deur Jerome Pugmire
Die leier in die Formule-Een-kampioenskap, Sebastian Vettel, was vandag die vinnigste in beide oefenrondtes vir die Hongaarse Grand Prix.
Vittel, wat vir die derde keer sy Formule-Een-titel verdedig, het albei kere gemaklik voor sy spanmaat Mark Webber geëindig met Red Bull wat ‘n indrukwekkende 1-2-wegspringposisie inneem.
Vettel het dit taamlik laat gelos voordat hy ‘n tydhourondte in die oggend gedoen het maar hy was vinnig op dreef deur ‘n tyd van 1 minuut, 22,723 sekodes op te stel. In die uiters warm middagtemperatuur het hy gemaklik vinniger as dit gejaag, met ‘n tyd van 1:21,264.
Lotus kan ook met vertroue uitsien na Saterdag se kwalifiserende rondtes.
Kimir Raikkonen was derde beste vir die oggend en die Fransman Romain Grosjean het sy tyd gedurende die middag geëwenaar.
Vettel het nog nooit in Hongarye gewen nie. Hy is daarop uit om sy algehele voorsprong bo Ferrari se Fernando Alonso, wat vierde in albei oefensessies geëindig het, te vergroot. – AP
Die span van Red Bull Racing het die afgelope naweek voort gestorm ná nog ’n oorwinning op die F1-kalender. Ná vry oefening Saterdag het die twee Red Bulls van Sebastian Vettel en Mark Webber vir die soveelste keer in die 1st en 2 de plek weggespring.
Ná ‘n nagmerrieseisoen in 2009 het Ferrari die nuwe seisoen met ’n baie indrukwekkende eerste en tweede plek begin. Die dubbele wêreldkampioen van Spanje, Fernando Alonso, het voor sy spanmaat Felipe Massa en Lewis Hamilton in sy McLaren oor die wenstreep gejaag.
Sebastian Vettel in sy Red Bull was van die begin af voor tot 15 rondtes voor die einde toe sy Renault uitlaatstelselprobleme begin gee het. Die twee Ferrari’s het verby geskiet en Hamilton moes vir die vale keer om die twee Mercedesse van Rosberg en Schumacher agter hom te hou. Jensen Button in die ander McLaren en Mark Webber in die tweede Red Bull was agter die twee Duitsers. Alonso was uit sy vel uit oor die oorwinning en het gesê dit is soveel meer spesiaal omdat hy nou in Ferrari, ’n span met ’n ryke motorsport geskiedenis, jaag en wen. Vettel het verbete teruggeveg met ’n kreupel Red Bull en uit eindelik vierde, net voor die twee Duitsers in hulle silwer Mercedesse, geëindig.
Die dorpie Eshowe in Kwazulu-Natal is verlede naweek geskud toe swart hoëlui met ‘n Ferrari en Lamborghini in mekaar vasgery het.
‘n Huwelikseremonie van wat as ‘n “ANC-familie” beskryf word, het by die sportsentrum op Eshowe plaasgevind waar die grasperk met gebreekte bottels en glase verniel is. Ná afloop daarvan het Romeo Mbambo, die eienaar van die Lamborghini Murcielago LP640, en die bestuurder van ‘n Ferrari F430 in Kangellastraat teen mekaar resies gejaag.
Die skade aan die twee Italiaanse sportmotors word op R1 miljoen beraam, volgens ‘n woordvoerder van Lamborghini Suid-Afrika.
Ja, al die stories dat Schummie weer gaan jaag, is toe bevestig. Die afgetrede wêreldkampioen van Duitsland het nie net vir groot kaartjieverkope by die toekomstige Duitse Grand Prix gesorg nie, maar ook veroorsaak dat van die mense by die baan nie vir Kersfees kon afvat nie. Die verkope van kaartjies vir aanstaande seisoen se wedren by Hockenheim was so goed dat daar ingewerk moes word om by te hou.
Toyota, die wêreld se grootste motorvervaardiger, het vandag aangekondig dat hulle nie langer aan formule een gaan deelneem nie. Hulle onttrek hulle van die sport weens finansiële druk en volgens Akio Toyoda, die president van Toyota, sal hulle ook nie verder enige enjins aan enige ander span beskikbaar stel nie. Williams wat Toyota-enjins gebruik het, het aangekondig dat hulle Gosworth-enjins aanstaande jaar gaan gebruik.
Die onlangse Duitse motorskou is die hoogtepunt van elke Europese vervaardiger se uitstalkas.
Audi het hulle A5 Sportback hier vrygestel. Dit is eintlik n vierdeursedan met n koepeetipe daklyn soos in die Mercedes CLS. Die Sportback is langer as die A4 en groter as die A5-koepee. Hy het ook ‘n luikdeur met n geweldige groot begasieruim. Sy kopruimte binne is slegs 5 mm minder as dié in die A4. Die motor is dan ook eintlik n viersitplek en nie soos die A4 ‘n vyfsitplek nie. Enjins in die Sportback is dieselfde as in die A4; ons weet egter nog nie watter van hulle plaaslik beskikbaar sal wees nie. Audi het insgelyks hulle R8 Spyder bekendgestel. Die motor is toegerus met dieselfde V10 5,2-literenjin as die koepee. Die materiaaldak kan binne 19 sekondes afslaan en jy kan tot 50 km/u ry terwyl die die dak op- of afgeslaan word. Audi het ook ‘nn elektriese weergawe van die R8 aan die skougangers gewys. Die motor is nog net ‘n konsep maar met die pole wat so smelt kan die R8 gouer sonder sy V10-enjin wees as wat ons dink.
