Nuus Archives - Page 570 of 1583

Wat het Jaco Mulder op Daspoort gesê?

“Ek gun dit nie vir Steve Hofmeyr om in die politiek te wees nie.” Só het mnr. Jaco Mulder, Gautengse leier van die Vryheidsfront Plus op Saterdag 26 Oktober 2013 in die AGS-kerk op Daspoort, Pretoria gesê.

In kommentaar wat gister op PRAAG se kommentaarafdeling geplaas is, skryf Mulder:

Ek stel dit sonder vrees vir teenspraak reguit aan Dan Roodt dat hy ‘n leuen verkondig op Praag, ek het dit nie gese nie. Ek het wel gese dat die volk dikwels van sterk leiersfigure soos Steve Hofmeyr en Louis Luyt verwag om die partypolitiek te betree om ‘n verskil te maak en dat mense soos Steve Hofmeyr en Louis Luyt eintlik ‘n ander nering het omdat deelname aan die Suid Afrikaanse partypolitiekestelsel ook behels dat jy jou dae in vervelige debatte moet deurbring wat nie noodwendig handel oor dit waaroor jy oorspronklik betrokke geraak het nie. Louis Luyt het na die ontnugtering wel na 1999 die parlement verlaat. Hierdie leiers kan ander mediums meer effektief gebruik soos byvoorbeeld Praag, Afriforum en ander.

Tydens Jaco Mulder se toespraak het ons notas bygehou; vandaar bogaande verbatim-aanhaling uit sy rede. Net voor die gedeelte waar Mulder na Steve Hofmeyr en Louis Luyt se deelname aan politiek verwys het, het hy gesê: “Sommige mense betree die politiek terwille van hul ego’s.” Binne die konteks van sy daaropvolgende kommentaar oor Hofmeyr en Luyt, moet dit dus as verdere sydelingse kommentaar op nie-beroepspolitici soos sangers of sakemanne gelees word. Hy het ook beklemtoon dat mnr. Louis Luyt “net drie maande in die parlement gehou het”, waarna sy setel aan iemand anders oorhandig is.

Sodat lesers self ‘n oordeel oor Jaco Mulder se toespraak kan vel, gee ons die res van die toespraak so volledig as moontlik hier weer.

“Afrikaners is plesierig… en dan maak hulle só. Soms stem hulle ook vir die DA. Hulle verkeer gesellig, hou van sport, die natuur, jag en kunstefeeste. Ons ontwikkel tegnologie: die eerste hartoorplanting is deur Chris Barnard, ‘n Afrikaner, gedoen.

“Ons maak geskiedenis, soos die republiek wat in 1961 tot stand gekom het. Sedertdien was daar egter ‘n totale magsoorgawe. Ons situasie is een van Afrikaner-onmag.

“Ons werk hard, maar brand uit.

“Op bladsy drie van Beeld verskyn daar ‘n berig oor ‘n Amerikaner wat oor Pretoria se standbeelde praat. Standbeelde van Paul Kruger moet afgebreek word.

“‘Net so sê prof. Makgoba (van die universiteit van Kwazulu-Natal): “Afrikaans is ‘n kanker.” Ook Jonathan Jansen is anti-Afrikaans. Die Vryheidsfront doen nie net dinge wat ‘n politieke party doen nie, hy moet ook ‘n stryd stry rondom taal en kultuur.

“Ek het nou na Deon Oppperman se reeks Donkerland (op KykNET) gekyk. Ek wil sê: Deon, jy is soos Malema. Dis ‘n skewe beeld van die Afrikaner wat jy oordra.

“Party van ons mense emigreer en doen afstand van hul identiteit. Party van ons verengels en stuur ons kinders na Engelse skole.

“Die DA is besig om te afrikaniseer. Hul party het ons stemme nie meer nodig nie. Ek noem die DA ‘n ‘liberaal-Afrikanistiese party’.

“Die Afrikaner het in 1994 sy politieke vryheid verloor.

“Ek wil ons leiers kritiseer: hulle moet om ‘n ronde tafel sit en vergader, hul verskille uit die weg ruim.

“Dit is noodsaaklik dat daar in elke stadsraad ‘n Vryheidsfrontlid moet wees.

“Ons is Euro-Afrikane. Ons woon in Afrika, maar het ‘n Westerse kultuur. Ons staan vir minderheidsregte, taal en kultuur. Die Vryheidsfront Plus is die laaste bastion van Westerse Christelike waardes in Suid-Afrika. Indien ons nie herkies word nie, sal ons uit die openbare lewe verdwyn. Daarmee saam sal die finansies verlore gaan (wat ons stryd aan die gang hou).

