Die 2010 Formule-eenseisoen begin die 12de Maart met die Bahrainse Grand Prix. Hieronder volg ‘n volledige kalender van wanneer en waar die 2010-seisoen gaan af loop. Hier is ook ‘n opsomming van wie jaag nou vir watter span.
12-14 Maart Bahrain(Sakhir)
26-28 Maart Australië (Melbourne)
02-04 April Maleisië (Kuala Lumpur)
16-18 April Sjina (Sjanghai)
07-09 Mei Spanje (Barcelona)
28-30 Mei Turkye (Istanboel)
11-13 Junie Kanada (Montreal)
25-27 Junie Europa (Valencia)
09-11 Julie Brittanje (Silverstone)
23-25 Julie Duitsland (Hockenheim)
30-01 Augustus Hongarye (Budapest)
27-29 Augustus België (Spa)
10-12 September Italië (Monza)
24-26 September Singapoer (Singapoer)
08-10 Oktober Japan (Suzuka)
22-24 Oktober Korea (Yeongam)
05-07 November Brasilië (Sao Paulo)
12-14 November Abu Dhabi (Yas Marina)
Die spanne is:
Mclaren Jenson Button/ Lewis Hamilton
Enjin: Mercedes
Debuut: 1966
Mercedes GP Micheal Schumacher/Nico Rosberg
Enjin: Mercedes
Debuut: 2010
Red Bull Sebastian Vettel/Mark Webber
Enjin: Renault
Debuut: 2005
Ferrari Fillipe Massa/Fernando Alonso
Enjin: Ferrari
Debuut: 1950
Williams Rubens Barrichello/Nico Hulcenberg
Enjin: Cosworth
Debuut: 1975
Renault Robert Kubica/Vitaly Petrov
Enjin: Renault
Debuut: 1977
Force India Adrian Sutil/Vitantonio Liuzzi
Enjin: Mercedes
Debuut: 2008
Torro Rosso Sebastien Buemi/Jaime Alguesuari
Enjin: Ferrari
Debuut: 2006
Lotus Jarno Trulli/Heikki Kovalainen
Enjin: Cosworth
Debuut: 2010
Campos Bruno Senna
Enjin: Cosworth
Debuut: 2010
US Jose Mario Lopez
Enjin: Cosworth
Debuut: 2010
Virgin Timo Glock/Luca di Grassi
Enjin: Cosworth
Debuut: 2010
Nou ja, kom ons kyk of die nuwe spanne enige hond haaraf sal maak, gaan die Cosworth-enjins in die Lotus- en Virgin-spanne saam kan ry met die Ferrari wat tot dusver in voorseisoentoetse briljant lyk? Gaan Mercedes wéér oorheers soos Brawn in 2009? Wat van Schumi, gaan hy die oudste wêreldkampioen word? Ons sal moet kyk wat gebeur. 14 Maart hier kom ons!
Wel, as jy nou ’n Volkswagen aanhanger is, sal jy onmiddellik die GTi raak sien met sy kenmerkende sierwiele. Die wiele is so eiesoortig dat dit moeilik is om die motor mis te kyk al is die res van sy aandpak effens verlede jaar.
Ja, al die stories dat Schummie weer gaan jaag, is toe bevestig. Die afgetrede wêreldkampioen van Duitsland het nie net vir groot kaartjieverkope by die toekomstige Duitse Grand Prix gesorg nie, maar ook veroorsaak dat van die mense by die baan nie vir Kersfees kon afvat nie. Die verkope van kaartjies vir aanstaande seisoen se wedren by Hockenheim was so goed dat daar ingewerk moes word om by te hou.
Hoor ‘n mens die woord Tata en motor in een sin dan begin almal te lag. “Tatta” is nou meer eenmaal ‘n kinderlike en gemeensame woord in Afrikaans wat kwalik met motors geassosieer word. Die Indiese reus van ‘n motorvervaardiger doen al amper 60 jaar sake, maar plaaslik is Tata eers sowat enkele jare gelede aan ons bekendgestel. Tata het ook onlangs die luukse Westerse vervaardigers Land Rover en Jaguar aangekoop, so die luukse tradisionele Britse ikone word nou deur Indië beheer en bestuur.
