Kategorie: Nuus

Gewapende polisie ontplooi na mesaanval in Londense park een eis

‘n Mesaanval in Londen het ‘n vrou se dood veroorsaak en vyf ander mense is beseer.

Die aanvaller wat amok gemaak het in sentraal-Londen se Russell Square kon ‘n terreurmotief gehad het, sê ondersoekbeamptes nadat ‘n verdagte in hegtenis geneem is op die toneel.

Beamptes het ‘n elektriese skokgeweer gebruik om die 19-jarige man in hegtenis te neem. Die polisie is ingeroep na die voorval in Russell Square naby die Britse Museum net ná 22:30 Woensdag.

Die verdagte is na die hospitaal geneem waar hy in polisie-aanhouding bly.

Mark Rowley, assistent-kommissaris die Metropolitaanse Polisie en mees senior teen-terrorisme beampte in Brittanje het die media toegspreek.

Hy het gesê “geestesgesondheid” was ‘n “beduidende” faktor in die voorval, maar het nie uitgebrei oor terrorisme nie.

Twee mans, wat na bewering van Midde-Oosterse afkoms is, is gesien dat hulle verdag optree buite die hotel na die voorval, volgens getuies.

Een getuie, ‘n 35-jarige, wat anoniem wou bly, het aan Express.co.uk gesê: “Ek het gesien hoe twee mans van Midde-Oosterse afkoms verdag optree buite die Imperial Hotel, op Southampton Row.

“Een man het op ‘n motorfiets aan die verkeerde kant van die pad opgejaag met die ander man wat in ‘n ander rigting laat spaander het.”

“Jy weet daar is iets verkeerd wanneer jy die polisie sien opdaag met gewere,” het ‘n ander ooggetuie gesê.

Maar Scotland Yard het gesê vir “gerusstelling en veiligheid” sal Londen Donderdagoggend ekstra beamptes ontplooi, insluitende gewapende polisie.

Die aanval in die gewilde toeriste-area kom te midde van waarskuwings oor die onafwendbaarheid van ‘n terroriste-aanval in die Verenigde Koninkryk na maande van jihadi-aanvalle in Europa en die Midde-Ooste.

Die slagoffer, wat vermoedelik in haar 60’s was, se naam is nog nie bekend nie. Twee vroue en drie mans is beseer.

Brandende vliegtuig moet noodlanding in Doebaai doen

‘n Vliegtuig van die Emirates-lugdiens moes ‘n noodlanding moes uitvoer op die Doebaai-lughawe.

Die 282 passasiers en 18 bemanningslede is ongedeerd.

Daar was glo ‘n Suid-Afrikaner aan boord van die vlug. ‘n Dik, swart rookwolk was sigbaar bo die gestrande vliegtuig op foto’s wat op sosiale media versprei is.

Volgens ‘n verklaring van die lugdiens was vlug EK521 op pad van Thiruvananthapuram in Indië na Doebaai, maar moes om 10:00 Woensdag ‘n noodlanding uitvoer nadat ‘n brand aan boord ontstaan het.

“Ons is nog nie seker wat die brand veroorsaak het nie,” lui die verklaring.

“Emirates kan bevestig dat alle passasiers en bemanningslede veilig is,” het die lugdiens getwiet, maar die voorval sal glo wye vertragings veroorsaak.

Die Doebaaise lughawe het getwiet dat alle vlugte deur die voorval geraak is en tot verdere kennisgewing vertraag sal wees.

Duitsland waarsku Turkye oor visum-afpersing

Duitsland het Turkye se dreigement om nie sy woord gestand te doen oor die omstrede ooreenkoms met die Europese Unie (EU) nie, verwerp.

Turkye het onderneem om die vloei van migrante na die EU te stop. Nou eis Turkye visumvrye toegang na die EU teen Oktober.

Gevra of Turkye die EU kon “afpers” oor die ­vlugteling-ooreenkoms, het Duitsland se minister van buitelandse sake, Frank-Walter­ Steinmeier,­ aan die koerant Rheinische­ Post gesê: “Dit is absurd.”

