Berigte oor ebola-slagoffer in Durban misleidend

Die Nasionale Instituut vir Oordraagbare Siektes sê berigte dat ‘n ebola-slagoffer in Durban aangemeld is, is misleidend.

Volgens die Instituut is die man se simptome nié dié van ebola nie, hy is voorts nooit daarvoor getoets nie en is ook nie opgeneem nie.

Luidens verskeie berigte is ‘n man vir toetse vir die ebola-virus in Durban se Addington-hospitaal opgeneem.

Daar is berig dat die man tyd in Sierra Leone deurgebring het, een van die state in Wes-Afrika waar die pandemie uitgebreek het.

Dié nuus het konsternasie by die hospitaal veroorsaak.

Die man werk as ‘n vlootbestuurder vir ‘n maatskappy in Sierra Leone en daar is volgens die Instituut geen risiko dat hy aan die virus blootgestel is nie.

Pick n Pay, Land Rover oorweeg boikot van Afrikaanse fees oor Steve

Die supermarkketting Pick n Pay en Land Rover bevind hulle tans midde-in die stryd rondom die sanger Steve Hofmeyr aangesien daar druk deur anti-Afrikaanse elemente op hulle toegepas word om hulle aan die “Afrikaans is groot”-fees te onttrek weens Steve se deelname daaraan.

Conrad Koch, die vloekende, linkse buikspreker met sy pop Chester Missing, het vandag ‘n rubriek in The Times met die titel “Dear white supremacists…” gepubliseer waarin hy Pick n Pay en Land Rover aanmaan om nie net Hofmeyr nie, maar sommer die hele Afrikaanse fees te boikot.

Koch se eerste “oorwinning” was toe hy die motorhandelaar Williams Hunt kon oorreed om Steve Hofmeyr se geborgde bakkie in Port Elizabeth te onttrek vanweë sy “apartheidtwiet” waarin hy gesê het dat swartmense die “argitekte (of mede-argitekte) van apartheid” was.

Nadat Conrad Koch die telefoonnommer van Williams Hunt op sy Twitter-rekening geplaas het, het die handelaar blykbaar verskeie onstoke oproepe van linkses ontvang wat eis dat hy sy borgskap van ‘n voertuig vir Hofmeyr moet onttrek. Omdat die handelaar “neutraal” wou bly, het hy Hofmeyr gevra om die voertuig ‘n dag vroeër terug te gee.
Pick n Pay het op Koch se oproep gereageer deur te sê:

“Pick n Pay se reputasie deur rassisme in die openbaar en sterk teen te staan, spreek vanself. Ons is ‘n gekontrakteerde borg van Afrikaans is Groot en ondersteun Afrikaanse musiek, maar nie individue nie. Ons is nie betrokke by die organisasie of die proses om kunstenaars te kies nie.”

Koch, wat as buikspreker bekend is met sy pop, “Chester Missing”, het geantwoord: “Het julle verbind met ‘n apartheidsontkenner. Dit gee sy sienings geloofwaardigheid.”

Land Rover het nog nie in die media gereageer nie.

Louis Trichardt kry sy naam terug na hofstryd van 10 jaar!

Die vreugdevure brand vandag hoog in die dorpie Louis Trichardt waar die 10 jaar lange hofstryd teen die ANC-munisipaliteit se naamsverandering vandag op ‘n oorwinning uitgeloop het: die dorp kry sy ou, vertroude Voortrekkernaam weer terug!

Die hooggeregshof van Gauteng in Pretoria het vandag uitspraak in die guns van die dorp se voorsittersvereniging gegee en die munisipaliteit beveel om die dorp se naam te herstel.

'n Naambord van Louis Trichardt wat in 2007 na 'n uitspraak van die Appèlhof herstel is, maar intussen weer verander is
‘n Naambord van Louis Trichardt wat in 2007 na ‘n uitspraak van die Appèlhof herstel is, maar intussen weer verander is

Die ANC, maar ook die polities korrekte media in Suid-Afrika, het begin om in 2003 die naam “Makhado” vir die dorp te gebruik. In dié jaar is daar ook ‘n summiere naamsverandering in die Staatskoerant gepubliseer, sonder dat die dorp se inwoners daaroor geraadpleeg is.

Louis Trichardt is na die Voortrekkerleier met dié naam vernoem, wat ook dagboek van sy trek gehou het en daarom ook ‘n groot bydrae tot die Afrikanergeskiedskrywing gelewer het.

