James Bond, oftewel die akteur Sean Connery, gaan vandag stem vir ‘n onafhanklike Skotland.
Die geskiedkundige referendum se meningspeilings toon daar is effens meer steun vir onafhankliheid van die Verenigde Koninkryk.
Die Engelse is erg onthuts oor dié verwikkeling wat hulle onkant gevang het omdat hulle gemeen het dat die media die uitslag in hul guns kan swaai. Behalwe ‘n klein streekskoerantjie, het die vryheidsgesinde Skotte geen media nie.
Leiers en ondersteuners van die Britse eenheidstaat is Dinsdag vir oulaas strate toe in ’n laaste koorsige poging om stemme te werf in ’n land stewig in die greep van opwinding en hoop verkeer.
Kiesers moet vandag slegs ja of nee antwoord op die vraag: “Moet Skotland ’n onafhanklike land wees?”
’n Ja-stem sal die einde beteken van die 307 jaar oue unie met Engeland en die opbreek van die Verenigde Koninkryk, sowel as ekonomiese onsekerheid.
Sowat 8% tot 14% van Skotland se 4,3 miljoen kiesers het gister nog getwyfel.
Desperate Britse politieke leiers het groter outonomiteit vir Skotland beloof as mense sou kies om verenig te bly. Ondersteuners van onafhanklikheid sê egter dis tyd vir Skotland om sy eie leiers te kies en self besluite te neem, vry van onderdrukking uit Londen.
Premier Alex Salmond, leier van die ja-veldtog en die Skotse Nasionale Party, het die Skotte aangevuur: “Kom ons word môre (Vrydag) wakker op die eerste dag van ’n beter land.”
In ’n ope brief het Salmond gesê Skotland se toekoms is in sy hande. Hy het hom beroep op die 18de eeuse ekonoom Adam Smith en Skotland se bekendste digter, Robert Burns: “Moenie hierdie geleentheid deur ons vingers laat glip nie. Moenie dat hulle vir ons sê ons kan nie. Kom ons dóén dit.”
Die Britse premier, David Cameron, het gesê die land is ’n demokrasie en die wil van die mense by die stembus sal gerespekteer word, maar die Skotte kan ongetwyfeld bly reken op Engelse lis.
Die Australiese regering het aangekondig dat hy onmiddellik nog geldelike hulp van sowat R60 miljoen gaan stuur vir die internasionale aksieprogram om die ebola-epidemie in Wes-Afrika te stuit.
Australië het voorheen R10 miljoen geskenk.
Julie Bishop, die minister van buitelandse sake, het Woensdag in ‘n verklaring gesê die geld sluit die R20 miljoen in wat Brittanje versoek het om mediese dienste in Sierre Leone te verskaf.
President Barack Obama het Dinsdag aangekondig dat die VSA troepe teen die ebola-virus in Wes-Afrika sal ontplooi.
Om die epidemie te stuit sal 3 000 Amerikaanse weermagpersoneel soontoe gestuur word om ‘n gesondheidsprogram te begin.
Dit sal ‘n gedwonge inentingsveldtog insluit met middels wat glo nog nie voorheen getoets is nie.
UNMIL, die VN se militêre ontplooiing na Liberië is in 2003 op die been gebring om ‘n skietstilstandooreenkoms te versterk na ‘n burgeroorlog wat byna 150,000 Liberiërs – meestal burgerlikes – uitgewis het en nog 850 000 gedwing het om te vlug na naburige lande.
Die missie hou tans 4619 militêre personeel in Liberië. Die Veiligheidsraad het pas ingestem om die sending te verleng tot Desember deser.
Obama gaan na Atlanta reis waar hy die Amerikaanse gesondheidshoofde sal ontmoet. Dit is deel van ‘n wêreldpoging om die epidemie, wat reeds 2 400 lewens geëis het, die hoof te bied.
