Kategorie: Internasionale nuus

Nuus oor die wêreld buite Suider-Afrika

Grootste Joodse gemeenskap in Europa verwelkom Moslems

‘n Sinagoge in Marseille, Frankryk gaan omskep word in ‘n moskee, wat die demografiese verskuiwings in die Suid-Franse stad weerspieël, het ‘n Joodse leier aan AFP gesê.

‘n Moslem kulturele vereniging, Al Badr, gaan die Or Thora-sinagoge, wat al hoe minder gebruik word deur die Joodse gemeenskap koop, het die stad se Joodse leier Zvi Ammar Dinsdag gesê.

“Vir die afgelope 20 jaar of so het ons die verskuiwing van die Joodse gemeenskap na ander woonbuurte gesien,” het Ammar gesê en bygevoeg by dat hy die stap as “positief” beskou.

“Ons het almal dieselfde god, die belangrikste ding is om dit in harmonie te laat gaan,” het hy gesê. Hy sê Jode verwelkom die uitbreiding van Islam in Frankryk, maar kennelik Christene bedoel as die moeilikheidmakers.

Die terrein naby die belangrikste stasie in die stad is aan Jode gegee wat gevlug het na Marseille uit Algerië.

Algerië het ná ‘n agt jaar lange oorlog onafhanklikheid van Frankryk in 1962 verkry.

Al Badr bedryf tans ‘n moskee in die omgewing wat te klein is vir sy gemeente.

Die Joodse gemeenskap in Marseille floreer, het Ammar gesê, met die aantal sinagoges wat reeds byna verdubbel het van 32 tot 58 in die afgelope drie dekades.

Die stad se 70.000 Jode is een van Frankryk en Europa se grootste Joodse gemeenskappe.

Marseille se bevolking van byna twee miljoen sluit ook sowat 220,000 Moslems in.

Marseille se Moslems wag nog steeds vir die konstruksie van hul Groot Moskee, wat die stad se burgemeester in 2001 belowe het, maar die projek het vasgeval in finansiële ellende asook wetlike uitdagings wat deur die “verregse” Front National gestel is.

Teen ‘n beraamde koste van €23 miljoen sal die moskee Frankryk se grootste wees as dit ooit gebou word.

Vroeër hierdie week het die burgemeester van Nice, digby Marseille, die groen lig gegee om die Franse staat te dagvaar in ‘n poging om die opening van ‘n Saoedi-befondsde moskee in die stad te sluit.

Burgemeester Christian Estrosi sê die eienaar van die gebou, Saoedi-Arabië se minister van Islamitiese sake Sheikh Saleh bin Abdul Aziz, bepleit sjariawette en wil “al die kerke op die Arabiese skiereiland tot niet maak”.

Trump looi globaliste oor oorlog en chaos

Die voorloper in die stryd om die benoeming as Republikeinse presidentkandidaat in die VSA, Donald Trump het ‘n striemende aanval op globalisme gedoen.

As die tema bekend was, was Trump se ernstige toon nie. Hy het staatgemaak op ‘n teleleser in plaas van om uit die vuis te praat soos gewoonlik.

“Ons sal nie meer hierdie land of sy mense oorgee aan die valse lied van globalisme nie. . . Ek is skepties oor internasionale verbonde wat ons inbind en aftrek in Amerika. En onder my administrasie, sal Amerika nooit enige ooreenkoms aangaan wat ons vermoë om ons eie sake te beheer, verminder nie,” het hy gesê, met verwysing na die NAFTA-ooreenkoms .

Trump het elke leier na Ronald Reagan blameer – wat dié Republikeinse George W. Bush insluit – omdat hulle almal “die pad heeltemal byster geraak het”.

In die komende konfrontasie met Clinton – wat meer aggressief as Obama is – het Trump probeer om homself uit te beeld as ‘n gedissiplineerde leier wat Amerikaanse belange voorop stel.

Hy het die Clinton-Obama-span gelooi oor die chaos wat hul inmenging in die buiteland veroorsaak het, met verwysing na die omverwerping van president Hosni Mubarak in Egipte, die ingryping in Libië en militêre optrede in Sirië.

