Etiket: EFF

Malema se setel is veilig na SAID skielik onttrek

Julius Malema se setel in die parlement is veilig na SAID, in ‘n onverwagse wending, laat Maandag sy sekwestrasie-aansoek teen Malema laat vaar het.

Die Ekonomiese vryheidsvegters se leier is deur die Inkomstediens laat vervolg.

Die voorlopige sekwestrasiebevel, wat sedert Februarie verlede jaar reeds oor sy kop hang, is ook opgehef nadat die SAID-advokaat Nic Maritz gesê het hulle onttrek.

Geen redes is gegee aan regter Gregory Wright in die Noord-Gautengse Hooggeregshof nie, maar Maritz het gesê dit was nie ‘n “normale sekwestrasie” nie.

Vroeër het die hof verdaag om regsargumente te hoor.

Toe die hof hervat, het Maritz, tot die verbasing van die gepakte gallery, net gesê hy is aangeraai deur sy kliënt (SAID) om die aansoek, asook die voorlopige bevel wat vroeër toegestaan is, te onttrek.

Hy het geen verduideliking gegee nie en die partye het daarna geweier om met die media te praat.

Duisende teken petisie vir terugkeer na Europa

Die Europese Unie moet erken dat wit Suid-Afrikaners etniese suiwering in die gesig staar, volgens ‘n petisie wat aanlyn sirkuleer sedert Sondag, het News24 berig.

“Die wit Suid-Afrikaanse bevolking staar tans etniese suiwering en vervolgings aan die hand van die ANC-regering, die EFF en verskeie individuele anti-wit aanvallers in die gesig,” volgens Rodrigo de Campos Herhaus op die webwerf change.org. Hy kom glo van Brasilië.

Die webwerf maak voorsiening vir enigiemand om ‘n petisie oor enigiets te plaas waaroor hulle sterk voel.

Hy beweer hy skakel in Suid-Afrika met die regse groep Front Nasionaal. ‘n Woordvoerder van die Front Nasionaal was nie onmiddellik beskikbaar vir kommentaar nie.

Sowat 12 500 mense het die petisie teen Sondagmiddag gesteun.

“Meer as 4 000 wit boere is wreed vermoor, dikwels ook deur marteling en verkragting en verminking. Baie wit Suid-Afrikaners vandag leef in vuil armoede as ‘n gevolg van Swart Ekonomiese Bemagtiging, die ANC-regering se beleid wat blankes uitsluit van die arbeidsmag.

“Gegrond op beleid van die Israeliese regering dat al die Jode die reg het om terug te keer na Israel, glo ons dit is nie net raadsaam nie maar moreel verpligtend dat Europa moet toelaat dat alle wit Suid-Afrikaners die reg het om terug te keer.”

Hy het gesê baie wit Suid-Afrikaners wat probeer om aansoek te doen vir burgerskap na Europese lande word verwerp.

“Baie van hierdie wit Suid-Afrikaners wat burgerskap vra is direkte afstammelinge van die einste Europese volke wat hulle verwerp.”

Hy meen Nederland of die Verenigde Koninkryk is die twee lande waarvan die meeste wittes kom.

Dit sou ook van toepassing op wit mense in Zimbabwe en Namibië wees, “gegewe dat hulle ‘n soortgelyke situasie in die gesig staar.”

Volgens die koerant die Verenigde Koninkryk se Express: “Europa kan word deur wit Suid-Afrikaners oorspoel word wat glo hulle het ‘die reg om terug te keer na Europa'”.

Malema: Zuma deur duistere trusts befonds

Julius Malema, partyleier van die Ekonomiese Vryheidsvegters (EFF), het in ‘n beëdigde verklaring gesê hy het eerstehandse kennis van donateurs wat pres. Jacob Zuma deur duistere trustfondse gefinansier het, het ANA berig.

Die Sunday Times het berig dat Malema hierdie bewering verlede week in ‘n 83 bladsy-lange verklaring gemaak het. Die verklaring is in die hooggeregshof in Pretoria ingedien in die voortslepende regsgeding tussen Malema en die Suid-Afrikaanse Inkomstediens (SAID).

