Nóg mense in hegtenis weens plundery in Soweto

Die aantal mense wat tot dusver weens plundery van winkels in Soweto aangekeer is, het tot 178 gestyg, luidens ‘n verklaring van die Suid-Afrikaanse Polisiediens wat gister uitgereik is.

Tot dusver is 178 verdagtes in hegtenis geneem… Ses van hulle is minderjariges wat onder die toesig van hul ouers vrygelaat is, op voorwaarde dat hulle in die hof moet verskyn,” se luitenant-generaal Solomon Makgale.

Polisiemanne steur hul nie aan 'n winkel wat agter hulle geplunder word nie. Foto: Alon Skuy
Polisiemanne steur hul nie aan ‘n winkel wat agter hulle geplunder word nie. Foto: Alon Skuy

Van die 178 wat in hegtenis geneem is, het 83 reeds in die Protea-landdroshof verskyn waar hul sake tot 28 en 29 Januarie uitgestel is. Hulle bly in aanhouding.

Volgens die luitenant-generaal sal die oorblywende 95 verdagtes, waaronder die minderjariges, vandag in die Kagiso- en Protea-landdroshowe verskyn.

Hulle word van openbare geweld en die besit van gesteelde goedere aangekla.

Dié man is duidelik in sy noppies oor sy gratis tamaties wat op 22 Januarie in Soweto gebuit is.
Dié man is duidelik in sy noppies oor sy gratis tamaties wat op 22 Januarie in Soweto gebuit is.

Makgale meen dat die naweek redelik stil verloop het in al die gebiede waar plundery voorheen aangemeld is.

“Hoewel die situasie tans rustig is, sal die polisie ‘n ogie hou oor dinge sodat daar vinnig opgetree kan word indien voorvalle van misdaad aangemeld word.”

Polisieversterkings is in al die gebiede ontplooi totdat wet en orde herstel kan word.

“Ons moedig ook lede van die publiek aan om plundervoorvalle aan te meld en winkeleienaars om nie die reg in eie hande te neem nie,” sê hy.

Plundery het oral in Soweto losgebars nadat ‘n tienderjarige swarte verlede Maandag doodgeskiet is, na bewering deur ‘n buitelandse winkelier in Slangpark naby Dobsonville.Inwoners het uit weerwraak alle winkels wat aan buitelanders behoort, begin plunder. Hierna het die gedrag na ander dele van Soweto uitgebrei en teen Donderdag het dit na Kagiso aan die Wes-Rand en Sebokeng in die Vaaldriehoek oorgespoel.

Drie mense is dood en meer as 160 is in hegtenis geneem. Die ongevalle sluit ‘n baba in wat doodgetrap is toe die kind se ma haar in die harwar toe mense weghardloop, laat val het. Die winkelier wat daarvan beskuldig word dat hy die tienderjarige doodgemaak het, sal ook vandag in die hof verskyn, tesame met ander wat op aanklagte van openbare geweld in hegtenis geneem is.Intussen berig AFP dat die plundery van Chinese winkels in Kinshasa in die DRK ook oor die afgelope paar dae uitgebreek het. Kongolese winkeliers kla dat die Chinese hul goedere te goedkoop verkoop, wat veroorsaak dat hulle nie ‘n bestaan kan maak nie. Chinese winkeliers het tekens op hul winkels gesit wat lui:”Moenie ons plunder nie. Dis u winkels óók!”

SAIR: Polisie is ‘n staatsondersteunde ‘misdaadbende’

‘n Verslag wat Woensdag deur die Suid-Afrikaanse Instituut vir Rasseverhoudinge (SAIRV) vrygestel sal word, beskryf die Suid-Afrikaanse polisie as ‘n staatsondersteunde misdaadbende.

Getiteld “Broken Blue Line 2”, dui die verslag daarop dat oortredings nie meer net “geïsoleerde voorvalle” is nie, maar ‘n “patroon van misdadige gedrag” volg.

“Van die polisie word verwag om misdaadbendes te infiltreer. In Suid-Afrika het misdaadbendes die polisie geïnfiltreer. Dit is miskien die vreesaanjaendste en belangrikste bevinding,” lui die verslag.

Die SAIRV se inligting is gegrond op 100 gevalle tussen April 2011 en Januarie 2015 van ernstige misdade wat wissel van moord en verkragting tot roof, waarby polisielede betrek word. Dit studie sluit nie eens gevalle van korrupsie en omkopery in nie.

Die korrupte en veroordeelde Jackie Selebi, die eerste swart polisiehoof, het die mag van 100 000 tot 155 000 laat aangroei met swart aanstellings.

