Nuus Archives - Page 539 of 1583

Suid-Soedan: President en visespresident haaks

Honderde mense is dood in gevegte tussen Dinka-lojaliste van die president Salva Kiir en Noër-ondersteuners van die voormalige visepresident Riek Machar, wat afgedank is in Julie en beskuldig word van ‘n poging tot magsoorname deur die regering.

Gevegte het intussen na die ryk olievelde uitgebrei en die regering het gesê ‘n senior weermagbevelvoerder het na Machar oorgeloop in die olie-produserende provinsie van Unity State.

Die Duitse weermag het Saterdag gesê hulle het 98 mense, insluitend Duitsers en ander burgers van Suid-Soedan mbv ‘n lugbrug ontruim na die naburige Oeganda.

Die Duitse ambassadeur in Suid-Soedan was onder hulle, die ministerie van buitelandse sake in Berlyn gesê.

‘n Aparte vliegtuig het luitenant-generaal Hans-Werner Fritz, hoof van Duitsland se Operasionele Bevel, saam met sy amptenare en vyf ander Duitsers, na Berlyn geneem, die militêre woordvoerder gesê.

Na die vergadering met bemiddelaars Vrydag, het Kiir se regering op sy Twitter verklaar dat hulle bereid is om gesprekke met enige rebellegroep te hou. Die Verenigde State van Amerika sal ‘n gesant stuur om te help om ‘n oplossing te vind.

Suid-Soedan se minister van buitelandse sake, Barnaba Marial Benjamin, het aan Reuters gesê die regering het swart bemiddelaars die groen lig gegee om met Kiir se mededingers, insluitende Machar en sy bondgenote te ontmoet.

Ethiopië se minister van buitelandse sake Tedros Adhanom, wat ‘n Oos-Afrika-afvaardiging van ministers van buitelandse sake na Juba gelei het vir die bemiddeling tussen die strydende partye, het gesê die span het nie daarin geslaag om Riek Machar van aangesig tot aangesig te ontmoet nie, en ook nie telefoon kontak gemaak nie.

“Ons probeer om hulle te kontak. Ons is hoopvol dat beide kante na die tafel sal kom binne die bestek van 10 dae,” het Tedros aan Reuters gesê.

In hul vergadering met Kiir het Tedros ook gesê hulle doel is om humanitêre hulp aan die bevolking ongehinderd deur te kry .

Benjamin het gesê lt.genl Lazarus Sumbeiywo wat deur die Keniaanse president Uhuru Kenyatta na Suid- Soedan gestuur is, het agter gebly om saam met ‘n Keniaanse diplomaat kontak met Machar te maak.

Sumbeiywo was die hoofbemiddelaar in die gesprekke wat gelei het tot die ondertekening van die 2005-vredesooreenkomste met Noord-Soedan.

Benjamin het gesê hulle moedig albei partye aan tot “onvoorwaardelike dialoog” maar dat die voormalige vise-president Riek Machar nie die mense van Suid-Soedan deur middel van etniese voorkeure moet aanhits nie.

Verenigde Nasies personeel sê honderde mense is dood oor die hele land – wat is die grootte van Frankryk is – hierdie week en dat 40.000 burgerlikes skuil by die VN se basisse.

Die Verenigde Nasies het gesê ten minste 11 Dinka-burgerlikes het tydens ‘n aanval vermoor deur sowat 2.000 gewapende jeugdiges van ‘n ander etniese groep op ‘n VN-vredesmagbasis.

Twee Indiese vredesoldate is ook dood .

Die VN se sekretaris-generaal, Ban Ki -moon het die aanval veroordeel en ‘n beroep op Kiir en Machar gedoen om “na die tafel te kom en ‘n politieke manier om uit hierdie krisis” te vind.

Namibiese vliegramp doelbewus veroorsaak

‘n Voorlopige ondersoek dui daarop dat die vlieënier van ‘n Mosambiekse vliegtuig wat verlede maand in Namibië neergestort en die lewens van 33 mense geëis het, die vliegtuig doelbewus laat neerstort het.

Van die 27 passasiers, was 10 Mosambiekers, nege Angolese, vyf Portugese en een burger elk van Frankryk, Brasilië en China aan boord.

Die vliegtuig het in swaar reën in Namibië se Bwabwata Nasionale Park verongeluk.

Die voorsitter van die Mosambiekse Burgerlike Lugvaart-instituut, Joao Abreu, sê opnames bevestig dat daar ‘n doelbewuste bedoeling was om die vliegtuig te laat neerstort wat die lewens van al ses bemanningslede en 27 passasiers geëis het.

