Kategorie: Nuus

UV begin dissiplinêre verhore oor amok by kampus

Die Universiteit van die Vrystaat (UV) sal na verwagting aantwoorde verskaf oor die dissiplinêre verhore wat glo Vrydag sal begin.

Die verhore hou verband met die voorval vroeër vanjaar waarin verskeie ontevrede kontrakwerkers, studente en ander belanghebbendes ‘n varsitybeker-rugbywedstryd op Shimlapark onderbreek en swart en wit studente handgemeen geraak het.

Dit is nie bekend of die instelling wit studente gaan vervolg nie.

Die UV se woordvoerder, Lacea Loader het gesê ‘n mediaverklaring sal Woensdag uitgereik word, maar wou nie verder kommentaar lewer nie.

Verskeie UV-studente het glo reeds briewe ontvang het dat hulle Vrydag voor ‘n dissiplinêre komitee by ‘n hotel in Bloemfontein moet verskyn.

Dit is nie bekend by watter hotel nie.

Die openbare orde-eenheid is klaarblyklik op ‘n gereedheidsgrondslag geplaas weens dreigemente van verdere geweld.

Bewsaardes dreig om opnuut oproerig te raak omdat die briewe op kort kennisgewing uitgedeel is.

Diegene wat briewe ontvang het, word van aanranding met die doel om ernstig te beseer, openbare geweld en die beskadiging van die universiteit se goeie beeld aangekla.

Na wat verneem word, het lede van die universiteit se sekuriteit en die polisie reeds vergader om veiligheid op die Bloemfontein-kampus verder op te skerp.

Swart jeug kry nie werk nie ten spyte van rassevoorkeure in hul guns

Ondanks drakoniese regstellende-aksiewetgewing in Suid-Afrika, kry blanke en Indiërjeugdiges steeds meer werk as hul swart en kleurling-eweknieë. Die blanke en Indiëropvoedingsvlakke het ook sedert 1994 toegeneem terwyl dié van swartes afgeneem het, met die implikasie dat die onderwysstelsel vir swartes onder sogenaamde “apartheid” beter was as die huidige mengelmoes van polities korrekte skole en linkse indokrinasie aan die universiteite.

Dié feite is deur die Suid-Afrikaanse regering self bekendgemaak, nie deur ‘n buite-agentskap nie. Die land se swart statistikus-generaal dr. Pali Lehohla, het Maandag aangekondig:

“Meer kleurling- en swart jeugdiges in Suid-Afrika is werkloos, by misdaad betrokke en ongeskool as ander rassegroepe.

“Vir Indiërs en blankes, is die toekoms helder. Vir die kleurling- en swart jeug, is dit nie. Dit neem twee keer soveel moeite vir ‘n swart of kleurlingkind wat aan dieselfde universiteit kwalifiseer om werk te kry,” het Lehohla gesê.

Maatskappye en werkgewers neem regstellende aksie in ag was dit by aanstellings kom, wel wetende dat die punte wat kleurlinge en swartes op universiteit ontvang, kunsmatig deur liberale en linkse professore opgestoot word.

Lehohla het ook die feit beklemtoon dat vele swartes op universiteit uitval, ten spyte van rekordgetalle wat toelating verkry.

“Die aantal swart en kleurlingjeugdiges wat universiteit toe gaan, het toegeneem, op dramatiese wyse. Die probleem is dat hulle nie klaarmaak nie, anders as die blanke studente. Hulle word deur ‘n aantal uitdagings in die gesig gestaar.”

Blanke, Indiër- en Asiese jongmense is ook meer geneig om hoërskool te voltooi as swart en kleurlingleerlinge. Dieselfde geld vir universiteit, waar slegs 10% van swartes in sommige studierigtings ooit hul graadkursusse voltooi.

Volgens Lehohla bestaan 66% van Suid-Afrika se werkloses uit jongmense, waarvan die meeste swartes of kleurlinge is.

Aangesien opvoeding met indiensneming korreleer, vind die blanke en Indiërjeug dit makliker om werk te kry, ondanks die negatiewe wetgewing wat blankes vir “hul ouers en grootouers se rassisme” straf. Maar, Indiërs doen in sommige gebiede selfs beter as blankes omdat hulle oor soortgelyke opvoedingsvlakke beskik, dog steeds vir regstellende aksie kwalifiseer. Sekere banke in Johannesburg neem na bewering slegs Indiërs in diens en byna geen blanke jeugdiges nie. Maar buite die grootmaatskappy-omgewing, lyk dit asof blanke jongmense by klein en mediumgroottemaatskappye in aanvraag is.