Louis Trichardt se voorsittersvereniging, wat ‘n petisie met 87 500 name opgestel het, het namens die inwoners die stad van die sogenaamde “Makhado” gedagvaar.

Onder andere het die voorsittersvereniging in die hof aangevoer dat die inwoners nie geraadpleeg is nie en dat die Pleknaamraad geen aanbeveling teenoor die destydse minister van kuns en kultuur gemaak het alvorens die naam van die borde verwyder is nie.

As deel van die protesaksies, is ‘n standbeeld van “hoofman Makhado” op die dorp destyds oranje, wit en blou geverf en ook “ontvoer” sodat die stadsraad dit op ‘n veilige plek moes aanhou en konstant moes bewaak. Op ‘n stadium is die weermag en die nasionale intelligensiediens “ontplooi” om die verwers vas te trek, dog sonder sukses.

 

Oogetuie vertel hoe metropolisie wit mans mishandel

‘n Ooggetuie van die inhegtenisneming van twee wit mans Saterdag by Zitapark in Garsfontein, Pretoria, tydens een van die mans se dogter se verjaarsdagpartytjie, sê sy sal nooit vergeet hoe dié tienjarige meisietjie histeries vir haar pa geskreeu het nie.

“Ek was baie bang en haar angsgille sal altyd by my spook,” sê Carmen Goodrich van Villeria.

Goodrich en haar familie het haar ouma se verjaarsdagpartytjie by die park gehou toe Chris De Lange en David Du Plessis deur vier swart metropolisiebeamptes in hegtenis geneem is.

“Die beamptes was baie arrogant en intimiderend en het die man (De Lange) klaarblyklik ‘n harde tyd gegee,” sê Goodrich.

“Dit was onnodig om die twee mans voor hul kinders, maatjies en ‘n klomp ouers in hegtenis te neem,” sê sy.

“Almal was duidelik getraumatiseer, insluitend my eie ma, en ek voel die beamptes kon beter opgetree het.”

Goodrich sê hulle het gesien hoe iemand wat by die park werk haastig ná die arrestasie rooi kleefband oor die kennisgewingbord wat aandui dat honde daar toegelaat word, aanbring.

De Lange en sy vrou, Sonja, het Maandag gaan foto’s neem van die bord wat nou aandui dat honde nie daar mag wees nie.

Op die webtuiste pretoriafordogs.co.za, wat plekke in Pretoria aandui waar mense met hul honde kan stap, is Zitapark gelys.

Daar is selfs foto’s op dié blad van honde wat langs die swembad baljaar.

Die getraumatiseerde wit klaers  behoort onverwyld ‘n klag by SAPS in te dien asook ‘n siviele eis teen die stadsraad instel, meen regslui.

In die video is dit uiters verdag dat ‘n wit man wat geen oortreding begaan het nie, op dié wyse hardhandig in hegtenis geneem is met brute krag en kragwoorde.

Senior Superintendent Isaac Mahamba, metropolisiewoordvoerder, sê die Tshwane metropolisie is in besit van die video, maar dat die beeldmateriaal van só aard is dat dit hulle nie toelaat om al die gebeure voor en ná die voorval te sien nie.

Hoewel ons vir dié rede nie kan vasstel of die beampte korrek of verkeerdelik opgetree het nie, is ons baie bekommerd oor die vulgêre taalgebruik wat gehoor kan word,” sê Mahamba.

African Bank se skuld word ingevorder

African Bank Investments vorder maandeliks sowat drie miljard rand se skuld in, sê die lener se toesighouer, Tom Winterboer.

Die instelling het om ‘n nuwe banklisensie aansoek gedoen as ‘n stap tot sy hertoelating tot die bedryf.

African Bank het in Augustus ‘n reddingsboei van die Reserwebank ontvang nadat die bank weens swak skuld ondergedompel is.

Die bank het voortgegaan om lenings toe te staan, terwyl hul kernmark van swart lae-inkomste leners nie hulle lenings terugbetaal het nie.

Onder die toesig van ‘n senior amptenaar van Pricewaterhouse Coopers, Tom Winterboer, is die bank onder kuratorskap geplaas.

Winterboer is deur die Reserwebank as kurator aangestel om die bank se hersiening te bestuur en hy het voortgegaan om slegte skuld in te vorder.

Die Reserwebank het aanvanklik gesê  R17 miljard se slegte skuld sal vir R7 miljard gekoop word.

Winterboer is egter nou van mening dat die lenings wel ingevorder kan word.