Bentley het ook n “kleiner” model bekendgestel. Die Mulsanne is nou wel meer kompak as die Brooklands en die Corniches waaraan ons gewoond geraak het, maar die motor is nog steeds een van die grootstes op die pad. Sy enjin is ‘n 6,75-liter V8 en die onderstel is effens korter as 5m. Oor die 600 ingeneurs het aan die ontwikkeling van die Mulsanne gewerk en Bentley sê dat hulle die uitlaatgasse met nog 40% oor die volgende drie jaar wil verminder. Die motor het snaakse lyne, maar is tog herkenbaar as ‘n egte Bentley.
BMW het soos gewoonlik die kluts weer heeltemal kwyt geraak. Hulle het die oplossing vir ‘n probleem wat nie daar was nie gaan uitdink. Die 5-reeks GT of Gran Turismo is bekendgestel. Wel wat kan ons sê, dit is net soos die X6 baie lelik en heeltemal onnodig. Die 5 GT is nou wel ‘n 5-reeks, maar sy onderstel is eintlik van die nuwe 7-reeks afkomstig. Binne is die motor pure BMW-weelde met ‘nn klein bietjie praktiese ondernemingsgees. Buite is die nuwe motor egter uit verhouding uit lank en lyk dit kompleet of dit ‘n liefdeskind tussen ‘n 1-reeks en ‘n 7-reeks is. Dit is amper iets soos Mercedes se R-klas. Wat wel onthullend aangaande die 5 GT is, is die feit dat dit waarskynlik ‘n goeie idee gee van hoe die 5-reeks gaan lyk, net sonder die groot luikrugdeur agter. Waaraan BMW nie gedink het nie, is om die motor net die GT of 8-reeks te genoem het. Dit verteenwoordig n mengesel tussen ‘n sportsedan, luikrug, veeldoelwa, stasiewa en ‘n limo… Ai tog BMW! Die X1 is net so vreemd. Nie dat die motor enigsins vreemd lyk nie; dit is n waardige, sagte veldvoertuig. Maar hoekom die X1? Die ding is net so groot soos die huidige X3, hoekom hom nie gewoon die X3 noem nie? Hy gaan net so duur wees soos die X3 en is ook nie regtig ‘n veldvoertuig nie. Die motor is boonop gebaseer op die huidige 3-reeks en nie die 1-reeks nie. Iemand by BMW rook iets.
Die Franse het nou maar eenmaal styl en oorspronklikheid. Citroën het hulle splinternuwe DS3 bekendgestel. Die DS-kenteken sal aan die bopunt van elke modelgroep staan, so met ander woorde die DS3 is aan die bopunt van die C3, die DS4 sal bo-aan die C4-modelreeks wees en die DS5 bo die C5. Citroën sê hulle wil die Mini en die Fiat 500 met dié outjie aanvat. Wel een ding is seker, die Citroën is heelwat groter as beide daardie retronommertjies. Die DS3 sal in petrol- en dieselweergawes beskikbaar wees. Net onder die DS3 is die splinternuwe C3. Dié nuweling is nie net langer en breër nie maar bied ook heelwat meer spasie in die binneruim. Sagter lyne as sy voorganger en meer moderne rondings maak die nuwe C3 nog meer aantreklik vir sy teikenmark. Nou is die C3 in dieselfde klas as sy naaste teenstander, die Ford Fiesta.
Sekerlik een van Ferrari se heel belangrikste motors is die F430, maar nou het die manne van Maranello die 458 Italia bekendgestel. Die 458 vervang die F430 en dit op sigself vertel die storie van hoe belangrik die motor is. Dit is die brood-en-botter-model van die Ferraristal, die goedkoopste Ferrari wat geld kan koop. Die enjin is ‘n 4,5-liter V8 met 413 KW en hope wringkrag. Trouens, die 458 beskik oor ‘n kwart meer wringkrag by 6000 toere as die F430 Scuderia. Die 458 gebruik ook die dubbelkoppelaar uit die Calafornia. Danksy die hulp van ‘n sekere mnr Schumacher is daar 140 kg afwaartse druk by 200 km/u. Die 458 Italia kan die 100km/u-merk binne 3,4 sekondes haal en sy asem sal eers by 323km/u opraak.
Soos ons nou al met die Koriane geleer het, doen hulle dinge baie vinnig. Die Hyundai Tuscon wat baie goed vir Hyundai oor die wêreld heen vaar, is so pas met die ix35 vervang. Dit sit die naamsveranderings van die i10, i20 en i30 voort, ix staan natuurlike vir 4×4-aandrywing. Nou ja, al die modelle in die ix35 reeks is darem nie 4×4 nie, daar is 4×2-modelle ook. Twee enjins word gebruik: ‘n 1,6-liter petrol met turbokrag wat 125 KW lewer en ‘n 2,0-liter turbodieseleenheid. Ons verwag die ix35 aan die begin van 2010 op plaaslike bodem.
Die voormalige wêreldkampioen Fernando Alonso, wat die afgelope twee seisoene vir Renault gejaag het, het so pas ‘n kontrak met Ferrari geteken. Dit sal amptelik aanstaande Donderdag bekendgemaak word.