Kategorie: Nuus

Kommer oor Prasa-ingenieur se kwalifikasies neem toe

Die Passasier-spooragentskap van Suid-Afrika (Prasa) sê hy is baie tevrede met sy hoofingenieur, dr. Daniel Mtimkulu, al is hy nie amptelik as ingenieur geregistreer nie.

Netwerk24 het gister onthul dat Mtimkulu nie by die Ingenieursraad van Suid-Afrika geregistreer is nie.

Ingevolge wetgewing moet ingenieurs wat vir die staat werk, by die raad geregistreer wees.

Die Vryheidsfront Plus gaan ook die Staatsdienskommissie versoek om ondersoek in te stel na die geldigheid van die kwalifikasies van Mtimkulu.

Mtimkulu beweer hy het ’n ingenieursgraad by die Universiteit van die Witwatersrand en ’n doktorsgraad in Duitsland behaal, maar Wits se registrasiekantoor kon geen rekord van hom as student opspoor nie.

Mtimkulu, die hoof van ingenieursdienste by Prasa, is aangedui as die ontwerper van die Afro 4000-lokomotiewe wat as ongeskik vir Suid-Afrikaanse infrastruktuur verklaar is. Hy het die foutiewe aankope op ‘n perskonferensie verdedig.

Die hoogte van die treine is nie geskik vir Suid-Afrikaanse spore nie, omdat hulle 4.264m hoog is terwyl die nasionale limiet 3.965m is.

By dieselfde perskonferensie het Prasahoof Lucky Montana gesê dat die bohaai te danke is aan ‘n rassismeveldtog teen Mtimkulu, wat as onbevoeg voorgehou word omdat hy swart is.

Hy het gesê Prasa-werknemers word uitgebeeld “as ‘n klomp onbevoegdes [en] dit is waarskynlik ‘n rassekwessie”.

SA se bydrae aan BRICS nie ‘n kopseer sê ekonoom

Suid-Afrika se beloofde bydrae van $10 miljard aan die beplande Nuwe Ontwikkelingsbank oftewel die BRICS-bank, hoef nie onmiddellik die land uit te vloei nie.

Die geld sal slegs gegee word wanneer dit benodig word, volgens die ekonoom Dawie Roodt.

Roodt het bygevoeg dat China waarskynlik die grootste gedeelte van die nuwe bank sal finansier.

Roodt sê Suid-Afrika hoef hom dus nie te veel te bekommer oor die kapitale uitleg nie.

Rusland en Suid-Afrika het Woensdag ooreengekom om ‘n memorandum van verstandhouding te teken oor onder meer energie.

President Jacob Zuma lei die Suid-Afrikaanse afvaardiging wat bestaan uit ministers en sakelui.

Afgevaardigdes sal onder meer ‘n ooreenkoms oor ekonomiese integrasie van die BRICS-lande bespreek, asook moontlike vrye handelsgebiede.

Die sewende sessie van die BRICS-beraad is in Rusland in die stad Ufa, net buite Moskou, gehou.

Dit is voorafgegaan deur die bekendstelling van die BRICS ontwikkelingsbank wat gesien word as alternatief vir die IMF, die Wêreldbank en ander westerse instellings.

Die handelsomset tussen die BRICS-lande het verlede jaar meer as $291 miljard beloop.

Chinese aandeelpryse, wat ‘n tweede agtereenvolgende dag skerp gedaal het, is ‘n direkte gevolg van hoë aandeelpryse reg oor die wêreld heen, het Roodt ook gesê.

Die Shanghai Composite Index wat met 8.2% gedaal het voor verhandeling begin het, het egter ‘n uur later met drie persentasie punte herstel.

Sedert 12 Junie toe aandeelmarkte gepiek het, het die Shanghai Composite Index met nagenoeg 30% gedaal.

Mooters neem hul park terug

Mooters, mense van die Moot, het Saterdag self ingespring om die Trimpark op te ruim en ongewenste elemente te verwyder, het Rekord Moot berig.