Daar was ‘n “duidelike bedoeling” om te verongeluk, het ondersoekbeampte gesê. Die vlieënier, Hermino dos Santos Fernandes, het ‘n “duidelike bedoeling” gehad om dit te doen.

Dos Santos Fernandes het homself in die kajuit toegesluit, en nie toegelaat dat sy mede-vlieënier binnekom tot oomblikke voordat die vliegtuig die grond getref het nie, het Abreu gesê.

“Gedurende hierdie aksies kan jy lae- en hoë-intensiteit alarmseine hoor en ‘n herhaalde geklop teen die deur met eise om in die kajuit te kom,” het hy aan die staatnuusagentskap AIM gesê.

Die vliegtuig van die Mosambiekse Lugredery was op pad na Angola en op 29 November in swaar reën.

BA-vliegtuig bots in baksteengebou op OR Tambo

‘n Vliegtuig van British Airways wat na Londen oppad was het van koers geraak en in ‘n baksteengebou by die OR Tambo Internasionale Lughawe in Johannesburg vasgery.

Harriet Tolputt, hoof van media vir Oxfam, was op die vlug en het die foto hiernaas geneem.

Sy het die foto na Twitter gepos: “BA bots in die gebou by J Burg lughawe. Niemand beseer nie, slegs die vlieënier se trots. Nie beïndruk dat die eersteklaspassasiers kan afklim voor ekonomiese klas tydens ‘n noodgeval nie.”

British Airways het gesê ‘n ondersoek is aan die gang is.

Die vlug is gekanselleer en die passasiers is na plaaslike hotelle geneem totdat hulle op ‘n ander vlug geplaas kan word.

Fotos wys hoe een van die vliegtuig se vlerke deur ‘n baksteengebou langs die aanloopbaan geskeur het. Passasiers het op Twitter gesê dat niemand beseer is nie.

‘n Woordvoerder van OR Tambo, Unathi Batyashe-Fillis het die voorval bevestig en sê die Burgerlugvaartowerheid stel ondersoek in.

Vrese vir etniese stryd in Suid-Soedan neem toe

Burgers van die VSA is Sondag veilig ontruim van Bor tot Juba in Suid-Soedan het die State Department gesê nadat vrese van ‘n etniese burgeroorlog verskerp het.

Die VN-sending in Suid-Soedan is tans besig om alle burgerlike personeel uit die hoofstad Juba na Oeganda te verskuif, te midde van die toenemende geweld tussen die land se weermag en rebellemagte.

‘n Helikopter van die VN is Vrydag in dieselfde streek afgeskiet.

Die sending sê die personeel in Bor, waar hewige gevegte aan die gang is, is reeds na Juba geneem.

Geweervuur het twee dae gelede drie Amerikaanse militêre vliegtuie getref wat besig was om Amerikaanse burgers te ontruim, en vier soldate is gewond.

Die geweld in die wêreld se jongste staat het reeds die lewens van honderde mense geëis en wêreldleiers het hul kommer oor die oorlog uitgespreek.

President Barack Obama het in ‘n brief aan die leiers in die Amerikaanse Huis van Verteenwoordigers en die Senaat gesê hulle monitor die situasie.

Ongeveer 380 Amerikaanse amptenare en private burgers is uit die gevegte in Suid-Soedan ontruim, het die State Department gesê.

Hulle het ook sowat 300 burgers van ander lande na Nairobi en ander plekke buite Suid-Soedan op vier huurvlugte en vyf militêre vliegtuie gevlieg .

“Die Amerikaanse regering doen alles moontlik om die veiligheid en sekuriteit van die Verenigde State se burgers in Suid-Soedan te verseker,” lui die verklaring deur Jen Psaki, die State Department se woordvoerder.

Die VSA se militêre magte het bevestig dat vier van sy lede in die aanvalle gewond is.

Die Verenigde Nasies sê honderde mense is dood in die jongste konflik in Suid-Soedan.

Konsultant wat Vigs met swartes verbind ‘kry baie skaam’

‘n Amerikaanse openbare betrekkinge konsultant vir ‘n mediamaatskappy se twiet oor swartes en Vigs het gelei tot verontwaardiging op sosiale mediawebwerwe Saterdag, asook haar afdanking.

Justine Sacco het getwiet dat sy nie vigs sal kry nie omdat sy wit is, het SABC-nuus berig.