Volgens Malema het hy persoonlik geld vir Zuma by ANC-saamtrekke ingesamel van “ongeïdentifiseerde donateurs” voordat Zuma in 2009 president geword het. Hy het gesê dat daar geen verskil was tussen sy Ratang-familietrust, wat vir sy leefstyl betaal het, en Zuma se familietrusts nie.

“Formele trust-strukture is opgerig waarin donasies gemaak is – sommige groot, sommige klein – ter voordeel van die leiers. Ek het eerstehandse kennis hiervan; ek het donasies aan pres. Zuma hanteer,” het Malema gesê. “Ek is op dieselfde manier onderhou. Soms is geld net in my bankrekening inbetaal deur onbekende donateurs; soms het bekende ondersteuners my uitgawes betaal of geld, klere en ander lewensbenodighede en luukshede as geskenke gegee.”

Mac Maharaj, Zuma se woordvoerder, het ontken dat die president enige “geheime donasies” ontvang het. “Die president het voortdurend alle inkomste ontvang in sy belastingopgawe aan SAID verklaar,” het Maharaj gesê.

SAID het aansoek gedoen dat ‘n bevel van finale sekwestrasie teen Malema gebring word nadat ‘n skikkingsooreenkoms rakende sy uitstaande belastingrekening ineengestort het. Die saak sal in Junie in die hof aangehoor word.

Twee voor oor hulle beelde beskadig

‘n Een-en-twintig-jarige man sal vandag in die Johannesburgse landdroshof verskyn in verband met die beskadiging van die Mahatma Gandhi-standbeeld op Gandhi-plein in Johannesburg.

Die swart verdagte is Saterdag in hegtenis geneem. Die polisie het hom betrap terwyl hy die standbeeld met wit verf beskadig het.

Hy was deel van ‘n groep wat ANC-pette gedra het.

Hy het ook ‘n stuk karton by hom gehad waarop gestaan het dat die “rassistiese Gandhi moet val”. Hy sal van kwaadwillige saakbeskadiging aangekla word.

Volgens Gandhi was een van die groot prestasies in Suid-Afrika rasseskeiding deur te weier om ‘n poskantoordeur met swartes te deel.

Hy het in die Britse leër gedien en gretig deelgeneem aan die 1906-oorlog teen swart Zoeloes.

Gandhi het breedvoerig oor sy ervarings met swartes van Suid-Afrika geskryf en deurentyd na hulle as “kaffers” verwys, met ‘n diepgewortelde minagting vir die Afrika-inboorling.

In Pretoria sal ‘n swarte ook vandag in die hof verskyn nadat die standbeeld van Paul Kruger op Kerkplein vir ‘n tweede keer gevandaliseer is.

Dit is die tweede voorval van vandalisme by die standbeeld die afgelope twee weke.

Die verdagte was deel van ‘n EFF-bende die naweek by die standbeeld wat verf daarop uitgegooi het. Een persoon is in hegtenis geneem toe die groep weggehardloop het.

‘n Dag nadat ‘n standbeeld van die dominee en skrywer Andrew Murray gevandaliseer is in Wellington in die Wes-Kaap, het ‘n paar inwoners gesê hulle is nog steeds woedend oor die voorval.

Die standbeeld wat op die terrein van die Wellington NG Kerk opgerig is, is Vrydagnag besmeer met rooi verf.

Draaipunt vir samewerking tussen DA, EFF

Die leier van die opposisie, Helen Zille, sal uittree as leier van die DA.

Zille het Sondag op ’n dringende vergadering van die party se federale raad aangekondig sy gaan haarself nie beskikbaar stel vir nog ’n termyn as partyleier tydens die party se nasionale konferensie later vandeesmaand in Port Elizabeth nie.

Sy sou die enigste kandidaat as na­sionale leier gewees het. Met dié aankondiging wil die DA ‘n nuwe leier se beeld betyds vir die volgende verkiesing begin afstof.

Mmusi Maimane is die gunsteling om by Zille oor te neem.

Sy samewerking met die EFF in Februarie, toe albei partye saam pres. Jacob Zuma tydens die debat oor die staatsrede aangeval het, was klaarblyklik die draaipunt vir die swart siening van hom as nie net ‘n blote wit werktuig nie.