Lehohla het gesê dat tweederdes van Suid-Afrika se werkloses in 2014 uit jongmense bestaan het. In die ouderdomsgroep 25 tot 34, het slegs een uit elke drie oor ‘n betrekking in 2014 beskik.

Vele blanke Suid-Afrikaners emigreer omdat hulle glo dat hul kinders nie werk sal kry nie as gevolg van die ANC-SAKP-bewind se rassistiese antiwit beleid as dit kom by die regulering van die arbeidsmark. Dog in die regte wêreld kom dit voor asof vaardighede steeds oor regstellende aksie en rassesosiogeniëring triomfeer.

 

 

Wilgehof-onnie deur EFF gejag

Die Trompsburg Primêre skool se beheerliggaam en ouers volstaan daarby dat ‘n onderwyser wat by die Laerskool Wilgehof in Bloemfontein afgedank is nadat hy ‘n ou Suid-Afrikaanse landsvlag en foto’s van die EFF-leier, Julius Malema, langs bobbejane in sy klaskamer vertoon het, as leerkrag op Trompsburg aanbly.

Die Federasie van Beheerliggame van Suid-Afrikaanse Skole (Fedsas) se Jaco Deacon sê die besluit is Maandag op ‘n vergadering met ouers en lede van die skool se beheerliggaam geneem.

Dit kom nadat die EFF Vrydag buite dié skool met plakkate betoog het om hul ontevredenheid te wys rakende Lenard Mac Kay, wat verlede week in ‘n beheerliggaampos by dié skool aangestel is.

‘n Griefskrif is aan dié skool se beheerliggaam-voorsitter, Willem Grobbelaar, oorhandig. Daarin eis die EFF dat Mac Kay in die pad gesteek word omdat hy onbevoeg is om met leerders te werk. Deacon sê Mac Kay het ook Maandagaand ‘n geleentheid gekry om op die vergadering te praat.

Die skool se beheerliggaam het besluit om Mac Kay in hul diens te hou en dat hy in die skool se “waarderaamwerk as opvoeder” inpas. Daar is dus nie aan die EFF se versoek voldoen dat Mac Kay onmiddellik uit sy pos ontslaan moet word nie, sê Deacon. Mac Kay gaan skoolhou soos wat ouers op die vergadering, asook die beheerliggaam besluit het.

Die EFF se Kgotso Morapela het Vrydag aan OFM-nuus gesê as die skool se beheerliggaam nie van Mac Kay ontslae raak nie, gaan die EFF dit nie daar laat nie en lede sal oorgaan tot ernstige aksie en Mac Kay self uit sy klaskamer verwyder.

Mac Kay is in 2014 deur die provinsiale onderwysdepartement as leerkrag by die Laerskool Wilgehof in Bloemfontein afgedank. Daar is bevind dat sy optrede onbehoorlik, skadelik en/of onaanvaarbaar was.

Die Suid-Afrikaanse Onderwyserunie (SAOU) het destyds ‘n skikking met die Suid-Afrikaanse Raad van Opvoeders (Sace) bereik, wat hom ook skuldig bevind het. SAOU tree namens Mac Kay op.

Die skikking met Sace het behels dat die skrapping van Mac Kay se naam van die onderwysersrol opgeskort gaan word vir ‘n tydperk van tien jaar.

Dít op voorwaarde dat hy hom nie weer skuldig maak aan dieselfde tipe wangedrag nie. SAOU het verlede jaar ‘n klag van onbillike ontslag by die Raad vir Arbeidsverhoudinge in die Onderwys (Ravo) ingedien. Dié arbitrasieproses is steeds aan die gang.

Mac Kay is onlangs in ‘n beheerliggaampos by die Trompsburg Primêre skool aangestel. Deacon sê die Skolewet bepaal dat beheerliggame bykomende onderwysers by skole kan aanstel as die leerkrag oor die nodige kwalifikasies beskik en aan ‘n betrokke skool se behoeftes voldoen. Hy mag dus ‘n beheerliggaampos beklee.

Milde reën oppad

Groot dele van die Noord-Kaap, Vrystaat en Noordwes kan vanaand en môre na reën uitsien.

Tonie Rossouw van die Bloemfonteinse weerkantoor het aan OFM gesê daar is vandag ‘n 30%-kans op buie en donderbuie in die sentrale deel van die binneland.

