Nuus Archives - Page 556 of 1583

Nog koue vir Kaap, skade aan oeste beloop miljoene

Agri Wes-Kaap meen die vloedskade in die provinsie kan miljoene rande beloop.

Carl Opperman, bestuurshoof, sê hulle is besig om met boere te praat oor die skade wat op die onderskeie plase aangerig is, berig RSG.

Hy sê sommige boere in die Boland- en Overbergstreke het tot 90% van hul oeste verloor. Vrugte- en graanoeste is die ergste geraak.

Intussen is berig dat nóg ‘n kouefront die provinsie nader. Die Kaapstadse weerkantoor het gesê verspreide buie word in die volgende twee dae oor die Wes-Kaap verwag.

Twee vroue het die afgelope naweek weens vloede dood, het die polisie Maandag gesê. Dit bring die dodetal op drie, nadat nog ‘n persoon vroeër dood is.

Die vroue, wat in die Jonkershoek-natuurreservaat by Stellenbosch dood is, se motor het op ’n brug weggespoel. Hulle het Vrydag laat glo probeer om van die oorstroming by hul kerkkamp in Die Eiland-terrein te ontsnap. Hul name is nog nie bekend gemaak nie.

Meer as 18 000 mense is deur die vloede geraak.

Die gebiede wat geraak is, sluit in Delft, Faure, Vishoek, Guguletu, Houtbaai, Khayelitsha, Kraaifontein, Kuilsrivier, Macassar, Philippi, Scarborough, Sir Lowryspas, Somerset-Wes, Strand, en Valhalla Park.

Die vloede het ook rots-, modder- en grondstortings in bergagtige gebiede tot gevolg gehad.

Wilfred Solomons-Johannes, woordvoerder van die stad se rampbestuursentrum, het gesê aan Sapa gesê toestande het verbeter en inwoners wie se huise ontruim is, is weer tuis.

Alle paaie behalwe Chapmanspiek is weer oopgestel vir verkeer.

Motlanthe se Chinese ere-graad moet wag

Die departement van internasionale betrekkinge het versoek dat ’n eerbetoon aan adjunkpres. Petrus Kgalema Motlanthe tydelik teruggetrek word.

Clayson Monyela, woordvoerder van die departement, het gesê dié besluit is geneem omdat interne en diplomatieke konsultasies nie betyds afgehandel is nie.

“Dit is verkeerd om te beweer dat die eerbetoon teruggetrek is. Dit is slegs uitgestel sodat die nodige konsultasies gedoen kan word. Almal wat deur die uitstel geraak is, is in kennis gestel.”

Die Burger het Saterdag berig Motlanthe is woedend nadat ’n ere-professoraat wat hy verlede maand op ’n ampsbesoek aan Beijing by ’n universiteit daar sou ontvang het, deur die Suid-Afrikaners van die hand gewys is. Pres. Jacob Zuma is hiervoor die skuld gegee.

Pres. Jacob Zuma het verlede jaar ‘n ere-professoraat in internasionale betrekkinge van ‘n universiteit in Beijing ontvang. Hy het ook in Augustus vandeesjaar ‘n ere-doktersgraad van Limkokwing-universiteit ontvang.

Zuma het die Chinese regering toe bedank omdat hulle die rol erken wat leiers van opkomende ekonomieë speel in die gesprekvoering oor wêreldkwessies.

Hy het toe gesê die eer wat hom te beurt geval het is ‘n bewys van die vertroue wat die Chinese regering in Suid-Afrika se buitelandse beleid het

Thabo Masebe, Motlanthe se woordvoerder, het Maandag gesê hy weet nie of die adjunkpresident ontsteld was oor die besluit om sy besoek aan die universiteit te kanselleer nie.

Bronne in en na aan die Uniegebou het gesê daar was geen amptelike kommunikasie van die departement van internasionale betrekkinge en samewerking aan Motlanthe se kantoor nie. Hy moes by konsulêre amptenare in Beijing uitvind daar is opdrag gegee dat die eerbewys nie meer ontvang sal word nie.

Die departement en die presidensie het berigte ontken dat Zuma betrokke was by die besluit.

