Kategorie: Nuus

Minister verswyg koste van privaat-ambulansdiens

Gesondheidsminister Aaron Motsoaledi wil klaarblyklik nie die totale koste van die omstrede kontrak tussen die Vrystaatse gesondheidsdepartement en die private maatskappy, Buthelezi-ambulansdienste openbaar maak nie.

Hy het reageer op ‘n perlementêre vraag oor watter provinsies derdeparty-kontrakte vir die verskaffing van ambulansdienste gesluit het, die duur van die kontrakte en die koste daarvan.

Motsoaledi het aangedui dat net twee provinsies – Vrystaat en Noordwes – van private ambulansdienste gebruik maak, maar nagelaat om die totale koste van dié kontrakte bekend te maak.

Opposisiepartye in die Vrystaat het die provinsiale gesondheidsdepartement sterk gekritiseer vir dié kontrak wat volgens LUR Benny Malakoane sowat R6.5 miljoen per maand beloop.

Die gesondheidsdepartemente in die Vrystaat en Noordwes is juis die twee provinsies wat weens geldelike probleme onder administrasie geplaas is.

Motsoaledi sê ingevolge ‘n ooreenkoms vir die gebruik van private ambulansdienste in Noordwes – geskied die diens net wanneer dit nodig is.

Mandela-kleinseun terug in hof oor verkragting

Die kleinseun van die ontslape Nelson Mandela sal na verwagting Maandag in die die Johannesburgse landdroshof hof verskyn nadat hy beskuldig is van die verkragting van ‘n 15-jarige meisie.

Die 24-jarige pa van drie is voorheen op R7 000 borg vrygelaat in Augustus nadat hy ‘n week in die tronk deurgebring het.

In haar verklaring, het die slagoffer gesê dat die beskuldigde haar verkrag het, maar Mandla Mandela beweer in sy beëdigde verklaring die seks was konsensueel en dat hy geen idee gehad het dat sy minderjarig is nie.

Hy beweer dat die kroeg waar hulle ontmoet het, nie gaste onder die ouderdom van 21 toelaat nie.

Sy het glo gedrink en gerook, word beweer. ‘n Sjef van die kuierplek, wat die twee saam gesien het, het ook ‘n beëdigde verklaring ingedien.

Gustav Venter gister getroud

Die Afrikaanse romansier, draaiboekskrywer en joernalis, Gustav Venter, is gister op die plaas Braamhof in die Oos-Vrystaat met Erma Carsten getroud. Die bruilof is deur byna 300 mense bygewoon en die bruid het in ‘n veteraan- Volkswagen Kombi opgedaag.

Gustav se broer, dr. Philip Venter, het al die pad van Louis Trichardt af gekom om die huwelikseremonie waar te neem. Afgesien van enkele ernstiger oomblikke toe Philip oor die vier verskillende woorde vir “liefde” in die Bybel gepreek het, het die huweliksbevestiging hoofsaaklik in ligte luim geskied. Sowel Gustav as Erma was voorheen in hul lewens getroud en gaan nou op Lusthof, wat deel Braamhof is, nesskop in Gustav se bestaande ou huis wat van die tradisionele Oos-Vrystaatse sandsteen gebou is.

Intussen vertrek hulle egter op ‘n wittebroodsreis na ‘n onbekende bestemming. Afgesien van allerlei versnaperinge is heerlike pannekoek met drie verskillende vulsels bedien, wat reg aan dié eg Afrikaanse bruilof laat geskied het.

Gaste het van heinde en verre gekom, vanuit die onmiddellike omgewing van Clarens en Fouriesburg, maar ook vanaf Pretoria en die Rand. Gastehuise in die Clarens-omgewing het goed sake gedoen, met die meeste gaste wat gisteraand oorgeslaap het. Lede van Gustav se peloton uit sy weermagjare was insgelyks teenwoordig, wat tot ‘n groot geskerts oor die bruidegom se sondes tydens sy dienspligjare aanleiding gegee het. Onder andere het Gustav destyds as Ratelbestuurder aan Operasie Askari in Angola deelgeneem.