Zille het in 2007 by Tony Leon as DA-leier ­oorgeneem en dien sedert 2009 as Wes-Kaapse premier.

Dit blyk Zille sal aanbly as premier van die Wes-Kaap.

Alhoewel Zille beweer dat sy nie weer betrokke sal raak by interne leierskapkwessies nie, is dit bekend dat sy Maimane steun as haar opvolger.

Zille sê ouderdom is nie ter sprake nie, maar slegs dat die nuwe leier geskik vir die pos en voortreflik moet wees.

Die leier van die DA in die Oos-Kaap, Athol Trollip en Zille het in die verlede koppe gestamp toe sy vir Lindiwe Mazibuko as parlementêre leier bó Trollip aangewys het.

Trollip het haar destyds daarvan beskuldig dat sy ingemeng het by die party se demokratiese proses deur ‘n swarte aan te wys.

Die DA sukkel om swart kiesers te oortuig dat hulle nie ‘n wit party is nie.

Vrese oor grootskaalse grondbesetting in Kaapstad

Die wapenmaatskappy Denel het ‘n dringende interdik bekom teen verdere onwettige besettings van sy grond in Khayelitsha op die Kaapse Vlakte.

Plakkers sê egter hulle sal bly omdat hulle nêrens anders het om te gaan nie.

Die EFF het die grondbesettings vanaf Maandag 6 April aangemoedig, want dit word histories erken as die dag waarop Jan van Riebeeck in SA aangekom het. Die EFF sê die aankoms van Van Riebeeck in 1652 het “die begin van die Europese vernietiging in die vasteland” ingelei en 6 April is “‘n belangrike herinnering aan gronddiefstal en onteiening deur die Europeërs”.

Te midde van vrese dat grootskaalse grondbesettings Kaapstad hierdie week kan tref, het die Ekonomiese Vryheidsvegters (EFF) Maandag ‘n groep van sowat 100 plakker na ‘n stuk grond gelei om te beset in Khayelitsha aan die buitewyke van Kaapstad.

Vroeër Dinsdag het sommiges begin bosse aan die brand steek om meer ruimte te skep om hul plakkershutte te bou op die eiendom in privaatbesit.

Die EFF het Maandag ‘n beroep op alle hawelose mense gedoen om oop en onbesette grond te identifiseer en “betrokke te raak in die stryd om hul grondregte te herstel”.

Volgens die Stad Kaapstad, was daar twee plekke wat in Khayelitsha geraak word.

Die ander erf behoort aan die stad en is sedertdien skoongemaak.

Richard Bosman, Kaapstad se uitvoerende direkteur vir veiligheid en sekuriteit, het gister gesê dat die stad sal Denel help om die strukture te verwyder.

Die staatsbeheerde maatskappy het gesê hulle beroep hulself op ‘n uitsettingsbevel teen die onwettige besetters.

Denel het vroeër strafregtelike aanklagte teen die vermeende onwettige grondbesetters ingedien.

‘n Woordvoerder van Denel, Vuyelwa Qinga, sê wetstoepassers is in die gebied ontplooi en het toestemming om verdere besettings te verhoed.

“Ons het nêrens om te gaan … ons is gelukkig want die EFF en Malema ondersteun ons,” sê Elizabeth Damba, een van die plakkers. Sy het gesê sy kan nie bekostig om huur te betaal nie want sy is werkloos.

Die EFF se Wes-Kaapse leier Nazier Paulsen, wat ook ‘n lid van die provinsiale wetgewer is, het gesê die party sal enige hofuitspraak om die besetting te stop, teenstaan.

Die besetting van private grond, deur EFF-lede en ondersteuners, is ‘n kriminele oortreding, het opposisielede gesê.

Krugerbeeld op Kerkplein beskadig

Die afgelope naweek het lede van die EFF groen verf uitgestort oor die standbeeld van Paul Kruger op Kerkplein in Pretoria.

Die party sê dit is deel van sy veldtog om alle koloniale standbeelde en simbole te verwyder.