Clinten Sulter, lid van die Moot-gemeenskapsinisiatief (MootGi), sê inwoners en lede van Moot Sektor 2 GPF het die middag omstreeks 15:00 by die Trimpark bymekaargekom en aan die werk gespring.

“Een van die grootste probleme is dwelms in die Moot. As dit uit die weg geruim kan word, behoort misdaad ook te daal.”

Sulter sê die lede het ook profiele oor die sluipslapers geskep wat in die park bly en ‘n noukeurige oog sal in die toekoms gehou word oor hul doen en late by die Trimpark.

“Daar is baie onwettige stortings van afval en ons beoog om die skuldiges te betrap.”

Hy sê baie rommel, tekens van dwelmverkope en gesteelde koperkabels is in die park gevind.

“Die opruiming van die Trimpark was ‘n groot sukses en ons beplan gereelde opvolg-aksies,” sê Sulter.

Ruiters spring weg vir moordende tog

Meer as 220 ruiters op hul perde het vanoggend weggespring vir die laaste dag van die moordende 42ste Fauresmith-perde-uithourit.

Koördineerder Charmaine Nickisson sê met gunstige weerstoestande was deelnemers vroegoggend slaggereed om hul staal te wys. Volgens haar het ruiters en hul perde wat die vinnigste tyd gelewer het tot dusver reeds vanaf 07:00 weggespring.

Die voorloper in die junior-afdeling is Nico-Meyer Le Roux. Volgens Nickisson sal die eerste deelnemers na verwagting teen 10:00 die rit voltooi.

Die Fauresmith-uithourit word deur baie beskou as een van die mees-uitmergelende ritte ter wêreld weens die moeilike roete, koue weerstoestande en die lang afstand oor drie dae. Sowat 350 deelnemers het op die eerste dag weggespring.

Die rit dien as die Uithouritvereniging van Suid-Afrika (Urvsa), se nasionale uithourit-kampioenskap.

Nagklub doef-doef voort ten spyte van klagtes

Tiger Tiger is die gewildste nagklub in die ooste van Pretoria, maar die musiekvoos inwoners het nou besluit om voet neer te sit en ‘n petisie voor die Tshwane metroraad te lê, maar die klub steur hom nie aan die ‘foefies’ van die oues nie en gaan voort om te doef-doef.

Musiekvoos inwoners in die ooste van Pretoria het besluit om Tshwane metro te nader vir hulp om die Tiger Tiger nagklub se deure te sluit, het Rekord Oos berig.

Bejaarde inwoners kla dat hulle na sewe jaar se doef-doef harde rave- en trans-musiek in January Masilelarylaan keelvol is. Dit dryf inwoners van die omliggende ouetehuise en aftree-oorde letterlik teen die mure uit, sê Karen Meyer, DA-raadslid van wyk 44.

Meyer het Maandag aan Rekord gesê die inwoners het die afgelope jaar herhaalde kere petisisies opgestel en op die klub se voorstoep afgelaai. “Dit het geen effek op hulle gehad nie. Die klub steur hulle net nie aan die besware nie,” het Meyer gesê.

Tiger Tiger is een van die min nagklubs wat steeds in die ooste van Pretoria vermaak verskaf. Sedert Hatfield Square nie meer studente se drinkgat is nie, stroom hulle na Tiger Tiger toe.

Volgens Meyer is die perseel waarop die klub geleë is, ‘n nes van onheilighede. “Daar word gereeld by motors ingebreek en ons stuur ook op ‘n gereelde basis die metropolisie na die klub om hulle stil te maak.”

Meyer sê die polisie slaan ook gereeld op die klub toe om dwelms uit te snuffel en gesondheidsinspekteurs maak ook gereeld daar ‘n draai.

Die klub het ook al bekendes soos die sangeres Elizma Theron en die atleet Llewelyn Herbert getrek en DJ’s waaronder Gareth Cliff speel ook gereeld daar.

Die jongklomp beskou dit as die “plek om gesien te word” en steur hulle nie regtig aan die inwoners se gebrom nie.