Hy Clinton skerp gekritiseer vir haar hantering van die dodelike aanvalle op die VSA in Benghazi.

Trump het ook die president se hantering van buitelandse sake as roekeloos en ‘n totale ramp beskryf.

Hy sê Amerika se bondgenote betaal nie ‘n regverdige deel van die sekuriteitsrekening nie, en dat enige land wat deur Amerika verdedig word, sal moet begin opdok.

Hy het Obama ook gekritiseer omdat hy, soos Trump dit stel, Amerika se goeie vriend, Israel afjak en Iran te goedgesind is.

Iran se Opperleier, die Ayatollah Ali Khamenei sê egter Obama probeer sakelui afskrik om in Tehran te belê en ‘n ondermyn ‘n ooreenkoms om internasionale sanksies op te hef.

Khamenei se kommentaar kom kort voor die tweede ronde van Iran se parlementêre verkiesings.

Trump het ook weer sy kommer oor die verspreiding van radikale Islam uitgespreek, en gesê dat die land ‘n langtermynplan in die opsig benodig.

Ramallah onthul Mandela-beeld

Dit was ‘n geskiedkundige dag vir die stad van Ramallah in Palestina nádat ‘n ses-meter standbeeld van die voormalige president, Nelson Mandela, onthul is.

Die onthulling kom nadat Ramallah se burgemeester, Mousa Hadid, by ‘n gesamentlike nuuskonferensie Johannesburg se burgemeester, Parks Tau, ontmoet het.

Tau het gesê die Madibastandbeeld is ‘n “simbool van hoop en inspirasie vir die mense van Palestina om hul vryheid te verwesenlik”.

“Suid-Afrika het met die ondersteuning van die internasionale gemeenskap apartheid verslaan, en is dit natuurlik dat ons ons ubuntubeginsels as Afrikane uitbrei en in solidariteit met daardie volke verkeer wat tans verskeie vorme van politieke en humanitêre oproer ervaar.” het Tau.

Die standbeeld, ‘n skenking van Johannesburg aan Ramallah, verteenwoordig ‘n simbool van solidariteit met die mense van Palestina.

Die ses-meter hoë brons standbeeld op die Nelson Mandela-plein in die omgewing van Al-Tireh, is die werk van Suid-Afrikaanse kunstenaars Tania Lee, Christina Salvoldi en Lungisa Kala.

Dit is ‘n maand gelede na Palestina gestuur.

Hadid het gesê die onthulling sal gevier word as ‘n nasionale dag, want die standbeeld van Nelson Mandela “verenig die mense van Palestina en Suid-Afrika”.

“Ons wil nie dat verhoudings hier eindig nie. Ramallah en die mense van Palestina het baie om te leer van Johannesburg en die hele Suid-Afrika.”

Die onthulling kom nadat ‘n sending onder leiding van die Suid-Afrikaanse Vereniging vir Plaaslike Regering (Savpr) Ramallah in November 2014 besoek het.

Die besoek het uitgeloop op die ondertekening van ‘n Memorandum van Verstandhouding (MOU) tussen Johannesburg en Ramallah omdat Savpr graag internasionale stad-tot-stad verhoudings en samewerking wil bevorder.

Plant moet N-woord verdoesel toe Obama kom kuier

Dit was by sy pa en onderwyser, landskapkunstenaar Jakob Gerritsz Cuyp, wat Aelbert Cuyp (1620-1691) sy skildertalent asook sy liefde vir die diere wat dikwels in sy landskappe pryk, geërf het.

Maar selfs die meester se talent kon klaarblyklik nie ontkom aan die alomteenwoordige Angelsaksiese rasbeheptheid nie.

Een van Cuyp se werke in die besit van die Duitse adel wat die Britse kroon dra, “The Negro Page”, het die muur in die sitvertrek versier waar die Windsors dié naweek die Obamas in volkleurfoto’s ontvang het om ‘n Brexit te probeer verhoed.

Met president Obama en sy vrou Michelle se besoek aan Kensingtonpaleis, is daar nie oor kunswaardering of skildertegniek bespiegel nie, maar wel oor die plant vóór die pragtige werk.