Tata se Indica-reeks is nou nie eintlik iets om oor opgewonde te raak nie, maar hy het goed met die prys van die Citi Golf meegeding. Die Citi het afgesterf, maar die Indica hou steeds die Tata-vlag hoog in die plaaslike mark. Ons het by die laaste Auto Africa-motorskou kennis gemaak met die vervanging vir die Indica, die Vista, of so het ons gedink. Die Vista gaan nie eintlik die Indica vervang nie, maar kom so ’n trappie bo die Indica in die mark in.
Kyk mens na die bougehalte en materiaal wat in die Indica gebruik is, kon enige iets ‘n verbetering daarop gewees het, maar in die nuwe Vista is dit asof die ingeneurs die basiese motor baie goed aanmekaar gesit het . Net die klein detailgoedjies soos die vensterslingers en -armpies om die spieëltjie te verstel, is maar nog baie kostedoeltreffend en dus van gebrekkige gehalte. Die bakwerk binne en buite is goed gemonteer met geen ratels of skewe paslyne nie. Die deure maak ook ‘n meer soliede geluid wanneer hulle toegemaak word. Daar is klankdempende doek onder die enjinkap en in die agterse luikdeur. Die deure voel ook stewiger. Die sitplekke en veral die paneelbord gedeelte voor die voorste insittendes voel en lyk duursaam. Ons moet onthou dat die Vista maar nog steeds ‘n intreevlakmotor is; ‘n segment-B-motor met die Renault Sandero en Cherry J1 as mededingers. Kyk ‘n mens na die prys dan is dit weereens moeilik om te glo wat motors kos. Die Tata Indica Vista Ini wat ons toets, is R120 000. In dié reeks is daar drie modelle: die basismodel Ini, die Aura en die vlagskip Ignis . Die verskil wentel om die toerustingsvlak. Daar is net een enjin en dit is die Safire 1,4 liter brandstofinspuitingseenheid met agt kleppe wat 55 Kw se krag lewer. Die vlagskip Ignis se eenheid is wel met sestien kleppe toegerus wat sy kraglewering na 65 Kw opstoot.
Wel die Vista Ini ry soos ‘n veel groter motor en voel stewig. ‘n Mens sit bietjie hoër as in ander B-segmentvoertuie en dit neem ‘n rukkie om daaraan gewoond te raak. Ratskakeling is glad en presies en die onderstel voel ook asof dit deel van die motor is en nie soos die vorigegenerasie-Indica dat die ding los is nie. Toerusting in die Ini is nou nie iets om oor huis toe te skryf nie, daar is geen lugsakke, geen ABS, geen elektriese ruite of buitespieëls nie. Eintlik is daar basies net ‘n lugversorger en radio-CD speler. Die Ini het wel misligte voor en agter, sentrale sluiting al is dit nou met die sleutel sonder ‘n afstandbeheer. Daar word ook ‘n 3 jaar 100 000km-waarborg en ‘n 3 jaar diensplan ingesluit.
Audi AG het onlangs hulle splinternuwe A8 in Miami, VSA bekendgestel. Die motor lyk nou nog meer soos ‘n groot A4, of dit nou goed of sleg is weet ek nie, maar die feit dat hulle dit reggekry het dat ‘n groot motor nou soos ‘n medium sedan vertoon, is ongelooflik.
Die nuwe A8 wemel van die tegnologie en ‘n mens kon sweer jy kyk na die nuwe Merc S-klas se spesifikasie lys as jy deur die nuwe geite gaan. Daar is volle LED-hoofligte, nagsig wat spesifiek uitkyk vir voetgangers, ‘n handskrifherkennende raakskerm vir die navigasiestelsel, Bang en Olufsen-klankstelsel; so gaan die lys aan.
Ek het nog nooit eintlik oor die Terios gedroom nie. Dit is nie eintlik die tipe voertuig waarvan ‘n mens en veral ‘n man, droom om te besit nie. As daar nou een voertuig is wat werklik waar ‘n afgetrede onderwyseres se ryding is dan is dit die Terios. Moenie my verkeerd verstaan nie, die voertuig het baie mooi lyne en is sommer heelwat groter as die eerste generasie, maar dit is nou maar net een maal nie ‘n ryding vir ‘n man nie. Nou vir wie is die ryding dan gemaak?
