EgyptAir-vlug verdwyn

Die Egiptiese lugdiens EgyptAir sê sy vlug MS804 wat Woensdagaand vanuit Parys na Kaïro vertrek het, het van die radar verdwyn.

Volgens berigte was daar 69 passasiers en bemanningslede aan boord van die vliegtuig.

Griekse lugbeheer het blykbaar die Egiptenare laat weet dat die vlug van die radar verdwyn het.

‘n Soektog is intussen begin na die vliegtuig van EgyptAir wat vermis word. Die vliegtuig het geen noodsein uitgestuur nie.

Die vliegtuig, ‘n Airbus 320, het volgens berigte in die vroeë oggendure onderweg na Kairo vermis geraak nadat dit gisteraand vanuit Parys in Frankryk vertrek het.

Vlug MS804 het 66 mense aan boord gehad, waarvan ‘n aantal bemanningslede is. Die vlieënier was glo ervare en daar was geen gevaarlike of brandbare vrag in die ruim nie.

EgyptAir het gesê die vliegtuig het “kommunikasie met radar opsporingstelsels verloor” omstreeks 02:45 (0045 GMT), maar later die tyd verander na 02:30.

‘n Boodskap op Twitter is aanvanklik deur die lugredery aangehaal waar ‘n “ingeligte bron” die vlug as vermis aangedui het.

Opgedateerde inligting van EgyptAir sê:

EgyptAir A320 vlugnommer MS804 verloor kontak met radar bo die Middellandse See 280km (175 myl) van die Egiptiese kus om 02:30 [plaaslike tyd] met die vlug wat na verwagting by Kaïro-lughawe sou aankom teen 3:15.

Dit is heel anders as vroeër verslae van die lugredery wat die laaste bekende kontak as 50km noord van die Egiptiese kus aangedui het.

Die vliegtuig was op ‘n hoogte van 37,000 voet. Daar was 15 Franse aan boord van die vlug. Geen Suid-Afrikaners was glo op die vlug nie.

Skole, universiteite sien honderde miljoene in rook opgaan

Swart leerlinge wat sedert verlede Donderdag Orlando High School in Soweto in puin gelê het weens ‘n hekel teen die skoolhoof, het glo veroorsaak dat die skool sal moet sluit.

Sedert verlede Maandag, toe leerlinge begin het om boeke te brand en ‘n klaskamer ook uitgebrand is, het die swart leerlinge ook skooleiendom geplunder, insluitend meubels, skoot- en tafelrekenaars.

Volgehoue pogings tot brandstigting het Dinsdag en Woensdag gevolg en Donderdag het die swart leerlinge vensters gebreek en die administratiewe blok binnegeval.

Dit is nie duidelik of die plundery direk verband hou met die 24 skole in Vuwani wat afgebrand is in soortgelyke oproer nie.

Talle ander, ewe verkwistende en sinnelose gevalle elders is ook aangeteken.

Die LUR vir onderwys in Gauteng Panyaza Lesufi het intussen geweier om skade-assessors te stuur na die Orlando-skool, en gesê dit sou geen doel dien om te betaal vir opknapping nie.

Die petrolbomaanval op die Universiteit van Johannesburg (UJ) in die vroeë oggendure Maandagoggend het skade veroorsaak wat geraam word op R100 miljoen, die universiteit gesê.

Brandstigters het ingebreek en die ouditorium by Aucklandpark kampus UJ teen omstreeks 02:00 met ‘n petrolbom verwoes.

Hulle het ook rekenaarlaboratoriums en toerusting wat gebruik word vir loopbaanassessering verwoes, het die universiteit in ‘n verklaring gesê.

Die fasiliteite was vir gradeplegtighede en halfjaarlikse assessering gebruik. Alternatiewe reëlings sal gemaak moet word.

Rusland, VSA in Wene oor Siriese kopseer

Die Amerikaanse minister van buitelandse sake, John Kerry, en sy Russiese ampsgenoot, Sergei Lavrof, het ‘n hoëvlakvergadering in Wene, Oostentyk, gehou om te probeer om die vredesproses in Sirië weer op koers te kry.