Dit word beskou as die ergste ebola-epidemie nóg en dit het reeds versprei deur Liberië, Sierra Leon, Nigerië en die Demokratiese Republiek van Kongo.
Die Amerikaanse hulp sal hoofsaaklik gefokus word op Liberië, wat sover die ergste getref is.
Die Verenigde Nasies het Woensdag gesê dat byna $1 miljard vir ‘n uitsonderlike, internasionale reaksie op die ebola-epidemie in Wes-Afrika nodig is.
Die Sekretaris-generaal Ban Ki-moon het verklaar: “Elke dag wat ons terughou, sal die koste en die lyding eksponensieel groei.”
“Dit is nie net ‘n gesondheidskrisis nie, maar dit het ernstige humanitêre, ekonomiese en maatskaplike gevolge wat ver buite die betrokke lande kan versprei,” het die sekretaris-generaal gesê op ‘n perskonferensie by die VN se hoofkwartier.
President Jacob Zuma het vroeër die sterftes bevestig van die 67 Suid-Afrikaners wat dood is in die ineenstorting van ‘n kerkgebou in Lagos, Nigerië, en sy meegevoel betuig met die gesinne.
Minstens vier Suid-Afrikaanse toergroepe het pastoor TB Joshua se Kerk besoek. Die President het steun beloof aan diegene wat geraak word en sê hulp sal verleen word met die uitkenning en herwinning van liggame.
Daar word egter vermoed dat die dodetal veel hoër is as die amptelike syfer omdat geen joernaliste naby die ramptoneel toegelaat word nie.
Die kerk gebruik glo sy eie reddingswerkers en die gebied is vir die publiek afgesper.
TB Joshua se bewerings van ‘n vreemde vliegtuig wat kort voor die ineenstorting van die gebou vier keer laag oor die gebou gevlieg is glo volgens veiligheidskenners ‘n foefie om die blaam vir die tragedie op Islamitiese Boko Haram te plaas.
Die land gaan reeds dekades lank gebuk onder godsdiensgeweld wat vir politieke doelwitte aangewend word.
Die “Profeet” beskik oor aansienlike politieke invloed in Afrika met presidente en premiers wat sy raad en aanbevelings as navolgingswaardig beskou.
Geboue wat ineenstort is ‘n alledaagse verskynsel in Nigerië. Die oorspronklike gastehuis, wat uit vier verdiepings bestaan het, het onlangs nog twee verdiepings bygekry, maar vermoedelik was die onderste struktuur nie sterk genoeg daarvoor nie.
Bouregulasies wat sogenaamd “nagekom word” in Nigerië se korrupsienes behels ‘n sertifikaat waarop staan “Hierdie gebou is veilig”. Dit word glo in die meeste gevalle bloot gekoop.
Die “heldersiende profeet” kan blykbaar ongelukkig nog nie betonsterkte verbeter nie. Joshua het onlangs beweer dat hy selfs slagoffers wat met die Ebola-virus besmet is, met soutwater kan genees.
“Moeilike tye kan my toets, kan hulle my nie vernietig nie,” het Joshua Dinsdag getwiet en op Facebook het hy 2 Kronieke 12:5-8 aangehaal: “God het die vyand toegelaat om Israel te oorwin sodat hulle kon besef hoe om God te dien verskil van hoe om die duiwel te dien. As dit nie vir ons moeilike tye was nie, sou ons nie die aangesig van God gesoek het nie. Ek bedoel, as dit nie vir ons moeilike tye was nie, sou die mens uit sy bose natuur nie die aangesig van God gesoek het nie. Dit beteken God gebruik soms moeilike tye om ons na Homself te trek sodat ons ons regte posisie en besitting in Hom kan inneem.”
Reddingswerkers kla dat “Die Sinagoge”, soos die kerk bekendstaan, hulle werk bemoeilik deur geen samewerking te gee nie.
Ten minste vyf Suid-Afrikaanse kerk toergroepe was by Die Sinagoge ten tye van die ineenstorting, volgens Suid-Afrikaanse amptenare.
