Gustav Venter – Bladsy 3

Proteas eindig laaste in groep

Laaste. Heel, heel laaste. Dis waar die Proteas in hulle groep in die IKR se Kampioenetrofee-toernooi geëindig het. Hulle het na die agterosposisie gedaal toe die geminagte Nieu-Seelanders gister die ewe verguisde Engelse span op die Wanderers met vier paaltjies verslaan het. Dié twee sukkelspanne is nou deur na die halfeindrondte van die toernooi terwyl die hoogaangeprese Sri Lankane saam met Suid-Afrika saggies by die agterdeur moet uitsluip huis toe.

Die Swartpette het die Rose op ‘n Wanderers-blad vol speserye deurmekaar geboul en vir 146 lopies uitgehaal. Daarna het hulle swaar getrek om die karige telling te haal, hoewel dit aanvanklik soos so maklik soos val uit ‘n boom gelyk het. Brendan McCullum en Martin Guptill het die bal, nou nie met uitgelatenheid nie, maar met uiterste gemak rondgedruk en getrek en het meer as helfte van die lopies aangeteken voordat McCullum op 48 en later Guptill op 53 uit is.

Daarna het die senuwees, die nukkerige kolfblad en Stuart Broad vol skoongesig aggressie die middelorde laat bewe het. Uiteindelik het Daniel Vettori met al sy onverstoorbaarheid die wa oor die kruin gestoot. Met dié oorwinning eindig die ondergewaardeerde Nieu-Seelanders bo in hulle groep met Engeland tweede.

Die twee superspanne, Sri Lanka en alewige stikkers, Suid-Afrika, het sterte netjies tussen die bene opgetrek en bedeesd die toernooi verlaat.

Фільчаков прокурор

Gary Botha kom terug

Blou Bul-staatmaker, Gary Botha, is op pad terug om sy rugbyloopbaan in Suid-Afrika voort te sit. Gerugte dat dit sal gebeur is gister bevestig. Daar word selfs gereken dat Botha by die Blou Bulle vir die res van die Curriebeker-seisoen sal inval, veral noudat een van die Noord-Transvalers se hakers, die kwotaspeler, Chilliboy Ralepelle, beseer is.

Botha het die afgelope paar jaar graafskapsrugby vir Londen Harlekyne gespeel. Hy sal Saterdag sy laaste wedstryd vir dié klub speel. Die span het nog nie ‘n oorwinning hierdie seisoen behaal nie. Botha en Harlekyne het wedersyds ooreengekom dat hy vroegtydig van sy kontrak vrygestel sal word.

Die hoofafrigter, John Kingston, het gesê dat hy hartseer is dat Botha die klub gaan verlaat. “Hy was ‘n integrale deel van die onlangse sukses van Harlekyne.”

Die knoetserige haker was deel van die Blou Bulle se Renaissance gedurende die begin van die dekade.

Die 27-jarige Botha sê hy het sy tyd by Harlekyne geniet. “Dit is met ‘n swaar hart wat ek sal gaan,” het hy bygevoeg. “Ek het baie vriende in my tyd by die klub gemaak en sal die span se vordering met groot belangstelling volg.”

Lydende Smith lei vergeefs en Proteas is uit toernooi

Die Engelse krieketspan het gister op Supersportpark in Verwoerdburg ontwaak om die hoogaangeskrewe maar vormverlore Proteas uit die IRK se kampioenskapstoernooi te boender.

Andrew Strauss het die loot gewen en besluit om die Proteas se swakpunt, vir eens die boulaanval, uit te buit. Hy is self op 25 uit toe hy agter die stokke deur Boucher van Parnell se boulwerk uitgevang is. Denly het ‘n kort Kallis-aflewering bykant toe gelepel en is op die grens deur Duminy uitgevang. Dit was die laaste Suid-Afrikaanse vreugdetjie toe Owais Sha en Paul Collingwood die Protea-aanval met aggressie en goeie oordeel betrek het.

Hierdie aanval was ‘n bont affêre, met die boulers wat Graeme Smith tot waansin gedryf het met aanvalle weerskante van die teiken. Collingwood het uiteindelik op 82 lopies gesneuwel en Sha is tot sy afgryse twee lopies kort van ‘n ton agter die penne uitgevang.

Dit het egter nie die Proteas se ellende verlig nie. Eoin Morgan, deurtrek met ‘n hewige kleinmannetjiesindroom, het onder die Proteas se boulers ingeklim met ‘n geweld wat aan die Aussies se David Warner aan die begin van sy loopbaan herinner het. Hy het bykans twee lopies uit elke bal gewiks voordat hy op 67 lopies van 34 balle uit is. Dit het die Suid-Afrikaners 324 lopies gelaat om nog asem in die toernooi te haal.