Selebi het dadelik ook gesorg dat hy die gespesialiseerde narkotikaburo ontbind as guns aan sy vriend die dwelmbaas Glenn Agliotti en daarmee toegesien dat die polisie die dwelmverspreider van voorkeur word.

‘n Kultuur van nepotisme, transformasie, rassebeheptheid, onbevoegdheid en wanbestuur heers glo binne die SAPD, het oud-polisielede gesê. Wit lede met ervaring het byna geen kans op bevordering nie.

Nie een van die bepalings in 2012 se Nasionale Ontwikkelingsplan (NOP) dat offisiere van die polisie geoudit moet word om te sien of hul vaardighede en kwalifikasies op peil is, is intussen nagekom nie.

Die verslag sal Vrydag aan genl. Riah ­Phiyega, die nasionale ­polisiehoof, oorhandig word.

Duisende diensvuurwapens wat jaarliks “wegraak” word deur polisielede aan misdaadsindikate verkoop.

Net verlede week het ‘n polisie-kolonel in die hof in Vereeniging verskyn nadat sy betrokkenheid by die beweerde verskaffing van wapens aan bendes op die Kaapse Vlakte aan die lig gekom het.

‘n Egpaar is ook in dieselfde week in die ooste van Pretoria gekaap deur lede in polisie-uniforms met polisietoerusting. Die SAPD het erken polisielede moontlik by die roofbende betrokke is.

Selebi na koma dood

Jackie Selebi, voormalige polisiekommissaris, is Vrydagoggend in die ouderdom van 64 oorlede, nadat hernude bespiegelinge oor sy paroolvrylating deur die omstrede regter Desai weer ter sprake gekom het.

Die regter wat voorheen oor Selebi se siektetoestand moes besluit, Siraj Desai, het dié week bevind dat Sunette Bridges haatspraakkommentaar op haar blad vergoeilik het.

Desai, ‘n Kaapse regter, is in 2004 van verkragting van ‘n vigswerker van Bela-Bela in ‘n weelderige hotelkamer in Moembaai verdink.

Zizi Kodwa, woordvoerder van die ANC, het gesê dat die departement van korrektiewe dienste Selebi se dood bevestig het.

Eyewitness News berig dat Schabir Shaik, Selebi se vriend, medeparoolvrygelatene en ywerige gholfspeler, eweneens vanoggend die nuus meegedeel is. Die twee het saamgewerk in Shellhuis in die vroeë 90’s.

Selebi was glo die afgelope twee en ʼn half weke in ʼn geïnduseerde koma.

Selebi is in 2010 skuldig bevind aan korrupsie en is tot 15 jaar tronkstraf gevonnis. Hy het in Desember 2011 by sy huis inmekaargesak nadat sy finale appèl misluk het.

Selebi is in 2012 op mediese parool vrygelaat nadat hy volgens berigte met nierversaking, hoë bloeddruk en diabetes gediagnoseer is, maar is kort na sy vrylating in ‘n “kritieke toestand” opgemerk waar hy lustig en sonder bystand inkopies doen by ‘n besige winkelsentrum.

Clive Derby-Lewis word steeds parool geweier, ten spyte van sy ernstig verswakkende gesondheidstoestand.

Blade dreig terwyl studente op universiteite toesak

Die Minister van Hoër Onderwys, Blade Nzimande, het dit duidelik gemaak dat geweld by universiteite nie geduld sal word nie, het RSG berig.

Registrasie by die Universiteite van Pretoria en die Witwatersrand is ontwrig. Studente by Wits het gedreig om die universiteit af te brand indien hulle nie staatsbeurse kry nie.

Nzimande sê geweld is heeltemaal onaanvaarbaar en hy sal optree teen diegene wat daarvoor verantwoordelik is. Hy sê om biblioteke af te brand, is ‘n tree terug vir die land.

Nzimande sê hy het die kwessie geopper toe hy studenteverteenwoodigers in Pretoria toegespreek het.

Die Tshwane Universiteit van Tegnologie het intussen gesê hy sal sowat vyfduisend studente nie met finansiering kan bystaan nie.

Die universiteit het 475 miljoen rand van die Nasionale Studente Finansiële Hulpskema, of NSFAS, vir die akademiese jaar gekry. Die universiteit het meer as 90 000 aansoeke van eerstejaarstudente ontvang.

Die waarnemende visekanselier, Lourens van Staden, sê hulle sal hulle bes probeer om te verseker dat van die studente bygestaan word.

Van Staden sê universiteite kan ook nie verwag dat die regering in al die land se behoeftes sal voorsien nie en sal dus ook hulle kant moet bring.