Nuwe entstof teen ebola getoets

Die Wêreldgesondheidsorganisasie, WGO, sê daar was die afgelope tyd ‘n afname in die verspreiding van Ebola in Liberië.

Die WGO het egter gewaarsku dat dit nog te vroeg is om te beweer dat die siekte onder beheer is.

Liberië is die land wat die ergste deur die siekte getref word in Wes-Afrika.

Die aantal nuwe gevalle wat in Wes-Afrika aangemeld is, is 13 703 en die dodetal sal waarskynlik binnekort die vyfduisendkerf verbysteek.

Intussen het ‘n medikus in Lausanne, Switserland, aangekondig dat ‘n toetse vir inentings sal begin op Oktober 31, met die bereidwilligheid van minstens ‘n paar inwoners om ingespuit te word met die Ebola-virus.

Sal die stad sal die gasheer van die grootste studie vir ‘n eksperimentele entstof teen Ebola wees.

Die WGO sê soveel as 10 000 mense per week sal in Desember aansteek.

Die entstof, wat deur GlaxoSmithKline vervaardig gaan word, sal in Lausanne op 120 gesonde volwassenes getoets word, het dr Blaise Genton, die studieleier, aangekondig.

Genton sê Glaxo se eksperimentele entstof is gebaseer op ‘n lewendige weergawe van ‘n genetiesgemodifiseerde sjimpanseevirus wat ebola bevat.

Oproer by platinummyn onder beheer

Gewelddadige oproer naby die Bokoni-platinummyn buite Burgersfort in Limpopo is volgens die polisie onder beheer gebring.

Inwoners het vroeër twee huise en ‘n motor van ‘n plaaslike hoofman aan die brand gesteek.

Ontstoke inwoners beskuldig die hoofman daarvan dat hy die myn toestemming gegee het om in die omgewing aktief bedrywighede te begin.

Oproermakers het ook myntoerusting aan die brand gesteek.

Oproeriges het die dood van ‘n inwoners wat vermoedelik na skietwerk by die myn deur ‘n klip getref is, maande gelede, as verskoning gebruik om op ‘n vernietigingstog te gaan.

Hulle sê die mynbestuur het sedert die ongeluk nog nie met hulle geskakel nie.

Byna 170 oortredings tydens Poskantoorstaking

Die minister van Telekommunikasie, Siyabonga Cwele, sê byna 170 sake is by die polisie aangemeld vir misdade wat tydens die staking gepleeg is.

Die onwettige tweemaandelange staking deur werkers wat vaste aanstellings en verhogings eis, het die Poskantoor feitlik op sy knieë gedwing.

Die misdade sluit ondermeer gevalle van kwaadwillige saakbeskadiging, intimidasie en aanranding in.

Cwele het in die Nasionale Vergadering van die parlement op ‘n vraag gereageer.

Die minister sê diegene wat die meeste deur die staking geraak word, is die armes, maar sakeondernemings het swaar gely onder die staking aangesien talle van duur koerierdienste moes gebruik maak.

Cwele pogings om die Poskantoor en die vakbondleiers te oorreed om tot ‘n vergelyk te kom sal voortgaan sodat werkers kan terugkeer werktoe.

Vakbondleiers het vroeër hulle looneis van 15 persent tot 7,5 persent afgeskaal.

Die Universiteit van Suid-Afrika het ondanks die staking ononderbroke dienste ontvang.

UNISA is een van die Poskantoor se grootste kliënte.

Cwele het gesê die Poskantoor het met die hulp van UNISA stelsels in plek gestel om te verseker dat die Unisastudente hulle pos en studiemateriaal ontvang.

Dit is veral belangrik vir studente wat eksamen gaan skryf dat hulle hulle werkstukke ter voorbereiding van die eksamen betyds ontvang.

Die minister het ook gesê die Departement en die Poskantoor sal voortgaan om met ander groot rolspelers en instellings wat swaar leun op die Posdienste, in gesprek te tree.

Onregmatige staatsbesteding verdubbel

Dit gaan moeilik wees om te verduidelik hoekom sommiges in Suid-Afrika uitmergelende begrotingsbesnoeiings in die gesig staar, terwyl die presidensie skaamteloos vir ‘n verdriedubbeling van hul eie begroting ruimte laat in die mediumtermynbestedingsraamwerk, van R366 miljoen tot R1 miljard in 2017.

