Kategorie: Nuus

Martin Bosma val ANC-terreur in nuwe boek en op TV aan

Martin Bosma, die parlementslid van die Nederlandse Partij voor de Vryheid, het onlangs op die Nederlandse televisie oor sy nuwe boek, Minderheid in eigen land, gepraat en ‘n skerp aanval op Nederlandse steun vir ANC-terreur tydens die tagtigerjare geloods. Hy beskryf die landmyne op plaaspaaie en moorde op “demokraties verkose munisipale raadslede” deur die ANC as “menseregteskendings”. Hiermee word die hoofstuk van Westerse en Nederlandse steun vir ANC-terreur in die verlede weereens geopen, iets wat sedert 1994 ook geensins in Suid-Afrika gedebatteer is nie.

Tydens sy laaste besoek aan Suid-Afrika toe hy besig was met navorsing vir die boek, het mnr. Martin Bosma met dr. Dan Roodt van PRAAG beraadslaag en ‘n ete met PRAAG-lede  bygewoon.

Clive-Derby Lewis kry mediese parool na 21 jaar in gevangenis

Mnr. Clive-Derby Lewis, ‘n vorige Suid-Afrikaanse parlementslid wat die Konserwatiewe Party verteenwoordig het, is vandag deur die Pretoriase Hooggeregshof meegedeel dat hy vir mediese parool kwalifiseer. Tot dusver het die ANC-bewind, asook verskeie ministers van korrektiewe dienste, volstrek geweier dat Derby-Lewis vrygelaat word, al is hy reeds in 2008 vir gewone parool en meer onlangs vir mediese parool aanbeveel.

Regter Selby Baqwa het beveel dat die gevangenis, asook die minister van korrektiewe dienste Michael Masutha en die Mediese paroolraad, teen 5 Junie Derby-Lewis se paroolvoorwaardes moet vasstel. Hy het ook die staat gelas om Derby-Lewis se regskoste betaal.

Derby-Lewis het reeds verskeie kere die hof genader om die onregmatige weiering van sy parool te betwis. Oor die afgelope twee dae het Baqwa ‘n verskeidenheid argumente van albei kante aangehoor. Onder andere het die staat gesteun op getuienis van ‘n swart dokter, Mike Sathekge, wat beweer het dat Derby-Lewis nie graad-4-longkanker het nie, maar graad 3. Twee ander medici het egter bevind dat Derby-Lewis wel aan graad 4-kanker ly.

Masutha, die minister van korrektiewe dienste, het op 30 Januarie Derby-Lewis se soveelste aansoek om mediese parool van die hand gewys, waarskynlik weens druk vanuit die Suid-Afrikaanse Kommunisteparty. Omdat Chris Hani, by wie se moord Derby-Lewis betrek is, ‘n leier van daardie party was, meen die party dat hy oor ‘n vetoreg beskik sover dit die vrylating van gevangenes betref.

Limpho Hani, die weduwee van Chris Hani, het ook vandag se verhoor bygewoon. Saam met die Kommunisteparty, staan sy Derby-Lewis se vrylating teen.

PRAAG, asook Steve Hofmeyr en lede van die party Front Nasionaal, het oor die afgelope jaar of meer verskeie betogings gereël waartydens Derby-Lewis se vrylating geëis is. In ‘n twiet het dr. Dan Roodt van PRAAG vanoggend gesê:

Clive Derby-Lewis het nooit enigiemand gedood nie en het in sy getuienis destyds verklaar dat hy nie geweet het dat Janusz Waluś vir Chris Hani wou gaan skiet nie. Hy het ook geen wapen aan Waluś oorhandig soos wat die staat beweer het nie. Derby-Lewis se bediende is egter deur die ou Veiligheidspolisie gedreig en geïntimideer om vals getuienis teen haar werkgewer te lewer, wat genoeg was om hom ter dood te laat veroordeel. Sy doodstraf is later in lewenslange gevangenisstraf omskep.

Die voormalige parlementslid verkeer steeds in die hospitaal in Pretoria waar hy teen kanker behandel word. Indien hy ontslaan word, sou hy nou huis toe kon gaan, terwyl hy tot vandag toe weer na die Sentrale Gevangenis in Pretoria sou moes terugkeer.

 

ANC beplan groot aanlyn-ingryping

Die Rolprent- en Publikasieraad het bewerings verwerp dat sy konsepbeleid oor aanlynregulering internetgebruik in Suid-Afrika gaan sensureer.

Die Raad sê die voorgestelde regulasies is slegs daarop gemik om te verseker dat kommersiële media nie onwettige materiaal wat pornografie, geweld en haatspraak bevat, publiseer of bevorder nie.