Veldwagter se seun steel glo voertuig vir stropery

Twee vermeende renosterstropers wat glo ‘n oop wildbesigtigingsvoertuig van ‘n nabygeleë hotel gesteel het om ‘n witrenoster by die Nasionale Krugerwildtuin se Paul Kruger-hek te stroop, het verlede Donderdag weer in die Nelspruit Streekshof verskyn, het die Laevelder berig.

Excellent Blues Shabangu (28) en Tsepo Mashele (28), die seun van Phalaborwa-streeksveldwagter mnr. Derrick Mashale, staan beide tereg op agt klagtes nadat hulle op 7 April 2014 gearresteer is. Die ontdekking van ‘n witrenoster se karkas ongeveer vyf kilometer van die Paul Kruger-hek het tot hul arres gelei. Die renoster se horing was glo op daardie stadium reeds gestroop.

Senior staatsaanklaer me. Ansie Venter het die staat se saak vir die eerste keer op 3 Oktober 2014 aan die hof voorgehou. Die twee beskuldigdes word aangekla van sameswering tot renosterstropery deurdat hulle na bewering ‘n Toyota Hilux-wildvoertuig gebruik het om ‘n witrenoster te stroop, sonder dat die voertuig se eienaar tot die gebruik daarvan toegestem het.

Hulle word ook aangekla daarvan dat hulle ‘n witrenosterhoring gesteel het. Verdere klagtes van onwettige vuurwapenbesit en die onwettige besit van ammunisie met die doel om die witrenoster te jag, en handeldryf in witrenosterhoring sonder ‘n permit, staar hulle ook in die gesig. Laastens woord hulle van onwettige jag in die Skukuza-omgewing aangekla.

Shabangu en Mashele se saak is tot 26 Maart uitgestel. Beide beskuldigdes sal tot dan in aanhouding bly.

Kantoorgebou in Centurion ontruim na antraksdreigement

‘n Kantoorgebou in Cambridge Office Park in Highveld, in Centurion is Donderdagmiddag ná ‘n antraksdreigement ontruim. Antraks of miltkoors is ‘n dodelike bakteriële stof.

Hugo Erasmus, voorsitter van die Lytteltonse Gemeenskapspolisiëringsforum (GPF) sektor 1, het gesê die gebou is rondom drieuur ontruim toe ‘n wit poeier gekry is.

Erasmus, wat op die toneel was, het gesê ‘n pakkie is uit die gebou ontruim. Die bomeenheid het die pakkie verwyder wat op die toneel was met die stof.

Erasmus het verduidelik dat mense nie toegelaat is om die toneel te verlaat nie en is tydelik onder kwarantyn geplaas.

Miltkoors is ‘n dodelike en hoogs aansteeklike siekte wat feitlik alle mak (byvoorbeeld beeste, skape, bokke) en wilde (byvoorbeeld koedoe, buffel, sebra) diere aantas en word veroorsaak deur die bakterie Bacillus anthracis.

Miltsiekte tas die mens ook aan. Diere vrek baie gou aan miltsiekte weens ‘n dodelike septisemie (bloedvergiftiging). Die belangrikste letsels is wydverspreide bloedings, swellings (edeem) en die afsterf van weefsels.

Diere met miltsiekte skep ‘n ernstige gevaar vir die mens. Dit is ‘n beroepsiekte vir persone wat noue kontak met diere het, sowel as werkers wat met wol en huide asook bloed- en beenmeel werk.

Polisie sê Soweto-geweld is onder beheer

Buitelanders moes uit Soweto vlug, of skuiling gaan soek by polisiestasies in die gebied, ná die jongste vlaag van geweld teen hulle.

Die geweld het Maandagaand uitgebreek nadat ‘n buitelandse winkeleienaar na bewering die 14-jarige Siphiwe Mahori in Snake Park doodgeskiet, omdat Mahori glo sy winkel wou beroof.

Die Gautengse polisiekommissaris, Lesetja Mothiba hou nietemin vol dat die polisie genoeg mannekrag het om die aanvalle onder beheer te bring.

Hy sê egter die polisie se nasionale leierskap is in kennis gestel dat bykomende magte op bystand moet wees.

Die polisie moes inderhaas ontplooi word om die plundery van winkels wat aan buitelanders behoort in Soweto hok te slaan. Volgens Lesetja is meer polisiebeamptes ontplooi in die gebiede wat deur die plundery geraak word.

Die geweld het in Soweto begin, en ook na Diepkloof en Kagiso versprei.

Asad Ali, wat ‘n selfoon-herstelwinkel gehad het, sê hy soek nou ‘n ander plek om sy winkel oop te maak.