Daarbenewens het staatsdepartemente se onregmatige besteding die afgelope geldjaar meer as R62 miljard beloop.

Die ouditeur-generaal Kimi Makwetu wat die ouditverslae in die parlement bekendgemaak het, sê onregmatige besteding het meer as verdubbel vanaf R26 miljard in die 2011-2012 boekjaar.

Makwetu sê die departement van Onderwys in Limpopo het vier persent van die R62,7 miljard in die water gesmyt. Dit is ‘n bedrag van R2,2 miljard wat vermors is.

Die ANC gaan ook nie terugdeins van die skep van 750 nuwe poste om hul netwerk uit te brei nie.

Dit is duidelik dat regering vrees kiesers sal in ‘n ekonomiese krisis, wanneer hardwerkende mense hul werk verloor, nie meer vir die regerende party wil stem nie.

Behalwe die presidensie se uitspattigheid, is daar geen maatreëls om ‘n groeiende burokrasie terug te snoei nie. Dit het daartoe gelei dat die regering se besteding tot ‘n ongelooflike 45,9% van die BBP toegeneem het.

In 2012 het Ghana se regering die besluit geneem het om die openbare sektor lone met sowat 20% te verhoog. Dit het die salarisrekening laat styg sowat 47%, volgens die Internasionale Monetêre Fonds.

Teen die middel van verlede jaar was Ghana in ‘n fiskale krisis gedompel, met ‘n tekort van 12% en die regering se skuld meer as 60% van die bruto binnelandse produk (BBP).

Nigeria sukkel met oliepryse wat bly daal. Buitelandse reserwes het ‘n maand gelede gedaal met sowat $600 miljoen en met $1 miljard in vergelyking met drie maande gelede.

Buitelandse reserwes is ‘n kosbare fiskale buffer in Nigerië, en tree as ‘n stabiliseringsmaatstaf vir die naira op.

Dit is die soort probleme waarop Suid-Afrika binnekort gaan afstuur te midde van ‘n moeilike ekonomiese wêreldklimaat.

Dan Roodt neem deel aan SABC3-program oor ‘rassisme’

Dr Dan Roodt was Dinsdagmiddag die enigste wit gas op ‘n geselsprogram op SABC3 oor rassisme.

Roodt is genooi om saam met vyf swart deelnemers waaronder Eusebius McKaizer en Ndumiso Ngcobo op 3Talk saam met Noeleen Maholwana-Sangqu te verskyn.

As die enigste wit gesig is Roodt van meet van aan as die “rassis” uitgekryt deur die res, maar hy het die deelnemers gemaan om nie in vervoering te raak oor ingevoerde Amerikaanse idees nie.

Volgens Roodt word swartes in die VSA nou in stede soos New York “ebolas” genoem en twee swart kinders uit Senegal het die week in die hospitaal beland nadat hulle deur wittes aangerand is. Daarom is die VSA met sy obsessie oor “rassisme” kwalik die land van waar Suid-Afrika lesse behoort te neem.

Eusebius McKaiser het erken dat hy as kleurling ‘n “rassistiese opvoeding” gehad het omdat sy ma vir hom dikwels gesê het hy “moet die gordyn toetrek as hy aantrek want die Bantoes kyk vir jou”.

Op ‘n stadium het die deelnemers daaroor gedebatteer of ‘n blanke ook ‘n Afrikaan kan wees, op aandrang van Sebenzile Nkambule, ‘n aanbiedster van Radio 702. Volgens haar kan slegs ‘n swartmens ‘n “Afrikaan” wees. Die programleidster Noeleen Maholwana-Sangqu het egter die idee verdedig dat Roodt insgelyks, as Afrikaner, ‘n “Afrikaan” sou wees.

“Jy is mos ‘n Afrikaan?” het sy aan hom gevra.

“Ja, beslis, ek is ‘n Afrikaan,” het hy geantwoord. Hy het egter die gehoor daaraan herinner dat daar 80 miljoen mense in Egipte is wat nie swart is nie, en erg in die gesig gevat sou voel indien hulle nie ook as boorlinge van Afrika gereken word nie.

Nkambule het aanhou sê dat slegs swartes Afrikane kan wees.

Heelwat Twitter-boodskappe oor die debat het gisteraand en vanoggend gevlieg. Onder andere het Zelda La Grange, die voormalige sekretaresse van Nelson Mandela, aan Eusebius McKaiser getwiet dat Roodt nie “eerlik was nie”:

Hierop het Roodt haar geantwoord: