Vyf mense is beseer in ‘n motorongeluk op die N14 by Upington waarin vier motors betrokke was.
ER24-woordvoerder, Russel Meiring, sê vier mans en ‘n vrou is beseer op die toneel gevind. Hulle het minder ernstige beserings opgedoen.
Nadat paramedici die beseerdes op die toneel behandel het is hulle afgevoer na die Upington-hospitaal vir verdere behandeling.
Die polisie ondersoek die ongeluk.
PRAAG het so pas ‘n antwoord van die Verenigde Nasies se kultuurliggaam, UNESCO in Parys, ontvang. Die Pro-Afrikaanse Aksiegroep het weereens ‘n klag by UNESCO aanhanging gemaak ná die jongste vlaag aanvalle op Afrikanerstandbeelde op kampusse.
“Die ANC-bewind, asook die radikale groepe in die land wat ons standbeelde en ander erfstukke aanval, is besig om strydig met plaaslike en internasionale wetgewing op te tree,” sê dr. Dan Roodt. “PRAAG is ook bekommerd oor versamelings van boeke en skilderye wat in biblioteke en museums gehou word en wat insgelyks die prooi van marxistiese revolusionêre bendes soos dié van die EFF kan word. Ook dít is aan UNESCO oorgedra.”
UNESCO het die wens uitgespreek dat ‘n “oplossing op nasionale vlak deur dialoog tussen gemeenskappe gevind kan word”. PRAAG se klag is aan Suid-Afrika se permanente verteenwoordiger by UNESCO oorgedra.
Die aksiegroep het reeds verlede jaar ‘n klag by UNESCO teen die ANC-bewind aanhangig gemaak op die stadium toe die Krugerstandbeeld in Pretoria gevandaliseer is. Die organisasie sukkel egter al ‘n jaar lank om met die departement van omgewingsake, wat met UNESCO skakel, te kommunikeer aangesien die departement weier om Afrikaans te gebruik. PRAAG sal egter binnekort ‘n dringende hofaansoek bring om die departement te dwing om erkenning aan Afrikaans as amptelike taal te verleen.
“Die kommunikasieprobleem met omgewingsake belemmer ons aksie om Afrikanererfenis van vandalisme en vernietiging te red,” sê dr. Dan Roodt van PRAAG. “In teenstelling met die ANC-bewind, kan mens gemaklik met internasionale organisasies kommunikeer aangesien hulle streng by hul taalbeleid hou en veeltaligheid handhaaf. Tot dusver het ons alle briewe aan UNESCO in Frans gerig, aangesien dit een van die amptelike tale van dié liggaam is en dit boonop in Parys gesetel is. Die ANC-bewind regeer vanuit Pretoria, ‘n Afrikanerstad, maar ken blykbaar geen woord Afrikaans nie. Vreemd. Ek is egter vol vertroue dat die howe ons gelyk sal gee dat Afrikaans nie in 1994 opgehou het om ‘n amptelike taal van Suid-Afrika te wees nie.”
PRAAG skakel met verskeie buitelandse regerings in ‘n poging om hulle by die reddingsaksie vir Afrikaanse erfenis te betrek, maar ook om tussen Afrikaners en die ANC-maghebber te bemiddel. “Ons bekyk tans die idee dat aspekte van Afrikanererfenis ook gedeelde erfenis met Europese lande kan wees,” het Roodt verklaar. “Die revolusionêre afro-marxistiese bendes is dus nie net besig om óns erfenis te vernietig nie, maar ook dié van Europa. Ons doen ‘n beroep op alle pro-Westerse groepe wêreldwyd om ons in ons stryd te ondersteun.”
Die aksiegroep is veral optimisties dat die veranderende politieke klimaat in Europa en die VSA pogings om Afrikanererfenis te red ten goede sal strek. “Mnr. Trump se gewildheid in die VSA, asook nuwe regse regerings in Oos-Europa, toon dat die tydvak van Westerse dekadensie ten einde loop,” sê Roodt. “Binnekort gaan die swartman in Suid-Afrika nie meer oor ‘n vrypas beskik om vanweë sy rassehaat vir die blanke ons standbeelde aan te val, of boeke en skilderye te verbrand nie.”