Sacco het Vrydag getwiet: “Gaan na Afrika, hoop ek kry nie vigs nie, net ‘n grap, ek is wit”.

Sacco is die hoof van openbare betrekkinge vir die Amerikaanse internetmaatskappy, InterActiveCorp ( IAC ).

Omdat Sacco nie toegang tot die internet gehad het tydens die vlug nie, was sy nie bewus van die storm wat sy veroorsaak het nie. Die hashtag # HasJustineLandedYet was op ‘n stadium gewild op Twitter soos mense haar vlug van Londen se Heathrowlughawe na die Kaapstad Internasionale Lughawe ingewag het.

IAC, wat die eienaar van match.com is, het die twiet veroordeel en het hulself sedertdien gedistansieer van Sacco, die senior direkteur van korporatiewe kommunikasie.

Met haar aankoms in Suid-Afrika is Sacco se Twitterrekening skielik verwyder, maar een plaaslike Twittergebruiker by Kaapstad Internasionale Lughawe het daarin geslaag om haar aankoms af te neem en te pos na Twitter.

Sacco het agter ‘n sonbril probeer wegkruip met haar aankoms.

“Daar is geen verskoning vir die haatlike stellings wat gemaak is nie en ons veroordeel dit onomwonde,” het IAC in sy verklaring gesê.

Sacco het intussen om verskoning gevra oor haar “rassistiese” twiet wat sy uitgestuur het.

Sy is summier na die voorval afgedank, maar sy sê sy is baie skaam oor haar onsensitiewe optrede teenoor miljoene mense wat met VIGS saamleef.

Sacco wat in Brirttanje woon, is in Suid-Afrika gebore.

Premier vra optrede na 2 sterf by inisiasie

Die premier van Noordwes, Thandi Modise, het gevra vir verskerpte optrede teen onwettige inisiasieskole na die dood van twee jong seuns.

Die twee jeugdiges van 16 en 17 jaar oud het by ‘n inisiasieskool op Makwaneng maagkrampe gekry en inmekaargesak.

Verskeie ander jong seuns is na die hospitaal op Schweitzer-Reneke geneem. Modise sê diegene wat onwettige inisiasieskole bedryf, behoort aangekla te word.

Sy het ‘n beroep op tradisionele leiers as bewakers van die tradisies gedoen om die inisiasieskole te monitor en enige mishandeling en onwettige optrede by die owerhede aan te meld. – RSG

Is Mandela deur die Mossad opgelei?

Winnie, 'David Mobsari' en Joe Slovo — Winnie, ‘David Mobsari’ en Joe Slovo

Volgens ‘n brief waarvan uittreksels in die Israelse koerant Haaretz gepubliseer is, het die jong Nelson Mandela in 1962 opleiding in sabotasie van dié land se geheimediens, die Mossad, ontvang. Blykbaar het Mandela die Mossad-agente gegroet met “Sjalom” en was “bekend met die probleme van die Jodedom en van Israel en het die indruk gewek dat hy ‘n intellektueel is. Die personeel het [daarom] gepoog om ‘n Sionis van hom te maak.”

Hierdie onthulling, wat ook deur die wêreld se grootste nuuswebwerf, die Huffington Post, oorgeneem is, kom ná enkele weke van intense heldeverering aan Mandela, oënskynlik in ‘n poging van die Joodse meningsvormer, David Fachler, om versoening tussen die ANC en Israel te bewerkstellig ná onlangse meningsverskille tussen die twee. Ná die uitlatings van die voormalige Israeliese minister van buitelandse sake Avigdor Lieberman dat ‘n “pogrom [ etniese vervolging of slagting ] teen die Jode in Suid-Afrika net ‘n kwessie van tyd is”, het die ANC die plaaslike Jode gepaai. Mary Kluk, die voorsitster van die Suid-Afrikaanse Joodse Raad van Afgevaardigdes, het insgelyks die gedagte verwerp dat daar hoegenaamd enige gevaar vir Jode in Suid-Afrika dreig.

Mandela het tydens sy tydperk in die buiteland blykbaar onder andere die skuilnaam David Mobsari gebruik Die aangehaalde gedeelte uit die geheime brief van die Mossad, wat in die Israeliese argief bewaar word, lui soos volg:

Amptelike embleem van die Mossad, die Israeliese geheimediens

Soos u u mag herinner, het ons drie maande gelede die geval bespreek van ‘n kadet genaamd David Mobsari wat by die Israelse ambassade in Ethiopië opgedaag het en van Rhodesië afkomstig was. Eersgenoemde het van die Ethiopiese personeel [wat amper vir seker Mossad-agente sou wees] opleiding in judo, sabotasie en vuurwapens ontvang.