Cathy Hudson, die eienares van Tiger Tiger, sê die nagklub is klankdig en dat hulle nie die inwoners stuur nie. “Die polisie en metropolisie was al by ons, maar hulle het geen dwelms op die perseel gevind nie. Ek werk nou saam met die polisie om van kriminele elemente ontslae te raak.”

Meyer meen egter dat die nagklub nie klankdig genoeg is nie.

Die moontlikheid bestaan dat Tiger Tiger, wat vier takke landswyd het, na ‘n ander perseel gaan verhuis.

Hudson sê sy huur die klub by Mercedes-Benz. Die motorhandelaar is reg langs die klub, en hulle gaan dalk al die huurders se kontrakte kanselleer.

Maar vir nou steur Hudson haar nie aan die “kerkgroepe” wat so brom nie. “Ons het nog ‘n huurkontrak en sal beslis nie nou ons deure sluit nie.”

Tiger Tiger is net Donderdae, Vrydae en Saterdae oop.

Adjudant-offisier Dave Miller, woordvoerder van die Garsfontein-polisiekantoor, sê hulle het die afgelope jaar twee keer dwelms by klubgangers gevind.

Hy kon nie kommentaar op die rusverstoringklagtes lewer nie.

Presidensie bestudeer regters se versoek

Die presidensie sal nie onmiddellik reageer op Hoofregter Mogoeng Mogoeng se besware oor bewerings dat die regbank beïnvloed word nie.

Die SABC berig Mogoeng het ‘n mandaat gegee dat ‘n vergadering met die president aangevra word om die bedreiging van die regstelsel te bespreek.

Dit volg nadat die land se top-regters vir die eerste keer in die geskiedenis van ‘n demokratiese Suid-Afrika, ‘n versoek gerig het vir ‘n vergadering met President Zuma.

Regters sê hulle wil die herhaaldelike en ongegronde kritiek teen die regterlike gesag bespreek en sê dit het die potensiaal om die howe se gesag te ondermyn.

Die presidensiële woordvoerder, Harold Maloka, sê president Jacob Zuma sal aandag aan die saak gee sodra hy van die BRICS-beraad teruggekeer het.

Volgens die SABC is dit die eerste keer in die geskiedenis van ‘n demokratiese Suid-Afrika dat die land se topregters ‘n vergadering met die president aanvra.

Hoofregter Mogoeng het vroeër gesê hy is optimisties dat President Jacob Zuma die regte ding sal doen

Senior ANC-lede het die howe onlangs skerp gekritiseer, veral oor die Omar al-Bashir-kwessie.

Harry se raadgewers skarrel om redes vir besoek op te dis

Prins Harry het dié week ’n hamburger as wegneemete by ’n eetplek op Mariental bestel.

Dit lyk asof sy Britse raadgewers skielik skarrel om redes vir sy besoek aan te dik, nadat hy in Namibië opgemerk is.

Sy toergroep het met ’n wit LandCruiser­ met ’n Gautengse registrasiemer­k gereis. Niemand mag foto’s van die koninklike neem nie.

“Hy was saam met vier mans en ’n Suid-Afrikaner daar,” het die bestuurder­, mnr. Stefan Nel, aan Marzanne Schoeman, ’n kadetverslaggewe­r van Republikein gesê.

“Prins Harry het ’n wit hemp, donker kakiebroek en lekker vellies aangehad­. Hy is ’n oulike ou, baie plat op die aarde en het grappies met die mense gemaak.”

Volgens Nel was prins Harry omstreeks­ 17:30 in die eetplek.

Prins Harry is glo “in die Suide” saam met die ministerie van die omgewing­ en toerisme vir navorsingsdoeleindes­.

Hy het ook ’n besoek aan die Red die Renosterfonds (SRT) gebring, asook die Woestynleeu Navorsingsprojek van dr. Flip Stander om meer van die verskillende projekte uit te vind.

Die Woestynleeu Navorsings­projek­ het nogal die woestynleeu­mannetjie­, Xpl-94, The Prince gedoop. Die dier is met ’n nuwe satellietnekband­ toegerus. The Prince is die welpie van die leeuwyfie Nina (Xpl-49).

