Kategorie: Nuus

Skermutselinge tussen onwettige myners aan Oos-Rand

Skermutselinge tussen onwettige myners, het die Oos-Rand nege ure lank in paniek gehad.

Gevegte tussen twee groepe strydende onwettige mynwerkers het veroorsaak dat gesinne onder hul beddens en binne kaste moes wegkruip vir gewapende mans wat mekaar agtervolg het en by hul eiendomme ingebars het.

New Modder, buite Benoni, is Sondag omskep in ‘n oorlogsone toe die twee bendes mekaar onder tuisgemaakte bomme en masjiengeweervuur gesteek het, het Timeslive berig.

Die stryd volg op die moord van vier onwettige myners buite Benoni Donderdag wat tot ‘n gebiedsoorlog gelei het.

Vrese groei dat ‘n dodelike onwettige myneroorlog, wat tot nou toe hoofsaaklik aan die Wes-Rand gewoed het, na die Oos-Rand uitgebrei het weens intense polisie bedrywighede in die gebied.

Ten spyte van getuienis wat daarop dui dat toestande merkbaar agteruitgegaan het, het die polisie gesê “niks buitengewoons in die gebied het op Sondagnag plaasgevind nie”.

‘n New Modder-huiseienaar Shabeer Shaik het gesê hy, soos sy bure, het sy gesin onder die bed weggesteek.

“Mense hardloop verby my huis en skiet. Hulle spring oor mure en jaag mekaar.

“Jy kon hulle hoor bomme gooi na mekaar. Dit was asof ons in die Midde-Ooste was.

“Die polisie kan nie byhou nie. Hulle is oorweldig. Die weermag is nodig,” het hy gesê.

‘n Ander inwoner het gesê: “Jy kon masjiengeweervuur hoor. Dit het tot 04:00 aangehou. Die ontploffings het die huis geskud. Ons het nie iewers om heen te gaan nie. Ons het gedink ons gaan doodgemaak word…..”

‘n Sekuriteitswag by ‘n nabygeleë uitgrawingsterrein, het gesê hy het gedink die wêreld het tot ‘n einde gekom.

“Ek het nog nooit so baie lyke gesien soos in die afgelope twee weke nie. Elke dag is daar ‘n skietery. Elke dag sterf mense. Dit is nie veilig nie. As jy uitgaan in die nag is jy dood,” het hy gesê.

Hy het gesê die onwettige mynwerkers het “soldate” om hul goud te beskerm en hou ander mynwerkers weg.

“Hulle het weermagte wat swaar gewapen is,” het Masuku gesê.

‘n Onwettige Zimbabwiese mynwerker het die groot aantal moorde bevestig. “Dit is hoofsaaklik Basotho’s wat veg en mekaar beroof.

Kolonel Martin van Niewenhuizen, waarnemende kommissaris vir Benoni het die stellings afgemaak as gerugte.

“Geen skietery van enige aard is aangemeld nie. Ons was in die gebied vandag [Maandag] en geen koeëldoppe is gevind nie.

“Hierdie bewerings kom uit die gemeenskap As jy inligting wil hê, moet jy hulle vra..”

Die myn se bestuurder, David Viljoen, het gesê wetlike bedrywighede word nie geraak deur onwettige mynbou of die oënskynlike voorvalle nie.

Generaal-majoor Oswald Reddy, bevelvoerder van die SAPD Honeydew-groep, het gesê die onrus in Benoni het te doen met groter druk wat die polisie op onwettige mynwerkers aan die Wes-Rand geplaas het.

“Dit was as gevolg van intense bedrywighede aan die Wes-Rand, dat hulle hul fokus verskuif het,” het Reddy gesê.

Reddy het gesê onwettige mynwerkers is doenig in Gauteng se hoofgoudrif, wat strek van Springs tot Carletonville.

Die Kamer van Mynwese skat dat tot 10% van Suid-Afrika se totale goudproduksie – wat in 2013 R72 miljard beloop het – van onwettige mynbou kom.

Hoëprofiel-swart-wit-moordsaak broei in VSA

CNN berig dat ‘n swart man, die 32-jarige Jesse Matthew, in Texas gevang is en aangekla gaan word van moord op ‘n 18-jarige blanke studente, Hannah Graham. Die polisie van Alebmarle-distrik sal later vandag om 10:00 Amerikaanse oostelike tyd (17:00 in Suid-Afrika) ‘n perskonferensie hou om besonderhede oor die saak bekend te maak.

