Inbrake neem kommerwekkend toe in Louis Trichardt

inbrakeDie toename in inbrake en diefstalle by wonings in Louis Trichardt – ook bekend as Makhado – die afgelope twee maande is ‘n bron tot ernstige kommer. Die polisie weier volstrek, na ‘n amptelike besluit, om misdaadsyfers bekend te maak.

Die plaaslike koerant, die Zoutpansberger het ‘n inisiatief geloods om op hoogte te bly van misdaadtendense sodat inwoners vroegtydig van probleme en probleemareas gewaarsku kan word.

Inwoners wat die slagoffers van ‘n misdaad was, kan deurlopend ‘n kort opsomming van gebeure na die koerant se kantore e-pos na news@zoutnet.co.za. Hulle verlang ‘n kontaknommer, asook dag, datum, tyd en plek. Indien ‘n saaknommer beskikbaar is, kan dit bygevoeg word.

“Dit wil voorkom asof veral die sentrale gebiede van die Nuwe Uitbreiding geteiken word,” het die voorsitter van die Soutpansberg Dorpswag, mnr. Dirk Meissenheimer, Woensdagoggend gesê. Hy het toe pas teruggekeer van die toneel waar twee duplekswoonstelle in Proteastraat net die vorige aand besteel is, terwyl die inwoners tuis was.

Die Zoutpansberger het die afgelope week besluit om self bietjie te probeer bepaal wat die omvang van die probleem is. Die besluit volg vanweë die polisie se volgehoue weiering om misdaadstatistieke ten opsigte van navrae oor huisbrake aan die koerant en publiek bekend te maak.

Kommerwekkend is dat huisbrake by wonings terwyl die inwoners by die huis is, al hoe meer algemeen voorkom. Dit was die geval by die woonstelle in Proteastraat. Terwyl die inwoners rustig gelê en slaap het op die boonste verdieping, het die booswigte die onderste vloer geplunder.

Mnr. Fanie van Zyl en sy gesin van Kameelstraat het dieselfde oorgekom. Hy het Vrydagoggend (17de) opgestaan en klaargemaak om werk toe te gaan. “Ek het aanvanklik niks agtergekom nie. Ek het klaargemaak en uitgestap na my bakkie toe … dit was toe dat ek modderspore in my huis sien. Ek het geweet dit is nie een van ons se spore nie,” het Fanie Woensdag gesê. Hy het die spore gevolg na die venster in hul eetkamer, die gordyne oopgetrek en met ‘n skok gesien die een venster is oop en die diefwering is geknip en opgebuig.

“Half verdwaas het ek rondgekyk maar kon niks verkeerd sien nie … Eers later het ons besef my seun se Playstation en my skootrekenaar is weg … Dit is duidelik dat hulle net gevat het wat hulle spesifiek wil hê en aan niks anders geraak of geskuif het nie,” het Fanie gesê. Hy voeg by dat hy die Maandag na die inbraak by sy versekeraars aangekom het waar hy ‘n oom ontmoet het wat in Leeustraat bly. Dié se huis is, terwyl hy in Musina was, daardie selfde aand as die inbraak by hom, deur diewe feitlik leeggesteel.

Op 7 Januarie het ook mnr. Heine de Jager en sy familie by hul woning in Acaciastraat ‘n wrede ontnugtering gehad. Terwyl hulle gelê en slaap het, het booswigte ook by hulle die sitkamervenster oopgemaak, die diefwering geknip en die gesin beroof van twee rekenaartablette, ‘n skootrekenaar, kamera en vyf selfone. Vir Heine se vrou Leonie was die inbraak veral traumaties weens die besef dat die inbrekers die aand langs haar bed gestaan het waar hulle haar selfoon van die bedkassie af gesteel het. Heine vermoed die inbrekers het iets in hul slaapkamer gespuit om te verhoed dat hulle wakker word. “Daar was ‘n groot geel kol op die buitekant van die slaapkamer gordyn en ek is daarvan oortuig dit is iets wat hulle in ons slaapkamer gespuit het,” het Heine gesê. Die geskatte waarde van die gesteelde goedere is sowat R60 000.

