat is.

‘Hollywood-base dreig akteurs wat Trump ondersteun’

Liberale Hollywood-base dreig na bewering akteurs wat Donald Trump ondersteun dat hulle nooit weer werk sal kry nie. Dié bewerings word gemaak deur die Amerikaanse sepiester en manlike model, Antonio Sabato jr. (foto hier bo). Volgens Sabato is hy aanlyn “geteiken” en op ‘n swartlys geplaas nadat hy ‘n toespraak ter ondersteuning van Trump by die Republikeinse Nasionale Kongres gelewer het.

In ‘n onderhoud met die vermaaklikheidstydskrif Variety, het die 44-jarige akteur – wat op die eerste dag van die Republikeinse kongres sy steun vir Trump uitgespreek het – gesê dat regisseurs sy agente gekontak het en aan hulle gesê dat hulle nooit weer met hom sal werk nie.

“Op Twitter is ek beledig en deur ander glanspersoonlikhede aangeval. Ek gee nie om nie,” het Sabato aan Variety gesê. “Ek sien dit, maar ek lees dit nie. Ek versper hulle en vee dit uit en laat dit agter. Daar is soveel negatiwiteit waardeur mens ingetrek kan word. Maar ek het ook van ander glanspersoonlikhede gehoor: ‘As hy dit kan doen, wil ek ook my mening lug.’ Hulle is keelvol vir die manier waarop dié land bestuur is en vir al die leuens.”

By die kongres het Sabato vertel hoe hy wettig na die Verenigde State geïmmigreer het, nadat hy 11 jaar lank moes wag. Die akteur, wat oorspronklik van Rome afkomstig is, sê hy “het die reëls nagekom” tydens die immigrasieproses, en het die behoefte vir ander immigrante om dieselfde te doen, beklemtoon.

“Donald Trump staan vir eenheid,” het Sabato gedurende sy kort toespraak gesê. “Donald Trump glo aan een Amerika, met vryheid en regverdigheid vir almal. Om veilige grense te hê, om ons burgers te beskerm, niks daarvan is haatdraend nie. Dis die regering se verantwoordelikheid. En dis die regte ding om te doen. Donald Trump gaan dit gedoen kry en ons weer op die regte spoor plaas.”

Hoewel miljoene mense Trump se kandidatuur vir die Amerikaanse presidentskap ondersteun, “hou die liberale Hollywood-bedryf nie daarvan nie”.

“Baie van die base, baie van die uitvoerende hoofde, hulle besit die kanale, hulle besit die media. Hulle skenk miljoene aan Hillary Clinton en president Obama,” het hy aan Variety gesê. “Ek is net ‘n gewone ou wat my mening lug. Laat dit so wees. Ek sal aanhou om te veg vir dít waarin ek glo, en ek sal aanhou om werk te soek.

“My werk en my lewe is op God gegrond,” meen Sabato. “My leier, die een waarna ek opkyk, is Jesus Christus. Ek het mense in dié bedryf ontmoet wat sê, ‘Ek praat nie met dié vent nie, want hy praat van Jesus Christus.’ Dit openbaar die ware persoonlikhede van dié mense. Wel, ek wil in elk geval nie saam met hulle werk nie. Maar as ek soos hulle sou optree, sou ek nooit vir enigiemand werk nie. Hulle is almal aan Hillary se kant.”

Die akteur het bygevoeg dat hy mense ken wat op ‘n swartlys geplaas is eenvoudig omdat hulle die Republikeinse kongres bygewoon het.

“Jy is veronderstel om in diens geneem te word vir jou talent en jou vermoëns, nie op grond van hoe jy voel oor politiek of godsdiens nie. Maar dis hoe hulle dinge doen,” het Sabato verduidelik. “En dis net nie hoe ek is nie. Ek ken baie mense wat in dieselfde bootjie is. Die werklikheid is dat indien jy met die Republikeinse Party verbind word, die rolverdelingsregisseurs en vervaardigers jou reeds op grond daarvan op die swartlys geplaas het.

Sabato het ook sy voorspelling herhaal dat Trump teenoor Clinton in November se algemene verkiesing gaan seëvier.

“Ek gaan Hollywood nooit verlaat nie. Kom wat wil, gaan ek sukses probeer behaal,” het hy aan Variety gesê. “Ek gaan bloot die waarheid praat – mense weet nie hoe dié bedryf werk nie. Ek voel sterk daaroor dat Donald Trump gaan wen. Ek dink hy gaan in November verkies word.”

 

VF Plus kry 2% in Pretoria, hoop op koalisie met DA

Die leier van die Vryheidsfront Plus, Sakkie du Plooy, hoop om in ‘n koalisie met die DA in Pretoria te dien. Gisteraand teen tienuur was die DA en ANC min of meer gelykop met 42% elk van die stemme in die sogenaamde Tshwane-metrogebied.