PRAAG blameer ook die hoofstroommedia vir die klimaat van onverdraagsaamheid wat daar teen Afrikanerkultuur en -erfenis geskep is. “Joernaliste in die HSM blaas die haat aan en juig as Afrikanererfenis gevandaliseer word. Ook word streng sensuur gehandhaaf oor enige pogings tot die teendeel: om Afrikanererfenis te red of te bewaar. Die alternatiewe media sal egter oor die beweging teen vandalisme en afro-marxistiese vernietiging berig. En iewers in die toekoms moet vandag se meelopers wat soveel haat en vernietiging teen ons aanblaas weens hul misdade teregstaan. Hulle gaan nog boet,” sê Roodt.
Owerhede in die Ivoorkus het 15 mense in hegtenis geneem na aanleiding van ’n aanval vroeër die maand waarin 19 mense dood is en waarvoor Al-Kaïda verantwoordelikheid aanvaar het.
Die polisie is steeds op soek na die vermeende voorbok, wat deur die aanklaer, Richard Adou, as Kounta Dallah geïdentifiseer is, het Reuters berig.
Gewapende mans het op 13 Maart op swemmers en sonbaaiers gevuur voordat hulle in verskeie hotelle op die strandfront in die dorp Grand Bassam, 40 kilometer van die kommersiële hoofstad, Abidjan, ingestorm het.
“Getuienis is op die toneel gevind wat ons in staat gestel het om sekere individue te identifiseer wat aan die aanval deelgeneem het,” het Adou op ’n mediakonferensie gesê.
Beslag is gelê op wapens, ammunisie, klapmusse en voertuie wat vermoedelik in die aanvalle gebruik is. Dit is ondersoek en ’n regter het sowel plaaslike as internasionale inhegtenisbevele voorberei, het hy gesê.
Elf inwoners van die Ivoorkus, insluitende drie spesiale mag-soldate is in die wilde skietery dood.
Vier Franse burgers is ook noodlottig in die voorval gewond en ander buitelandse slagoffers was van Duitsland, Libanon, Masedonië en Nigerië afkomstig.
Niger, die arm uraanryke land, se president Mahamadou Issoufou het 92 persent van die stemme in die omstrede tweede rondte verkiesings, wat deur opposisiepartye geboikot word, op hom verenig.
Die amptelike verkiesingsuitslae is Dinsdag bekend gemaak.
Sondag se verkiesing is deur ’n lae stempersentasie gekenmerk en die verkiesingskommissie sê Amadou kon net sewe persent van die stemme op hom verenig.
Issoufou se enigste teenstander, Hama Amadou, is sedert November in aanhouding weens ‘n wankelrige klag oor sy betrokkkenheid by babahandel.
Amadou moes van agter tralies sy veldtog voer nadat hy op 14 November in hegtenis geneem is op ‘n klagte wat allerweë as vals beskou word.
Hy het boonop enkele dae voor Sondag se verkiesing vir mediese behandeling na Frankryk gevlieg.
Amadou, die opposisieleier, het aanvanklik nie gelyk of hy die tweede ronde gaan haal nie.
“Van die gevangenis na die presidentskap, net soos Nelson Mandela!” het sy ondersteuners egter entoesiasties buite die tronk geskree toe hy wel deurgedring het.
Issoufou het in die eerste rondte in Februarie 48,4 persent gewen en Amadou het 17,7 persent van die stemme behaal.
Kiesersdeelname was krities ná die opposisie se versoek vir ’n verkiesingsboikot.
Issoufou voer aan dat hy ‘n groot vennoot van die Weste is in die stryd teen djihadiste. Die VSA en Frankryk het albei hommeltuigbasisse in Niger.