“Die feit is dat voorwaardes vir die visumvrye beleid geld, en dit is aan almal bekend,” het hy gesê.

“Turkye het onderneem om sy deel van die ooreenkoms na te kom. Dit is nog nie die geval nie en Turkye het nog werk om te doen.”

Die Turkse minister van buitelandse sake, Mevlut Cavusoglu, het in ’n onderhoud met die Duitse dagblad Frankfurter Allgemeine Zeitung gesê Ankara kan onttrek aan die ooreenkoms indien die EU Turke nie teen Oktober toelaat om sonder visums na die EU te reis nie.

Duitsland se visekanselier, Sigmar Gabriel, het teruggekap en gesê: “Nie Duitsland of Europa mag toelaat dat hulle af­gepers word” deur Turkye oor die migrante-ooreenkoms nie.

Turkye en die EU het die omstrede ooreenkoms in Maart onderteken waarin Ankara ooreen­gekom het om Siriese vlugtelinge wat op Griekse eilande aangekom het, terug te neem in ruil vir politieke­ en finansiële aan­sporingsmaatreëls.

Kanselier Angela Merkel het die leiding met die ooreenkoms met Ankara geneem nadat Duitsland verlede jaar ’n rekordaantal migrante en vlugtelinge, ongeveer 2 miljoen ingeneem het.

Benewens visumvrye reise, sluit die ooreenkoms miljarde euro’s in bystand en versnelde same­sprekings oor Turkye se aansoek om lidmaatskap van die EU in.

Betrekkinge is egter gespanne sedert pres. Recep Tayyip Erdogan se strawwe optrede teen ­vermeende same­sweerders ná verlede maand se mislukte staatsgreep.

ISIS-djihadiste byna uit Sirte verdryf

Magte lojaal aan Libië se eenheidsregering maak vordering binne die djihadiste se vesting, Sirte nadat die eerste Amerikaanse lugaanvalle, posisies van die Islamitiese Staat (ISIS) in die stad geteiken het.

Die soldate het die sentrale distrik, Al-Dollar, ingeneem nadat gevegte die lewens van vyf soldate geëis het. Sewentien ander is gewond.

Die regering in Tripoli het in Mei ‘n operasie van stapel gestuur om Sirte te herower, wat sedert Junie 2015 deur die djihadiste beheer word.

Die val van die kusstad, ongeveer 450 kilometer oos van Tripoli, sal ‘n reuseslag vir ISIS wees, wat ook terugslae in Sirië en Irak beleef.

Maandag het die hoof van die eenheidsregering, Fayez al-Sarraj, pro-regeringsmagte in Misrata, 190 kilometer noordwes van Sirte, besoek.

Meer as 300 lede van die pro-regeringsmag is reeds dood en meer as 1 500 gewond sedert die aanvang van die stryd om die herowering van Sirte.

Die magte bestaan grootliks uit milisies van die weste van Libië, Hulle het in 2011 tot stand gekom tydens die opstand wat die bewind van die diktator, Moeammar Ghaddafi, omvergewerp het.

Pous sê Islam is nie aan geweld gekoppel nie

Pous Franciscus het Sondag gesê dit is verkeerd om Islam aan geweld te koppel.

Dié uitspraak kom na veral ‘n reeks dodelike aanvalle deur die Moslemterreurgroep ISIS in Europa.

Hy het tydens ‘n mediakonferensie aan boord van ‘n vliegtuig gesê afgodediens en geld is onder die belangrikste oorsake vir terrorisme.

Hy was in Pole ter viering van Wêreldjeugdag. Die pous het Sondag ‘n mis saam met 1,5 miljoen pelgrims van oral in die wêreld gehou.

Ter erkenning van vandag se oorweldigende internetgebruik, het die pous gelowiges aangemoedig om “die beste skakel ooit af te laai, naamlik ‘n hart wat goedheid sien en oordra, sonder om moeg te word.”

Tydens die vyf dag lange besoek aan Pole het hy onder meer die Auschwitz-konsentrasiekamp besoek.