In weerwil van die groot aantal Afrikaners in Pretoria, is die VF Plus egter net in die vierde plek, agter die radikale EFF wat 10,52% van die stemme op hom verenig het. ‘n ANC-EFF-koalisie sou dus ook in Pretoria tot stand kon kom.

Die Vryheidsfront het tot dusver vier setels ontvang en Du Plooy verwag dat daar nog vier sal bykom soos wat verdere stemme getel en uitslae bekendgemaak word.

DA praat met Bantu Holomisa oor koalisie in Port Elizabeth

Die leier van die United Democratic Movement (UDM), Bantu Holomisa, het aangekondig dat hy deur “groot partye” genader is om ‘n koalisieregering in die Nelson Mandelabaai-metro saam te stel.

Holomisa het gisteraand gesê: “Ek hoor sekere van die groot partye praat met ons om te vra of ons hulle kan help. Afhangend van die finale telling, mag die UDM óf deur die ANC óf deur die DA genader word om hulle te help. Die DA-leier het my genader maar ek het aan hom gesê dat ons moet wag vir die uitslae om bekendgemaak te word.”

 

Volgens Holomisa gee hy nie om met watter party hy saamwerk nie maar dat “kiesergedrag” in ag geneem moet word.

“In die verlede het ons beide partye gehelp. Onthou toe Zille Kaapstad van die ANC oorgeneem het? Ons het die ANC in Kwazulu-Natal in 2004 bygestaan toe dit aan bewind gekom het. Die beginsel wat ons toepas, is om na die wense van van die kiesers te kyk, dan neem ons die besluit, nie of ons van ‘n sekere leier hou of nie, ek werk nie so nie,” sê Holomisa.

Terwyl die DA-leier in die metro, Athol Trollip (foto hier bo), reeds aangekondig het dat sy party die grootste is en daarom ‘n nuwe plaaslike regering behoort saam te stel, het die ANC by die OVK beswaar gemaak dat die verkiesing nie “vry en regverdig was nie”.

‘n Woordvoerder van die party, Bheza Ntshona, het gesê dat die party ‘n klag gelê het weens die ontdekking van stembriewe in ‘n tent aan die agterkant van die lokaal.

“Ons het ook ander onreëlmatighede waargeneem, in so ‘n mate dat ons nie die verkiesing as vry en regverdig beskou nie. Die uitslag van dié verkiesing, hoewel dit nog nie finaal is nie, weerspieël nie die wil van die mense van Nelson Mandelabaai nie,” meen hy.

 

Munisipale verkiesing 2016 ‘n referendum vir Zuma

Wit Suid-Afrikaners het Woensdag in munisipale verkiesings gestem in die hoop om die regerende ANC ’n gevoelige slag te kan toedien.

Die verkiesing word as ’n soort referendum oor Zuma gesien, wat verswak is deur korrupsie­skandale, hofsake en treurige ekonomiese data, insluitende ’n werkloosheidsyfer van 27 persent en nul persent groei in die bruto binne­landse produk.

Die media het ‘n vroeër ‘n venynige veldtog teen die president geloods.

Ten spyte van sommige menings­opnames dat die ANC die gevaar geloop om beheer oor sleutel­stede soos Pretoria, Johannesburg en Port Elizabeth te verloor, loop die party steeds voor.

Ontwikkeling in Suid-Afrika was sedert die eerste veelrassige verkiesings in 1994 onbenullig, met baie swart gemeenskappe wat steeds swak behuising, onvoldoende onderwys en ’n gebrek aan geleenthede ondervind, maar dit pla swart kiesers min.

Met die ekonomie wat tot stilstand gekom het en werkloosheid wat rekordhoogtes bereik het, hoop die belangrikste opposisieparty, die Demokratiese Alliansie (DA), en die radikale linkse Ekonomiese Vryheidsvegters (EFF) om steun te wen.

In Johannesburg se Soweto-woonbuurt het inwoners van vroegdag af in rye gestaan om te gaan stem.

“Ons is moeg vir hierdie selfdienende­ leierskap. Mense is moeg vir hulle en selfs oumas is siek en sat vir hierdie regering,” het Nathi Mulaudzi, ’n 40-jarige werklose vragmotorbestuurder aan AFP gesê.

Tog geniet pres. Jacob Zuma steeds wye steun, veral in landelike gebiede, en die ANC se sterk netwerk en diep beursies kan dit help om beheer oor die meerderheid van die 278 munisipaliteite­ te behou.