Amerikaanse en Britse oproepe dat die regime van pres. Basjar al-Assad en die rebelle moet instem tot hulle raamwerk vir ‘n politieke oorgang, het tot dusver tot groot hoofbrekens gelei.

Amerikaanse amptenare wat saam met Kerry reis, sê Washington dring steeds daarop aan dat Al-Assad uittree en dat 1 Augustus as die ­sperdatum hieroor en die ­inwerkingtreding van die raamwerk gestel word.

Al-Assad, wat die militêre steun van Rusland en Iran geniet, het egter nog geen aanduiding gegee dat hy voornemens is om dit te doen nie.

Saoedi-Arabië dreig intussen om plan “B” te loods, wat volskaalse militêre ingryping beteken om van die Siriese leier ontslae te raak.

“Dit is duidelik gemaak dat Bashar al-Assad twee keuses het – óf hy sal deur ‘n politieke proses verwyder word of hy sal verwyder word deur middel van geweld,” het Adel al-Jubeir aan verslaggewers gesê nadat die ISSG met Rusland en die VSA vergader het.

“Ons glo ons moet ‘n plan B hê,” het hy gesê.

“As hulle nie reageer op die druk van die internasionale gemeenskap nie… dan sal ons maar moet sien wat anders gedoen kan word.”

Die lot van Assad blyk steeds ‘n struikelblok vir lede van die ISSG te wees.

Moskou is gekant teen enige pogings om ‘n vredeskikking op voorwaarde dat die verwydering Assad se smee, met die Russiese minister van buitelandse sake wat dit duidelik gemaak het dat Rusland die stryd teen terreur voer, en hulle “het nie ‘n beter alternatief as die Siriese leër nie”.

Die Duitse minister van buitelandse sake, Walter Steinmeier, met sy aankoms in Wene die Amerikaanse voorwaarde herhaal, maar weggeskram van oorlog.

“Dit is hoekom ons, onder die beskerming van die VN (Verenigde Nasies), die oorgangsregering en hoe dit saamgestel moet word, moet bespreek en seker maak sake is op koers,” het hy bygevoeg.

Intussen het gerugte die ronde gedoen dat wapens deur Swaziland vloei na die Midde-Ooste met die Swazi-president wat glo invoersertifikate teen $1 miljoen elk verskaf.

Tot dusver het die VN-geleide vrede­samesprekings in Genève, Switserland, onder aanvoering van die internasionale gesant Staffan de Mistura, min vordering gemaak. Washington-ondersteuners het self hul twyfel uitgespreek of hul 1 Augustus ‘n haalbare sperdatum is.

Die Internasionale Siriese On­dersteuningsgroep (ISSG) se 17 lande sal tydens hierdie vergadering sy oproep vir ’n nasionale wapenstilstand en die onmiddellike toegang deur humanitêre hulpverleners aan die beleërde gebiede, herhaal.

‘n Senior amptenaar van buitelandse sake (Amerika) het aan joernaliste in Wene gesê gesprekke word gevoer met Rusland “om ’n beter klimaat” vir die samesprekings te skep, veral by die Al-Assad-regime”.

Die opposisie-koalisie is meer oop oor die ooreenkoms wat hulle graag sou hê, maar Al-Assad se mense neem nog nie deel nie al steun hulle in die openbaar die samesprekings, het hy gesê.

Grootste dwelmvonds ooit in Colombië

Agt ton kokaïen is in Colombië deur die polisie gekonfiskeer, die grootste binnelandse dwelmvonds in dié land se geskiedenis, het AP berig.

Dit behoort aan ’n misdaad­sindikaat bekend as die Usuga-­clan en is gevind in ’n ­piesangboord in Turbo, Antioquia, naby die grens met Panama. Dit was glo bestem om via die Karibiese Eilande na die VSA te gaan.

“’n Slag teen misdadigers is geslaan,” het pres. Juan Manuel Santos op Twitter na dié deurbraak verwys. Hy het die land se polisie gelukgewens met die goeie werk.

Drie verdagtes is in hegtenis geneem en drie het ontsnap, het die polisie in ’n verklaring gesê. Vyftig lede van die nasionale polisie-agentskap, bygestaan deur helikopters, het Sondag op die piesangboord toegeslaan.

