Die ondersoek na ses mense wat na bewering deur inwoners van Khutsong aan die brand gesteek is, duur voort, het die polisie in Gauteng gesê.
Brig. Neville Malila, polisiewoordvoerder, het gesê niemand is teen 18:30 Maandagaand in hegtenis geneem in verband met die misdade wat Sondag plaasgevind het nie.
“Ons doen steeds ‘n beroep op inwoners om na vore te tree met inligting.”
‘n Sterk polisieteenwoordigheid word in die gebied gehandhaaf, maar die situasie is kalm.
Vyf mense, onder wie ‘n toordokter, het Sondag gesterf. Dít nadat sowat 400 mans, vermoedelik inwoners van Khutsong, ‘n vergadering gehou het om bende-aktiwiteite in die gebied te bespreek.
Malila het gesê een van die groepe het na ‘n huis gegaan, waar hulle ‘n 61-jarige tradisionele geneser aangeval en hom en sy huis aan die brand gesteek het. Die man het op die toneel gesterf.
Ander groepe wat die vergadering bygewoon het, het na ander gebiede gegaan, waar twee jong mans, wat glo bendelede is, aangerand en aan die brand gesteek is. Hulle het ook op die toneel gesterf.
Malila het gesê in Extension Five, Carletonville, het die groepe verskeie mense, wat hulle gedink het bendelede is, aangerand.
“Twee vermeende bendelede is gestenig. Een van hulle het op die toneel gesterf en die ander een in die hospitaal.
‘n Sesde persoon se lyk is Sondagaand gevind, hy is aan die brand gesteek.
Vier van die ses lyke is geïdentifiseer as James Magagula (61), Mojalefa Maleho (23), Makume Makume en Akhona Ngwati.
Malila het Dinsdag gesê die name van die ander twee mans wat gesterf het, is nog nie bekend gemaak nie. – Sapa
Die regering van die Demokratiese Republiek van die Kongo het Dinsdag aangekondig dat hy ‘n “totale oorwinning” oor die M23-rebellebeweging behaal het.
“Die laaste elemente van die M23 het onder druk van die Kongolese weermag (FARDC) hul posisies in Runyonyi en Chanzu verlaat,” het die land se minister van kommunikasie in ‘n SMS-boodskap aan die nuusagentskap AFP gesê.
Die minister het verwys na twee posisies sowat 80 km noord van die stad Goma. – Sapa/AFP
Bewerings van liggame wat by die Charlotte Maxeke Akademiese Hospitaal in Johannesburg verkoop word, word ondersoek.
‘n Woordvoerder van die Gautengse Departement van Gesondheid, Hope Papo, sê hulle beskou die bewerings in ‘n ernstige lig.
Die ondersoek volg na bewerings dat minstens een liggaam vir 800 rand aan ‘n begrafnisondernemer verkoop is.
Die Departement het ook gehoor dat hospitaalamptenare onwettig in besit is van stempels van ondernemers, en dat nog ‘n liggaam sonder die familie se toestemming uit die hospitaal se lykshuis aan ‘n ondernemer verskaf is.
Papo sê drie mense wat by die saak betrek word, is van hulle pligte onthef. – RSG
Afrika-leiers oorweeg ‘n groot vredesending na die Demokratiese Republiek van die Kongo om rebelle op die agtervoet te dwing.
Afrikaleiers het die moontlikheid om die VN-mag in die DRK te versterk bespreek te midde van rebelle wat terugveg om beheer oor hul vestings te behou.
President Jacob Zuma het tydens die opening van die SAOG-beraad in Pretoria ‘n beroep op Afrikaleiers gedoen om alles moontlik te doen om vrede en stabiliteit in die DRK te herstel.
‘n VN-mag van 3.000 soldate van Malawi, Suid-Afrika en Tanzanië het vroeër aangesluit by 17.000 vredesmagsoldate wat reeds in die land ontplooi is.
Die brigade was Maandag vir die eerste keer in ‘n kontak met die M23 in ‘n poging om die rebelle uit hul vestings te verdryf.
President Zuma het tydens sy openingstoespraak beklemtoon dat hoewel die DRK en Grootmere-gebied ryk is aan minerale, kan die mense van die streek nie voordeel trek uit die minerale hulpbronne nie.
Ander streekleiers wat die beraad bywoon sluit in president Robert Mugabe van Zimbabwe, Yoweri Museveni van Oeganda en die Malawiese president, Joyce Banda wat ook tans voorsitter van die SAOG is.
