renosters – Bladsy 2

Vyf vermeende renosterstropers aangekeer

Vyf vermeende renosterstropers het Maandag in die KwaMsane Landdroshof in Kwazulu-Natal verskyn waarna hulle op R5 000 borgtog elk vrygelaat is, het News24 berig.

Die vyf mans is 13 Junie in hegtenis geneem na ‘n wenk dat renosterstropers op pad was om ‘n renoster in die Umfolozi-gebied te stroop.

Polisie het die vyf omstreeks sewe-uur die aand naby Mfekayi voorgekeer. Daar is beslaggelê op ‘n jaggeweer, ammunisie, ‘n byl, knaldemper en ander tipiese strooptoerusting.

Polisiewoordvoerder Vish Naidoo sê dit blyk dat die stropers besluit het om renosters in die Umfolozi-gebied te teiken nadat groter polisiesigbaarheid in die Isimangaliso-wildreservaat stroperaktiwiteit aan bande gelê het.

Die vyf mans staan tereg op aanklagte van sameswering om renosters te jag, sowel as die onwettige besit van vuurwapens en ammunisie. Die saak is tot 28 Julie uitgestel.

Duitse popster wil Namibiese renosters red

‘n Derde witrenoster is op die wildsplaas Okamahoro wes van Okahandja in Namibië gestroop, het die Republikein berig.

Volgens die polisie van die Otjozondjupastreek is die renoster met 10 geweerskote neergevel. In Mei is ook twee witrenosters op dié plaas gestroop. Niemand is nog in hegtenis geneem nie en die ondersoek duur voort.

Intussen het die opbrengs van ’n potjie poker op Swakopmund die boerpot van die Red die Renosterfonds (SRT) geword.

Die wedgeld beloop N$100 000 en is deur ’n merkwaardige seun van dié dorp tot die laaste sent vir die bewaring van die bedreigde swartrenosterspesie geskenk.

Die jong man, Christoph Thesen, ’n Duitse popster met die verhoognaam T-Zon, se pa, mnr. Werner Thesen van Swakopmund, het die oorhandiging van die geld aan die voorsitter van die SRT, mnr. Simson !Uri?Khob, waargeneem.

Saam met die oorhandiging was daar ’n onderneming van die jong kunstenaar met Duitsland aan sy voete dat soortgelyke ondersteuning ook in die toekoms van hom verwag kan word.

Die potjie poker is vanjaar in Mei in Hamburg gespeel en Christoph was as “baie belangrike kunstenaar” genooi om daar op te tree. Dit was ’n spel in belang van liefdadigheid wat deur ’n internetmaatskappy, pokerstar.de, aangebied is. Toe stap Christoph met die wedgeld weg.

“Dis ’n mannetjie met ’n groot hart,” het sy pa tydens die oorhandiging gesê. “Hy is deurentyd bewus van sy welsynsverpligtinge. Hy het gehoor van die renosterstropery in sy geboorteland en het onmiddellik besluit om tot die bewaring van die swartrenosters by te dra.”

Christoph is in 1993 op Swakopmund gebore en het ná drie jaar in Windhoek in 2011 aan die DHPS gematrikuleer. As 12-jarige seun het hy reeds sy eerste liedjies geskryf en vrygestel. In 2012 het hy by die Makro Media-akademie in Keulen ingeskryf en in 2015 was hy gekwalifiseer om spesiale geleenthede aan te bied.

Sy loopbaan het as YouTube/rap/hip-hop kunstenaar ontwikkel. In 2014 het sy eerste album, Doppelleben.

Vroeër vanjaar het hy meer as 20 verhoogoptredes in Duitsland en Oostenryk gelewer. Sy tweede album is op pad en teen September behoort sy tweede Europese toer te begin.

Prins wil glo renosters in Namibië kom oppas

Kensington-paleis in Londen wou nie berigte in Brittanje en Namibië, dat prins Harry binnekort Namibië gaan besoek, bevestig of ontken nie.

Volgens verskeie berigte sal prins Harry ’n deel van sy besoek van drie maande in Afrika toewy aan pogings om die bedreigde swartrenoster te help red.

Die adjunk-kommunikasiebestuurder van Kensington-paleis, Nick Loughran.