Alhoewel die voorval nie in die Nuwe Uitbreiding plaasgevind het nie, het ‘n middernagtelike besoeker ook vir die 74-jarige mnr. Gert van Zyl van Jeppestraat laat skrik. Omstreek 02:15 op Sondag, 22 Desember verlede jaar, is sy rus versteur deur ‘n harde slag. “Ek het wakker geword van ‘n geraas, maar was nie seker of ek dit net gedroom het nie. My hele lewe het ek egter hierdie ‘sesde sintuig’, en dié het my aangeraai om net bietjie wakker te lê en nie dadelik weer te gaan slaap nie. ‘n Rukkie later vra my vrou: ‘Wie stap in die gang?’ Die volgende oomblik gaan die ganglig aan,” het Gert vertel.

Hy het sag en versigtig hul kamerdeur oopgesluit en toe die deur oopgeruk. Groot was sy skok toe daar op daardie presiese oomblik ‘n groot-geboude man voor hom in die gang staan. Die man het Gert uit die pad gestamp en na die aangrensende kamer gehardloop. “Ek kon dit nie glo nie. Hy het in een beweging op die bed gespring en is by die stukkend-geslaande kamervenster weer uit!” Gelukkig het Gert hom betyds betrap, voordat hy iets kon steel.

Die volgende dag sou Gert by die speurders hoor dat die booswig(te) dieselfde aand ook by sy bure, die Davhana-egpaar, ingebreek het terwyl hulle tuis was. Ook hulle kon daarin slaag om die man te verwilder.

“Ek dink hierdie is die werk van ‘n sindikaat wat tans kyk hoeveel hulle in die dorp kan skep. In meeste gevalle is die modus operandi dieselfde: Hulle breek in terwyl die huismense slaap deur ‘n venster oop te maak en die diefwering te knip. My raad is dat mense maar liewers al hul vensters in die aand moet toemaak, moet seker maak hul deure is gesluit, en nie items soos sakrekenaars en telefone laat rondlê nie. As jou hond blaf, gaan kyk maar hoekom blaf hy, maar wees net versigtig. Moet ook nie items soos tuingereedskap, klerasie en fietse buite los in die aand nie,” was Dirk se raad aan inwoners namens die dorpswag.

Daar is ook heelwat ander gevalle van huisbraak en diefstalle die afgelope twee maande aan die Zoutpansberger gerapporteer, maar daar kan nog baie meer gevalle wees. Dieselfde week waar daar by die De Jagers ingebreek is, is daar ook goedere gesteel buite mnr. Dirk du Preez se woning. Op 4 Desember is daar by De Jager se buurman oorkant die straat, mnr. Carel Breytenbach, ‘n kragopwekker gesteel. “Dit is vir my vreemd want die kragopwekker was agter die huis vasgemaak. Hulle moes inligting gehad het,” het Carel gesê.

Op 23 Desember het mnr. Tinus van der Linden van Forestryweg teruggekeer na sy huis, wat ondertussen deur inbrekers geplunder is. Hulle het die voorafgaande naweek op Waterpoort gekuier. Elektriese ware, klerasie en juwele is onder meer gesteel, ten bedrae van net meer as R50 000. Op 11 Januarie rapporteer mnr. Jacobus Smith van Acacia Woonstelle (Elandstraat) dat die battery uit sy Hyundai bakkie gesteel is.

Ook in Waterbessiestraat lyk sake nie beter nie. ‘n Inwoner het aan die koerant gesê die misdaad is geweldig erg en mens voel glad nie meer veilig in jou eie huis nie. – Zoutnet

Jo-Anne Held (Strauss) benoem as direkteur van Media 24

Jo-Ann Held (Strauss), 'n voormalige mej. Suid-Afrika
Jo-Ann Held (Strauss), ‘n voormalige mej. Suid-Afrika

Media24 het pas aangekondig dat Jo-Ann Held as ’n direkteur van dié maatskappy aangestel is.

Volgens ‘n verklaring deur die maatskappy, is “Jo-Ann… ’n media-entrepreneur wat onder meer haar eie spitstyd-TV-program aanbied en vervaardig het. Sy het ook verskeie korporatiewe ondernemings en is ’n direkteur van Partnership Investments, ’n maatskappy met belange in media, mynbou en eiendom. Sy dien ook in die Wes-Kaapse Raad van Ubuntu Botho (deel van Sanlam) en die direksie van M&C Saatchi Abel, een van SA se voorste reklameagentskappe. Sy het ’n BCom (Regte)-graad aan die Universiteit Stellenbosch verwerf.”