Dit blyk dat die Windsors plaatjies aan hulle skilderye moet aanbring omdat hulle nie so goed kan onthou waarna hulle nou eintlik kyk in hul eie sitkamer nie en ongelukkig is die titel van die werk duidelik aangedui.

Gewoonlik bring regte versamelaars en kunsliefhebbers nie plaatjies aan hul eiendom aan nie. Dit is iets vir die parvenu.

Dus moes die eerste neger in die Withuis nie alleen na die swart slaaf kyk wat ‘n perd lei nie, maar ook na die plaatjie waarop aangedui word dat die swarte ‘n “neger” is.

Dit was klaarblyklik net te veel kwetsende dinge vir een besoek, en die Windsors, William en Kate, het besluit om ‘n plant strategies voor daardie lelike woord te plaas.

Die gawe Windsors wou kennelik seker maak hulle bondgenoot oorkant die water moet bly glo hy is “nie-rassig”.

Terwyl Cuyp nooit na Italië gereis het nie, het sy skilderye ‘n tipiese sonnige, Mediterreense atmosfeer. Die kuiertjie om trans-Atlantiese verhoudinge weer ‘n bietjie gom te gee, was egter maar ongemaklik, aangeplak en styf ten spyte van die plant.

Die swart gaste het die behangde muur deur die aand vermy en die matte bewonder.

As een van Dordrecht se grootste kunstenaars nou maar kon raai vir watter verleentheid hy eendag sou sorg om die werklikheid so netjies vas te vang.

Obama nog ongewilder in Duitsland as VK

Na ‘n uiters ongewilde besoek aan Brittanje het die Amerikaanse president, Barack Obama die Duitse Kanselier, Angela Merkel ontmoet om ‘n sinkende handelsooreenkoms te probeer red.

Dit lyk gelukkig asof Obama daarvoor sal sorg dat ‘n beoogde Transatlantiese Handels- en Beleggingsvennootskap (TTIP) daardeur gedoem is.

Die Duitse Minister van die Ekonomie, Sigmar Gabriel het gewaarsku dat die vryehandelsooreenkoms sal platval indien Amerika nie instem om Europese firmas toe te laat om vir staatskontrakte te bie nie.

Die VSA beplan egter nie om Europese bedrywe toe te laat nie, terwyl hulle self die reg opeis om dit in die EU te doen.

Inwoners van Hanover in Duitsland het die afgelope naweek teen die ooreenkoms betoog.

Minder as twintig persent van Duitsers is ten gunste van die ooreenkoms.

Obama probeer voorgee dat die ooreenkoms werksgeleenthede sal beskerm en ekonomiese groei sal stimuleer, iets wat hoogs onwaarskynlik is.

Die Britte is woedend nadat Obama ingemeng het oor die VK se vertrek uit die EU.

Obama is sterk gekant teen Brexit soos dit in die Britse media genoem ­word. Dit sal op 23 Junie tydens ‘n referendum besluit word.

Hy het die Britte gedreig in ‘n meningsartikel in die Daily Telegraph dat die VSA hul handels- en intelligensie-ooreenkomste met die VK sal heroorweeg as hulle dit waag op uit te stap.

Obama het met sy besoek Koningin Elisabeth II opgehemel en saam met prins William en sy vrou, Catherine, en prins Harry geëet. Die Windsors is ewe bekommerd oor Brexit.

Obama se meningstuk het sterk reaksie gekry van onder andere Boris Johnson, burgemeester van Londen, wat ten gunste van Brexit is.

Johnson het in ‘n artikel in The Sun gesantwoord dat Obama nog moet verduidelik hoekom hy die borsbeeld van Winston Churchill uit die Ovaalkantoor in die Withuis laat verwyder het.

Die uitgesproke Johnson het gesê Obama se bande met die MauMau het hom waarskynlik daartoe oorreed. Hy het beklemtoon dat die noue bande met Amerika nie sal verdwyn nie.

Die paniek oor ‘n moontlike Brexit is tasbaar by die Britse establishment en hulle het Johnson aangeval en van uiterste rassisme beskuldig omdat hy na Obama se Keniaanse verlede verwys het.