Die Raad se bedryfshoof, Sipho Risiba het in Johannesburg by ‘n openbare sitting oor die voorgestelde regulasies gesê die Raad wil in staat wees om aanlynbeeldmateriaal en -inligting te “klassifiseer”.

Dit sal glo meebring dat die publikasie van “onwettige inhoud verhoed kan word”, maar die voorgestelde keuring van aanlyn-materiaal is kennelik ‘n growwe skending van die grondwetlike reg tot die vryheid van uitdrukking, ten spyte van die ANC se vrome verklarings.

Die voorgestelde klassifikasieproses is eerder daarop gemik om onthullende inligting en internetvryheid te beperk.

Selfoonbeeldmateriaal wat geweld teen wit minderhede uitwys en voorvalle van intimidasie en korrupsie deur ANC-amptenare sal waarskynlik maklik verbied kan word.

Indien die voorgestelde regulasies van krag word, sal bekendmaking van belangrike inligting beperk kan word.

Airbus 330 verloor skielik onverklaarbaar krag

‘n Airbus A330-300 van Singapore Airlines met 180 passasiers en 12 bemanningslede aan boord het tydelik die krag van albei sy enjins verloor terwyl dit Saterdag op ‘n vlug van Singapoer na Sjanghai op ‘n hoogte van 39.000 voet deur ‘n storm gevlieg het.

‘n Woordvoerder van die lugdiens sê die vlieëniers het operasionale prosedures gevolg om weer die enjins aan die gang te kry waarna dit veilig in Sjanghai geland het.

Die straler het krag verloor in beide enjins na meer as 3 uur in die lug. Die een enjin het later weer begin werk.

“Die vlieëniers het operasionele prosedures gevolg om normale werking van die tweede enjin te herstel deur die vliegtuig in ‘n beheerde daling te stuur, voordat dit weer kon klim,” luidens die verklaring.

Volgens die Aviation Herald het die vliegtuig op 39.000 voet, 162 myl van Hong Kong se Rolls-Royce Trent 772-enjins opgehou werk.

Die straler het gedaal tot 26.000 voet voor die werking herstel is.

By nadere ondersoek na ‘n veilige landing, het Singapore Airlines gesê geen “onreëlmatighede” kon opgespoor word met die werking van die enjins nie.

Tenderhouer in Limpopo ontplof

Die Valke het die ondersoek na ‘n ontploffing by ‘n tenderhouer by die kantore van die Departement van Onderwys in Limpopo oorgeneem, het RSG berig.

Die houer is opgeblaas kort voor die spertyd vir die indiening van tenderdokumente vir die Skoolvoedingsskema verstryk het.

‘n Woordvoerder van die Valke, Hangwani Mulaudzi, sê die ondersoek is nog in ‘n vroeë stadium, maar hulle beskou die voorval in ‘n baie ernstige lig.

Mulaudzi sê die land kan nie bekostig dat staatseiendom vernietig word deur mense met hulle eie politieke agendas nie. Hy sê hy hoop om die skuldiges binnekort vas te trek.

Onrus by Delareyville na taxi leerlinge raakry

Inwoners van die lokasie by Delareyville in Noordwes het Donderdag die hoofpad na die dorp met brandende buitebande en ander voorwerpe versper nadat ‘n taxibestuurder twee leerlinge raakgery het.

Hulle beskuldig die taxi-bestuurder van nalatigheid en vra dat die owerheid streng moet optree teen die oortreder.

Een kind verkeer glo in ‘n ernstige toestand.

Die polisie sê nog lede is in die gebied ontplooi om die situasie te monitor.

Lokasie-inwoners by Delareyville het voorheen met die polisie slaags geraak weens ‘n onwettige byeenkoms het Noordwes polisie gesê.

‘n Groep swart DA-lede het na kantore van die munisipaliteit Tswaing opgeruk oor swak dienslewering, het brig Thulani Ngubane gesê.

Hulle het raadslede daarvan beskuldig dat net ANC-lede vakatures vul.

Dit is nie bekend of die DA betrokke is by die jongste onrus nie.

Danny Jordaan stom oor FIFA-aantygings

Onthullings dat twee Suid-Afrikaners na bewering die sokkerliggaam FIFA met 120 miljoen rand omgekoop het sodat Suid-Afrika die Wêreldbeker sokkertoernooi in 2010 kon aanbied, het “Madiba-koors” waarskynlik vir goed laat verdamp.

Die kantoor van die Amerikaanse prokureur-generaal sê die twee Suid-Afrikaners het FIFA amptenare omgekoop om stemme vir die 2010-bod te bekom.