Ek haat Engeland. Ek hou van Skotland want op ‘n manier dink ek dat hulle beter as ons is – Vivienne Westwood, Engelse modeontwerpster
Met slegs twee dae oor voordat inwoners van Skotland in ‘n referendum stem of hoe hulle van Brittanje wil afstig, poog die Britte angsvallig om die Skotte as deel van die unie te behou. In Suid-Afrika word die referendum, met sy ooglopende tersaaklikheid vir die posisie van die Afrikanerminderheid, egter grootliks geïgnoreer, veral deur die Naspersmedia.
Sondag het ‘n niksseggende artikel in Rapport verskyn waarin die skrywer darem Afrikaners by die Skotse referendum betrek, maar dan kategories verklaar:
Die relatief swak politieke posisie van selfbeskikkingsbewegings in Suid-Afrika is egter ’n weerspieëling van die land se sukses in die skepping van ’n inklusiewe bedeling waaraan die meeste mense steeds voel dat hulle ’n aandeel het.
Daarvoor is ons Nelson Mandela en Kie. steeds dank verskuldig.
Terwyl Afrikaners glad nie gelyk teenoor Engelse of swartes in Suid-Afrika behandel word nie, word daar kwalik teen Skotte binne die Britse stelsel gediskrimineer. Nogtans wil ten minste die helfte van Skotte van Engeland en die res van Brittanje afstig.
Beeld, nog ‘n Naspersorgaan, gee geen van die stortvloed menings deur skrywers, joernaliste, popsangers en modeontwerpers (Vivienne Westwood het haar so pas by die “ja”-kamp gevoeg) weer nie, maar voel genoop om die koningin van Engeland se uitspraak weer te gee. Soos Naspers se tydskrif, Die Huisgenoot, speel die Britse koningsgesin ‘n vername rol in die Beeld-bewussyn.
Beeld skryf:
Koningin Elizabeth II (88) het luidens berigte Sondag ná ’n kerkdiens naby haar Balmoral-landgoed in Skotland aan ’n omstander gesê: “Ek hoop die mense dink mooi voordat hulle die besluit oor die toekoms neem.”
Intussen raak die Britse politici so desperaat om die Skotse kiesers te paai dat al drie die vernaamste politieke leiers, David Cameron van die Konserwatiewes, Nigel Farrage van UKIP en Ed Milliband van die Arbeiders ‘n grootskaalse devolusie van magte aan Skotland belowe het indien hul “nee” sou stem en nogtans in die Britse unie aanbly.
Die Financial Times, wat gewoonlik ‘n sogenaamde “betaalmuur” op sy webblad handhaaf, het alle artikels oor die Skotse referendum vir die publiek oopgestel. Hoewel die koerant, soos die oorgrootte meerderheid Britse media, die “nee”-stem teen onafhanklikheid ondersteun, berig hy nogtans vandag oor ‘n groep Noorse skrywers, waaronder Jostein Gaarder (skrywer van Sophie se wêreld), wat sê:
“Ons bied ons ondersteuning vir Skotse aspirasies na onafhanklikheid en wil graag uitwys dat Noorweë se onafhanklikheid van Swede in 1905 tot die voordeel en verryking van beide lande se politieke kultuur gestrek het.”
Vivienne Westwood, die Engelse ontwerpster het haar steun insgelyks onomwonde aan die “ja”-kamp toegesê deur te verklaar: “Ek haat Engeland. Ek hou van Skotland want op ‘n manier dink ek dat hulle beter as ons is. Hulle is meer demokraties.” Sy het ook gesê dat “die probleem van demokrasie is dat dit ‘n tirannie van die meerderheid is”. Sy het mense wat “nee” teen Skotse onafhanklikheid stem as “dom en bang” beskryf en haar uitgespreek teen die Britse regering “wat die geld van die mense wegneem en dit aan die banke gee”.
