Ligte vliegtuig stort neer in Mpumalanga

er24Twee middeljarige mans is dood nadat ‘n ligte vliegtuig in Matibidi, Mpumalanga, neergestort het, het paramedici gesê.

“Die mans het reeds gesterf voor die helikopter van die provinsiale nooddienste op die toneel aangekom het,” het Werner Vermaak, woordvoerder van ER24, gesê.

‘n Mediese helikopter in Nelspruit is na die toneel ontbied om te help, maar by hul aankoms is ontdek dat die twee mans reeds aan hul beserings omgekom het.

Die ligte vliegtuig het neergestort in ‘n gebied van modder en digte bosse naby Potholes in Matibidi. Die oorsaak van die ongeluk is nie bekend nie.

Kol. Leonard Hlathi, polisiewoordvoerder, het gesê die ongeluk word ondersoek. – Sapa

SA ontplooi soldate in DRK na Veiligheidsraad se goedkeuring

Rebelle van M23
M23-rebelle

Suid-Afrikaanse soldate gaan in die suide van die Demokratiese Republiek van die Kongo ontplooi word nadat die hoof van die Verenigde Nasies se missie in die DRK die beskerming van burgerlikes beveel het.

Die ontplooiing is deur president Jacob Zuma goedgekeur. Zuma het gister in Angola aangekom om vredespogings met die president van die DRK, Joseph Kabila, te bespreek.

Die minister van verdediging, Nosiviwe Mapisa Nqakula, het bevestig dat die ontplooiing ook deur die VN-Veiligheidsraad goedgekeur is.

Die hoof van die VN-missie, bekend as MONUSCO, sê daar is direkte aanvalle op bewoonde gebiede en VN-posisies in Goma. Hy sê die ontplooiing is genoodsaak nadat hernieude gevegte tussen die Kongolese weermag en die M23-rebelle uitgebreek het.

Vroeër vanjaar is 14 Suid-Afrikaanse soldate doodgeskiet en 27 gewond in gevegte tussen Suid-Afrikaanse soldate en rebelle in die Sentraal Afrikaanse Republiek.

Nosiviwe Mapisa Nqakula het aan die SAUK gesê indien Suid-Afrika nie ingryp nie, sal talle vlugtelinge uit die DRK oor die grense stroom na Suid-Afrika.

Zille storm uit vergadering oor SANW nie ontplooi word

zazille2Die emosionele uitbarstings van die Wes-Kaapse premier, Helen Zille is al bekend agv haar energieke Twitter-vingers.

Zille het Donderdag weer vir ongelukkigheid gesorg nadat sy uit ‘n vergadering met die minister van polisie Nathi Mthethwa gestorm het. Die vergadering is belê om hernude bendegeweld te bespreek op die Kaapse Vlakte.

Mthethwa se woordvoerder, Zweli Mnisi, het gesê Zille het die vergadering vroeg verlaat, met die verskoning dat sy ‘n afspraak met die minister van menslike nedersettings Connie September het.

“Die minister was hier teen 10:30 vir die geskeduleerde vergadering om 11:00. Maar ons moes lank wag vir die premier om te kom,” het hy gesê.

Die vergadering is belê nadat Zille ‘n ope brief aan die minister van polisie gerig het waarin sy vra dat die SANW ontplooi word in warm kolle soos Manenberg.

By die vergadering het Mthethwa gesê dat sosio-ekonomiese toestande op die Kaapse Vlakte agter die geweld sit en dit moet verbeter word.

Maar Zille het haarself glo gewip en gesê troepe moet dadelik ingeroep word om die strate te patrolleer.

Zille het haarself skielik verskoon om blykbaar vir September te gaan ontmoet. Mthethwa en sy amptenare moes daarna ontdek dat sy by inligtingsessie joernaliste by die parlement toegespreek het.

Zille se woordvoerder, Zak Mbhele, het ontken sy Donderdagmiddag uit die vergadering gestorm het. – timeslive.co.za

Nog 30 lasbriewe vir kinderporno-verdagtes

SAPDDie ses mans wat gevang is met kinderpornografie – saam met ander verdagtes – is na bewering ingeskryf vir ‘n Kanadese webwerf wat kinderpornografie aan pedofiele wêreldwyd verskaf.

‘n Woordvoerder van die polisie, luitenant-generaal Solomon Makgale, het Donderdag gesê 30 lasbriewe is verkry in verband met die “byna 50 verdagtes wat ons ondersoek“.

“Die mense wat ons in hegtenis geneem het en op soek na is, is professionele mense.“

Makgale het geweier om uit te brei op die beroepe van die verdagtes.

“Ons het die ses in hegtenis geneem want ons het bewyse en grafiese materiaal wat verband hou met beweerde kinderpornografie gekry.