Die adjunkvoorsitter van die Somaliese-vereniging van Suid-Afrika, Cassim Ali het die plundery as vreemdelingehaat én misdaad bestempel.

Meer as 120 mense is tot dusver in hegtenis geneem op aanklagte wat wissel van moord tot diefstal en die polisie het beslag gelê op tientalle onwettige vuurwapens.

Mothiba sê hulle is besig met ‘n ondersoek na waar die vuurwapens vandaan kom.

Drie polisiebeamptes, wat nie in uniform geklee was nie, het ‘n Sapa-verslaggewer glo Donderdag gedwing om foto’s van haar selfoon uit te vee wat sy van ‘n Somaliër se winkel in Dobsonville, Soweto, geneem het.

Die verslaggewer is afgetrek deur ‘n polisievoertuig nadat sy die foto’s geneem het.

“Die een beampte het oor my skouer geloer om seker te maak dat ek alles uitvee,” het Mpho Raborife gesê. “Hy het daarna gesê ek mag nie ʼn foto op die toneel neem nie, aangesien dit openbare geweld is, so dit val onder hulle jurisdiksie.

“Hulle het toe gesê ek mag in elk geval nie die foto’s neem nie omdat ek nie toestemming gevra het nie, en ek kan nie net by ʼn toneel opdaag en foto’s neem en dan wegry nie.”

Die polisie het haar verslaggewerskaart en selfoon by haar afgeneem. Daarna het die beamptes volgehou dat sy hulle na die Dobsonville-polisiestasie moet vergesel en geweier dat sy haar werkgewer bel. Hulle is uiteindelik nooit na die stasie nie.

Die polisiebeampte het volgehou dat sy nie daar mag foto’s neem en dit aan die publiek mag ‘uitlek’ nie. Hulle het haar selfoon en verslaggewerskaart teruggegee eers nadat sy die foto’s uitgevee het.

Mark van der Velden, redakteur van Sapa, het gesê die verslaggewer het haarself met haar verslaggewerskaart geïdentifiseer en alhoewel die polisiebeamptes in ʼn polisievoertuig was, het hulle siviele klere aangehad en het hulself nie voldoende geïdentifiseer nie. “Die feite tot dusver dui daarop dat die gedrag van die beamptes uiters onprofessioneel was en dit voldoen nie aan die prosedure nie. Die polisiebeamptes het klaarblyklik moeite gedoen om ʼn joernalis te intimideer en wou inligting in openbare belang onderdruk oor ʼn aktuele nuusstorie oor xenofobie.”

Volgens Van der Velden word die polisie verbied om enige media te dwing om foto’s uit te vee. Hy het bygevoeg dit is nog ʼn voorval van polisiebeamptes wat staande bevele verontagsaam.

Sapa gaan deur die Suid-Afrikaanse Nasionale Redakteursforum (Sanef) ʼn formele klag by die polisiekommissaris se kantoor aanhangig maak.

EFF dring daarop aan om soos Rooi Miere te lyk

Die EFF se hoofsweep, Floyd Shivambu het verklaar dat die party hom nie aan klereddragbepalings gaan steur nie.

Die parlementêre komitee het ‘n kleredragkode vir parlementslede bespreek. Die meeste opposisiepartye, waaronder die DA en IVP, asook die ANC stem egter saam dat ‘n kleredragkode nodig is.

Shivambu het aan die subkomitee van die Parlement se reëlskomitee gesê dat nie wette òf reëls die party sal keer om hulle rooi oorpakke in die Nasionale Vergadering te dra nie.

Die EFF se rooi oorpakke lyk op ‘n haar soos dié van die Rooi Miere wat as munisipale uitsmyters optree en onwettige krotte afgreek.

Shivambu het gesê partylede sal aanhou om rooi oorpakke en werkersklere te dra, ongeag wat die komitee se besluit.

Hy het met die gewone beperkte logika van sy party verklaar dat EFF-parlementslede “nie vir die ANC of die Parlement werk nie, maar vir die kiesers wat vir hulle gestem het”.

Alle belastingbetalers dra egter by tot die instelling en die verkose lede se vergoeding, selfs al stem hulle nie.

Plaasaanval in Namibië skok

Sy pa is erg getraumatiseerd en wil nie oproepe of besoekers in die private kliniek op Gobabis, Namibië ontvang nie.

Só sê mnr. Marius van Moltke, die seun van die bejaarde egpaar, mnr. Ackerman (Acker) von Moltke en sy vrou, Dorea, wat Sondagnamiddag op hul plaas deur twee mans aangeval is.