Issoufou het ná die aankondiging van die amptelike uitslae beloof om “gedurende hierdie mandaat, al my energie te gebruik om te reageer op die aspirasies van die mense van Niger”.
Hy sê die verskerping van veiligheid, die versterking van die demokrasie en die waarborg van voedselveiligheid sal sy prioriteite wees.
“Kom ons verenig en mors nie energie op ydele stryery nie,” het die president gesê.
In die verkiesing het die 64-jarige Issoufou, ’n voormalige mynbou-ingenieur met die bynaam “die leeu” te staan gekom teen die 66-jarige Amadou, ’n voormalige eerste minister en speaker van die parlement, bekend as “die feniks” vir sy vermoë om politieke terugkere te maak.
Die COPA 2016 opposisie-koalisie sê die stempersentasie was ’n skamele elf persent, ondanks die aanvanklike amptelike skatting van 56 persent.
In ‘n chaotiese streek, blyk die land ‘n hawe van stabiliteit te wees: In die noorde lê die Libiese konflik, jihadiste bly aktief in Mali en Boko Haram dreig Nigerië na die suide.
Minstens drie mense is gedood in geweld in Niger teen die Franse koerant, Charlie Hebdo, oor spotprente van die profeet Mohammed in 2015.
Die polisie moes traangas gebruik om woedende skares klipgooiende Moslems in bedwang te hou wat kerke aan die brand gesteek het en winkels in die hoofstad Niamey geplunder het nadat owerhede ‘n vergadering deur die plaaslike Islamitiese leiers verbied het.
‘n Polisiekantoor is ook aangeval en ten minste twee polisiemotors is toe verbrand.
President Denis Sassou Nguesso van die Kongo het die afgelope naweek se presidentsverkiesing gewen nadat hy gesorg het dat ‘n beperking op die aantal termyne wat hy mag dien, afgeskaf is.
Hy is die afgelope 30 jaar reeds in die regeringstoel. Die land se ministerie van Binnelandse Sake het die uitslag in Brazzaville bekendgemaak te midde van ‘n verbod op alle kommunikasie.
In die hoofstad Brazzaville, het die president se ondersteuners begin om die uitslag Woensdag reeds te vier na die voorlopige resultate aangekondig is.
“In gebiede waar die regering steun geniet is die strate besig en daar is feitlik geen polisie of weermag teenwoordig nie,” het alJazeera berig.
Opposisieleiers sê egter hulle sal nie die oorwinning aanvaar nie. Die regering het selfoonseine en die internet geblokkeer om onrus te voorkom.
Nguesso het 60 persent van die stemme gekry. Hy het verlede jaar veranderinge aan die land se grondwet laat aanbring wat hom toelaat om nog sewe jaar president te wees.
Sedert die grondwetlike referendum in Oktober wat ‘n beperking op die presidensiële termyne beëindig het, was die kanse van die 72-jarige voormalige valskermsoldaat om te wen, verseker.
Die land is ryk aan olie en hout.
Suid-Afrikaanse boere in die Republiek van die Kongo het ook glo reeds ‘n indruk op die president gemaak.
Die boere het hulle gevestig op ’n staatsplaas van 85 000 ha in die Niari-vallei. Binne enkele maande het die boere 1 200 ha ontbos en met mielies beplant.
Hulle het die waterpompe en pype na die grond herstel met die gevolg dat die plaaslike bevolking nou ook kraanwater het.
Waar die plaaslike bakker maar enkele brode ’n week verkoop het, bak hy nou 200 brode per dag as gevolg van die nuwe werkgeleenthede en geld vir die plaaslike gemeenskap.
Die Kongolese minister van Landbou het ’n video van die boere se suksesse gemaak ten einde dit aan die president te vertoon.
Die projek is ook as ’n presidensiële projek verklaar.
Die swart tuinier wat in verbrand met die moord op die Pienaar-egpaar van Nigel aangekeer is, se handlangers is vrygelaat.
