Trevor Manuel sê mense moet nie soos hy geld uit politiek maak nie

Sonder verantwoordelikhede?
Sonder verantwoordelikhede?

Trevor Manuel, minister in die presidensie, het Maandag gesê Suid-Afrikaners moet nie soos hy geld uit politiek probeer maak nie.

Hy het gesê om sy voorbeeld te volg is nie die oplossing nie.

“Moenie na my kyk en sê dat omdat ek my geld uit politiek maak, is ek die oplossing nie. Ek is nie die oplossing nie. Ek dink ons moet anders na die kwessie kyk.”

Hy het Maandag ‘n toespraak by die Universiteit van Stellenbosch se Teologiese Dag gelewer oor die funksie van die Nasionale Ontwikkelingsplan (NOP).

Politici is nie die oplossing vir Suid-Afrika se probleme nie, het hy gesê.

Elkeen moet die verantwoordelikheid vir sosiale probleme op sy eie skouers neem en nie na politici soos hy kyk vir ‘n oplossing nie.

“Al het demokrasie vir elke Suid-Afrikaner die geleentheid gegee om eienaarskap te neem van wat in die land gebeur, is ons grootliks besig om die taak te wil oorhandig aan iemand anders. Ons weet dit gebeur. Ons reageer net nie daarop nie,” het hy gesê.

Volgens Manuel weet Suid-Afrikaners nie hoe aktiewe burgerskap werk nie, en dit lei tot swak demokrasie en uiteindelik korrupsie.

“Pak die probleme self aan,” het hy gesê. “Moenie wag tot met die verkiesing en dan jou skouers ophaal en sê dat jy nou gaan wag en sien wat die party vir jou gaan doen nie. Dis nie demokrasie nie.”

Hy het gesê die NOP beteken dat Suid-Afrikaners aktief betrokke moet raak.

Mandela se testament gelees

Zelda la Grange
Zelda la Grange lei Mandela

Nelson Mandela se testament van 40 bladsye wat Maandag gelees is, het belangstelling gaande gehad omdat daar reeds ‘n uitgebreide familietwis oor sy erflating woed.

Dit is Maandag onthul dat Mandela en Graca Machel, die weduwee van die afgestorwe Mosambiekse rewolusionêre leier, glo binne gemeenskap van goedere getroud was.

Machel is daarom geregtig op die helfte van Mandela se boedel.

Spesifieke items in die boedel is aan haar bemaak, maar sy kan baie meer opeis. Mandela se erflating is glo nagenoeg R46 miljoen werd, maar dit moet nog geëvalueer word.

Mandela het ook R50 000 aan verskeie van sy personeellede, onder wie Zelda la Grange, bemaak.

Zille se koalisie-kaartehuis stort in duie

Zille in haar kombuisbediende-mondering, sweep swart gemoedere op oor grond
Zille in haar kombuisbediende-mondering, sweep swart gemoedere op oor grond

Die DA en Agang se openbare gesoenery het toe niks vermag nie. Dr. Mamphela Ramphele en Helen Zille se baie kortstondige politieke bondgenootskap het binne net enkele dae in ‘n openbare vyandskap geëindig.

Dit volg na ’n ultimatum wat Zille aan Ramphele gestel het om deel te neem aan ‘n optog na Luthuli-huis teen die ANC. Ramphele – wat waarskynlik na ANC-vermanings besef het dit sou tot geweld lei – was beslis dat sy nie tot so iets ingestem het nie

Zille het Mampi-Rampi daarvan beskuldig dat “sy nie vertrou kan word nie”. Die DA-leier het pas ‘n grootskaalse swartsmeerskinderveldtog teen haar “beste vriendin” van stapel gestuur in ‘n poging om haar eie voortvarende politieke onbeholpenheid toe te smeer.

Die DA-leier, wat self met ‘n vertrouensprobleem en haar eie grootheidswaan worstel, het Sondagaand in ’n verklaring bevestig dat die DA en Agang SA se paaie gaan skei.

Die onverwagse vyandskap sal Maandag in afsonderlike nuuskonferensies in Johannesburg belig word.