Dit weens ‘n frontale stelsel wat suid van die land inbeweeg. Daarmeesaam is daar ‘n goed ontwikkelde bolaagtrog voor dié frontale stelsel wat die styging van lug veroorsaak.

‘n Wolkband beweeg van die westelike deel na die ooste. Hy sê daar is vanaand ‘n 60%-kans op reën in die Vrystaat en die Noord-Kaap wanneer die stelsel deurbeweeg.

Hy voorspel ook ‘n 60%-kans op reën môre in die sentrale en suidelike deel van die Vrystaat, die verre suid-oostelike deel van Noordwes en die oostelike deel van die Noord-Kaap.

Gunstige reëntoestande verbeter teen vanmiddag. Daar is ‘n goeie kans op buie en donderbuie teen vanaand en môre heeldag in die sentrale binneland.

Dit sal aanvanklik begin in die westelike deel en deurbeweeg oor die sentrale deel van die Vrystaat, asook die Suid-Vrystaat, na die noord-oostelike deel van die provinsie. Rossouw sê reëntoestande sal teen Vrydag opklaar. Hy voorspel ook geen reën vir volgende week nie.

Rossouw sê teen Saterdag kan mense in die sentrale binneland sonnige maar koel toestande verwag. Warmer temperature kom eers teen Sondag voor.

Valke maak nie hond haaraf teen stropers nie

Die Valke in die Noord-Kaap se ondersoek na twee afsonderlike voorvalle waarin twee renosters onlangs op ‘n plaas naby Kimberley doodgeskiet is, het nog niks opgelewer nie.

‘n Witrenosterkoei se ontbinde karkas is gekry. Die koeikarkas wat op 7 April op ‘n wildsplaas gevind is, het nog albei horings gehad.

Die Valke se provinsiale woordvoerder, Philani Nkwalase, sê nóg ‘n karkas is op 9 April op dieselfde plaas gevind.

Dié van die witrenosterkoei is vermoedelik geskiet ‘n paar dae voordat haar karkas gevind is en die gewonde dier het glo weggehardloop daar waar sy gevind is, gevrek.

Die ligging van waar die karkasse gevind is, gaan nie bekendgemaak word nie om verdere voorvalle te voorkom. Dié dier se horings is ook nie verwyder nie.

Nog niemand is in hegtenis geneem nie. Die polisieondersoek duur voort. Nkwalase kon nie bevestig of ‘n renosterkoei of –bul in die tweede voorval doodgeskiet is nie.

Dié dier se karkas het ook al begin ontbind, sê hy. Dit is ook steeds onduidelik of dieselfde booswigte betrokke is by albei voorvalle.

Intussen sê ‘n polisiewoordvoerder in Bloemfontein, Wendy Nkabi, die polisie soek steeds na stropers ná ‘n voorval waarin ‘n witrenosterkoei en haar kalf vermoedelik in Maart doodgeskiet en van hul horings op die Bloemfonteinse dieretuinplaas buite die stad gestroop is.

Die koei en haar kalf se karkasse is op 31 Maart deur ‘n veldwagter in ‘n kamp op dié plaas gevind.

Die polisie se forensiese eenheid en ander betrokkenes werk nou saam met streng veiligheidsmaatreëls wat in plek is op die plaas, wat goed omhein is.

Dit gaan nog verder opgeskerp word.

Nkwalase doen opnuut ‘n beroep op plaaseienaars en werknemers in die Noord-Kaap om meer paraat te wees teen renosterstropers.

Volgens hom moet gemeenskappe enige verdagte mense of voertuie wat by plase in die provinsie opgemerk word, by die polisie aanmeld.

Intussen word ‘n stryd ook om van die Valke se hoof, Berning Ntlemeza ontslae te raak.

Die voorsitter van die drukgroep Freedom Under Law, oudregter Johann Kriegler sê die hoofaansoek om te bepaal of Ntlemeza se aanstelling as hoof van die Valke wettig was, gaan voort.

Swart seun in swembad: oordeienaar moet homself heropvoed, sê MRK

‘n Vakansieoordeienaar van Nylstroom wat voorheen daarvan beskuldig is dat hy ‘n “swart tiener” gevra het om uit die oord se swembad te klim, het onderneem om ‘n program van die Suid-Afrikaanse Menseregtekommissie te volg om hom selfs van onbewuste neigings tot rassisme te genees. Johan Gresse van die Klipspringer-vakansieoord het ontken dat hy op 31 Desember verlede jaar rassisties opgetree het deur die aangenome swart seun van twee van sy gaste te vra om uit die swembad te klim. Blykbaar het van die ander blanke gaste oor die swart tiener se teenwoordigheid in die swembad gekla en Gresse het gedink dat hy ‘n indringer was wat nie by die gastehuis tuisgaan nie.