Held is ’n voormalige Mej. Suid-Afrika, was ’n aanbieder van Pasella en is nog betrokke as aanbieder by Top Billing. Sy is ’n gewilde spreker oor verskillende onderwerpe soos geslagskwessies, die nuwe sakeomgewing en korporatiewe transformasie. Sy is aktief betrokke by verskeie liefdadigheidsinisiatiewe.

Phiyega slaan politieke heksevure in Limpopo dood

Riah Phiyega
Riah Phiyega

Die liggaam van ‘n driejarige kind is gevind naby die onrusgeteisterde Rhelela buite Tzaneen in Limpopo. Die woedende gemeenskap het ‘n winkel aan die brand gesteek in Khubyana naby Rhelela.

‘n Plaaslike raadslid sê die kind se liggaam is gevind nadat drie kinders tussen drie- en vierjaar oud, Woensdagaand as vermis aangemeld is.

Die polisie in Tzaneen vermoed nie enige gemene spel in verband met die dood van ‘n driejarige kind nie.

Die Nasionale Kommissaris van Polisie Riah Phiyega het Woensdag na Limpopo gereis om te probeer om die situasie te ontlont.

Sy het die gebied besoek nadat betogers die naweek ‘n polisiekantoor aangeval het oor die dood van ‘n 15-jarige seun.

Die Groter Tzaneen se raadslid, Moses Mahasha sê die kind is in ‘n kattebak van ‘n motor van ‘n plaaslike swart sakeman gevind. Daar word beweer dat hy deur die polisie doodgeskiet is.

Dit is in dieselfde gebied waar ‘n gewelddadige openbare protes vir vyf dae geduur het. Drie betogers is tydens die botsings deur die polisie geskiet.

In die daaropvolgende geweld Dinsdagnag is twee betogers doodgeskiet en 15 polisiemanne beseer. Negentien polisievoertuie is ook beskadig.

Inwoners het ook op ‘n plundertog gegaan nadat die verminkte liggaam van ‘n 20-jarige vrou gevind is.

Phiyega het inwoners gister gewaarsku dat openbare orde nie onderhandelbaar is nie.

Vier mense is gewond toe die polisie met rubberkoeëls op ‘n groep ontstoke gemeenskapslede by die Ha-Kutama-stamgebied buite Makhado in Limpopo losgebrand het.

Die betogers dring aan op die inhegtenisneming van nege mense wat daarvan daarvan verdink word dat hulle ‘n 38-jarige man van ‘n nedersetting vermoor het.

Die polisie sê die man het selfmoord gepleeg.

Phiyega het die polisie-optrede verdedig tydens haar besoek. Sy het gesê dat die polisiebeamptes moes optree, aangesien hul lewens in gevaar was.

“Uit vrees vir hul lewens het ‘n paar van die lede lewendige ammunisie gebruik wat gelei het tot die dood van die twee lede van die gemeenskap. Die gebou en sowat 19 voertuie is beskadig. Feit van die saak is dat die polisie beamptes ook mense is. Elke lewe verloor tydens polisie-ingryping is pynlik, niemand moet tydens ‘n openbare protes sterf nie,” het Phiyega gesê.

 

Mampi-Rampi soen haar kiesers koebaai

Rampi en Zille oppad na nêrens
Rampi en Zille oppad na nêrens

Agang SA se leier Mamphela Ramphele staar ‘n interne opstand in die gesig, met woedende amptenare en die plaaslike leiers wat sê hulle is “gebruik” en “verraai”.

Haar eertydse ondersteuners sal haar ook nie na die DA volg nie, want dit is ‘n “wit party”.

Hulle het Ramphele daarvan beskuldig dat sy Agang SA vir selfsugtige redes verlaat het.

Hulle het gesê sy was nie deursigtig oor haar geheime samesmeltingsgesprekke met die DA nie.

Die DA-leier Helen Zille het Ramphele as die DA se presidensiële kandidaat vir die 2014-verkiesing aangewys.