Die 30-jarige prins gaan glo Brittanje einde van die maand verlaat en na Namibië se noord-westelike Kunenestreek vertrek waar hy gaan leer hoe om renosters en woestynolifante te help beskerm.

Volgens die Daily Mail het hy dié projek bo honderde ander omgewingsbewaringsprojekte gekies nadat hy gelees het oor die werk van die Namibiese bewaringsgebiede en die Save The Rhino Trust.

Renosterstropers teiken Namibië

Met 60 renosters al vanjaar gestroop, waarvan 54 in die Etosha Nasionale Park, het die Namibiese ministerie van die omgewing en toerisme sy beloning verdubbel, het die Republikein berig.

“Genoeg is genoeg,” het die minister van die omgewing en toerisme tydens ’n nuuskonferensie in Windhoek oor die onwettige stropery van renosters en olifante gesê.

Die statistieke oor renosterstropery staan op 60 vir vanjaar teenoor 24 vir 2014. Wat olifante betref, is 23 in 2015 vir hul ivoor gestroop teenoor verlede jaar se 78.

Die minister het wel aangedui dat die spoor van verdagte renosterstropers in Etosha en die Palmwag-konsessie (waar ses renosters vanjaar gestroop is) gevolg word “en is dit net ’n kwessie van tyd voor hulle in hegtenis geneem sal word”.

Volgens hom werk die ministerie nou saam met ander wetstoepassers en bewaringsorganisasies om kort en langer termyn strategiese maatreëls in te stel wat menslike kapasiteit, waarneming, patrollies en opsporing insluit.

“Ons werk steeds nou saam met die Namibiese polisie en weermag om voete op die grond te hê en ons patrollies op te skerp. Ons het teenwoordigheid in die Etosha en Bwabwata Nasionale Parke en die Palmwag-konsessie. Lugpatrollies word ook deur die polisie en weermag uitgevoer,” het die minister gesê.

Lede van die polisiemag is van 40 tot 140 vermeerder.

Hy sê meer hulpbronne word belê om die onwettige jag van renosters en olifante te voorkom en “die situasie word as ’n prioriteitsmisdaad beskryf en daarom moet meer hulpbronne in ons pogings belê word om dié misdaad te stop”.

Hy het beklemtoon dat “niks onder die mat ingevee sal word nie”.

Hy het ook gesê dat twee gebiede in die park geteiken word, naamlik die noordelike en suidwestelike dele.

“Al die inligting van elke renosterkarkas moet ná die nadoodse ondersoek verwerk word, asook die ballistiese toetse op die vuurwapens en met voorvalle gekoppel word.

“Dieselfde vuurwapens is waarskynlik deur dieselfde stropers gebruik, maar die stropers maak nou van outomatiese gewere in plaas van jaggewere gebruik,” het Shifeta gesê.

Die adjunkminister het gesê “Alhoewel die kriminele ons uitoorlê het, die nasie nie paniekerig oor renosterstropery moet raak nie. Vroeër of later sal ons resultate hê.”

Die ministerie het ook ’n nasionale wildbeskerming- en sekuriteitskomitee op die been gebring wat as nodige platform vir alle rolspelers sal dien.

Verteenwoordigers van die Namibiese Professionele Jagtersvereniging (Napha) was ook gister by die nuuskonferensie teenwoordig, asook mnre. Jofie Lamprecht van Jofie Lamprecht Safaris en Henri Slabbert van The Next Generation Conservation Trust.

Saam met Help Our Rhinos Now Namibia (HoRN.Nam) wil hulle ’n verenigde front skep.

Nog ‘n renoster val in Etosja

Die eerste renosterkarkas wat vanjaar in die Etosja Nasionale Park gestroop is, is Vrydag gevind. Dit is die vierde karkas wat in vyf maande in dié spogpark gevind is, het die Republikein berig.

’n Karkas van ’n jong renoster met drie koeëlwonde is Vrydag deur toeriste by ’n watergat by Dolomite Camp aan die westekant van die park gevind.

Die hoof van die polisie se eenheid vir beskermde spesies (PRU), hoofinspekteur Barry de Klerk, het gister die voorval aan Republikein bevestig.