Die Terios-reeks bestaan uit twee bakvorms en twee aandrywingsweergawes. Jy kry die 4×2 en 4×4 in die kortasafstand- en langasafstandweergawe. Die kortasafstand-Terios het plek vir vyf insittendes en bagasie. Die sewesitplek- langasafstandweergawe is so ‘n aks of wat langer om die ekstra twee sitplekke te akkommodeer. Daardie sitplekke is ook net eintlik vir baie klein kindertjies of outjies met baie kort bene. Die binneruim is uitgedos in pikswart materiaalsitplekke en goeiekwaliteit- swart plastiek op die instrumentepaneel. Die middelste konsole is gemaak van silwer metaalagtige plastiek, redelik goeie kwaliteit wat ‘n sportiewe beeld skep. Daar is ook van dieselfde materiaal gebruik by al vier die deurhandvatsels aan die binnekant. Die instrumente is duidelik uiteengesit en mens kan alles mooi raaksien. Al die kontroles is op die regte plekke waar jy hulle nie sommer sal mis vat nie. Die Terios is redelik toegerus, met elektriese ruite, lugversorging, elektriese kantspieëls en ‘n voorlaai- kompakskyfspeler. Dit alles is na my mening heel standardtoerusting en hoort in alle voertuie wat nie ‘n intreevlakbegrotingskarretjie is nie. Persoonlik sou ek ‘n ritrekenaar, temperatuurmeter, outomatiese hoofligverstelling en banddrukmeter in hierdie tipe voertuig wou sien.
Die Terios is ‘n kompakte sportnutsvoertuig. Maar wag ‘n bietjie. Is dit presies nie wat BMW hulle X3 en Audi hulle Q5 noem nie? Wel, ja, so eintlik is die Terios ‘n trappie onder hulle. Eintlik ‘n minisportnutsvoertuig. Nou wonder ek wat is die RAV4 en Hyundai Tucson dan? Wel, hulle is nou weer ‘n trappie hoër as die Terios op die leer, en val onder die kompakte sportnutsvoertuie of sypaadjieklimmers. Die Terios het eintlik net een regte mededinger in Suid-Afrika en dit is die Suzuki Grand Vitara. Let wel, nie die Suzuki Jimni nie, want dié is heelwat kleiner en het net twee deure. Die Grand Vitara is nou wel effens langer maar al die ander syfers is omtrent identies aan dié van die Terios. Nou kan ‘n mens ook sê die Grand Vitara is toegerus met ‘n veel groter enjin (2 liter) en is dan ook baie duurder. Dit is so, maar dit is die voertuig wat die naaste aan die Terios kom, wat sy afmetings en binneruim aanbetref. Op ons rit van Pretoria na Bloemfontein en terug het die Terios hom goed gedra. Dit neem ‘n rukkie om die vierwielaandrywing gewoond te raak want die hele voertuig voel asof elke wiel sy eie rigting wil inslaan. Die ry-stopverkeer deur Johannesburg was ook nie een van die gemaklikste ervarings met ‘n Terios nie en alhoewel hy maklik hanteer en veral parkeer, is hy nie regtig vir hoëdrukspitsverkeer gebou nie. Ons toetsmodel is die handrat- 4×4-weergawe wat ‘n kort ratverhouding het; op die langpad is dit bietjie ongemaklik. Die 1,5 liter-brandstofinspuitingenjin ontwikkel 77 KW en ‘n heel respektabele 140 Nm. Die wringkrag was vir my nogal baie goed op die oop pad. Verbygaan by stadiger verkeer, veral by ‘n togspoed van 140km/h was verbasend goed as jy die klein verplasing van die enjin in ag neem. Gepraat van die enjin, om tot by ‘n gemaklike toerspoed van 130km/h te kom, het nogal baie toere geverg en die Terios moes nogal werk om dit te handhaaf. Met ons spoedtoetse kon ek nie meer as 155km/h haal nie wat heel skaflik vir dié tipe voertuig is. In Bloemfontein aangekom, het ek bietjie grondpad gery en dit is waar die Terios nou eintlik tot sy reg kom. Die voertuig het baie goeie vastrapvermoë en kan ook lag-lag met die meeste modderplasse en sandpaaie klaarspeel wanneer die ewenaarslot geaktiveer word. Die permanente vierwielaandrywing van die Terios versprei die krag so 60/40 na die voorwiele en dit help natuurlik met die trekkrag van die buksie.