Bykans 1,5 ton kokaïen was reeds verpak en gereed om verskeep te word, het Luis Carlos Villegas, minister van verdediging, in ’n verklaring gesê.

Volgens dié land se polisie is meer as 86 ton kokaïen dusver vanjaar gekonfiskeer.

Colombia is die grootste kokaprodusent ter wêreld en produseer volgens die Verenigde Nasies 442 ton kokaïen per jaar. Koka is enigeen van ’n aantal struike van Suid-Amerika waaruit kokaïen verkry word.

TAC kry skielik toegang tot Vrystaat

Die Vrystaatse provinsiale regering gaan die stand van gesondheidsdienste in die provinsie ondersoek nadat ‘n afvaardiging van die Treatment Action Campaign (TAC) met die provinsiale kabinet vergader het.

Anele Yawa van die TAC sê die tekort aan medikasie, skorsing van gesondheidswerkers en onbevoegdheid van die LUR vir gesondheid, Benny Malakoane, was op die agenda vir die vergadering.

Die ingryping van adjunkpresident Cyril Ramaphosa is klaarblyklik die rede vir die vergadering tussen die Treatment Action Campaign (TAC) en die Vrystaatse regering.

Yawa sê die nie-regeringsorganisasie het Ramaphosa genader om toegang tot die Vrystaat te kry.

Hy sê enkele dae ná dié vergadering het die premier van die Vrystaat Ace Magashule – in sy hoedanigheid as voorsitter van die provinsiale Vigsraad – die TAC genader om probleme in die provinsie te bespreek.

LUR vir Ekonomiese Ontwikkeling en Toerisme, Sam Masinini, het die media ná die vergaderingnamens die provinsiale kabinet toegespreek.

Hy sê in ‘n vergadering wat op 11 Mei plaasgevind het, het dit duidelik geword dat die uitvoerende bestuur op die saak moet begin fokus.

Hy het ontken dat die departement tot dusver nie doeltreffend ten opsigte van die gesondheidskrisis in die provinsie opgetree het nie.

Vuwani, Malamulele steeds uiters onbestendig

Swart onderwysers het nie Dinsdag by skole in Mashau, naby Vuwani in Limpopo vir klas opgedaag nie. Geen van die beloofde mobiele klaskamers is nog afgelaai nie.

Vuwani en Malamulele in Limpopo word steeds as uiters onbestendig bestempel ten spyte daarvan dat die minister van Staatsveiligheid die situasie dmv sekere hoofmanne probeer kalmeer.

By die Maligana Wilson-sekondêre skool het slegs twee van die 23 onderwysers aangemeld. Leerlinge het by skole opgedaag maar kon nie onderrig ontvang nie omdat onderwysers uit vrees vir geweld wegbly.

Sowat 24 skole is die afgelope ruk afgebrand na etniese geweld uitgebreek het oor ‘n besluit rakende die munisipale afbakening van die gebied

Parlementslede het ‘n blitsdebat oor die etniese krisis in Vuwani in die Nasionale Vergadering gehou. Tydens die blitsdebat oor die etniese geweld in Vuwani in die Nasionale Vergadering is die afbrand van skole gekritiseer.

Die minister van staatsveiligheid, David Mahlobo het ‘n streng waarskuwing gerig aan inwoners wat onderwysers in en om Vuwani in Limpopo intimideer.

Tradisionele leiers in die gebied het ook hul kommer uitgespreek. Hoofman Livhuwani Matsila wat Mahlobo vergesel, sê onderwysers het onderneem om aan te meld vir werk.

Matsila sê hulle is teleurgesteld, veral na hul gesprekke met die onderwysvakbond, Sadou en skoolbeheerliggame.

Die OVK het reeds in April ‘n beroep gedoen dat die geweld by sy lokale gestaak word.

Op Vuvani in Limpopo moes nege lokale weens onrus gesluit word.

Die Hoofkiesbeampte, Mosotho Moepya het ‘n beroep op kiesers gedoen om hulle van geweld te weerhou en hulle reg om te stem uit te oefen.

Die EFF se hoofsweep, Floyd Shivambu het die ANC en ‘n tekort aan ekonomiese ontwikkeling die skuld gegee vir die onrus in Vuwani.

