Karin Roodt – Bladsy 96

Pa sterf in kamer, gesinslede in hof

Twee swart susters en ‘n broer het Dinsdag op aanklagte van moord, ontvoering en regsverydeling in die Atteridgeville-landdroshof verskyn.

Samuel, Regina en Lillian Malatji het na bewering hul pa, Benedict Malatji (80), en hul kleinneefs, Kentridge Malatji en Thabo Malatji, twee jaar lank in ‘n kamer toegesluit, sê kapt. Bonginkosi Msimango.

Die drie is Maandagaand in hegtenis geneem.

“Kentridge kon daarin slaag om te ontsnap en het die saak by die polisie aangemeld, waarna polisiebeamptes hom na die huis begelei het,” sê Msimango.

Die polisiebeamptes het op Benedict Malatji se ontbinde lyk afgekom.

“Die jonger seun, Thabo, is by sy oupa gevind. Hy is na ‘n hospitaal geneem vir traumabehandeling,” sê Msimango.

Die twee susters het gebid toe polisiebeamptes op hulle afgekom het en hul broer het onder ‘n bed weggekruip.

Die drie word voorlopig aangehou tot 16 September wanneer hulle in die hof sal verskyn in ‘n borgtogaansoek. – Sapa

Meeste staatsdepartemente voldoen nie aan diensleweringsvereistes nie

Sowat 80% van regeringsdepartemente voldoen nie aan die vereistes vir dienslewering nie, toon ‘n verslag wat Woensdag deur Collins Chabane, minister in die presidensie, uitgereik is.

“Dis ‘n teenstrydigheid, aangesien die verbetering van dienslewering ‘n prioriteit van die regering is,” het die Management Performance Assessment Tool (MPAT) bevind.

Die verslag, wat oor die 2012/13-boekjaar die stand van bestuurspraktyke in die staatsdiens meet, sluit die assessering van al 156 nasionale en provinsiale departemente in.

Die bevindings is bestempel as “geloofwaardig” en dat dit ‘n taamlik “akkurate prentjie skets van die stand van bestuurspraktyke in alle departemente”.

Chabane, wat verantwoordelik is vir prestasiemonitering en evaluering, het in die parlement aan joernaliste gesê die departemente se bestuurspraktyke is gemeet aan 29 “generiese bestuurstandaarde”.

Die departemente wat die beste gevaar het, is wetenskap en tegnologie, handel en nywerheid, omgewingsake, die nasionale tesourie en die regering se kommunikasie- en inligtingstelsel (GCIS).

Die drie departemente wat die swakste gevaar het, was waterwese, openbare werke en heel onder aan die lys, die departement van vroue, kinders en mense met gestremdhede. – Sapa

Snowden vir die Sakharov-prys vir vryheid van spraak benoem

Edward Snowden, die fluitjieblaser wat die VSA se omvattende spioenasieprogram blootgelê het, is Woensdag benoem vir die parlement van die Europese Unie se jaarlikse Sakharov-prys vir vryheid van spraak.

Die 30-jarige Snowden het aansoek gedoen om asiel in Rusland nadat hy weke in die transitodeel van Moskou se lughawe moes deurbring waar hy uit Hong Kong aangeland het na sy plofbare onthullings wêreldnuus geraak het.

Die wenner van die prys word in Oktober aangewys.

Oudpres. Nelson Mandela en dr. Kofi Anan, voormalige sekretaris-generaal van die Verenigde Nasies, is vorige wenners. – AP

Kya Sands kalm na oproer

Die Kya Sands-lokasie in die noorde van Johannesburg is kalm nadat inwoners in die gebied Woensdag oproerig geraak het.

“Dit is vanoggend kalm, maar beamptes monitor die gebied,” het hoofsupt. Wayne Minnaar, woordvoerder van die Johannesburgse metropolisie, gesê.

Inwoners het Woensdag die Malibongwe-rylaan naby Cosmo City met klippe en brandende voorwerpe versper.

Die pad is weer oopgestel vir verkeer, het Minnaar gesê.

Kapt. Lydia Mtila-Dikolomela, polisiewoordvoerder, het gesê die inwoners het betoog oor behuising nadat twee mense Sondag in ‘n brand gesterf het. Altesaam 50 plakkershutte is in die brand verwoes. – Sapa

Afriforum wil petisie aan VN oorhandig oor plaasmoorde

Die burgerregte-organisasie AfriForum en die families van plaasmoord-slagoffers wil ‘n petisie aan die Verenigde Nasies oorhandig om die minister van polisie te dwing om op te tree.