Gustav het reeds twee e-boeke by PRAAG uitgegee, wat albei binnekort ook in gedrukte formaat sal verskyn: Die amigdala van Alrina Smal en Bodem.

Erma is ‘n boorling van Pretoria wat aan Menloparkhoërskool gematrikuleer en agterna aan Tukkies gestudeer het. Gustav was op Hoërskool Stofberg op Brakpan en het ook aan Tukkies klas geloop, waar hy die bynaam “Prof” gekry het omdat hy soveel boeke gelees het.

Ons wens die splinternuwe egpaar geluk met die groot stap en hoop dat hulle dolgelukkig sal wees in die pragtige vallei omring deur berge net 13 kilometer van Clarens af. In dié verruklike omgewing en met sy pragtige nuwe Muse aan sy sy, verwag ons ook dat Gustav nog veel meer boeke en draaiboeke die lig gaan laat sien. Dat alle Afrikaanse lesers en fliekgangers daarna uitsien, is gewis!

Lees gerus ook Gustav Venter se rubrieke.

Russiese verkenningsvliegtuig draai ‘n seemyl van Amerikaanse vliegdekskip

Op 27 Oktober 2015, het ‘n Tupolef 142 herhaaldelik nadervlugte aan die vliegdekskip die USS Ronald Reagan uitgevoer. Dié vliegdekskip is deel van die Sewende Vloot en die Suid-Koreaanse vloot se maneuvers in die ooste van die skiereiland.

Sedert April 2014, het die Russiese vliegtuie sorties onderneem om sy eie kommunikasiestoringstelsel en die bevelstruktuur van NAVO te toets.

Verskeie van die Amerikaanse vliegdekskip se vliegtuie kon opstyg voordat die Russiese vliegtuie hul kommunikasie en die VSA se bevelketting onderbreek het.

Die Amerikaners was uiteindelik in staat om die indringer te verwilder, maar die Tupolef het binne 500 voet van die vliegdekskip gedraai voordat die Sewende Vloot kon reageer.

Dié oefening lê die feit bloot dat Rusland in staat is om ‘n vlagskipvaartuig van NAVO te vernietig.

Die Russiese kommunikasiestoringstelsel en NAVO se opdragstruktuur word tans daagliks getoets in Sirië in ‘n werklike oorlogsituasie.

Die Russe dek ‘n radius van 300 kilometer vanaf Latakia in Sirië wat nou buite bereik is van die Atlantiese Verdragslande.

Dieselfde stelsel is ook ontplooi binne ‘n deel van die Swart See en omstrede Kaliningrad.

Springbokke moet vinniger verswart sê minister

Die minister van sport en ontspanning, Fikile Mbalula het op ‘n nuuskonferensie gesê SARU sal later vandeesmaand vergader om die vertoning van die Springbokke tydens die Wêreldrugbytoernooi te bespreek.

Hy het gewaarsku dat as ‘n transformasieteiken van 50 persent vir die Springbokke nie bereik kan word nie, sy departement stappe teen SARU sal doen.

Mbalulu sê die Springbokke het nie sleg gevaar tydens die wêreldbeker nie, maar kan beter doen as hulle verder transformeer.

Die Springbokke het derde geëindig in die toernooi, na Australië en Nieu-Seeland.

Die adjunk-minister van sport, Gert Oosthuizen, sê SARU en rugbyfederasies is verantwoordelik vir transformasie in die sport.

Hy het by dieselfde mediakonferensie in Johannesburg gepraat.

Transformasie in die nasionale-rugbyspan word voorgehou as die rede vir die Bokke se middelmatige vertoning.

Net agt spelers van kleur is by die Springbok-wêreldbeker-groep ingesluit.

Die vakbond Cosatu sê hulle sal die druk teen ‘n gebrek aan transformasie in Suid-Afrikaanse rugby volhou.

Hulle dreig om wedstryde te ontwrig as daar nie aan die oproep om verswarting gehoor gegee word nie.