“Die berigte is ongegrond en belaglik,” het Mac Maharaj, presidensiële woordvoerder, in ’n verklaring gesê. – Sapa

Sonja Laxton ernstig beseer in tref-en-trap

Die oud-Springbok- Sonja Laxton is ernstig beseer in ’n tref-en-trap-ongeluk in Johannesburg.

Sy is in Melrose by ’n verkeerslig deur ’n voertuig getref wat ’n rooi verkeerslig verontagsaam het.

Laxton (nooiensvan Van Zyl) was in haar kinderjare ’n inwoner van Oudtshoorn en was van sub A tot standerd 4 ’n leerling van die Laerskool Van Reede. Haar pa was die magistraat op die dorp.

‘n Verdagte sal vanoggend in die Hillbrow landdroshof verskyn op ‘n aanklag van roekelose bestuur.

Laxton is Sondagoggend raakgery in Rosebank in Johannesburg. Die 65-jarige Laxton was sowat ‘n kilometer van haar huis op die hoek van Glenhove en Oxfordstrate toe sy getref is.

Sy het verskeie beserings opgedoen en word tans in die Milpark hospitaal behandel.

Laxton, wat al langer as vyf dekades aan atletiek deelneem en meer as 70 nasionale titels verower het, is die eerste atleet wat nasionale kleure vir baan-, pad- en veldwedlope verower het.

Die motorbestuurder het glo weggejaag, maar is kort daarna deur lede van ’n veiligheidsmaatskappy aangekeer.

Laxton is met veelvuldige beenbreuke in die Milpark-hospitaal opgeneem waar sy waarskynlik vandag en môre verskeie operasies sal moet ondergaan.

Noodlynsentrum weier hulp na moord

Die polisie se 10111-noodlynsentrum het versuim om ‘n gestremde man te help nadat sy vrou in hul huis in Durban vermoor is.

Edda Botha is vroeg Saterdagoggend in haar huis in Athlone Park doodgeslaan, berig die Sunday Tribune.

Die egpaar se bure het toe reageer op oproepe van Botha se man.

Richard Allkins van die Amanzimtoti-misdaadvoorkomingsorganisasie het gesê daar was ‘n argument, omdat die operateur nie iemand wou uitstuur sonder dat hulle die presiese besonderhede oor die slagoffer en haar beserings weet nie.

“Ons het uiteindelik ‘n polisievoertuig, wat op roetine-patrollie was, voorgekeer. Hulle kon nie glo dat hulle nie onmiddellik na die toneel gestuur is nie.”

Kol. Jay Naicker, polisiewoordvoerder, het ‘n beroep gedoen op “diegene wat die bewerings maak” om na vore te tree, sodat ‘n ondersoek gedoen kan word. – Sapa

Regseise van R3,7 miljard teen Gauteng gesondheid

Regseise van tot R3,7 miljard is teen die Gautengse departement van gesondheid ingedien, het die die DA Sondag gesê.

Dít is die bedrag wat die provinsie se komitee oor openbare rekening verlede week gegee het, het Jack Bloom, DA-koukusleier in Gauteng, in ‘n verklaring gesê.

“Die bedrag het gestyg van R2,7 miljard se regseise teen 31 Maart vanjaar en R1,6 miljard in die 2011/12 boekjaar.

“Die meeste eise is van 1 002 mediese eise en die totale bedrag van dié eise is R3,415 miljard.”

Altesaam 326 siviele eise, wat R265 miljoen beloop, en 159 nooddiens-eise, wat R9,7 miljoen beloop, is ook ingedien.

Die Gautengse departement kon nie vir kommentaar bereik word nie.

Bloom het gesê die bedrag is kommerwekkend omdat die departement alle hofsake oor mediese nalatigheid die afgelope drie jaar verloor het.

“Die vlaag van eise benadruk die dringendheid om die standaard van gesondheidsorg te verbeter, sodat minder foute begaan word.

“Gehalte-bestuur moet verbeter word, veral in kraamsale, omdat baie eise ingestel is weens babas wat tydens geboorte beseer is.” – Sapa

Span van 22 versorg Mandela

Die kamer waar hy behandel word in oudpres. Nelson Mandela se huis in Houghton, lyk soos ‘n hoësorgeenheid, het Winnie Madikizela-Mandela, sy gewese vrou, gesê.