Jesse Matthew
Jesse Matthew

Graham, wat ‘n eerstejaartjie aan die Universiteit van Virginië was, is as vermis aangemeld. In Oktober verlede jaar is haar skedel en beendere egter gevind op ‘n plek wat ongeveer 15 kilometer van waar sy laas gesien is, gevind.

Kringtelevisie-opnames en ander getuienis het die owerheid daartoe oorreed om Matthew as verdagte wat vir haar verdwyning verantwoordelik was te eien.

Die meisie het net voor sonop vermis geraak op 13 September nadat sy laas op kringtelevisie by ‘n winkelsentrum in Charlottesville vasgevang is.

Hanna Graham, waarvan slegs die skedel en beendere gevind is
Hannah Graham, waarvan slegs die skedel en beendere gevind is

Matthew is verlede jaar op 24 September op ‘n strand in die Galveston-distrik, Texas, ongeveer 2000 kilometer van waar Graham laas gesien is, in hegtenis geneem.

Alvorens die klagtes teen hom tot moord verhoog is, is Matthew vir ontvoering met die bedoeling om te verkrag aangehou.

In ‘n ander saak staan Matthew tereg op die onsedelike aanranding van ‘n vrou in Fairfax, Virginië, in 2005. Dié verhoor sal in Maart vanjaar plaasvind. Volgens die Amerikaanse owerheid is dié dame in September 2005 van agter af gegryp en onsedelik aangerand. Haar aanvaller is egter deur ‘n voetganger afgeskrik.

Inligting wat van dié vrou verkry is, het die polisie in staat gestel om Matthew met die saak van nog ‘n vermiste meisie, Morgan Harrington, te verbind. Harrington was ‘n studente aan die Tegniese Universiteit van Virginië wat insgelyks in Oktober 2009 in Charlottesville vermis geraak en drie maande later dood aangetref is. Matthew is egter nog nie van daardie saak aangekla nie.

Speurders ondersoek sy moontlike verbintenis met ander, soortgelyke gevalle in dieselfde gebied. Dit sluit in: moorde op die Virginië-Tegniese studente Heidi Childs en David Metzler, asook die doodmaak van Cassandra Morton van Lynchburg, Virginië, in Oktober 2009.

Nog ‘n studente wat vermis word, is Samantha Anne Clarke van Orange, Virginië, waarvan Matthew insgelyks deur speurders verdink word.

 

 

Woede oor Zim olifantkalwers uitvoer

Die Zimbabwiese regering gaan voort met sy omstrede planne om lewende olifante uit te voer, het RSG berig.

‘n Woordvoerder, Prince Mupazviriro sè hulle sal dit ooreenkomstig die reëls van die wèreldwye wildhandelsverdrae hanteer.

Tot 80 olifantkalwers is in die Hwange Nasionale Park gevang, wat internasionaal groot woede ontlok het.

Die finansieel gestremde wildtuinowerheid sê hy het die geld van die olifantverkope nodig om sy bedrywighede te finansier.

Omgewingsbewaarders sè dit is wreed om die olifantkalwers van die res van die trop te skei. China het na bewering van die olifante bestel.

Hittegolf duur voort

Die Suid-Afrikaanse weerdiens het gewaarsku dat die hittegolf oor Gauteng en Noordwes tot more kan voortduur.

Die westelike dele van Noordwes, soos Vryburg, Bloemhof en Klerksdorp sal veral geraak word en in sekere gebiede sal die kwik nie tot onder 35 grade celsius daal nie.

Die warm weer word veroorsaak deur hoogdrukstelsels in die hoër vlakke.

“Ons neem die gemiddelde van die warmste maand en voeg vyf grade daarby. As jy daardie toestand vir drie dae aanhoudend het, is dit wanneer jy ‘n hittegolf het.”

Temperature in Noordwes sal na verwagting so hoog as 36°C styg teen Woensdag.

‘n Waarskuwing is voor die naweek uitgereik van hittegolf-toestande in die noordelike en sentrale dele van die land.

Mense, en veral bejaardes en jong kinders, word aangeraai om genoeg vloeistof te drink en nie proteïnryke voedsel te eet nie omdat dit metaboliese hitte kan verhoog.

Geen beurtkrag vandag?

Volgens ‘n twiet op Eskom se Twitterblad van gisteraand 11-uur, is fase-1-beurtkrag gekanselleer omdat verbruikers glo “elektrisiteit bespaar” het.

Soos praag egter gister berig het, kan verbruikers steeds beurtkrag en kragonderbrekings oor die langer termyn verwag soos wat Eskom se probleme weens ‘n jare lange gebrek aan instandhouding en goeie bestuur toeneem.