Tony Ehrenreich van Cosatu het aan eNCA gesê dat meer gedoen moet word, en vinnig.

Mbalula sê die 50 persent swart verteenwoordiging moet bereik word teen die volgende Wêreldbeker-toernooi in 2019.

Byna 300 sake van wangedrag in Vrystaat

‘n Totaal van 299 sake van wangedrag is tydens die vorige boekjaar in departemente en openbare entiteite in die Vrystaat aangemeld.

Dit is volgens die LUR vir finansies, Elzabe Rockman.

Sy het tydens die amptelike aankondiging van die internasionale anti-korrupsie- en bedrogbewusmakingsveldtog in Bloemfontein gesê dat 161 amptenare in dié sake skuldig bevind is.

Rockman sê 29 amptenare is afgedank, 63 het finale waarskuwings gekry en 25 is beboet vir verskeie oortredings. Rockman sê nie al die klagtes het te doen met finansiële bestuur of die toekenning van tenders nie.

Sy sê as gevolg van die feit dat die departemente van gesondheid en onderwys die grootste aantal werknemers het, het hulle die hoogste aantal sake aangemeld.

Deen wat met menslike dele betrap is se borgaansoek duur voort

Die borgtog-aansoek van die Deense burger, Peter Fredericksen, wat van onder meer seksuele aanranding aangekla word, gaan voort.

Die saak teen die 63-jarige wapenhandelaar van Bloemfontein het ‘n verrassende wending geneem, nadat dit aan die lig gekom dat Peter Fredericksen ook verbind word met die skietdood van sy swart vrou in Lesotho verlede maand.

Die klagstaat teen hom lees as volg: Twee aanklagte van aanranding met die doel om ernstig te beseer, een van aanranding, verskeie aanklagte van die vervaardiging van pornografie, die verspreiding van kinderpornografie, asook die besit daarvan.

Daar is ook twee aanklagte van sameswering, die verwydering van menslike weefsel en ‘n aanklag dat menslike weefsel by ‘n ongemagtigde plek verwyder is, sowel as bigamie.

Fredericksen is op 17 September in hegtenis geneem nadat vrouedele van sewe swart vroue in die vrieskas van sy Langenhovenparkhuis ontdek is. Hulle is almal vermoedelik van Lesotho.

Dit is nie bekend of die Deen die menslike dele vir moetie verkoop het nie.

Sy oorlede vrou, Anna Matseliso Molise, het hom dieselfde dag by die polisie aangegee.

Volgens die BBC word hy in Denemarke deur die polisiegesoek op aanklagte van onwettige wapenhandel.

SA verkies tot Interpol se Uitvoerende Komitee

Suid-Afrika is die eerste Afrika-land wat hierdie week verkies is tot uitvoerende komitee van Interpol, het die Valke Donderdag gesê.

Meer as 190 lande in die Algemene Vergadering van Interpol het gestem dat Suid-Afrika op die Uitvoerende Komitee verteenwoordig word.

Die vergadering is hierdie week van Maandag tot Donderdag in Kigali, Rwanda gehou.

Die Suid-Afrikaanse Minister van Polisie Nkosinathi Nhleko het gesê die aanstelling is ‘n eer. Hy het gesê die aanstelling is ‘n aanduiding dat die Suid-Afrikaanse Polisiediens (SAPD) “voortgaan om ‘n leidende rol in internasionale polisiëring te speel.”

Nhleko het gesê die aanstelling versterk Suid-Afrika se standpunt oor die stryd teen misdaad.

Hy het gesê Suid-Afrika is verbind daartoe om die nuwe aanstelling beskou as ondersteuning “om die belange van die vasteland in die globale stryd teen internasionale georganiseerde misdaad te bevorder.”

Die komitee het 13 lede en die Suid-Afrikaanse afvaardiging op die komitee sal onder leiding van brigadier Anbuen Naidoo, hoof van Interpol se Nasionale Sentrale Buro (NCB) in Pretoria staan.