Meer as 100 Britse euroskeptiese wetgewers het ook ‘n ope brief aan Obama gerig om hom te versoek om nie betrokke te raak by die debat nie en duisende het ‘n petisie onderteken teen sy inmenging.

David Cameron, premier, wat in die EU wil bly en tans veg om sy politieke oorlewing, is ook deur Nigel Farage, leier van die United Kingdom Independence Party (Ukip) gekasty.

Farage wat teen die EU gekant is, het gesê Obama se inmenging is ongevraag.

‘Verregse’ party in Oostenryk blink uit

Die anti-immigrasie Vryheidsparty, oftewel die Freiheitliche Partei Österreichs (FPÖ) het behoorlik stof in die oë van hul teenstanders geskop in die eerste ronde van die presidensiële verkiesing in Oostenryk.

Media-histerie heers nadat Norbert Hofer van die “verregse” FPÖ 36 persent van die stemme ingepalm het, gevolg deur die Groen Party se Alexander Van der Bellen met ‘n amper 20 persent, en onafhanklike kandidaat Irmgard Griss met net meer as 18 persent.

Rudolf Hundstorfer van die Sosiale Demokrate (SPÖ) en Andreas Khol van die Volksparty (ÖVP) het in die vierde en vyfde onderskeidelik geëindig met net sowat 10 persent van die stemme onderskeidelik.

Steun vir die regerende sentriste was reeds aan die krimp oor die afgelope jaar. Hul daling in gewildheid is aangevuur deur kieserverwerping en politieke onsekerheid wat voorlê.

Die Vryheidsparty in skrille kontras, het met vrees vir massa-immigrasie en die voortdurende vlugtelingkrisis, aansienlike politieke aansien verkry van die Oostenrykse publiek.

Vir die eerste keer sedert 1945, sal Oostenryk nie ‘n president uit die SPO of ÖVP hê nie, want die twee regerende partye het selfs nie eers die nodige stemme behaal vir volgende maand se stemronde nie, het waarnemers gesê.

“Dit is die begin van ‘n nuwe politieke era,” het die FPÖ-leier Heinz-Christian Strache gesê.

“Ek is daarvan oortuig dat as president, sal Norbert Hofer as beskermer van die Oostenrykse volk optree,” sê Strache, soos aangehaal deur AFP.

Die FPÖ se toetrede tot die regering in 2000 onder sy voormalige partyleier, Jörg Haider, het skokgolwe deur die hele Europa gestuur.

Haider is onder vreemde omstandighede dood in 2008 in ‘n motorongeluk.

Hy is daarvan beskuldig dat hy Nazi-simpatiseerder was omdat hy vol lof vir die Derde Ryk se “ordelike werkgeleentheidsbeleid” was en ook verklaar het dat “die Waffen-SS deel was van die Wehrmacht” en daarom alle eer en erkenning verdien.

Cruz en Kasich teen ‘n oormag

Ted Cruz en John Kasich, twee potensiële Republikeinse presidentskandidate, lyk asof hulle die aftog sal moet blaas teen die voorloper Donald Trump.

Cruz, wat probeer het om afgevaardigdes outomaties te wen deur kiesers te verhoed om te gaan stem in sekere state, se plan het geboemerang.

Die twee wend nou ‘n laaste poging aan om die multimiljoenêr, Trump se optog te stuit om die party se kandidaat in die komende Amerikaanse presidentsverkiesing te word.

Cruz en Kasich het kort na mekaar verklarings uitgereik waarin hulle sê dat Cruz op Indiana sal fokus en Kasich op Oregon en Nieu-Meksiko.

Hulle hoop om só te keer dat Trump die steun van die Republikeinse 1237 afgevaardigdes kry.

Hy is reeds baie naby aan dié syfer en staan dus ‘n goeie kans om as presidensiële kandidaat aangewys te word.

Obama ontmoet topamptenare van Golfstate

Pres. Barack Obama het die week topamptenare van ses Arabiese nasies ontmoet om kwessies rakende vrede in die Persiese Golf-streek, insluitende die stryd teen die Islamitiese Staat-groep (ISIS), te bespreek.