President Jacob Zuma tree as gasheer vir die leiers van die 15 lande in die Suider-Afrikaanse Ontwikkelingsgemeenskap in Pretoria op.
Verskeie lande, insluitend Suid-Afrika, het bygedra tot die troepe vir ‘n spesiale VN-ingrypingsbrigade wat ‘n offensiewe mandaat het om saam met die Kongolese weermag die M23 -rebelle na die gesprekstafel te dwing.
“Die vergadering is ‘n finale koördineringsvergadering tussen die SAOG en die Groot Mere-lande,” sê Martin Rupiya, uitvoerende direkteur van die Afrika se Openbare Beleids- en Navorsingsinstituut .
“Hulle dink M23 is op die rotse,” sê Rupiya. “Die belangrikste agenda is om die ondersteuning vir M23 uit te roei.”
Maar, sê Trevor Maisiri, ‘n senior ontleder by die International Crisis Group, die M23-rebelle is net een van vele gewapende rebellegroepe in die streek.
“Ons gaan ander uitbarstings sien ‘n paar weke van nou af,” het Maisiri gesê.
Duitsland is uit die veld geslaan dat hulle moeite om Suid-Afrika te “bevry” nie waardeer word deur die ANC nie.
Jürgen Erich Schrempp, die HUB van Daimler-Benz, en een van Transnet se direkteure, was een van die ANC se grootste ondersteuners. Sy sakevernuf om die Duitse en Amerikaanse motormark saam te smelt het hom egter in die steek gelaat en dit het op ‘n totale mislukking uitgeloop.
Dit lyk asof Duitsland se verhouding met die ANC op dieselfde koers is.
Die nuwe Wet op die Bevordering en Beskerming van Beleggers sal die ANC-regering die mag gee om Duitse bates van eensydig te vervreem.
Die wet is verlede Vrydag in die staatskoerant gepubliseer ten spyte van hewige Europese kritiek. Beleggers is feitlik tans van alle beskerming ontneem vir sover dit bilaterale handelsverdrae aangaan.
Die wet bied gebrekkige beskerming aan huidige beleggers sowel as voornemende beleggers wat die land se ekonomie verder kan knou.
Verhoudinge met die Europese Unie wil nie vlot sedert Suid-Afrika onlangs sy handelsverdrae met België ongedaan gemaak het nie ten spyte van beleggings van miljarde rande.
Drie van die seerste knelpunte is dat indien buitelandse ondernemers van hul bates vervreem word of benadeel word, hulle hulself nie op internasionale bemiddeling en arbitrasie sal kan beroep nie.
Vergoeding met onteiening vereis nie dat markwaarde oorweeg word nie en geen billikheidsbeginsel met vergoeding – wat voorheen in handelsverdrae gewaarborg is – sal in toekomstige verdrae vasgelê word nie.
Kennelik het die wet nou die pad voorberei om beleggers se bates te kan opeis sonder vergoeding wat aan markwaarde gekoppel is.
Die Duitse ambassadeur in Suid-Afrika, dr. Horst Freitag, het gesê Duitsland en Duitse beleggers deel hul diepe pessimisme dat die ANC bilaterale handelsooreenkomste met ‘n sekere onverskillige argeloosheid bejeën.
Douglas Gibson, voormalige DA-politikus en ambassadeur na Thailand het ‘n kwalik bedekte aanval op Afrikaners geloods deur lesers van The Citizen te vertel hoe “verregses” se versugting om Steve Hofmeyr as die nuwe Moses te sien, niks sal oplewer nie.
Volgens Gibson sal geen nuwe charismatiese leier Afrikaners kan lei na die nuwe beloofde land nie, aangesien selfbeskikking binne ‘n Konfederasie nie haalbaar is nie.
In sy pleidooi om Steve Hofmeyr af te kraak en die Vryheidsfront Plus se beeld as ‘n sterwende party wat bestaan uit ‘n paar professionele politici, te red, sê Gibson Hofmeyr se Rooi Oktober-beweging sal niks oplewer nie, ten spyte van baie wye mediadekking.
Hofmeyr, sê Gibson, het ‘n interessante geskiedenis. Hy was op skool saam met sy pa, ook Steve, en saam met sy oom, Danny de Waal. Generaal Louis Botha, die eerste Eerste Minister van die Unie van Suid-Afrika, was hul grootoupa, en Helen de Waal, Louis Botha se dogter, was hul ouma .