“Daar is ander mense wat ons vermoed wat betrokke is by kinderpornografie, maar ons kan hulle nie in hegtenis neem nie, want ons wag op die resultate van die ontleding van rekenaars, eksterne hardeskywe, geheue stokkies, kameras en videokameras wat in beslag geneem is in die strooptogte.

“Hulle het elektroniese transaksies beklink wat daar sit. Hulle kan nie dit wegsteek nie. Ons werk is om uit te vind en die getuienis te beveilig ,“ het Makgale gesê.

Ontleding van honderde DVD’s, rekenaars en rekenaartoerusting sal na verwagting voltooi word teen die einde van volgende week.

Die polisie se kubermisdaadkundiges gaan deur die databasisse terwyl ondersoekbeamptes hul verdagtelys opstel, lasbriewe finaliseer en meer vermeende pedofiele identifiseer.

Baie van die geïdentifiseerde verdagtes word gemonitor deur ander regeringsagentskappe wat deelneem aan die operasie, het ‘n polisieman met kennis van die ondersoek gesê.

Hy het gesê ‘n aantal van hulle het skakels na ‘n hoë-profiel maatskappye en professionele praktyke.

“Hulle is nie klein vissies nie. ‘n Paar het glo aansienlike invloed,” het hy gesê en bygevoeg dat die lys van verdagtes na verwagting sal aangroei soos ondersoekbeamptes meer inligting bekom. – timeslive.co.za

‘Wreedheid’ in polisie neem glo toe

Gould saam met Leon Wessels
Gould saam met Leon Wessels

Die Instituut vir Sekerheidstudies sê gevalle van polisie-wreedheid het in die laaste tien jaar met meer as 300% toegeneem, met slegs een persent van gevalle waar oortreders skuldig bevind is.

Die syfer is bekend gemaak op die vierder jaarlikse konferensie oor nasionale en internasionale perspektief oor die vermindering van misdaad en strafregterlike geregtigheid in Johannesburg.

‘n Senior navorser van die instituut, Chandre Gould, sê die statistieke toon dat daar ‘n meerderwaardigheidskultuur binne die polisie bestaan wat burgerlikes kan vervreem.

Sy sê uit die 11880 strafregterlike sake wat by die onafhanklike polisie ondersoek direktoraat aanhangig gemaak is, in die vyf jaar tot en met 2012, is slegs 2000 sake voor die hof gebring en was daar slegs 129 suksesvolle skuldigbevindings. – RSG

Regering wil skaliegas-ontginning goedkeur

skalie
Wie is die skape?

Die regering kan skaliegas-ontginning voor aanstaande jaar se verkiesing goedkeur.

Die minister van Handel en Nywerheid, Rob Davies sê skaliegas kan ‘n noodsaaklike deel van Suid Afrika se soeke na energie-sekerheid wees.

Op ‘n vraag oor die sterk weerstand teen hidrobreking in die Karoo het Davies gesê die regering sal ontginning op ‘n omgewings- én maatskaplik- verantwoordelike wyse doen.

Davies sê die besluit oor hidrobreking is een van ‘n reeks stappe om beleggings en werkskepping te stimuleer.

Die drukgroep Treasure the Karoo het adjunkpresident Kgalema Motlanthe se beweerde steun vir skaliegas-ontginning, oftewel hidrobreking, vroeër veroordeel.

Motlanthe het die openingstoespraak in Junie deser by die Groen Energie se  Jeugberaad in Kaapstad gelewer. Hy het gesê die kommersiële ontginning van die land se oorvloedige skaliegashulpbronne moet steeds ondersoek en opgevolg word.

Motlanthe het dié mening gelug kort nadat die Suid-Afrikaanse aktivis, Jonathan Deal, met ‘n internasionale omgewingsprys weggestap het vir die teenkanting wat hy gebied het om hidrobreking in die Karoo te verhoed.

Deal en nog vyf ander ontvangers het die Goldman Omgewingsprys ter waarde van R1,4 miljoen elk in San Francisco ontvang. Omgewings-aktivisme op grondvlak word met dié prys vereer. Deal het die drukgroep Treasure the Karoo in 2011 op die been gebring om die ontginning van skaliegas deur hidrobreking te keer.

Die minister van Minerale Hulpbronne, Susan Shabangu het in April verlede jaar ‘n moratorium op hidrobreking geplaas en ‘n taakspan aangestel om ‘n verslag vir haar op te stel.

Sy het in September aangekondig dat geologiese ontginning toegelaat sal word om die grootte en potensiaal van die skaliegas-reserwe te bepaal.

Die Treasure the Karoo-drukgroep het met Afriforum kragte saamgesnoer om planne van olie- en gasmaatskappye te bestry wat skaliegas wil ontgin.