Hierdie sou nie ‘n dag van 438-heldhaftigheid wees nie. Die Proteas het wel 301 lopies gehaal, maar het dwarsdeur agter die hakke gelyk. Maar laat Graeme Smith se knor nie geminag word nie. Hy het 141 lopies met tipiese Biff-bombasme, getemper deur ‘n sekere berekendheid, geklop. Verpletterend genoeg het dit nie die wa deur die drif gesleep nie. Hy het maar papperige ondersteuning van sy kolfkamerade gekry. Die naasbeste tellings was AB de Villiers se 36 en JP Duminy, wat homself weer in eendagkrieket moet ontdek, se 24.

Die Engelse het nou, raar genoeg, drie wenwedstryde in ‘n ry. Dit sal ongetwyfeld so deur die Engelse media besing word, dat hulle krieketspan met rapperstylarrogansie later vanjaar hier sal opdaag. Dis ook goed. Dis altyd lekker om te sien hoe lyk hoogmoed voor die val.

crystal tiaras

Griekwas spartel op nat Nuweland

Die Griekwas was geheel en al onvoorbereid op ‘n springgety op Nuweland: Nie ‘n paddavoet of snorkel in sig nie. Die Diamantdelwers kan hardloop, hulle kan lak, hulle kan dryf – dis nou dryf soos in om voorwaartse momentum op te bou. Dryf soos in om bo-op baie water te bly, dié kan hulle nie. Gister was hulle soos visse op droë grond, heeltemal oorbluf oor die sopnat Nuweland en algeheel sonder antwoorde vir die WP se spel.

Die WP, in teenstelling, het getoon dat as die veld nat genoeg is, hulle ‘n moontlike Curriebekerwenspan sal wees, dié seisoen. Die voorspelers het iewers vastrap in die modder gevind, die agterspelers het dikwels genoeg die bal gevang en uitgegee en die lostrio van Watson, Vermeulen en Francois Louw het die modderstoeiery gewen.

Boonop het eers Peter Grant en toe die Aussie-invoerproduk, Matt Toomua, merkwaardige beheer oor die nat bal gedemonstreer. Die skraal blonde sluipskutter, Joe Pietersen, het indrukkend uit die laaste vesting pale toe geskiet en 19 punte aangeteken. Anders as wat mens egter sou verwag het, is daar meer punte deur drieë as skoppe deur die WP aangeteken. Eers het Brock Harris uit ‘n losskrum op die Griekwa-doellyn oorgekruiptrekker vir ‘n drie voordat Joe Pietersen ruimte gevind het om deur te blits vir nog ‘n vyfpunter.

WP het teen rustyd voorgeloop met 24-3.

In die tweede helfte het Duane Vermeulen sy pad oopgebeur vir die WP se derde drie en later het Juan de Jongh ‘n bal via Toomua gekry en ‘n skoppie deurgeknikker vir Frikkie Welsh om in die doelgebied op te val. Pieter Louw het heel teen die einde ‘n lang bal van die Australiër gekry en ongehinderd oorgedraf vir die vyfde van die dag.

Die WP het hulle meesterskap in die reën bewys. Indien hulle wel, soos dit nou lyk, ‘n tuishalfeindstryd behaal, behoort hulle nie op die wispelturigheid van die weer staat te maak nie. Hulle sal wys wees om die sproeiers betyds aan te sit. Dis nog nie duidelik of hulle mans genoeg is vir ‘n Haaie-span of ‘n trop Blou Bulle op ‘n droë veld nie. Maar as Nuweland nat genoeg is, kan daar hierdie jaar ‘n beroemde goue beker in die span se kabinet opduik.

european roulette

Vrystaat verloor op punte

Die Vrystaat het ‘n ongekompliseerde rugbyfilosofie: Om ‘n wedstryd te wen, moet jy sorg dat jy meer punte as hulle het. Alte dikwels hierdie jaar het hulle teenstaanders meer punte as die Cheetahs gekry. Die Vrystaters hardloop en dryf en val aan en maak dit maklik lyk om punte te kry. Maar hulle laat te dikwels toe dat ander spanne ‘n groter puntetotaal as hulle bereik.

Gister het die Vrystaat die Blou Bulle verras en het as gevolg van net een rede verloor: Hulle het minder punte as die Pretorianers aangeteken. Terwyl dit alles verstommend eenvoudig klink, het die Cheetahs hierdie seisoen allerlei splinternuwe metodes gevind om hulle voetbal mee te kompliseer. Dis amper asof ‘n oordrewe sportmangees aan die wortel van die ellende lê.

Niks demonstreer dít beter as toe Fabian Juries net na halftyd die Blou verdedigingslinie laat borrels hap het toe hy om hulle geskroei het vir ‘n drie wat die Cheetahs ‘n aanspraak op die wedstryd gegee het. Maar amper asof dit onsportief sou wees om in ‘n posisie te bly om ‘n voorsprong te bekom, staan hulle toe ewe opsy sodat Wynand Olivier die drie van Fabian Juries kan neutraliseer.

Vroeër het die Blou Bulle presies volgens verwagting die Cheetahs gevou en opgerol. ‘n Morné Steyn-strafskop en ‘n Gerhard van den Heever-drie het die Bloues gou met 10-0 voorgekry. ‘n Dewald Potgieter-afstormdrie en Steyn se rente het die Noord-Transvalers laat voorloop 17-0.