Paniek oor Eskom: binnekort dalk geen krag en water, maar wel onluste, plundery

Soos wat meer en meer nuus oor Eskom uitlek, kom dit voor asof jare se wanbestuur deur hoogs besoldigde “uitvoerende beamptes” uiteindelik hul tol begin eis. Die koerant Business Day berig vandag dat die elektrisiteitsreus Donderdag “ten minste 10 000 Mw van sy vermoë verloor het”, die ergste sedert die kragonderbrekings in 2008. Hierdie toestand gaan ten minste vir die volgende twee tot drie jaar duur.

Volgens Eskom het daar Donderdag 10 424 Mw (een kwart van die land se totale elektriese vermoë) se opwekkeningseenhede “onverwags onklaar geraak”, wat die maatskappy naarstiglik laat soek het na maniere om ‘n totale ineenstorting van die netwerk te keer. ‘n Verdere 5 000 Mw se vermoë was boonop onbeskikbaar vanweë beplande instandhouding.

Ingenieurs en afgetrede ingenieurs wat buite die stelsel verkeer en dus meer vrylik kan praat, is bekommerd dat ‘n totale ineenstorting van die kragnetwerk nie meer ver is nie. Dit kan tussen 2 weke en 2 maande neem vir die netwerk om weer aan die gang te kom soos wat kragsentrales weer aangeskakel moet word, wat miljoene mense binne ure sonder krag, water, kommunikasie en veral veiligheid kan laat.

Die Amerikaanse ervaring in New Orleans na afloop van die Katrina-orkaan het getoon dat veral die swart bevolking dit as ‘n geleentheid om te roof, te plunder en te verkrag gesien het. Terwyl die hoofstroommedia in die VSA dié aspek van die ramp in Augustus 2005 geïgnoreer het, het konserwatiewe webblaaie in die VSA gewemel van eerstehandse berigte van die chaos wat gevolg het toe daar nie meer krag of water was nie.

‘n Ingenieur van Pretoria, mnr. Alex Bell, het gepoog om uit te vind of die Pretoriase munisipaliteit oor enige gebeurlikheidsplanne beskik om seker te maak dat inwoners ten minste water sou hê indien Eskom se kragnetwerk ineenstort. Hy skryf in ‘n epos dat mense hul eie voorsorgmaatreëls moet tref aangesien die Suid-Afrikaanse “owerheid” nóg besorg oor die krisis is nóg oor enige voorsorgmaatreëls beskik:

Ek woon in ‘n sekuriteitsoord met ongeveer 250 wooneenhede. Dit kan na my mening onverantwoordelik wees om NIKS te doen nie, maar elkeen moet sy eie plan beraam.

INDIEN die Eskom-NETWERK VAL – ineenstort, soos totaal, gaan dit ten minste enigiets van 2 weke tot 2 maande neem om dit weer aan te kry.
MAAR waar lê die grootste risiko? Dit is nie die feit dat ons nie gaan krag hê nie, daarvoor kan ons ‘n plan maak soos gas of iets, MAAR WAT MAAK ONS INDIEN DAAR NIE WATER IS NIE !!!!

Daar is geen bron van waar drinkwater aangery kan word nie – moontlik rou water vanaf nabygeleë damme. Die kettingwinkels sal net vir ‘n dag of twee water hê en die reservoirs wat in die Randwater- en byvoorbeeld munisipale verspreidingsnetwerke is sal maksimum vir ongeveer 48 uur water kan voorsien. En daarna ??? In ‘n stad soos Pretoria of Johannesburg sal dit afhanklik wees van waar die water voorsien word, maar nog steeds sal die munisipale pompstasies asook dié se Randwater-inlynpompstasies NIE water kan pomp sonder krag nie !!!!

Ek het met “bekwame persone” van byvoorbeeld Pretoria-munisipaliteit gesels en dié sê dat Pretoria geen bystandsgenerators het wat aangeskakel kan word vir dié doel nie.

Só het ek ook gesels met bekwame persone van Randwater, en dié sê hulle het by verre nie genoeg / voldoende / net enkele bystandskragopwekkers wat gebruik kan word, sou daar ‘n krisis ontstaan.

Ek dink dié boodskap moet uitgaan sodat ons mense NIE KAN SÊ HULLE IS NIE BETYDS GEWAARSKU NIE !!!

Die noodsaaklike behoefte aan water sal in die orde van sê 4 000 liter (4 kubieke meter) per persoon per maand wees. Bronne wat gebruik kan word is byvoorbeeld: boorgate, swembaddens en watertenks.