Die vergaderings in Rijad moet glo voortbou op ’n ­soortgelyke spitsberaad wat verlede jaar by Camp David, die Amerikaanse president se vakansiewoning in Maryland, plaasgevind het.

Die VSA het voor hul besoek gedreig om beslag te lê op Saoedi-beleggings as hulle nie wil saamwerk nie.

Die byeenkomste in Rijad is ‘n aanduiding dat die Withuis skeptiese Midde-Oosterse bondgenote opnuut wil indwing in hul besluite.

Die Koninkryk het ‘n bemarkinsoffensief deur hul lobbies in die VSA en Brittanje geloods voor die ontmoeting.

Saud al-Faisal het aan die FT gesê dat ISIS hulle antwoord is op Iran.

Dié gesprekke kom nadat die Wahabi-koning daarvan beskuldig is dat sy land vir die terreuraanvalle van 9/11 verantwoordelik is. Saoedi-Arabië is ‘n bondgenoot van Israel sowel as Turkye.

Hierdie bondgenote het ernstige ­bedenkinge oor Obama se uitreiking na Iran en die Amerikaanse beleid oor die voortslepende burgeroorlog in Sirië, maar die VSA kan nie bekostig dat die gebeure rakende 9/11 verder onder die soeklig kom nie.

Met die aanvang van die verrigtinge in ’n weelderige vergadersaal in die Dirija-­paleis, het leiers oor koeitjies en kalfies gepraat, vir die kameras geglimlag, maar geen verklarings gemaak nie, het AP berig.

Die Amerikaanse minister van verdediging, Ash Carter, die minister van ­buitelandse sake, John Kerry, die nasionale veiligheidsraadgewer, Susan Rice en die direkteur van die CIA, John Brennan, het ook die vergadering bygewoon.

Die spitsberaad volg op bilaterale gesprekke wat Obama Woensdag met die Saoedi-kon­ing, Salman, gehad het kort nadat hy in die koninkryk aangekom het.

Benewens ­Saoedi-Arabië is die Verenigde Arabiese Emirate, Koeweit, Oman, Katar en Bahrein ook deel van die spitsberaad.

Die Golfstate is uiters skepties oor Obama se bereidwilligheid om met die magtige Sjiïtiese Iran te onderhandel.

Hulle vrees dat verlede jaar se kernooreenkoms met die Islamitiese Republiek tot ’n herbalansering van die magte in die streek, tot hul nadeel, kan lei.

Dit is nou reeds vier maande nadat die VSA belowe het om Iran se bevrore rekeninge oop te stel, maar nog nie stappe geneem het om hul onderneming na te kom nie.

Intussen het die VSA ook steun aan die Koerde verskaf in Sirië wat Wahabi-pogings om Assad uit die kussings te lig, verder bemoeilik.

Saoedi-Arabië, die Emirate en ander Golf-lande eis dat Amerika meer moet doen om die Siriese president, Basjar Assad, omver te werp. Die kanse is egter besonder skraal omdat Rusland Sirië steun.

Franse wil noodtoestand verleng

Die Franse regering wil die parlement vra om die ­noodtoestand wat ná die Parys-terreuraanvalle in November ­afgekondig is, te verleng.

Sodoende sal die noodtoestand ook die duur van die Euro 2016-­sokkertoernooi dek, het die eerste minister, Manuel Valls, die week gesê.

Hierdie maatreëls gee groter veiligheidsmagte aan die owerhede. Dit is reeds in Februarie met ’n verdere drie maande tot 26 Mei verleng.

Die Euro 2016-toernooi vind vanaf 10 Junie tot 10 Julie in Frankryk plaas.

Ingevolge die noodtoestand kan die minister van binnelandse sake enige persoon wie se gedrag beskou kan word as “’n bedreiging vir veiligheid en die openbare orde”, onder huisarres plaas en deursoekings van huise te eniger tyd gelas, sonder die betrokkenheid van die howe.

Sedert dit in November ingestel is, is meer as 3 500 deursoekings gedoen wat tot 400 in hegtenisnemings gelei het.