Toyota, die wêreld se grootste motorvervaardiger, het vandag aangekondig dat hulle nie langer aan formule een gaan deelneem nie. Hulle onttrek hulle van die sport weens finansiële druk en volgens Akio Toyoda, die president van Toyota, sal hulle ook nie verder enige enjins aan enige ander span beskikbaar stel nie. Williams wat Toyota-enjins gebruik het, het aangekondig dat hulle Gosworth-enjins aanstaande jaar gaan gebruik.
Die Duitser Sebastian Vettel het die F1-kampioenskap vir 2009 met glorie afgesluit toe hy die heel eerste dag/nag-formule-eenwedren in die geskiedenis gewen het.
Die onlangse Duitse motorskou is die hoogtepunt van elke Europese vervaardiger se uitstalkas.
Audi het hulle A5 Sportback hier vrygestel. Dit is eintlik n vierdeursedan met n koepeetipe daklyn soos in die Mercedes CLS. Die Sportback is langer as die A4 en groter as die A5-koepee. Hy het ook ‘n luikdeur met n geweldige groot begasieruim. Sy kopruimte binne is slegs 5 mm minder as dié in die A4. Die motor is dan ook eintlik n viersitplek en nie soos die A4 ‘n vyfsitplek nie. Enjins in die Sportback is dieselfde as in die A4; ons weet egter nog nie watter van hulle plaaslik beskikbaar sal wees nie. Audi het insgelyks hulle R8 Spyder bekendgestel. Die motor is toegerus met dieselfde V10 5,2-literenjin as die koepee. Die materiaaldak kan binne 19 sekondes afslaan en jy kan tot 50 km/u ry terwyl die die dak op- of afgeslaan word. Audi het ook ‘nn elektriese weergawe van die R8 aan die skougangers gewys. Die motor is nog net ‘n konsep maar met die pole wat so smelt kan die R8 gouer sonder sy V10-enjin wees as wat ons dink.
Bentley het ook n “kleiner” model bekendgestel. Die Mulsanne is nou wel meer kompak as die Brooklands en die Corniches waaraan ons gewoond geraak het, maar die motor is nog steeds een van die grootstes op die pad. Sy enjin is ‘n 6,75-liter V8 en die onderstel is effens korter as 5m. Oor die 600 ingeneurs het aan die ontwikkeling van die Mulsanne gewerk en Bentley sê dat hulle die uitlaatgasse met nog 40% oor die volgende drie jaar wil verminder. Die motor het snaakse lyne, maar is tog herkenbaar as ‘n egte Bentley.
BMW het soos gewoonlik die kluts weer heeltemal kwyt geraak. Hulle het die oplossing vir ‘n probleem wat nie daar was nie gaan uitdink. Die 5-reeks GT of Gran Turismo is bekendgestel. Wel wat kan ons sê, dit is net soos die X6 baie lelik en heeltemal onnodig. Die 5 GT is nou wel ‘n 5-reeks, maar sy onderstel is eintlik van die nuwe 7-reeks afkomstig. Binne is die motor pure BMW-weelde met ‘nn klein bietjie praktiese ondernemingsgees. Buite is die nuwe motor egter uit verhouding uit lank en lyk dit kompleet of dit ‘n liefdeskind tussen ‘n 1-reeks en ‘n 7-reeks is. Dit is amper iets soos Mercedes se R-klas. Wat wel onthullend aangaande die 5 GT is, is die feit dat dit waarskynlik ‘n goeie idee gee van hoe die 5-reeks gaan lyk, net sonder die groot luikrugdeur agter. Waaraan BMW nie gedink het nie, is om die motor net die GT of 8-reeks te genoem het. Dit verteenwoordig n mengesel tussen ‘n sportsedan, luikrug, veeldoelwa, stasiewa en ‘n limo… Ai tog BMW! Die X1 is net so vreemd. Nie dat die motor enigsins vreemd lyk nie; dit is n waardige, sagte veldvoertuig. Maar hoekom die X1? Die ding is net so groot soos die huidige X3, hoekom hom nie gewoon die X3 noem nie? Hy gaan net so duur wees soos die X3 en is ook nie regtig ‘n veldvoertuig nie. Die motor is boonop gebaseer op die huidige 3-reeks en nie die 1-reeks nie. Iemand by BMW rook iets.