‘n Tweetal Fabian Juries-drieë, een net voor rustyd en een net daarna, het die wedstryd binne die Cheetahs se bereik gebring. Uiteindelik was dit Blou Bulle wat die strooptoglustige Cheetahs uit die loopgrawe gehou het – net-net. Die Ligbloues wen 30-27.

Nie een span is tevrede huis toe nie. Die Cheetahs moet vrede maak met die gedagte dat hulle Curriebekeraanspraak vir die seisoen daarmee heen is. En die Blou Bulle moet wonder hoekom die toevoeging van hulle Springbokke nie die oorheersing waarop hulle staatgemaak het, besorg het nie. Dit kan wel wees dat die Cheetahs gister een van hulle beste wedstryde dié seisoen gelewer het. Hulle het egter minder punte as die Blou Bulle aangeteken. Dit beteken natuurlik dat die Blou Bulle meer punte as die Vrystaat behaal het. En só gesien, lyk die Pretorianers eintlik na Curriebekerkampioene.

Kop op die Blok: Nou vir die Blou

Omdat die Blou Bulle so ‘n stoere bydrae tot die Springbok-lotgevalle maak, het hulle seisoen die patroon van die afgelope paar jaar herhaal: Terwyl die hardebaarde met toetsspanne wedywer, word hulle plekke volgestaan deur belowende maar nat-agter-die-ore penkoppe. Hulle werk is om huis en haard te verdedig totdat die gesoutes terug is van hulle internasionale pligte. As die Blou Bulle binne trefafstand op die punteleer is, is die plan dat die toetsspelers ‘n plek in die halfeindrondtes sal konsolideer en as hulle eers daar is, wel, geen ander provinsiale span verstaan so goed soos die Blou Bulle hoe om trofees te wen nie.

Nou is dit ook so dat die Vrystaat met hulle grofste geskut nie veel beter as die Pretoriase plekhouers is nie. Hulle weet nou min of meer hoe goed hulle is en dit is moeilik om te sien waar hulle nog elemente sal vind om hulle spelpeil te lig.

‘n Blou span, aan die ander kant, wat skielik versterk word deur Victor Matfield, Danie Rossouw, Pierre Spies, Morné Steyn en Wynand Olivier, lyk skielik na ‘n span waarvoor ‘n Curriebeker-wennersparade solank gereël kan word. Frans Ludeke kan nou in die woorde van Hannibal Smith opreg mymer dat hy daarvan hou as ‘n plan bymekaar kom. Daar is nou genoeg wringkrag in die dieselenjin en in Spies, Dewald Potgieter en Deon Stegmann het hulle ‘n goedgebalanseerde lostrio wat die Blou bal kan beskerm, maar wat ook terreur in hulle opponente se geledere kan saai.

Morné Steyn sal boonop môre koers en kalmte na die agterlyn bring, terwyl die senterduo van Wynand Olivier en Jaco Pretorius nie net die verdedigingslyn sal styf trek nie, maar wat ook die belofte inhou om groot en skielike ellende op die Cheetahs uit te stort.

‘n Voorspelling: Die Blou Bulle wen met vyftien punte.

Данильченко Харьков

Krieket: Engelse pootjie Sri Lanka

Die voorspellings is toe bewaarheid: Gister, op die Wanderers, was daar ‘n span vol kalmte, presiesheid en veglus wat gespeel het teen ‘n span vol onsekerheid en mog’t –troffe krieket. Die skok was dat dit die Engelse was wat alles voortreflik gedoen het, terwyl dit toernooigunstelinge Sri Lanka was wat gestrompel en gesteier het.

Eoin Morgan het Engeland uiteindelik gestuur tot ‘n moraalopkikkerende ses-paaltjie oorwinning oor Sri Lanka in die Kampioenetrofee.

Engeland het ‘n 213-lopie teiken op ‘n springlewendige blad gehaal met nog vyf boulbeurte om te gaan, danksy Morgan (62 nie uit nie), Man van die Wedstryd Paul Collingwood, (46) en Owais Shah (44.)

Suid-Afrika en Sri Lanka het nou elk een oorwinning uit twee wedstryde, terwyl Engeland hulle eerste wedstryd gespeel het nadat hulle 6-1 in ‘n onlangse tuisreeks deur Australië afgeransel is.
Nieu Seeland het hulle openingswedstryd verloor. Die twee topspanne sal deurgaan na die halfeindrondte.

“’n Mens kan baie uit so ‘n wedstryd leer. Ons spelers het sonder vrees gespeel en as ons so aanhou, kan ons ‘n goeie span wees,” het die Engelse kaptein, Andrew Strauss gesê.

“Collingwood, Shah en Morgan het briljant gespeel. Die sleutel was om nie te veel paaltjies vroeg te verloor nie. Dit was ‘n sinvolle en professionele lopiejaagtog.”

Sri Lanka se tolboulers, Muttiah Muralitharan en Ajantha Mendis, van wie verwag is dat hulle Engeland onder druk sal hou, kon nie veel indruk maak op ‘n blad wat stadige boulers beswaarlik gehelp het.