Dr. Pete Morkel is glo die befaamde veearts saam met wie prins Harry reis.

“Die Woestynleeu Navorsingsprojek­ bedank dr. Pete Morkel, Tommy Hall en die SRT vir hul hulp,” is op die webtuiste te sien.

’n Betroubare bron wat teenwoordig was, beskryf ook die prins as “baie aangenaam en plat op die aarde”.

Prins Harry het glo verlede Woensdagaand­ met ’n vlug van Air Namibia, ekonomiese klas, in Namibië aangekom, is op Twitter getwiet. Dit dui daarop dat sy besoek geheim moes wees.

Verlede Donderdagoggend het die prins inkopies op Omaruru gedoen waar mee. Hanni Griebel en Edna Botha koninklike handdrukke van hom gekry het en die aap uit die mou gelaat het.

Regters bekommerd oor ANC-bewind hofbevele ignoreer, regters kritiseer

IN AN unprecedented show of force, 27 of SA’s most senior judges, led by Chief Justice Mogoeng Mogoeng, on Wednesday responded to a slew of criticism by politicians, saying they wanted to discuss “the dangers of the repeated and unfounded criticism” of the judiciary with President Jacob Zuma.

27 van Suid-Afrika se mees senior regters het gister onder leiding van die hoofregter, Mogoeng Mogoeng, gereageer op die kritiek wat ANC-ampsdraers op die regbank uitspreek deur te sê dat hulle “die gevare van herhaalde en ongegronde kritiek” met president Jacob Zuma wil bespreek.

Oor die afgelope weke het die ANC gereeld teen regters uitgevaar. Onder andere het sy sekretaris-generaal, Gwede Mantashe, gesê “dele van die regbank chaos vir die regering wil skep” en het die regbanke in Pretoria en Kaapstad genoem.

Tydens ‘n spitsberaad van die drieledige alliansie van die Kommunisteparty, Cosatu en die ANC is ‘n verklaring uitgereik waarin beweer word dat “sekere streke en regters konsekwent teen die staat bevind”.

Dié verklaring is uitgereik nadat die Pretoriase Hooggeregshof ‘n bevel uitgereik het wat die staat beveel om die Soedannese president Omar al-Basjir in hegtenis te neem, ‘n bevel wat deur die staat geïgnoreer is.

Ondersteun deur sy adjunkte, het regter Mogoeng gesê dat die regbank die inwoners van Suid-Afrika, asook die res van die wêreld, wil verseker dat hulle steeds die verpligting sal nakom om aan die Grondwet en hul ampsede uitvoering te gee. “Vir regters is dié verpligting en die eed heilig,” het hy gesê.

Mogoeng het gesê dat regters ontvanklik vir opbouende kritiek behoort te wees. Maar sodanige kritiek moet billik en ter goedertrou uitgespreek word. Dit moet ook “spesifiek en helder” wees. “Algemene, ongegronde kritiek is nie aanvaarbaar nie,” meen die hoofregter. “Ons kan nie voorgee dat daar niks gesê is nie.”

Die suggestie dat regters in sekere sake “deur ander voorgesê is om ‘n voorafbepaalde beslissing te vel… is iets wat ons verwerp,” het Mogoeng voortgegaan. Dit is blykbaar ‘n verwysing na ‘n beskuldiging deur die minister van polisie, Nathi Nhleko, wat aan senior ondersoekers van die Onafhanklike Polisie-ondersoekdirektoraat gesê het dat “sekere elemente van die regbank met karakters ontmoet om sekere uitsprake te bewerkstellig”.

Volgens Mogoeng word hofbevele “in die reël” deur organe van die staat gehoorsaam. Maar die “enkele gevalle” waar hulle nie gehoorsaam is nie, “ondermyn die regstaat”.

Hy het herhaal wat die Gautengse regterpresident Dunstan Mlambo in die Bashir-uitspraak gesê het: die regstaat is die hoeksteen van grondwetlike demokrasie.