Indien mense twyfel oor die moontlikhede dat die Eskomnetwerk kan faal, skakel en gesels met verantwoordelike persone oor die stand van onderhoud wat by Eskom ondervind word.

Ongeag die vooruitsig van ‘n volslae krisis en moontlike chaos wat daarop kan volg, rig Eskom reeds enorme skade aan die ekonomie aan. ‘n Energiekundige wat gereeld selfs in die hoofstroommedia aangehaal word, Chris Yelland, het vanoggend soos volg getwiet oor ‘n verdere “menslike fout” by die Koebergkragstasie:

Benewens water, behoort mense ook droë kos soos rys wat min water verg om gaar te maak, byderhand te hou, tesame met genoeg gas, kerse en brandstof in voertuie aangesien die pompe by vulstasies ook nie mag funksioneer nie.

Le Pen sien regdeur Amerikaanse oorlogsplanne

Die leier van Frankryk se opkomende Front National (FN), Marine Le Pen, het Brussel daarvan beskuldig dat hulle “Amerikaanse lakeie” is wat die EU-beleid in die Oekraïne betref.

Sy het Washington voorts beskuldig dat hulle probeer om ‘n “oorlog in Europa” te ontketen en met NAVO uit te brei tot teenaan Rusland se grense.

“Europese hoofstede het nie die wysheid om te weier om afhanklik te wees van Amerikaanse posisies oor die Oekraïne nie,” het Le Pen Sondag aan Franse joernaliste gesê.

“Wat die Oekraïne aanbetref, het ons onself gedra soos Amerikaanse lakeie,” het sy gesê, voordat sy gewaarsku het dat “die doel van die Amerikaners is om ‘n oorlog in Europa te begin deur NAVO na die Russiese grens uit te brei.”

Sy het die Europese leiers beskuldig dat hulle hulself blind hou vir die Oekraïense regering wat burgerlikes bombardeer en bygevoeg dat beide die Krim sowel as die Oos-Oekraïne onafhanklik behoort te word.

In Junie, het sy insgelyks aan RT se Sophie Shevardnadze gesê dat daar “geen onafhanklike state in Europa is nie,” en baie van hul buitelandse beleidsfoute in die afgelope tyd is gemaak “onder Washington se invloed”.

Haar woorde eggo verklarings deur die voormalige Franse premier Francois Fillon, wat dié naweek aan die openbare uitsaaier France 5 herhaal het dat die Verenigde State van Amerika ‘n poging aanwend “om ‘n oorlog in Europa te ontketen, wat sal eindig in ramp”. Hy het bygevoeg dat sodra ‘n oorlog uitgebreek het, die VSA boonop sal probeer om homself te distansieer daarvan.

“Die Amerikaners het een fout na die ander gemaak en vandag is hulle eenvoudig gediskrediteer,” het Fillon gesê.

“Om Rusland te verneder is eenvoudig onaanvaarbaar.”

Saterdag, het die voormalige Franse president Nicolas Sarkozy gesê dat Europa deel is van “‘n gemeenskaplike beskawing met Rusland,” en dat dit daarom nodig is om konflik op die vasteland te vermy.

“Die belange van die Amerikaners en die Russe is nie die belange van Europa en Rusland nie,” het hy gesê, en bygevoeg dat die herlewing van ‘n Koue Oorlog tussen Europa en Rusland ongewens is.

Intussen het gerugte die rondte gedoen dat ‘n kernontploffing Donetsk in Oos-Oekraïene geruk het waar hewige gevegte steeds voortduur tussen selfverdedigingsgroepe en die junta in Kiëf wat deur die VSA bewapen word.

Beurtkrag waarskynlik met sukkelende Eskom

Die geskeduleerde instandhoudingswerk by Eenheid 1van die Koeberg Kernkragsentrale naby Kaapstad begin Maandag en sal na verwagting tot einde Mei duur.

Eenheid 1 het weens ‘n onverwagse tegniese fout aan die einde van Januarie onklaar geraak.

“Die stelsel sal hierdie week ook onder druk bly, dus bly die risiko vir beurtkrag hoog,” het Eskom gesê. “Daar is ‘n tekort aan opwekkingskrag weens eenhede wat tans weens beplande en onbeplande instandhouding nie krag aan die netwerk kan voorsien nie.”

Eskom het intussen gewaarsku dat die kragnetwerk steeds onder groot druk verkeer.