Die geval het opspraak verwek en selfs die minister van toerisme het Gresse se optrede verwerp en dit as uiterste rassisme beskryf. ‘n Hele aantal liberale media in Johannesburg het met woede op die voorval gereageer en geëis dat die oord permanent gesluit word en dat Gresse vervolg word.

Gresse het nou ‘n verklaring onderteken waarin hy “om verskoning vra” en erken dat sy “optrede van waningeligtheid gespreek het” as deel van ‘n “versoeningsooreenkoms” met die Suid-Afrikaanse Menseregtekommissie.

Die verklaring lui soos volg:

“Ek aanvaar dat my optrede van waningeligtheid spreek en dat ek die waardigheid van die kind mag geskend het.

“Ek sal daaraan werk om die kind se vertroue weer te wen en aanvaar die aanbevelings van die Kommissie hierin en onderneem om van vandag af vorentoe enige klagtes vinnig en gepas op te los sodat enige soortgelyke voorval in die toekoms vermy kan word.”

Die swart tiener se aangenome moeder het hom alleen gelaat om haar man op die dorp te gaan haal. In die wyle is hy versoek om die swembad te verlaat.

Die mede-eienares van die oord, Elsabe Gresse, het gesê dat die ouers haar nie in kennis gestel het dat die twee seuns saam met hulle is nie. Gresse het om veiligheidsredes die tiener gevra om uit die swembad te klim aangesien kinders nie sonder hul ouers se toesig mag swem nie.

Die SA Menseregtekommissie het ook aanbeveel dat die Gresse-egpaar byeenkomste by hul oord hou om “samehorigheid tussen verskillende rasse en kulture te skep”.

Hulle sal gereeld aan die SAMRK moet terugrapporteer oor die vordering in hul heropvoedingsprogramme.

Volgens ‘n artikel in die Amerikaanse Psychology Today bestaan daar egter wel ‘n gevaar van verdrinking as ‘n mens swart kinders sonder toesig laat swem, aangesien die meeste nie kan swem nie. Volgens ‘n swart dokter, Melody T. McCloud, is dit aan sosiale redes toe te skryf: eerstens word die meeste swart kinders deur hul ma’s grootgemaak omdat die pa gewoonlik reeds vort is en tweedens hou die ma nie daarvan om in die swembad te klim nie aangesien haar hare nat gaan word. Swart vroue bestee reusebedrae aan pruike of om hul hare te laat reguit maak en dus wil hulle nie swem nie.

Dr. McCloud skryf op Psychology Today:

Nog ‘n sleutelrede waarom vele swartes nie (kan) swem nie (ja, ek gaan dit sê), is dat swart vroue nie moeite met hul hare wil hê nie, ná alles. Met vroue van alle rasse wat meesal die primêre opvoeder en bepaler van hul kind se aktiwiteite is, word vele swart kinders nie aan ‘n swembad of die see blootgestel nie hoofsaaklik omdat die moeder nie swem nie (want sy wil nie haar hare laat nat word, of “haar hare bederf” nie). Dit bewys ‘n onguns aan die kinders.

Maar ek sê, dames, herstel daarvan — dis net hare. Om u en u kinders se onthalwe, klim in die water! Dompel jou onder! Duik in! Maar ja, leer eers om te swem; dit mag eendag handig te pas kom.

Kaapstad bestry rassisme, nie geweld nie

Kaapstad bestry liewer rassisme, nie geweld en die vernietiging van infrastruktuur nie.

Wes-Kaapse Verkeersowerhede sê die N7 by Du Noon naby Milnerton is weer oopgestel na nog ‘n nag van gewelddadige protesoptrede.

Protesgangers het voertuie met klippe bestook en buitebande aan die brand gesteek.

Hulle sê daar word nie gehoor gegee aan hul eise om behuising en dienslewering nie.

Maandag is winkels wat aan buitelandse burgers behoort gestroop en ‘n MyCiti-bushalte ernstig beskadig.

Intussen sê die Kaapstadse metro sê hulle ondersoek nou meer as 30 voorvalle van rassisme in die stad en nie dienslewering nie.

Die plaaslike owerheid en die Kaapse Skiereiland universiteit van tegnologie het ‘n onderneming onderteken om rassisme te bestry.

