Kategorie: Internasionale nuus

Nuus oor die wêreld buite Suider-Afrika

Brussel-aanvallers wou Parys weer bom

Die terroriste wat verlede maand Brussel geteiken het, het aanvanklik beplan om ‘n tweede aanval op Frankryk te doen, het België se Federale Vervolgingsgesag gesê.

Maar die groep was “verras deur die spoed van die vordering in die voortgesette ondersoek” en het besluit om ‘n aanval op die Belgiese hoofstad te loods, het die kantoor in ‘n verklaring gesê.

Twee selfmoordbommers het 16 mense op die lughawe Brussel op 22 Maart vermoor en in ‘n daaropvolgende ontploffing by Maalbeek-moltreinstasie dieselfde oggend, nog 16 mense opgeblaas.

Ondersoekbeamptes het bande ontdek tussen die sel agter die Brussel-aanvalle en die groep wat 130 mense in Parys vermoor het op 13 November verlede jaar.

Die verklaring Sondag het bevestig wat baie vermoed het: Die reeks klopjagte en arrestasies in die week in die aanloop tot die Brussel-aanvalle, het die moordenaars tot aksie oorgehaal.

Saterdag, het Belgiese owerhede vier mans aangekla weens hul deelname aan “terreurmoorde” en die “aktiwiteite van ‘n terroriste-groep” nalv die Brussel-aanvalle.

Een van hulle, Mohamed Abrini, is ook aangekla in verband met die aanvalle in Parys, het aanklaers gesê.

Abrini is geïdentifiseer as die sogenaamde “man in die hoed” wat langs die twee selfmoordbommer opgemerk is wat hulself opgeblaas het by die Zaventem-lughawe in Brussel.

Toesig-beeldmateriaal het hom ook in die konvooi saam met die aanvallers wat na Parys is, geplaas.

Abrini was ‘n jeugvriend van Brussel-broers Salah en Brahim Abdeslam, beide verdagtes in die Parysaanval.

Sy vingerafdrukke en DNA is nie net in ‘n Renault Clio gekry nie, maar ook in ‘n woonstel in die buurt Schaerbeek van Brussel wat gebruik is deur die lughawebommers.

Abrini het vroeër na Sirië gereis, waar sy jonger broer oorlede in 2014 as ‘n lid van die Islamitiese staat se Franssprekende brigade.

Die Belgiese anti-terreureenhede verkeer steeds op ‘n hoë gereedheidsgondslag aangesien hulle nog aanvalle verwag.

Die Franse minister van Binnelandse Sake, Bernard Cazeneuve het Sondag aan I-Tele TV gesê sy land het die afgelope tyd 13 sulke beplande aanvalle afgeweer en reeds 80 mense is aangekla sedert die begin van die jaar. Hy wou nie verder uitbrei nie.

Neocon Nuland se witbroodjie moet bedank

Die eerste minister van die Oekraïne, Arseniy Yatsenyuk sê hy het besluit om te bedank oor wat hy bestempel het as ‘n kunsmatige politieke krisis in die land.

Yatsenyuk het in Februarie net-net ‘n mosie van wantroue in die land se parlement oorleef, nadat die president, Petro Poroshenko ‘n beroep op hom gedoen het om te bedank.

Sy party se gewildheid het ook skerp gedaal weens bewerings van korrupsie en ‘n gebrek aan optrede.

Yatsenyuk was die keuse van Victoria Nuland, die Amerikaanse adjunkminister van buitelandse sake om haar land se belange te verteenwoordige nadat sy in ‘n privaatgesprek wat gelek is, gesê het: “Fok die EU.”

Poroshenko en die nuwe eerste minister sal dus onder groot druk van die Oekraïne se bondgenote in Europa en Amerika wees om werklike hervorming in werking te stel.

“Die samewerkingsooreenkoms [met die EU] sal nie verander word nie,” het die Oekraïnse president Poroshenko Sondag gesê.