Dit blyk dat die swart sokkeradministrateur, Jack Warner, met die FBI saamgewerk het om die name van korrupte amptenare te oorhandig. Warner het die tronk in Trinidad intussen verlaat omdat hy “ongesteld” is.

Hy het gesê dis jammer dat net mense van die Derde Wêreld geteiken word.

Dit is nie bekend wie die twee Suid-Afrikaanse amptenare is nie.

Danny Jordaan, die uitvoerende hoof van SAFA, die Suid-Afrikaanse sokkervereniging, wat nou betrokke was by die bod, is stom oor die onthullings. Hy is intussen verkies tot burgemeester van die Nelson Mandela Metro.

Suid-Afrikaners en die wêreld is vertel dat die land die bod gewen om die Wêreldbekertoernooi aan te bied omdat algar so ‘n bewondering vir Nelson Mandela koester. Toe nie.

Die Suid-Afrikaanse regering het intussen aantygings ontken van reuse bedrae omkoopgeld wat betaal is om 2010 se Wêreldbeker-sokkertoernooi vir Suid-Afrika te verseker.

Die minister in die presidensie, Jeff Radebe, het in Kaapstad aan verslaggewers gesê Suid-Afrika het ná die toernooi ‘n skoon ouditverslag van Ernst en Young ontvang.

Hy het gesê daar was nooit enige aanduiding dat enigiets verdags in Suid-Afrika plaasgevind het nie.

Radebe was destyds self lid van die plaaslike reëlingskomitee.

Die ekonoom, Mike Schussler, het aan RSG gesê die opvatting dat die land gesien kan word as een wat bereid is om mense om te koop om dinge gedoen te kry, kan dalk potensiële beleggers bekommerd maak.

Hy sê die Wêreldbeker self het positiewe publisiteit geskep.

Die regering sê hy het 36 miljard rand bestee om die toernooi aan te bied.

Opposisiepartye in Port Elizabeth het ooreengekom om die spesiale metroraadvergadering waarop die Sokkervereniging se president, Danny Jordaan, as nuutverkose burgemeester aangewys word, te boikot.

Jordaan moes kort ná die vergadering Switserland toe vlieg vir “SAFA-sake”.

ANC hoop om Nkandla dood te praat

‘n Veelparty adhoc-komitee in die Parlement sal op die been gebring word om die minister van Polisie se verslag oor Nkandla te bestudeer.

‘n Reusebedrag van die belastingbetaler se geld is aan die privaatwoning van ‘n politieke ampsdraer bestee, maar Zuma word in die verslag kwytgesteld van enige finansiële aanspreeklikheid vir die opgraderings van 246 miljoen rand aan sy huis by Nkandla.

Die minister van Polisie, Nathi Nhleko het die verslag Donderdag bekendgemaak.

Die ANC se kantoor van die hoofsweep sê alle partye het die name van hulle verteenwoordigers op die komitee bekendgemaak.

Die ANC hoop die proses om onregmatige aanwending van staatsfondse dood te praat, sal ‘n uitkoms “bespoedig” volgens die hoofsweep.

Die minister het vroeër gesê die opgraderings wat ‘n swembad, beeskraal, hoenderhok, amfiteater en besoekersentrum insluit, is om “veiligheidsredes” gebou.

In die verslag oor veiligheidsopgraderings by president Jacob Zuma se privaatwoning Nkandla, word gepoog om die uitgawes te verbloem.

Skuld word gepak op swak skakeling met die projekbestuur en die integriteit en geloofwaardigheid van bouspesialiste word as verdag voorgehou.

Die Openbare Beskermer, Thuli Madonsela, het verlede jaar aanbeveel dat Zuma van die geld terugbetaal wat nie verband hou met veiligheidsopgraderings nie.

Opposisiepartye het intussen skerp gereageer op wat hy genoem het die verwerping van die Openbare Beskermer se bevindinge dat die President vir sommige van die opgraderings by sy privaatwoning moet betaal.

Volgens berekenings is Zuma verantwoordelik vir minstens 52 miljoen rand van die koste.

Uitspraak oor Derby-Lewis vandag verwag

Die Hooggeregshof in Pretoria sal na verwagting vandag bepaal of die Minister van Justisie en Korrektiewe Dienste, Michael Masutha, ‘n fout gemaak het deur Clive Derby-Lewis se paroolaansoek te weier.

Maandag het Derby-Lewis ‘n aansoek ingedien om Masutha se besluit te hersien.