Volgens die polisiewoordvoerder was daar geen bewyse wat die twee ander swartes met die dubbelde moord kon verbind nie.
Twee wit bejaardes, Allan en Chrissie Pienaar, is Saterdagaand tuis in Ferryvale in ‘n mesaanval vermoor.
Die polisie het die swart tuinier daarna in Duduza in die Pienaars se Kia Sorento voorgekeer.
Die tuinier het Sondag die twee as medepligtiges uitgewys en hulle is daarna in hegtenis geneem, het ‘n polisiewoordvoerder van Nigel gesê.
Die tuinier, wie se naam nog nie bekend gemaak is nie, is steeds in aanhouding en sal Woensdag 30 Maart in die hof verskyn.
Donald J. Trump en Hillary Clinton het hul teenstanders in die Arizonavoorverkiesing Dinsdag oorweldig, volgens die Associated Press.
Die twee presidensiële voorlopers hoop om te verhoed dat die nominasiestryd ingewikkeld raak sodat hulle op mekaar kan begin konsentreer.
Dit blyk dat een van die belangrikste verkiesingskwessies sal handel oor immigrasie.
Trump, die Republikeinse presidensiële voorloper, het Dinsdag gesê as hy president word, sal hy die grense van die land sluit in die nasleep van gekoördineerde terreuraanvalle soos in België.
Hy het getwiet dat ten minste tussen 10% en 25% van Moslems terreuraanvalle steun en bygevoeg dat Moslemimmigrasie “selfmoord” is.
Clinton het egter dadelik teruggekap. “Dit is onrealisties om te sê dat ons ons grense heeltemal vir almal gaan sluit,” het Clinton tydens ‘n onderhoud op NBC gesê.
Sy het haar opmerkings aan die terreuraanval in Brussel gewy en dit in ‘n aanval op Trump, die voorste Republikeinse aanspraakmaker, verander.
“Die laaste ding wat ons nodig het, my vriende, is leiers wat meer vrees aanhits,” het Clinton gesê met verwysing na Trump.
“In die gesig van terreur, moet Amerika nie paniekerig te raak nie. Ons moet nie mure bou of ons rug draai op ons [Moslem]bondgenote nie.”
Trump het Ted Cruz maklik verslaan in Arizona, en al 58 van sy afgevaardigdes tot sy voorsprong gevoeg.
Maar Cruz sal waarskynlik Utah se Republikeine oorreed in die hoop dat die 40 afgevaardigdes Trump se kieswinste beperk.
Cruz het Trump probeer verantwoordelik hou vir die terreur in Brussel en uitgevaar teen die voorloper omdat hy NAVO se uitgawes in Europa wil besnoei.
Senator Bernie Sanders het Clinton in die Utah-koukusse verslaan, en hy toon sy blywende appèl onder liberale aktiviste.
Clinton het ondersteuners in Seattle toegespreek maar Sanders botweg geïgnoreer.
Sanral se voorneme om dagvaardings uit te reik vir agterstallige e-tolrekeninge, neem hoegenaamd nie die Nasionale Verbruikerskommissie se ondersoek in ag nie, het die VF+ gesê.
Die party het vroeër reeds namens alle rekeninghouers ‘n klag by die Verbruikerskommissie ingedien waarin aangevoer word dat Sanral se meetinstrumente nie voldoen aan die vereistes van die Metrologiewet nie.
Die party se woordvoerder sê Sanral het tydens ‘n vergadering met die Vryheidsfront Plus erken dat hy geen skriftelike bewyse het van die Nasionale Reguleerder vir Verpligte Spesifikasies oor die wettigheid van sy meetinstrumente nie.
Bloot op grond hiervan sal enige poging van Sanral om geld in te vorder, onwettig wees.
Die vakbondfederasie Cosatu het gewaarsku dat Sanral se voorneme om dagvaardings uit te reik, die verhouding tussen die publiek en die regering verder kan versuur.
Cosatu sê Sanral se plan kom neer op “maatskaplike teistering”.