Tydens gister se algemene verkiesing in Swede het geen party besonder goed gevaar nie, behalwe die patriotiese Sweedse Demokrate wat sy steun meer as verdubbel het, vanaf 4,8% tot 12,9%.
‘n Regeringskoalisie van die Sosiale Demokrate onder Stefan Lofven en Linkse Party (voormalige Kommunisteparty) sal waarskynlik die land voortaan regeer nadat die sentrum-regse koalisie aan steun ingeboet het. Tesame met die Groenparty, beskik die linkse koalisie egter oor slegs 43,7% van die stemme.
Die sentrum-regse blok sou gemaklik kon regeer met die hulp van die Sweedse Demokrate, maar soos in Vlaandere waar sowel linkse as regse partye weier om met die Vlaams Blok saam te werk, poog Swede om ‘n “cordon sanitaire” rondom die Sweedse Demokrate te trek.
Die ‘regse gevaar’: Jimmie Åkesson, leier van die Sweedse Demokrate
Die Sweedse Demokrate se standpunt teen verdere immigrasie uit die derde wêreld is in die linkse Sweedse media só omstrede dat die party allerweë as “verregs” afgemaak word. Die meeste hoofstroomkoerante in Swede word deur twee ryk (Joodse) families beheer, die Bonniers en Peter Hjörne (Kaplan), eienaar en hoofredakteur van die Göteborgs-Posten, die vierde grootste koerant in Swede met ‘n sirkulasie van 253 700 en 600 000 lesers. Dit verklaar ook waarom Swede in die sewentigerjare opgesweep is om terreur in Suid-Afrika geldelik vanuit die land se parlement te ondersteun.
Gister se verkiesing is meesal gevoer rondom die hoë werkloosheid in die land (8%), asook enkele skandale rondom geprivatiseerde skole waaruit sakeondernemings nou geld maak terwyl standaarde daal. ‘n Opname van die Organisasie vir Ekonomiese Samewerking en Ontwikkeling (OESO), wat ontwikkelde lande verteenwoordig, het getoon dat Swede se skoolstandaarde vergeleke met dié van ander lande gedaal het, wat vir die publiek as ‘n groot skok gekom het. Daarom word gevoel dat die staat weer volle beheer oor skole onder die Sosiaal-Demokrate behoort te neem.
Stefan Lofven, leier van die Sosiaal-Demokrate, het reeds gesê dat hy nie sal toelaat dat die Sweedse Demokrate as “koningmaker” tussen Links en Regs optree nie. Maar die leier van die Sweedse Demokrate, Jimmie Åkesson, meen dat die parlement nie sonder sy party se 49 LP’s sal kan funksioneer nie, aangesien hulle nou die derde grootste party in die land is, ná die Sosiaal-Demokrate en die Gematigdes.
Nadat al 5 837 kiesdistrikte, op twee na, gisteraand getel is, het die linkse koalisie oor slegs 158 setels beskik, terwyl 175 vir ‘n meerderheid nodig is. Daarteenoor het die sentrum-regse koalisie (sonder die Sweedse Demokrate) 142 setels behaal. Indien die SD hom dus by die Sweedse Demokrate sou voeg, sou die sentrum-regse koalisie kon aanhou regeer. Daar was gisteraand groot vreugde by die party se viering na afloop van die verkiesing in die middestad van Stockholm.
Interessant is ook dat ‘n derde van die Gematigde Party se kiesers voel dat daar met die Sweedse Demokrate saamgewerk moet word, anders as wat die hoofstroommedia en die linkse partye wil hê.
Dit was die juis Gematigdes endie Sosiaal-Demokratewat die meestekiesersaan dieSweedse Demokrate afgestaan het.29persent van diegene wat vanjaar vir die Sweedse Demokrategestem het,het indie verkiesingvan 2010 vir die Gematigdes gestem.
