Verspreide oproer oor buitelanders, HOP-huise

somaliDaar is steeds ‘n groot polisieteenwoordigheid by New Brighton in Port Elizabeth nadat die plunder van winkels wat aan Somaliërs behoort deur die woonbuurt versprei het.

Die Somaliërs het alles opgepak wat hulle uit hulle winkels kon red en is na veiligheid geneem.

‘n Polisiewoordvoerder, Thembi Gwe sê die geweld het na bewering begin nadat ‘n Somaliese man ‘n 30-jarige man tydens ‘n argument doodgeskiet het.

Lede van die gemeenskap het toe op ‘n stormloop gegaan en tien winkels geplunder. Drie winkels en ‘n voertuig wat buite een van die winkels geparkeer was, is aan die brand gesteek.

Die plundery het in Gunguluza- en Tintilistraat begin, maar het vinnig versprei. Die polisie monitor steeds die gebied.

Verder noord het inwoners van die Thekwane-Suid township naby Nelspruit in Mpumalanga een van die hoofpaaie na Nelspruit met brandende buitebande versper.

Die inwoners beweer dat  hulle huise aan ander mense verkoop. Hulle wil hê die LUR vir huisvesting, Andries Gamede moet ingryp en ‘n oplossing vir die saak vind.

Die betoging gaan na verwagting die oggendverkeer in die Mbombela gebied ontwrig, aangesien die pad wat versper word ook die KaNyamazane township met Nelspruit verbind. – RSG

Komitees oor twee omstrede kwessies begin dié week

parliamentTwee Parlementêre komitees begin die week werk aan omstrede kwessies.

‘n Ad-hoc komitee gaan President Jacob Zuma se opmerkings oor die wetsontwerp oor die beskerming van staatsinligting oorweeg.

Zuma het die wetsontwerp verlede week terugverwys na die Parlement, en gesê dele daarvan kan ongrondwetlik wees.

‘n Ander ad-hoc komitee gaan kyk na die Openbare Beskermer se verslag oor die Onafhanklike Verkiesingskommissie se kantore in Centurion.

Die Openbare Beskermer, Thuli Madonsela het vroeër die maand in haar verslag aanbeveel dat die Parlement stappe teen die voorsitter van die OVK, Pansy Tlakula oorweeg vir haar rol in die verkryging van die gebou.

Die twee komitees het tot 31 Oktober om die kwessies te oorweeg voordat hulle moet verslag doen aan die Nasionale Vergadering. – RSG

Pule kos belastingbetaler al oor ‘n miljoen aan regskoste

Dina Pule
Dina Pule

Dina Pule se opvolger, Yunus Carrim, het onthul dat die voormalige minister van kommunikasie se regskoste die belastingbetaler reeds R1,2 miljoen uit die sak gejaag het.

Carrim het in die parlement gesê dat die regskoste tot dusver R1 187 148,82 beloop. Dit is nog nie die finale bedrag nie.

Die Sunday Independent het berig dat die staat gewoonlik dié soort uitgawes dek. Dis egter onduidelik of die staat die uitgawes sal dek wat die voormalige minister ná haar afdanking aangegaan het.

Pule word tans deur die openbare beskermer vir beweerde ongerymdhede ondersoek.

Die Valke het verlede week bevestig dat dié eenheid se ondersoek na die gewese minister ook voortgaan.

Pinetown-bestuurder in hof

pinetown3Die vragmotorbestuurder wat teen vier taxi’s en ‘n motor gebots het, verskyn Maandag in die Pinetown-landdroshof.

Die ongeluk het die lewens van 22 mense geëis.

Sanele Goodness May (23) van Swaziland, is op 6 September op 22 aanklagte van moord en roekelose of nalatige bestuur in hegtenis geneem.

Landdros Wendolynn Robinson het die saak tot Maandag uitgestel, maar het gesê ‘n formele borgtogaansoek sal op 18 September plaasvind.

Theasen Pillay vir die verdediging het gesê hy is deur Sagekal Logistics aangestel om May te verteenwoordig.

May is aanvanklik aangekla van strafbare manslag, maar die nasionale vervolgingsgesag het bevestig dat die aanklagte van moord verander is.

Die ongeluk het kort voor 19:00 op 6 September op die hoek van Fields Hill (M13) en Richmondweg plaasgevind.

Sibongiseni Dhlomo, LUR vir gesondheid in KwaZulu-Natal, het gesê die dodetal het tot 23 gestyg nadat een van die beseerdes Saterdagoggend in die hospitaal gesterf het. – Sapa

ANC-voorsitter in Pakistan ontvoer

Lahore-lughawe
Lahore-lughawe

‘n Suid-Afrikaanse sakeman is in Pakistan ontvoer.

