Woolworths bied $2 miljard (R21 miljard) vir die afdelingswinkel David Jones aan, ‘n bod wat gevolg is deur A$213m (R2,15 miljard) vir Solomon Lew se 11,88%-aandeel in die klerewinkelketting Country Road. Woolworths verkoop reeds Country Road-klere in Suid-Afrika.
“Dié aanbod bied ‘n bykomende voordeel (wat nie aan ander aandeelhouers van David Jones beskikbaar is nie) aan mnr. Lew en sou in analoë omstandighede van ‘n oorname nie toelaatbaar wees nie.”
Die kommissie se beswaar is egter deur die hof van die hand gewys en sal na verwagting nie Woolworths se aanbod van R20 miljard vir David Jones, Australië se naasgrootste kleinhandelaar, laat ontspoor nie.
Woolworths meen die Country Road-transaksie word om handelsredes gedoen en maak deel uit van sy langdurige begeerte om minderhede in die luuksekleinhandelaar uit te koop.
“Daar is geen ooreenkoms met Solomon Lew rakende die bod vir Country Road nie. Dit word om goeie handelsredes gedoen en Country Road sal hul eie deskundige mening oor die waardasie bekom,” sê die woordvoerder vir Woolworths, Nic Bennett.