Net so het 16 persent of een uit ses van die Sweedse Demokrate se kiesers in die vorige verkiesing vir die linkse Sosiaal-Demokrate gestem, wat toon dat die party kiesers vanuit die linkse én die regse deel van die politieke spektrum trek, soortgelyk aan Marine Le Pen se Front National in Frankryk.
Vandie anderpartyehet net‘n paar persentvan die SweedseDemokratiesekiesersinvanjaar severkiesing bygedra. Die Liberale Partyhet vyf persent bygedra en die Christen-Demokratedrie persent. Die Linkse Party,die SentrumpartyendieGroenParty het twee persent bygedra.
Volgens meningspeilings is dit nie duidelik waarom kiesers in Swede van party verander nie. Blykbaar raak die kiesers meer beweeglik en besluit self vir wie om te stem. Een uit elke drie kiesers besluit in die laaste week van die verkiesing vir wie hulle gaan stem.
In die konserwatiewe kamp het Reinfeldt, die leier van die Gematigde Party, 63 persent van sy vorige kiesers behou. Agt persent van die party se kiesers het na die Sweedse Demokrate oorgeloop en dieselfde persentasie na die Sosiaal-Demokrate. 17 persent het vir ander partye in die alliansie gestem.
Die eertydse Australiese gholfkampioen Greg Norman is in die hospitaal nadat hy Saterdag amper sy hand met ‘n kettingsaag afgesny het.
Die voormalige Australiese nommer een-speler het ‘n foto van homself op Instagram geplaas waar hy in ‘n hospitaalbed lê met ‘n verbinde arm.
By sy foto het hy geskryf: “As ‘n mens met ‘n kettinsaag werk, moet jy altyd waaksaam wees. Ek was ‘n gelukkige man. Beseer, maar nog nie plat geslaan nie. Ek het darem nog my linkerhand.”
Ironies genoeg het Norman die vorige week ‘n foto van homself geplaas waar hy ‘n boom met die kettingsaag takel.
Norman het twee Britse Ope-kampioenskappe verower en was die wêreld se nommer een -speler vir 331 weke in die jare tagtig en negentig.
Amptenare van die Suid-Afrikaanse ambassade in Lagos in Nigerië fynkam hospitale in die hoofstad op soek na Suid-Afrikaners.
Hulle kan moontlik slagoffers wees van ‘n gastehuis wat by ‘n kerk, die Synagogue Church of All Nations, SCOAN ineengestort het. Die dodetal staan op 41.
Die gastehuis was glo besig om aanbouings te doen om nog verdiepings by die gebou te voeg. Meer as 130 beseerdes is reeds lewend uit die puin gered.
Die gebou huisves meestal buitelanders wat vanoor reg die wêreld kom om die omstrede pastoor en politieke prediker, T.B. Joshua te sien. Dit is onduidelik wat tot die ongeluk gelei het.
Die “Profeet” soos Joshua homself noem, sê ‘n klein vliegtuig het vier keer bo die gebou gedraai wat dalk ‘n aanduiding mag wees dat iemand hom wou dood hê, want vyf minute later het die struktuur meegegee sê hy.
Hy het omstanders aangemoedig om te getuig.
Die Departement van Internasionale Betrekkinge het bevestig dat die Suid-Afrikaanse Hoëkommissariaat in Nigerië in samewerking met die owerheid in Abuja probeer vasstel of daar enige Suid-Afrikaners beseer is in die ineenstorting.
EFF-leier, Julius Malema het Joshua, Nigerië se voorste charismatiese geneser en vyfde rykste pastoor in die land, ook vroeër besoek.
Winnie Madikizela-Mandela het in ‘n onderhoud in 2011 op Josua se televisiekanaal, Emmanuel TV, ná haar besoek aan SCOAN sy kerk geprys.
Ander besoekers sluit Zimbabwe se voormalige eerste minister Morgan Tsvangirai, Malawi se president Joyce Banda, koning Goodwill Zwelithini, en rugbyspeler Jaco van der Westhuizen in.