Hy het ons manne met “Sjalom” gegroet, was bekend met die probleme van die Jodedom en van Israel en het die indruk gewek dat hy ‘n intellektueel is. Die personeel het gepoog om van hom ‘n Sionis te maak.

Tans beklee verskeie Suid-Afrikaanse Jode belangrike poste in die ANC-regering en ander instellings, soos byvoorbeeld die president van die Reserwebank, Gill Marcus, haar broer Gilbert wat die meeste van die ANC se belangrike hofsake as advokaat hanteer, asook die minister van handel en nywerheid, Rob Davies, die rektor van die Universiteit van Kaapstad, Max Price, en vele ander.

Maar volgens Haaretz, wat in Tel Aviv gesetel is en in beide Engels en Hebreeus verskyn, is Jode besig om terug te staan in die Suid-Afrikaanse politiek en speel hulle tans ‘n mindere rol as in die verlede:

Jode was eens op ‘n tyd aktief in die Suid-Afrikaanse politiek op elke vlak. Benewens Helen Suzman, is die Progressiewe Party deur die voormalige opposisieleier Tony Leon verteenwoordig, asook Selma Browde en Harry Schwarz. Die African National Congress, die bevrydingsbeweging wat in 1994 die regerende party geword het, het oor ‘n getalryke groep Jode beskik, waaronder Joe Slovo [lees praag se resensie oor sy biografie], Ronnie Kasrils en Dennis Goldberg. Jode was ook prominent in die munisipale politiek. Tydens Johannesburg se 120-jarige geskiedenis, was 22 van sy 94 burgemeesters Jode, volgens die stad se webwerf. Sedert 1907 het Kaapstad reeds oor 13 Joodse burgemeesters beskik.

Intussen het die Nelson Mandela-stigting in ‘n verklaring die brief wat deur Haaretz gepubliseer is, verwerp:

“Die media dra tans die verhaal oor dat Nelson Mandela in 1962 interaksie met ‘n Israeliese agent in Ethiopië gehad het.

“Die Nelson Mandela-stigting kan bevestig dat hy geen getuienis in Nelson Mandela se private argief (wat sy 1962-dagboek en notaboek insluit) kon vind dat hy interaksie met ‘n Israeliese agent gedurende sy toer van Afrika-lande in daardie jaar gehad het nie. Sowel die dagboek as sy notaboek is as getuienis teen hom in die Rivoniaverhoor in 1963-1964 vir sabotasie gebruik.

“In 1962 het mnr. Mandela militêre opleiding van Algerynse vryheidsvegters in Marokko en van die Ethiopiese Onluspolisie te Kolfe buite Addis Abeba ontvang alvorens hy in Julie 1962 na Suid-Afrika teruggekeer het. In 2009 het die Nelson Mandela-stigting se senior navorser na Ethiopië gereis en onderhoude met die mans wat by Mandela se opleiding betrokke was, gevoer – geen getuienis van ‘n Israeliese verbintenis het na vore gekom nie.”

Luidens die artikel in Haaretz was Golda Meir, die toentertydse eerste minister van Israel, ‘n groot ondersteuner van die swart bevrydingsbewegings in Afrika. Eers later in die sewentigerjare, toe die meeste onafhanklike Afrikalande onder Arabiese invloed besluit het om die Palestyne te steun, het Israel sy posisie verander en begin om militêr met Suid-Afrika saam te werk. Samewerking tussen die ANC en die Mossad in die vroeë sestigerjare, gegewe ook die aansienlike persentasie radikale Jode wat die ruggraat van die ANC- en SAKP-leierskap uitgemaak het, sou dus strook met die destydse Israeliese buitelandse beleid.

Barack Obama versag vonnisse van swart dwelmoortreders

President Barack Obama het die gevangenisstrawwe van agt mense wat aan crack-kokaïen-oortredings skuldig bevind is, versag. Volgens die Amerikaanse president is hulle gestraf deur ‘n onbillike strafregstelsel wat verarmde swart gemeenskappe buitengewoon seermaak.

Al die gevangenes is vir ten minste 15 jaar tronk toe gestuur, waaronder ses wat lewenslange vonnisse opgelê is. Die meeste sal nou teen 17 April weens die presidensiële kwytskelding vrygelaat word.