Die NCB het onlangs deel geword van die Direktoraat vir Prioriteitsmisdaadondersoek (Valke) en sal met globale wetstoepassingsagentskappe skakel.

Nhleko het gesê: “Die Valke se leidende rol sal Suid-Afrika se voetspoor versterk in die bou van kriminele databasisse en saamwerk met ander internasionale agentskappe op polisiëring in oorgrensondersoeke, operasies en arrestasies.”

Gebou stort ineen in Pakistan

Reddingswerkers in Pakistan het gister 99 mense lewend onder die puin uitgehaal nadat ’n fabriek in die stad Lahore ineengestort het, het AFP berig.

Talle ander fabriekswerkers is vermoedelik steeds onder die puin vasgekeer, met ten minste 18 mense wat gesterf en wie se liggame al verwyder is.

Die gebou het Woensdagaand in duie gestort, waarna die reddingswerkers met die hulp van soldate versigting deur die staal moes sny en hyskrane moes gebruik om die rommel te verwyder sodat hulle by die beseerdes kon kom.

Een van die vasgekeerde werkers het aan SAAMA TV gesê hy lê steeds onder ’n swaar ysterstaaf vasgepen en is baie dors.

Dit is nog nie ­duidelik hoeveel mense in die gebou was toe dit ineengetuimel het nie, maar reddingswerkers meen dit kan tot soveel as 200 wees.

’n 22-jarige fabriekswerker, Mohammad Navid, het aan AFP gesê die gebou het met ’n harde slag ineengestort en hy het bewusteloos op die grond geval. Toe hy ’n rukkie later sy bewussyn herwin, het hy gehoor hoe mense om hulp roep en skree.

Volgens Navid het kinders van so jonk as 12 jaar in die fabriek gewerk.

Die eens vier verdieping poliëster-fabriek, Rajput Polyester, is in die Sundar-nywerheidsheidsgebied aan die buitewyke van Lahore geleë.

Die vermoede is dat die gebou strukturele skade opgedoen het in die aardbewing op 26 Oktober waarin nagenoeg 400 mense in Pakistan en Afganistan omgekom het.

VSA dreig SA met opskorting van AGOA

President Barack Obama het Suid-Afrika 60 dae gegee om te reageer om die AGOA-ooreenkoms te red.

Die African Growth and Opportunity Act (AGOA) is ‘n handelsooreenkoms wat die vrye invoer van Amerikaanse landbouprodukte in ruil vir uitvoervoordele behels.

Amerika sê Suid-Afrika het onder meer onnodige sanitêre vereistes vir Amerikaanse vark- en beesvleis ingestel, nadat pluimveeprodukte verlede Desember na ‘n uitbreking van voëlgriep verbied is.

Suid-Afrika sal die voordele ingevolge die wet op Afrika Groeigeleenthede prysgee, indien die hindernisse rakende Amerikaanse hoender- en vleisuitvoere nie uit die weg geruim word nie.

Die verlies aan voordele beloop na raming bykans R100 miljoen.

Suid-Afrika het ‘n spertyd van 15 Oktober misgeloop om op nuwe reëls vir invoere van Amerikaanse pluimvee- en vleis-produkte ooreen te kom.

“Ek neem hierdie stap omdat Suid-Afrika voortgaan om beperkings aan langdurige Amerikaanse handel te stel, insluitend hindernisse wat op sekere Amerikaanse landbou-uitvoere geld,” het hy gesê in ‘n brief aan die Kongres.

Vrye toegang tot Suid-Afrika vir Amerikaanse handel en belegging is een van die kriteria vir lidmaatskap van AGOA.

Die ooreenkoms is vroeër vanjaar hernu en bied belastingvrye toegang tot goedere van sub-Sahara Afrika-lande, wat wissel van ru-olie tot klere.

In 2014 het Suid-Afrika $176 miljoen se landbouprodukte na die Verenigde State uitgevoer onder AGOA.

Produkte wat geraak word sluit lemoene, wyn, makadamianeute en sitrussap in, volgens Amerikaanse data.