Engeland se oorwinning is in die wieg gelê deur die spoedboulers, James Anderson (3-20,) Stuart Broad (3-49) en Graham Onions (2-58.) Hulle het voortreflik geboul om Sri Lanka op ‘n naatvriendelike blad te beperk.

Engeland het op 19-2 geswoeg toe hulle die openingskolwers, Strauss en Joe Denly, verloor het, maar die verbete Collingwood het die kolfbeurt op die regte koers gekry met ‘n ywerige teenaanval.

Nuwan Kulasekera het die vroeë skade aangerig toe hy Strauss vir nege en Denly vir vyf lopies verwyder het in sy vlymskerp openingskof. Hierna het Collingwood die druk verlig deur onder andere met die kolfblad af te skuifel en Kulasekara oor middebaan te trek vir ‘n ses waarna hy die volgende twee aflewerings vir viere gewiks het. Na sy vertrek het Morgan aangetree om toe te sien dat Engeland die paal haal toe hy sewe viere in sy sewende halfton in eendag internasionale wedstryde aangeteken het.

Sri Lanka in hulle beurt het vroeg reeds gewankel op 17 vir vier voordat Kandamby met 53 lopies en Matthews met 52 die wa terug op sy wiele gekry het. Sri Lanka se kaptein, Kumar Sangakkara het gereken die span se telling van 212 was ‘n goeie een op ‘n blad wat nie ‘n tipiese eendagstrook was nie.

Tydens die Sri Lanka-beurt het die Engelse kaptein, Andrew Strauss, gewys dat hy iets van die Suid-Afrikaanse sportgeesinbors behou het, toe hy Mathews teruggeroep het om verder te kolf toe dié as uitgehardloop uitgegee is nadat hy in die bouler vasgehardloop het op pad na ‘n tweede lopie.

Of hierdie oorwinning van Engeland, en die gelatenheid waarmee Sri Lanka dit beleef het, blote afwykings was, sal gesien moet word. Engeland speel Sondag teen Suid-Afrika in ‘n wedstryd wat van dié antwoorde sal verskaf.

дома интернет

Halfpas-Proteas goed genoeg vir Swart Pette

Die Proteas het gister geen spiere verrek om die Nieu-Seelanders in Verwoerdburg te klop nie. Nogtans is hierdie nog nie ‘n span wat lyk of al die werkende dele in posisie geklik het nie. Tog is die tekens daar dat hierdie span ‘n wedstryd of twee daarvan is om soos die meedoënlose masjien van die vorige seisoen te lyk. Nieu-Seeland is inderdaad ‘n span wat niks dreigender lyk as ‘n pak malvalekkers nie, maar die Suid-Afrikaners het op alle gebiede tog ‘n snarsie akkurater, vinniger en meer doelgerig gelyk.

Wayne Parnell was weereens spandabelrig met lopies, maar het darem vyf paaltjies gekoop al was dit teen Woolworths-pryse van 7,12 lopies per boulbeurt. Dale Steyn het minder paaltjies gekry maar sy knaende en onstuimige boulwerk het net 32 lopies in een bal minder as tien boulbeurte afgestaan. Parnell was waarskynlik die begunstigde toe kolwers uit pure verligting aan die einde van elke Steyn-boulbeurt probeer het om Parnell se boulwerk te kasty. Dis ‘n strategie wat met peperduur paaltjies beboet is.

Lopies het eers in ‘n skaflike vloed gekom, maar het toenemend opgedroog. Roelof van der Merwe en Johan Botha, op pad na iets soos sy gewone vorm, het die kraantjie nog stywer toegedraai. Van der Merwe het lopies met die iesegrimmigheid van ‘n Skot afgestaan en het twee paaltjies vir 35 geneem.

Brendan McCullum het ‘n ongewone 68 balle verbruik vir sy 44 lopies voordat hy skuins agter sy rug uitgevang is deur JP Duminy van Johan Botha se kort bal af. Daarna het Ross Taylor vasgeskop asof hy ‘n vyfdaagse toets probeer red. Hy het uiteindelik op 72 die toneel verlaat. Die gebruiklike einde-van-die-beurt aanslag het uitgeflikker toe kolwers een na die ander terug paviljoen toe gedruipstert het met enkele lopies op hulle telkaarte. Die 213 lopies wat hulle aangeteken het, weliswaar op ‘n growwe kolfblad, het nooit na ‘n wentelling gelyk nie.

Graeme Smith het gou die harde werk aan die res oorgelaat toe hy hondmak uit is na ‘n skephoutjie na ‘n kort diepby met sy telling op 7. Hashim Amla was die ene onskouspelagtige konsentrasie waar rondom die Proteas die beurt gekonstrueer het. Kallis was meer dominerend vir 36 lopies van 39 balle. Maar, nie vir die eerste keer nie, was dit AB de Villiers wat waaksaamheid met waaghalsigheid gekombineer het vir ‘n gepoleerde 70 lopies van 76 balle. Albie Morkel het ‘n selfversekerde 19 lopies vir die verbruik van 14 balle gewiks.