Volgens die DA het hulle nuutaangewese presidentskandidaat in die komende verkiesing die ooreenkoms tussen die twee partye verbreek.

Ingeligte bronne binne die DA sê Zille is woedend omdat sy dit nie kon regkry om Mampi-Rampi se manipuleer nie.

Uiteraard sal dit beteken dat Mampi-Rampi ook nie meer die DA in die voorste gestoeltes in die komende algemene verkiesing sal verteenwoordig nie.

Ramphele se woordvoerder, Andrew Gasnolar, het Sondagaand bevestig dat sy nie meer die DA se presidentskandidaat sal wees nie.

Zille sê Ramphele het die die media, Agang-ondersteuners en die DA mislei deur aan elkeen ‘n ander verhaal voor te hou.

In werklikheid het Zille haarself en haar party met haar eie egoïstiese ywer en leë beloftes gesink.

Sy het deurentyd names Ramphele besluite geneem terwyl sy nie tred gehou het met die anti-DA sentiment onder Agang se ondersteuners nie. Praag het verlede week oor die ontevredenheid onder Agang-kiesers oor die skielike samesmelting berig.

Dié onverkwiklike toestand wat deur Zille se aandagsug meegebring is, het die ooreenkoms tussen die twee vryers gou laat versuur.

Beeld het Maandag Zille se beeld probeer red met ‘n emosiebelaaide, karakterskendende aanval teen Mampi-Rampi.

 

 

Oproer tref Limpopo en Gauteng

Die nasionale polisiekommissaris, Riah Phiyega sal na verwagting besoek aflê in Ha-Kutama, net buite Makhado in Limpopo, nadat oproer en geweld in die gebied uitgebreek het.

Gemeenskapslede het vier huise, twee voertuie en twee polisiemotors tydens die oproerogheid in ligte laaie gelaat.

Die ontstoke inwoners eis dat nege mense in hegtenis geneem word vir die moord op ‘n 38-jarige swart man in ‘n nabygeleë woongebied. Hulle glo die nege  is vir die man se dood verantwoordelik.

Die situasie in die swart woongebiede buite Tzaneen in Limpopo is steeds kalm.

Die polisie in Limpopo het gesê dat die eenhede wat openbare orde handhaaf steeds die gebied monitor.

Relela en Kubjana is verlede week in chaos gedompel toe ‘n oproerige skare ‘n satelliet-polisiestasie aangeval het.

Die stasie in Relela het kwaai onder vandale deurgeloop. Vyftien polisiebeamptes is beseer en 19 polisievoertuie is beskadig.

Drie mense is tydens die oproer dood. Inwoners sê hulle is deur die polisie doodgeskiet.

oproerNege verdagtes sal môre op aanklagte van openbare geweld, saakbeskadiging en brandstigting in die plaaslike landdroshof verskyn, en nog nege is steeds in aanhouding tot hul volgende hofverskyning aanstons.

Die munisipaliteit van Mogale City het intussen die gewelddadige oproer deur Heuningklip-inwoners naby Krugersdorp veroordeel.

Die skare oproeriges het die N14 met brandende buitebande versper in ‘n poging om grond te beset.

Geweld het losgebars het toe personeel van ‘n privaat veiligheidsmaatskappy hulle van die grond afgejaag het.

Vier mense is beseer, toe die Rooimiere met rubberkoeëls op die skare losgetrek het.

‘n Woordvoerder van Mogale City sê die grond sal beskikbaar gemaak word aan gesinne wat van plase in die omgewing afgesit is.

Nasionale Taxi-alliansie staak oor e-tol-lisensies

Besige taxiroetes in en om Johannesburg sal na verwagting gesluit wees Maandag as die Nasionale Taxi-alliansie (NTA) begin met ‘n protes wat duisende pendelaars gestrand sal laat.

Die NTA se woordvoerder Theo Malele het gesê die regering se versuim om bedryfstelsellisensies betyds uit te reik aan taxibestuurders beteken hulle moet e-tol betaal.

taxis“Sanral en die regering beweer dat ons vrygestel word van e- tolhefings en tog het hulle geweet dat byna 80% van taxi’s nie bedryfslisensies het nie.”