Sy was ‘n merkwaardige matriarg en die Verenigde Party se staatmaker. Die Suid-Afrikaanse Party van destyds onder Botha wou Afrikaners en Engelssprekende wit Suid- Afrikaners saamsnoer teen die Nasionale Party.
Gibson ken nie sy geskiedenis nie. Hy vergeet gerieflikheidshalwe dat Hofmeyr se gelyknamige voorsaat ook die Ossewabrandwag se Stormjaers onder Britse invloed uitgelei het. Wat as ‘n “uitlaatklep” moes dien vir anti-Britse sentiment, het vinnig onder Hofmeyr se leierskap tot ‘n gedugte nasionalistiese voorhoede gelei.
Die Vaderland se eerste sportredakteur was sekerlik een van die merkwaardigste.
Nie net het hy die Universiteit van Oxford in 1930 in die Intervarsity teen Cambridge op die rugbyveld aangevoer nie, hy was ook die owerste van die Ossewa-Brandwag se paramilitêre elitekorps, die Stormjaers, wat sabotasie tydens die Tweede Wêreldoorlog uitgevoer het.
Met sy Oxfordse agtergrond sou niemand dit kon dink nie. Hy het die perfekte dubbele lewe gelei deur vryelik in hoëre Engels-sprekende kringe te beweeg, terwyl hy terselfdertyd die bedrywighede van die Stormjaers gekoördineer het
Volgens Gibson slaag Hofmeyr nie soos Louis Botha daarin om dit te vermag nie, omdat hy “verhuis het na ‘n posisie aan die regterkant van ons politiek, tot so ‘n mate dat hy deur baie, regverdig of onregverdig, as ‘n rassis afgemaak word”.
Nietemin glo Gibson dat alhoewel jonger Afrikaners politiek verwerp as irrelevant, en belowe om weg te bly van die stembus, hulle waarskynlik vir die “rassis” Steve Hofmeyr sal stem, as hy staan.
Sal die VF + probeer om hom op hul verkiesingslys te sit en hom gebruik om hulself te red? Gibson dink nie Hofmeyr sal dit oorweeg nie aangesien Pieter Mulder se omhelsing van President Zuma noodlottig was.
Volgens Gibson is daar geen politieke voertuig meer vir die ondersteuners van Rooi Oktober nie.
‘n Konfederale staat is nie haalbaar nie, weens die tweederdemeerderheid wat ‘n wysiging van die Grondwet vereis in die parlement, en is wat Gibson betref onoorkombaar. Dit is des te meer onhaalbaar as regse kiesers die politieke proses boikot en wegbly van die stembus, sê hy.
Gibson troos homself dat die ondersteuning vir só ‘n siening klein is en die oorweldigende meerderheid van Afrikaanse kiesers sal voortgaan om vir die Demokratiese Alliansie te stem in plaas daarvan om “onbereikbare nonsens” na te jaag.
‘n President Steve Hofmeyr sal daar nie wees nie, belowe Gibson.
In die nasleep van Marikana, is die People’s War weer opgewarm en het nuwe stukrag verkry met buitelandse fortuinsoekers wat soos voorheen griewe vir die plaaslike swart bevolking skep, ook om te kan uitbuit. Dali Mpofu se aankondiging dat hy die ANC ná 33 jaar van lidmaatskap gaan verlaat, dui op die ver-linkse vloedgolf van geweld wat dreig om Suid-Afrika weereens soos in die tagtigerjare, te verswelg.
Mpofu, wat die Marikana-mynwerkers by die Farlam-Kommissie van Ondersoek verteenwoordig, het pas sy gewig agter Julius Malema se Ekonomiese Freedom Fighters (EFF) gegooi om die “armes” te help. Die armes is natuurlik nie wit nie.
Die DA doen ewe fluks mee aan die verwagting dat swart griewe gelug moet word met hulle aanhoudende romantisering van die “struggle”, ophemeling van terreurplegers en openlike steun vir anti-wit wetgewing. Waarksynlik is daar naïewelinge wat glo dat die DA ‘n beter “opposisie” verteenwoordig want die wit leier Zille sal nie wittes versaak nie. Hierbenewens het sy die ver-linkse woordeskat bemeester en huisvesting aan terroriste verskaf, dus is haar geloofwaardigheid by swartes as’t ware afbetaal.
Maar vir alle praktiese doeleindes is daar tans twee partye op die politieke toneel: ‘n swart een en ‘n swart een. En nie een van die twee swart partye is die DA nie.