Volgende op die Groen-en-Goud spyskaart is die Engelse. Wonderwerke gebeur, maar as die Proteas enigsins verbeter, is ‘n wonderwerk wat dit sal verg vir die Engelse om te wen.

Фильчаков

Pakistan en Wes-Indiërs veg hard maar bereik min

Die Wes-Indiese krieketspan het gister nie baie lank gevat om die wip en spoed van die kolfblad op die Wanderers gewoond te raak nie, maar in die kort tydjie was die top ses kolwers – en nommer agt op die koop toe – reeds terug in die paviljoen.

Dié span is natuurlik aanmekaar gelap en is iets tussen ‘n B-span en ‘n jeugspan. Dit was juis dié gebrek aan ervaring wat sy tol geëis het. Aanvangkolwers Richards en Fletcher, het hulleself nie eintlik vermoei om die wip van die kolfblad en die aard van die boulaanval deur te kyk nie. Die blad was lewendig en die jong snelbouler, Mohammad Aamer, nog meer so. Binne ‘n ommesientjie het hy die toporde ontwortel waarna die ouer Umar Gul sy voorbeeld gevol het en nóg drie paaltjies geneem het.

Hierna het Darren Sammy en Nikita Miller die oog ingespeel, en tot die skande van die topordekolwers, begin om die bal die veld vol te slaan. Miller, nommer 9 op die kolflys, het uiteindelik die span se hoogste telling van 57 gekry, maar selfs sy heldhaftigheid kon nie die Wes-Indiese debakel in ‘n skaflike telling verander nie.

Pakistan moes 135 lopies vir ‘n oorwinning insamel, maar met ewe onbesonne kolfwerk het hulle dit na ‘n formidabele teiken laat lyk. Die onbekende Gavin Tonge – wel, hulle is omtrent almal net aan hulle moeders bekend, het die Pakistanse toporde in skerwe gelaat met ‘n boulontleding van vier paaltjies vir 25 in tien boulbeurte.

Dit het naderhand nog ‘n jongeling, die pragmatiese Umar Akmal, in geselsskap met sy kaptein, Shahid Afridi, geverg om met ‘n spanninglose 41 lopies ‘n einde aan die malligheid te bring. Dié twee het die teiken in die 31ste boulbeurt gehaal.

Pakistan lyk allermins soos die span wat die 20-20 Wêreldbeker gewen het. Maar dis juis wanneer hulle soos ploerte lyk wat hulle eensklaps in ‘n onstuitbare span verander. Opponente sal in die komende wedstryde wel beraad wees om nie weer aan hierdie wedstryd te dink nie.

beaded tiaras Фильчаков прокурор

Proteas tree aan teen Sri-Lanka

Die Internasionale Krieketraad se Kampioenskapstoernooi – inderwaarheid ‘n mini-Wêreldbekertoernooi – begin vandag op Supersportpark in Verwoerdburg. Suid-Afrika speel gasheer vir die mannetjies van Sri Lanka.

Hierdie kan ‘n ordentlike vuurwerkwedstryd wees. Sri Lanka is gelaai met kragspelers en slinksheid, met die klem op slinksheid. Suid-Afrika is gelaai met slinksheid en kragspelers met die klem op kragspel.

Sri Lanka sal hulle vertroue in hulle draaigoëlaars, Muttiah Muralitharan en die misterieuse Mendis belê. Hulle hoop op ‘n oorwinning is hoofsaaklik gesetel in die gewaande onbeholpenheid van die Suid-Afrikaners teen tolboulwerk. Graeme Smith het egter tereg uitgewys dat Suid-Afrika die nommer een 50-boulbeurtspan ter wêreld is, juis omdat hulle die tegniek om draaiballe te speel, bemeester het.

Smith self, of “Biff” soos sy spanmaats hom verwysende na sy nonsieslose kolfbenadering noem, kan as hy sy balans vind en gemaklik oor die ligging van sy wegpen is, kan selfs vir die Spinnekop, Muralitharan, moedeloos sloeg. Hashim Amla, hy met die volstruisveerbaard, open die kolfwerk saam met Smith in die beseerde Herschelle Gibbs se plek, en hy is geneties en temperamenteel ingestel om tolballe met oorknakgewrigte te neutraliseer. Kallis, AB de Villiers en JP Duminy is self bedrewe om met doelgerigte voetwerk die angel uit ‘n tolbal te haal en om dit vir die meeste lopies te melk. En paaltjiewagter Mark Boucher en Albie, die Hamer, Morkel kan enige bal, draaiend, swaaiend of snel, uit die speelveld slaan.

Hulle sal egter veral moet konsentreer teen die slingerballe van Lasith Malinga, wat vier Proteas met vier agtereenvolgende balle gepluk het tydens die vorige Wêreldbekertoernooi. As hy sy ritme en spoed vind, kan hy haas onspeelbaar en algeheel vernietigend word.