Trump se posisie verstewig verder

Donald Trump se aanslag op die Amerikaanse presidentskap het verder verstewig.

Trump het beloof om die oneerlike media, veral CNN, “die Clinton News Network, aan te vat by ‘n byeenkoms in Harrisburg, Penn. Maandagaand.

“Ons het ‘n media wat so oneerlik is,” het Trump gesê. “Dit is van die mees oneerlike mense wat jy ooit, ooit sal ontmoet.”

“Ons gaan deur die media slaan,” het hy gesê. “Ons moet.” Hy het ook die New York Times uitgesonder as ‘n leuenfabriek.

Met die aanvang van die eerste volle week se veldtogbedrywighede met die oog op die presidentsverkiesing in November, het Hillary Clinton se span ‘n “Moslemslagoffer” van haar konfliksaaiery teen Trump probeer inspan.

Die Demokrate het Kahn al voorheen gebruik in 2005 om Amerikaanse invalle in die Midde-Ooste te bemark.

Clinton het die Amerikaanse politieke en maatskaplike taboe verbreek toe sy ‘n emosiebelaaide woordestryd deur Khizr en Ghazala Khan, die ouers van ‘n Moslem weermagkaptein, teen Trump gebruik het.

Khan het deur die toedoen van ‘n selfmoordbomaanvaller in 2004 in Irak gesneuwel. Sy pa het van die verhoog af op Trump gegil, die ma blykbaar onaangetas deur die mediasirkus.

Trump het gesuggereer dat Ghazala Khan nie gepraat het nie omdat sy ‘n Moslemvrou is en daarom nie ‘n spreekbeurt kry nie. Só ‘n opmerking is in die Demokrate se oë om een of ander rede ‘n doodsonde.

Dit is kennelik ‘n teer punt om na die ooglopende gebrek aan regte onder Moslemvroue te verwys.

In nog ‘n TV-verskyning op CNN, hierdie keer op “New Day,” het Kahn nou aangekondig dat hy “uit die kollig wil bly” omdat die druk oor sy teenstrydighede blykbaar vir hom te veel raak.

Die politieke storm het Hillary grootliks geïsoleer gelaat in haar Demokratiese kampie en het die potensiaal om onafhanklike kiesers wat woedend is oor haar onderduimse manipulasies teen Bernie Sanders, nog verder te vervreem.

Intussen het Jill Stein (foto bo) Hillary se sorge nog groter gemaak.

Die Groen Party presidensiële kandidaat Stein het na berig word die swart menseregte-aktivis Ajamu Baraka as haar vise-presidentkandidaat gekies.

Dr. Stein het dit amptelike Maandag op Twitter aangekondig. Stein gaan waarskynlik stemme van die Demokrate wat Hillary en haar miljardêrsklub haat, wegrokkel.

Op sy persoonlike webwerf het Baraka gesê hy het wortels in “die Swart bevrydingsbeweging, anti-apartheid- en Sentraal-Amerikaanse solidariteitstryd”.

Sy werk was hoofsaaklik in die humanitêre sektor in samewerking met Amnestie Internasionaal in die verlede.

Sowel die speaker van die huis van verteenwoordigers, Paul Ryan, as die leier van die meerderheid in die senaat, Mitch McConnell, het verklarings uitgereik waarin kapt. Humayun Khan, aan wie ‘n brons ster en ‘n “Purple Heart” toegeken is, geprys word.

Vir die tweede keer in ‘n week het Trump se visepresidentskandidaat, Indiana se goewerneur, Mike Pence, ook ‘n verklaring uitgereik wat die angel uit die Demokrate se flou poging gehaal het.

Pence, die pa van ‘n Amerikaanse seesoldaat, het gesê kapt. Khan is ‘n held en sy familie moet deur elke Amerikaner gekoester word.

Verlede week het Pence gesê Rusland sal ernstige gevolge in die gesig staar indien hulle met Amerikaanse verkiesings inmeng.