Shivambu sê die geweld hou verband met konflik binne die ANC.

Hy beweer die burgemeester van Makhado en sekere raadslede besef dat hulle hulle poste sal verloor indien Vuwani volgens ‘n besluit van die Munisipale Afbakeningsraad by ‘n nuwe munisipaliteit ingesluit word.

Winnie Rust is doodgewurg deur haar moordenaar

Winnie Rust (77), vermoorde skryfster van Wellington, is doodgewurg deur haar moordenaar.

Luidens die klagstaat in die saak teen die twee bruin mans, Nigel Plaatjies (18) en Johannes Plaatjies (34), is dit die oorsaak van haar dood.

Die polisie het verskeie items wat aan Rust behoort het in die jonger man se besit gevind toe hy aangekeer is. Nigel is die seun van ‘n voormalige bediende van die Rusts en Johannes is sy oom.

Rust is verlede Woensdag vermoor in haar kombuis aangetref. Haar arms en voete was vasgebind en haar gesig was vol bloed.

Nigel het Maandag in die landdroshof op Wellington op aanklag van moord verskyn nadat hy Vrydag 13 Mei, twee dae ná die moord op Rust, in New Rest, Wellington, by sy ouerhuis in hegtenis geneem is.

Die saak teen hom is tot 24 Mei vir ‘n formele borgtogaansoek uitgestel en hy sal tot dan in aanhouding bly.

Johannes het Dinsdag in die landdroshof op aanklag van moord verskyn. Die saak teen hom is ook tot 24 Mei uitgestel.

EFF weer uitgeboender uit parlement

Die leier van die EFF, Julius Malema het die chaos in die Parlement Dinsdag regverdig.

EFF-LP’s en amokmakers het na bewering personeel met brandblussers gespuit, ‘n glasdeur gebreek en onder meer besemstokke gegooi.

Malema sê egter hulle onderbrekings en ontwrigtings is “vreedsame pogings” om president Jacob Zuma teen te staan.

Hy het na afloop van die hernude chaos toe EFF-LP ‘s uit die parlement gegooi is, weer die geleentheid benut om media-aandag op die EFF te fokus.

Die speaker, Baleka Mbete het veiligheidspersoneel nader geroep nadat die EFF geweier het om die president ‘n geleentheid te gee om die huis toe te spreek.

Die ANC het die EFF-vandale skerp gekritiseer en gesê die parlement sal toesien dat strafregtelike klagte ingedien word teen hulle.

Pres. Jacob Zuma het na die oproer rustig voortgegaan om die geskeduleerde vrae te beantwoord ten spyte van die EFF se aandrang dat nie nie die Nasionale Vergadering mag toespreek nie.

Dit is die vierde keer dat die Withemde, die veiligheidsdiens, EFF-LP’s moes verwyder weens oproerigheid.

Probleme wag vir Brasilië

Michel Temer, Brasilië se nuwe, waarnemende president, is self ‘n ongewilde leier en gaan met baie van dieselfde probleme te make hê as wat pres. Dilma Rousseff moes trotseer, het AFP berig.

Brasiliane hoop hul regering kan ná ’n maande lange stryd oor die geskorste Rousseff se staat van beskuldiging aanbeweeg.

Dit het die aandag afgelei van die land se ander probleme, waaronder die ergste resessie in jare en die reël­ings vir die Olimpiese Spele wat in Augustus begin.

Hoewel Temer (75) die steun van sakelui het, meen politieke ontleders hy sal dieselfde struikelblokke as Rousseff teëkom.

Rousseff (68) is deur die senaat vir tot 180 dae geskors nadat sy in ’n staat van beskuldiging gestel is en sy verhoor moet word. Sy het glo begrotingsprobleme verswyg om tot president herkies te word. Temer, ’n regse veteraan, is ook nie gewild in Brasilië­ nie.

Hoewel Rousseff se goedkeuringsyfer onder 10% geval het, sal Temer maar 1% of 2% van die stemme in ’n presidentsverkiesing kan lok, is in ’n onlangse peiling bevind.