Die burgemeester van Kaapstad, Patricia de Lille het ‘n beroep op die publiek gedoen om voorvalle van rassisme aan te meld.

Metrorail moes pendelaars waarsku dat vertragings van tot twee ure kan voorkom na vandalisme aan die seintoerusting by die Kaapse stasie.

Die pendeldiens ervaar die afgelope paar weke verskeie probleme weens ‘n onbeskermde staking.

Treinwaens is onder meer aan die brand gesteek. Nog veiligheidsmaatreëls is in plek en pendelaars is gevra om van alternatiewe vervoer gebruik te maak.

Die departement van Water en Sanitasie het ook sy kommer uitgespreek oor die toenemende beskadiging van waterinfrastruktuur weens kabeldiefstal by pompstasies.

Die departement sê kabeldiefstal kniehalter die verskaffing van skoon water aan gemeenskappe.

Water ter waarde van tot sewe miljard rand gaan jaarliks verlore weens die beskadiging van infrastuktuur.

Was dit SAPD wat Bothaville-plaasaanval geloods het?

‘n Tweede verdagte, wat deel was van ‘n groep van vier swartes wat hulle as polisiebeamptes voorgedoen het tydens ‘n gewapende roof op ‘n plaas by Bothaville in die Vrystaat meer as ‘n week gelede, is Maandag in Klerksdorp in Noordwes in hegtenis geneem.

‘n Polisiewoordvoerder, Stephen Thakeng het nog nie bevestig of polisiebeamptes by die aanval op die drie vroue en twee kinders op die Bothaville-plaas betrokke was nie. Hy sê die ondersoek is steeds té sensitief.

Thakeng sê die 36-jarige man was in besit van ‘n wit Nissan-bakkie wat gebruik is toe vier mans met polisiepette en -hemde toegang tot ‘n plaashuis verkry het.

Hulle het aan die plaaseienaar gesê hulle wil haar huis vir dwelms deursoek. ‘n Verdagte, Paballo Molaudi, is kort ná dié voorval by Orkney in hegtenis geneem. Hy sal na verwagting Donderdag aansoek om borgtog doen.

Thakeng sê die verdagte wat Maandag aangekeer is, sal môre in die hof verskyn. ‘n Vyfde verdagte, vermoedelik ‘n plaaswerker op dié plaas, is intussen vrygelaat nadat hy deur die polisie vir ondervraging aangehou is.

Intussen doen die polisie ‘n beroep op gemeenskappe om inligting te verskaf oor ‘n afsonderlike voorval in Maart in Welkom waarin twee mans, wat hulle ook as polisiebeamptes voorgedoen het, twee mynwerkers van R9000 beroof het. Thakeng sê die mynwerkers was onderweg na hul werk, toe ‘n wit Polo hul motor agtervolg het.

Die booswigte het tot langs die werkers se motor gery en aangedui dat hulle van die pad moet aftrek. Die mans het polisiewapens getoon.

Hulle het aan die werkers gesê die “polisie” het inligting ontvang dat dié twee betrokke was by ‘n diefstalvoorval by ‘n myn. Hulle het die slagoffers se motor deursoek en R9000 in die mans se besit gevind.

Thakeng sê die sogenaamde polisiebeamptes het die mynwerkers beveel om hulle te volg na die naaste polisiekantoor, waarna die booswigte weggejaag het. Die werkers het toe besef hulle is beroof.

Thakeng vra enigiemand met inligting in verband met albei voorvalle om hul naaste polisiekantoor te bel.

Intussen is die twee mans wat gesoek word in verband met die Welkom-rooftog se identiteitsprofiele bekend gestel. Een van die verdagtes is bykans 1,8 meter lank en is vermoedelik tussen die ouderdom van 35 en 40.

Hy was in die besit van ‘n swart handgeweer. Die tweede verdagte is ook bykans 1,8 meter lank, hy het ‘n donker velkleur en is tussen die ouderdom van 40 en 45.

Albei mans het Sesotho gepraat.

Japan lamgelê deur twee aardbewings

Die twee aardbewings wat dele van die suide van Japan lamgelê het, se invloed word veel verder as die middelpunt van die rampgebied gevoel.

Alhoewel dit nie so erg was soos die verwoesting van die 2011-aardbewering en die tsunami nie, word vervaardiging direk geraak.

Motorvervaardigers veral, het sedertdien lesse oor ontwrigtings in die verskaffingsketting geleer.

Toyota Motor Corp, die motorvervaardiger wat die swaarste getref is, het produksie by sy fabriek in Kyushu gestaak, waar die aardbewings laat Donderdag en vroeg Saterdag plaasgevind het.