Zille se blou barette kan nie kers vashou by twee ver-linkse swart partye nie, aangesien die aantal poste en posisies (lees: vergoeding) wat hulle aanbied nooit genoeg sal wees vir die groot aptyt wat die “armes” ontwikkel het nie.
Alhoewel die ANC dikbek is oor die EFF se sukses, kan hulle geen werklike kritiek daarteen monster nie, aangesien hulle met dieselfde gewelddadige metodes aan die mag gekom het. Om die oproer wat die EFF aanblaas te tem, het die regering straks nog ‘n paar magsinstrumente soos die polisie waarmee hulle met welslae sal kan onderhandel.
Daar is ongelukkig in die fynskrif van die DA, die “opposisie”, se beleid oor taal, regstellende aksie en swart ekonomiese bemagtiging nie veel wat wit inwoners tot optimisme kan stem nie. Hul dwepery oor Mandela sal allermins help om swart gemoedere te kalmeer.
Die stryd om watter swart party gaan wen, raak feller. Vandaar die onrustigheid onder swart kiesers wat toeneem. Maar soos ons almal wat Afrika-rassepolitiek verstaan, weet, sal samewerking tussen die ANC en EFF uiteindelik tot voordeel van albei wees. Dáár lê die politieke energie vir die verkiesing. Die Moeder van die Nasie, Winnie Madikizela-Mandela se goeie politieke instink het haar ook dié naweek genoop om Juju as die nuwe swart hoop aante prys.
In ANC-geledere word daar reeds heerlik gelag en grappe gemaak oor die ou Xhosa. In ‘n kultuur waar geskiedenis deur uiters vloeibare mondelinge oorlewering oorgedra word, gaan die “ikoon” van Anglo-Amerikaanse belange, Madiba, dit dalk nie as nastrewenswaardige voorbeeld vir swartes oorleef nie. Die dwepers moet in gedagte hou dat die naam Sol Plaatje vir die gemiddelde Diepslootbewoner vandag minder as niks beteken.
Mpofu en sy span het nie skielik besluit om Malema te ondersteun nie. Agter die skerms, vir maande nou al voor sy aankondiging dié naweek gemaak is, was hy besig om te help met pogings om linkse individue vir die strukture van die EFF te werf.
Die post-Marikana politieke landskap het soos Sharpeville nuwe politieke geleenthede vir rassepolitiek geskep. Dit sluit veral groepe soos die September Nasionale Imbizo’s (SNI) van Andile Mngxitama in.
Mngxitama se retoriese vaardighede oor swartheid, getooi in idees van sy wit Nederlandse ondersteuners en Westerse clichés, is duidelik in die EFF se aanslag sigbaar.
Suid-Afrika se platinumkrisis, noem sekere ontleders dit, maar by nadere ondersoek is dit die land se rassekrisis waaroor regse ontleders al jare lank waarsku. Die Marikana-slagting was hardhandige optrede deur die swart ANC-vise-president en sy kliënt, die NUM, teenoor ‘n swart aanspraakmakersunie Amcu. Maar die gelag sal uiteindelik deur wit Suid-Afrikaners betaal word. In die swart kultuur is daar nooit oorsaak en gevolg nie, maar ‘n eksterne agent, naamlik witheid.
Dat daar stygende anti-wit populêre steun is, is gewis.
Feit is dat verskeie ver-linkse, uitsluitlik swart groeperinge betrokke geraak het op alle vlakke. Sommige, soos die Demokratiese Sosialistiese Beweging, verskaf strategiese ondersteuning in die rol van stakings en ander is direk gemoeid met loononderhandelinge.
Die SNI het geen program tot voordeel van die massas nie en is suiwer ideologiese ondersteuning vir die EFF. Dit blyk nietemin ‘n uitstekende “arm, swart” samewerkingsmodel te wees.
Malema ontgin die diepe ontnugtering dat rykdom deur eie inisiatief geskep sal moet word, en nie deur diefstal en korrupsie nie. Die hernude klem wat die EFF op swart slagofferstatus plaas, vind oral byval, aangesien die swart massas se verwagtinge aangewakker word by gebrek aan lewering deur die ANC.
Dit is dus in die ANC se guns dat die ver-linkse beweging so goed op dreef kom, want dit steek hule eie verleentheid oor swak regering, diefstal en korrupsie soveel beter weg.