Die NTA is die moederliggaam van ‘n groot aantal taxi-verenigings oor die hele land .

“Die regering se weiering om bedryfstelsellisensies uit te reik beteken dat ons bedrywighede onwettig op die paaie is,” sê Malele .

“Van Maandag gaan ons die paaie oorneem en verbyry sonder om e-tol te betaal,” het hy bygevoeg .

Hy het gesê geaffilieerde verenigings van ander provinsies sal by die protes aansluit .

Maar die Suid-Afrikaanse Nasionale Taxi-organisasie (SANTACO) het geweier om by die protes aan te sluit omdat hulle glo die haakplek sal binnekort opgelos word.

Zim wettig nog geldeenhede teen naderende geldkrisis

Die waarnemende goewerneur van die Zimbabwiese Reserwebank, Charity Dhliwayo
Die waarnemende goewerneur van die Zimbabwiese Reserwebank, Charity Dhliwayo

Volgens mediaberigte dreig ‘n nuwe geldkrisis in Zimbabwe met baie min likiditeit in die land. Daarom het die regering aangekondig dat nog ‘n viertal buitelandse valutas in die land toegelaat sal word. Hule is: die Chinese joean, die Indiese roepee, die Japannese jen en die Australiese dollar. Prakties beteken dit dat daardie geldeenhede nou ook wettige betaalmiddels in Zimbabwe is.

Ander geldeenhede wat reeds aanvaar word, is die Botswana-pula, die SA rand, die euro en Britse pond.

Die waarnemende goewerneur van die sentrale bank, Charity Dhliwayo, sê uitvoerders en die algemene publiek mag voortaan dié buitelandse geld gebruik, asook rekeninge in sodanige valutas aanhou.

Sedert 2009, toe hiperinflasie in die land gewoed het, het Zimbabwe nie meer ‘n eie geldeenheid nie. Sedertdien is die Amerikaanse dollar as die belangrikste geldeenheid aanvaar, in ‘n poging om aan hiperinflasie te ontkom.

Met die land weereens onder ekonomiese druk, poog die sentrale bank om soveel likiditeit as moontlik na Zimbabwe te lok.

Volgens Charity Dhilwayo ervaar die ekonomie ‘n erge likiditeitskrisis. wat beteken dat die plaaslike nywerheid geen krediet kan verkry nie, terwyl invoerkostes verhoog en plaaslike produkte glad nie mededingend is nie.

Na raming sirkuleer $2 miljard buite die bankstelsel, aangesien rentekoerse laag en die bankkostes hoog is. Die lae vlakke van deposito’s veroorsaak die likiditeitskrisis in die banksektor.

Charity sê ook dat sy die minimumkapitaalvereistes vir banke tot $25 miljoen verlaag het, teenoor die $100 miljoen wat voorheen beplan is.

Die banke is aangesê om hul minimumkapitaal teen Junie vanjaar tot $100 miljoen te verhoog, maar dié sperdatum is nou tot 31 Desember 2020 verleng.

Die sentrale bank poog tans om hom te herkapitaliseer met ‘n lening van $150 – $200 miljoen teen die einde van Maart vanjaar, waarna hy weer sy funksies van die regering se bank en lener in die laaste instansie sal hervat.

Volgens ‘n vorige minister van finansies van Zimbabwe, Simba Makoni, beskik die regering egter oor geen “rasionele planne” vir die ekonomie nie. Makoni, wat die huidige leier van die opposisie is, sê dat “in weerwil van al die retoriek oor die nasionale begroting vir 2014 van $4,1 miljard, is daar geen rasionele, volhoubare, samehangende beleid wat die burgers, veral spelers in die ekonomie, kan rig om vir die toekoms met helderrheid en vertroue te beplan nie”.

Nog ‘n mynstaking dreig

Irvin Jim
Irvin Jim

Nog ‘n staking dreig in die mynsektor.

Die vakbond Numsa gaan ‘n 48-uur kennisgewing indien om by Anglo American Platinum te begin staak.

Dit volg terwyl die lede van die vakbond Amcu die werkgewers se jongste aanbod van ‘n nege persent verhoging verwerp het.