“Daar is mense wat by die politiek betrokke raak vir hulle ego’s.

“Mense kom na my toe en sê: Steve (Hofmeyr) moet parlement toe gaan. (Maar) ek gun hom nie om in die politiek te wees nie. Ek hou van Steve, maar neem nou maar die voobeeld van Louis Luyt. Min mense weet dat hy ‘n stigterslid van die DA was. Toe hy sien waarheen die DA op pad is, het hy en die Federale Alliansie na die Vryheidsfront Plus toe oorgeloop. Om in die politiek te wees, beteken dat jy jou dae in vervelige debatte moet deurbring wat nie noodwendig handel oor dít waaroor jy oorspronklik betrokke geraak het nie.

“Louis Luyt het net drie maande in die parlement gehou, toe sien hy nie meer daarvoor kans nie. Dit is toe aan iemand anders oorgegee wat sy termyn voltooi het.

“Ons beskik oor ‘n vyfpunt-aksieplan wat ons verkiesingsplan uitmaak.

“Mense besef nie watter rol ons agter die skerms speel om Afrikanerbelange te beskerm nie. Sonder ons sou Kleinfontein lankal in die moeilikheid gewees het. Op 30 Oktober gaan die portefeuljekomitee (van die provinsie Gauteng) weer Kleinfontein besoek.

“Mense is onbetrokke. Hulle wil liewer ander dinge doen.

“Die Vryheidsfront moet deel word van die hoofstroomdebat in die land.”

Tokyo Sexwale in die VSA aangehou weens terreurlys

Tokyo Sexwale, oud-ANC-minister, is Sondag op die JFK-lughawe in New York aagehou deur Amerikaanse veiligheidsowerhede omdat sy naam op ’n lys van verbode mense verskyn weens die terreurdade wat hy gepleeg het.

Die SAUK het berig Sexwale, ’n skatryk sakeman, was op ’n sakebesoek in die VSA toe hy gearresteer en aangehou is.

Amerikaanse wetgewing het voorheen verhoed dat ANC-lede weens die terreurveldtog wat hulle ondersteun het, na die VSA kon reis. Die verbod is intussen opgehef, maar nie al die name wat destyds op die lys was, is verwyder nie.

Lesley Mkhabela, Sexwale se regsverteenwoordiger, het gesê die voormalige minister van behuising en Gautengse premier sal die saak met die Amerikaanse owerhede opneem.

Hy sal glo ’n brief aan die Amerikaanse ambassade in Pretoria asook ’n afskrif aan dié land se departement van buitelandse sake rig om ‘n herhaling van die pasafgelope gebeure te vermy, het Mkhabela gesê.

EFF stort ontlasting voor Sanlam se deur

Drie mense, na bewering EFF lede, is in hegtenis geneem nadat betogers Vrydag ontlasting by Sanlam se hoofkantoor in Bellville, Kaapstad, uitgegooi het.

“Omstreeks 10:30 het ‘n groep van sowat 20 tot 30 mense, met rooi barette en na bewering lede van die Ekonomiese Freedom Fighters, by ons hoofontvangs opgedaag,” het Sanlam se woordvoerder Ainsley Moos gesê.

Die groep het bande en houers vol ontlasting by die ingang na die ontvangs area neergesit.

Personeel het die polisie gebel en toe die groep probeer het om die houers leeg te maak het ‘n onderonsie uitgebreek tussen die EFF-lede en die polisie.

Kaptein Frederick van Wyk het gesê die polisie het opgedaag en aan die groep gesê dat hul protes onwettig is.

“Hulle is gevra om die gebied te verlaat … Hulle het begin om die ontlasting uit te giet op die grond en dit na die Sanlam-gebou te gooi.”

Twee mense is in hegtenis geneem.

“Een betoger het ‘n polisiebeampte aangeval en probeer om die aangehoudenes in die polisievoertuig te red. Hierdie persoon is ook in hegtenis geneem op aanklag van aanranding op ‘n polisiebeampte.”

Die drie sal binnekort in die hof verskyn.

Van Wyk het gesê drie houers ontlasting is na die polisiestasie geneem.

Moos het gesê die protes het te doen gehad met iemand in diens van Sanlam wie se kontrak onlangs beëindig is.