Die tweede standbeeld is Maandag in die Nelson Mandelabaai-gebied beskadig. Vermeende EFF-lede het ‘n standbeeld van ‘n perd en soldaat in Port Elizabeth gevandaliseer.

Die standbeeld is ter ere van die rol van diere in die Anglo-Boereoorlog.

Verlede Donderdag het EFF-lede ‘n oorloggedenksteen in Uitenhage aan die brand gesteek.

Die granietborsbeeld en marmergrafsteen van pres. Paul Kruger in die Heldeakker in Pretoria is in 1995 ook deur vandale beskadig.

Die standbeeld van Paul Kruger in Rustenburg is onlangs met ’n swart sak bedek en op sy voetstuk word hy met graffiti gewaarsku: “Gaan, hardloop!”

Amptenare het Maandag gesê dit is nog onduidelik wie die historiese standbeeld van Paul Kruger geskend het op Kerkplein in die Pretoriase middestad.

“Niemand het die verantwoordelikheid daarvoor aanvaar nie,” het Blessing Manale die burgemeesterskomitee se woordvoerder gesê.

Kruger se standbeeld is met groen verf Sondag beskadig.

Manale het gesê die burgemeester verwag om ‘n petisie van die African National Congress Youth League Dinsdag te ontvang.

Hulle het gevra dat die Kruger-standbeeld verwyder word.

Sekuriteit is sedertdien opgeknap by verskeie punte in die hoofstad waar historiese beelde staan.

“Die stad het besluit om sekuriteit by die Voortrekkermonument, Freedom Park, die stadsaal en by die Uniegebou op te knap,” het Manale gesê.

Die skending van Kruger kom te midde van oproepe om historiese standbeelde uit sentrale gebiede te verwyder.

Sekwestrasiebevel teen Malema glo hersien

‘n Voorlopige sekwestrasiebevel teen die leier van die EFF, Julius Malema sal na verwagting vandag in die Hooggeregshof in Pretoria hersien word, het RSG berig.

Die Suid-Afrikaanse Inkomstediens het Malema gedagvaar nadat hy na bewering tussen 2006 en 2010 nie belastingopgawes ingedien het nie.

Regter Bill Prinsloo het verlede jaar gelas dat Malema se bates voorwaardelik gesekwestreer word.

Die Inkomstediens het op van Malema se eiendom beslaggelê, waaronder ‘n plaas in Limpopo en ‘n huis in Johannesburg.

Malema en sy Ratanang Familietrust skuld die ontvanger na bewering ongeveer 16 miljoen rand.

Malema het vroeër toegegee dat hy nie sy belastingsake hanteer het, soos deur die wet vereis word nie.

Munisipaliteit woedend dat EFF grondbesetting stook

Die Mantsopa-plaaslike munisipaliteit in die ooste van die Vrystaat het uitgevaar teen die Ekonomiese Vryheidsvegters, nadat hulle inwoners aangemoedig het om grond onwettig te beset.

Dit volg nadat sowat 300 onwettige grondbesetters Dinsdag in die Marikana-informele woonbuurt by Ladybrand verwyder is, het RSG berig.

Die grondbesetters, wat pensioentrekkers en gestremdes ingesluit het, se hutte is deur ‘n stootskraper platgestoot.

Die EFF het na bewering T-hemde aan die grondbesetters uitgedeel en hulle aangemoedig om die munisipaliteit se hofbevel te verontagsaam.

Die burgemeester, Dennis Tsepe het die EFF daarvan beskuldig dat hulle kwesbare groepe gebruik om politieke punte aan te teken.

Die Menseregtekommissie het vroeër gesê die munisipaliteit moes alternatiewe verblyf aan kwesbare groepe beskikbaar gestel het, voordat hulle uitgesit word.

Staatsveiligheid wil amptenare wat vir CIA werk uitsnuffel

Die departement van Staatsveiligheid sê bewerings wat op sosiale media gemaak word dat sekere openbare ampsdraers vir die Amerikaanse spioenasiediens, die CIA, werk, sal ondersoek word.

Daar word beweer dat die Openbare Beskermer, Thuli Madonsela en sekere opposisieleiers by spioenasie betrokke is.