Hy het kommentaar gelewer oor die moontlike gevolge van die onlangse referendum in Nederland, waar die meerderheid van die kiesers teen die aanvaarding van die ooreenkoms is.

Die Oekraïense leier het bygevoeg dat hy in die volgende paar dae verwag dat die Europese Kommissie wetgewing sal “inisieer” om die Oekraïne as ‘n visum-vrye gebied te verklaar.

Die voorgestelde samewerkingsooreenkoms tussen die EU en Kiëf is onderteken in 2014, maar vir die verdrag om volle regskrag te hê moet dit deur al die 28 EU-lidlande bekragtig word.

Nederland moet dit nog doen, maar die Nederlandse referendum verlede week het getoon dat die meerderheid kiesers is teen die bekragtiging van die verdrag gekant is.

Iran, Israel betrek by Nagorno-Karabach konflik

Die ministers van buitelandse sake van Rusland en Iran het gister aangesluit by gesprekke om ’n hernude oorlog tussen Azerbaidjan en Armenië oor Nagorno-Karabach te voorkom, terwyl albei kante in die konflik mekaar van skendings van die twee dae oue ­skiet­stilstand beskuldig.

Die Russiese en Iranse buitelandse ministers het gister onderskeidelik met hul Armeense en Azerbaidjanse eweknieë vergader.

Gevegte het oor die naweek uitgebreek waarin minstens 64 mense, insluitende drie burgerlikes, dood is.

Dit is die hewigste uitbreking van geweld sedert ’n ­separatistiese oorlog in 1994 geëindig het en ­Nagorno-Karabach, amptelik deel van Azerbaidjan, onder beheer van plaaslike Armeense magte en die Armeense­ weermag gekom het.

Armeense magte beset ook verskeie gebiede buite die Karabach-streek.

Israel en Azerbaidjan het ‘n strategiese alliansie.

Met sy geografiese nabyheid aan Iran, maak dit die land baie belangrik vir Israel. Azerbaijan is ook een van die belangrikste verskaffers van olie aan Israel.

Videomateriaal wat opgelaai is op Youtube ‘n paar dae gelede toon om ‘n Israeli-hommeltuig, die Harop wat oor die betwiste streek vlieg, het die Washington Post die naweek berig.

Die tuig, wat plofstof dra, vind sy teiken gebaseer op radar of radiogolwe en is bedoel om die teiken te vernietig.

Die Armeense ministerie van verdediging se woordvoerder het gesê een van hierdie tuie het in ‘n bus vol Armeense “vrywilligers” op pad na die geveg sone aangeval, en sewe gedood.

Ysland se premier bedank oor Panama-onthullings

Ysland se eerste minister, Sigmundur David Gunnlaugsson, het die eerste slagoffer van die miljoene gelekte Panamese dokumente oor buitelandse rekeninge en dopmaatskappye geword.

Hy het Dinsdag onder groot druk die tuig neergelê.

Woede het in Ysland geheers oor die onthulling dat hy ’n dopmaatskappy gebruik het om groot bedrae geld te verskans terwyl Ysland se ekonomie ’n krisis beleef het.

Politici in verskeie lande, onder wie Oekraïne se president, staar vrae in die gesig oor moontlike twyfelagtige aflandige skemas wat gebruik is om belasting te ontduik.

Pres. Petro Poroshenko het volgens die Panamese dokumente sy lekkergoed-onderneming geskuif en sy land sodoende van miljoene dollar aan belasting ontneem.

Die VSA se korporatiewe media het intussen nuus oor die lekkasies asook aantygings van twyfel­agtige optrede van staatslui in hul eie land verswyg.

Vietnam se premier bedank na Kongres swaai

Viëtnam se eerste minister, Nguyen Tan Dung, het Woensdag ná tien jaar in die amp, uitgetree.

Dung se houding teenoor China het hom waarskynlik sy pos gekos in dié eenpartystaat. Hy was besig om te pro-Amerikaans op te tree na die smaak van die Nasionale Kongres.