Kaapstad is getref deur ‘n aantal van ontlastingstortingsvoorvalle in die afgelope maande. In die meeste van die vorige gevalle was die betrokke protes oor sanitasie in informele nedersettings. – Sapa

Hou op om op ons te spioeneer!

Duisende betogers het Saterdag na die kongresgebou in Washington gemarsjeer om te betoog teen die VSA se aanlynspioenasie. Die omvang daarvan is onlangs deur Edward Snowden onthul.

‘n Boodskap van Snowden is voorgelees by die geleentheid.

Mense het slagspreuke vertoon soos “Stop Mass Spying”, “Thank you, Edward Snowden” en “Unplug Big Brother”.

Die betoging is gereël deur ’n koalisie bekend as Stop Watching Us, wat ’n beroep op die kongres doen om die wette wat die NSA ( National Security Agency) toelaat om elektroniese data in te samel, te verander.

Die regering van pres. Barack Obama het gesê die NSA-programme is “uiters belangrik” vir die beskerming van die land se nasionale veiligheid teen “terroriste”.

Snowden het onthul dat die Amerikaners owerhede inwoners se internetbedrywighede en foonoproepe op groot skaal monitor.

Saterdag was ook die 12de herdenking van die Patriot Act, wat kort ná die 9/11-terreuraanvalle aanvaar is en wat die staat omvattende magte gee.

Snowden, ’n voormalige NSA-kontrakteur, het asiel in Rusland ontvang.

Hy het pas onthul dat die VSA 35 wêreldleiers afluister, waaronder ook die foon van Angela Merkel, kanselier van Duitsland. – Reuters

Renosterstropery neem kritieke afmetings aan

Die Noord-Kaap blyk ‘n veilige toevlugsoord vir renosters te wees.

Die omgewingskenner, Werner Boeing van Bloemfontein Natuurbewaring sê geen renosters is die afgelope jaar in die Noord-Kaap gestroop nie.

Hy waarsku egter dat boere op hul hoede moet wees. Daar is meer as 20 boere wat met renosters in die provinsie boer.

Die oënskynlike veiligheid van renosters word toegeskryf aan die grootte van die provinsie en die feit dat die bevolking wyd versprei is.

Die renosterboer, Wian van der Linde sê ook mense ken mekaar in die gemeenskappe en dus word vreemde elemente vinnig uitgeken.

Syfers wat gister bekendgemaak is toon dat meer as honderd renosters die afgelope vier weke in Suid-Afrika vir hul horings doodgemaak is.

Die ministerie van omgewingsbewaring sê die situasie neem kritieke afmetings aan omdat meer renosters doodgemaak word as wat gebore word. – RSG

‘Alle tale behalwe Engels moet uitgefaseer word’

Die Pan-Suid-Afrikaanse Taalraad se uitvoerende hoof, Daniel Thokoane wil hê dat leerders tot op tersiêre vlak in hul moedertaal onderrig word.

Hy het tydens ‘n seminaar vir die bevordering van inheemse tale by die Universiteit van Venda gepraat. Hy het die Universiteit van Zoeloeland geloof omdat Zoeloe ‘n verpligtende vak vir alle eerstejaar-studente is.

Thokoane meen alle ander universiteite moet dié voorbeeld navolg.

Die voormalige administrateur van die Universiteit van Limpopo, Patrick Fitzgerald het in teenstelling hiermee gesê alle Afrika-tale by die universiteit moet uitgefaseer word omdat dit nie bemarkbaar is nie.

Fitzgerald was vir ‘n tydperk van aanhouding onder die voormalige regering, en in ballingskap as ‘n ondergrondse lid van die ANC. Hy beklee tans ‘n hoë posisie by die Universiteit van die Witwatersrand as vise-kanselier.

Hy het binne die ANC-strukture in Botswana, Zambië en elders die stryd teen Afrikaners gevoer. Gedurende hierdie tyd het die ANC hom na Liverpool Universiteit gestuur om sy meestersgraad te doen in Openbare Administrasie en Bestuur.

Fitzgerald is ‘n geswore Afrikanerhater en ‘n vertroueling van die Brits-gesinde Pallo Jordan asook Tokyo Sexwale. Hy spits homself toe op skakeling tussen die ANC en groot sakeondernemings.

Vrou met plofstof by Beitbrug voor

’n Vrou wat in Limpopo met plofstof in haar besit betrap is, sal Vrydag in die hof op Musina verskyn.