Die egpaar het by hul ander seun gaan kuier wat in die omgewing van Hochfeld boer. Met hul tuiskoms omstreeks 17:00 op hul plaas, Okatjombua, sowat 90 km noordoos van Gobabis op die Summerdownpad, is hulle deur twee vreemde mans ingewag, oorval, vasgebind en beroof.

“My man is 71 jaar oud, maar hy het soos ‘n jong man baklei,” het me. Von Moltke aan Republikein vertel, maar gister het dit emosioneel glad nie met hom goed gegaan nie.

“Ek dink die skok het nou eers ingetree; hy is erg getraumantiseerd,” het sy gesê van die oudonderwyser wat op Grootfontein geskiedenis onderrig het.

Hoe gaan dit met haar? “Ek bly staan. Hulle het my nie seergemaak nie.”

Von Moltke vertel met hul aankoms op die plaas het die twee mans (sy skat hul ouderdom in die vroeë dertigs) reeds toegang tot hul huis gekry.

“Alles was reeds uit die kaste gegooi. Hulle moes ons honde baie bang gemaak het. My man het die huis baie beveilig, maar hulle het die staaldeure met byle oopgekap.”

Sy vertel dat die aanvallers agter die dam moes geskuil het en hulle by die hek ingewag het: “Toe my man die hek agter ons toemaak, het hulle hom van agter bestorm en aangerand.”

Hy is met ‘n stomp teen sy kop geslaan, het ‘n groot wond op sy regterarm by sy skouer, ‘n groot snywond teen sy ribbes en talle meswonde en snye op sy lyf wat steke moes kry.

Volgens van Moltke kon haar man daarin slaag om die lem van een van die aanvallers se mes af te breek en in die dam te gooi, “maar toe ruk hy ‘n tweede mes uit en steek my man verder daarmee”.

Die egpaar is deur die aanvallers na die huis geneem en gedwing om die kluis oop te sluit, maar daar was nie geld in nie.

Hulle is in die badkamer vasgebind en toegemaak, maar die aanvallers kon nie die sleutel kry nie en die egpaar is toe in die enjinkamer toegesluit.

“My man het gelukkig ‘n mes in sy sak gehad en hy kon ons lossny. Toe ons die voertuig hoor wegry, het my man in sy toestand die hoeksteenslyper gevat en die staaldeur van die enjinkamer daarmee oopgesny.”

Von Moltke het dadelik met haar bebloede man hospitaal toe gejaag. Sy praat met lof van die buurtwag wat hul bystand verleen het met geld, ‘n selfoon en klere.

“Ons beursies met bankkaarte, selfone, my rekenaar en pistool is onder meer gesteel. Die gemeenskap het vir ons geld, ‘n selfoon en klere gebring,” vertel sy.

Die egpaar se bakkie is Maandag op Witvlei gevind met hul dokumente daarin. “Die aanvallers het vir ons gesê hulle gaan die bakkie êrens los.”

Von Moltke vertel dat hulle al sowat 18 jaar boer en sy kan nie glo dit met hulle gebeur het nie: “Ons werk alleen en het nie werkers op die plaas nie, so dit is nie ‘n geval van ‘n voormalige plaaswerker wat ‘n wrok teen ons dra nie. Dit is vreemde mense.”

Die polisie se streekskommissaris van Omaheke, komm. Josaphat Abel, het die voorval bevestig en gesê dat die ondersoek voortduur en geen verdagtes dusver in hegtenis geneem is nie.

“Die slagoffers is besig om goed te herstel en die bakkie is by Witvlei gevind. Ons ondersoek duur voort.”

Bron: Die Republikein

Swart skare sak toe op vrag vol beeste

ʼn Vragmotor wat beeste vervoer het, het Dinsdagmiddag naby die Grasmere-tolplaza omgeslaan en verongeluk nadat daar glo klippe van ʼn brug af gegooi is.

Volgens die Nasionale Dierebeskermingsvereniging (DBV) het ʼn skare swartes op die beeste toegesak. Alhoewel baie van die diere ernstig beseer is in die ongeluk, het die oorblywende trop van die tierende skare probeer vlug.

“Hulle bedoeling was om vleis van die lewende diere af te kap. Van die diere kon nie ontsnap nie en is deur die groep mense gesteel of opgekap.”

Volgens die DBV was die polisie, brandweer en ander reddingseenhede op die toneel om die skare te beheer en die beeste wat nog in die wrak vasgekeer was, te bevry. Die beeste wat nie gered kon word nie is op die toneel geslag.

Die bestuurder van die vragmotor is volgens berigte ernstig beseer, het Sapa berig.