“Daar is baie negatiewe dinge wat oor die ANC gesê word, maar ek bly dink aan waardeur Mandela onder apartheid gegaan het, dus doen ek dit vir hom,” het Lebogang Maponyane, ’n 43-jarige werk­lose vrou van Soweto gesê, nadat sy vir die ANC gestem het.

Niks nuuts: ANC, EFF en DA is SA se gewildste partye

Die Ekonomiese Vryheidsvegters (EFF) het in Lethabong naby Rustenburg al vroeg die oorwinningsvieringe Woensdag afgeskop, skaars na die sluiting van die stembusse om 19:00.

‘n Konvooi van motors met die EFF-vlae versier het stadig deur die dorp gery, met partylede wat al singende hul vuiste in die lug gehou het ter viering van ‘n verwagte oorwinning.

Die EFF is vol vertroue dat hulle in Wyke 27 sowel as 28 van die Rustenburg Plaaslike Munisipaliteit, die ANC onttroon het.

Wyk 28 is deur die voormalige ANC-jeugliga se takvoorsitter, Pako Molatlhegi beman, wat as ‘n onafhanklike kandidaat in die 2011 plaaslike regeringsverkiesing gestaan het. Hy was die EFF kandidaat vir hierdie pos.

Die ANC se beheer van Gauteng se drie metrorade is verwater. Met 42 persent van die stemme wat landwyd getel is, toon syfers dat die DA in Tshwane, Johannesburg en Ekurhuleni voorloop. As Soweto se stemme bygetel word, kan die prentjie egter vinnig verander.

Die WNNR voorspel dat die ANC in al drie die metrorade sal wen. Die EFF is op die oomblik in die derde plek in al drie die metrorade.

Tientalle kiesbeamptes in Gauteng is ontevrede omdat amptenare by die provinsiale uitslaesentrum in Aucklandpark te lank neem om hulle te help wanneer hulle hul stempunte se uitslae wil inhandig.

Die beamptes beweer hulle het ure lank gewag om gehelp te word. Die beamptes het hul uitslae neergegooi en uitgestap.

Die Verkiesingskommissie het nog nie op die voorval gereageer nie. Dit is onbekend hoe dit die uitslae in Gauteng gaan raak.

Die ANC loop landwyd ver voor met 50%, teenoor die DA se 35% en die EFF wat 6% het. Die ANC het tot dusver meer as 2 miljoen van die stemme teenoor die DA se 1,5 miljoen.

Die DA het die Kouga-munisipaliteit in die Oos-Kaap gewen. Die party het 17 wyke ingepalm teenoor die ANC se 12.

Die EFF kon geen wyke in palm nie. Kouga smelt saam met ander munisipaliteite in die gebied om ‘n nuwe munisipaliteit te vorm.

Die ANC se steun het tot 40 persent gedaal in dié bruin gebied.

Die DA het Donderdagoggend verklaar dat hulle die Midvaal-munisipaliteit in Gauteng behou.

Volgens die jongste telling, met 58% van stemlokale getel, staan die DA tans op 50,49%.

Die ANC is op 39,57%, terwyl die EFF 5.98% van die stemme gekry het. Die Vryheidsfront Plus is ver agter met 3,48%.

DA-LP Makashule Gana het op Twitter aangekondig dat die party die munisipaliteit behou het.

Midvaal is die enigste DA-munisipaliteit in Gauteng.

Geregistreerde kiesers het gisteraand nog kort voordat stempunte om 19:00 gesluit het, hul kruisies getrek.

In die Vrystaat het sowat 44% van geregistreerde kiesers hulle kruisies gaan trek, ‘n afname in vergelyking met sowat 56% in die vorige munisipale verkiesing.

Die Verkiesingskommissie se provinsiale kiesbeampte, Jabulani Tshabalala sê die finale uitslae word ongeveer vyfuur vanmiddag verwag.

Gewapende polisie ontplooi na mesaanval in Londense park een eis

‘n Mesaanval in Londen het ‘n vrou se dood veroorsaak en vyf ander mense is beseer.

Die aanvaller wat amok gemaak het in sentraal-Londen se Russell Square kon ‘n terreurmotief gehad het, sê ondersoekbeamptes nadat ‘n verdagte in hegtenis geneem is op die toneel.

Beamptes het ‘n elektriese skokgeweer gebruik om die 19-jarige man in hegtenis te neem. Die polisie is ingeroep na die voorval in Russell Square naby die Britse Museum net ná 22:30 Woensdag.

Die verdagte is na die hospitaal geneem waar hy in polisie-aanhouding bly.

Mark Rowley, assistent-kommissaris die Metropolitaanse Polisie en mees senior teen-terrorisme beampte in Brittanje het die media toegspreek.

Hy het gesê “geestesgesondheid” was ‘n “beduidende” faktor in die voorval, maar het nie uitgebrei oor terrorisme nie.