“Dit is bevestig dat ’n renosterbul geskiet is. Hy het sowat ses kilometer ver gehardloop nadat hy gekwes is en by die watergat geval en gevrek,” het De Klerk gesê. “Die horings is nie verwyder nie. Volgens parkbeamptes is die bul sowat vyf jaar oud.”

’n Windhoekse egpaar wat die naweek by Dolomite Camp was, sê hulle is belet om by die watergat in te gaan, want parkbeamptes was glo besig met ’n operasie.

“Later het hulle weer verby ons gery en dit het gelyk of daar iets agterop die lorrie gelê het. Daar was ’n klomp regeringsvoertuie,” het die man gesê.

Die eerste renosterkarkas wat in Etosja gevind is, was einde Oktober verlede jaar in die suidwestelike gedeelte van die park gekry. Die horings van die swartrenosterbul was verwyder.

Die renoster was met ’n naspoortoestel toegerus en toe die sein skielik verdwyn, het natuurbewaarders na die renoster gaan soek en die karkas in die omgewing van Otjovasandu gekry. Dit word vermoed dat die renoster twee of drie dae voor die karkas gevind is, gestroop is.

In November is nóg twee renosterkarkasse met hul horings verwyder in Etosja gevind.

Die twee karkasse is sowat drie tot vier kilometer van mekaar in die omgewing van Ombika gevind.

Volgens die ministerie van die omgewing en toerisme is die een moontlik in Februarie 2014 gestroop en die ander karkas was sowat twee tot drie maande oud.

Een van die verdagtes van renosterstropery in Etosha, dr. Gerson Kandjii, die voormalige spandokter van die Brave Warriors, is tans in aanhouding saam met vier ander beskuldigdes, nadat hy van die onlangse moord op mnr. Reinhard Schmidt, die Duitse eienaar van die Namibië Hoodia Jagplaas naby Kalkrand, aangekla is.

Minstens 34 renosterkarkasse is verlede jaar in Namibië gevind.

Polisielede vas vir renosterspropery

Drie polisiebeamptes en ‘n eertydse wildbewaarder sal na verwagting Dinsdag in die Nelspruit-streekshof verskyn in verband met renosterstropery.

Die beskuldigdes het in November in die hof verskyn maar die saak is uitgestel weens ‘n vertraging met die dossiere van die beskuldigdes wat in Mei in hegtenis geneem is na ‘n gesamentlike operasie deur die Valke en SANPark.

Die vier staan tereg op aanklagte van sameswering om renosters te jag en die onwettige besit van vuurwapens en ammunisie.

Lt.genl. Solomon Makgale, nasionale woordvoerder van die polisie, het destyds gesê parkbeamptes het ŉ wenk ontvang waarna hulle ŉ gemerkte Skukuza-polisiebakkie van die pad af getrek het. Daar is op ŉ .375-jaggeweer, ŉ knaldemper, ammunisie en toerusting vir stropery beslag gelê.

Veldwagter se seun steel glo voertuig vir stropery

Twee vermeende renosterstropers wat glo ‘n oop wildbesigtigingsvoertuig van ‘n nabygeleë hotel gesteel het om ‘n witrenoster by die Nasionale Krugerwildtuin se Paul Kruger-hek te stroop, het verlede Donderdag weer in die Nelspruit Streekshof verskyn, het die Laevelder berig.

Excellent Blues Shabangu (28) en Tsepo Mashele (28), die seun van Phalaborwa-streeksveldwagter mnr. Derrick Mashale, staan beide tereg op agt klagtes nadat hulle op 7 April 2014 gearresteer is. Die ontdekking van ‘n witrenoster se karkas ongeveer vyf kilometer van die Paul Kruger-hek het tot hul arres gelei. Die renoster se horing was glo op daardie stadium reeds gestroop.

Senior staatsaanklaer me. Ansie Venter het die staat se saak vir die eerste keer op 3 Oktober 2014 aan die hof voorgehou. Die twee beskuldigdes word aangekla van sameswering tot renosterstropery deurdat hulle na bewering ‘n Toyota Hilux-wildvoertuig gebruik het om ‘n witrenoster te stroop, sonder dat die voertuig se eienaar tot die gebruik daarvan toegestem het.