Swart spioen pryk eersdaags op Amerikaanse banknoot

Die Amerikaanse Tesourie het aangekondig dat die swart spioen, Harriet Tubman die eerste vrou in meer as ‘n eeu sal wees om op Amerikaanse banknote te verskyn.

Die onaansienlike bediende Tubman is in die 1820’s as ‘n slaaf gebore en het gedurende die Amerikaanse Burgeroorlog op die Suide gespioeneer.

Sy sal die oudpresident Andrew Jackson, wat ‘n slawe-eienaar was, voor op die 20-dollar-noot vervang.

Die Unie het haar betaal om die bewegings van die Konfederale troepe te verraai.

In 1863, het die swart bediende kolonel James Montgomery en sowat 150 swart soldate op ‘n kanonboot vergesel met die inval in Suid-Carolina.

Die Unie het die Konfederale rebelle verras en toe die slawe wat in die afgebrande plantasies geskuil het, besef die Unie kan hul vryheid waarborg, het hulle uit alle rigtings na die bote begin aanstorm.

“Ek het nog nooit so ‘n gesig gesien nie,” het Tubman daarvan gesê van die 700 siele.

Sy word tans voorgehou as een of ander swart militêre genie wat ‘n veldslag teen die “rassistiese” Suide gewen het.

Die sekretaris van die Tesourie, Jacob Lew sê Tubman is ‘n geskiedkundige leierfiguur wat haar eie lewe op die spel geplaas het om ander re red.

Tubman se onvleiende gesig is verfraai vir die noot.

Volgens Tubman self het sy soos ‘n “onkruid” opgekom as kind.

Die Tesourie het planne laat vaar om een van die stigters van die Amerikaanse finansiële stelsel, Alexander Hamilton van die 10-dollar-noot te verwyder.

Trump en Hillary lyk sterk na New York

New York het die week voorverkiesings gehou en vir Donald Trump het die staat ‘n ryk oes aan afgevaardigdes ingehou.

Trump, Bernie Sanders en Hillary Clinton het een ding in gemeen: Hulle is almal New Yorkers en het hul bande met Amerika se grootste stad op die vooraand van die voorverkiesing gesmous.

Die drie het probeer om hulself as ware plaaslike inwoners uit te beeld en “New York-waardes” te verdedig wat deurlopend deur die Republikeinse kandidaat van Texas, Ted Cruz, verwerp is.

Trump het Cruz egter verneder by die stembus en Republikeinse party-amptenare het Woensdag, ‘n dag na Donald Trump se verpletterende oorwinning vergader om sy groeiende aanvaarding binne hul geledere te bespreek.

Hy het beide sy teenstanders Ted Cruz en John Kasich geklop en sodoende nader aan die 1237 afgevaardigdes gekom wat nodig is om die nominasie met ‘n volstrekte meerderheid te wen sonder ‘n betwiste konvensie.

Van die drie New Yorkers het Trump die beste gevaar. Hy en Hillary is nou die voorlopers.

Trump is die seun van ’n ryk ontwikkelaar en ’n Skotse immigrante-moeder. Die 69-jarige miljardêr het in ’n 23-vertrek weelde- woning met nege badkamers in ’n welvarende deel van Queens grootgeword.

Benewens sy eiendomsbelange het Trump vir tien jaar die realiteits­program, The Apprentice op TV aangebied wat hom na sitkamers oral in Amerika geneem het.

Bernie Sanders het op sy beurt gesê hy is baie trots daarop om ’n boorling van New York te wees, maar alhoewel Sanders die oorgrote meerderheid van die staat New York ingepalm het, het Clinton met die digbevolkte stedelike gebiede, veral in New York stad vir Bernie uitgestof.

Sy pa, ’n Poolse Jood, het sonder ’n sent op sy naam op die ouderdom van 17 jaar in Amerika aangekom. Sanders is in Brooklyn gebore en het in ’n nederige woonstel grootgeword en staatskole bygewoon.

Die 74-jarige het ’n politieke vergadering voor sy kindertuiste toegespreek en op Coney-eiland aan ’n worsbroodjie gesmul, maar vir die deftige kiesers in NYC was dit nie ‘n teken om vir hom te stem nie.