In ’n formele stemming het lede van die Nasionale Kongre met 430 teenoor 462 stemme gestem dat Nguyen Tan Dung uit sy amp onthef moet word, drie maande voor die verstryking van sy termyn.

Sy vertrek was ’n blote formaliteit nadat hy die leierskapstryd tydens die regerende kommunistiese party se kongres in ­Januarie verloor het en die knie voor Nguyen Phu Trong moes buig.

Die Nasionale Vergadering sal vandag sy adjunk, Nguyen Xuan Phuc, as eerste minister aanstel.

Teen die einde van Desember het Trong, 72, sy voorneme verklaar om aan te bly vir ‘n jaar of langer as die party se sekretaris-generaal, terwyl 65 die sperouderdom vir Politburolede is om nuwe poste te aanvaar.

Die aankondiging van nuwe Viëtnamese strategiese vennootskappe, soos met Indonesië, wat ook oor Chinese oorheersing kla, het die Kongres geswaai.

‘n Aankondiging van ‘n nuwe Viëtnamese strategiese vennootskap met ‘n ander anti-Chinese Asiatiese land soos Indonesië, moet gesien word as ‘n potensiële teken van stygende spanning tussen Beijing en Hanoi.

Enige militêre krisis met betrekking tot China en Vietnam kan egter Amerikaanse belange benadeel.

Die potensiële skade wat spruit uit ‘n China-Viëtnam maritieme krisis vir die VSA sal ook eksponensieel groter ekonomiese ontwrigting veroorsaak.

‘n Insident of twee in die Suid-Chinese See sal, selfs vir ‘n paar dae, die internasionale ekonomie ernstig knou, want die see is so belangrik vir handel en daar is min werklike alternatiewe roetes.

Meer as die helfte van die wêreld se handel in vloeibare aardgas en meer as 33 persent van die handel in ru-olie moet deur die gebied beweeg.

Ted en Bernie wen in liberale Wisconsin

Senator Ted Cruz het Donald Trump Woensdag in die liberale Wisconsin verslaan.

Met meer as 90% van die stemme getel, het Cruz meer as 49% van die kiesers se steun gekry en Trump 35%. Sen. John Kasich het sowat 14% van die stemme getrek.

Cruz se oorwinning het van Trump se afggevaardigdes afgerokkel. Hy het tans sowat 740, teenoor Cruz se sowat 514 en Kasich met 143.

Trump, die voorloper in dié party se benoe­mingstryd, sal waarskynlik nie ’n volstrekte meerderheid hê wanneer die Republikeinse Party-konvensie in Julie in Ohio plaasvind nie.

Minstens 1 237 afgevaardigdes se steun is nodig vir ’n kandidaat om as die party se presidentskandidaat vir die nasionale verkiesing in November aangewys te word.

Trump se teenstanders, ook in sy eie party, hoop hy word sodoende uitgestem as dit gebeur.

Bernie Sanders van die Demokratiese Party het sy teenstander, Hillary Clinton, maklik in Wisconsin geklop deur meer as 56% van die stemme op hom te verenig, teenoor Clinton se 43%.

Die twee is kop-aan-kop met Clinton wat 1 274 afgevaardigdes het en Sanders wat die steun van 1 025 afgevaardigdes geniet.

Minstens 2 383 afgevaardigdes se steun is nodig om as die Demokratiese Party se presidentskandidaat aangewys te word.

Piesangs kry slegte naam

‘n Rashisterie het by die Universiteit van Warwick in Brittanje losgebars nadat daar op piesangs geskryf is.

‘n Petisie is geloods deur WARSoc, ‘n anti-rassisme vereniging, om die instelling “verantwoordelik te hou vir rassisme binne sy mure” nadat ‘n student kwetsende woorde op piesangs ontdek het.

WARSoc, wat poog om dekolonisering te weeg te bring, het ‘n lys van eise opgestel, insluitend ‘n oorsig van die “hele beleid van rassisme en diskriminasie” wat by Warwick heers.