Hulle word ook aangekla daarvan dat hulle ‘n witrenosterhoring gesteel het. Verdere klagtes van onwettige vuurwapenbesit en die onwettige besit van ammunisie met die doel om die witrenoster te jag, en handeldryf in witrenosterhoring sonder ‘n permit, staar hulle ook in die gesig. Laastens woord hulle van onwettige jag in die Skukuza-omgewing aangekla.

Shabangu en Mashele se saak is tot 26 Maart uitgestel. Beide beskuldigdes sal tot dan in aanhouding bly.

Twee stropers doodgeskiet

Twee renosterstropers is doodgeskiet en ses is in hegtenis geneem, het RSG berig.

SanParke sê in die eerste voorval het veldwagters van Krokodilbrug op drie vermeende renosterstropers afgekom.

Hulle is agterna gesit en twee is noodlottig gewond, terwyl die derde oor die grens na Mosambiek gevlug het.

‘n Jaggeweer, ammunisie en ander toerusting is gekry.

In die tweede operasie is ses verdagtes buite die westelike grens van die Nasionale Krugerwildtuin deur SanParke se Omgewingsmisdaad-ondersoekeenheid in hegtenis geneem.

Daar is beslag gelê op ‘n jaggeweer, ammunisie en twee motors.

Die inhegtenisnemings is die jongste in twee weke van suksesvolle operasies, waartydens 35 vermeende renosterstropers aangekeer is.

Valke-lid deel van stropersindikaat

‘n Lid van die Valke. ‘n grootwildjagter, ‘n prokureur, en vlieënier is onder die tien beskuldigdes wat Maandag in die landdroshof in Hatfield verskyn het op 318 aanklagte wat verband hou met renosterstropery.

Die tien staar ook klagtes van diefstal en geldwassery in die gesig.

Willie Oosthuizen van die Valke, Hugo en Anton Ras, Hugo se vrou Trudie, Mandla Magagula, Joseph Wilkinson (prokureur), Bonnie Steyn (vlieënier), Arno Smit, Christopher Scheepers, en Willem van Jaarsveld is nie gevra om te pleit nie.

Hugo Ras het Vrydag in die landdroshof in Pretoria-Noord verskyn op aanklag wat ook met renosterstropery verband hou toe hy deur die Valke in hegtenis geneem is.

Die ander beskuldigdes is Vrydag in Polokwane, Ficksburg in die Vrystaat, Mamelodi, Potchefstroom en Kameeldrift in hegtenis geneem.

Volgens ‘n woordvoerder van die Valke, Paul Ramaloko, was Ras vermoedelik die leier van die stropersindikaat.

Hulle is reeds vyf jaar lank in Limpopo, KwaZulu-Natal, Gauteng en Mpumalanga bedrywig.

Hulle word daarvan beskuldig dat hulle 22 renosters tussen 2008 en 2012 gestroop het en 84 renosterhorings ter waarde van R22 miljoen onwettig bekom het.

Sowat 52 horings was vermoedelik afkomstig van gestroopte renosters terwyl die res gesteel is.

Nog ‘n stroper doodgeskiet in Krugerwildtuin

Wildbewaarders in die Nasionale Krugerwildtuin in Mpumalanga het ‘n 35-jarige vermeende renosterstroper doodgeskiet, het RSG berig.

Die polisie sê veldwagters op patrollie het op twee verdagte mans afgekom. Een van die mans het na bewering ‘n vuurwapen op die veldwagters gerig waarna hulle skote afgevuur het.

Die man is op die toneel dood. Die ander man het daarin geslaag om te vlug.

Olifantbul vir sy tande doodgeskiet in Krugerwildtuin

Dis nie net meer renosters wat vir hul horings bedreig word nie.

‘n Olifant is in die Pafuri-streek van die Nasionale Kruger-wildtuin vir sy tande gestroop.

Die hoof van SanParke se teen stropingseenheid, Johan Jooste, sê die stropers het die olifantbul eers doodgeskiet en daarna sy tande uitgeslag.

Dié stropery is die eerste so ‘n voorval die afgelope dekade.

Spoorsnyers het die spore van vier mense na Mosambiek gevolg.