Derby-Lewis is destyds in hegtenis geneem omdat vals getuienis gelewer is wat beweer het dat hy die vuurwapen verskaf het wat Janus Walus in 1993 gebruik het om die SAKP-leier Chris Hani mee dood te skiet.

Volgens die getuie, ‘n swart bediende, se eie verklaring was dit onmoontlik om te sien van waar sy gestaan het, dat Derby-Lewis ‘n wapen aan Walus oorhandig.

Derby-Lewis is deur sy regspan afgeraai om te getuig oor sy onskuld. Hy is daarna tot lewenslange tronkstraf gevonnis.

Derby-Lewis se huidige regspan steun op die menings van twee spesialiste wat verklaar het dat hy aan Fase 4 kanker ly.

Die Staat verkies om ‘n derde spesialis, die swart dr Mike Sathekge se weergawe te te glo dat Derby-Lewis se kanker alleen tot Fase 3b gevorder het.

Sy prokureur, Roelof du Plessis, het gesê uitgewys dat twee van die drie dokters tekens van Fase 4 kanker gevind het en kon nie verstaan waarom die derde op die paneel van drie spesialiste, nie dieselfde diagnose gemaak het nie.

Du Plessis sê voorts daar was ‘n uitnodiging aan Hani se weduwee, Limpho, gerig om Derby-Lewis te besoek in die hospitaal vir ‘n verskoning van aangesig-tot-aangesig. Sy het nie die aanbod opgeneem nie.

Du Plessis het ook gesê daar was geen reaksie op ‘n soortgelyke uitnodiging in April nie.

Hani se weduwee hou intussen steeds vol dat die gevangene “geen berou” toon nie.

VSA loods aanval op FIFA oor Rusland

Amerikaanse senatore het ‘n oproep gedoen dat FIFA-baas Sepp Blatter moet bedank.

Die VSA probeer om Blatter te ontsetel as die hoof van die sokkerorganisasie weens sy steun vir Rusland om die volgende Sokkerwêreldbekertoernooi aan te bied.

Die Amerikaanse mislukking om kleurrewolusies in Europa, soos in die Oekraïne en nou Macedonië te laat slaag teen Rusland, het vermoedelik tot dié stappe teen die Europese FIFA gelei.

Blatter se ondersteuning van Vladimir Poetin het voorheen hewige kritiek in die Verenigde State van Amerika ontlok.

Die VSA self is nommer 22 op die globale korrupsie-indeks tussen Uruguay en Chili, en speel ‘n baie marginale rol in internasionale sokker.

Tog het hulle die FIFA-aanval geloods en ten minste 10 top-amptenare op aanklagte van korrupsie in hegtenis laat neem ‘n paar dae voor die leierskapsverkiesing.

Ná die arrestasies van sy sewe amptenare in Swede, het FIFA op ‘n perskonferensie laat blyk dat die 2018- en 2022-toernooie steeds gehou sal word in Rusland en Katar.

Die federasie, wat al geruime tyd gebuk gaan onder beskuldigings van korrupsie, het gesê hulle sal ten volle met die ondersoekers saamwerk.

Blatter het vroeër in ‘n verklaring onderneem om korrupte amptenare uit die sport te skop.

Tot dusver het net Europese sokkeradministrateurs gevra dat more se presidentsverkiesing uitgestel moet word. Uefa sê in die lig van die jongste onthullings kan die verkiesing in ‘n klug ontaard.

Dié samewerking om korrupsie uit te roei, sal die VSA se planne om die Wêreldbeker in 2018 in Rusland te kelder, bemoeilik.

Intussen het die Suid-Afrikaanse minister van sport, Fikile Mbalula, gesê hy sal later reageer op bewerings dat Suid-Afrika se bodproses om die 2010 sokkerwêreldbeker aan te bied, ondersoek word.

Dit volg na bewerings dat een van die mense wat in die jongste korrupsie-ondersoek betrek word, Jack Warner, by omkopery in Suid-Afrika se bod betrokke was.

Die Suid-Afrikaanse sokkervereniging, Safa, het vroeër gesê die ondersoek na Suid-Afrika se bodproses is bloot bewerings. ‘n Woordvoerder van Safa, Dominic Chimhavi sê niemand in Suid-Afrika word by die ondersoek betrek nie.

Blatter sal Donderdag sy eerste openbare verskyning maak sedert strafregtelike aanklagte teen veertien voormalige Fifa-amptenare ingedien is.

Die Amerikaanse prokureur-generaal, Loretta Lynch sê korrupte amptenare van die FIFAS-sokkerbeheerliggaam het omkoopgeld tydens die proses geneem en sê 14 senior amptenare en bemarkers is betrokke by sowat twee miljard rand se omkoopgeld.