Die petisie eis ook ‘n “bevryde kurrikulum” en dat baie meer swart en etniese minderhede verteenwoordiging sal word in alle posisies van aansien.

Nadat Faramade Ifaturoti, 19, ‘n eerstejaarstudent in biomediese wetenskap, Dinsdagmiddag ‘n foto gepos het op haar Twitter-blad wat lui: “Net by die kombuis ingestap en kyk na wat een van my woonstelmaats [na bewering] gedoen het. Ek is baie gewalg.”

Sy het ‘n foto van haarself met ‘n klomp van die piesangs aangeheg waarop daar twee woorde pryk, naamlik “monkey!” en “nigga!”.

WARSoc kla dat die Warwick Akkommodasiehandboek “absoluut niks” met betrekking tot rassisme uitlê nie en bygevoeg: “Tog spog die instelling hardop oor [hulle] diversiteit en dat hulle die Rasgelykheidhandves onderteken het.”

Die petisie sê ook: “Hierdie dade kom regdeur die akademiese jaar voor, elke jaar.

Terwyl me Ifaturoti haar woonstelmaats blameer vir die “skokkende rassistiese aanmerkings en verontmenslikende opmerkings” op die vrugte, is nog nie duidelik wie verantwoordelik is nie.

Die woorde kon ook geskryf gewees het deur ‘n besoeker aan die woonstel.

Die woordvoerder het gesê: “Die student is alternatiewe akkommodasie aangebied in ‘n aantal ander plekke op die kampus, terwyl die saak ondersoek word.”

Warwick se studenteraadvoorsitter, Isak Leigh, het verwys na die voorval as “absoluut walglik,” en het gesê: “[Ek] voel fisies siek. Ons het nie al die inligting nie, maar ons weet genoeg om te weet dat die sterkste moontlike stappe gedoen gaan word. Rassisme het geen plek op Warwick Universiteit nie.”

Twee jaar gelede het minderhede gekla oor die universiteit se “rassistiese swane” wat net donkerder mense aanval.

Splintergroep van Boko Haram se leier gevang

Die Nigeriese weermag het die leier van die Islamitiese militante groep, Ansaru, ’n splinterfaksie van Boko Haram, in hegtenis geneem en hom daarvan beskuldig dat hy Westerlinge ontvoer en vermoor, het Reuters berig.

In 2012 het die Amerikaanse departement van verdediging Ansaru se leier, Khalid al-Barnawi, geïdentifiseer as een van drie Nigeriese militante wat op die swartlys geplaas is vanweë hul verbintenis met Boko Haram en al-Kaïda se Noord-Afrika vleuel.

’n Verdedigingswoordvoerder, brig.genl. Rabe Abubakar, sê al-Barnawi is Saterdag in Lokoja, die hoofstad van die sentrale deelstaat, Kogi, in hegtenis geneem. “Ons het reusevordering gemaak,” het Abubakar gesê.

Hy het voorts gesê sommige Boko Haram-vegters het hulle aan Nigeriese troepe oorgegee.

Die Nigeriese president, Muhammadu Buhari, het dit ’n prioriteit van sy presidensie gemaak om Islamitiese militante in Afrika se digsbevolkte land en die vasteland se grootste ekonomie uit te dryf.

Inwoners vlug na skermutselinge in Brazzaville

Kongolese inwoners van die suidelike distrikte van Brazzaville skuil by ’n kerk nadat hulle Maandag van intensiewe skermutselinge tussen veiligheidsmagte en opposisie-voorstanders in die suide van die hoofstad van die Republiek van die Kongo gevlug het.

Gevegte woed nog in dele van die stad, het AFP berig.

Volgens verslaggewers op die toneel, het paniekbevange mense na die noorde van die stad gestroom, weg van suidelike gebiede, wat lojaal aan die opposisie is en pres. Denis Sassou Nguesso se onlangse herverkiesing teenstaan.