Suid-Afrika sal vol vertroue wees dat hulle eie snellers, Dale Steyn, Wayne Parnell en óf Ntini, óf Lonwabe Tsotsobe die Sri-Lankane bang sal boul op ‘n vinnige blad. Boonop het Suid-Afrika, amper uit die bloute, ‘n tolduo in Johan Botha en Roelof van der Merwe gevind wat die slag het om die ander span in ‘n net van presiese draaiboulwerk te snoer. Dit behoort genoeg te wees, maar as die Sri-Lankaanse kolfbattery wat Sangakkara, Tilekeratne Dilshan, die bittereinde Sanath Jayasuriya en die bestendige Jayawardene insluit, hulle koers vind, kan hulle enige aanval ter wêreld papslaan.

50-50 wedstryde is nie heeltemal ‘n Lotto-affêre soos 20-20 nie, maar dit bly genoeg van ‘n lootjietrekkery om ‘n uitslag tussen twee sulke gedugte spanne met oortuiging te voorspel. Maar goeie krieket is goeie krieket en bewonderaars het baie om vanmiddag na uit te sien.

free games.co.uk

Haaie ontglip die Vrystaat

Soms, as deel van hulle lewensvaardigheidsopleiding, kry klein jagluiperdjies ‘n lewendige bokkie van hulle ma om mee te speel. Hulle sal die bokkie ‘n skynontsnapping toelaat en dan kyk hulle hoe veel van ‘n voorsprong hulle die diertjie kan toelaat voordat hulle dit agterna sit. Maar soms werk hulle berekeninge verkeerd uit, en die bokkie bou ‘n té groot voorsprong op en dan is die katjie hulle ete kwyt én hulle moet aan Ma gaan verduidelik.

Die Vrystaatse jagluiperdjies wat rugby speel, hou blykbaar deesdae te veel van dié uitdaging. Hulle het ‘n minsame, maar soms selfvernietigende, gewoonte gekweek om hulle teenstaanders toe te laat om goedkoop punte vroeg aan te teken – en dan te kyk of hulle hulle kan inhaal. Verlede week het hulle die WP ‘n stewige voorsprong gegee en toe net-net met ‘n strafdrie na die sirene gevang. Gister teen die Haaie het die patroon homself herhaal. Nadat die Vrystaat die Haaie netjies in hulle kwartgebied ingekamp het, staan hulle skielik terug en BOEM! die Natallers suiker buite om en Waylon Murray rammel oor vir ‘n drie. Minute later en BOEM! Craig Burden kry ‘n drie.

Dis toe dat die jagtog begin met die Cheetahs wat met gebruiklike sorgeloosheid die veld vol hardloop. ‘n Veldlange strooptog het geëindig met Ashley Johnson, Bevan Fortuyn-spookpophaarstyl en al, wat ‘n drie druk. Jacques-Louis Potgieter, skynbaar toe nog vasbeslote om die uitdaging so taai as moontlik te maak, skop die verdoeling mis maar slaag darem daarna met ‘n strafskop en die halfeindrondte is 15-8 vir die Haaie.

Potgieter, om presies te wees, was heeltemal te spandabelrig met punte en het in ‘n ommesientjie tien punte op die veld gelos met onindrukwekkende stelskopwerk. As hy sy neus vir skoppe opgetrek het, het hy tog ‘n instink vir drieë getoon en venynig gebreek om vir JW Jonker doellyn toe te stuur.

Teen hierdie tyd was die bokkie egter te ver voor en die Vrystaatse beste pogings kon nie die regte gleuwe in die Haaie se verdediging vind nie.

Die Haaie wen die wedstryd met 24-13.

Nou ja, die jagluiperdjies het hulle pret gehad en ons ook, want dit was ‘n heerlike wedstryd, propvol harde en flinke rugby.

Die stoffies wat die jagluiperdjies sien, is hulle kans op ‘n halfeindrondte wat al hoe verder buite hulle bereik raak.

Die Haaie, nou koning van die ligamishoop, moet self die binnelip kou, ten spyte van hulle noue ontkoming. Hulle skrum het swaargetrek en selfs die toevoeging van die wêreld se mees onwaarskynlike vaskopstut, John Smit, het nie verhoed dat die Cheetahs hulle verniel nie. Tog, met spelers soos Ruan Pienaar en Ryan Kankowski, het hulle genoeg sambok om ander spanne seer te maak. Die krulkop Kankowski was met tye iesegrimmig in die vaste los, maar om hom op volle vaart te sien as hy uitbreek, is ‘n voorreg. Sy hantering is seepglad, delikaat en presies.

So, het die Haaie genoeg wringkrag in die voorpakenjin om, sê nou maar ‘n Blou Bul-span, opgestop met Matfield, Bakkies Botha, Danie Rossouw en Pierre Spies van die voorvoet af te hou?

Errr… nee, ek dink nie so nie.