Suid-Afrika het volgens berekenings ‘n baie ryk skat aan tegnies-ontginbare gasreserwes, maar omgewingskenners is bekommerd dat dit die omgewing kan skaad.

Die hoof van omgewingsake by Afriforum, Julius Kleynhans sê Suid-Afrikaners is nie genoegsaam ingelig oor die uitwerking van hidroliese breking nie.

Treasure the Karoo het verlede jaar ‘n groep betogers na die hekke van die Parlement gelei om te eis dat meer navorsing gedoen word oor die eksplorasie van skaliegas.

Die groep se woordvoerder, Jonathan Deal, sê egter die motivering om skaliegas te ontgin, is nie oortuigend genoeg nie. – RSG

‘Aanvallers praat nie, skiet net’

shooting“Hulle het niks gepraat nie. Toe hulle in die kombuis kom het hulle hom net geskiet. Sommer net.”

Willem Swanepoel se dogter, Karien van der Berg van Harry Gwalastraat in Dennesig, Middelburg, sukkel om die woede en hartseer te onderdruk. Sy het haar pa verloor nadat hy geskiet is tydens ’n rooftog by hul huis op die Elandspruit-plotte. Iemand wat sy as “sagmoedig en oopkop” beskryf.

“Hoekom moes hulle die sneller trek? Net omdat hulle kan. Hy was nie ’n aggressiewe man nie.”

Mnr. Swanepoel (57) is Sondagoggend in die maag geskiet toe hy in drie swart aanvallers vasgeloop het. Sy vrou, Marinda, het op die tweede vloer van hul huis wakker geword van die slag en haar man hoor skree.

Sy is met die trappe af om hom te hulp te snel, maar is deur die rowers teruggedwing slaapkamer toe. Daar is sy met rekenaarkabels en haar man se skoenveters vasgebind. Een van die rowers het haar deur die gesig geslaan.

Die aanvallers het aanhoudend vir geld en kos gevra.

Hulle het mnr. Swanepoel na die badkamer gesleep en hom daar gelos. Hy het die heeltyd by hulle gesmeek: “Vat alles en gaan net.”

Sy dogter sê dat die groot aantal bloed op die vloer aandui dat hy moontlik verder mishandel is. “Mens kan nie so baie bloed uit ’n wond uit bloei nie. Ons moet maar wag vir die outopsie om seker te maak.” Die projektiel is by sy maag in en onder sy linkerboud uit.

Die aanvallers het die Swanepoel-egpaar se hele huis leeggedra. Hulle het hul buit agterop mnr. Swanepoel se werksbakkie gelaai. Daaronder was ’n rekenaar, kluis, wapens en juwele.

“Hulle het alles gevat. Selfs die Sunlight en die wasgoed seep. Hulle het die yskas leeggemaak. Die yskas het hulle gelos maar ook net omdat hy te groot was om te laai” sê Innus van der Berg, Karien se man.

Nadat die rowers fort is het mev. Swanepoel daarin geslaag om haarself los te wikkel. “Tot vandag toe weet sy nie hoe sy dit reggekry het nie want hulle het haar styf vasgemaak. Die merke sit nou nog daar. Dit was net genade van Bo.”

Sy is af na haar man en het hom in ’n plas bloed aangetref. Mev. Swanepoel het na die naaste bure, wat dieselfde naweek hul intrek gekry het, gehardloop vir hulp.

Karien en haar man het teen 02:30 ’n oproep gekry. Hulle het hul na die plot gehaas en oppad soontoe die ambulans gebel.

“Die ER24 kar het seker vyf minute na ons daar gestop en die polisie kort daarna.”

Mnr. Swanepoel is eers na die Middelburg-hospitaal geneem, maar van daar oorgeplaas eMalahleni toe omdat hy ’n dringende operasie nodig gehad het.

Na die operasie het dit gelyk asof alles beter gaan. Hy kon Sondag met sy familie praat en ’n verklaring by ’n polisieman aflê.

Mev. Van der Berg was oppad om haar pa te besoek toe die hospitaal bel en sê dat hulle dringend moet kom. Mnr. Swanepoel het in ’n koma verval en is kort daarna oorlede.

Sy voertuig is Maandag in Vosman (eMahalaleni) naby ’n treinspoor by ’n hostel teruggevind. Polisiemanne is nog besig om die voertuig te deursoek vir leidrade.

Dinsdag moes sy haar pa se lyk gaan uitken: “In die hospitaal het my pa sleg gelyk. Hy was bleek en sy oë was ingesink. Maar Dinsdag was dit anders. Hy lyk vreedsaam en gelukkig. Hy is nou waar hy moet wees.”

Mev. Swanepoel gaan nie terug na die huis waar haar man vermoor is nie. Sy moes Woensdag alleen hul 37ste huweliksherdenking vier, met die letsels op haar lyf steeds sigbaar.