Sy is Donderdagaand by die Beitbrug-grenspos voorgekeer.

Die 23-jarige vrou was per bus vanaf Zimbabwe na Suid-Afrika onderweg toe die polisie op die plofstof en 100 ontstekers in haar handbagasie afgekom het.

Die plofstof word gewoonlik gebruik om kitsbanke en kluise mee op te blaas.

Die Suid-Afrikaanse polisie is intussen in verbinding met hul ampsgenote in Zimbabwe om te probeer vasstel of die vrou ’n misdaadgeskiedenis in haar tuisland het. – Sapa

Brasilië en Duitsland snoer kragte saam teen Amerikaanse spioenasie

Brasilië en Duitsland het Donderdag kragte saamgesnoer om ‘n VN-Resolusie wat die reg van privaatheid op die Internet beskerm, deur te voer.

Dié twee lande het die voortou geneem in die eerste groot internasionale poging om die Amerikaanse National Security Agency se indringers in toom te hou, volgens diplomatieke bronne.

Die poging volg op ‘n Duitse eis dat die VSA dadelik hul spioenasie op kanselier Angela Merkel en dosyne ander wêreldleiers staak. Dit kom ook oor ‘n maand nadat Brasilië se Dilma Rousseff NSA-spioenasie teen haar land as ‘n “skending van internasionale reg” in die Algemene Vergadering aan die kaak gestel het.

Sy het voorgestel dat die VN wetlike riglyne vestig om te verhoed dat “die kuberruimte gebruik word as ‘n oorlogswapen”.

Brasiliaanse en Duitse diplomate het in New York ontmoet met ‘n klein groepie van Latyns-Amerika en Europese regerings om ‘n konsepresolusie wat vra vir die uitbreiding van die privaatheid soos vervat in die Internasionale Verdrag van Burgerlike en Politieke Regte op die aanlyn-wêreld te oorweeg.

Die konsep verwys nie na ‘n vlaag van onthullings oor Amerikaanse spioenasie wat ‘n politieke opskudding oor die hele wêreld, veral in Brasilië en Duitsland, veroorsaak het nie, maar dit was duidelik dat die politieke momentum teen die VSA poog om die Verenigde Nasies ook te aktiveer.

“Dit is ‘n voorbeeld van die heel ergste aspekte van die Snowden onthullings”, het ‘n voormalige verdedigingsamptenaar met lang ervaring in NAVO gesê.

“Dit sal baie moeilik wees vir die VSA om hulleself hieruit te grawe.” Die koste aan geloofwaardigheid en vertroue is enorm vir Amerika wat graag geweld op ‘n morele platform voer.

Hoewel die VN se vermoë om die NSA in enige iets te dwing nul is, is die toenemende internasionale oproer oor Amerikaanse spioenasie ‘n groot kopseer omdat Europese bondgenote dalk nie meer intelligensie sal wil deel nie, sê ‘n militêre strateeg met beleidservaring van Europese aangeleenthede.

Bronne beweer Duitsland werk met ‘n plan. Die Internasionale Verdrag oor Burgerlike en Politieke Regte is in 1966 oonderteken en in werking gestel in 1976, dekades voor die internet maar ‘n bepaling in Artikel 17, sê: “Niemand sal onderworpe wees aan arbitrêre of onregmatige inmenging van sy privaatheid, familie, woning of korrespondensie nie, of aan onwettige aanvalle op sy eer en reputasie nie.“ Dit sê ook dat “elkeen het die reg tot beskerming onder die wet teen sulke inmenging of aanvalle.“

Die Guardian in Brittanje het nalv ‘n geklassifiseerde dokument wat Edward Snowden gelek het, berig dat telefoonoproepe van 35 wêreldleiers gemonitor word deur die VSA se National Security Agency (NSA).

Die name van die 35 leiers is nie in die dokument bekendgemaak nie.

Die Guardian-berig volg ‘n dag ná bewerings dat die NSA die selfoon van Angela Merkel, Duitse bondskanselier, glo jare lank reeds afluister.

Thomas de Maizière, minister van verdediging, het gesê die verhouding tussen die twee lande is onafwendbaar verander.