“Eenheid 1 by Koeberg word vanaf Maandag afgeskakel vir ʼn geskeduleerde inspeksie en instandhouding. Die eenheid sal na verwagting teen die einde van Mei weer beskikbaar wees,” het Eskom bygevoeg.

Fase Twee-beurtkrag is die naweek toegepas, wat die sesde agtereenvolgende dag van landwye beurtkrag was.

Eskom sê hy het die naweek gefokus op sy dieselreserwes en die watervlakke van damme vir die komende week se kragopwekking.

Die fokus is om die eenhede, wat onvoorsiend van die netwerk afgehaal moes word, so gou as moontlik weer aan die gang te kry.

Die maatskappy het Suid-Afrikaners gemaan om steeds elektrisiteitsbesteding in te kort om die erns van beurtkrag te beperk.

Palestynse terroris: ISIS = Apartheid

Die voormalige Palestynse terroris, Leila Khaled, het die bedrywighede van die militante groep, die Islamitiese Staat, skerp veroordeel.

Sy het gesê die dade van ISIS is vergelykbaar met dié van verregse Joodse setlaars en Sioniste wat apartheid en rassisme ondersteun het. ISIS word hoofsaaklik deur Saoedi-Arabië befonds om Wahabi-Islam, ‘n fundamentalistiese Moslemvertakking, te bevorder.

By ‘n plegtigheid waar die voormalige intelligensieminister Ronnie Kasrils ook teenwoordig was om ‘n boikotveldtog teen Israel te loods, het Khaled ISIS se onthoofdings as terreurdade bestempel.

Minister Malusi Gigaba het Khaled by OR Tambo lughawe ingewag saam met Umkhonto We Sizwe en ander ANC-organisasies.

Sy is in Suid-Afrika as gas van die Boycott, Divestment and Sanctions-beweging. Die aktivis het Port Elizabeth besoek as deel van haar landwye besoek aan Suid-Afrika.

Khaled het in 1969 eiehandig ‘n vliegtuig gekaap, een van verskeie. Vlug TWA 840 is opgeblaas nadat die gyselaars ontset is.

Sy het die onlangse moord op die Jordaniese vlieënier vergelyk met die branddood van ‘n Palestynse tiener Mohammed Abu Khdeir in Jerusalem verlede jaar deur regse Jode.

Na die publikasie van ‘n ikoniese foto van Khaled waar sy ‘n AK-47 ophou, geklee in ‘n keffija, het sy “ses operasies aan haar neus en ken” gehad “om haar identiteit te verberg”, maar dié is sedertdien glo omgekeer.

Bronne beweer egter dat die beweringe oor plastiese chirurgie onwaar is omdat die persoon op die foto nooit Khaled was nie, maar ‘n model wat vir die foto geposeer het.

Afrika kry sy eerste swart heilige

Die eerste swart heilige van Afrika is nie Nelson Mandela nie, het die Sunday Times berig.

Benedictus Daswa, ‘n Limpopo-skoolhoof wat gestenig, geslaan en doodgebrand is vir sy Katolieke oortuigings is, sal as die eerste swart heilige van Afrika verklaar word.

“Hy het ‘n beginselvaste standpunt teen heksery ingeneem. Hy het dit openlik gedoen, selfs al was daar pogings op sy lewe voordat hy ‘n martelaar geword het,” het Biskop Hugh Slattery aan die koerant gesê, wat die veldtog vir die saligverklaring van Daswa gelei het.
 
Op 22 Januarie vanjaar het Pous Francis die proklamasie om saligverklaring gemagtig.
 
Slattery het gesê daar is ‘n “besliste moontlikheid” dat die pous kan die seremonie kan bywoon.
 
“Ons hoor dat hy waarskynlik na Afrika kom aan die einde van die jaar.”
 
Daswa se storie is vervat in ‘n verslag van nagenoeg 1000 bladsye wat aan die Vatikaan voorgelê is.
 
Gebore in Mbahe in 1946 as ‘n lid van die Lemba-stam – wat hulself as afstammelinge van die Jode beskou – is Daswa na Katolisisme op die ouderdom van 17 bekeer.
 
Op 2 Februarie 1990, is Daswa in ‘n lokval gelei en vermoor deur ‘n skare wat hom gestenig het, met ‘n knopkierie oor sy kop geslaan het en kookwater oor hom gegooi het omdat hy nie swaar weer aan heksery wou verbind nie.
 
Hy was 43.
 
Hierdie week, is ‘n uitnodiging om die plegtigheid by te woon deur die aartsbiskop van Durban, kardinaal Wilfred Napier, aan die Vatikaan oorhandig.