“Vandag is nie ’n goeie dag vir my ma nie.”

Mnr. Swanepoel se begrafnis vind Saterdag om 11:00 in Klerksdorp plaas. Iemand wat met die familie in verbinding wil tree kan mev. Van der Berg bel by 083 330 0912.

• Enigiemand met inligting oor die misdryf, of wat dalk iets verdags gesien het, kan die bevelvoerder van die Middelburg speurtak, kolonel Filla Mahlangu by 076 942 5455 of die ondersoekbeampte, sersant Lekgeng, by 076 536 6028 bel.

Polisievoertuig land op sy dak

sapd2Ses verdagtes in polisieaanhouding is beseer toe hulle na hulle hofverskyning na die Kagiso-polisiestasie onderweg was.

Ses verdagtes in polisieaanhouding en twee polisiebeamptes dié week beseer toe die voertuig waarin hulle gery het met ‘n bakkie gebots het en op sy dak beland het.

Dié ongeluk het omstreeks 3.30nm op die hoek van Hoofrif- en Paardekraalweg, Krugersdorp plaasgevind toe die polisiebeamptes na Kagiso Polisiestasie onderweg was nadat die verdagtes in die Krugersdorp Landdroshof verskyn het.

Brigadier Sipho Ngubane van die Kagiso Polisiestasie sê dat al die insittendes van die polisievoertuig vir behandeling na Leratong Hospitaal geneem is.

“Niemand het ernstige beserings opgedoen nie. Die passasiers is vir skok en geringe beserings soos krapmerke en kneusplekke behandel.”

Hy sê dit lyk nie of die passasiers van die bakkie waarteen die polisievoertuig gebots het, ernstig beseer is nie.

Dit wil voorkom of albei voertuie moontlik afgeskryf gaan word.

‘n Omstander op die toneel sê ‘n polisievoertuig en die nooddienste is na die toneel ontbied.

“Die nooddienste se ambulans het baie naby die polisievoertuig gestop en die polisiebeamptes van die ander voertuig het bystand verleen om seker te maak dat die verdagtes nie ontsnap nie.”

Ngubane sê die polisie ondersoek die oorsaak van die ongeluk. – looklocal.co.za

Vrou ry oor aanvaller

carwindow‘n Vroulike motoris het na bewering oor ‘n man gery wat haar kant-venster in Benoni gebreek het, en hom in ‘n koma gelaat.

The Star berig dat die voorval om 07:30 Dinsdag in Northmead, Benoni plaasgevind het.

Konst. Timothy Masilela het aan die koerant gesê dat die vrou, wat bestuur het, gestop het by ‘n kruising. Die aanvaller het blykbaar die passasier-kant se venster van haar Tata gebreek.

“Hy het toe die handsak op die sitplek gegryp. Maar die vrou het dit teruggegryp en hulle was daaroor geworstel, en terwyl hy nog steeds aan die handsak klou, het die vrou versnel. En toe sy dit doen, het die man die sak gelos en geval,” het Masilela aan The Star verduidelik.

“Die slagoffer het gesê sy het net gery en nooit gekyk wat gebeur het met die aanvaller nie. Sy het die voorval by die Benoni-polisiekantoor aangemeld, en toe ons daar kom, was die man in ‘n koma en vol bloeding van sy kop en bene,” het Masilela bygevoeg .

Die man, glo 25 jaar oud, is op lewensondersteuning op die toneel geplaas.

Hy is tans in ‘n koma en onder polisiebewaking in die Tembisa-hospitaal.

SR-verkiesing: Daso en Sasco in messtekery

Daso-werwingsplakkaat
Daso-werwingsplakkaat

Beeld berig dat ‘n messtekery tussen lede van die DA-studenteorganisasie (Daso) en lede van Sasco uitgebreek het ná afloop van die Tshwane-universiteit van Tegnologie (TUT) se SR-verkiesing.

Die geweld het op Polokwane-kampus uitgebreek omdat Mmusi Maimane, DA-premierskandidaat in Gauteng, die verkiesingsuitslag op die Soshanguve-kampus bevraagteken het.

Sekere studente moes weens tegniese probleme by ‘n ander kampus gaan stem. Die SR-verkiesing was egter oop vir alle TUT-kampusse, ten spyte van dié probleme.

Die DA-Jeug het in ’n verklaring gesê ’n klag is by die polisie ingedien nadat ’n Daso-lid glo deur ’n Sasco-lid met ’n mes gesteek is.

‘n Sasco-lid is ook glo in die gevegte wat losgebars het, gesteek. Sasco kon nie bereik word vir kommentaar nie.

Willa de Ruyter, woordvoerder van die TUT, het gesê die TUT-bestuur veroordeel die voorval. Die uitslae van die SR-verkiesing was nog nie gister beskikbaar nie.