Swaar geweervuur is sedert vroeg dié week in die hoofstad van die ­Republiek van die Kongo gehoor. ’n Regeringswoordvoerder het bevestig dat die polisie in gevegte met ­milisie-vegters gewikkel is.

Die skietery is in die suidelike Bacongo- en Makelekele-woonbuurt van Brazzaville gehoor.

Die milisie staan bekend as die ninjas. Dit was een van die hoof-anti­regeringsmagte in die 1998-’99-burgeroorlog in die land.

Die groep staan onder leiding van die afvallige pastoor, Frederic Bitsangou. Die groep het die 1999-skietstilstandooreenkoms onderteken, maar vroeg in 2000 weer die wapen opgeneem en geëis om ’n rol in politieke en militêre besluitneming te speel.

Die milisie onder Bitsangou is uiteindelik ontbind en hy is later as minister in die land se regering aangestel.

Maandag se gevegte kom weke na die herverkiesing van die langdienende president, Denis Sassou N’Guesso. Hy regeer die land sedert 1979 met uitsondering van vyf jaar sedert 1992 toe hy in die land se eerste veelparty verkiesing uitgestem is en nie aan bewind was nie.

Hy het weer in die verkiesing wat op 20 Maart gehou is, gestaan nadat ’n grondwetlike referendum die termyn en ouderdomsbeperking vir presidentskandidate geskrap het.

Mossack Fonseca: ‘Enigste misdaad is kuberinbraak’

Die enigste misdaad wat gepleeg is, is van ‘n kuberaard, volgens Ramon Fonseca, een van die stigters van Mossack Fonseca, die regsfirma wat die middelpunt van die Panama Papers is.

Fonseca het gesê die firma het ‘n klag by die Panamese owerheid ingedien omdat al die beriggewing tot dusver oor die bates van rykes handel maar “niemand praat oor die kubermisdaad nie en dit is die enigste misdaad wat gepleeg is”.

“Ons het ‘n tegniese verslag dat daar by ons oorsese bedieners ingebreek is,” het hy gesê.

Volgens hom is dit ‘n jammerte dat die beriggewing oor die 11,5 miljoen dokumente op die bekende kliënte fokus.

“Ons verstaan dit nie. Die wêreld aanvaar reeds dat privaatheid nie ‘n mensereg is nie,” het hy gesê.

Intussen het Sigmundur David Gunnslaugsson, premier van Ysland, na aanleiding van die Panama Papers bedank omdat sy vrou in die onthullings genoem word.

“Die premier het aan sy party se parlementêre groep gesê hy sal afstand doen van sy amp en dat ek sal oorneem,” het Sigurdur Ingi Johannsson, adjunkleier van die Progressiewe Party en minister van landbou, gesê.

Die uitgelekte dokumente het aan die lig gebring dat Gunnslaugsson (41) en sy vrou, Anna Sigurlaug Palsdottir, ‘n rekening in die Britse Maagde-eilande bedryf.

Betogers het Maandag buite die Yslandse parlement betoog.

Van die bekendes wie se name in Ramon Fonseca se dokumente opduik vir die skep van aflandige maatskappye om geld te hou, is die Spaanse Oscar-bekroonde regisseur Pedro Almo- dóvar, die akteur Jackie Chan en die sokkerspeler Lionel Messi.

Gianni Infantino, nuwe president van die sokkerbeheerliggaam Fifa, is onder skoot nadat dit aan die lig gekom het dat hy ‘n kontrak goedgekeur het met twee sakemanne wat sedertdien van omkopery beskuldig is.

Hy het die TV-uitsaairegte vir Europa se premierklubkompetisie aan die pa en seun Hugo en Mariano Jinkis in 2006 gegee.

Die VSA wil dié twee Argentyne laat uitlewer as deel van ‘n FBI-ondersoek.