Die gevangenes sou waarskynlik veel ligter strawwe ontvang het indien hulle onder ‘n wet gevonnis sou gewees het wat Obama drie jaar gelede onderteken het en wat die verskille in vonnis tussen crack-kokaïen en poeierkokaïen verminder het.

Obama het gesê die ses swartmans en twee -vroue is deur ‘n “onregverdige stelsel” tot gevangenisstraf gevonnis wat een gram crack-kokaïen dieselfde straf oplê as iemand wat met 100 gram poeierkokaïen gevang word, verhouding at deur die Billike Vonniswet van 2010 verminder is.

“Indien hulle kragtens die huidige wet gevonnis sou gewees het, sou baie van hulle reeds hul tronkstraf uitgedien en hul skuld aan die samelewing vereffen het,” het Obama in ‘n verklaring gesê.

“Pleks daarvan, vanweë ‘n wanbalans in die wet wat nou as onregverdig erken word, bly hulle in die gevangenis agter, teen ‘n koste van miljoene belastingbetalerdollars per jaar.” Die invloedryke American Civil Liberties Union-groep het Obama se besluit verwelkom maar beklemtoon dat hy een van die kleinste kwytskeldings- en vonnisversagtingsrekords van enige Amerikaanse president in die onlangse geskiedenis het.

Tydens sy vyf jaar as president het Obama voorheen 39 kwytskeldings en een vonnisversagting toegestaan.

“Dis een belangrike stap om die skade ongedaan te maak wat ekstreme vonnisse aan soveel mense in ons strafregstelsel berokken het,” het die ACLU se adjunkregsdirekteur Vanita Gupta gesê.

“Ons hoop dat die president sal voortgaan om sy begenadigingsmagte uit te oefen en sy steun aan stelselhervorming te verleen wat ons strafregstelsel slimmer, billiker en meer menslik sal maak.”

Die billike vonniswet van 2010 het die strawwe verminder sodat iemand wat met een gram crack nou dieselfde vonnis ontvang as iemand wat met 18 gram poeierkokaïen gevang word. Dit ruim ook die verplgte minimumstraf van vyf jaar vir die eenvoudige besit van crack uit die weg.

Net ‘n kwart van crack-kokaïengebruikers is swart, maar 81 persent van mense wat vir crack-besit of -handel in 2007 gevonnis is, was swart, volgens die Verenigde State se Vonniskommissie.

Zuma loof Vendas vir respekbetoon

President Jacob Zuma sê hy sou vir hom ‘n Vendavrou gevat het as hy nie reeds getroud was met sy vier vroue nie. Hulle gaan “lê selfs om respek vir ander mense te wys”, het hy vol lof gesê.

The Star het Vrydag berig dat hy honderde mense op Impendle in die KwaZulu-Natalse Middellande vroeër hierdie week toegespreek het, waar hy die belangrikheid van respek beklemtoon het.

Zuma het gesê dat jong mans en vroue moet selfrespek en respek vir ander toon.

“Toe ek in Venda was onlangs, was ek so beïndruk om te sien hoe die mense daar respek vir ander mense toon,” het Zuma glo gesê.

“‘n Vrou het haar hande geklap en selfs gaan lê om respek te toon.”

Die president het gesê hy was beïndruk, en onder groot gelag gesê as hy nie reeds getroud was nie, sou hy in Venda gaan soek het vir ‘n vrou.

Dak van Londense teater stort ineen

Die dak van ‘n teater in die Britse hoofstad Londen het ineengestort en minstens 76 mense is beseer.

Na wat berig word is sewe van die 76 mense ernstig beseer nadat die dak van die Apollo-teater in Londen meegegee het.

Die Londense brandweer sê al die mense wat gedurende die vertoning in die teater vasgekeer was, is gered uit die puin.

Agt-en-vyftig mense is in nabygeleë hospitale opgeneem. ‘n Teater naby waar Les Miserables speel, is as kitshospitaal ingerig.

Die Apollo het die “The Curious Incident of the Dog in the Nighttime” opgevoer, toe die ongeluk gebeur het.

Die stadsraad van Westminister sal ‘n ondersoek na die oorsaak van die ongeluk loods, maar het verklaar dat die ineenstorting nie as ‘n terreurdaad beskou word nie.

Die brandweer sê daar was bykans 720 mense in die teater toe ‘n strukturele fout daartoe gelei het dat die dak vyf verdiepings ver val.

Volgens ooggetuies het verskeie balkonne ook ineengestort en het dit soos ‘n “bom” geklink.