Die woordvoerder van Cosatu, Sizwe Pamla sê inwoners het dit baie duidelik gemaak het dat hulle nie die e-tolstelsel wil hê nie, maar die regering het die stelsel desnieteenstaande in werking gestel.
Pamla sê dit word as ‘n uiterste vorm van burokratiese afknouery gesien en sal die verhouding tussen Gautengse inwoners en die provinsiale regering versuur.
Nelson Kgwete, die woordvoerder van die die departement van Internasionale Betrekkinge, sê hulle is nie bewus van enige Suid-Afrikaners wat in die terreuraanvalle in Brussel omgekom het nie.
Die Afrika Unie Kommissie het die aanvalle in die Belgiese hoofstad veroordeel.
Die voorsitter van die Kommissie, Nkosazana Dlamini-Zuma, het haar medelye uitgespreek met die families wat geraak is deur die aanvalle.
Dlamini-Zuma sê die AU verwerp terrorisme en gewelddadige ekstremisme. Sy sê die AU sal met die internasionale gemeenskap saamwerk om terrorisme te bekamp.
Plaaslike en internasionale reise in België is steeds opgeskort en veiligheid regoor Europa is na die aanvalle opgeskerp.
‘n Vlag van ISIS en ‘n bom is gevind by ‘n huis in Brussel tydens ‘n soektog deur die Belgiese polisie in verband met Dinsdagoggend se aanvalle, het aanklaers gesê.
Die ploftoestel met spykers is by ‘n huis in die Schaerbeek-munisipaliteit gekry, het Belgiese aanklaers gesê.
Chemikalieë is ook gevind tydens die soektog.
Klopjagte word gedoen regoor die land in die nasleep van die terreuraanvalle, het die Belgiese federale aanklaer Frederic Van Leeuw aangekondig op ‘n perskonferensie.
‘n Moontlike verband tussen die Brusselaanvalle en die aanvalle in Parys word nog ondersoek.
Minstens 30 mense is dood toe selfmoordbomdraers by die Brussel-lughawe en die Maelbeek-moltreinstasie toegeslaan het. Bykans 200 mense is beseer, waaronder ook kinders.
Ploftoestelle, wat nie afgegaan het nie, is ook by die lughawe gevind. Alle lug- en spoorverkeer na en van Brussel is opgeskort.
Alle vlugte is gekanselleer en Brussel se lughawe sal minstens vir nog `n dag gesluit bly.
Eurostar het alle treindienste na en van die Belgiese hoofstad gekanselleer. Sekuriteit is ook in Brittanje by die Gatwick- en Heathrow-lughawens opgeskerp.
Die Nederlandse polisie het waarskuwingskote by Amsterdam se hoofstasie afgevuur toe drie verdagtes in hegtenis geneem is.
`n Polisie-woordvoerder sê die voorval het te doen gehad met dwelmmiddels, maar het plaasgevind nadat sekuriteit by Europese lughawens en stasies opgeskerp is weens die terreuraanvalle in België.
‘n Foto wat Maandag deur die Belgiese federale polisie beskikbaar gestel is, toon die verdagte, Najim Laachraoui, wat glo met die onlangse aanvalle in België verbind kan word.
Belgiese aanklaers het ’n beroep die publiek gedoen om enige inligting aangaande Laachraoui aan wetstoepassers te oorhandig.
Daar word vermoed dat hy een van die topverdagtes in die Parys-aanvalle was en in 2015 na Hongarye gereis het.
Hy het in 2013 na Sirië gereis.
Veiligheidswagte by die Oostenryks-Hongaarse grens het Laachraoui opgemerk wat in ’n Mercedes saam met Salah Abdesalam en nog ’n ander persoon gereis het.
Abdesalam is vyf dae gelede deur die Belgiese owerhede in hegtenis geneem.
Daar word voorts vermoed dat die inhegtenisname van Abdesalam gelei het tot die jongste terreuraanvalle in Brussel.