Nigeriese owerhede het bewerings verwerp dat die noodlottige ineenstorting van ‘n gastehuis in Lagos verbind kan word met verdagte vliegtuie.
Joshua, het intussen beeldmateriaal van die oomblikke voor die ineenstorting op sy TV-netwerk vertoon. Die polisie en reddingswerkers in die land sê die vliegtuie op die beeldmateriaal is duidelik daar omdat die gastehuis naby die lughawe geleë is.
Die Australiese regering het Vrydag sy terreur-waarskynlikheidsvlak na “hoog” opgeskuif, het premier Tony Abbott in ‘n verklaring bekend gemaak.
Die rede vir die besluit is die toenemende aantal Australiërs wat bande het met of geïnspireer word deur terreurgroepe, waaronder die Islamitiese Staat.
“Die besluit is nie gegrond op kennis van ‘n spesifieke aanvalsplan nie, maar eerder op ‘n klomp bewyse wat daarop dui dat Australië wel deur terroriste-aanvalle bedreig kan word,” lui die verklaring.
‘n Kragtige ontploffing is kilometers ver gehoor toe ‘n chemiese aanleg naby Bremen ontplof het, in die noorde van Duitsland. Ten minste een persoon is na wat berig word beseer, terwyl die aanleg se geboue “ernstige skade” gely het, het nooddienste gesê.
Meer as 300 brandbestryders het na die ontploffing en massiewe brand gehaas by die Bergolin-maatskappy in Ritterhude, ‘n stad noord van Bremen met ‘n bevolking van 15,000. Die aanleg produseer hoofsaaklik industriële bedekkings.
‘n Woordvoerder vir die plaaslike polisie-afdeling het aan die Bild-koerant gesê die ontploffing kon kilometers ver gehoor word. Verskeie geboue was aan die brand en ‘n fabriekswerknemer is as vermis aangemeld by die toneel van die ongeluk.
“Ons het tot dusver net sy motor ontdek,” het die polisiewoordvoerder Mark Neumann gesê. Plaaslike owerhede sê dat ten minste een persoon ernstig beseer is, maar hulle kon nie sê of dit die vermiste werknemer is nie.
Die polisie het gesê dat teen ongeveer middernag plaaslike tyd, was die vuur grootliks onder beheer gebring, het Spiegel berig.
Verskeie omliggende huise is erg beskadig deur die ontploffing, met ‘n paar in gevaar van ineenstorting, het ‘n woordvoerder van die polisie gesê. Plaaslike inwoners is gevra om binnenshuis te bly na swart rookkolomme in die lug ná die voorval in die lug gesien is.
Owerhede het 60 polisiebeamptes in die gebied ontplooi. Die spoorlyn tussen Bremen en Bremerhaven is aanvanklik ná die ongeluk gesluit.
Die lughawe naby Donetsk in die ooste van die Oekraïne wat deur die selfverdedigingsmagte beset is, is Maandagaand deur vuurpyle bestook, het die Oekraïnse weermag bekend gemaak.
Die lughawe is in Mei reeds ernstig beskadig in swaar gevegte. Maandagaand is dit vier keer deur mortiere en vuurpyle getref. Niemand is in die aanvalle beseer nie.
Dis een van talle verbrekings van die wankelrige skietstilstand wat Vrydag tussen die Kiëf-regering en selfverdedigingsmagte ná vyf maande se konflik onderteken is.
Die skietstilstand is in Minsk onderteken voor die NAVO-beraad in Wallis ten einde geloop het, nadat die Russiese president Wladimir Poetin ‘n vredesplan aangekondig het.
Dié vredesplan het die oorlogskoors wat NAVO teen Rusland in die Oekraïne stook gedemp, maar ontleders meen Kiëf sal ongelukkig aanhou om die skietstilstand te breek om die vredesplan te probeer kelder.
Indien die konflik aanhou, is die kanse dat NAVO sal toetree groter, sê hulle.