Die Franse het nou maar eenmaal styl en oorspronklikheid. Citroën het hulle splinternuwe DS3 bekendgestel. Die DS-kenteken sal aan die bopunt van elke modelgroep staan, so met ander woorde die DS3 is aan die bopunt van die C3, die DS4 sal bo-aan die C4-modelreeks wees en die DS5 bo die C5. Citroën sê hulle wil die Mini en die Fiat 500 met dié outjie aanvat. Wel een ding is seker, die Citroën is heelwat groter as beide daardie retronommertjies. Die DS3 sal in petrol- en dieselweergawes beskikbaar wees. Net onder die DS3 is die splinternuwe C3. Dié nuweling is nie net langer en breër nie maar bied ook heelwat meer spasie in die binneruim. Sagter lyne as sy voorganger en meer moderne rondings maak die nuwe C3 nog meer aantreklik vir sy teikenmark. Nou is die C3 in dieselfde klas as sy naaste teenstander, die Ford Fiesta.
Sekerlik een van Ferrari se heel belangrikste motors is die F430, maar nou het die manne van Maranello die 458 Italia bekendgestel. Die 458 vervang die F430 en dit op sigself vertel die storie van hoe belangrik die motor is. Dit is die brood-en-botter-model van die Ferraristal, die goedkoopste Ferrari wat geld kan koop. Die enjin is ‘n 4,5-liter V8 met 413 KW en hope wringkrag. Trouens, die 458 beskik oor ‘n kwart meer wringkrag by 6000 toere as die F430 Scuderia. Die 458 gebruik ook die dubbelkoppelaar uit die Calafornia. Danksy die hulp van ‘n sekere mnr Schumacher is daar 140 kg afwaartse druk by 200 km/u. Die 458 Italia kan die 100km/u-merk binne 3,4 sekondes haal en sy asem sal eers by 323km/u opraak.
Soos ons nou al met die Koriane geleer het, doen hulle dinge baie vinnig. Die Hyundai Tuscon wat baie goed vir Hyundai oor die wêreld heen vaar, is so pas met die ix35 vervang. Dit sit die naamsveranderings van die i10, i20 en i30 voort, ix staan natuurlike vir 4×4-aandrywing. Nou ja, al die modelle in die ix35 reeks is darem nie 4×4 nie, daar is 4×2-modelle ook. Twee enjins word gebruik: ‘n 1,6-liter petrol met turbokrag wat 125 KW lewer en ‘n 2,0-liter turbodieseleenheid. Ons verwag die ix35 aan die begin van 2010 op plaaslike bodem.
Verskeie mediaberigte in Brasilië wil dit hê dat Rubens Barrichello van 2010 af vir Williams gaan jaag. Folha de S.Paulo, woordvoerder van Barrichello, het wel gesê dit is vir nou net 2010 met die opsie om 2011 ook in te sluit. Die skuif sal Barrichello se salaris heelwat vehoog van dit wat hy nou by Brawn verdien. Nico Rosberg gaan glo Barrichello se sitplek in die Brawn-span vol sit. Die GP2-bestuurder Nico Hulkenberg kan dalk ook sy buiging in ‘n F1 motor maak as hy Barrichello se spanmaat by Williams word.
Die voormalige wêreldkampioen Fernando Alonso, wat die afgelope twee seisoene vir Renault gejaag het, het so pas ‘n kontrak met Ferrari geteken. Dit sal amptelik aanstaande Donderdag bekendgemaak word.