“As inwoners van die land, sou dit gevaarlik wees om dit te ignoreer,” het Mogoeng gesê.

Chinese aandele tuimel na paniekverkope

Aandele in China het Donderdagoggend tot ‘n vier maande laagtepunt getuimel.

Chinese aandele het in ‘n stadium met meer as agt persent gedaal ondanks pogings deur reguleerders om die mark te stabiliseer. Die Shanghai-indeks het vroeër reeds met sewe punte gesak.

Paniek op Chinese aandelebeurse het markte in Hong Kong getref wat vier persent laer is.

Bykans die helfte van genoteerde Chinese maatskappye het handel opgeskort om hulself teen skerp dalings te beskerm.

Chinese maatskappye in die buiteland het ook gedaal.

Beleggers vrees dat die onbestendige Chinese mark die ekonomie omver kan werp en dat dit ‘n groter risiko inhou as die Griekse krisis in die Eurosone.

Die onafhanklike strateeg en raadgewer van beursverhandelde fondse, Nerina Visser, het aan RSG gesê die JSE sal goed gemonitor word.

Aandele reguleerders sê die tuimelende aandelemark van die tweede grootste ekonomie in die wêreld is op die oomblik paniekerig.

Beleggers ignoreer ondersteuningsmaatreëls wat Beijing ingestel het.

Die Volksbank van China het gesê hulle sal stappe neem om makelaars wat aandele ondersteun te help.

Batebestuurders sê owerhede moet die blaam moet dra vir die ineenstorting van die Chinese aandelebeurs in Sjanghai.

‘n Batebestuurder van Ample Capital in Hong Kong, Alex Wong, het aan RSG gesê die regering het nie net misluk om die mark te stabiliseer nie, maar ook paniek aangeblaas.

Meer as ‘n derde van genoteerde maatskappye het in Sjanghai handel opgeskort en in Shenzhen meer as die helfte van die genoteerde maatskappye.

Dit beteken dat meer as 1300 maatskappye by die onderskeie Chinese beurse handel opgeskort het.

Nigerië gaan gebuk onder vlaag van bomaanvalle

Nigerië se nasionale noodbestuursagentskap het Maandag bekendgemaak dat minstens 44 mense dood en 47 beseer is toe twee bomme by onderskeidelik ‘n inkopiesentrum en gewilde moskee in die stad, Jos ontplof het.

Niemand het onmiddellik aanspreeklikheid vir die voorvalle aanvaar nie, maar die godsdiens-verdeelde stad, Jos, is voorheen ook deur Islamitiese militante geteiken, het AFP berig.

Die Plateau-staat, waarvan Jos die hoofstad is, lê op die skeidslyn van Nigerië se hoofsaaklik Christelike suide en Moslem noorde, en het die afgelope dekade golwe van sektariese geweld ervaar wat duisende menselewens geëis het.

Boko Haram het sy aanvalle in die noorde van Nigerië sedert die inhuldiging van pres. Muhammadu Buhari op 29 Mei verskerp met verskeie aanvalle, ontploffings en selfmoordbomaanvalle wat uitgevoer is.

Met die jongste sterftes staan die dodetal nou reeds op meer as 500 mense.

Sondag het ‘n selfmoordbomaanvaller haar binne ‘n kerk in die stad, Potiskum, in die Yobe-staat in die noordooste van Nigerië opgeblaas en vyf kerkgangers is in die aanval dood.

Verlede week het Islamitiese vegters ‘n aantal nedersettings in die omgewing van die Tsjad-meer aangeval en meer as 150 vermoor wat in moskees met gebede besig was.

‘n Jong vrou het haarself Woensdagnag naby ‘n moskee in Kano in Nigerië opgeblaas.

Die polisie sê haar teiken was vermoedelik die Umar al-Khattab-moskee. Niemand anders is dood of beseer nie.

Die militante groep Boko Haram het die afgelope ruk ‘n vlaag aanvalle in die gebied uitgevoer met minstens 250 mense wat omgekom het.