Arshard Ali, wat ook die ANC-voorsitter in Meyerton is, was Dinsdag by die Lahore-lughawe op pad om ‘n vliegtuig terug na Suid-Afrika te haal, toe vier mans hom gedwing het om in ‘n dubbelkajuit-bakkie te klim, het Eyewitness News berig.

Ali se familie het die departement van internasionale betrekkinge om hulp genader.

“Hulle [die ontvoerders] het nie gesê wat hulle wil hê nie,” het sy vrou, Emel Ali gesê.

“Hulle het hom net gegryp. Kan enige iemand in Suid-Afrika my help om soheentoe te gaan om my man op te spoor?”

Die departement van internasionale betrekkinge kon nie vir kommentaar bereik word nie. – Sapa

Russiese parlementslid in ‘rassisme’-herrie oor piesangfoto van Obama

Irina Rodnina
Irina Rodnina

‘n Pro-Kremlin-parlementslid en vorige Olimpiese goue medaljewenner staar nou ‘n rassisme-herrie in die gesig nadat sy ‘n foto-collage van president Barack Obama op Twitter geplaas het waarin sy hom met ‘n piesang jukstaponeer

Irina Rodnina het ‘n fotokomposisie op Twitter geplaas wat dit laat lyk asof Obama en sy vrou na ‘n hand op die voorgrond staar wat ‘n piesang vashou.

Die beeld herinner aan die piesangs wat deur sommige sokkergeesdriftiges vir swart spelers in die lug gehou word, ‘n kwetsende rassistiese gebruik wat steeds by sommige wedstryde in Rusland gesien word.

Rodnina, 64, is tans ‘n parlementslid vir die regerende party in die Doema, die laer huis van die Russiese parlement, maar het goue medaljes in ysskaats in die 1970s en 1980s gewen.

Die foto wat sy op Twitter geplaas het, het viraal verpsrei nadat Rusland se charismatiese opposisieleier, Alexei Nawalni, dit Vrydagaand oorgeneem het.

Nawalni,  wat self al die wenkbroue laat lig het deur by nasionalistiese byeenkomste te praat, het geskryf dat die parlementslid “‘n grap gemaak het”.

Die joernalis Tikhon Ziadko het op Twitter geantwoord: “Doema-afgevaardigde Irina Rodnina steek nie weg dat sy ‘n rassis is nie.”

“Miskien is dié alledaagse rassisme. Miskien is dit dat sy sleg opgevoed is en ‘n verwronge sin vir humor het,” het die adjunkredakteur van die dagblad Moskofski Komsomolets, Aider Moesjdabajef, op ‘n woernaal geskryf.

“Die belangrikste is dat Rodnina dit gedoen het, en sy is hoegenaamd nie spyt nie.”

Nadat die plasing op Twitter Saterdag ‘n storm van afsku veroorsaak het, het Rodnina die boodskap uitgevee, maar steeds daarop aangedring dat sy niks verkeerds gedoen het nie.

“Spraakvryheid is spraakvryheid! Hanteer self julle ‘hang-ups’,” het sy onbevange op Twitter geskryf en gemeen dat die plasing haar gewildheid laat styg het.

‘n Lid van die laer huis se etiek-komitee, Jan Zelinski, het in kommentaar aan die Russiese Nuusdiens se radio-uitsending saamgestem.

“Sy beskou die president van die Verenigde State as iemand wat van piesangs hou. Wat is verkeerd daarmee?”

Irina Rodnina in haar dae as Olimpiese ysskaatskampioene
Irina Rodnina in haar dae as Olimpiese ysskaatskampioene

Nog ‘n bekende sportvrou, die paalspringster, Jelena Isibajewa, het onlangs internasionale woede veroorsaak deur Sweedse atlete te kritisser omdat hulle gay-regte by die Moskouse wêreldatletiekkampioenskap in Augustus bevorder het.

Sy het in gebroke Engels gesê dat Russe “normale standaardmense” is wat nie van gay-regtebyeenkomste hou nie.

Die Russiese laer huis van die parlement is vol bekende sportpersoonlikhede, waaronder die bokser Nikolai Waloejef, die gimnas Alina Kabjewa en tennisspeler Marat Safin, wat almal die Verenigde Rusland-party van meneer Poetin ondersteun. – AFP

Vierjarige brand dood

atlantis‘n Vierjarige swart seun het doodgebrand in ‘n plakkershut in die Witsand-lokasie in Atlantis, Kaapstad.

Wilfred Solomons-Johannes, woordvoerder van die stad Kaapstad se rampbestuursentrum, het gesê 20 mense is dakloos gelaat nadat hul huise in die brand verwoes is.

Die skade van die brand word op R36 000 geraam. – Sapa

VN-verslag oor chemiese wapens verwag

bankimoenDie sekretaris-generaal van die VN, Ban Ki-moen, gaan later vandag ‘n verslag deur wapeninspekteurs oor chemiese wapens in Sirië voorlê.