“AfriForum het vandag [Woensdag] ‘n petisie begin vir die prioritisering van plaasmoorde,” sê Ernst Roets, adjunkhoof van AfriForum, in ‘n verklaring.

“Die petisie sal in November vanjaar aan die VN se forum vir minderheidskwessies voorgelê word.”

Roets sê die petisie sal op 1 November sluit, waarna die finale voorbereiding vir AfriForum se deelname aan die forum sal begin. – Sapa

Obama probeer Kongres oorreed om Sirië te bombardeer

Amerika se president Barack Obama het die Amerikaanse Kongres gevra om die stemmery vir goedkeuring om militêre aanvalle op Sirië te loods, uit te stel.

Obama sal nie die nodige steun vir sy aanvalsplan in die Kongres kry nie. Sen. John McCain (R-Ariz.) en Sen. Lindsey Graham (R-S.C.) het naarstiglik probeer om die aanval te regverdig.

Die Guardian het vroeër onthul dat McCain omkoopgeld van superryk bankiers, die Rothschilds aanvaar het.

Die Amerikaanse president het gesê die uitstel “sal aan Rusland kans te gee om Damaskus te oorreed om sy chemiese wapens te oorhandig”. Damaskus het reeds ingestem.

Die voorsitter van die Senaatskomitee vir gewapende optrede – Carl Levin – sê Obama wil Sirië en Rusland daarop wys dat hy ernstig is oor die chemiese wapenkwessie.

Die Senaat het Dinsdagaand met debatvoering begin ter ondersteuning van Obama se aanvalsplan. Die Senatore wat die aanval steun kry meer as 80% van hul skenkings van militêre kontrakteurs.

Obama het intussen weereens argumente probeer vind om optrede teen die Siriese regering te regverdig.

Hy het in ‘n toespraak wat regstreeks op Amerikaanse televisie gelewer is, benadruk dat die Siriese regering ongetwyfeld vir die chemiese aanval op Siriese burgers verantwoordelik is. Die VSA beweer dat die bewyse “logiese afgelei” kan word.

Amerika beskik oor geen vaste bewyse dat Sirië vir die gifgasaanval verantwoordelik is nie. Rusland het intussen gesê dat bewyse gevind is dat die beeldmateriaal wat die Withuis gebruik, vervals is.

Twee Europese joernaliste van twee afsonderlike gesaghebbende koerante, ‘n Belg Pierre Piccinin en Italianer Domenico Quirico, bevestig dat die Amerikaans-gesteunde rebelle vir die gifgasaanval verantwoordelik is.

Die Amerikaanse president het in sy toespraak, onder andere, gesê dat “ander tiranne” ook moontlik gifgasse sal aanwend indien die VSA niks omtrent Sirië doen nie. Amerika het ‘n aantal jare gelede die grootste gifgasaanval ooit in die Midde-Ooste teen duisende Koerdiese burgerlikes gesteun.

Hy sê ook dat al-Kaida bemoediging uit die wêreld se daadloosheid sal put. Dié opmerking het vir heelwat verbasing gesorg, aangesien die VSA al-Kaida in Sirië aktief oplei, bewapen en finansieel steun.

Obama se toespraak kom te midde van toenemende internasionale verdeeldheid oor en druk op die VSA om af te sien van die voorgestelde bombardement van Sirië. Frankryk het skielik hul ywerige steun teruggetrek.

‘n Vergadering deur die Verenigde Nasies Veiligheidsraad is ter elfder ure afgestel, nadat Rusland sy versoek om ‘n sessie onttrek het.

SA, VK bespreek ontwikkelingshulp en visumvereistes

Suid-Afrika en Brittanje het gesprek gevoer oor Britse visum-vereistes.

Die Britse minister van buitelandse sake – William Hague – sê hulle neem kennis van die vordering wat in Suid-Afrika gemaak word en wil hul samewerking vergroot as Suid-Afrika beter beheer toepas oor reisigers.

Britse visum-vereistes is in 2008 ingestel weens die groot aantal vervalsings wat in Suid-Afrika voorgekom het.