Terugslae vir Trump en Hillary in Wisconsin

Die senator van Texas, Ted Cruz, het gisteraand Suid-Afrikaanse tyd oor Donald Trump geseëvier in die Republikeinse nominasiestryd in die deelstaat Wisconsin. In die Demokratiese resies het die senator van Vermont, Bernie Sanders, op sy beurt vir Hillary Clinton geklop en daarmee nog ‘n onlangse oorwinning ingeryg, hoewel hy steeds ver agter loop sover dit afgevaardigdes betref.

Met meer as driekwart van die stemdistrikte wat hul uitslae ingedien het, het Cruz 49 persent van die stemme op hom verenig, teenoor 34 persent vir Trump. Die senator van Ohio, John Kasich, het 14 persent ontvang.

Die volgende rondte in die nominasiestryd sal in die New Yorkse deelstaat plaasvind, tuiste van sowel Clinton as Trump. Volgens onlangse meningspeilings loop Trump ver voor Cruz in New York, ‘n groot deelstaat wat weens die wenner-vat-als-formule tot 95 afgevaardigdes vir Trump kan beteken.

Volgens huidige vooruitskattings, ná sy verloor in Wisconsin, mag Trump nie ‘n algehele meerderheid van 1237 afgevaardigdes hê by die Cleveland-kongres waar die Republikeinse presidentskandidaat in Julie aangewys gaan word nie. ‘n Paneel van Amerikaanse verkiesingsdeskundiges het onlangs voorspel dat Trump waarskynlik met ‘n totaal van 1208 afgevaardigdes mag opeindig, net-net te min. Maar steeds sou so ‘n syfer hom in staat stel om die presidentskandidaat te word, aangesien daar iets soos 138 onverbonde afgevaardigdes bestaan wat self kan besluit vir watter kandidaat hulle wil stem. Indien Trump oor slegs om en by 1200 afgevaardigdes van sy eie beskik, hoef hy slegs 27% van die onverbondes (37) oor te haal om vir hom te stem om steeds die 1237-kerf tydens die eerste rondte van stemmery te haal. Daarna sal dit vir Cruz en Kasich neusie verby wees.

Volgens huidige beramings deur Associated Press, sou Cruz gisteraand 39 afgevaardigdes in Wisconsin behaal. Dit laat hom tans steeds met ‘n agterstand van meer as 200 afgevaardigdes teenoor Trump, want die miljardêrsakeman staan op 740 teenoor Cruz se 514 en Kasich se 143. Trump beskik steeds oor meer afgevaardigdes as Cruz en Kasich sáám, wat hom steeds die voorloper maak.

Wat die Demokratiese uitslag in Wisconsin betref, het die linkse Bernie Sanders 56 persent van stemme verower teenoor mev. Hillary Clinton se 44 persent, met driekwart van die stemdistrikte wat getel is. Dit laat Sanders egter steeds met ‘n aansienlike agterstand, want Clinton beskik oor 1274 afgevaardigdes teenoor sy 1025. As sogenaamde “superafgevaardigdes” ingesluit word, het Clinton reeds 1743 teenoor Sanders se 1056. Hillary Clinton moet 2383 bereik om die benoemingstryd in haar guns te beklink, wat op dié stadium waarskynlik lyk.

ISIS uit sleuteldorp gedryf

Sirië het met die hulp van Russiese lugaanvalle Sondag die Islamitiese Staat (ISIS) uit die dorp al-Qaryatain gedryf.

ISIS het in Augustus beheer van die dorp geneem.

Sirië se staatstelevisie het Maandag berig dat die dorp weer in die hande van die wettige regering is. “Die laaste groepe Daesh-terroriste in die dorp is om die lewe gebring.”

Die dorp lê sowat 100km wes van die antieke stad Palmira wat verlede Sondag van die Islamitiese staat herower is.

Dit is ‘n strategiese dorp waardeur olie en gas deur die invallers gesmokkel is. ISIS se voorraadroete in Sirië is daarmee ontwrig.