Agt Agang-leiers en senior party-amptenare het aan The Star gesê hulle sal nie vir Ramphele na haar nuwe tuiste volg nie.

Ontevrede lede sou na verwagting Dinsdagnag ‘n krisisvergadering by die party se hoofkwartier hou.

Volgens The New Age sal Agang SA die algemene verkiesing met ‘n ander leier tegemoet gaan.

“Ons leier neem ons waar ons nog nooit wou gaan nie. As sy ‘n samesmelting met die DA wou gehad het, moes sy ons eerste geraadpleeg het,” het die waarnemende Agang Gauteng sekretaris Yako Sakhiwo aan die koerant gesê .

Pule Monama , ‘n lid van Agang se Nasionale Adviesraad , beskryf Ramphele se besluit as ‘n terugslag vir die mense in nedersettings wat gehoop het dat daar ‘n “nuwe begin sou wees, [‘n party] wat werklik wou veg en hul diensleweringsprobleme sou oplos”.

Ramphele het nie gereageer op oproepe en ‘n SMS-boodskap nie.

Die soen
Die soen

Transito-rowers kom tweede

heistTwee vermeende rowers is in ‘n skietery met transito-veiligheidswagte by ‘n winkelsentrum op Witbank dood.

Die polisie in Mpumalanga sê ‘n groep van sowat vyf mans het die SBV transitovoertuig by die Safewaysentrum aangeval.

‘n Woordvoerder, Selvy Mohlala, sê die mans het op die wagte losgebrand waarna hulle teruggeskiet en twee doodgeskiet het, het RSG berig.

‘n Smous is ook in die kruisvuur dood. Mohlala sê die rowers is vermoedelik van Botswana en Zimbabwe.

Die polisie soek na drie aanvallers wat van die toneel af weggevlug het.

Vroeër is vyf mense doodgeskiet in nog ‘n transitorooftog op Richmond in KwaZulu-Natal.

Onder die slagoffers is ‘n polisielid, ‘n veiligheidswag en drie vermeende rowers.

Die polisie sê die veiligheidsmaatskappy was besig om geld in die kitsbank te laai toe die veiligheidswag deur gewapende mans gekonfronteer is.

Hulle het hom daarna doodgeskiet en sy vuurwapen na bewering afgeneem.

Toe hulle probeer het om die geldhouer te verwyder, het die kleurstof ontplof waarna hulle gevlug en in die daaropvolgende skietery nog twee omstanders gewond het.

Solly Ozrovech se boeke van winkelrakke na beweerde molestering

Ds. Solly Osrovech
Ds. Solly Ozrovech

Die boeke van ‘n gewilde skrywer is van die Christelike Uitgewers Maatskappy (CUM) se winkelrakke gehaal, na Huisgenoot berig het oor sy beweerde kindermolestering.

Ds. Solly Ozrovech se ouers was Poolse Jode wat na Suid-Afrika geïmmigreer het om die sogenaamde Jodeslagting van die Tweede Wêreldoorlog vry te spring.

Nadat albei sy ouers in ‘n motorongeluk oorlede is, is hy wees gelaat en het weens ‘n misverstand in die Afrikaanse weeshuis in Ugie beland, pleks van die Joodse weeshuis in Brixton.

Twee mans wat anoniem wil bly, beweer dat hulle deur Ozrovech gemolesteer is.

Die eerste man beweer dat hy as tienjarige weeskind gesodomiseer is deur Ozrovech, toe direkteur van die M.T.R. Smit-kinderoord in die Oos-Kaap.

’n Tweede beweerde slagoffer het soortgelyke voorvalle beskryf.

Ozrovech het met regstappe teen die tydskrif begin.

Jacques Louw, Ozrovech se prokureur, het bevestig dat Huisgenoot vir laster gedagvaar sal word.

Oranje Meisieskool moet swembadwater gebruik weens watertekort

Oranje Meisieskool
Oranje Meisieskool

Honderde meisies van Oranje Meisieskool het begin om die skool se swembad te benut vir water weens die erge watertekort in Bloemfontein.

Die Mangaung Metroraad sê egter die grootskaalse wateronderbrekings in die stad se noordelike voorstede sal eersdaags iets van die verlede wees.