Die minister van internasionale betrekkinge – Maite Nkoana-Mashabane sê sy het goeie terugvoering gekry van immigrasie-amptenare.

Oor ontwikkelingshulp aan Suid-Afrika, het die Britse minister van internasionale ontwikkeling – Justine Greening – in Pretoria met die minister van finansies – Pravin Gordhan – vergader.

Brittanje het in April aangekondig dat direkte hulp aan Suid-Afrika teen 2015 sal eindig.

Die visumvereiste, sowel as Brittanje se onlangse aankondiging dat hulle direkte ontwikkelingshulp aan Suid-Afrika sal staak, was die twee belangrikste kwessies op die agenda van die 10de Bilaterale Forum tussen die twee lande in Kaapstad Dinsdag.

Suid-Afrikaners kon voorheen na die Verenigde Koninkryk sonder visums reis. Maar die Verenigde Koninkryk het ‘n visumvereiste vir Suid-Afrikaanse paspoorthouers in Maart 2009 ingestel.

SAUK blaas R1.5 miljard

Finansiële wanbestuur by die SAUK saai verwoesting, met sy jongste jaarverslag wat toon dat versuim is om voldoende rekenskap te gee vir R1.5–miljard wat bestee is aan konsultante.

Dié dienste kon ewe maklik deur sy eie personeel verskaf word.

Suid-Afrikaners sal voorts geskok wees om te verneem dat sowat R913 miljoen se TV-lisensiegelde wat SAUK-amptenare beweer ingesamel is, nie gerugsteun kan word met bewyse nie.

Tydens die tertafellegging van die openbare uitsaaier se jaarverslag, het die minister van kommunikasie, Yunus Carrim gesê die Ouditeur-generaal, Terence Nombembe, kon nie die uitsaaier finansiële resultate afteken nie weens ‘n gebrek aan “genoeg [en] toepaslike ouditbewyse“.

Die jongste oudit dui daarop dat die uitsaaier se skoon oudit in die 2011-2012 finansiële jaar iets van die verlede is.

Die lang lys van finansiële oortredinge ontbloot by die SAUK, sluit in:

Geen ondersteunende dokumente vir die aanstelling van konsultante en ander diensverskaffers teen ‘n koste van R1.5 miljard nie;
‘n Verdere R106 miljoen is spandeer sonder behoorlike tenderprosedures;
Belasting betaalbaar aan die Suid-Afrikaanse Inkomstediens is onderskat met meer as R47 miljoen;
Geen voorsiening is gemaak vir enige finansiële verpligting wat die SAUK kan aangaan ten spyte daarvan dat hy ‘n verweerder in ‘n aantal van regsgedinge is.

Die onthullings beteken niks goeds vir die uitsaaier nie. Die uitvoerende bestuur is opdrag gegee om in 2009 sy finansiële beheer op te knap nadat ‘n R1.4–miljard–lening, gewaarborg deur die Nasionale Tesourie, aan hulle toegestaan is.

In die jaarverslag, het die SAUK se uitvoerende hoof Lulama Mokhobo erken dat die uitsaaier misluk het om die prestasieteikens van die regering se leningswaarborg te haal. Sy het gesê die korporasie is meer as R600 miljoen onder sy inkomsteteikens.

Dit is glo net sepies soos Generations, waaruit die SAUK geld verdien. Dit is aangewys as die sepie met die meeste kykers en word deur baie meer as 4,9 miljoen mense daagliks gesien. Steve Hofmeyer het vir die temamusiek gesorg.

Dit is ook die eerste TV-reeks in Suid-Afrika wat dmv vennootskappe met maatskappye hul produkte en dienste as deel van die verhaal adverteer. Dit word gedoen op ‘n wyse waar hierdie vennote in die verhaalteks ingesluit word.

Die drie Suid-Afrikaanse maatskappye is Pep Stores, Capitec Bank en Smart Gym.

Jeugliga sonder geld bied verskonings aan

Die ANC-jeugliga het Dinsdag om verskoning gevra aan almal wat hy in die verlede verontreg en beledig het.

“Dit is belangrik dat ons op die spesiale geleentheid ’n openbare verskoning rig aan almal wat deur die organisasie verontreg en beledig is,” het Mzwandile Masina, tussentydse president en sameroeper van die liga se nasionale taakspan (NTT), gesê.

