Tag: Select Category

AgriSA het ‘n uitspraak van die Pretoriase hoërhof verwelkom dat die Minerale en Petroleum hulpbronontwikkelingswet effektief dieselfde is as om onbenutte, ou orde mineraleregte te onteien.

Die uitspraak sal die staat verplig om kompensasie te betaal of om eienaarskap van die onteiende mineraalregte weer her in te stel, het AgriSA se hoofuitvoerendebeampte Hans van der Merwe Maandag in ‘n verklaring gesê.

Hy het die uitspraak as ‘n belangrike landmerk beskou in AfriSA se poging om grondeienaarskap te beskerm en foute uit te wys op beleids- en regulerende vlakke.

Die departement van minerale en energiesake het die finaliteit van die uitslag egter in twyfel getrek.

Woordvoerder Bheki Khumalo het gesê die departement is geadviseer dat dit slegs betrekking het op “regstegniese uitsonderings” wat deur die departement geopper word teen die eise van AgriSA.

“…Die meriete van die saak, of daar werklik onteiening plaasgevind het sal besluit word wanneer die saak uiteindelik in die hof aangehoor word, nadat die departement sy kant van die saak gestel het,” het Khumalo gesê.

Hy het gesê die departement het kennis geneem van die uitspraak. Die regspan was steeds besig om die uitspraak te bestudeer, waarna dit die departement sal aanbeveel watter aksie om te neem.

Die voorlopige resultate van die Landbousensus 2007, stem TLU SA pessimisties. Uit die resultate wat op 17 Februarie 2009 bekend gemaak is, blyk dit duidelik dat daar sedert 1993 ’n afname van 17,998 boerdery-eenhede was. Gevolglik kan dit aanvaar word dat daar ook ’n ooreenstemmende afname in die bewerkte oppervlaktes was. Dit plaas ’n besondere verpligting op boere wat steeds grond produktief benut.

Volgens die president van TLU SA, mnr Ben Marais, raak landbougrond, wat in Suid-Afrika alreeds ’n baie skaars kommoditeit is, al hoe skaarser. Dit kan grotendeels toegeskryf word aan die volgende:

    * Die feit dat landbougrond toenemend deur gemeenskappe opgeëis word en daarna vir ander doeleindes benut word.
    * Die gevolge van plaasmoorde wat lei tot boedelbereddering wat tydsgewys negatief op volgehoue produktiwiteit inwerk.
    * Toenemende misdaad, veral diefstal, wat daartoe lei dat boere alternatiewe praktyke oorweeg.
    * Stygende insetkostes wat die winsgewendheid van veral marginale boerderye uiters nadelig affekteer.

Mnr Marais het dit beklemtoon dat  die produksie van voldoende en bekostigbare voedsel van aanvaarbare standaard al hoe belangriker word. Teen hierdie agtergrond sal die gevolge van die wêreldwye ekonomiese insinking en werksverliese in Suider-Afrika vernietigend wees indien daar nie optimaal van beskikbare landbougrond gebruik gemaak gaan word nie. Dit is in belang van hierdie land se inwoners dat die owerheid hiervan kennis moet neem en aksieplanne in werking stel om te verseker dat Suid-Afrika in staat sal wees om voldoende voedsel vir huishoudelike gebruik sowel as vir die buurlande waarin hongersnood toenemend ‘n realiteit word, te voorsien.