‘n Woordvoerder van die departement, Brian Dube sê die bewerings is op ‘n webwerf en ander sosiale media-platforms gemaak.

Daar word bespiegel dat Madonsela, die EFF-leier Julius Malema, die voormalige parlementêre leier van die DA, Lindiwe Mazibuko en die president van Amcu, Joseph Mathunjwa CIA-spioene is.

Die adjunkminister van Verdediging en Militêre Veterane, Kebby Maphatsoe het voorheen gesê die openbare beskermer, Thuli Madonsela is deur die CIA geplant.

uThuliumele asitshele ukuthi ubani ihandler yakhe [Thuli moet ons vertel wie haar hanteerder is],” het Maphatsoe toe gesê.

“Hulle gebruik selfs van ons instellings nou … Hierdie Hoofstuk 9-instellings is deur die ANC geskep, maar word nou teen ons gebruik… Ama [die] Amerikaners wil hul eie uitvoerende hoof in Suid-Afrika hê, en ons moet dit nie toelaat nie,” het Maphatsoe gesê.

Die Openbare Beskermer sê sy is verras dat die departement van Staatsveiligheid bewerings dat sy en sekere opposisie politici by spioenasie betrokke is, ernstig opneem.

Madonsela se woordvoerder, Oupa Segalwe sê die bewerings is belaglik. Hy sê hulle het dit by misdaadintelligensie aangemeld om te ondersoek en uit te vind wie die misdadigers is wat daarvoor verantwoordelik is.

Segalwe sê hulle het nie verwag dat enige redelike persoon die bewerings in ‘n ernstige lig sou beskou nie.

Die webwerf beweer onder meer dat Mazibuko deur die Amerikaanse intelligensiedienste opgelei is nadat sy deur Madonsela gewerf is.

Zuma ontken bewerings oor EFF-ontmoeting in Mosambiek

President Jacob Zuma het amptelik bewerings ontken dat hy met lede van die EFF in Mosambiek onderhandel het.

In ‘n geskrewe antwoord op ‘n parlementêre vraag deur die Demokratiese Alliansie Donderdag, het Zuma ontken dat hy ‘n vergadering by die Southern Sun Hotel in Maputo op 18 Januarie vanjaar na bewering saam met EFF-leiers bygewoon het.

Zuma was amptelik in die Mosambiekse hoofstad op 15 Januarie vir die inhuldiging van Filipe Nyusi as dié land se president.

DA-LP John Steenhuisen het ‘n skriftelike vraag aan die president gestel oor die beweerde Maputo-ontmoeting.

In sy skriftelike antwoord, het Zuma gesê: “Nee. Ek het nie ‘n vergadering in Maputo bygewoon, in Mosambiek op 18 Januarie 2015 nie.”

Bewerings van ‘n vergadering tussen EFF-leiers en ‘n groep van die ANC is in ‘n brief aan EFF-leier Julius Malema deur Gayton McKenzie gemaak.

Maar Zuma se beweerde betrokkenheid by die vergadering het aan die lig gekom tydens ‘n perskonferensie deur sekere beswaarde EFF-lede, wat beweer het dat Zuma veronderstel was om die vergadering by te woon.

Hulle beweer dat die LUR in Gauteng vir onderwys Panyaza Lesufi en ANC-LP Mathole Motshekga gereël het dat Zuma die EFF-leiers in Maputo ontmoet.

Lesufi, Motshekga en die EFF het intussen ook die bewerings ontken.

Volgens Malema hoef hy nie deur ander partye te werk om met die president te vergader nie. “Eerste van alles, Panyaza hoef nie reëlings vir my te maak as ek die president wil ontmoet nie,” het hy gesê.

“Daar is ‘n lyn van kommunikasie. Na afloop van die verkiesing verlede jaar, kan ek Lakela Kaunda [hoofbedryfsbeampte in die Presidensie] skakel en vir haar sê ek wil met die president praat.

HSM dink landsbestuur is ‘n swart Idols-kompetisie

Die parlementêre sirkus waar die media sowel as lede klaarblyklik meen dit gaan om ‘n klugtige swart Idols-kompetisie eerder as landsbestuur, duur voort.