Masina het ’n toespraak gelewer op die 69ste herdenking van die jeugliga in Johannesburg.

“Die ANC bevind homself in die hof as gevolg van ons optrede. Onlangs het ons ’n saak verloor teen ’n joernalis van The Star, wat deur ons organisasie ’n dronkaard genoem is.”

Hy het gesê die jeugliga het nie geld om die joernalis te betaal nie, maar kan slegs ’n “opregte verskoning” aanbied.

Masina het ’n beroep op lede gedoen om nie “roekelose stellings” namens die jeugliga te maak nie. – Sapa

ANC woedend oor Goldfields-bewerings

Die ANC het Dinsdag gesê die Mail & Guardian moet sy storie onttrek oor Baleka Mbete, ANC-voorsitter, wat na bewering deur Gold Fields omgekoop is en haar en die party om verskoning vra.

“In hul gretigheid om die nasionale voorsitter en die ANC te diskrediteer, het die koerant ’n swak, ongegronde storie gepubliseer,” het die regerende party in ’n verklaring gesê.

“Die Mail & Guardian gebruik opsetlik die opskrif [‘Gold Fields bribed ANC Chair’] met die bedoeling om sensasioneel, lasterlik en beledigend te wees.”

Stefaans Brummer, een van die joernaliste wat die storie geskryf het, het die ANC-verklaring as “heeltemal oordrewe” beskryf.

“Ons staan by ons storie, wat duidelik in die openbare belang was.”

’n New Yorkse regsfirma het bevind dat ’n aandeletoekenning van R25 miljoen aan Mbete neerkom op omkopery. Die koerant het berig dat Gold Fields dié bevinding onder die mat gevee het.

Die regsfirma, wat deur Gold Fields aangestel is, het bevind dat Mbete se aandeel in ’n omstrede bemagtigingstransaksie in 2010 vergroot is ná ’n beweerde dreigement deur haar verteenwoordiger. – Sapa

Oortreder aan die brand gesteek in Mpumalanga

‘n Swart man is in ‘n kritieke toestand in die hospitaal Dinsdag opgeneem, nadat hy aan die brand gesteek is in ‘n voorval van bende-geregtigheid in Siyabuswa, Mpumalanga polisie gesê.

Brigadier Selvy Mohlala het gesê ‘n groep mense het die man gevang en hom vasgebind aan ‘n boom Saterdag.

Hulle het hom met vullis sakke bedek, paraffien oor hom uitgegooi en hom aan die brand gesteek.

“Die man is gered deur die polisie nadat hulle inligting ontvang het van bekommerde lede van die gemeenskap.“

‘n Klag van poging tot moord is geopen. Niemand is nog in hegtenis geneem nie.

Mohlala het gesê inwoners moet nie die reg in eie hande neem nie.

“Die optrede van individue wat die wet in eie hande neem word gedefinieer as krimineel en ons waarsku die oortreders van vigilantisme om te stop … met hierdie grusame en onwettige daad.

“Wanneer misdaad gepleeg word, is die wetlike beginsel om te begin deur die polisie te ontbied om na die toneel te kom,” het hy gesê. – Sapa

Moord: Ethiopiër in spazawinkel doodgebrand

‘n Dertigjarige Ethiopiër van Pietermaritzburg het in sy spazawinkel doodgebrand.

Die polisie in KwaZulu-Natal het ‘n saak van moord en opsetlike brandstigting geopen ná die dood van die buitelander.

Die man het glo wag gehou by sy winkel om sy voorraad te beskerm, toe die winkel aan die brand gesteek is. Hy is tussen die vlamme en sy diefwering vasgekeer en het doodgebrand.

Die polisiewoordvoerder in die provinsie, Thulani Zwane sê ‘n leë plastiekhouer, met brandstof daarin, is buite die voordeur van die winkel gevind.

Niemand is nog ivm die voorval in hegtenis geneem nie.

Die Kwazulu-Natalse provinsiale regering het ‘n Raad teen Misdaad aangestel in ‘n poging om die stryd teen misdaad in die provinsie te versterk, en verskeie projekte in die provinsie te koördineer, het RSG berig.

Regeringsamptenare, tradisionele leiers, sakelui, georganiseerde arbeid en gemeenskapsorganisasies het in Durban byeengekom vir die bekendstelling van die Raad.