пазлы купить украина

Kop op die Blok sê: Brüssouw en sy bende gaan te veel wees vir die Haaie

Tuisveldvoordeel, meer Springbokke as in die Kalahari en meer selfvertroue as Steve Hofmeyr by ‘n kombuistee – mens sou dink dit is genoeg vir die Haaie om môre se wedstryd teen die Vrystaat op Kingsmead te laat wen… maar dit is nie. Die Cheetahs gaan die Haaie vandag krap waar dit die seerste maak – reg in die ligapunte.

Die Haaie se spelpatroon is om die skroef in die vaste los stywer en stywer te draai totdat hulle teenstaanders hulle formaat verloor en om dan vinnig en venynig toe te slaan. Vandag gaan die spel besonder vormloos wees by tye – presies die soort vreetfees waarin die Haaie gedy. Hulle probleem is dat daar een span is wat beter toeslaan op aas as hulle – en dit is die Cheetahs.

‘n Ernstige Cheetah-span kan by tye skokkend onbeholpe lyk, maar die afgelope ses weke het hulle, onder Adriaan Strauss sorgelose voetbal gespeel. Die partytjie gaan vandag voortgesit word. Voorlangs het die Vrystaat genoeg konstruksiewerkers om ‘n dansvloer op Kingsmead te bou. Wian du Preez, Adriaan Strauss en WP Nel het genoeg domkrag in hulle om die skrum in donkierat te kry en David de Villiers en Nico Breedt het genoeg vuur en veerkrag in voorraad om die Vrystaat hulle kwota lynstaanballe te verseker.

Die Haaie maak staat op ‘n Cheetah-agterlyn om ongeorganiseerd op die verdediging te bly – ‘n ryk aar wat die WP verlede week vir punte raakgeboor het, veral tussen die senters deur. Naka Drotske en Helgaard Muller is egter gesout genoeg om reg te maak wat verkeerd is. En in Andries Strauss en Waylon Murray het die Haaie nie die vonkelvoetigste senters nie. Die Haaie gaan hulle slaankrag probeer ekstra lading gee deur vir Adi Jacobs op die veld te bring wat hulle kwesbaar gaan maak rondom die punte – presies daar waar die resiesperde, Jongi Nokwe en Lionel Mapoe soos skaduwees gaan omhardloop.

Die Cheetahs gaan ander vrae vra wat die Haaie sal sukkel om te antwoord. Vernaamste hiervan is: Hoe om die sakkeroller, Heinrich Brüssouw, in aanhouding te kry. Graniethard soos Jean Deysel is, en verbete soos wat Jacques Botes is, hulle gaan nie die jong grypdief verhoed om hulle die Haaie se losballe na die Vrystaatse pandjieswinkel aan te dra nie. Dit sal die Haaie se losvoorspelers dwing om oorywerig en waaghalsig bal toe te werk, ‘n desperaatheid waarvoor hulle in strafskoppe gaan betaal. Met Jacques-Louis Potgieter wat met groter sekerheid pale toe skop, gaan hierdie strafskoppe vir punte gewissel word.

Kop op die Blok se voorspelling: Vrystaat met agt punte.

En terloops – die Leeus gaan die Griekwas met tien punte op daardie hoërskoolveld eet.

pour chat

Dit was die naweek se sport…

Die Bokke skop agterwêreld

John Smit se Springbokke se uitdagings raak nou op. By hulle Wêreldbeker, hulle 2008 onoorwonne Europese toer en reeksoorwinning oor die Britse Leeus, het hulle vanjaar se Drienasiestrofee gevoeg. Hulle het dit Saterdag in Hamilton teen die All Blacks met 32-29 gewen, 'n wedstryd wat onthou sal word vir drie verstommende langafstandstrafskoppe deur Frans Steyn en 'n kenmerkende onderskepdrie van Jean de Villiers.

Blou Kalfies gevreet op Loftus

Die Ligbloues se instaanspelers was net nie rof genoeg en moeilik genoeg om die Haaie te sink nie en het met 23-29 verloor. Volgende week sal hulle waarskynlik hulle skof teen die Boland afsluit en dan kom die hardebaarde soos Bakkies Botha, Victor Matfield, Fourie du Preez, Pierre Spies, Bryan Habana, Danie Rossouw en Morné Steyn terug. So, oor twee weke begin die Curriebekerreeks in alle erns.

Vrystaat steel wedstryd van WP

Nadat die WP die wedstryd op Bloemfontein wel en deeglik in die sakkie gehad het, het die Blikore by die agterdeur ingesluip en die wedstryd na die laaste sirene met 'n strafdrie afgerokkel. Die telling was 33-31.

Motorsport

Rubens Barrichello van Brasilië het gister sy derde Italiaanse Grand Prix, dié keer in 'n Brawn Mercedes gewen. Sy spanmaat, die kampioenskapvoorloper Jensen Button, was tweede met Ferrari se Kimi Raikonnen in die derde plek. Die wêreldkampioen, Lewis Hamilton, in 'n McLaren Mercedes, het op die laaste rondte die gehalte van die baanversperrings getoets en het nie die wedren voltooi nie. Button is nou 14 punte voor Barrichello met nog vier wedrenne in vanjaar se reeks oor.