Die swart Republikein, dr Ben Carson, wat waarskynlik ‘n pos in die Amerikaanse Departement van Gesondheid en Maatskaplike Dienste kan verwag onder ‘n Trump-administrasie, het Clinton direk gekoppel aan die duiwel twee weke gelede tydens sy toespraak by die Republikeinse Nasionale Konvensie.

Carson het gesê as ‘n dissipel van ver-linkse aktivis Saul Alinsky, is Hillary deel van die Lucifer-bende, die “oorspronklike radikales”.

Alinsky het sy boek “Reëls vir Radikales”, een van Clinton se bronverwysings aan Lucifer opgedra.

Twee vragmotorbestuurders in mensehandel betrap

Twee bruin vragmotorbestuurders sal na verwagting om borgtog aansoek doen in die Marble Hall-landdroshof Dinsdag nadat hulle in hegtenis geneem is weens beweerde mensehandel.

Die Direktoraat vir Prioriteitsmisdaadondersoek (Valke) se kapt Matimba Maluleke het gesê Idrisa Yusuf Mussa, 39, en Danison Prahima, 39, is in hegtenis geneem op 28 Julie en sal Vrydag in die hof verskyn.

“Die polisie het twee verdagte vragmotors geparkeer langs die pad naby Marble Hall onderskep. Terwyl hulle ‘n deursoeking van die twee vragmotors gedoen het, was die polisie geskok om 59 Malawiese immigrante waaronder nege vroue, twee van hulle minderjariges, en die res volwasse mans te ontdek,” het Maluleke gesê.

“Die 59 migrante is aan die agterkant van die vragmotor versteek en ‘n paar was in ‘n ernstige toestand van dehidrasie. Sommige van die immigrante is met vervalste paspoorte betrap.”

Hy het gesê al 59 individue sal aangekla word omdat hulle onwettig in die land is en sal na verwagting binnekort verskyn in die Marble Hall-landdroshof.

Brandstofstaking kan voornemende kiesers tuis hou

Dit is nie bekend hoe die brandstofstaking die Munisipale Verkiesing wat more op 3 Augustus plaasvind, sal raak nie. Voornemende kiesers sal dalk in Jan Tuisbly se karretjie moet ry.

Metrobus het pendelaars in Johannesburg gewaarsku dat sy busse nie op alle geskeduleerde roetes sal loop Dinsdag nie weens die voortgesette staking in die petroleumbedryf.

Die staking het gelei tot depots wat laag is op brandstof.

“Ons depots is reeds laag aan brandstofvoorrade en as gevolg daarvan, is ons verplig om ons diens te verminder,” het Metrobus in ‘n verklaring Maandagaand gesê.

“In die lig van die brandstofkrisis, kan ons nie alle geskeduleerde roetes vanaf 2 Augustus 2016 bedien nie, tot verdere kennisgewing. Ons vra om verskoning vir enige ongerief wat veroorsaak word daardeur.”

Petroleumbedryfwerkers verbonde aan die Chemical, Energy, Paper, Printing, Wood and Allied Workers Union (Ceppwawu) het ná loongesprekke ‘n dooiepunt bereik het, begin staak.

Hulle verwerp die aanbod van ‘n toename van sewe persent in loonverhogings. Ceppwawu eis ‘n nege persent loonverhoging oor een jaar.

Die staking raak brandstofdepots en raffinaderye. Werkers by vulstasies staak nie, maar in sommige gebiede het motoriste gesê pompe het opgedroog.

PRAAG het van ‘n hele paar vulstasies in Pretoria verneem dat hulle tenks leeg is en hulle moes motoriste wegwys. Die Engen-stasie in Groenkloof was al Maandagoggend sonder brandstof.

Die Suid-Afrikaanse Petroleum (Sapia) het gesê dele van Gauteng ervaar vertragings in brandstofaflewerings.

Sapia se uitvoerende direkteur Avhapfani Tshifularo het aan Sake24 gesê intimidasie deur stakende vakbondlede by ‘n groot petrolspilpunt in Pretoria het die depot tot stilstand gedwing.