Die herowering van die dorp word het ISIS se greep op die digbevolkte weste van Sirië – asook Damaskus en ander belangrike stede – losgemaak.

Die regering beplan om ander terreurneste in die gebied skoon te maak.

Volgens berigte uit Sirië het die soldate die dorp uit verskillende rigtings binnegeval en landmyne noordwes van die dorp is onskadelik te stel.

Duisende landmyne is ook geplant toe ISIS uit Palmira gevlug het en inwoners sal eers kan terugkeer wanneer die myne onskadelik gestel is.

ISIS beheer steeds die stad Raqqa – wat hy as sy hoofstad benut – en die grootste deel van die provinsie Deir al-Zor in die ooste van die land en aangrensend aan Irak.

Islamitiese Staat aanvaar verantwoordelikheid vir Irak-aanvalle

Selfmoordbomaanvalle het die lewens van minstens 24 mense Maandag in Irak geëis.

Intussen vlug duisende inwoners uit die strategiese stad Hit, wes van Bagdad, wat deur Islamitiese militante bedreig word.

Die Islamitiese Staat (IS), wat dele van die noorde en die weste van Irak beheer, het op die Amaq-nuusblad verklaar dat hulle verantwoordelikheid vir die aanvalle aanvaar.

Volgens amptenare het die aanvallers onder meer lede van ’n Sjiïtiese militêre groep geteiken.

‘n Motorbom het in Basra, die grootste stad in Irak, ontplof. Minstens vyf mense het omgekom.

Die bom het ook ‘n konvooi van ‘n koalisie van Sjiïtiese soldate, die PMF, geteiken en nog vyf mense is in dié voorval dood.

Vyf mense is ook dood toe selfmoordbomaanvallers hulself by militêre punte in Bagdad ­opgeblaas het.

In die suidelike stad Nassiriya is minstens vier lede van die PMF-groep buite ’n restaurant in ’n selfmoordbomaanval dood.

Twee lede van die regeringsmagte is in die weste van Bagdad in ’n motorbom-aanval dood en ’n derde lid in ’n ontploffing in die suide van dié stad.

Twee mense is dood in ’n mortierbomaanval in die Abu Ghraib-distrik.

Europa stuur migrante terug

Migrante wat van die Griekse eiland Lesbos teruggestuur is, het Maandag in Turkye begin aankom ingevolge ‘n omstrede ooreenkoms wat daarop gemik is om die hooftoevoerroete van miljoene mense oor die Egeïese see na Griekeland te sluit.

Ingevolge die ooreenkoms wat deur menseregtegroepe en vlugtelingagentskappe veroordeel word, sal Ankara alle migrante insluitende Siriërs wat Griekeland onwettig binnegaan, terugneem in ruil waarvoor die Europese Unie duisende Siriërs regstreeks van Turkye sal ontvang.

Turkye word ook met meer geld, vervroegde visumvrye reise en vordering met die land se onderhandelinge vir EU-lidmaatskap beloon, het Reuters berig.

Twee Turkse passasiersbote met 131 migrante het gisteroggend in die Turkse hawedorp Dikili onder begeleiding van die Turkse kuswag en ‘n polisiehelikopter aangekom.

Altesaam 66 mense, van wie die meeste Afgane is, is ook Maandag na Turkye teruggestuur.

Die doel van die EU-ooreenkoms met Turkye is om migrante te ontmoedig om die gevaarlike seevaart dikwels in klein vaartuie, te onderneem. Dit het vberder ten doel en om die sakemodel van mense-smokkelary te breek wat tot Europa se grootste migrasie-vlaag sedert die Tweede Wêreldoorlog gelei het.

‘n Paar ure nadat die eerste boot met vlugtelinge van die Griekse eiland Lesbos na Turkye vertrek het, het die Griekse kuswag minstens twee klein vaartuie gered.

Die twee vaartuie het meer as 50 migrante onder wie kinders en ‘n vrou in ‘n rolstoel, aan boord gehad wat die eiland probeer bereik het.