Hy het reeds aangedui dat die verslag aan die VN se Veiligheidsraad sal bevestig dat senugas in die aanval naby Damaskus op 21 Augustus gebruik is.

Honderde mense is in die aanval dood. Die VN-span is nie toegelaat om te sê wie vir die aanval verantwoordelik is nie.

Westerse regerings wys die vinger na die Siriese regering terwyl Rusland die blaam op die rebelle plaas. ‘n Russies-Amerikaanse skikking om Sirië se chemiese wapenvoorraad te vernietig sal ‘n besliste invloed op die Veiligheidsraad se beraadslagings hieroor hê.

Die skikking maak daarvoor voorsiening dat die wapens binne die volgende nege maande tot niet gemaak moet word. – RSG

Zuma: Jeugliga moet radikaal en gehoorsaam wees

blackwhitePresident Jacob Zuma het by ‘n byeenkoms in Seshego, Limpopo gesê die ANC Jeugliga mag radikaal wees, solank hulle die tradisies van die regerende party respekteer.

Tienduisende mense het die byeenkoms bygewoon. Daar was nie een wit gesig in die skare of op die verhoog nie, wat ‘n duidelike streep deur die ANC se vermaarde verbintenis aan “nie-rassigheid” getrek het.

Die president se toespraak was gemik om Julius Malema se EFF-steunbasis in sy tuisdorp. Zuma het gesê daar is nie iets soos die “Born Free” geslag nie – diegene wat ná 1994 gebore is – aangesien daar nog nie ekonomiese gelykheid in Suid-Afrika heers nie.

Die byeenkoms het die nege en sestigste herdenking van die Jeugliga gevier. Busse van oral het na Polokwane gereis vir die geleentheid.

Zuma het vroeër ook die graf van die voormalige Jeugligaleier Peter Mokaba besoek en ‘n krans gelê. Mokaba het die “Kill a Boer” liedjie gepopulariseer.

Zuma se neef verloor miljoene na goudtransaksie skeefloop

fakegoldKhulubuse Zuma, die president se gesette neef, het miljoene rande verloor nadat hulle deur ‘n goudswendelaar in Guinee om die bos gelei is.

Zuma en ‘n sakevennoot Sikhumbuzo Shamase, het vroeër vanjaar ‘n privaatstraler gehuur om die “goud” te gaan haal van ‘n stamhoof in dié Wes-Afrikaland.

Die twee sakemanne, het op 16 Februarie by Lanseria-lughawe geland na hul reis, en hoogs in hul skik met hul jongste aankoop vir foto’s geposeer. By die doeane is die houer met die kosbare vrag oopgesny aangesien die twee nie die sleutel gehad het nie.

Die “goud” is na ‘n stoorplek by OR Tambo-lughawe geneem waar ‘n Belgiese koper van Argentor Essayeurs dit ‘n paar dae later sou gaan haal het. Die transaksie was deel van ‘n reeks soortgelykes wat Zuma en sy vennoot voorheen glo met sukses afgehandel het.

Maar op 26 Februarie toe die Belgiese kopers die die “goud” in Antwerpen ondersoek, het hulle vasgestel dat dit koper- en sinkstawe is met ‘n geraamde waarde van R7 000, en die houer teruggestuur.

Zuma en sy vennoot het toe reeds R2,5 miljoen spandeer om die straler te huur, en na Conakry te vlieg.

“Dis ‘n korrupte stelsel waar die weermag saamwerk met tradisionele leiers wat die grond besit. As hulle jou wil bedrieg is dit gewoonlik dié twee [groepe] wat saamwerk,” het Shamase gesê.

Die twee het nooit die saak by die polisie aangegee nie. “Dis donker Afrika. Ons het die hou op die ken gevat, want dis deel van hoe sake gedoen word in Afrika,” Het Shamase aan die Sunday Times gesê.

Die Sentrale Bank in Guinee het die besending as 99% suiwer goud gesertifiseer en hulle het self die besending met ‘n lasergeweer getoets. Dit kom glo van 250 verskillende dorpies in Guinee waar goud op ‘n primitiewe, artisanale wyse gedelf word.

Die delwers neem dan die goud na die stamhoof wat dit verkoop.

Die twee sakevennote is nie baie bekommerd oor die jongste verwikkelinge nie. “Ons het ander manier gekry om die verlies te dek en dit gaan aanhou [om geld in te bring],” het Shamase gesê.

Zuma was een van die direkteure van die Auroramyn wat duisende myners werkloos gelaat het ná likwidasie. Die myn is in chaos gedompel na die infrastruktuur verwaarloos is en goudtransaksies nie verklaar is nie.

Een vreemde aspek van die transaksie is dat die goud nie direk na die koper geneem is nie. “Ons het met vorige transaksies die goed na China, Japan en Dubai geneem, maar dis ‘n probleem om die geld terug te bring. Daar is te veel vrae.”