Amerika se voormalige presidentsgade, Clinton, is in Chicago gebore en het vanaf 2001 tot 2009 as senator vir New York gedien.

Sy besit ’n huis in Chappaqua, ongeveer ’n uur se reis noord van New York, wat sy in 1999 gekoop het om haar geregtig te maak om as kandidaat vir die senaat te staan.

“Ons het sy [Bernie Sanders] se gat geskop vanaand,” het ‘n Clinton-medewerker aan Politico gesê.

“Ek hoop dit oortuig Bernie om op te hou. Indien nie, fok hom!”

Clinton het met sowat 58 persent van die stemme teen Sanders se 42 persent gewen.

UV weier om name bekend te maak van studente wat aangekla word

Studente aan die Universiteit van die Vrystaat (UV) wat vandeesweek kennisgewings ontvang het om voor ‘n dissiplinêre komitee te verskyn oor rassekonflik, sal nie geskors word hangende die verhore nie.

Die universiteit wil egter nie die name bekend maak van diegene wat kennisgewings ontvang het om te verskyn nie.

Hulle is aangekla weens hul beweerde betrokkenheid by die Shimlapark-bakleiery vroeër vanjaar, maar sal nie geskors word nie.

In ‘n verklaring het die UV se woordvoerder, Lacea Loader, erken dat dissiplinêre stappe teen ‘n aantal studente geneem word wat betrokke was by die voorval waarin ‘n Varsitybekerwedstryd tussen die Shimlas en Madibaz onderbreek is.

‘n Groep betogers het op die rugbyveld gestorm waarna wit toeskouers op die veld gehardloop het en die betogers van die veld verjaag het.

Loader sê studente wat onder die toeskouers was wat betogers op die veld aangerand het asook die betogers wat betrokke was by dade van vandalisme en ander wangedrag tydens die onrus van 22 Februarie tot 26 Februarie op die Bloemfontein-kampus het kennisgewings ontvang.

Sy sê die UV het ‘n verantwoordelikheid om dissiplinêr op te tree.

Diegene wat aangekla word is versoek om môre ‘n vergadering by te woon om reëlings te tref met betrekking tot die verhore.

Japan lamgelê deur twee aardbewings

Die twee aardbewings wat dele van die suide van Japan lamgelê het, se invloed word veel verder as die middelpunt van die rampgebied gevoel.

Alhoewel dit nie so erg was soos die verwoesting van die 2011-aardbewering en die tsunami nie, word vervaardiging direk geraak.

Motorvervaardigers veral, het sedertdien lesse oor ontwrigtings in die verskaffingsketting geleer.

Toyota Motor Corp, die motorvervaardiger wat die swaarste getref is, het produksie by sy fabriek in Kyushu gestaak, waar die aardbewings laat Donderdag en vroeg Saterdag plaasgevind het.

Tot dusver is 42 mense dood en byna 1 100 beseer. Honda Motor Corp het produksie by sy motorfietsfabriek in Kumamoto, die grootste stad wat deur die aardbewing geraak is, gestaak.

Díe fabriek is ernstig in die aardbewing beskadig en vanweë naskokke was dit onveilig om die gebou binne te gaan en die omvang van die skade te inspekteer.

Dodetal in Ekwador-aardbewing styg

Die dodetal in die aardbewing in Ekwador in Suid-Amerika is opnuut opwaarts aangepas nadat dit intussen weer skerp gestyg het, het RSG berig.

Berigte is ontvang van bevestiging deur Ekwador se president, Rafael Correa dat die dodetal nou op 272 staan.

Die skudding het 7,8 op die Richterskaal gemeet, sowat 160km van die hoofstad Quito.

Reddingswerkers en troepe soek steeds na moontlike oorlewendes van eergister se aardbewing waarin meer as 2500 mense beseer is.

Tienduisend soldate en 3500 polisielede is ontplooi te midde van die omvanryke skade.

Brûe het meegegee en woonstelgeboue het onder andere ingetuimel.

Die adjunkpresident, Jorge Glas het bevestig dat internasionale hulp aangebied is.