‘Afrikaans is ‘n kanker wat vernietig moet word’

Uitlatings van die rektor van die Universiteit van KwaZulu-Natal, prof. Malegapuru Makgoba, wat luidens ‘n mediaberig gesê het Afrikaans is ‘n ‘kanker wat vernietig moet word’, kan nie geduld word nie en die Vryheidsfront Plus gaan ‘n klag hieroor by die Menseregtekommissie indien, sê adv. Anton Alberts, die VF plus se parlementêre woordvoerder oor hoër onderwys.

Prof. Makgoba se uitlatings oor Afrikaans het verlede jaar ook opslae gemaak toe hy in die media gesê het dit is ‘n ‘sterwende taal’ by die universiteit en dat hy beplan om die departement vir Afrikaans-Nederlands te sluit.

Adv. Alberts sê prof. Makgoba se beweerde uitlatings is tekenend van die totale aanslag teen Afrikaans op alle vlakke van onderwys in Suid-Afrika. Onlangs het prof Jonathan Jansen, rektor van die Universiteit van die Vrystaat, in ‘n toespraak voorgestel dat Engels die enigste onderrigtaal op skoolvlak moet wees.

“Ironies genoeg het Afrikaans by die universiteit van Kwazulu-Natal vanaf 2011 tot 2012 gegroei wat bewys dis allermins ‘n sterwende taal soos wat prof. Makgoba sou aandui.

“Dit blyk verder dat Afrikaans inderwaarheid by ander universiteite in die land waar dit gedoseer word, besig is om te groei eerder as om te kwyn.

“Daar word berig hoe daar byvoorbeeld in 2006 by die Noordwes-Universiteit 50 eerstejaarstudente, 22 tweedejaars en 11 derdejaars was. Hierdie jaar is dit onderskeidelik 119, 45 en 27.

“Wat ons dus sien, is dat Afrikaans op hierdie vlak besig is om te groei ten spyte van die groot aanslag teen die taal.

“Indien Afrikaans mettertyd wel uit die hoër onderwys gedwing word om eentaligheid te bewerkstellig, sal ‘n geestelike verarming van die Afrikaanse gemeenskap plaasvind wat tot nadeel van die hele land se wees.

“Pogings om Afrikaans te vertrap is boonop in stryd met die Grondwet wat veeltaligheid en die gelykheid van al die amptelike landstale bepleit,” sê adv. Alberts.

Taal kan brûe bou in SA

Taal is van onskatbare belang om mense in Suid-Afrika te help om ‘n wedersydse begrip en respek vir mekaar te ontwikkel en om nasiebou te bevorder, sê dr. Corné Mulder, die Vryheidsfront Plus se hoofsweep.

Dr. Mulder het vandag met die tweede lesingsdebat van die Wetsontwerp op die Raad vir Suid-Afrikaanse Taalpraktisyns gesê die VF Plus sal daarom enige stap steun om veeltaligheid in die land te bevorder.

Hy het gesê dit sal die ideale situasie wees as jong mense mekaar se taal kan praat aangesien dit mense letterlik en figuurlik sal help om mekaar beter te verstaan.

“Hierdie mag dalk na ‘n baie gewone wet lyk, maar dit is nie. Hierdie wet is deel van ‘n sekere proses van taal in Suid-Afrika wat baie belangrik is,” het dr. Mulder gesê.

Op ‘n ligter noot het dr. Mulder aan mede-parlementslede gesê hy is nie bekommerd oor die oorlewing van Afrikaans nie. “Afrikaans het die aanslag van die Britse Ryk oorleef. Die ANC sal nie ‘n probleem wees nie…’

“Die meerderheid Afrikaanssprekendes in die land is nie wit nie. Miljoene mense praat Afrikaans. Dis ‘n doodgewone, amptelike Suid-Afrikaanse taal.

“Suid-Afrika is ‘n uiteenlopende gemeenskap, waarvan taal ‘n deel uitmaak. Maar taal kan ‘n fokuspunt wees op die gebied van sosiale kohesie en nasiebou.

“Wanneer ons met hierdie bouproses begin, soos met hierdie wet, sal ons besef dat ons die wet nie in isolasie kan sien nie. Taal is ‘n belangrike proses in nasiebou. Wanneer ons almal gemaklik ons eie taal met mekaar kan praat, dan sal ons ware vooruitgang maak na sosiale kohesie en nasiebou.

“Dit is waarna ons moet streef en waarheen ons moet mik. En indien ons daarmee erns het, is ‘n wet soos hierdie belangrik om amptelike taalpraktisyns deel te maak van die samebindende weg na veeltaligheid wat allerbelangrik vir die land is,” het dr. Mulder gesê.