Madikizela-Mandela het gesê die voormalige staatshoof is steeds siek, berig die Sunday Independent.

Sy het gesê Mandela kan ook weens die pype in sy mond nie meer praat nie. Dié pype word gebruik om vloeistof van sy longe af te hou.

“Hy kommunikeer met sy gesig, maar die dokters het gesê hulle hoop om weer sy stem terug te kry.”

Madikizela-Mandela het ontken dat die oudpresident aan lewensondersteuningsmasjiene gekoppel is.

Sy het gesê ‘n span van 22 dokters versorg Mandela.

Madikizela-Mandela het gesê dit is goed dat Mandela in ‘n “omgewing is wat hy ken”.

Dié kommentaar volg twee weke nadat die sakeman Tokyo Sexwale aan die media gesê het Mandela beskou nie homself as siek nie.

“Madiba sê oor sy gesondheid: ‘Ek is nie siek nie, ek is net oud’,” het Sexwale gesê.

Vroeër vanjaar is Mandela byna drie maande in die hospitaal behandel vir ‘n wederkerende longinfeksie. Hy is op 1 September ontslaan. – Sapa

Voormalige polisieman ontvoer kind, eis R1,5 miljoen losprys

‘n Voormalige polisiebeampte is in hegtenis geneem in verband met die ontvoering van ‘n negejarige seun van Lyttelton Manor in Pretoria.

Die man wat voorheen ‘n konstabel was by Lenasia se Speurtak vir handelsmisdaad, is in Johannesburg in hegtenis geneem nadat die seun Dinsdag by sy laerskool vermis geraak het.

Hy het ‘n losprys van R1,5 miljoen van die seun se ouers geëis wat hy later na R250.000 en ‘n motor, verminder het.

Die verdagte sal binnekort in die hof verskyn. – RSG

Juju skryf eksamen as hofsaak begin

Julius Malema, leier van die Ekonomiese Vryheidsvegters (EFF), kan dalk agter tralies eindig voor die verkiesing.

Juju se hofsaak sal vandag in die Rondgaande Hof in Polokwane begin. Streng veiligheidsmaatreëls sal geld.

Malema en sy vier mede-beskuldigdes word van bedrog, geldwassery en afpersing aangekla. Die voormalige leier van die ANC Jeugliga het na bewering miljoene rande uit korrupsie verdien.

Malema is in September verlede jaar in hegtenis geneem omdat sy Ratanang-familietrust na bewering R4 miljoen van ‘n R52 miljoen-tender gekry het wat die departement van paaie en vervoer in Limpopo in 2011 aan die maatskappy On Point Engineering betaal het.

Die party se provinsiale koördineerder, Josie Butane het saam met duisende Malema-ondersteuners ‘n nagwaak gehou.

Hulle het die ANC-leiers daarvan beskuldig dat hulle staatshulpbronne gebruik in ‘n poging om Malema te vernietig.

Butane sê niks sal egter Malema se leierskap keer nie. ‘n Senior lid van die Ekonomiese Vryheidsvegters, Floyd Shivhambu het gedreig dat hulle lede grond sal begin beset as deel van die party se grondhervormingstrategie.

Shivhambu het duisende EFF-lede toegespreek om die EFF se hoofbeleid om grond te onteien sonder vergoeding oor te dra.

Shivhambu het die trae pas van die regering se grondhervormingsprogram gekritiseer. Hy sê hulle sal grond identifiseer en dit wat aan die mense behoort, beset en later bekommer oor die wetlikheid daarvan.

Malema moet Maandagoggend glo eers eksamen skryf as deel van ‘n Unisa-graad voordat hy in die hof sal verskyn.

Die polisie het die strate rondom die hofgebou afgesper en polisielede sal ontplooi wees by verskeie moontlike brandpunte in die stad en in Seshego.

Malema het in Junie in die streekhof gesê die Nasionale Vervolgingsgesag is onbevoeg en die strafregtelike saak teen hom is ‘n politieke sameswering.

Daar is vroeër vanjaar reeds op Malema se luukse huis in Sandton en sy plaas buite Polokwane beslag gelê.