Tot dusver is 42 mense dood en byna 1 100 beseer. Honda Motor Corp het produksie by sy motorfietsfabriek in Kumamoto, die grootste stad wat deur die aardbewing geraak is, gestaak.

Díe fabriek is ernstig in die aardbewing beskadig en vanweë naskokke was dit onveilig om die gebou binne te gaan en die omvang van die skade te inspekteer.

Piet Croucamp dreig PRAAG oor sy ‘God en Jesus is breindood’-video

Die marxistiese, anti-Afrikaanse lektor aan die Universiteit van Johannesburg, dr. Piet Croucamp, is tans besig om PRAAG te dreig weens ‘n opname van sy “God en Jesus is breindood”-toespraak wat op PRAAG se YouTube-kanaal geluister kan word. Die opname, in Engels, bevat growwe godlasterlike uitsprake teen Christene, Moslems en Jode, asook gelowiges in die algemeen.

‘n Engelse skrywe waarin PRAAG met “onmiddellike regstappe” gedreig word, is aan die aksiegroep gerig. Omdat PRAAG hom vir taalgelykheid en gelykberegtiging vir Afrikaans beywer, is die afsender van die epos in kennis gestel dat die organisasie geensins op Engelse regskrywes reageer nie.

SONDER BENADELING VAN REGTE

Ons lei af uit onderstaande skrywe dat u na ‘n YouTube-video verwys en regsoptrede daaroor beplan.

Let daarop dat PRAAG, die Pro-Afrikaanse Aksiegroep, geen regskrywes in die Engelse taal beantwoord nie, en op sy grondwetlike en internasionale reg aandring om sodanige skrywes in Afrikaans te ontvang.

U word dus vriendelik versoek om die versending van enige Engelstalige skrywes na dié adres te staak aangesien ons nie daarop sal reageer nie.

Die uwe,

Dr. Dan Roodt
Direkteur, PRAAG

In verdere kommentaar het dr. Dan Roodt van PRAAG gesê:

“Dr. Piet Croucamp, wat blykbaar ‘n proefskrif oor minibustaxi’s geskryf het, gedra hom meermale in die openbaar soos ‘n minibustaxibestuurder en beskik insgelyks oor die intellek van so ‘n bestuurder. Hy is iemand wat ander, veral vroue soos dr. Louise Mabille, intimideer, afdreig en op kleinlike wyse vervolg. Nie net beskou hy dit as sy reg om Moslems, Jode en Christene op ‘n growwe wyse te beledig nie, maar hy is ook sterk anti-Afrikaans en ‘n opperste Boerehater.

“In die onlangse verlede het hy dit goedgedink om Breyten Breytenbach, wat moontlik oor die afgelope 50 jaar die mees gepubliseerde digter in Afrikaans is, te beledig en uit te skel bloot omdat hy ‘n standpunt ten gunste van die behoud van Afrikaans aan die Universiteit van Stellenbosch ingeneem het. In reaksie daarop het prof. Helize van Vuuren van Port Elizabeth aan Croucamp geskryf:

“…u lyk asof u haat wil kweek, nog intenser haat teen u eie moedertaal, met u ‘bloed aan die mure’-opmerking. Duidelik het u geen besondere band met u moedertaal nie. En voel vere vir sy letterkunde.”

“Croucamp het voorheen ook beweer dat Afrikaners oor ‘n laer gemiddelde intelligensievlak as dié van ander etniese groepe beskik.

“Ons sou ons mandaat van die Afrikaanse publiek en alles waarin ons glo verraai indien ons ons deur ‘n sogenaamde ‘akademiese’ rampokker soos Piet Kopdoek laat afdreig en intimideer om ‘n bona fide-opname van wat hy as ‘n teologiese referaat beskou, van die internet te verwyder. In geen opsig het die Universiteit van Johannesburg hom nog ooit van Croucamp se standpunte en platvloerse taal wat hy gereeld in die openbaar besig, gedistansieer nie. Die enigste logiese afleiding is dat die universiteit hom inderdaad met Croucamp se menings en terme vereenselwig.

“As patriotiese Afrikaner en liefhebber van Afrikaans, vind ek dit hartverskeurend dat die voormalige Randse Afrikaanse Universiteit (RAU) tot so ‘n lae vlak kan daal as om hom met Croucamp se anti-Afrikaanse, godslasterlike, kwetsende en onnosele uitsprake te vereenselwig.”