Die Raad sal strategiese advies en leiding verskaf om die doeltreffendheid van die stryd teen misdaad te verhoog.

Die Raad sal ook die vordering monitor en die proses hersien.

Die LUR vir Veiligheid en Sekerheid Willie Mchunu en die provinsiale polisiekommissaris Mammunye Ngobeni het die bekendstelling bygewoon. – Sapa

Ondersoek beweerde SEB-gekonkel by Goldfields vra VF+

Bewerings van korrupsie by die goudmynmaatskappy Goldfields rondom Swart Ekonomiese Bemagtiging (SEB) moet oopgevlek word en die Vryheidsfront Plus gaan die Valke versoek om die bewerings te ondersoek en skuldiges voor die hof te bring, sê adv. Anton Alberts, die Vryheidsfront Plus se parlementêre woordvoerder oor handel en nywerheid.

Luidens onlangse mediaberigte het Goldfields se direksie besluit om nie die aanbevelings van ’n onafhanklike ondersoek na ‘n bemagtigingstransaksie in 2010 verder te voer nie.

Die bevindings van ‘n onafhanklike ondersoek van ’n Amerikaanse firma, Paul Weiss, gaan ook nie in ’n amptelike verslag van die maatskappy opgeteken word nie.

Dr. Mamphela Ramphele, voormalige voorsitter van Goldfields, het vroeër vanjaar gesê die regering het ’n lys van voorgestelde kandidate vir dié bemagtigingsaksie in Goldfields se ‘kele afgedruk’.

Adv. Alberts sê dit onderstreep net weer dat SEB niks anders is nie as ‘ideologiese snert’ wat toegang tot die regering se geldtrog verseker en net dieselfde magtige en bemagtigde mense oor en oor en op korruptiewe wyse verryk onder die dekmantel van ‘bemagtiging’.

“SEB is bloot ‘n rookskerm om die staatskas te plunder en die VF Plus gaan die Valke versoek om ondersoek instel na die transaksie. Indien daar korrupsie was, moet die betrokkenes vervolg word,” sê adv. Alberts.

Die lys van voorgestelde kandidate wat die regering glo aan Goldfields voorgelê het vir die bemagtiging, het gekom toe Goldfields die mynregte bekom het vir South Deep, die groep se mees winsgewende Suid-Afrikaanse mynboubate.

Luidens berigte het dit meer as 70 bevoordeeldes ingesluit, van pres. Jacob Zuma se prokureur tot Baleka Mbete, ANC-voorsitter, asook Zindzi Mandela en ’n dogter van ’n voormalige ANC-lid van die parlementêre portefeuljekomitee oor minerale. Die waarde van die SEB-transaksie was sowat R2,1 miljard.

“Wat hier gebeur wys ook opnuut waarom Suid-Afrika nie begerig is om die Europese Unie se lidlande as handelsvennote te omarm nie. Sonder ‘n wakende oog kan die geplunder in die naam van bemagtiging na hartelus plaasvind en onder die mat ingevee word.

“In hierdie geval sal die VF Plus sorg dat dit nie gebeur nie en sal toesien dat die bewerings ondersoek word,” sê adv. Alberts.

DA sweep swartes op oor grond

“Die Demokratiese Alliansie (DA) se Mmusi Maimane se stelling dat die DA grondhervorming ondersteun want “..die euwels van die apartheidstelsel het die beste grond slegs vir wittes gereserveer” dui op opportunisme en dat wittes geteiken word as sondebokke.

Die DA speel nou net soos die ANC die rassekaart oor grond,” sê mnr. Pieter Groenewald, die VF Plus se parlementêre woordvoerder oor landelike ontwikkeling en grondhervorming.

“Eerstens is dit onverantwoordelik om emosies rondom grondhervorming op te jaag op die basis van ras.

Tweedens is van die beste landbougrond in Suid-Afrika in die destydse Transkei en Bophuthatswana geleë.

Selfs die grondoudit deur die landmeter-generaal wat onlangs deur die kabinet aanvaar is, kon nie verklaar hoeveel grond behoort aan wittes of swartes nie.

Die DA probeer nou die ANC oorbie om emosies oor grond op te jaag om stemme te werf vir die 2014-verkiesing. Dit skep polarisasie tussen swart en wit en die Vryheidsfront Plus veroordeel dit,” het Groenewald gesê.