Engen se vulstasies blyk die meeste geraak te word, maar hulle het maatreëls in plek om die impak van die brandstof-staking te bestuur, het Engen in ‘n verklaring gesê.

Die Suid-Afrikaanse Kamer van Koophandel en Nywerheid het Maandag gewaarsku dat die staking ‘n negatiewe impak op die ekonomie sal hê.

Meer as 15,000 werknemers in die petroleumsektor het verlede Donderdag begin staak.

Vrydag het die Sentrale Energiefonds gesê die brandstofprys sal met 99 sent per liter vir petrol en 74 sent per liter vir diesel daal vanaf 3 Augustus.

Die fonds sê die aansienlike prysdaling was te danke aan ‘n afname in die internasionale produkpryse van petrol, diesel en paraffien, asook die versterking van die rand teenoor die Amerikaanse dollar.

Kayla Meyer en haar gesin se moordenaars gevang

In wat deur die polisie as ‘n “deurbraak” beskryf is, is vier verdagtes deur die Randfonteinse polisie aangekeer in verband met die grusame moorde op 10 Maart 2016 op Kayla Meyer,9, en die res van haar gesin, waaronder haar moeder Marietjie Meyer, 46, dié se vriend Kenny MacCormack, 42, en Monty MacCormack, 73. Die vier verdagtes het gister in die Randfonteinse landdroshof verskyn en hul saak is tot 18 Augustus uitgestel. Hul name is nog nie bekendgemaak nie.

Volgens kaptein Appel Ernst van die Randfonteinse polisiestasie, het “luitenant-kolonel Gert Kruger, wat aan die Randfonteinse speurtak verbonde is, asook lede van die Wesrand-trio-taakmag vier verdagtes ná ‘n intense ondersoek in die saak in hegtenis geneem”.

Brigadier Manamela, die stasiebevelvoerder van Randfontein, het sy tevredenheid oor die inhegtenisnames uitgespreek. “Hierdie span polisiebeamptes het ‘n positiewe uitwerking op ondersoeke betreffende ernstige misdaad,” het hy gesê. Hy het luitenant-kolonel Kruger met sy volharding in die saak gelukgewens.

Lees ook ons vorige berigte oor die moorde op ‘n kleinhoewe in die Rodora-gebied in Randfontein:

‘Nog geen arrestasies’ in moorde op Kayla Meyer (9) en haar gesin

‘Dis kruipende volksmoord’: kommentaar oor uitwissing van Randfontein-gesin

 

Dertien gedood in motorbomaanval

In die aanloop tot die presidentsverkiesing in Somalië dié maand, is die militante Islamitiese groep, al-Sjabaab, besig om sy aanvalle te verskerp, het Reuters berig.

Militante het Sondag twee motorbomme buite ‘n polisiebasis in Somalië se hoofstad, Mogadishu laat ontplof voordat gewapendes die gebou binnegestorm en minstens dertien mense om die lewe gebring het.

Die Islamitiese groep al-Sjabaab het aanspreeklikheid vir die aanval aanvaar.

Dit was die tweede groot aanslag deur die groep in ‘n week in die stad, wat ‘n guerrilla-ooglog teen die Westers-gesteunde regering voer.

Swaar geweervuur is vir byna ‘n halfuur ná die eerste ontploffing binne die gebou gehoor, het ooggetuies berig.

Die oorskot van vier burgerlikes het in die straat gelê naby die kompleks wat gedeeltelik deur die ontploffings in puin gelê is. ‘n Nabygeleë kiosk het aan die brand geslaan.

“Minstens tien mense, insluitende vier militante, vyf burgerlikes en ‘n soldaat het in die aanval gesterf,” het ‘n polisiewoordvoerder gesê.

Nog 15 is beseer van wie sommige in ‘n ernstige toestand verkeer.

In al-Sjabaab se eerste aanval verlede week Dinsdag by die ingang na die Afrika-unie se Amison-basis, het twee motorbomme ontplof wat die lewens van 13 mense geëis het.

Veiligheidswaarnemers het gewaarsku dat die groep sy aanvalle in die aanloop tot die presidentsverkiesing kan verskerp.