Die minister van staatsveiligheid, Siyabonga Cwele het gesê hy wil Suid-Afrikaners verseker dat die land nie aan die risiko van destabilisering deur terroriste blootgestel sal word nie.
Suid-Afrikaanse owerhede ondersoek nog hoe ‘n plaaslike paspoort verkry is deur Samantha Lewthwaite, die Britse vrou wat deur Interpol gesoek word sedert die terreuraanval in Nairobi, het die minister gesê.
“Ons ondersoeke duur voort en sodra ons gereed is sal ons ‘n verklaring maak,” het die minister van binnelandse sake, Naledi Pandor gesê op ‘n nuuskonferensie wat deur die Kabinet se veiligheidsgroepering in Pretoria gehou is.
Sy het bygevoeg dat owerhede intussen die “veiligheid met betrekking tot ons paspoort verbeter het”.
Dit sluit in “kontrole biometriese skakels na die agtergrond van mense wat hulle by ons kantore aanmeld.”
Lewthwaite, ook genoem die Wit Weduwee deur buitelandse media, het op ‘n Suid-Afrikaanse paspoort wat nie vervals is nie, gereis.
Dit is aan haar uitgereik in die naam van Natalie Faye Webb deur die departement van binnelandse sake .
Dit is nog nie duidelik of daar enige verband tussen Lewthwaite en Webb is en of laasgenoemde bloot ‘n slagoffer van identiteitsdiefstal was nie.
Interpol het Lewthwaite laat in September ná die aanval op Nairobi se Westgate Mall deur vermeende al-Shabaab militante, op ‘n internasionale lys van verdgates geplaas.
Daar is 72 mense gedood, maar dit is nie die finale dodetal nie.
Lewthwaite is die weduwee van Germaine Lindsay, een van die selfmoordbomaanvallers wat die openbare vervoerstelsel in Londen in Julie 2005 geteiken het.
Sy het Suid-Afrika op ‘n Suid -Afrikaanse paspoort in 2008 binnegekom, en dit gebruik tot 2011.
Dit het vrese laat ontstaan oor ‘n diplomatieke dooiepunt tussen Pretoria en Londen oor streng visumvereistes vir Suid-Afrikaners. – Sapa
Die voormalige Amerikaanse president Jimmy Carter het oudpres. Thabo Mbeki byna met die vuis toegetakel oor MIV/vigs-behandeling in Suid-Afrika, het die Sunday Times berig.
“Die eerste keer toe ek Kaapstad toe gekom het, het ek byna in ‘n vuisgeveg met die president van Suid-Afrika, Thabo Mbeki, betrokke geraak weens sy versuim om dié epidemie te takel, het Carter aan die Sondagkoerant gesê.
“Dit is die naaste wat ek gekom het om ‘n staatshoof aan die bors te gryp”.
Carter het gesê die rusie was oor Mbeki en die destydse minister van gesondheid, Manto Tshabalala-Msimang, se weiering om vigs te behandel.
In 1999 het Mbeki beweer dat die antiretrovirale middel AZT giftig is en het hy geweier om behandeling beskikbaar te stel ten spyte dat die Verenigde Nasies sy bystand aangebied het.
Carter het gesê hy en Bill Gates het Mbeki probeer oortuig om die antiretrovirale middel ten minste aan swanger vroue met vigs te gee, “maar Mbeki was daarteen gekant”. – Sapa
‘n Kleurlinglektor aan die Universiteit van Johannesburg het ‘n finale geskrewe waarskuwing ontvang nadat hy ‘n student met ‘n knuppel aangerand het.
Eyewitness News het beeldmateriaal van die voorval, wat in April by een van die ingange by die universiteit plaasgevind het, bekom.
Chris Fortuin, ‘n lektor aan die universiteit se departement sportwetenskap, beweer die student het by sy huis ingebreek, waarna hy, sy twee seuns en ‘n broerskind die man aangeval het.
Die student het ‘n kopwond opgedoen, maar wou nie ‘n saak by die polisie aanhangig maak nie.
Fortuin het nie ontken dat hy die student aangerand het nie, maar wou nie kommentaar lewer nie.
Die bestuur van die universiteit het gesê Fortuin is afgedank, maar het teen sy afdanking geappelleer.
Hy het toe ‘n finale geskrewe waarskuwing ontvang. Fortuin moet ook 100 uur gemeenskapdiens doen en die huis op die universiteit se perseel, waar hy en sy gesin woon, ontruim.