Twee mans, wat na bewering van Midde-Oosterse afkoms is, is gesien dat hulle verdag optree buite die hotel na die voorval, volgens getuies.

Een getuie, ‘n 35-jarige, wat anoniem wou bly, het aan Express.co.uk gesê: “Ek het gesien hoe twee mans van Midde-Oosterse afkoms verdag optree buite die Imperial Hotel, op Southampton Row.

“Een man het op ‘n motorfiets aan die verkeerde kant van die pad opgejaag met die ander man wat in ‘n ander rigting laat spaander het.”

“Jy weet daar is iets verkeerd wanneer jy die polisie sien opdaag met gewere,” het ‘n ander ooggetuie gesê.

Maar Scotland Yard het gesê vir “gerusstelling en veiligheid” sal Londen Donderdagoggend ekstra beamptes ontplooi, insluitende gewapende polisie.

Die aanval in die gewilde toeriste-area kom te midde van waarskuwings oor die onafwendbaarheid van ‘n terroriste-aanval in die Verenigde Koninkryk na maande van jihadi-aanvalle in Europa en die Midde-Ooste.

Die slagoffer, wat vermoedelik in haar 60’s was, se naam is nog nie bekend nie. Twee vroue en drie mans is beseer.

Brandende vliegtuig moet noodlanding in Doebaai doen

‘n Vliegtuig van die Emirates-lugdiens moes ‘n noodlanding moes uitvoer op die Doebaai-lughawe.

Die 282 passasiers en 18 bemanningslede is ongedeerd.

Daar was glo ‘n Suid-Afrikaner aan boord van die vlug. ‘n Dik, swart rookwolk was sigbaar bo die gestrande vliegtuig op foto’s wat op sosiale media versprei is.

Volgens ‘n verklaring van die lugdiens was vlug EK521 op pad van Thiruvananthapuram in Indië na Doebaai, maar moes om 10:00 Woensdag ‘n noodlanding uitvoer nadat ‘n brand aan boord ontstaan het.

“Ons is nog nie seker wat die brand veroorsaak het nie,” lui die verklaring.

“Emirates kan bevestig dat alle passasiers en bemanningslede veilig is,” het die lugdiens getwiet, maar die voorval sal glo wye vertragings veroorsaak.

Die Doebaaise lughawe het getwiet dat alle vlugte deur die voorval geraak is en tot verdere kennisgewing vertraag sal wees.

Duitsland waarsku Turkye oor visum-afpersing

Duitsland het Turkye se dreigement om nie sy woord gestand te doen oor die omstrede ooreenkoms met die Europese Unie (EU) nie, verwerp.

Turkye het onderneem om die vloei van migrante na die EU te stop. Nou eis Turkye visumvrye toegang na die EU teen Oktober.

Gevra of Turkye die EU kon “afpers” oor die ­vlugteling-ooreenkoms, het Duitsland se minister van buitelandse sake, Frank-Walter­ Steinmeier,­ aan die koerant Rheinische­ Post gesê: “Dit is absurd.”

“Die feit is dat voorwaardes vir die visumvrye beleid geld, en dit is aan almal bekend,” het hy gesê.

“Turkye het onderneem om sy deel van die ooreenkoms na te kom. Dit is nog nie die geval nie en Turkye het nog werk om te doen.”

Die Turkse minister van buitelandse sake, Mevlut Cavusoglu, het in ’n onderhoud met die Duitse dagblad Frankfurter Allgemeine Zeitung gesê Ankara kan onttrek aan die ooreenkoms indien die EU Turke nie teen Oktober toelaat om sonder visums na die EU te reis nie.

Duitsland se visekanselier, Sigmar Gabriel, het teruggekap en gesê: “Nie Duitsland of Europa mag toelaat dat hulle af­gepers word” deur Turkye oor die migrante-ooreenkoms nie.

Turkye en die EU het die omstrede ooreenkoms in Maart onderteken waarin Ankara ooreen­gekom het om Siriese vlugtelinge wat op Griekse eilande aangekom het, terug te neem in ruil vir politieke­ en finansiële aan­sporingsmaatreëls.

Kanselier Angela Merkel het die leiding met die ooreenkoms met Ankara geneem nadat Duitsland verlede jaar ’n rekordaantal migrante en vlugtelinge, ongeveer 2 miljoen ingeneem het.

Benewens visumvrye reise, sluit die ooreenkoms miljarde euro’s in bystand en versnelde same­sprekings oor Turkye se aansoek om lidmaatskap van die EU in.

Betrekkinge is egter gespanne sedert pres. Recep Tayyip Erdogan se strawwe optrede teen ­vermeende same­sweerders ná verlede maand se mislukte staatsgreep.