Watertekorte veroorsaak groot ongerief vir inwoners.

Inwoners wat na die munisipale kantore opgeruk het, is deur die polisie voorgekeer omdat die betoging klaarblyklik onwettig was.

‘n Munisipale woordvoerder het gesê die Metroraad het miljoene rand bestee om die probleem aan te spreek.

Die woordvoerder sê hulle het ‘n kontrak van sowat R70 miljoen gesluit vir die aankoop van nuwe pompe.

Die geld sal aangewend word om die infrastruktuur te verbeter en te verseker dat daar in inwoners se waterbehoeftes voorsien word.

Polisie skiet glo nog twee oproermakers in Limpopo

limpopoviolenceDie polisie in Limpopo sê hulle het geen ander keuse gehad nie as om hulself te verdedig teen die oproerige inwoners in Rhelela buite Tzaneen.

Hangwani Mulaudzi , polisiewoordvoerder, het het gereageer op die dood van twee lede van die gemeenskap wat omgekom het na skote buite ‘n satellietpolisiestasie in die gebied Dinsdagnag weerklink het.

Woedende inwoners is sedert Vrydag verlede week in oproer ná die noodlottige skietery van ‘n 15-jarige seun en die moord van ‘n 20-jarige vrou.

Hulle het ‘n satellietpolisiekantoor aangeval en beamptes met klippe gegooi. Die aanval het gevolg nadat woedende inwoners deur ‘n provinsiale leier van die Ekonomiese Vryheidsvegters toegespreek is.

Skote is afgevuur wat gelei het tot twee sterftes. Die skare is verwilder nadat die polisie versterkings ingeroep het.

Agt mense is dood in botsings tussen oproermakers en die polisie in die afgelope twee weke.

Sedert Vrydag is vier mense reeds in Rhelela dood

Twintig studente geskors by UJ oor beurs-oproer

ujTwintig studente is geskors na betogings by die Universiteit van Johannesburg (UJ) oor ‘n tekort aan befondsing deur die regering se nasionale studente-finansiële hulpskema (NSFAS).

Sowat ‘n honderd studente het vandag buite die universiteit se Kingsway-kampus betoog.

Geregistreerde studente is geskors hangende dissiplinêre optrede en moontlik kriminele klagte teen hulle.

Studente wat nog nie geregistreer is nie en wat deel was van die protes sal aangekla word van kriminele gedrag, het die universiteit gesê.

Die universiteit sê die studente het administratiewe en registrasie-aktiwiteite ontwrig.

“Die universiteit respekteer die reg van studente om vreedsaam te protesteer , so lank as wat akademiese en administratiewe aktiwiteite nie ontwrig word nie en die veiligheid van studente en personeel is nie in die gedrang gebring word nie.”

Die vise-kanselier, Tinyiko Maluleke sê die studente het ‘n persooneellid aangehou, en van die studente het gedreig om die universiteit af te brand.

Studente by tien universiteite sê hulle gaan registrasie en klasse ontwrig uit protes teen onvoldoende befondsing deur die NSFAS.

Die SA Studentekongres ( Sasco ) het Sondag ‘n oproep om massaprotes oor die befondsingstekort gedoen.

Mangosuthu Universiteit van Tegnologie en die Durban Universiteit van Tegnologie in KwaZulu-Natal ervaar ook ontwrigting as gevolg van die protes.

“Geen registrasie by die universiteite nie totdat alle studente gelyke geleenthede gegee word,” het Sasco se president Ntuthuko Makhombothi aan verslaggewers in Johannesburg gesê.

 

Winderige koeie laat skuur ontplof

koeivlamMetaangas uit 90 winderige koeie het ‘n Duitse plaasopstal laat ontplof en skade aan die dak aangerig.

Een van die diere is beseer, het die polisie gesê.

Hoë vlakke van die gas het opgebou in die struktuur in die sentrale Duitse dorp Rasdorf, toe ‘n statiese elektriese lading ‘n vonk veroorsaak het wat die gas laat ontplof het in vuurtongflitse,” het die owerhede in ‘n verklaring gesê.

Een koei is vir brandwonde behandel, het ‘n woordvoerder van die polisie gesê.