Volgens SANparke is teen-stropingsveldtogte die afgelope tyd eerder daarop gemik om renosterstropery te bekamp.

Met die volgehoue olifantstropery in die res van Afrika wat dit egter slegs ‘n kwessie van tyd voordat dié bykomende plaag Suid-Afrika weer sou tref.

Stropers ontsnap uit polisieaanhouding

Drie vermeende renosterstropers is oor die naweek in die Krugerwildtuin in hegtenis geneem, het SANParke Maandag gesê.

Een persoon wat Saterdag vasgetrek is, het egter ontsnap, en Sondag het drie van die groep wat aangekeer is, weggekom.

Reynold Thakhuli, woordvoerder, het in ’n verklaring gesê drie vermeende stropers is in hegtenis geneem, alhoewel die aangehoudenes ontsnap het.

Die polisie het beslag gelê op ’n jaggeweer, ammunisie en strooptoerusting.

Volgens Thakuli is ’n soektog na op tou gesit na die vermeende stropers.

Nog twee renosters in Noordwes gestroop

Die Noordwes Parke en Toerismeraad sê nog twee renosters is in die provinsie gestroop, wat die totaal vir die jaar op tien te staan bring, het RSG berig.

Dit volg nadat die Lehurutshe-landdroshof naby Zeerust, gister tien jaar tronkstraf aan Hans Skhosana opgelê het vir renosterstropery.

Sy medebeskuldigde verskyn op 26 Maart in die hof.

Die raad sê in die jongste voorval is ‘n renoster Sondagaand in die Rustenburg-gebied geskiet en van sy horing gestroop.

Niemand is nog in hegtenis geneem nie.

Wildbedryf boer vooruit

‘n Belegging in wildboerdery kan dié van eiendom en die Johannesburgse aandele-indeks oortref, sê wildboere.

Wildboerdery sal na verwagting in die nabye toekoms die plaaslike boerderybedryf oorheers.

‘n Ekonoom in die wildbedryf, Flippie Cloete, het by ‘n boerdedag op Klippan naby Mahikeng in Noordwes uitgewei oor die ekonomiese lewensvatbaarheid van dié soort boerdery.

Cloete sê met die prys van ‘n buffel wat op meer as R20 miljoen geraam word, dui die stygende wildpryse op groei in die wildbedryf.

Die jaarlikse omset het gegroei van R62 miljoen tot R864 miljoen oor die afgelope tien jaar, soos gemeet deur Vleissentraal se veilings, en daar is nog baie potensiaal het ontleders vroeër gesê.

Wiaan van der Linde, eienaar van Winterhoek, ‘n wildplaas buite Kimberley en Wildbedryf Suid-Afrika (WRSA) se direkteur, sê wildboerdery gee ‘n hoër opbrengs per hektaar as enige ander boerdery-aktiwiteit.

“Die meeste mense plaas in elk geval tussen 20-30% van hul beleggingsportefeuljes in riskante beleggings. Hulle kan ‘n opbrengs van 28-42% konserwatief gesproke verwag,” verduidelik hy.

Hoër kapitale belegging is nodig met al die seldsame wildsoorte, soos buffels, renosters, swart rooibokke, swartwitpense en Livingstone-elande.

Dit skep geleenthede vir beleggers wat nie boere is nie, mense soos Cyril Ramaphosa en Johann Rupert. “Die nuwe soort belegger sal ook sien dat ons die huidige hoë vlakke van opbrengs handhaaf,” sê Van der Linde .

Die grootste deel van die inkomste oor die afgelope tien jaar was uit skaars diersoorte ( R788 miljoen) , maar na verwagting sal die prys van koedoes, byvoorbeeld eksponensieel groei.

Eers is daar R7 000 vir ‘n koedoebul betaal, maar nou haal hulle tot R800 000. Dit gaan alles oor die lengte van die horings.

In 2012 het buffels die hoogste gemiddelde prys van enige dier gehaal met meer as R800 000 gemiddeld en 37% van die bedryf se omset.

Dieselfde dier het gemiddeld R610 550 in 2011 en R424 050 in 2010 gekos.

Die gemiddelde prys is egter steeds heelwat minder as die R40 miljoen wat Johann Rupert vir ‘n Kaapse buffelbul uitgehaal het.