‘Rotgevrete baba’ was glo moetiemoord

Die sewe maande oue baba wat na bewering in Diepsloot deur rotte opgevreet is, was nie ‘n slagoffer van ‘n knaagdierplaag of verwaarlosing nie, maar heksery.

PRAAG het van die bure van die ouerpaar verneem dat die baba nie dood is weens rotte wat hom gevreet het nie, maar van beserings wat hy opgedoen het in ‘n moetie-ritueel.

Sy ma het glo die baba se tong uitgesny asook ‘n arm verwyder. Buitelanders het aan PRAAG gesê hulle het verlede week vir hul lewens gevrees aangesien inwoners die gerug verspei het dat immigrante die baba laat opsny het vir moetie.

Buitelanders is ook verantwoordelik gehou vir die onlangse verkragtings in Diepsloot, sê hulle.

Die baba is dood gevind is in ‘n plakkershut in Diepsloot. Sapa het daarna berig dat “die baba se voet deur rotte afgeknaag is”.

Die sewe maande oue baba se verminkte liggaam is Sondag in die woning gekry.

Die ma en haar kêrel is in hegtenis geneem, het die Gautengse polisie Donderdag gesê.

“Die ma is Dinsdagaand in ‘n kroeg in Randburg vasgetrek en haar kêrel is verlede week in Diepsloot gearresteer,” het kapt. Tsekiso Mofokeng gesê.

Mofokeng het gesê die 23-jarige vrou word aangekla van kinderverwaarlosing en moord in die landdroshof in Pretoria.

Haar 30-jarige kêrel word deur ‘n aanklagte van moord in die gesig gestaar.

In ‘n ander voorval in Khutsong is sogenaamde bendelede lewendig verbrand na boendoehowe. Die “bendelede” of volgelinge van geneser, het volgens inwoners onder die invloed van heksery verkeer.

Inwoners het die wrede moorde op die sewe “bendelede” verwelkom en aan die Mail&Guardian gesê dit sal nou “rustig” wees in Khutsong.

Israel, Saoedi-Arabië beplan aanval op Iran

Israel is besig met die koördinering van planne vir ‘n militêre aanval op Iran. Hulle werk saam met Saoedi-Arabië.

Riyadh sal taktiese ondersteuning bied aan Jerusalem, het ‘n Britse koerant berig vroeg Sondag.

Saterdag het Bibi Netanyahu aan die Franse dagblad Le Figaro oor die situasie verklaar dat Israel en die “voorste lande in die Arabiese wêreld ” saamstem wanneer dit kom by Teheran en sy kernvermoëns.

“Ons almal dink dat Iran nie toegelaat moet word om die kapasiteit te hê om kernwapens te maak nie,” het hy gesê. “Ons glo dat as Iran was kernwapens bekom, dit kan lei tot ‘n kernwedloop in die Midde-Ooste, en sal die die Midde-Ooste in ‘n kernkruitvat verander.”

Volgens die Sunday Times, het Riyadh ingestem om Israel toe te laat om sy lugruim in ‘n militêre aanval op Iran te gebruik en saam te werk oor die gebruik van reddingshelikopters, brandstofvliegtuie en onbemande tuie.

“Die Saudies is woedend en bereid om aan Israel al die hulp wat hulle nodig het te gee,” het ‘n anonieme diplomatieke bron aan die koerant gesê .

Die verslag kom te midde van Netanyahu se blitsbesoeke om steun te probeer werf teen ‘n internasionale alliansie wat sal toelaat dat Iran uraan sal verryk.

Iran het egter herhaaldelik gesê dat hulle nie belangstel in kernwapens nie.

As die eerste minister van Israel, het hy beklemtoon, moet hy sorg vir “die oorlewing van my land”.

CNN berig dat Netanyahu ook gesê het in die onderhoud dat hy sal doen wat dit nodig is om te doen om Israel te beskerm.

Indien ‘n ooreenkoms bereik word by gesprekke wat in Genève Woensdag hervat, volgens die Israeliese diplomatieke bron, is ‘n militêre opsie terug op die tafel.

Saoedi-Arabië se taktiese ondersteuning, in plaas van rugsteun van die Pentagon, sal deurslaggewend wees vir ‘n langafstand aanval op Iran se kernprogram .