Numsa se hoofsekretaris, Irvin Jim, sê al die mynsektore eis dubbelsyfer verhogings. Numsa se eise sluit in behuising, skof-en vervoertoelae.

Die vakbond wil ook ‘n 40 uur werksweek hê, en dat werkers nie op openbare vakansiedae moet werk nie.

Jim het die mynbestuur gevra om vinnig op te tree om te keer dat die staking plaasvind.

DA-lid rand wit raadslid aan oor ‘rassisme’

Jindela
Jindela

’n Stadsraadsvergadering van die Stellenbosch-munisipaliteit het Woensdag in geweld ontaard toe ’n swart DA-raadslid ’n wit opposisielid met die vuis geslaan het.

Die voorval is deur die stadsraad in ’n verklaring bevestig, het Beeld berig.

Nyaniso Jindela (DA) het André van der Walt (Stellenbosch Civic Association) geslaan oor ‘n “rassistiese” aanmerking.

Van der Walt het tydens die raadsvergadering vir Jindela glo “you stupid” genoem. Die speaker, Cyril Jooste, het Van der Walt gevra om sy woorde terug te trek, waaraan hy toe gehoor gegee het.

Tydens ‘n koffiepouse, ‘n rukkie daarna beweer Jindela is hy ‘n “dom kaffer” genoem waarop hy toe vir Van der Walt “geklap” het.

Van der Walt het ’n klag van aanranding by die polisie inge­dien.

‘n Raadslid sê Van der Walt het nie ’n rassistiese aanmerking gemaak nie. Hy het wel gesê dat Jindela “dom vrae vra en sy tyd mors”.

Hy het aan Die Burger gesê Van der Walt is so hard met die vuis geslaan deur Jindela dat hy twee van sy tande verloor het en op die grond neergeval het.

Van der Walt was besig om ’n wysiging ’n raadsitem te motiveer toe Jindela die spoor byster geraak het en deurentyd wou weet waaroor daar gepraat word.

Die raadslid van die Stellenbosch Civic Association het sy ontsteltenis oor die munisipaliteit se eensydige verklaring uitgespreek.

 

Sanral-werknemer vas oor bomdreigemente

sanralDie bomdreigemente by Sanral is glo deur ’n werknemer self van die Suid-Afrikaanse Nasionale Padagentskap gemaak.

Die man van Soweto is op aanklag van terrorisme in hegtenis geneem weens sy beweerde rol in die onlangse voorvalle by die maatskappy se bedryfsentrum in Samrand naby Midrand.

Die woordvoerder vir die Valke, kapt. Paul Ramaloko, sê die 28-jarige is Woensdagmiddag by die kantoor waar hy werk, in hegtenis geneem. Hy het bygevoeg dat die man se beweegredes nie bekend is nie.

Die dreigemente het daartoe gelei dat die gebou drie keer in ’n week ontruim moes word.

Die Valke het ook beslag gelê op ’n selfoon wat vermoedelik deur die werknemer gebruik is om ’n bomdreigement te maak.

Portefeuljekomitee keur Robert McBride se Opod-hoofskap goed

Robert McBride
Robert McBride

Die Parlement se portefeuljekomitee oor polisie het die aanstelling van Robert McBride as hoof van die Onafhanklike Polisie-ondersoekdirektoraat (Opod), goedgekeur.

Die voorsitter van die komitee, Annelize van Wyk, sê die nominasie sal nou na die Nasionale Vergadering verwys word wat na verwagting McBride se aanstelling as die hoof van Opod sal goedkeur.

Die direktoraat is al sonder ‘n permanente hoof vir meer as ‘n jaar. Opposisiepartye,waaronder die Demokratiese Alliansie, Congress of the People en die African Christian Democratic Party, is ontstoke oor die nominasie en het gesê McBride is nie geskik vir die pos nie as gevolg van sy persoonlike regsprobleme in die verlede.

Maar, die minister van polisie, Nathi Mthethwa het lede vermaan en gesê dat McBride vrygespreek is van dronkbestuur aanklagte tydens sy termyn as Ekurhuleni Metro-polisiehoof.