Tennis

Lang skaduwee val oor Rafa Nadal

Die tennismasjien is in die Amerikaanse Ope van die baan gevee deur die Argentynse wolkekrabber, Juan Martin del Potro, het Nadal uit alle hoeke met ontsaglike slaanwerk verniel en vir die Spanjaard sy grootse nederlaag in 'n Grand Slam toegedien. Die telling was 6-2, 6-2, 6-2.

Serena Williams betaal duur vir viswyfgedrag

Die gunsteling Serena Williams het eers 'n tennisles van die terugkerende mammie, Kim Clijsters, gekry en toe 'n etiketles van die owerhede van die Amerikaanse Ope in New York. Nadat sy die eerste stel verloor het, het Williams 'n kodeoortredingswaarskuwing gekry nadat sy haar raket stukkend geslaan het. Toe sy in die tweede stel moes dien om in die wedstryd te bly, op 15-30, is sy vir 'n voetfout geroep. Nadat sy die lynregter beledig en met die dood gedreig het, is sy nog 'n punt beboet wat aan die komkommerkoel Clijsters die wedstryd besorg het.

Federer toor Djokovic

Roger Federer het sy sesde agtereenvolgende Amerikaanse Ope-eindstryd gehaal toe hy sy aangewese troonopvolger, Novak Djokovic, in skoon stelle geklop het. Die telling was 7-6, 7-5, 7-5. Die voorlaaste wenhou van Federer, 'n uitspattige tussen-die-bene-deur dwarsbaanwenner, het hyself as die beste hou van sy loopbaan beskryf. Federer tree in die eindstryd teen Juan Martin del Potro van Argentinië aan.

Gholf

Suid-Afrika se James Kingston het die prestigeryke Mercedes-Benz Meesterstitel in Keulen, Duitsland in 'n uitspeelwedstryd teen Denemarke se Anders Hansen gewen. Die spelers het die toernooi op 13 onder syfer afgesluit. Kingston het ongeveer R3,500,000 met 'n gelyk-aan-syfer telling op die eerste uitspeelputjie gewen.

турецкая баня цена

Haaie boelie kalfies op Loftus

Chris Jordaan van die Haaie duik vir Francois Hougaard in gister se wedstryd

Ja, die Haaie het gister op Loftus met 29-23 gewen, in ‘n groot mate te danke aan die pogings van hulle ingevoerde losskakelster, Juan Martin Hernandez, wat 24 punte gemaak het. Maar die Natallers is ongetwyfeld baie onrustig uit Pretoria uit. Volgende week kom die groot Haaie en die groot Bulle terug vanuit die verre vreemde waar hulle Springbokke was.

En ja, die Haaie sal darem baie meer manhaftig wees met Smit, Du Plessis, Muller, Kankowski, Pienaar en Frans Steyn in die poel. Die Bulle, dié weet die Haaie, wag vir veel magtiger versterkings, beeste soos Steenkamp, Matfield, die pyniger Bakkies Botha, Pierre Spies, Fourie du Preez en die nuwe Koning van Loftus, Morné Steyn. Die Blou Bulle herinner dan… wagwagwag. Daar’s nog Danie Rossouw ook. Hoe goed ís ‘n span as hulle jou van Danie Rossouw laat vergeet. So, die Blou Bulle herinner dan alteveel aan ‘n span wat onlangs die Super 14 gewen het.

Gister was dus die laaste maklike wedstryd vir enige Blou Bul-opponent. Vir ‘n maklike wedstryd was dit dan ook nie so danig maklik nie. By tye het die Kalfies darem alteveel na befoeterde brahmane gelyk en met sluitingstyd was dit die Haaie wat gebid het die tyd moet omgaan. Dit was inderwaarheid die Blou Bulle wat in die eerste helfte die Haaie in klein sirkels laat swem het en 12-6 met lemoentyd voor was.

Na rustyd het die geslepe Haai-veterane met hulle bejaarde, maar uitmuntende, kaptein op heelagter, Stefan Terblanche, wat die Blou Kalfies se koppe laat draai het met presiese grootmensrugby. Hernandez het deurgesypel vir ‘n drie en toe Jacques Botes ook. Die agterstand is uitgewis en ‘n voorsprong opgebou.

Teen die einde was dit egter die Haaie wat soos Jacob Zuma se regspan moes verdedig. Selfs hulle beste pogings was nie genoeg om Werner Kruger te keer om ‘n stutdrie met die Bulle se handelsmerk daarop te druk nie. In die laaste minuut was die Blou Bulle ‘n aangee daarvan af om die wedstryd uit die Haaie se kake te ruk.

So, die Haaie het gewen. Hierdie seisoen se Bulletjierugby is nou verby. Volgende week begin die ware Curriebekerstryd.

Die Haaie het 29 punte gekry. Juan Hernandez het ‘n drie, twee verdoelings, vier strafskoppe en ‘n skepskop aangeteken.

Die Blou Bulle se 23 punte bestaan uit ‘n drie deur Werner Kruger, vier strafskoppe van Burton Francis en twee deur Francois Brummer.

ыгри для дивчат кухня