Rousseff het hom uitgekryt vir die leier van ’n “staatsgreep” om van haar ontslae te raak en hy moet nou die openbare vertroue herstel in ’n politieke stelsel wat Brasiliane as korrup beskou.

“Hy sal baie van die Brasiliane se ontevredenheid erf weens die soort tradisionele politiek wat hy verteenwoordig.

“Dit sal vir hom moeilik wees om hom as ’n nuwe mens sonder enige verbintenis met die vorige leierskorps te herskep,” sê ­Thiago Bottino, ’n ontleder aan die Getulio Vargas-stigting.

Lincoln Secco, ’n historikus aan die Universiteit van São Paulo, sê Temer kan later ’n ander probleem hê: Rousseff.
“Vir vyf of ses maande (terwyl die verhoor aan die gang is) het ons ’n nie-uitvoerende president.

“Haar skadu sal oor Temer hang en druk sal op sy regering geplaas word om gou resultate te lewer.”

Die Temer-administrasie se hoop is op die herstel van die sukkelende ekonomie gevestig.

Die sakewêreld sien reeds uit daarna om ’n regering te hê wat markvriendeliker is ná jare van linkse beleid en groeiende tekorte. Brasilië is in sy tweede jaar van ’n resessie en sal na verwagting eers teen 2018 groei toon.

Om die ekonomie aan die gang te kry, het Temer ’n “brug na die toekoms” voorgestel waaronder besnoeiing van staatsuitgawes en handelshervormings tel.

Onder Rousseff en haar voorganger Luiz Inácio Lula da Silva, het die land se maatskaplike programme miljoene mense uit armoede gelig. Vir talle Brasiliane is Temer ’n tree terug.

“Ek dink burgerlike bewegings sal die strate invaar. Hulle gaan die lewe vir Temer nie maklik maak nie,” sê Debora Messenberg van die Universiteit­ van Brasilië.

Trump en Bernie Sanders pla Hillary

Bernie Sanders het Dinsdagaand Oregon ingepalm nadat hy ‘n laataanslag deur Hillary Clinton afgeweer het.

Die Amerikaanse deelstaat Kentucky se voorverkiesingstryd is naelskraap deur Clinton gewen.

Donald Trump het Clinton gespot omdat sy so gesukkel het om Kentucky te wen.

“Dink jy die kroek Hillary sal uiteindelik die transaksie sluit?” het Trump getwiet. “As sy Kentucky nie kan wen nie, moet sy uit wedloop val. Die sisteem is skeef!”

Sanders se oorwinning het die broodnodige momentum aan sy veldtog verskaf, wat dalk kan lei tot vuurwerke by die Demokratiese Konvensie as ‘n presidentskandidaat aangewys word.

Donald Trump en Hillary Clinton is voorheen as voorlopers in die wedloop na die Withuis beskou.

Die Reuters-Ipsos-peiling onder waarskynlike kiesers landwyd in die VSA, toon dat die presidentsverkiesing op naelbyttryd tussen dié twee kan afstuur.

In die volgende ses maande vóór die verkiesing op 8 November kan verrassings oplewer, maar dat Clinton sal sukkel teen Trump, is reeds duidelik.

Trump se gewildheid het verder die hoogte ingeskiet nadat hy die stryd om as die Republikeinse Party se kandidaat aangewys te word, gewen het.

Ted Cruz en John Kasich moes die handdoek ingooi en aan die wedloop onttrek.

Die peiling wys dat 41% van die waarskynlike kiesers Clinton in hierdie stadium ondersteun en 40% vir Trump, met 19% wat besluiteloos is. Die peiling is oor ’n tydperk van vyf dae onder 1 289 mense gedoen.

Die Washington Post berig dat Trump met Henry Kissinger ontmoet het om oor buitelandse beleid te gesels.

Sanders het gesê hy wil niks met Kissinger te make hê nie en opgemerk dat Kissinger het die weg gebaan vir een van die ergste gevalle van volksmoord in die moderne geskiedenis

Volgens Sanders was Kissinger verantwoordelik vir die massiewe bombardement van Kambodja en die daaropvolgende grondinval, wat kommunistiese Chinese gerugsteun het om die Khmer Rouge aan bewind te kry.