Hoofstroommedia berig oudergewoonte oor verskillende politieke persoonlikhede wat mekaar slegsê asof dit van enige wesentlike belang vir die produktiewe minderheid sou wees.

Opposisie-parlementslede het intussen tydens die debat oor die staatsrede hul ontevredenheid uitgespreek oor die weglating van sommige sleutelgebeure uit die notules van verlede week.

Hulle kla dat geen melding gemaak word van die blokkering van selfoonseine wat plaasgevind het nie. Dit is nie seker wat die meeste opposisiepartye kan kommunikeer of twiet wat aan die ANC se meerderheid sal verander nie.

Die uitsmyting van die EFF-lede sowel as die DA wat agterna uit die Nasionale Vergadering gestorm het om verrigtinge verder te ontwrig, is nie onder die besprekingspunte nie.

Soos verwag, het EFF-leier, Julius Malema sy toespraak weer begin met ‘n verwysing na Nkandla.

Sanef wil hof toe oor selfoonseine in parlement

Die Suid-Afrikaanse Nasionale Redakteursforum, Sanef, wil ‘n regshulpfondsop die been bring om hofsake te maak teen die skending van joernaliste se reg om ondermeer oor parlementêre gebeure te berig.

Dit volg nadat selfoonseine in die Parlement ontwrig is voor President Jacob Zuma se Staatsrede.

Die redakteursforum het die naweek verklaar dat media-maatskappye gaan aansoek doen vir ‘n dringende hofbevel om te keer dat veiligheidsagentskappe kommunikasieseine kan verhinder soos wat glo met die president se staatsrede gebeur het.

Sanef sê dit meng met beriggewing in.

Donderdagaand is die spesiale sitting in die Nasionale Vergadering ook ontwrig deur die EFF.

Sanef sal ook die hof vra om die Parlement te dwing om uitsaai-media toe te laat om hulle eie kameras in die Parlement te installeer.

President Zuma sê dit was onnodig dat hy moes kommentaar lewer op die ontwrigting terwyl hy sy staatsrede gelewer het.

Ontleders het die president daaroor gekritiseer, maar hy sê die EFF se optrede is vooraf bepaal en dat daar niks was om daaroor te sê nie.

Chaos het uitgebreek toe die EFF deur veiligheidsbeamptes verwyder is omdat hulle geweier het om die Nasionale Vergadering te verlaat.

Hulle wou ‘n punt van orde stel oor wanneer die president die geld wat aan sy Nkandla-woning bestee is, gaan terugbetaal.

EFF-grondbesettingsplan in Midrand gefnuik

EFF-lede met rooi hempies en pette het onlangs ‘n aantal plakkers op ‘n oop stuk kleinhoewe in Belvedereweg neffens die Glen Austin-voëlpark in Midrand gevestig. Oor die afgelope paar dae het die SAPD egter die stukture afgebreek, maar die eienaars van kleinhoewes in die omgewing is lugtig dat daar weer so ‘n poging sal opduik.

‘n Malawiese vrou is op dieselfde stuk grond verkrag en vermoor. Die polisie het agterna die lyk kom haal, maar niemand is nog in hegtenis geneem nie. Die naam van die vrou is nog onbekend, maar Malawiërs in die omgewing het haar begrafnis bygewoon.

‘n Zimbabwiër het aan praag gesê: “Ons vrees vir ons lewens. Ons vertrou ook nie die polisie nie. Niks gaan van hierdie moordsaak kom nie. Ons is heeltemal uitgelewer.”

‘n Rede waarom die polisie wel teen die plakkers opgetree het, is omdat die skaars brulpaddaspesie by die Glen Austin-dam deur plakkery bedreig sou word.

“Die paddas het ons gered,” sê een eienaar.

Die EFF van Julius Malema het by sy jongste partykongres formeel die beleid van grondbesetting aangeneem. Die Pretoriase munisipaliteit het sy hande vol en moes reeds grondbesetters van persele in Sokhulumi, Mamelodi, Soshanguve, Mooiplaats, Donkerhoek, Atteridgeville en Olivenhoutbosch, asook nou Midrand, verwyder.